𑐰𑐵𑐡𑐾𑐳𑐫𑑂 𑐬𑐘𑑂𑐖𑐣𑐵 𑐮𑐶𑐥𑐶 𑐳𑑂𑐫𑐣𑐾𑐖𑑂𑐫𑐵

𑐱𑑂𑐬𑐾𑐲𑑂𑐛 𑐳𑐩𑐵𑐖 𑐰𑐵𑐡𑐾𑐫𑑂 𑐰 𑐐𑑀𑐡𑐵𑐰𑐬𑐷 𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑑄𑐎𑐵 𑐐𑑂𑐰𑐳𑐵𑐮𑐫𑑂 𑐣𑑂𑐴𑑂𑐫𑐵𑑅𑐐𑐸 𑐮𑐔𑑂𑐕𑐷 𑐫𑑄𑐎𑐫𑐵 𑐣𑐶𑑅𑐱𑐸𑐮𑑂𑐎 𑐬𑐘𑑂𑐖𑐣𑐵 𑐮𑐶𑐥𑐶 𑐥𑑂𑐬𑐱𑐶𑐎𑑂𑐲𑐞 𑐖𑑂𑐫𑐵𑐗𑑂𑐰𑑅 𑐐𑑀𑐡𑐵𑐰𑐬𑐷 𑐣𑐐𑐬𑐥𑐵𑐮𑐶𑐎𑐵 𑑑𑑑 𑐰𑐜𑐵 𑐖𑑂𑐫𑐵𑐎𑐸𑐠𑐶𑐂 𑐳𑑀 𑐩𑐧𑐵𑑅 𑐎𑑂𑐰𑐔𑐵𑐫𑐾 𑐎𑐹𑐐𑐸 𑐡𑐸 𑑋

𑐱𑑂𑐬𑐾𑐲𑑂𑐛 𑐳𑐩𑐵𑐖𑐫𑐵 𑐣𑐵𑐫𑑅 𑐰𑐵𑐳𑐸𑐡𑐾 𑐰 𑐱𑑂𑐬𑐾𑐲𑑂𑐛𑑄 𑐮𑐳𑐎𑐸𑐳 𑐫𑐵𑐣𑐵 𑐣𑑂𑐴𑑂𑐫𑐵𑑅𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐮𑐔𑑂𑐕𑐷𑐫𑑄𑐎 𑐎𑑂𑐮𑐵𑐳𑐫𑑂 𑐧𑑂𑐰𑐟𑐶 𑐎𑐫𑐵𑑅 𑐟𑐵𑑅𑐮𑐵𑑅𑐥𑐶𑑄 𑐧𑑂𑐰𑐣𑐵𑐩𑐶𑐥𑐶𑑄 𑐰 𑐳𑑄𑐎𑐮𑑂𑐥 𑐧𑐖𑑂𑐬𑐵𑐔𑐵𑐬𑑂𑐫 𑐣𑑂𑐴𑐵𑐥, 𑐡𑐾𑐰𑐵𑐣 𑐩𑐴𑐬𑑂𑐖𑐣 𑐮𑑂𑐫𑐹 𑐰 𑐳𑐮𑐶𑐣𑐵 𑐩𑐴𑐬𑑂𑐖𑐣 𑐮𑐶𑐫𑐵𑑄 𑐮𑑂𑐫𑐹 𑐮𑐵𑑅𑐥𑐶𑐣𑑂𑐟 𑐩𑐹𑐥𑐵𑐴𑐵𑑃 𑐄𑐥𑐩𑐾𑐫𑐬 𑐩𑐸𑐣𑐵 𑐀𑐢𑐶𑐎𑐵𑐬𑐷, 𑐣𑐾𑐥𑐵𑐮 𑐮𑐶𑐥𑐶 𑐐𑐸𑐠𑐶𑐫𑐵 𑐣𑐵𑐫𑑅 𑐣𑐶𑐬𑐣𑑂𑐖𑐣 𑐟𑐵𑐩𑑂𑐬𑐵𑐎𑐵𑐬 𑐰 𑐥𑑂𑐬𑐱𑐶𑐎𑑂𑐲𑐎 𑐳𑐸𑐡𑐾𑐣 𑐎𑐸𑐩𑐵𑐬 𑐩𑐴𑐬𑑂𑐖𑐣𑐥𑐶𑐳𑑄 𑐡𑐳𑐶𑐥𑑁 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋

𑐨𑐵𑐲𑐵, 𑐳𑑄𑐳𑑂𑐎𑐺𑐟𑐶 𑐠𑐾𑑄𑐖𑐵𑑅𑐐𑐸 𑐳𑑂𑐫𑐣𑐾𑐐𑐸 𑐢𑐿𑐐𑐸 𑐩𑐔𑐵𑑄𑐣𑐶𑐳𑐾𑑄 𑐴𑐾 𑐳𑑂𑐫𑐣𑐾𑐩𑐵 𑐢𑐿𑐐𑐸 𑐡𑐳𑐸 𑐎𑐠𑑄 𑐄𑐐𑐸 𑐥𑑂𑐬𑐱𑐶𑐎𑑂𑐲𑐞 𑐖𑑂𑐫𑐵𑐗𑑂𑐰𑐮𑐫𑑂 𑐳𑑂𑐰𑑄𑐐𑐹 𑐟𑐐𑐶𑑄𑐣𑐶𑐳𑐾 𑐣𑐾𑐥𑐵𑐮𑐨𑐵𑐲𑐵 𑐳𑑂𑐣𑐵𑐟𑐎𑑀𑐟𑑂𑐟𑐬 𑐟𑐐𑐶𑑄𑐫𑐵 𑐧𑑂𑐰𑐣𑐵𑐩𑐶𑐥𑐶𑑄 𑐫𑐵𑐣𑐵 𑐩𑐸𑐎𑑂𑐎𑑄 𑐳𑐸𑐂𑐏𑐸𑐩𑑂𑐴𑐳𑑂𑐫𑐵𑑄 𑐮𑐔𑑂𑐕𑐷𑐫𑑄𑐎 𑐎𑐎𑑂𑐲𑐵𑐫𑑂 𑐔𑑂𑐰𑐣𑐵 𑐖𑐵𑑃𑐔 𑐧𑑂𑐫𑐹𑐐𑐸 𑐏𑑅 𑑋

𑐰𑐜𑐵𑐣𑐵𑐥 𑐳𑐩𑐣𑑂𑐰𑐫 𑐫𑐵𑐣𑐵 𑐱𑑄𑐏𑐢𑐬𑐳𑐵𑐏𑑂𑐰𑐵𑑅𑐫𑐵 𑐗𑑂𑐰𑐵𑐟𑐵 𑐟𑐫𑐾𑐫𑐵 𑐣𑐶𑐟𑐶𑑄 𑐁𑑅 𑐰𑐂𑐐𑐸 𑐁𑐬𑑂𑐠𑐶𑐎 𑐰𑐬𑑂𑐲𑐫𑐵 𑐣𑑂𑐴𑐹𑐐𑐸 𑐧𑐖𑐾𑐚𑐫𑑂 𑐄𑐎𑐶𑐫𑐵𑐣 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾𑐐𑐸 𑐧𑐔𑑄 𑐩𑐹𑐥𑐵𑐴𑐵𑑃 𑐄𑐥𑐩𑐾𑐫𑐬 𑐀𑐢𑐶𑐎𑐵𑐬𑐷𑑄 𑐧𑐶𑐫𑐵𑐡𑐷𑐐𑐸 𑐡𑐸 𑑋

𑐨𑐵𑐫𑑂‌𑐫𑐵𑐟 𑐥𑑂𑐬𑐵𑐠𑐩𑐶𑐎𑐟𑐵 𑐧𑐶𑐂𑐩𑐵 𑐨𑐵𑐫𑑂‌𑐫𑐵𑐟 𑐐𑐧𑐮𑐾 𑐣𑑄 𑐀𑐥𑐩𑐵𑐣 𑐰 𑐀𑐥𑐴𑐾𑐮𑐣𑐵 𑐫𑐵𑐫𑐾𑐩𑐖𑑂𑐫𑐹𑐐𑐸 𑐏𑑃 𑐨𑑂𑐫𑐵𑐮𑐶 𑐳𑑂𑐎𑐹𑐮𑐫𑐵 𑐥𑑂𑐬𑐶𑐣𑑂𑐳𑐶𑐥𑐮 𑐬𑐧𑐶𑐣 𑐱𑐬𑑂𑐩𑐵𑑄 𑐢𑐫𑐵𑐡𑐶𑐮𑐳𑐵 𑐄𑐎𑐶𑐫𑐵𑐟 𑐩𑐵𑑅𑐐𑐸 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾 𑐐𑐸 𑐧𑐔𑑄 𑑑𑑑 𑐣𑑄 𑐰𑐜𑐵 𑐀𑐢𑑂𑐫𑐎𑑂𑐲 𑐣𑐷𑐮 𑐎𑐸𑐩𑐵𑐬 𑐡𑐾𑐳𑐵𑐬𑑄 𑐧𑐶𑐫𑐵𑐡𑐷𑐐𑐸 𑐡𑐸 𑑋

𑐣𑐾𑐥𑐵𑐮 𑐮𑐶𑐥𑐶 𑐐𑐸𑐠𑐶𑐫𑐵 𑐣𑐵𑐫𑑅 𑐟𑐵𑐩𑑂𑐬𑐵𑐎𑐵𑐬𑑄 𑐬𑐘𑑂𑐖𑐣𑐵 𑐮𑐶𑐥𑐶 𑐢𑐿𑐐𑐸 𑐥𑐸𑐮𑐵𑑄𑐐𑐸 𑐮𑐶𑐥𑐶 𑐣𑐵𑐥𑑄 𑐡𑐾𑐫𑑂‌𑐫𑐵 𑐢𑐬𑑀𑐴𑐬 𑐖𑐹𑐐𑐸 𑐢𑐵𑐳𑐾𑑄 𑐄𑐎𑐶𑐫𑐵𑐟 𑐳𑐸𑐣𑐵𑑄 𑐕𑑂𑐫𑐮𑐵𑐧𑐸𑐮𑐵 𑐴𑐫𑐵 𑐣𑐵𑐮𑐵 𑐎𑐵𑐂 𑐂𑐩𑐶𑐐𑐸 𑐴𑐾 𑐖𑐸𑐂𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐡𑐸 𑑋

𑐠𑑅𑐥𑐶𑐳𑑄 𑐳𑐫𑐾𑐎𑐾𑐟 𑐳𑐸𑐬𑐸𑐁𑐟 𑐫𑐵𑑅𑐐𑐸 𑐬𑐘𑑂𑐖𑐣𑐵 𑐮𑐶𑐥𑐶𑐫𑐵𑐟 𑐢𑐿𑐬𑑂𑐫𑐟𑐵𑐥𑐹𑐬𑑂𑐰𑐎 𑐥𑑂𑐬𑐵𑐎𑑂𑐚𑐶𑐳 𑐫𑐵𑐣𑐵 𑐕𑐸𑐣𑑄 𑐎𑐠𑑄𑐫𑐵 𑐡𑐳𑐶𑐥𑑁 , 𑐧𑑂𑐰𑐣𑐵𑐥𑑁 , 𑐴𑐣𑐵𑐥𑑁 , 𑐳𑐸𑐨𑐵𑐫𑐥𑑁 , 𑐮𑐳𑐟𑐵𑐥𑑁𑐮𑐾 𑐕𑑂𑐫𑐮𑐾𑐟 𑐥𑑂𑐬𑐱𑐶𑐎𑑂𑐲𑐎 𑐩𑐴𑐬𑑂𑐖𑐣𑑄 𑐧𑑂𑐰𑐣𑐵𑐩𑐶𑐥𑐶𑑄𑐟 𑐂𑐣𑐵𑐥 𑐫𑐵𑑅𑐐𑐸 𑐡𑐸 𑑋