𑐫𑐾𑑃𑐫𑐵 𑐰𑐶𑐱𑑂𑐰 𑐱𑐵𑐣𑑂𑐟𑐶 𑐧𑐶𑐴𑐵𑐬𑐫𑑂 𑐧𑐸.𑐳𑑄. 𑑒𑑕𑑖𑑖 𑐫𑐵 𑑖𑑐 𑐎𑑂𑐰𑑅𑐐𑐸 𑐣𑐾𑐥𑐵𑐮 𑐧𑑁𑐡𑑂𑐢 𑐥𑐬𑐶𑐫𑐟𑐶 𑐱𑐶𑐎𑑂𑐲𑐵𑐫𑐵 𑐡𑐷𑐎𑑂𑐲𑐵𑐣𑑂𑐟 𑐳𑐩𑐵𑐬𑑀𑐴 𑐕𑐐𑐹 𑐟𑑅𑐖𑐶𑐐𑐸 𑐖𑑂𑐫𑐵𑐗𑑂𑐰 𑐫𑐵𑐳𑐾𑑄 𑐎𑑂𑐰𑐔𑐵𑐮 𑑋 𑐀𑐏𑐶𑐮 𑐣𑐾𑐥𑐵𑐮 𑐨𑐶𑐎𑑂𑐲𑐸 𑐩𑐴𑐵𑐳𑑄𑐑𑐫𑐵 𑐀𑐢𑑂𑐫𑐎𑑂𑐲 𑐣𑐵𑐥𑑄 𑐣𑐾𑐥𑐵𑐮 𑐧𑑁𑐡𑑂𑐢 𑐥𑐬𑐶𑐫𑐟𑐶 𑐱𑐶𑐎𑑂𑐲𑐵𑐫𑐵 𑐱𑐶𑐎𑑂𑐲𑐵𑐢𑑂𑐫𑐎𑑂𑐲 𑐨𑐶𑐎𑑂𑐲𑐸 𑐢𑐬𑑂𑐩𑐱𑑀𑐨𑐣 𑐩𑐴𑐵𑐳𑑂𑐠𑐰𑐶𑐬𑐫𑐵 𑐀𑐢𑑂𑐫𑐎𑑂𑐲𑐟𑐵𑐫𑑂 𑐖𑐹𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐰𑐳𑐥𑑀𑐮𑐥𑐵𑐏𑐾𑑄 𑐥𑐘𑑂𑐔 𑐱𑐶𑐮 𑐧𑐶𑐫𑐵𑐧𑐶𑐖𑑂𑐫𑐵𑐳𑐾𑑄 𑐥𑐬𑐶𑐫𑐟𑐶 𑐱𑐶𑐎𑑂𑐲𑐵𑐫𑐵 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑑄𑐟 𑐥𑐬𑐶𑐫𑐟𑐶 𑐥𑑂𑐬𑐟𑐶𑐖𑑂𑐘𑐵 𑐣𑑄 𑐫𑐵𑐎𑐵𑐧𑐶𑐖𑑂𑐫𑐵𑑅𑐐𑐸 𑐏𑑅 𑑋

𑐣𑐾𑐥𑐵𑐮 𑐧𑑁𑐡𑑂𑐢 𑐥𑐬𑐶𑐫𑐟𑐶 𑐱𑐶𑐎𑑂𑐲𑐵𑐫𑐵 𑐎𑐾𑐣𑑂𑐡𑑂𑐬𑐷𑐫 𑐥𑐬𑐷𑐎𑑂𑐲𑐵 𑐣𑐶𑐫𑐣𑑂𑐟𑑂𑐬𑐎 𑐨𑐶𑐎𑑂𑐲𑐸 𑐧𑑀𑐢𑐶𑐖𑑂𑐘𑐵𑐣 𑐩𑐴𑐵𑐳𑑂𑐠𑐰𑐶𑐬𑑄 𑐰𑐵𑐬𑑂𑐲𑐶𑐎 𑐥𑑂𑐬𑐟𑐶𑐰𑐾𑐡𑐣 𑐧𑐶𑐫𑐵𑐧𑐶𑐖𑑂𑐫𑐵𑑅𑐐𑐸 𑐗𑑂𑐰𑐮𑐫𑑂 𑐥𑐬𑐶𑐫𑐟𑑂𑐟𑐶 𑐱𑐶𑐎𑑂𑐲𑐵𑐫𑐵 𑐮𑐵𑐐𑐶 𑐁𑐬𑑂𑐠𑐶𑐎 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐷𑐥𑐶𑑄 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐣𑐵𑐥𑑄 𑐄𑐥𑐵𑐳𑐎–𑐄𑐥𑐵𑐳𑐶𑐎𑐵𑐥𑐶𑑄𑐟 𑐳𑐵𑐢𑐸𑐰𑐵𑐡 𑐧𑐶𑐫𑐵𑐧𑐶𑐖𑑂𑐫𑐵𑐟 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑄 𑐎𑐠𑑄 𑐗𑐵𑐫𑐵𑐡𑐷𑐩𑑂𑐴 𑐱𑐶𑐎𑑂𑐲𑐵, 𑐰𑐶𑐖𑑂𑐘𑐵𑐣 𑐟𑐠𑐵 𑐥𑑂𑐬𑐰𑐶𑐢𑐶𑐩𑐣𑑂𑐟𑑂𑐬𑐷 𑐀𑐱𑑀𑐎 𑐬𑐵𑐃𑑄 𑐄𑐟𑑂𑐎𑐺𑐲𑑂𑐚 𑐧𑐶𑐡𑑂𑐫𑐵𑐬𑑂𑐠𑐷𑐥𑐶𑑄𑐟 𑐥𑐸𑐬𑐳𑑂𑐎𑐵𑐬 𑐰 𑐥𑑂𑐬𑐩𑐵𑐞𑐥𑐟𑑂𑐬 𑐮𑑅𑐮𑑂𑐴𑐵𑐣𑐵𑐡𑐶𑐮 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐥𑐵𑑅𑐫𑐵 𑐮𑐵𑐐𑐶 𑐩𑑂𑐫𑐵𑐣𑐩𑐵𑐬𑐫𑐵 𑐬𑐵𑐖𑐡𑐹𑐟 𑐄 𑐳𑐿 𑐄 𑐣𑐵𑐥𑑄 𑐡𑐹𑐟𑐵𑐰𑐵𑐳𑐫𑐵 𑐥𑐡𑐵𑐢𑐶𑐎𑐵𑐬𑐷𑐥𑐶𑑄, 𑐀𑐠𑐾𑐴𑐾 𑐱𑑂𑐬𑐷𑐮𑑄𑐎𑐵𑐮𑐷 𑐬𑐵𑐖𑐡𑐹𑐟𑐵𑐰𑐵𑐳𑐫𑐵 𑐥𑑂𑐬𑐠𑐩 𑐳𑐔𑐶𑐰 𑐣𑐶𑐮𑐸𑐱𑐵 𑐡𑐶𑐩𑐶𑐣𑐷 𑐣𑑄 𑐄𑐥𑐳𑑂𑐠𑐶𑐟 𑐖𑐸𑐫𑐵𑐡𑐷𑐐𑐸 𑐏𑑅𑑋

𑐠𑐸𑐐𑐸𑐳𑐷 𑐥𑐬𑐶𑐫𑐟𑐶 𑐱𑐶𑐎𑑂𑐲𑐵𑐫𑐵 𑐠𑐷𑐠𑐷 𑐟𑐐𑐶𑑄𑐫𑐵 𑑒𑑕𑑒𑑔 𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑑄 𑐄𑐟𑑂𑐟𑐷𑐬𑑂𑐞 𑐖𑐹𑐐𑐸 𑐏𑑅 𑑋 𑐄𑐎𑐷 𑐥𑑂𑐬𑐱𑐵𑐣𑑂𑐟 𑐡𑐾𑐰 𑐱𑐵𑐎𑑂𑐫, 𑐣𑐶𑐱𑐵 𑐧𑐖𑑂𑐬𑐵𑐔𑐵𑐬𑑂𑐫, 𑐳𑐬𑐳𑑂𑐰𑐟𑐶 𑐩𑐴𑐬𑑂𑐖𑐣, 𑐣𑐾𑐐𑑂𑐩𑐵 𑐱𑐵𑐎𑑂𑐫, 𑐳𑐩𑐸𑐣𑑂𑐡𑑂𑐬 𑐡𑐾𑐰𑐷 𑐟𑐵𑐩𑑂𑐬𑐵𑐎𑐵𑐬, 𑐬𑑀𑐖𑐷 𑐧𑐖𑑂𑐬𑐵𑐔𑐵𑐬𑑂𑐫, 𑐎𑑀𑐩𑐮 𑐮𑐎𑑂𑐲𑑂𑐩𑐷 𑐱𑐵𑐎𑑂𑐫, 𑐩𑐢𑐸𑐥𑑂𑐬𑐎𑐵𑐱 𑐖𑑂𑐘𑐰𑐵𑐮𑐷, 𑐣𑐶𑐬𑑂𑐩𑐮𑐵 𑐟𑐵𑐩𑑂𑐬𑐵𑐎𑐵𑐬 𑐰 𑐥𑐡𑑂𑐩𑐵 𑐱𑐵𑐎𑑂𑐫𑐥𑐶𑑄𑐳𑑄 𑐳𑐡𑑂𑐢𑐩𑑂𑐩𑐎𑑀𑐰𑐶𑐡 𑐄𑐟𑑂𑐟𑐷𑐬𑑂𑐞 𑐫𑐵𑐣𑐵𑐡𑐶𑐮𑐳𑐵 𑑓𑑐 𑐩𑑂𑐴 𑐥𑐬𑐷𑐎𑑂𑐲𑐵𑐬𑑂𑐠𑐷𑐥𑐶𑑄𑐳𑑄 𑐳𑐡𑑂𑐢𑐩𑑂𑐩𑐥𑐵𑐮𑐎 𑐄𑐥𑐵𑐢𑐶 𑐄𑐟𑑂𑐟𑐶𑐬𑑂𑐞 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐧𑑁𑐡𑑂𑐢 𑐥𑐬𑐶𑐫𑐟𑐶 𑐱𑐶𑐎𑑂𑐲𑐵 𑐣𑐾𑐥𑐵𑑅𑐫𑐵 𑐳𑐸𑐡𑐹𑐬𑐥𑐱𑑂𑐔𑐶𑐩 𑐥𑑂𑐬𑐡𑐾𑐱 𑐧𑐵𑐴𑐾𑐎 𑐩𑐾𑐐𑐸 𑐏𑐸𑐐𑐹 𑐥𑑂𑐬𑐡𑐾𑐱𑐫𑐵 𑑒𑑒 𑐖𑐶𑐮𑑂𑐮𑐵𑐫𑑂 𑐳𑑄𑐔𑐵𑐮𑐣 𑐖𑐸𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋