𑐣𑐾𑐥𑐵𑐮𑐨𑐵𑐲𑐵 𑐏𑑂𑐫𑐮𑐫𑑂 𑐳𑐵𑐴𑐶𑐟𑑂𑐫𑐫𑐵 𑐠𑐷𑐠𑐷 𑐰𑐶𑐢𑐵𑐫𑑂 𑐔𑑂𑐰𑐳𑐵 𑐣𑑂𑐴𑑂𑐫𑐵𑐎𑐵𑑅 𑐠𑑅𑐐𑐸 𑐴𑐾 𑐩𑐟𑐵𑐥𑐫𑑂 𑐩𑐡𑐶𑐎 𑐣𑑂𑐴𑑂𑐫𑐵𑑅𑐰𑐫𑐵𑑄𑐔𑑂𑐰𑑄𑐩𑑂𑐴 𑐕𑐩𑑂𑐴 𑐔𑑂𑐰𑐩𑐶 𑐩𑐫𑑂𑐖𑐸 𑐱𑑂𑐬𑐷𑐮𑐎𑑂𑐲𑑂𑐩𑐷 𑐱𑑂𑐬𑐾𑐲𑑂𑐛𑐫𑐵 𑐣𑐶𑐐𑐹𑐐𑐸 𑐧𑐵𑐏𑑄𑐳𑐦𑐹 𑐎𑐠𑑄 𑐥𑐶𑐡𑑄𑐐𑐸 𑐳𑐦𑐹𑐫𑐵 𑐣𑐵𑑄 𑐏𑑅 – 𑐖𑐷𑐰𑐣𑐫𑐵 𑐮𑑃𑐥𑐸𑐂 𑑋 𑐰𑐶𑐰𑐶𑐢 𑐰𑐶𑐲𑐫𑐫𑐵 𑐟𑐵𑑅𑐴𑐵𑐎𑑅𑐐𑐸 𑐰 𑐔𑐶𑐴𑐵𑐎𑑅𑐐𑐸 𑐫𑐵𑐣𑐵𑑅 𑐗𑐶𑑄𑐣𑐶𑐥𑐸 𑐬𑐔𑐣𑐵 𑐠𑑂𑐰 𑐳𑐦𑐸𑐮𑐶𑐂 𑐡𑐸𑐠𑑂𑐫𑐵𑐎𑐵𑐟𑑅𑐐𑐸 𑐡𑐸 𑑋
𑐡𑐎𑐮𑐫𑑂 𑐣𑑂𑐴𑐵𑐥𑐵𑑄𑐐𑐸 𑐧𑐵𑐏𑑄 ‘𑐳𑑂𑐰𑐵𑐬𑑂𑐠’𑐫𑑂 𑐕𑐐𑐹 𑐥𑐸𑐮𑐵𑑄𑐐𑐸 𑐩𑐾𑐔𑐫𑐵𑐟 𑐎𑐾𑐣𑑂𑐡𑑂𑐬𑐰𑐶𑐣𑑂𑐡𑐸𑐂 𑐟𑐫𑐵𑑅 𑐎𑐮𑐵𑑅–𑐨𑐵𑑅𑐟𑐫𑐵 𑐡𑐠𑐸𑐂 𑐠𑑅𑐠𑑅𑐐𑐸 𑐳𑑂𑐰𑐵𑐬𑑂𑐠𑑄 𑐫𑐵𑐣𑐵𑑅 𑐣𑐶𑐩𑑂𑐴𑐾𑐳𑐶𑐫𑐵 𑐣𑐶𑐏𑐾 𑐳𑑂𑐰𑑅𑐐𑐸 𑐩𑐣𑑀𑐨𑐵𑐰 𑐧𑑂𑐰𑐫𑐵𑐟𑑅𑐐𑐸 𑐡𑐸 𑑋 𑐮𑐶𑐳𑐾𑑄 𑐠𑐸𑐎𑐷 𑐩𑐣𑐹𑐟𑐫𑑂𑐐𑐸 𑐎𑐟𑐶𑐮𑐵𑑅𑐳𑐶𑑄 𑐳𑑂𑐰𑐨𑐵𑐰𑐫𑐵 𑐣𑑄 𑐔𑐶𑐟𑑂𑐬𑐞 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐣𑐶𑐥𑐸𑐐𑐸 𑐧𑐵𑐏𑑄 ‘𑐩𑐵𑑄𑐫𑐵 𑐩𑐟𑐶𑐣𑐵’ 𑐏𑑅 𑑋 𑐧𑐵𑐏𑑄𑐫𑐵 𑐱𑐶𑐲𑐬𑑂𑐎𑐫𑐵𑐟 𑐮𑑂𑐰𑐫𑐾𑐎 𑐠𑐸𑐎𑐷 𑐩𑐵𑑄𑐫𑐵 𑐩𑐟𑐶𑐣𑐵𑐫𑐵 𑐧𑐫𑐵𑐣 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐠𑑅 𑐩𑐳𑑂𑐟𑐫𑑂𑐳𑑄 𑐣𑑂𑐴𑑂𑐫𑐵𑐎𑑂𑐰 𑐴𑐾 𑐣𑐸𑐐𑐮𑐫𑑂 𑐳𑑂𑐫𑐵𑐂𑐐𑐸 𑐖𑑂𑐫𑐵 𑐫𑐵𑑅𑐳𑐵𑑄 𑐩𑐵𑑄𑐫𑐵 𑐣𑐸𑐐𑑅 𑐠𑑅 𑐩𑐳𑑂𑐟𑐥𑐵𑐏𑐾 𑐴𑐾 𑐎𑑂𑐰𑐳𑐵𑐂𑐐𑐸 𑐰 𑐂𑐩𑐶𑐟 𑐕𑐸𑑄 𑐎𑐠𑑄𑐫𑐵 𑐡𑐸𑐏, 𑐳𑐩𑐵𑐳𑑂𑐫𑐵 𑐖𑐸𑐂𑐎𑐾 𑐩𑐧𑐷𑐟 𑐠𑑅𑐥𑐶𑑄 𑐣𑑂𑐴𑑂𑐫𑐵𑐐𑐸 𑐫𑐵𑐫𑐾𑐟 𑐣𑑄 𑐟𑐫𑐵𑐬 𑐖𑐸𑐂𑐐𑐸 𑐫𑐠𑐵𑐬𑑂𑐠𑐫𑐵𑐟 𑐠𑑂𑐰 𑐧𑐵𑐏𑐣𑐫𑑂 𑐧𑐵𑑄𑐮𑐵𑐎 𑐧𑑂𑐰𑐫𑐵𑐟𑑅𑐐𑐸 𑐡𑐸 𑑋
𑐳𑑂𑐰𑐥𑐸𑐐𑐸 𑐧𑐵𑐏𑑄 ‘𑐥𑐱𑐸𑐥𑐟𑐶𑐣𑐵𑐠𑐫𑐵 𑐡𑐬𑑂𑐱𑐣’ 𑐫𑑂 𑐴𑐾𑐬𑐵𑐩𑐿𑑄 𑐣𑐵𑑄𑐫𑐵𑐩𑑂𑐴 𑐕𑐩𑑂𑐴 𑐥𑑀𑐬𑐾𑐣𑐷𑐫𑐵𑐟 𑐩𑐹 𑐥𑐵𑐟𑑂𑐬 𑐡𑐫𑐾𑐎𑐵𑐟𑑅𑐐𑐸 𑐡𑐸, 𑐀𑐮𑐾 𑐰𑐫𑐵𑐐𑐸 𑐴𑐾 𑐩𑐵𑐢𑑂𑐫𑐩𑑄 𑐡𑐾𑐱𑐫𑑂 𑐰𑑂𑐫𑐵𑐥𑑂𑐟 𑐖𑐸𑐫𑐵𑐔𑑂𑐰𑑄𑐐𑐸 𑐟𑑅𑐩𑐶𑑄 𑐔𑐷𑐩𑐶𑐫𑐵𑐟 𑐫𑐵𑐂𑐐𑐸 𑐠𑐷𑐠𑐷 𑐎𑐠𑑄𑐫𑐵 𑐱𑑀𑐲𑐞,𑐖𑐵𑐟𑐷𑐫 𑐕𑐸𑐰𑐵𑐕𑐹𑐟, 𑐢𑐵𑐬𑑂𑐩𑐶𑐎 𑐨𑐾𑐡𑐨𑐵𑐰 𑐁𑐡𑐶𑐫𑐵 𑐨𑐞𑑂𑐜𑐵𑐦𑑀𑐬 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐰𑐿𑐔𑐵𑐬𑐶 𑐎 𑐮𑑂𑐫𑐵𑐏𑑄 𑐟𑐳𑐎𑑄 𑐴𑐾 𑐔𑑂𑐰𑐕𑐵𑐫𑐾𑐧𑐴𑐐𑐸 𑐠𑑂𑐰 𑐧𑐵𑐏𑐣𑐫𑑂 ‘𑐧𑐴𑐸𑐖𑐣 𑐴𑐶𑐟𑐵𑐫, 𑐧𑐴𑐸𑐖𑐣 𑐳𑐸𑐏𑐵𑐫’ 𑐫𑐵 𑐁𑐖𑑂𑐖𑐸 𑐥𑐹𑐰𑑄𑐎𑐾𑐐𑐸 𑐮𑑃𑐥𑐸𑐂 𑐣𑑂𑐴𑑂𑐫𑐵𑑅𑐰𑐣𑐾𑐐𑐸 𑐴𑐾 𑐢𑐵𑐠𑐾𑑄𑐫𑐵𑐐𑐸 𑐢𑐬𑑂𑐩 𑐏𑑅 𑐢𑐫𑐵𑐐𑐸 𑐳𑐣𑑂𑐡𑐾𑐱 𑐡𑐸 𑑋 𑐢𑐵𑐠𑐾𑑄 𑐢𑐵𑐫𑐾𑐐𑐸 𑐏𑑅𑐳𑐵 𑐠𑑂𑐰 𑐳𑐦𑐸𑐮𑐶𑐂 𑐡𑐸𑐠𑑂𑐫𑐵𑑅𑐐𑐸 𑐗𑐶𑑄𑐣𑐶𑐥𑐸 𑐩𑐢𑑂𑐫𑐾 𑐡𑐎𑐮𑐫𑑂 𑐔𑑂𑐰𑐣𑑂𑐴𑑂𑐫𑐵𑑅𑐐𑐸 𑐧𑐵𑐏𑑄 𑐣𑑄 𑐠𑑂𑐰 𑐴𑐾 𑐏𑑅 𑐢𑐵𑐫𑐾𑐩𑐵𑑅 𑑋
𑐥𑑂𑐫𑐥𑐸𑐐𑐸 𑐧𑐵𑐏𑑄 ‘𑐎𑐔𑑄 𑐰𑑄𑐐𑐸 𑐩𑐟𑐶𑐣𑐵’ 𑐫𑑂 𑐳𑐵𑐩𑐵𑐖𑐶𑐎 𑐫𑐠𑐵𑐬𑑂𑐠 𑐧𑑂𑐰𑐫𑐵𑐟𑑅𑐐𑐸 𑐡𑐸 𑑋 𑐩𑐶𑐳𑐵𑐟𑐫𑑂𑐳𑑄 𑐩𑐶𑐳𑐵𑐟𑐫𑑂𑐟 𑐴𑐾 𑐎𑑂𑐰𑐠𑐸𑐣𑐾𑐟 𑐳𑑂𑐰𑐂𑐐𑐸, 𑐧𑐵𑑄𑐮𑐵𑐎 𑐂𑐴𑐶𑐥𑐵 𑐫𑐵𑐣𑐵𑑅 𑐰𑑅𑐩𑑂𑐴 𑐨𑑁 𑐩𑐔𑐵 𑐰 𑐀𑐠𑐾𑑄 𑐧𑑂𑐰𑐫𑐾𑐎𑐵𑐴𑑅𑐩𑑂𑐴 𑐨𑑁𑐩𑐔𑐵𑐫𑐵 𑐡𑐠𑐸𑐂 𑐩𑐵𑐖𑐸𑑄𑐫𑑅𑐩𑐫𑑅 𑐫𑐵𑐂𑐐𑐸, 𑐎𑐮𑐵𑑅𑐫𑐵 𑐨𑐵𑐰𑐣𑐵𑐫𑐵𑐟 𑐧𑐵𑑄𑐮𑐵𑐎𑑄 𑐠𑐹𑐳𑐵𑑄 𑐰𑑂𑐫𑐎𑑂𑐟𑐶𑐐𑐟 𑐳𑑂𑐰𑐵𑐬𑑂𑐠𑑄 𑐫𑐵𑐣𑐵𑑅 𑐨𑐵𑑅𑐟𑐩𑑂𑐴𑑄 𑐎𑐮𑐵𑑅𑐫𑐵 𑐨𑐵𑐰𑐣𑐵𑐫𑐵𑐟 𑐠𑐸𑐂𑐎𑐵𑐩𑐧𑐷𑐐𑐸 𑐁𑐡𑐶 𑐁𑐡𑐶 𑐏𑐵𑐫𑐸𑐐𑐸 𑐳𑐟𑑂𑐫 𑐠𑑂𑐰 𑐧𑐵𑐏𑐣𑐫𑑂 𑐧𑐵𑑄𑐮𑐵𑐎𑑄 𑐧𑑂𑐰𑐫𑐵𑐟𑑅𑐐𑐸 𑐡𑐸 𑑋 𑐧𑐵𑐏𑑄, 𑐧𑐵𑐏𑑄 𑐎𑐣𑐷𑐩𑑂𑐴𑑄 𑐧𑐵𑐏𑑄 𑐎𑐣𑐵𑐔𑑂𑐰𑑄𑐐𑐸 𑐱𑐿𑐮𑐷𑑄 𑐔𑑂𑐰𑐫𑐵𑐟𑑅𑐐𑐸𑐮𑐶𑑄 𑐫𑐵𑐣𑐵𑑅 𑐠𑑂𑐰 𑐧𑐵𑐏𑑄, 𑐧𑐵𑐏𑑄 𑐳𑑂𑐰𑐫𑐵𑑄 𑐣𑑄 𑐧𑐵𑐏𑑄𑐫𑐵 𑐳𑐵𑐬 𑐢𑐵𑐫𑐾 𑐮𑑂𑐰𑑅𑐐𑐸 𑐖𑐸𑐫𑐵𑐧𑐶𑐮 𑑋 𑐠𑐠𑐾 𑐩𑐖𑐸𑐳𑐾 𑐣𑐵𑐚𑐎𑐫𑐵 𑐱𑐿𑐮𑐷𑐂 𑐏𑑃𑐮𑑂𑐴𑐵𑐧𑐮𑑂𑐴𑐵 𑐣𑑄 𑐡𑐸𑐠𑑂𑐫𑐵𑐎𑐵𑑅 𑐔𑑂𑐰𑑅𑐐𑐸 𑐏𑑅𑐳𑐵 𑐠𑑂𑐰 𑐧𑐵𑐏𑑄
𑐁𑑅 𑐳𑑂𑐰𑐫𑐵𑑄 𑐬𑑀𑐔𑐎 𑐰 𑐥𑑂𑐬𑐨𑐵𑐰𑐎𑐵𑐬𑐷 𑐖𑐸𑐂𑐐𑐸 𑐏𑐂 𑑋
‘𑐳𑑄𑐐𑐸 𑐧𑐵𑑅𑐐𑐸𑑂 𑐖𑐶𑐣𑑂𑐡𑐐𑐷’ 𑐰𑐶𑐡𑐾𑐱𑐷 𑐩𑐶𑐖𑑄 𑐰𑐵 𑐰𑐶𑐡𑐾 𑐱𑐷 𑐩𑐶𑐳𑐵𑐮𑐶𑐳𑐾 𑐂𑐴𑐶𑐥𑐵 𑐫𑐵𑐣𑐵𑑅 𑐰𑐶𑐡𑐾𑐱 𑐰𑐣 𑐢𑐵𑑅𑐳𑐵 𑐐𑐵𑐎𑑂𑐎𑑄 𑐳𑐸𑐏 𑐳𑐷 𑐢𑐎𑐵𑑅 𑐧𑐶𑐔𑐵𑑅 𑐫𑐵𑐂𑐥𑐶 𑐣𑐾𑐥𑐵𑑅𑐩𑐶𑐟𑐫𑑂𑐟 𑐳𑐟𑐬𑑂𑐎 𑐫𑐵𑐎𑐵𑐟𑑅𑐐𑐸 𑐧𑐵𑐏𑑄 𑐏𑑅 𑑋 𑐠𑐸𑐎𑐷 𑐰𑐶𑐡𑐾𑐱𑐷 𑐎𑐮𑐵𑑅 𑐡𑐫𑐾𑐎𑐵𑑅 𑐫𑐹𑐬𑑀𑐥 𑐰𑑄𑐩𑑂𑐴 𑐩𑐶𑐖𑑄𑐫𑐵 𑐎𑐣𑑂𑐣𑐵𑐔𑐵𑐫𑐵𑐥𑐸𑐐𑐸 𑐀𑐰𑐳𑑂𑐠𑐵𑐫𑐵 𑐔𑐶𑐟𑑂𑐬𑐞 𑐡𑐸 𑐠𑐾𑑄 𑐰𑐶𑐡𑐾𑐱𑐷 𑐨𑐵𑑅𑐟 𑐡𑐫𑐾𑐎𑐵𑑅 𑐫𑐹𑐬𑑀𑐥 𑐰𑑄𑐩𑑂𑐴 𑐩𑐶𑐳𑐵𑐫𑐵 𑐖𑐶𑐣𑑂𑐡𑐐𑐷 𑐣𑐬𑑂𑐎 𑐖𑐹𑐐𑐸 𑐏𑑃𑐫𑐵𑐟 𑐎𑐫𑐵𑑅 𑐣𑑄 𑐧𑑂𑐰𑑃𑐩𑐶𑐫𑐵𑐟 𑐣𑐸𑐐𑑅 𑐴𑐾 𑐠𑐸𑑄𑐡𑐶𑐎𑐵 𑐧𑐷𑐦𑐸𑐐𑐸 𑐰𑐬𑑂𑐞𑐣 𑐡𑐸 𑑋 𑐫𑐹𑐬𑑀𑐥𑐾𑐮𑐷𑐟𑐫𑑂𑐐𑐸 𑐄𑐥𑐨𑑀𑐎𑑂𑐟𑐵𑐰𑐵𑐡𑐷 𑐳𑑄𑐳𑑂𑐎𑐺𑐟𑐶𑐫𑐵 𑐁𑐮𑑀𑐔𑐣𑐵𑐟𑑂𑐩𑐎 𑐚𑐶𑐥𑑂𑐥𑐞𑐷 𑐫𑐵𑐣𑐵𑐟𑑅𑐐𑐸 𑐠𑑂𑐰 𑐧𑐵𑐏𑐣𑐫𑑂 𑐔𑑂𑐰𑐩𑐶𑐐𑐸𑐮𑐶𑐏𑐾𑑄 𑐠𑐵𑐳𑐫𑑂 𑐟𑐥𑑂𑐫𑑄𑐎 𑐣𑐰𑐵𑐣𑐵𑐟𑑅𑐐𑐸𑐮𑐶𑑄 𑐢𑐵𑑅𑐳𑐵 𑐧𑐵𑐏𑑄𑐫𑐵 𑐥𑑂𑐬𑐨𑐵𑐰𑐎𑐵𑐬𑐶 𑐟𑐵𑐫𑑂 𑐨𑐟𑐶𑐔𑐵 𑐀𑐳𑐬 𑐮𑐵𑐎𑐹𑐐𑐸 𑐀𑐣𑐸𑐨𑐰 𑐖𑐹 𑑋
𑐏𑐸𑐥𑐸𑐐𑐸 𑐧𑐵𑐏𑑄 ‘𑐟𑐵𑑅𑐁𑐫𑐸’ 𑐣𑑄 𑐰𑐶𑐡𑐾𑐱𑐫𑐵 𑐥𑐺𑐲𑑂𑐛𑐨𑐸𑐩𑐶𑐂 𑐐𑑂𑐰𑐫𑐵𑐟𑑅𑐐𑐸 𑐧𑐵𑐏𑑄 𑐏𑑅 𑑋 𑐠𑑂𑐰 𑐧𑐵𑐏𑐣𑐫𑑂 𑐣𑑄 𑐔𑑂𑐰𑐩𑐶𑑄 𑐫𑐹𑐬𑑀𑐥𑐫𑐵 𑐄𑐥𑐨𑑀𑐎𑑂𑐟𑐵𑐰𑐵𑐡𑐷 𑐳𑑄𑐳𑑂𑐎𑐺𑐟𑐶𑑄 𑐫𑐵𑐣𑐵𑑅 𑐕𑐩𑑂𑐴 𑐐𑐸𑐂𑐣𑐶𑐡𑑃 𑐡𑐸𑐩𑑂𑐴 𑐩𑐶𑐳𑐵𑑄 𑐐𑐸𑐎𑐠𑑄 𑐡𑐸𑐏 𑐳𑐶𑐮 𑐢𑐫𑐵𑐐𑐸 𑐏𑑃𑐫𑐵 𑐰𑐬𑑂𑐞𑐣 𑐡𑐸 𑑋 𑐧𑐵𑐏𑑄 𑐧𑑂𑐰𑐣𑐾𑐧𑐮𑐫𑑂 𑐣𑐸𑐐𑑅 𑐩𑐕𑐶𑑄𑐳𑐾 𑐔𑑂𑐰𑐣𑐵𑐰𑑅 𑑋 𑐣𑑂𑐴𑐫𑑂𑐥𑐸𑐐𑐸 ‘𑐔𑐦𑐸𑐂 𑐩𑐦𑐹𑐐𑐸 𑐩𑐟𑐶𑐣𑐵’ 𑐟𑑅𑐩𑐶 𑐰 𑐔𑐷𑐩𑐶𑐫𑐵 𑐡𑐠𑐸𑐂 𑐩𑐟𑐶𑐣𑐵 𑐖𑐹𑐐𑐸 𑐕𑐥𑐸 𑐳𑐵𑐢𑐵𑐬 𑐞 𑐧𑐵𑐏𑑄 𑐏𑑅 𑑋 𑐟𑐬 𑐳𑐵𑐢𑐵𑐬 𑐞 𑐧𑐵𑐏𑑄𑐫𑐵𑐟 𑐔𑑂𑐰𑐩𑐶𑑄 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶𑐫𑐵 𑐮𑐳𑐵𑑄 𑐟𑐫𑐵𑑅 𑐀𑐳𑐵𑐢𑐵𑐬 𑐞 𑐡𑐫𑐾𑐎𑐵𑐧𑐶𑐄𑐐𑐸 𑐡𑐸 𑑋 𑐩𑐫𑑅 𑐩𑐫𑑅 𑐖𑐹𑐐𑐸 𑐧𑑂𑐫𑐵𑐴𑐵𑐫𑐵𑐟 𑐰𑐶𑐲𑐫𑐰𑐳𑑂𑐟𑐸 𑐡𑐫𑐾𑐎𑐵𑑅 𑐔𑑂𑐰𑐫𑐵𑐟𑑅𑐐𑐸 𑐠𑑂𑐰 𑐧𑐵𑐏𑐣𑐫𑑂 𑐂𑐴𑐶𑐥𑐵𑐧𑐮𑐫𑑂 𑐫𑐵𑐂𑐐𑐸 𑐣𑐾𑐰𑐵𑑅 𑐳𑑄𑐳𑑂𑐎𑐵𑐬 𑐫𑐵 𑐰𑐶𑐳𑑂𑐟𑐺𑐟 𑐰𑐶𑐰𑐬 𑐞 𑐧𑐷𑐐𑐸 𑐎𑐸𑐟𑑅 𑐖𑐹𑐐𑐸 𑐡𑐸 𑑋
𑐔𑑂𑐫𑐵𑐥𑐸𑐐𑐸 ‘𑐖𑐣𑑂𑐩𑐣𑑂𑐴𑐶𑐫𑐵 𑐄𑐟𑑂𑐳𑐰’ 𑐧𑐵𑐏𑑄 𑐳𑑂𑐰𑐫𑐵𑑄 𑐣𑑄 𑐣𑐶𑐫𑐵𑐟𑑂𑐬𑐵 𑐢𑐵𑐫𑐾𑐧𑐴𑐸𑐐𑐸 𑐬 𑐔𑐣𑐵 𑐏𑑅 𑑋 𑐣𑐶𑐫𑐵𑐟𑑂𑐬𑐵 𑐢𑐫𑐵𑐐𑐸 𑐧𑐵𑐏𑑄𑐫𑐵 𑐱𑐿𑐮𑐷𑐂 𑐔𑑂𑐰𑐵𑐫𑐟𑐂𑐐𑐸 𑐫𑐵𑐟𑑂𑐬𑐵–𑐰𑐬𑑂𑐞𑐣 𑐏𑑅, 𑐐𑐸𑐎𑐷 𑐩𑐵𑐣𑐰𑐶𑐫 𑐳𑑄𑐰𑐾𑐡𑐣𑐵 𑐣𑑄 𑐡𑐸𑐠𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑐂 𑑋 ‘𑐖𑐣𑑂𑐩𑐣𑑂𑐴𑐶𑐫𑐵 𑐄𑐟𑑂𑐳𑐰’ 𑐠𑑂𑐰 𑐴𑐾 𑐥𑑂𑐬𑐰𑐶𑐢𑐶 𑐡𑐸𑐣𑐾 𑐔𑑂𑐰𑐣𑐵𑑅 𑐔𑑂𑐰𑐫𑐵𑐟𑑅𑐐𑐸 𑐖𑐹𑐐𑐸𑐮𑐶𑑄 𑐠𑐸𑐎𑐶𑐫𑐵𑐟 𑐣𑐶𑐫𑐵𑐟𑑂𑐬𑐵 𑐢𑐵𑑅𑐳𑐵 𑐥𑐵𑐫𑑂𑐕𑐶 𑐖𑐸𑐂𑐐𑐸 𑐏𑑅𑐮𑐵 𑐢𑐫𑐵𑐐𑐸 𑐰𑐶𑐔𑐵𑑅 𑐣𑑂𑐴𑑂𑐫𑐧𑑂𑐰𑐫𑐵𑑅𑐐𑐸 𑐏𑑅 𑑋
𑐐𑐸𑐥𑐸𑐐𑐸 ‘𑐗𑐵𑐳𑐸𑐮𑐣𑐵 𑐃 ’ 𑐣𑑄 𑐫𑐹𑐬𑑀𑐥𑐫𑐵 𑐥𑐺𑐲𑑂𑐛𑐨𑐹𑐩𑐶𑐂 𑐴𑐾 𑐔𑑂𑐰𑐫𑐵𑐟𑑅𑐐𑐸 𑐧𑐵𑐏𑑄 𑐏𑑅 𑑋 𑐫𑐹𑐬𑑀𑐥𑐫𑑂 𑐩𑐣𑐹𑐟 𑐩𑐾𑐳𑐷𑐣 𑐠𑐾 𑐔𑐵𑑄–𑐣𑑂𑐴𑐶𑑄 𑐠𑑅𑐥𑐶𑑄𑐟 𑐔𑐸𑐟𑑂𑐟𑐸𑐔𑐸𑐮𑐵𑑅 𑐖𑐶𑐣𑑂𑐡𑐐𑐷 𑐴𑐣𑐵𑐔𑑂𑐰𑐣𑐾𑐩𑐵𑑅𑐐𑐸 𑐏𑑃𑐫𑐵 𑐔𑐶𑐟𑑂𑐬𑐞 𑐡𑐸 𑑋 𑐗𑐶𑐥𑐸𑐐𑐸 ‘𑐕𑐾𑑃 𑐧𑑂𑐰𑐠𑐮𑐵’ 𑐣𑐾𑐥𑐵𑑅𑐫𑐵 𑐥𑐺𑐲𑑂𑐛𑐨𑐹𑐩𑐶𑐂 𑐴𑐾 𑐔𑑂𑐰𑐫𑐵𑐟𑑅𑐐𑐸 𑐕𑐥𑐸 𑐩𑐵𑐬𑑂𑐩𑐶𑐎 𑐧𑐵𑐏𑑄 𑐏𑑅 𑑋 𑐕𑐩𑑂𑐴 𑐎𑐶𑐳𑐵𑐣𑐫𑐵𑐟 𑐎𑐾𑐣𑑂𑐡𑑂𑐬𑐰𑐶𑐣𑑂𑐡𑐸𑐂 𑐟𑐫𑐵𑑅 𑐔𑑂𑐰𑐫𑐵𑐟𑑅𑐐𑐸 𑐠𑑂𑐰 𑐧𑐵𑐏𑐣𑐫𑑂 𑐡𑐾𑐱𑐫𑑂 𑐰𑑅𑐐𑐸 𑐬𑐵𑐖𑐣𑐷𑐟𑐶𑐎 𑐴𑐶𑐄𑐥𑐵𑐮𑑄 𑐳𑐬𑑂𑐰𑐳𑐵𑐢𑐵𑐬𑐞 𑐩𑐣𑐹𑐟𑐫𑑂𑐐𑐸 𑐖𑐷𑐰𑐣 𑐗𑑄 𑐗𑑄 𑐎𑐲𑑂𑐚𑐥𑐹𑐬𑑂𑐞 𑐖𑐸𑐫𑐵𑐰𑑅𑐐𑐸 𑐰𑐬𑑂𑐞𑐣 𑐡𑐸 𑑋 𑐗𑐶𑑄𑐕𑐥𑐸𑐐𑐸 ‘𑐑𑐵𑑅’ 𑐕𑐥𑐸 𑐳𑐵𑐩𑐵𑐣𑑂𑐫 𑐧𑐵𑐏𑑄 𑐏𑑅𑐳𑐵 𑐗𑐶𑐣𑐶𑐥𑐸𑐐𑐸 ‘𑐢𑐬 𑐟𑐷 𑐰 𑐁𑐎𑐵𑐱’𑐕𑐥𑐸 𑐥𑑂𑐬𑐟𑐷𑐎𑐵𑐟𑑂𑐩𑐎 𑐔𑐶𑐧𑐵𑐏𑑄 𑐏𑑅 𑑋
𑐳𑐩𑐐𑑂𑐬𑐫𑑂 𑐢𑐵𑐫𑐾𑐧𑐮𑐫𑑂 𑐠𑑂𑐰 𑐳𑐦𑐹𑐫𑐵 𑐀𑐥𑑂𑐰𑑅 𑐢𑐫𑐵𑐠𑐾𑑄 𑐧𑐵𑐏𑐣𑐫𑑂 𑐣𑐾𑐥𑐵𑑅𑐩𑐶𑐟𑐫𑑂𑐐𑐸 𑐣𑑂𑐴𑐶𑐫𑐵𑐣𑑂𑐴𑐶𑐠𑑄𑐫𑐵 𑐖𑐷𑐰𑐣𑐫𑐵 𑐧𑐫𑐵𑐣 𑐡𑐸, 𑐐𑐸𑐐𑐸 𑐧𑑂𑐰𑑃𑐩𑐶𑐥𑐶𑐣𑐶𑐐𑐸 𑐣𑐶𑑄𑐟𑐶𑑄 𑐄𑐟𑑂𑐳𑐸𑐎𑐟𑐵𑐫𑐵 𑐰𑐶𑐲𑐫 𑐖𑐸𑐂𑐦𑐸 𑑋 𑐀𑐠𑐾 𑐴𑐾 𑐣𑐾𑐥𑐵𑑅𑐫𑐵 𑐥𑐬𑐶 𑐰𑐾𑐱𑐫𑑂 𑐔𑑂𑐰𑐫𑐵𑐟𑑅𑐐𑐸 𑐧𑐵𑐏𑐣𑑄 𑐧𑑂𑐰𑑃𑐩𑐶𑐥𑐶𑑄𑐟 𑐱𑑀𑐲𑐶𑐟 𑐥𑐷𑐜𑐶𑐟 𑐥𑐎𑑂𑐲𑐫𑑂 𑐔𑐶𑐣𑑂𑐟𑐣-𑐩𑐣𑐣 𑐫𑐵𑐫𑐾 𑐟 𑐧𑐵𑐢𑑂𑐫 𑐫𑐵𑐎𑐷𑐐𑐸 𑐏𑐣𑐾𑐡𑐸 𑑋