𑐱𑐵𑐎𑑂𑐫𑐰𑑄𑐱 𑐰 𑐱𑐵𑐎𑑂𑐫 𑐩𑐴𑐵𑐰𑐶𑐴𑐵𑐬𑐫𑐵 𑐂𑐟𑐶𑐴𑐵𑐳 𑐳𑐦𑐹

𑐱𑐵𑐎𑑂𑐫 𑐩𑐴𑐵𑐰𑐶𑐴𑐵𑐬 𑐳𑑄𑐑𑐫𑐵 𑐐𑑂𑐰𑐳𑐵𑐮𑐫𑑂 𑐱𑐣𑐶𑐰𑐵𑑅 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 ‘𑐱𑐵𑐎𑑂𑐫𑐰𑑄𑐱 𑐰 𑐗𑐶𑐐𑐹 𑐱𑐵𑐎𑑂𑐫 𑐩𑐴𑐵𑐰𑐶𑐴𑐵𑐬𑐫𑐵 𑐳𑑄𑐎𑑂𑐲𑐶𑐥𑑂𑐟 𑐂𑐟𑐶𑐴𑐵𑐳’ 𑐳𑐦𑐹𑐫𑐵 𑐥𑐶𑐟𑐧𑑂𑐰𑐖𑑂𑐫𑐵 𑐫𑐵𑑅𑐐𑐸 𑐡𑐸 𑑋 𑐄𑐐𑐸 𑐴𑐾 𑐖𑑂𑐫𑐵𑐗𑑂𑐰𑐮𑐫𑑂 𑐗𑐶𑐐𑐹 𑐩𑐴𑐵𑐰𑐶𑐴𑐵𑐬𑐫𑐵 𑐡𑐎𑐮𑐫𑑂 𑐠𑐎𑐵𑐮𑐶𑐩𑑂𑐴 𑐰𑐶𑐎𑐩𑐵𑑅 𑐧𑐴𑐵𑑅𑐫𑐵 𑐱𑑂𑐬𑐡𑑂𑐢𑐾𑐫 𑐩𑑀𑐟𑐶𑐬𑐟𑑂𑐣 𑐱𑐵𑐎𑑂𑐫𑐵𑐟 𑐩𑐴𑐵𑐳𑑂𑐠𑐰𑐶𑐬 𑐥𑐡𑑄 𑐰𑐶𑐨𑐹𑐲𑐶𑐟 𑐫𑐵𑑅𑐐𑐸 𑐏𑑅 𑑋

𑐳𑑄𑐑𑐫𑐵 𑐣𑐵𑐫𑑅 𑐱𑐸𑐨𑐎𑐵𑐖𑐷 𑐱𑐵𑐎𑑂𑐫𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑑅𑐫𑐵 𑐄𑐮𑐾𑐖𑑂𑐫𑐵 𑐥𑐵𑐴𑐵𑑄𑐥𑐶𑑄𑐥𑐵𑐏𑐾𑑄 𑐧𑑀𑐢𑐶 𑐩𑐟 𑐔𑑂𑐫𑐵𑐎𑐵𑑅 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐳𑑄𑐑 𑐣𑐵𑐫𑑅𑐮𑐶𑐳𑐾𑑄 𑐣𑐾𑐥𑐵𑐮 𑐳𑑄𑐰𑐟𑑂 𑐣𑑂𑐴𑐹𑐡𑑃 𑐳𑐩𑐵𑐬𑑀𑐴 𑐳𑐩𑐶𑐟𑐶𑐫𑐵 𑐣𑐵𑐫𑑅, 𑐧𑑁𑐡𑑂𑐢 𑐰𑐶𑐡𑑂𑐰𑐵𑐣 𑐥𑑂𑐬𑐵. 𑐜𑐵. 𑐣𑐬𑐾𑐱𑐩𑐵𑐣 𑐰𑐖𑑂𑐬𑐵𑐔𑐵𑐬𑑂𑐫, 𑐥𑐸𑐮𑐵𑑄𑐩𑑂𑐴 𑐩𑐣𑑂𑐟𑑂𑐬𑐷 𑐜𑐵. 𑐎𑐾𑐱𑐰𑐩𑐵𑐣 𑐱𑐵𑐎𑑂𑐫, 𑐥𑐸𑐮𑐩𑑂𑐴 𑐧𑐵𑐐𑐩𑐟𑐶 𑐥𑑂𑐬𑐡𑐾𑐱 𑐳𑐵𑑄𑐳𑐡 𑐱𑑀𑐨𑐵 𑐱𑐵𑐎𑑂𑐫 𑐰 𑐬𑑀𑐱𑐣 𑐱𑐵𑐎𑑂𑐫𑑄 𑐩𑑄𑐎𑐵𑑅𑐎𑐠𑑄 𑐳𑐦𑐹𑐫𑐵 𑐥𑐶𑐟𑐧𑑂𑐰𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐥𑐸𑐮𑐵𑑄𑐩𑑂𑐴 𑐩𑐣𑑂𑐟𑑂𑐬𑐷 𑐜𑐵. 𑐱𑐵𑐎𑑂𑐫𑑄 𑐱𑐵𑐎𑑂𑐫𑐟𑐫𑑂 𑐂𑐟𑐶𑐴𑐵𑐳𑐫𑐵 𑐠𑐷𑐠𑐷 𑐥𑐎𑑂𑐲𑐫𑐵𑐟 𑐎𑐫𑐵𑑅 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅𑐳𑐵 𑐣𑑂𑐴𑐹𑐡𑑃 𑐳𑐩𑐵𑐬𑑀𑐴 𑐳𑐩𑐶𑐟𑐶𑐫𑐵 𑐣𑐵𑐫𑑅𑐮𑐶𑐳𑐾𑑄 𑐧𑑁𑐡𑑂𑐢 𑐰𑐶𑐡𑑂𑐰𑐵𑐣 𑐥𑑂𑐬𑐵. 𑐜𑐵. 𑐰𑐖𑑂𑐬𑐵𑐔𑐵𑐬𑑂𑐫𑑄 𑐣𑐾𑐰𑐵𑑅 𑐳𑐩𑐵𑐖𑐫𑑂 𑐱𑐵𑐎𑑂𑐫𑐟𑐫𑑂 𑐰𑐶𑐱𑐾𑐲𑐟𑐵, 𑐂𑐟𑐶𑐴𑐵𑐳𑐮𑐶𑐳𑐾𑑄 𑐣𑐾𑐰𑐵𑑅𑐟𑐫𑑂𑐳𑑄 𑐴𑐣𑐷𑐐𑐸 𑐣𑐏𑑅𑐔𑐏𑑅𑐫𑐵 𑐩𑑁𑐮𑐶𑐎𑐟𑐵 𑐰 𑐄𑐎𑐶𑐫𑐵 𑐥𑐡𑑂𑐡𑐟𑐶𑐫𑐵𑐟 𑐎𑐫𑐵𑑅 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐥𑐸𑐮𑐵𑑄𑐩𑑂𑐴 𑐥𑑂𑐬𑐡𑐾𑐱 𑐳𑐵𑑄𑐳𑐡 𑐱𑐵𑐎𑑂𑐫𑑄 𑐣𑑄 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋

𑐳𑑄𑐑𑐫𑐵 𑐩𑐹𑐕𑑂𑐫𑐵𑐘𑑂𑐖𑐾 𑐳𑑄𑐑𑐬𑐟𑑂𑐣 𑐱𑐵𑐎𑑂𑐫𑑄 𑐔𑑂𑐰𑐫𑐵𑑅 𑐠𑐩𑑂𑐴𑑄 𑐳𑐩𑑂𑐥𑐡𑐵𑐣 𑐫𑐵𑐣𑐵𑐡𑐷𑐐𑐸 𑐳𑐦𑐹𑐫𑐵 𑐥𑑂𑐬𑐵. 𑐟𑐷𑐬𑑂𑐠𑐬𑐟𑑂𑐣 𑐱𑐵𑐎𑑂𑐫𑑄 𑐳𑐩𑐷𑐎𑑂𑐲𑐵 𑐫𑐵𑐣𑐵𑐡𑐷𑐐𑐸 𑐏𑑅𑐳𑐵 𑐔𑑂𑐰𑐩𑐶 𑐱𑐵𑐎𑑂𑐫𑑄 𑐳𑐦𑐹𑐫𑐵 𑐠𑐷𑐠𑐷 𑐥𑐎𑑂𑐲𑐫𑐵𑐟 𑐎𑐫𑐵𑑅 𑐠𑑅𑐐𑐸 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋

𑐄𑐐𑐸 𑐴𑐾 𑐖𑑂𑐫𑐵𑐗𑑂𑐰𑐮𑐫𑑂 𑐫𑐾𑑃 𑐡𑐾𑐫𑑂𑐫𑐵 𑐱𑐵𑐎𑑂𑐫𑐟𑐫𑑂 𑐗𑐶𑐐𑐹 𑐩𑐴𑐵𑐰𑐶𑐴𑐵𑐬𑐫𑐵 𑐡𑐎𑐮𑐫𑑂 𑐠𑐎𑐵𑐮𑐷𑐩𑑂𑐴 𑐩𑑀𑐟𑐶𑐬𑐟𑑂𑐣 𑐱𑐵𑐎𑑂𑐫𑐫𑐵𑐟 𑐩𑐴𑐵𑐳𑑂𑐠𑐰𑐶𑐬 𑐥𑐡𑑄 𑐰𑐶𑐨𑐹𑐲𑐶𑐟 𑐫𑐵𑑅𑐐𑐸 𑐏𑑅 𑑋 𑐳𑑄𑐑𑐫𑐵 𑐣𑐵𑐫𑑅 𑐱𑐵𑐎𑑂𑐫𑑄 𑐠𑐵𑐫𑑂𑐥𑐵𑐫𑐵 𑐟𑐥𑐸𑐮𑐶𑑄 𑐥𑐸𑐂𑐎𑐵𑑅 𑐡𑑀𑐳𑐮𑑂𑐮𑐵 𑐣𑑂𑐫𑐫𑐾𑐎𑐵𑐡𑐷𑐐𑐸 𑐏𑑅𑐳𑐵 𑐰 𑐣𑑂𑐴𑐹𑐡𑑃 𑐳𑐩𑐵𑐬𑑀𑐴 𑐳𑐩𑐶𑐟𑐶𑐫𑐵 𑐣𑐵𑐫𑑅 𑐥𑑂𑐬𑐵. 𑐜𑐵. 𑐰𑐖𑑂𑐬𑐵𑐔𑐵𑐬𑑂𑐫𑑄 𑐴𑐣𑐵𑐥𑑁 𑐡𑐾𑐕𑐵𑐣𑐵𑐡𑐷𑐐𑐸 𑐏𑑅 𑑋