𑐣𑐾𑐥𑐵𑐮𑐨𑐵𑐲𑐵 𑐩𑑄𑐎𑐵𑑅 𑐏𑐮𑑅 𑐧𑐾𑐣𑐷𑑄 𑐮𑑂𑐫𑐵𑐫𑑂𑐩𑑂𑐴 𑐮𑑂𑐫𑐵𑐳𑐾𑐟𑐫𑑂𑐟 𑐮𑐎𑑂𑐲𑐶𑐟 𑐫𑐵𑐣𑐵𑑅 𑐩𑑁𑐮𑐶𑐎 𑐥𑑂𑐫𑐵𑐏𑑄𑐫𑐵 𑐥𑑂𑐬𑐱𑐶𑐎𑑂𑐲𑐞 𑐱𑐸𑐬𑐸 𑐫𑐵𑑅𑐐𑐸 𑐡𑐸 𑑋 𑐩𑑄𑐎𑐵𑑅 𑐏𑐮𑑅 𑐧𑐾𑐣𑐷𑑄 𑐳𑑂𑐠𑐵𑐣𑐷𑐫 𑐩𑑁𑐮𑐶𑐎 𑐧𑐬𑑂𑐏𑐾 𑐥𑑂𑐫𑐵𑐏𑑄𑐫𑐵 𑐥𑐸𑐳𑑂𑐟𑐵𑐬𑐣𑑂𑐟𑐬𑐞 𑐫𑐵𑐫𑐾𑐐𑐸 𑐮𑑂𑐫𑐵𑐏𑑄 𑐮𑑂𑐫𑐵𑐫𑑂 𑐥𑐸𑐳𑑂𑐟𑐵𑐫𑐵𑐟 𑐰𑐵 𑐥𑐷𑐐𑐸 (𑐬𑑀𑐥𑐵𑐂𑑃) 𑐰 𑐖𑑀𑐐𑐷 𑐥𑑂𑐫𑐵𑐏𑑄 𑐟𑐵𑐮𑐶𑐩 𑐳𑑄𑐔𑐵𑐮𑐣 𑐫𑐵𑑅𑐐𑐸 𑐏𑑅 𑑋

𑐩𑑄𑐎𑐵𑑅 𑐏𑐮𑑅 𑐧𑐾𑐣𑐷𑐫𑐵 𑐣𑑂𑐰𑐎𑐸 𑐎𑐰𑐶𑐬 𑐱𑑂𑐬𑐾𑐲𑑂𑐛𑑄 𑐧𑐾𑐣𑐷𑐫𑐵 𑐩𑑁𑐮𑐶𑐎 𑐧𑐬𑑂𑐏𑐾 𑐥𑑂𑐫𑐵𑐏𑑄 𑐴𑐸𑐮𑐷𑐥𑐶𑑄 𑐎𑐮𑐵𑐎𑐵𑐬𑐫𑐵 𑐀𑐨𑐵𑐰 𑐖𑐸𑐂𑐰𑑄 𑐳𑑂𑐎𑐸𑐮𑐫𑑂 𑐁𑐏𑑅 𑐧𑑂𑐰𑐣𑐷𑐥𑐶𑑄 𑐮𑑂𑐫𑐵𑐫𑑂𑐩𑑂𑐴 𑐥𑐸𑐳𑑂𑐟𑐵𑐫𑐵𑐟 𑐟𑐵𑐮𑐶𑐩 𑐧𑐶𑐫𑐵𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋 𑐳𑑂𑐠𑐵𑐣𑐷𑐫 𑐩𑑁𑐮𑐶𑐎 𑐧𑐬𑑂𑐏𑐾 𑐥𑑂𑐫𑐵𑐏𑑄𑐫𑐵 𑐳𑐷𑐥 𑐰 𑐎𑐮𑐵 𑐥𑐸𑐳𑑂𑐟𑐵𑐣𑑂𑐟𑐬𑐞 𑐫𑐵𑐫𑐾𑐐𑐸 𑐟𑐵𑐮𑐶𑐩𑐫𑐵 𑐩𑐸𑐏𑑂𑐫 𑐄𑐡𑑂𑐡𑐾𑐱𑑂𑐫 𑐖𑐹𑐐𑐸 𑐣𑑄 𑐰𑐫𑑂𑐎𑐮𑑄 𑐎𑐣𑐵𑐡𑐶𑐮 𑑋

𑐰𑑄𑐐𑐸 𑐨𑐡𑑁 𑑑𑑘 𑐐𑐟𑐾𑐣𑐶𑐳𑐾𑑄 𑐣𑑂𑐴𑑂𑐫𑐵𑑅𑐐𑐸 𑐟𑐵𑐮𑐶𑐩 𑐀𑐳𑑀𑐖 𑑑 𑐐𑐟𑐾𑐟𑐎 𑐣𑑂𑐴𑑂𑐫𑐵𑐂 𑑋 𑐧𑐾𑐣𑐷 𑐣𑐐𑐬𑐥𑐵𑐮𑐶𑐎𑐵 𑐰𑐜𑐵 𑑗 𑐰 𑑘𑐫𑐵 𑐐𑑂𑐰𑐵𑐴𑐵𑐮𑐶𑐂 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐟𑐵𑐮𑐶𑐩𑐫𑑂 𑐧𑐾𑐣𑐷𑐫𑐵 𑐳𑑂𑐰𑑄𑐐𑐹 𑐰𑐶𑐡𑑂𑐫𑐵𑐮𑐫𑐫𑐵 𑐣𑑂𑐫𑐫𑑂𑐩𑑂𑐴 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐮𑑂𑐫𑐵𑐫𑑂𑐩𑑂𑐴 𑐮𑑂𑐫𑐵𑐳𑐾𑐟𑐫𑑂𑐳𑑄 𑐥𑑂𑐬𑐱𑐶𑐎𑑂𑐲𑐞 𑐎𑐫𑐵𑐔𑑂𑐰𑑄𑐐𑐸 𑐡𑐸 𑑋  𑐣𑑂𑐰𑐎𑐸 𑐱𑑂𑐬𑐾𑐲𑑂𑐛𑑄 𑐎𑐣𑐵𑐡𑐷𑐎𑐠𑑄 𑐰𑐵 𑐥𑐷𑐐𑐸 𑐥𑑂𑐫𑐵𑐏𑑄𑐫𑐵 𑐣𑐶𑑄𑐟𑐶𑑄 𑐳𑑂𑐰𑐷𑐩𑑂𑐴 𑐰 𑐖𑑀𑐐𑐷 𑐥𑑂𑐫𑐵𑐏𑑄𑐫𑐵 𑐣𑐶𑑄𑐟𑐶𑑄 𑐗𑐶𑐩𑑂𑐴 𑐎𑐮𑐵𑐎𑐵𑐬𑐫𑐵 𑐁𑐰𑐱𑑂𑐫𑐎 𑐖𑐸𑐂 𑑋

𑐩𑑄𑐎𑐵𑑅 𑐏𑐮𑑅 𑐧𑐾𑐣𑐷𑐫𑐵 𑐥𑐸𑐮𑐵𑑄𑐩𑑂𑐴 𑐣𑐵𑐫𑑅 𑐬𑐵𑐖𑐾𑐣𑑂𑐡𑑂𑐬𑐎𑐸𑐩𑐵𑐬 𑐱𑑂𑐬𑐾𑐲𑑂𑐛𑑄 𑐎𑐣𑐵𑐡𑐷𑐎𑐠𑑄 𑐠𑑂𑐫𑑄𑐩𑐠𑑂𑐫𑑄 𑐣𑐶𑐳𑑅 𑐡𑑃 𑐣𑑂𑐴𑑂𑐫𑑅𑐣𑐶𑐳𑐾𑑄 𑐡𑑃𑐫𑑂𑐡𑐳𑑄 𑐧𑐾𑐣𑐷 𑐧𑐖𑐵𑐬𑐫𑑂 𑐮𑐕𑐶𑐟𑐎 𑐎𑑂𑐫𑐣𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐧𑐬𑑂𑐏𑐾 𑐥𑑂𑐫𑐵𑐏𑐣𑐫𑑂 𑐥𑑂𑐫𑐵𑐏𑑄 𑐮𑑂𑐴𑐸𑐂𑐥𑐶𑑄 𑐎𑐮𑐵𑐎𑐵𑐬𑐫𑐵 𑐀𑐨𑐵𑐰 𑐖𑐸𑐂𑐰𑑄 𑐣𑑂𑐴𑐹 𑐥𑐸𑐳𑑂𑐟𑐵𑐫𑐵𑐟 𑐳𑐷𑐥 𑐮𑑅𑐮𑑂𑐴𑐵𑐫𑐾𑐐𑐸 𑐎𑐸𑐟𑑅𑐎𑐠𑑄 𑐥𑑂𑐬𑐱𑐶𑐎𑑂𑐲𑐞 𑐱𑐸𑐬𑐸 𑐫𑐵𑑅𑐐𑐸 𑐏𑑅 𑑋 𑐰𑐫𑑂𑐎𑐮𑑄 𑐥𑐸𑐮𑐵𑑄𑐥𑐶𑑄 𑐎𑐮𑐵𑐎𑐵𑐬𑐟 𑐟𑐳𑐎𑑄 𑐖𑑂𑐫𑐵𑐠𑑅 𑐖𑐸𑐂𑐢𑐸𑑄𑐎𑐹𑐐𑐸𑐰 𑐐𑐸𑐮𑐶𑐏𑐾 𑐩𑐡𑐫𑐵 𑐣𑑄 𑐰𑐣𑐾𑐢𑐸𑑄𑐎𑐹 𑐣𑐵𑐥𑑄 𑐰𑐶𑐡𑐾𑐱 𑐰𑑄𑐐𑐸 𑐰 𑐣𑑂𑐴𑐹 𑐥𑐸𑐳𑑂𑐟𑐵𑐫𑑂 𑐳𑑄𑐳𑑂𑐎𑐺𑐟𑐶 𑐴𑐳𑑂𑐟𑐵𑐣𑑂𑐟𑐬𑐞 𑐩𑐖𑐹𑐐𑐮𑐶𑑄 𑐎𑐮𑐵𑐎𑐵𑐬𑐫𑐵 𑐀𑐨𑐵𑐰 𑐖𑐎 𑐩𑐏𑐳𑐾 𑐩𑑁𑐮𑐶𑐎 𑐳𑑄𑐳𑑂𑐎𑐺𑐟𑐶 𑐴𑐾 𑐮𑑀𑐥 𑐖𑐸𑐂 𑐀𑐰𑐳𑑂𑐠𑐵𑐫𑑂 𑐠𑑂𑐫𑑄𑐐𑐸 𑐡𑐸 𑐢𑐫𑐵𑐡𑐶𑐮 𑑋

𑐠𑑂𑐰 𑐳𑑂𑐰𑐫𑐵𑑄 𑐣𑑂𑐴𑑂𑐫𑑅 𑐣𑐾𑐰𑐵𑑅 𑐳𑐩𑐸𑐡𑐵𑐫𑐫𑐵 𑐩𑐶𑐖𑑄𑐟𑐫𑑂𑐳𑑄 𑐖𑐎 𑐮𑑂𑐴𑐸𑐂𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐧𑐬𑑂𑐏𑐾 𑐥𑑂𑐫𑐵𑐏𑑄 𑐮𑐶𑐥𑐵𑑄𑐐𑐸 𑐂𑐮𑐫𑑂 𑐩𑐶𑐳𑐵𑐥𑐶𑑄 𑐮𑐶𑐳𑐾𑑄 𑐩𑐾𑐩𑐾𑐐𑐸 𑐳𑐩𑐸𑐡𑐵𑐫𑐵𑐥𑐶𑑄𑐟 𑐣𑑄 𑐡𑐸𑐠𑑂𑐫𑐵𑐎𑐵𑑅 𑐥𑑂𑐫𑐵𑐏𑑄 𑐎𑑂𑐫𑐣𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑐣𑐵𑐐𑐸 𑐥𑐸𑐮𑐵𑑄𑐩𑑂𑐴 𑐣𑐵𑐫𑑅 𑐱𑑂𑐬𑐾𑐲𑑂𑐛𑑄 𑐎𑐣𑐵𑐡𑐶𑐮 𑑋

𑐠𑐸𑐐𑐸𑐳𑐷 𑐧𑐾𑐣𑐷 𑐧𑐖𑐵𑐬𑐫𑑂 𑐮𑐵𑐏𑐾 𑐥𑑂𑐫𑐵𑐏𑑄, 𑐳𑐮 𑐥𑑂𑐫𑐵𑐏𑑄, 𑐣𑐵𑐐𑐣𑐵𑐐𑐶𑐣𑐷, 𑐡𑑂𑐰𑑃𑐴 𑐥𑑂𑐫𑐵𑐏𑑄, 𑐰𑐵 𑐥𑐷𑐐𑐸 𑐥𑑂𑐫𑐵𑐏𑑄, 𑐰𑐵𑐩𑐵 𑐥𑑂𑐫𑐵𑐏𑑄 𑐎𑑂𑐫𑐣𑐾𑐐𑐸 𑐐𑑂𑐰𑐳𑐵𑑅 𑐡𑐸𑐐𑐸 𑐩𑑄𑐎𑐵𑑅 𑐏𑐮𑑅 𑐧𑐾𑐣𑐷𑑄 𑐖𑐵𑐣𑐎𑐵𑐬𑐷 𑐧𑐶𑐄𑐐𑐸 𑐡𑐸 𑑋

𑐣𑐾𑐰𑐵𑑅𑐟𑐫𑑂 𑐧𑐵𑐴𑐸𑐮𑑂𑐫𑐟𑐵 𑐡𑐸𑐐𑐸 𑐧𑐾𑐣𑐷 𑐧𑐖𑐵𑐬𑐫𑑂 𑐰𑐵 𑐥𑐷 𑐳𑐶𑐢𑐫𑐾𑐎𑐵𑑅 𑐐𑐠𑐵𑑄𑐩𑐸𑐐𑑅𑐣𑐶𑐳𑐾𑑄 𑐔𑐠𑐵𑑅 𑐟𑐎 𑐥𑑂𑐫𑐵𑐏𑑄 𑐎𑑂𑐫𑐣𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋