𑐎𑐸𑐮𑐵𑐒𑑂𑐐𑐵𑐬 𑐎𑑀𑐬𑑀𑐣𑐵
𑐳𑑄𑐐𑐷𑐟𑐵𑐫𑐵 𑐩𑐣𑐫𑑂 𑐢𑑁𑐧𑐖𑐶 𑐰𑐵𑐮𑐵𑐔𑑂𑐰𑐣— 𑐕𑐸 𑐫𑐵𑐫𑐾, 𑐐𑐠𑐾 𑐫𑐵𑐫𑐾 ! 𑐣𑑂𑐴𑑂𑐫𑐵𑐎𑑂𑐰
𑐣𑑂𑐴𑑂𑐫𑐳: 𑐟:𑐳𑐵𑑄 𑐮𑐶𑐳: 𑐮𑐸𑐂𑐎𑐾 𑐩𑐦𑐸 𑐰𑑄 𑑋 𑐕𑐸 𑐫𑐵𑐫𑐾𑐐𑐸 𑐁: ?
𑐠: 𑐩𑐶𑐖𑑄 𑐬𑐰𑐶𑐫𑐵𑐎𑐾 𑐣𑑂𑐴𑑂𑐫𑐳: 𑐟𑐮 𑑋
‘𑐕𑐸 𑐫𑐵𑐫𑐾𑐐𑐸 𑐢𑐵𑐫𑐾 𑐁: 𑐖𑐶𑑄, 𑐖𑐹𑐖𑐹𑐐𑐸 𑐖𑐸𑐂 𑐎𑐵, 𑐨𑐐𑐰𑐵𑐣𑑂 𑐨𑐮𑐳𑐵 𑐎𑐵 𑑋’—
𑐬𑐰𑐶𑑄 𑐨𑐔𑐵 𑐫𑐵𑐄𑑃𑐎 𑐳𑐵𑐳: 𑐮𑑂𑐴𑐵𑐟 𑑋
‘𑐣𑐶𑐣𑑂𑐴𑐸 𑐳𑑂𑐰𑐣𑑂𑐴𑐸𑑄 𑐮𑐵 𑐀𑐳𑑂𑐥𑐟𑐵𑐮 𑐰𑐣𑐾 𑐟𑑂𑐫𑐂𑐣 𑐄𑑃 𑑋’— 𑐕𑐗𑐵: 𑐗𑐳𑐸𑐎𑐵: 𑐟𑐮
𑐳𑑄𑐐𑐷𑐟𑐵𑑄 𑑋
‘𑐰𑐣𑐾 𑐟𑑂𑐫:𑐳𑐵 𑐰𑐣𑐾𑐐𑐸 𑐎𑐵 𑐕𑐸 𑐮𑐾 𑑋’— 𑐬𑐰𑐶 𑐨𑐔𑐵 𑐗𑐬𑑂𑐎𑐫𑑂 𑐖𑐸𑐮 𑑋
‘𑐠𑑂𑐰 𑐀𑐩𑐾𑐬𑐶𑐎𑐵 𑐏: 𑐕𑐸, 𑐕𑐵𑐫𑑂 𑐢𑐣𑑂𑐡𑐵 !’— 𑐁𑐱𑑂𑐰𑐵𑐳𑐣 𑐧𑐶𑐮 𑐬𑐰𑐶𑑄 𑑋
‘𑐰 𑐮𑐵 𑐏:, 𑐐𑐠𑐾 𑐫𑐵𑐫𑐾𑐐𑐸 𑐢𑐿𑐐𑐸 𑐎𑐵 ?’— 𑐥𑑂𑐰𑐵𑐠𑐫𑑂 𑐡𑐸𑐩𑑂𑐴 𑐳𑑄𑐐𑐷𑐟𑐵𑑄 𑐗𑑂𑐫𑐵𑐟𑐸–
𑐥𑐴𑐮𑑄 𑐣𑑂𑐰𑐰𑐵𑐟 𑑋
‘𑐩𑐔𑐵 𑐧𑐸𑐂𑐐𑐸 𑐖𑐶𑐐𑐸 𑐜𑐾𑐚 𑐣𑑄 𑐗𑐣𑑂 𑐗𑐣𑑂 𑐣𑑂𑐴𑑂𑐫:𑐣𑐾 𑐰𑐫𑐵𑐔𑑂𑐰𑐣 𑑋 𑐴𑐶𑐳𑑂𑐫𑐵𑐂 𑐠𑐾𑑄
𑐕𑐏𑐾 𑐎𑑀𑐬𑑀𑐣𑐵𑑄 𑐠𑐸𑐮𑐶 𑐳𑐶𑐟, 𑐄𑐮𑐶 𑐳𑐶𑐟 𑐢𑐎𑐵: 𑐳𑐷.𑐊𑐣.𑐊𑐣𑑄. 𑐢𑑂𑐰𑐵𑑄𑐐 𑐦𑐸𑐎𑐫𑑂
𑐫𑐵𑐣𑐵𑐔𑑂𑐰𑐣, 𑐳𑑄𑐎𑑂𑐬𑐩𑐶𑐟 𑐠𑐸𑐮𑐶 𑐠𑑂𑐫𑐣, 𑐄𑐮𑐶 𑐠𑑂𑐫𑐣 𑐢𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐚𑐶𑐨𑐶 𑐴𑐾 𑐔𑐵𑐫𑐾𑐎𑐾
𑐐𑑂𑐫𑐵𑐫𑐾𑐢𑐸𑑄𑐎𑐮 𑑋’
𑐀𑐠𑐾𑐳𑐵𑑄 𑐳𑑄𑐐𑐷𑐟𑐵 𑐟𑐷𑐖𑐎 𑐳𑑀𑐦𑐵𑐫𑑂 𑐦𑑂𑐫𑐟𑐸𑐟, 𑐚𑐶𑐨𑐶 𑐀𑐣 𑐫𑐵𑐟 𑑋 𑐖𑐶 .𑐚𑐶𑐨𑐶
𑐟𑐮, ‘𑐳𑐵𑐬𑐾𑐐𑐩’, ‘𑐮𑐶𑐚𑐶𑐮 𑐔𑑂𑐫𑐵𑐩𑑂𑐥’ 𑐰𑐫𑐵𑐔𑑂𑐰𑐣 𑑋 𑐩𑐔𑐵𑐟𑐳𑐾𑑄 𑐐𑐸𑐮𑐶 𑐧𑐵𑑄𑐮𑐵𑐎 𑐩𑐾
𑐴𑐵𑐮𑐵𑐔𑑂𑐰𑐣 𑑋 𑐕𑐩𑑂𑐴 𑐠𑐾 𑐕𑐩𑑂𑐴 𑑋 𑐳𑑄𑐐𑐷𑐟𑐵𑐫𑐵 𑐩𑐣 𑐢𑐵:𑐳𑐵 𑐐𑐣 𑐩𑐾 𑐣𑑂𑐫𑐣𑐾𑐐𑐸𑐮𑐷 𑐡𑐸,
𑐩𑐶𑐏𑐵 𑐚𑐶𑐨𑐶𑐂, 𑐩𑐣 𑐩𑐾𑐠𑐵𑐫𑑂 𑐴𑐾 𑑋 𑐰 𑐣𑑄 𑐳𑑂𑐰𑐫𑐾 𑐩𑐫𑐮 𑑋 𑐳𑐷.𑐊𑐣.𑐊𑐣. 𑐟𑐶𑐮,
𑐗𑐳𑑄𑐐 𑐰𑐣 𑑋
‘𑐎𑐵 𑐫𑐩𑑂𑐩𑐵:𑐳𑐵, 𑐮𑐵𑐏𑑄 𑐩𑐮𑑂𑐫𑐵𑐎 𑐮𑐵 𑐳𑐷𑐢𑐸𑑄𑐎𑐮 𑐎𑐵 𑑋 𑐴𑐬𑐾 …… 𑐕𑐸
𑐫𑐵𑐫𑐾𑐐𑐸 𑐎𑐵 ……’
𑐣𑐸𑐐: 𑐨𑐵𑐬𑐵𑐨𑐵𑐬𑐵 𑐩𑐶𑐣 𑑋
𑐠𑐣 𑐣𑐵𑐥𑐣𑐵𑐥 𑐣𑑄 𑐣𑑂𑐫𑐵𑐩𑑂𑐴 𑐏𑐸𑐩𑑂𑐴 𑐳𑑄𑐎𑑂𑐬𑐩𑐶𑐟 𑐖𑐸𑐮 𑐴𑑃 𑐢𑐎𑐵: 𑐩𑑂𑐴𑐶𑐐: 𑐖𑐸𑐣𑐸𑐔𑐵𑑄
𑐦𑑀𑐣 𑐫𑐵𑐣𑐵𑐴𑐮 𑐎𑐵, 𑐰 𑐣𑑄 𑐩𑑂𑐴𑐳𑑂𑐫𑐹𑐥𑐶𑑄 𑐴𑐾 𑑋 𑐴𑐬𑐾 𑐨𑐐𑐰𑐵𑐣𑑂 ! 𑐕𑐸 𑐫𑐵𑐫𑐾𑐐𑐸 …… 𑑋
𑐔:𑐟𑐶 𑐣𑐵: 𑐣𑐵: 𑐰𑐮 𑑋 𑐕𑐸 𑐫𑐵𑐫𑐾 𑐕𑐸 𑐫𑐵𑐫𑐾 𑐖𑐸𑐮 𑑋 𑐀𑐳𑑂𑐥𑐟𑐵𑐮𑐫𑑂 𑐣𑑄 𑐳𑑄𑐎𑑂𑐬𑐩𑐶𑐟𑐟
𑐣𑑄 𑐡𑐂 𑐖𑐸𑐂 𑐣𑐶 …… 𑑋 𑐠:𑐐𑐸 𑐣𑑂𑐴𑑂𑐫𑐳𑐮𑑄 𑐠: 𑐴𑐾 𑐐𑑂𑐫𑐵𑐟 𑑋
𑐩𑐾𑐐𑐸 𑐕𑐐𑐹 𑐣𑑄 𑐥𑐷𑐬 𑐎𑐵— 𑐀𑐩𑐶𑐟𑐫𑐵 𑐖𑑂𑐫𑐵𑐫𑐵𑐐𑐸 𑑋 𑐳𑑄𑐐𑐷𑐟𑐵𑑄 𑐮𑐵 𑐣𑐶𑐮𑐵 𑐴𑐾
𑐡𑐫𑐾𑐢𑐸𑑄𑐎𑐮 𑐖𑑂𑐫𑐵 𑐟𑑂𑐰:𑐟𑐹𑐐𑐸 𑑋 𑐟𑑂𑐰 𑐣𑑄 𑐟𑑂𑐰:𑐟𑐮, 𑐬𑐾𑐳𑑂𑐚𑐸𑐬𑐾𑐣𑑂𑐚 𑐧𑐣𑑂𑐡 𑐴𑐾 𑐖𑐸𑐮 𑑋 𑐦𑐸𑐎𑑂𑐎
𑐬𑐾𑐳𑑂𑐚𑐸𑐬𑐾𑐣𑑂𑐚𑐟 𑐧𑐣𑑂𑐡 𑐴𑐾 𑐖𑐸𑐮 𑑋 𑐏𑐵𑐮𑐶 𑐎𑑂𑐫𑐵𑐬𑐷 𑐁𑐄𑐚 𑐖𑐎 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐕𑐸
𑐫𑐵𑐫𑐾, 𑐩𑐾𑐠𑐵𑐫𑑂 𑐣𑑄 𑐖𑑂𑐫𑐵 𑐫𑐵𑐫𑐾 𑐡𑐸𑐐𑐸 𑐩𑐏𑐸 𑑋 𑐳𑑂𑐚𑐸𑐜𑐾𑐣𑑂𑐚 𑐨𑐶𑐳𑐵 𑐣𑑄 𑐳𑐶𑐢𑐫𑐾 𑐢𑐸𑑄𑐎𑐮
𑐳𑑄𑐐𑐷𑐟𑐵𑐫𑐵 𑑋 𑐢𑐣𑑂𑐣 𑐠𑑁𑑄𑐎𑐣𑑂𑐴𑐫𑑂 𑐚𑐶.𑐥𑐶.𑐊𑐳. 𑐡𑐫𑐵: 𑐮𑐵 𑐏: 𑑋 𑐣𑐟𑑂𑐬𑐳𑐵 …… 𑑋
𑐄𑐎𑐶𑑄 𑐮𑐵 𑐩𑐾𑐠𑐵𑐫𑑂 𑐣𑑄 𑐖𑑂𑐫𑐵 𑐫𑐵𑐫𑐾 𑐖𑑂𑐫𑐹 𑑋 𑐟𑐬 …… 𑐠: 𑐴𑐾 𑐖𑑂𑐫𑐵 𑐫𑐵𑐫𑐾𑐦𑐂 𑐩𑐏𑐸𑐟
𑐁: …… 𑐬𑐰𑐶 𑐮𑐵 𑐕𑐐𑐹 𑐂𑐣𑑂𑐜𑐶𑐫𑐣 𑐐𑑂𑐬𑑀𑐳𑐬𑐷 𑐳𑑂𑐚𑑀𑐬𑐫𑑂 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸, 𑐧𑐶𑐔𑐬𑐵
𑐬𑐰𑐶𑐫𑐵 𑐮𑐵 𑐚𑐶.𑐥𑐶.𑐊𑐳. 𑐣𑑄 𑐩𑐡𑐸 𑑋 𑐂𑐮𑐶𑐐𑐮 𑐖𑐸𑐫𑐵: 𑐔𑑂𑐰𑐣𑐵𑐔𑑂𑐰𑑄𑐩𑑂𑐴 𑐰 𑑋 𑐀𑐮𑐾 𑐕𑐸
𑐩𑐵𑐣𑐶 𑐂𑐩𑐶𑐟, 𑐥𑐾𑐮𑐫𑑂 𑐫𑐵𑐫𑐾 𑐦𑐎𑑂𑐰 𑐥𑐾𑐮𑐫𑑂 𑐫𑐵𑐂𑐐𑐸 𑑋 𑐣𑑂𑐴𑑂𑐫𑐵𑐐𑐸 𑐫𑐵:𑐳𑐵𑑄 𑐕𑐸 𑐫𑐵𑐫𑐾 ?
𑐖𑑂𑐫𑐵 𑐫𑐵𑐫𑐾 𑐴𑐾 𑐩𑐵𑐮 𑑋 𑐢𑐣𑑂𑐣 𑐳𑑄𑐐𑐷𑐟𑐵𑐫𑐵 𑐀𑐣–𑐂𑐩𑑂𑐥𑑂𑐮𑐵𑐂𑐩𑐾𑐣𑑂𑐚 𑐦𑐵𑐂𑐮 𑐫𑐵𑐫𑐾𑐡𑐸𑐐𑐸
𑐖𑐸𑐫𑐵: 𑐨𑐔𑐵𑐳𑐵𑑄 𑐀:𑐥𑐸𑐮 𑐎𑐵 ……
‘𑐁: 𑐕𑐸 𑐫𑐵𑐫𑐾𑐐𑐸, 𑐡𑐸𑐃 𑐴𑐥𑑂𑐟𑐵 𑐕𑐸𑐚𑑂𑐚𑐷 𑐎𑐵𑐫𑐾 𑐢𑐎𑐵: 𑐏𑑃 𑐮𑑂𑐴𑐵𑐣𑐵 𑐰𑐵 ……’—
𑐳𑑄𑐐𑐷𑐟𑐵𑑄 𑐢𑐵𑐮 𑑋
‘𑐰 𑐮𑐵 𑐏:, 𑐀𑐠𑐾 𑐢𑐵𑐫𑐾𑐧𑐮𑐫𑑂 𑐰𑐫𑐾 𑐴𑐾 𑐩𑑂𑐰𑐵:𑐮 𑐢𑐵:𑐳𑐵 𑐕𑐸 𑐫𑐵𑐫𑐾𑐐𑐸
𑐮𑐾 ?’— 𑐬𑐰𑐶𑐫𑐵 𑐡𑑀𑐩𑐣 𑐖𑐸𑐮 𑑋
‘𑐖𑑂𑐫𑐵 𑐩𑐣𑑂𑐟𑐎𑐶 𑐣𑑄 𑐠𑐵𑐎𑐸𑐂, 𑐕𑐸 𑐫𑐵𑐫𑐾 ? 𑐖𑑂𑐫𑐵 𑐴𑐸𑑃 𑐢𑐵𑐫𑐾𑐟 𑐣𑑄 𑐠𑐣 𑐕𑐸
𑐫𑐵𑐫𑐾𑐐𑐸 ? 𑐳𑐸𑑄 𑐡𑐸𑐐𑐸 𑐩𑐏𑐸 𑑋 𑐣𑐾𑐥𑐵𑐮𑑄 𑐣𑑄 𑐳𑐸𑑄 𑐳:𑐟𑐾 𑐖𑑂𑐫𑐹𑐐𑐸 𑐩𑐏𑐸 𑑋 𑐐𑑂𑐬𑐵𑐖𑐸𑐫𑐳𑐣 𑐖𑐹𑐳𑐵
𑐮𑐵 𑐕𑐶𑑄 𑐎𑐵 𑐳:𑐟𑐾 𑑋 𑐩𑐔𑐵 𑐧𑐸𑐂𑐐𑐸 𑐢𑐎𑐵: 𑐳:𑐟𑐾𑐟 𑐠:𑐥𑐶𑐣𑐶𑐐𑐸 𑐴𑐵𑐮𑐟 𑐠𑐖𑑂𑐫𑐵:𑐐𑐸 !’
‘𑐴𑐬𑐾 𑐨𑐐𑐰𑐵𑐣𑑂 …… 𑐣𑑂𑐴𑐵𑐥𑐵𑑄 𑐧𑐸𑐡𑑂𑐢𑐶 𑐩𑐰: 𑑋 𑐀𑐩𑐾𑐬𑐶𑐎𑐣 𑐖𑐸𑐂𑐩𑐵: ……
𑐏𑐹𑐧 𑐖𑐸𑐮 𑐎𑐵 𑐀𑐩𑐾𑐬𑐶𑐎𑐣 …… 𑐧𑑂𑐫𑐵𑐴𑐵 𑐫𑐵𑐫𑐾 𑐣𑑂𑐴𑑂𑐫: 𑐩𑐔𑐵 …… 𑐃 𑐎𑐵
……’ 𑐠:𑐟 𑐠𑐩𑑂𑐴𑑄 𑐩𑑂𑐰𑐵𑐫𑑂 𑐔𑐸𑐂𑐎𑐮 𑑋 𑐎𑐥𑐵𑐮𑐫𑑂 𑐡𑐵𑐮 𑐳𑑄𑐐𑐷𑐟𑐵𑑄— ‘𑐀𑐩𑐾𑐬𑐶𑐎𑐵,
𑐀𑐩𑐾𑐬𑐶𑐎𑐵 …… 𑐃 ……’ 𑐩𑐹 𑐴𑐵𑐮 𑐳𑑄𑐐𑐷𑐟𑐵 𑑋
‘𑐎𑐵 𑐎𑐵 𑐩𑑂𑐰𑐵:𑐮 𑑋 𑐣𑐾𑐥𑐵𑐮𑑄 𑐳𑐸𑐫𑐵𑐟𑑄 𑐳:𑐟𑐾𑐟 𑐁: 𑐮𑐵 𑐦𑑂𑐮𑐵𑐂𑐚 𑐴𑐾 𑐧𑐣𑑂𑐡 𑑋’
‘𑐀𑐮𑐾 𑐕𑐸 𑐮𑐾’
𑐴𑐵 𑐴𑐵 𑐴𑐵 …… 𑐕𑐎: 𑐣𑐶𑐩𑑂𑐴𑑄 𑐣𑑂𑐴𑐶𑐮 𑑋
‘𑐐𑐖𑑂𑐫𑐵:𑐐𑐸 𑐥𑑂𑐬𑑀𑐧𑑂𑐮𑐾𑐩 𑐠𑑂𑐰 𑐎𑐸𑐮𑐵𑐒𑑂𑐐𑐵𑐬 𑐎𑑀𑐬𑑀𑐣𑐵𑑄 𑐫𑐵𑐣𑐵: ……’— 𑐬𑐰𑐶𑑄
𑐕𑐎: 𑐟𑑄 𑐥𑐶𑐎𑐵𑐮 𑑋
‘𑐎𑐵 𑐩𑑂𑐰𑐵𑐫𑑂𑐳𑐾 ! 𑐰𑐣𑐾𑐟 𑐣𑑄 𑐐𑑂𑐫𑐵𑐣𑐵𑐥𑐸, 𑐕𑑄 𑐣𑑄 𑐩𑐔𑐵 𑐧𑐸𑐂, 𑐩𑐔𑐵 𑐡𑐂 𑑋 𑐰 𑐠𑑂𑐰
𑐩𑐡𑐫𑐾𑐎 𑐩𑐣𑐹𑐟 𑐰𑐫𑐵𑐔𑑂𑐰𑐣𑐷, 𑐳𑐸𑐫𑐵𑐎𑐾 𑐨𑐵𑐂𑐬𑐳 𑐡𑐸, 𑐳𑐸𑐫𑐵𑐎𑐾 𑐩𑐡𑐸, 𑐳𑐸𑐣𑐵𑑄 𑐕𑐸 𑐳𑑂𑐫𑐹 𑐀𑐣
𑐳𑑂𑐚𑑀𑐬𑐫𑑂 𑐰𑐂𑐥𑐶𑑄 𑑋’
‘𑐠:𑐐𑐸 𑐖𑐷𑐄 𑐟:𑐢𑑄 𑐮𑐵𑐎𑐶 𑐖𑑂𑐫𑐵 𑐟:𑐢𑑄 ? 𑐖𑐷𑐄 𑐴𑐾 𑐩𑐣𑑂𑐟 𑐢𑐵:𑐳𑐵 𑐕𑐸 𑐫𑐵𑐫𑐾𑐐𑐸,
𑐩𑐏𑐸 𑐮𑐵 ? 𑐕𑑄 𑐴𑐾 𑐢𑐵 𑐮𑐾 ?’— 𑐬𑐰𑐶𑑄 𑐣𑑂𑐰𑐵𑐟 𑑋
𑐳𑑄𑐐𑐷𑐟𑐵 𑐕𑐗𑐵: 𑐰𑐵𑐟𑐵𑐴𑐵𑑄 𑐔𑑂𑐰𑐣 𑑋 𑐟𑑂𑐰𑐵𑐮𑐵𑐴𑐵𑑄 𑐳𑑂𑐰𑐮 𑐬𑐰𑐶𑐫𑐵𑐟 𑑋 𑐰 𑐢𑐵𑐫𑐾
𑐠𑑂𑐰 𑐢𑐵𑐫𑐾 𑐩𑐣𑑂𑐟 𑐳𑑄𑐐𑐷𑐟𑐵𑐫𑐵 𑑋 𑐏𑑂𑐰𑐵: 𑐖𑐶𑐮𑑂𑐮 𑐖𑐸𑐮 𑑋
‘𑐎𑐵 𑐳𑐵 𑐎𑐵 𑐠𑑂𑐰 𑐎𑐸𑐮𑐵𑐒𑑂𑐐𑐵𑐬 𑐎𑑀𑐬𑑀𑐣𑐵𑑄 𑐐𑐧𑐮𑐫𑑂 𑐖𑐎 𑐟𑑂𑐰:𑐟𑐵 𑐰𑐣𑐷 𑐠𑐾𑑄 !
𑐠𑑂𑐰 𑐦𑐸𑐎𑑂𑐎 𑐳𑐩𑐳𑑂𑐫𑐵𑐫𑐵 𑐖𑐜 𑐠𑑂𑐰 𑐴𑐾 𑐮𑐵 𑐏: 𑐣𑐶 …… 𑐎𑐸𑐮𑐵𑐒𑑂𑐐𑐵𑐬 𑐎𑑀𑐬𑑀𑐣𑐵’—
𑐢𑐵𑐢𑐵𑑄 𑐳𑑄𑐐𑐷𑐟𑐵 𑐰𑐵𑐠𑐵𑐎𑑂𑐎 𑐳𑑀𑐦𑐵𑑄 𑐡𑐣𑐵𑐰𑐣 ……