𑐥𑑂𑐬𑐵𑐢𑑂𑐫𑐵𑐥𑐎 𑐟𑐸𑐮𑐵𑐢𑐬𑐫𑐵𑐟 𑐩𑐵𑐟𑐺𑐨𑐵𑐲𑐵 𑐬𑐵𑐲𑑂𑐚𑑂𑐬𑐶𑐫 𑐳𑐾𑐰𑐵 𑐥𑐸𑐬𑐳𑑂𑐎𑐵𑐬–𑑒𑑐𑑘𑑒 𑐮𑑅𑐮𑑂𑐴𑐵𑐟

𑐳𑐩𑐵𑐮𑑀𑐔𑐎 𑐣𑐵𑐥𑑄 𑐥𑑂𑐬𑐵𑐢𑑂𑐫𑐵𑐥𑐎 𑐥𑑂𑐬𑐾𑐩𑐱𑐵𑐣𑑂𑐟𑐶 𑐟𑐸𑐮𑐵𑐢𑐬𑐫𑐵𑐟 𑐩𑐵𑐟𑐺𑐨𑐵𑐲𑐵 𑐬𑐵𑐲𑑂𑐚𑑂𑐬𑐶𑐫 𑐳𑐾𑐰𑐵 𑐥𑐸𑐬𑐳𑑂𑐎𑐵𑐬–𑑒𑑐𑑘𑑒 𑐮𑑅𑐮𑑂𑐴𑐵𑑅𑐐𑐸 𑐡𑐸 𑑋

𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐄𑐟𑑂𑐠𑐵𑐣 𑐬𑐵𑐲𑑂𑐚𑑂𑐬𑐶𑐫 𑐥𑑂𑐬𑐟𑐶𑐲𑑂𑐛𑐵𑐣𑑄 𑐠𑑁𑑄 𑐠𑐣 𑐐𑑂𑐰𑐳𑐵𑑅𑐐𑑂𑐰𑑅𑐐𑐸 𑐳𑐩𑐵𑐬𑑀𑐴𑐫𑑂 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐁𑐫𑑀𑐐𑐫𑐵 𑐣𑐵𑐫𑑅 𑐬𑐵𑐩𑐧𑐴𑐵𑐡𑐸𑐬 𑐠𑐵𑐥𑐵𑑄 𑐥𑑂𑐬𑐵𑐢𑑂𑐫𑐵𑐥𑐎 𑐟𑐸𑐮𑐵𑐢𑐬𑐫𑐵𑐟 𑐕𑐐𑐹 𑐮𑐏 𑐡𑐵𑑄𑐮𑐶𑐳𑐾𑑄𑐫𑐵 𑐥𑐸𑐬𑐳𑑂𑐎𑐵𑐬 𑐮𑑅𑐮𑑂𑐴𑐵𑐣𑐵𑐡𑐶𑐮 𑑋

𑐣𑐵𑐫𑑅 𑐠𑐵𑐥𑐵𑑄 𑐩𑐵𑐟𑐺𑐨𑐵𑐲𑐵𑐫𑑂 𑐫𑑀𑐐𑐡𑐵𑐣 𑐫𑐵𑑅𑐥𑐶𑑄 𑐰𑑂𑐫𑐎𑑂𑐟𑐶𑐟𑑂𑐰𑐥𑐶𑐣𑐶𑐐𑐸 𑐳𑐩𑑂𑐩𑐵𑐣𑑄 𑐨𑐵𑐲𑐵𑐫𑐵 𑐳𑐩𑑂𑐩𑐵𑐣 𑐖𑐸𑐂 𑐢𑐫𑐵𑐡𑐶𑐮 𑑋 “𑐁𑑅𑐟𑐎 𑐫𑐎𑑂𑐰 𑐐𑐬𑐶𑐩𑐵 𑐡𑐸𑐥𑐶𑑄 𑐩𑐣𑐹𑐟𑐫𑑂𑐳𑑄 𑐠𑑂𑐰 𑐥𑐸𑐬𑐳𑑂𑐎𑐵𑐬 𑐎𑐵𑐫𑐾𑐢𑐸𑑄𑐎𑐹𑐐𑐸 𑐡𑐸, 𑐠𑑂𑐰 𑐧𑐵𑑄𑐮𑐵𑑅𑐐𑐸 𑐥𑐎𑑂𑐲 𑐏𑑅 𑑋 𑐩𑐵𑐟𑐺𑐨𑐵𑐲𑐵𑐫𑐵𑐟 𑐩𑐵𑐫𑐵 𑐫𑐵𑐂𑐥𑐶𑑄𑐟 𑐴𑐣𑐵𑑅 𑐡𑐾𑐫𑑂𑐫𑐵 𑐨𑐵𑐲𑐶𑐎 𑐰𑐶𑐰𑐶𑐢𑐟𑐵𑐫𑐵𑐟 𑐎𑐵𑐫𑐩 𑐫𑐵𑐣𑐵𑐟𑐫𑐾𑐟 𑐗𑐷𑐥𑐶𑑄 𑐳𑐎𑐮𑐾𑑄 𑐎𑑂𑐬𑐶𑐫𑐵𑐱𑐷𑐮 𑐖𑐸𑐂𑐩𑐵𑑅”, 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮 𑑋

𑐣𑐵𑐫𑑅 𑐠𑐵𑐥𑐵𑑄 𑐦𑐸𑐎𑑂𑐎 𑐖𑐵𑐟𑐷𑐫 𑐳𑑄𑐳𑑂𑐠𑐵𑐟𑐫𑑂𑐳𑑄 𑐫𑐵𑐂𑐐𑐸 𑐩𑐵𑐟𑐺𑐨𑐵𑐲𑐵𑐫𑐵 𑐳𑐩𑑂𑐩𑐵𑐣 𑐣𑐵𑐥𑑄 𑐥𑐸𑐬𑐳𑑂𑐎𑐵𑐬 𑐖𑑂𑐫𑐵𑐗𑑂𑐰𑑅𑐫𑐵𑐟 𑐩𑐵𑐟𑐺𑐨𑐵𑐲𑐵𑑄 𑐴𑐾 𑐳𑐘𑑂𑐔𑐵𑐮𑐣 𑐫𑐵𑐫𑐾𑐐𑐸 𑐀𑐰𑐳𑑂𑐠𑐵 𑐡𑐫𑐾𑐎𑐾𑐟 𑐂𑐣𑐵𑐥 𑐫𑐵𑐣𑐵𑐡𑐶𑐮 𑑋

𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐩𑐴𑐵𑐳𑐒𑑂𑐑𑐫𑐵 𑐣𑐵𑐫𑑅 𑐣𑐶𑐩𑐵 𑐮𑐵𑐩𑐵𑑄 𑐩𑐵𑐟𑐺𑐨𑐵𑐲𑐵 𑐳𑑄𑐬𑐎𑑂𑐲𑐞 𑐰 𑐳𑑄𑐰𑐡𑑂𑐬𑑂𑐢𑐣𑐫𑐵 𑐣𑐶𑑄𑐟𑐶𑑄 𑐠𑐸𑐖𑐵𑑅𑐐𑐸 𑐳𑐩𑑂𑐩𑐵𑐣 𑐩𑐴𑐟𑑂𑐟𑑂𑐰𑐥𑐹𑐬𑑂𑐞 𑐖𑐸𑐂𑐐𑐸 𑐢𑐵𑐬𑐞𑐵 𑐟𑐫𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐨𑐵𑐲𑐶𑐎 𑐰 𑐖𑐵𑐟𑐷𑐫 𑐰𑐶𑐰𑐶𑐢𑐟𑐵𑐫𑐵𑐟 𑐴𑐣𑐵𑑅 𑐠𑐸𑐎𑐶𑐫𑐵 𑐩𑑁𑐮𑐶𑐎𑐟𑐵 𑐰 𑐀𑐳𑑂𑐟𑐶𑐟𑑂𑐰𑐫𑐵𑐟 𑐢𑑂𑐫𑐵𑐣 𑐧𑐶𑐫𑐵𑑅 𑐖𑑂𑐫𑐵 𑐫𑐵𑐫𑐾𑐟 𑐬𑐵𑐖𑑂𑐫𑑄 𑐮𑐶𑐔𑑂𑐰𑑅 𑐰𑐂𑐐𑐸 𑐖𑑂𑐫𑐵 𑐫𑐵𑐫𑐾𑐩𑐵𑑅𑐐𑐸𑐮𑐶𑐂 𑐧𑑅 𑐧𑐶𑐫𑐵𑐡𑐶𑐮 𑑋

𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐥𑐹𑐬𑑂𑐰𑐄𑐥𑐵𑐢𑑂𑐫𑐎𑑂𑐲 𑐮𑐶𑐳𑐾𑑄 𑐥𑐸𑐬𑐳𑑂𑐎𑐵𑐬 𑐕𑐣𑑀𑐚 𑐳𑐩𑐶𑐟𑐶𑐫𑐵 𑐎𑐖𑐶 𑐖𑐶𑐟𑐥𑐵𑐮 𑐎𑐶𑐬𑐵𑐟𑐾𑑄 𑐟𑐸𑐮𑐵𑐢𑐬𑑄 𑐎𑐵𑐫𑐩 𑐫𑐵𑐣𑐵𑐡𑐷𑐐𑐸 𑐥𑑂𑐬𑐟𑐶𑐲𑑂𑐛𑐵 𑐰 𑐫𑑀𑐐𑐡𑐵𑐣𑐫𑐵 𑐩𑐹𑐮𑑂𑐫𑐵𑐒𑑂𑐎𑐣 𑐫𑐵𑐣𑐵𑑅 𑐥𑐸𑐬𑐳𑑂𑐎𑐵𑐬 𑐮𑑅𑐮𑑂𑐴𑐵𑐫𑐾𑐐𑐸 𑐣𑐶𑐬𑑂𑐞𑐫 𑐫𑐵𑐣𑐵𑐐𑐸 𑐢𑐫𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐫𑐸𑐣𑐾𑐳𑑂𑐎𑑀𑐫𑐵 𑐀𑐢𑑂𑐫𑐫𑐣𑐎𑐠𑑄 𑐣𑐾𑐥𑐵𑐮𑐫𑑂 𑐮𑑂𑐴𑐵𑐂𑐐𑐸 𑐳𑐔𑑂𑐕𑐶 𑐰 𑑒𑑔 𑐨𑐵𑐲𑐵𑐩𑐢𑑂𑐫𑐾 𑑖𑑐 𑐐𑐹𑐟𑐶 𑐨𑐵𑐲𑐵 𑐮𑑀𑐥𑑀𑐣𑑂𑐩𑐸𑐏 𑐢𑐮𑐏𑐫𑑂 𑐡𑐹𑐐𑐸 𑐣𑑂𑐴𑑂𑐫𑐠𑐣𑐵𑐡𑐶𑐳𑐾𑑄 𑐨𑐵𑐲𑐵, 𑐳𑑄𑐳𑑂𑐎𑐺𑐟𑐶 𑐰 𑐳𑐨𑑂𑐫𑐟𑐵𑐫𑐵𑐟 𑐖𑐷𑐰𑐣𑑂𑐟 𑐫𑐵𑐣𑐵𑐟𑐫𑐾𑐟 𑐫𑑀𑐐𑐡𑐵𑐣 𑐫𑐵𑑅𑐥𑐶𑑄𑐟 𑐴𑐣𑐾𑐩𑐵𑑅𑐐𑐸 𑐢𑐵𑐬𑐞𑐵 𑐟𑐫𑐵𑐡𑐶𑐮 𑑋 – 𑐬𑐵𑐳𑐳

𑐥𑐸𑐬𑐳𑑂𑐎𑐺𑐟 𑐰𑑂𑐫𑐎𑑂𑐟𑐶𑐟𑑂𑐰 𑐥𑑂𑐬𑐵𑐢𑑂𑐫𑐵𑐥𑐎 𑐟𑐸𑐮𑐵𑐢𑐬𑑄 𑐠𑑂𑐰 𑐳𑐩𑑂𑐩𑐵𑐣𑑄 𑐠𑑅 𑐖𑐎 𑐩𑐏𑐸 𑐣𑐾𑐥𑐵𑐮 𑐨𑐵𑐲𑐵 𑐰 𑐦𑐸𑐎𑑂𑐎 𑐩𑐵𑐟𑐺𑐨𑐵𑐲𑐵𑐫𑐵𑐟 𑐳𑐩𑑂𑐩𑐵𑐣 𑐫𑐵𑑅𑐐𑐸 𑐩𑐴𑐳𑐸𑐳 𑐫𑐵𑐣𑐵 𑐢𑐫𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐥𑐸𑐬𑐳𑑂𑐎𑐵𑐬𑑄 𑐩𑐵𑐟𑐺𑐨𑐵𑐲𑐵𑐫𑐵 𑐳𑑄𑐬𑐎𑑂𑐲𑐞 𑐰 𑐳𑑄𑐰𑐡𑑂𑐬𑑂𑐢𑐣𑐫𑑂 𑐠𑐥 𑐖𑐶𑐩𑑂𑐩𑐾𑐰𑐵𑐬𑐷 𑐰 𑐡𑐵𑐫𑐶𑐟𑑂𑐰 𑐀𑐥𑑂𑐰𑑅𑐐𑐸 𑐢𑐫𑐵𑐡𑐶𑐮 𑑋

𑐥𑐸𑐬𑐳𑑂𑐎𑐺𑐟 𑐰𑑂𑐫𑐎𑑂𑐟𑐶𑐟𑑂𑐰 𑐥𑑂𑐬𑐵𑐢𑑂𑐫𑐵𑐥𑐎 𑐟𑐸𑐮𑐵𑐢𑐬 𑐣𑐾𑐥𑐵𑐮𑐨𑐵𑐲𑐵 𑐨𑐵𑐲𑐵, 𑐳𑐵𑐴𑐶𑐟𑑂𑐫, 𑐳𑐩𑐵𑐮𑑀𑐔𑐣𑐵 𑐣𑐵𑐥𑑄 𑐳𑐵𑑄𑐳𑑂𑐎𑐺𑐟𑐶𑐎 𑐀𑐢𑑂𑐫𑐫𑐣𑐫𑐵 𑐣𑐵𑑄𑐖𑐵𑑅𑐩𑑂𑐴 𑐀𑐢𑑂𑐫𑐾𑐟𑐵 𑐣𑐵𑐥𑑄 𑐀𑐰𑐎𑐵𑐱 𑐎𑐵𑐫𑐾𑐢𑐸𑑄𑐎𑐹𑐩𑑂𑐴 𑐥𑑂𑐬𑐵𑐢𑑂𑐫𑐵𑐥𑐎 𑐏𑑅 𑑋 𑐰𑐶𑐳𑑄 𑑒𑑐𑑐𑑘 𑐫𑑂 𑐫𑐾𑑃𑐫𑐵 𑐨𑑀𑐚𑐵𑐴𑐶𑐚𑐷𑐂 𑐧𑐹𑐩𑑂𑐴 𑐰𑐫𑑂𑐎𑑅 𑐠𑑁𑑄𑐎𑐣𑑂𑐴𑐫𑑂 𑐎𑐥𑐸𑐬𑐢𑐵𑐬𑐵𑐫𑑂 𑐧𑐳𑑀𑐧𑐵𑐳 𑐫𑐵𑐣𑐵𑐰𑐫𑐵𑐔𑑂𑐰𑐣𑐵𑐡𑐷𑐐𑐸 𑐏𑑅 𑑋 𑐰𑐫𑑂𑐎𑑅𑐫𑐵 𑐣𑑂𑐴𑐵𑐥𑐵𑑄𑐐𑐸 𑐬𑐔𑐣𑐵 ‘𑐖𑐷𑐰𑐣 𑐰 𑐳𑐒𑑂𑐑𑐬𑑂𑐲’ 𑐣𑐾𑐥𑐵𑐮 𑐳𑑄𑐰𑐟𑑂 𑑑𑑐𑑘𑑘 𑐫𑑂 ‘𑐳𑐶𑐟𑐸’ 𑐥𑐟𑑂𑐬𑐶𑐎𑐵𑐫𑑂 𑐥𑐶𑐴𑐵𑑃𑐰𑑅𑐐𑐸 𑐏𑑅 𑑋

𑐟𑑂𑐬𑐶𑐨𑐸𑐰𑐣 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐥𑐵𑐏𑐾𑑄 𑐀𑐬𑑂𑐠𑐱𑐵𑐳𑑂𑐟𑑂𑐬𑐫𑑂 𑐳𑑂𑐣𑐵𑐟𑐎𑑀𑐟𑑂𑐟𑐬 𑐫𑐵𑐣𑐵𑐡𑐷𑐩𑑂𑐴 𑐟𑐸𑐮𑐵𑐢𑐬𑑄 𑐥𑐡𑑂𑐩𑐎𑐣𑑂𑐫𑐵 𑐎𑑂𑐫𑐵𑐩𑑂𑐥𑐳𑐫𑑂 𑑓𑑕 𑐡𑑃 𑐰 𑐣𑐾𑐥𑐵𑐮𑐨𑐵𑐲𑐵 𑐎𑐾𑐣𑑂𑐡𑑂𑐬𑐷𑐫 𑐰𑐶𑐨𑐵𑐐𑐫𑑂 𑐣𑑂𑐫𑐵𑐡𑑃 𑐥𑑂𑐬𑐵𑐢𑑂𑐫𑐵𑐥𑐣 𑐫𑐵𑐣𑐵𑐡𑐷𑐐𑐸 𑐄𑐐𑐸 𑐗𑑂𑐰𑐮𑐫𑑂 𑐖𑐵𑐣𑐎𑐵𑐬𑐷 𑐧𑑂𑐫𑐹𑐐𑐸 𑐏𑑅 𑑋 𑐰𑐫𑑂𑐎𑐮𑑄 ‘𑐥𑐮𑐾𑐳𑑂𑐰𑐵𑑄 𑐥𑐸𑐔𑑅’ 𑐐𑐛𑐣 𑐫𑐵𑐣𑐵𑑅 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐶𑐎 𑐖𑑂𑐫𑐵𑐏𑑃 𑐟𑐧𑑂𑐫𑐵𑐎𑐾𑐟 𑐩𑐴𑐟𑑂𑐟𑑂𑐰𑐥𑐹𑐬𑑂𑐞 𑐨𑐹𑐩𑐶𑐎𑐵 𑐩𑑂𑐴𑐶𑐟𑐵𑐡𑐶𑐮 𑑋