𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐳𑑂𑐎𑐸𑐮𑐫𑑂 𑐮𑐵𑐐𑐹 𑐫𑐵𑑅𑐐𑐸 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩𑐫𑐵 𑐥𑐵𑐛𑑂𑐫 𑐳𑐦𑐹𑐫𑐵𑐟 𑐎𑐫𑐵𑑅 𑐳𑐴𑐮𑐴 𑐖𑐹𑐐𑐸 𑐡𑐸 𑑋 𑐩𑑄𑐐𑐮𑐰𑐵𑑅 𑐫𑐮𑐫𑐵 𑐥𑐵𑐚𑐣 𑐴𑐵𑐂𑐳𑑂𑐎𑐹𑐮𑐫𑑂 𑐥𑐵𑐛𑑂𑐫 𑐳𑐦𑐹 𑐣𑐶𑐬𑑂𑐩𑐵𑐞 𑐳𑐩𑐶𑐟𑐶 𑐰 𑐠𑐷𑐠𑐷 𑐳𑑂𑐎𑐹𑐮𑐫𑐵 𑐱𑐶𑐎𑑂𑐲𑐎 𑐮𑐶𑐳𑐾𑑄 𑐣𑐾𑐰𑐵𑑅 𑐏𑐮𑑅 𑐥𑐸𑐔𑑅𑐫𑐵 𑐥𑑂𑐬𑐟𑐶𑐣𑐶𑐢𑐶𑐥𑐶𑐣𑐶 𑐡𑐠𑐸𑐂 𑐥𑐵𑐛𑑂𑐫𑐳𑐦𑐹𑐫𑐵𑐟 𑐎𑐫𑐵𑑅 𑐳𑐴𑐮𑐴 𑐖𑐹𑐐𑐸 𑐏𑑅 𑑋

𑐳𑐴𑐮𑐴𑐫𑑂 𑐣𑑂𑐰𑐰𑐵𑐣𑐵𑐡𑐶𑐳𑐾𑑄 𑐥𑐵𑐛𑑂𑐫𑐳𑐦𑐹 𑐣𑐶𑐬𑑂𑐩𑐵𑐞 𑐳𑐩𑐶𑐟𑐶𑐫𑐵 𑐳𑐴𑐳𑑄𑐫𑑀𑐖𑐎 𑐟𑐸𑐮𑐳𑐷𑐮𑐵𑐮 𑐳𑐶𑑄𑐴𑑄 𑐩𑐳𑑂𑐟𑐫𑑂𑐟 𑐀𑑅𑐥𑐸𑐎 𑐣𑐾𑐥𑐵𑐮𑐨𑐵𑐲𑐵 𑐳𑑂𑐫𑐣𑐾𑐐𑐸 𑐮𑐶𑐳𑐾𑑄 𑐣𑐾𑐰𑐵𑑅 𑐟𑐖𑐶𑐮𑐖𑐶, 𑐫𑐮 𑐩𑐴𑐵𑐣𑐐𑐬𑐫𑐵 𑐠𑐵𑐫𑑂𑐧𑐵𑐫𑑂 𑐧𑐵𑐬𑐾 𑐖𑐵𑐣𑐎𑐵𑐬𑐷 𑐧𑐷𑐐𑐸 𑐮𑑂𑐫𑐵𑐏𑑄 𑐳𑐦𑐹 𑐟𑐫𑐵𑐬 𑐫𑐵𑐣𑐵𑐐𑐸 𑐏𑑃 𑐎𑐣𑐵𑐡𑐶𑐮 𑑋 𑐠𑑂𑐰 𑐗𑑂𑐰𑐮𑐫𑑂 𑐰𑐫𑑂𑐎𑐮𑑄 𑐳𑑄𑐰𑐶𑐢𑐵𑐣 𑐎𑐠𑑄 𑐕𑐐𑐹 𑐟𑐐𑐶𑑄𑐣𑐶𑐳𑐾𑑄 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐧𑑂𑐰𑑄𑐎𑐾 𑐡𑐂𑐐𑐸 𑐖𑐹𑐳𑐵𑑄 𑐎𑑂𑐰𑐫𑑂𑐫𑐵 𑐟𑐐𑐶𑑄𑐣𑐶𑐳𑐾𑑄 𑐴𑐾 𑐧𑑂𑐰𑑄𑐎𑐵𑐫𑑄𑐎𑐮 𑐢𑐵𑑅𑐳𑐵 𑐮𑐶𑐥𑐵 𑐠𑑂𑐫𑑄𑐎 𑐀𑑅𑐥𑐸𑐂 𑐢𑐫𑐵𑐐𑐸 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑐾𑐫𑐬 𑐔𑐶𑐬𑐶𑐧𑐵𑐧𑐸 𑐩𑐴𑐬𑑂𑐖𑐣𑐫𑐵 𑐧𑐶𑐔𑐵𑑅 𑐎𑐠𑑄 𑐧𑐵𑐮–𑐰𑐶𑐎𑐵𑐳 𑐟𑐐𑐶𑑄 (𑐣𑐬𑑂𑐳𑐬𑐷) 𑐣𑐶𑐳𑐾𑑄 𑐴𑐾 𑐧𑑂𑐰𑑄𑐎𑐾𑐐𑐸 𑐎𑐠𑑄 𑐥𑐵𑐛𑑂𑐫𑐳𑐦𑐹 𑐟𑐫𑐵𑐬 𑐫𑐵𑐣𑐵𑐐𑐸 𑐏𑑃 𑐎𑐣𑐵𑐡𑐶𑐮 𑑋

𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐣𑐐𑐬 𑐥𑐬𑐶𑐲𑐡𑑂𑑄 𑐫𑐮 𑐩𑐴𑐵𑐣𑐐𑐬 𑐡𑐸𑐣𑐾𑐫𑐵 𑐳𑐵𑐩𑐸𑐡𑐵𑐫𑐶𑐎 𑐰 𑐣𑐶𑐖𑐷 𑐳𑑂𑐎𑐹𑐮 𑐦𑐸𑐎𑑂𑐎 𑐠𑐵𑐳𑐫𑑂 𑐧𑐵𑐮𑐧𑐶𑐎𑐵𑐳 𑐟𑐐𑐶𑑄𑐣𑐶𑐳𑐾𑑄 𑐳𑑂𑐰𑑄𑐐𑐹 𑐟𑐐𑐶𑑄 𑐟𑐎 𑐀𑐣𑐶𑐰𑐵𑐬𑑂𑐫 𑐎𑐠𑑄 𑐣𑐾𑐥𑐵𑐮𑐨𑐵𑐲𑐵𑑄 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐮𑐵𑐐𑐹 𑐫𑐵𑐫𑐾𑐐𑐸 𑐣𑐶𑐬𑑂𑐞𑐫 𑐫𑐵𑐣𑐵 𑐟𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐠𑑂𑐰 𑐣𑐶𑐬𑑂𑐞𑐫 𑐎𑐠𑑄 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐱𑐶𑐎𑑂𑐲𑐵 𑐩𑐴𑐵𑐱𑐵𑐏𑐵–𑐫𑐵 𑐳𑑄𑐫𑑀𑐖𑐎 𑐩𑐴𑐾𑐣𑑂𑐡𑑂𑐬𑐧𑐴𑐵𑐡𑐸𑐬 𑐎𑐵𑐬𑑂𑐎𑐷𑐫𑐵 𑐳𑑄𑐫𑑀𑐖𑐎𑐟𑑂𑐰𑐫𑑂 𑐥𑐵𑐛𑑂𑐫𑐳𑐦𑐹 𑐣𑐶𑐬𑑂𑐩𑐵𑐞 𑐳𑐩𑐶𑐟𑐶 𑐣𑐷𑐳𑑂𑐰𑐣𑐵𑑅 𑐖𑑂𑐫𑐵 𑐣𑑂𑐴𑑂𑐫𑐵𑐎𑐹𑐐𑐸 𑐏𑑅 𑑋 𑐳𑐩𑐶𑐟𑐶𑑄 ‘𑐫𑐮 𑑅 𑐮𑐮𑐶𑐟𑐎𑐮𑐵𑐫𑐵 𑐡𑐾𑐫𑑂’ 𑐣𑐵𑐩𑑄 𑐥𑐵𑐛𑑂𑐫𑐳𑐦𑐹 𑐟𑐫𑐵𑐬 𑐫𑐵𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋

𑐳𑐴𑐮𑐴 𑐖𑑂𑐫𑐵𑐗𑑂𑐰𑐮𑐫𑑂 𑐳𑐨𑐵𑐥𑐟𑐶𑐫𑐵 𑐠𑐵𑐳𑑄 𑐣𑑂𑐰𑐰𑐵𑐳𑐾𑑄 𑐳𑑄𑐫𑑀𑐖𑐎 𑐎𑐵𑐬𑑂𑐎𑐷𑑄 𑐠𑑅𑐥𑐶𑑄𑐳𑑄 𑐣𑐾𑐰𑐵𑑅 𑐨𑐵𑐫𑑂 𑐩𑐳𑐶𑐄𑐐𑐸𑐮𑐶𑑄 𑐳𑐦𑐹 𑐟𑐫𑐵𑐬 𑐫𑐵𑐫𑐾𑐟 𑐰𑑂𑐫𑐰𑐳𑑂𑐠𑐵𑐥𑐣𑐫𑐵 𑐖𑑂𑐫𑐵 𑐫𑐵𑐣𑐵𑐔𑑂𑐰𑐣𑐵𑐐𑐸 𑐰 𑐳𑐴𑐳𑑄𑐫𑑀𑐖𑐎 𑐟𑐸𑐮𑐳𑐷𑐮𑐵𑐮 𑐳𑐶𑑄𑐴𑐫𑐵 𑐥𑐸𑐔𑐮𑑄 𑐥𑐵𑐛𑑂𑐫𑐳𑐦𑐹 𑐟𑐫𑐵𑐬 𑐫𑐵𑑅𑐐𑐸 𑐏𑑃 𑐎𑐣𑐵𑐡𑐶𑐮 𑑋

𑐥𑐵𑐛𑑂𑐫𑐳𑐦𑐹 𑐣𑐶𑐬𑑂𑐩𑐵𑐞 𑐳𑐩𑐶𑐟𑐶𑐂 𑐱𑐶𑐎𑑂𑐲𑐵 𑐩𑐴𑐵𑐱𑐵𑐏𑐵𑐫𑐵 𑐣𑐰𑐬𑐵𑐖 𑐬𑐶𑐖𑐵𑐮 𑐳𑐔𑐶𑐰 𑐎𑐠𑑄 𑐰 𑐖𑐷𑐰𑐣𑐎𑐸𑐩𑐵𑐬 𑐩𑐴𑐬𑑂𑐖𑐣, 𑐡𑐷𑐥𑐎 𑐟𑐸𑐮𑐵𑐢𑐬, 𑐊𑐮𑐶𑐣𑐵 𑐩𑐴𑐬𑑂𑐖𑐣 𑐰 𑐳𑐰𑐶𑐣𑐵 𑐩𑐴𑐬𑑂𑐖𑐣 𑐡𑐸𑐖𑑅 𑐎𑐠𑑄 𑐡𑐸𑐠𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

News