𑐫𑐾𑑃 – 𑐠𑐣𑐫𑐵 𑐔𑐵𑐐𑐮𑐫𑑂 𑐔𑑂𑐰𑑄𑐐𑐸 𑐣𑐾𑐥𑐵𑐮𑐨𑐵𑐲𑐵𑐫𑐵 𑐣𑑂𑐴𑐵𑐥𑐵𑑄𑐐𑐸 𑐧𑑂𑐰𑐣𑐎𑐸𑐠𑐶 𑐖𑐐𑐟𑐳𑐸𑐣𑑂𑐡𑐬 𑐧𑑂𑐰𑐣𑐾𑐎𑐸𑐠𑐶𑐫𑐵 𑐣𑐷𑐔𑑂𑐫𑐵𑐡𑑃 𑐧𑐸𑐣𑑂𑐴𑐶 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅 𑐫𑐵𑐳𑐾𑑄 𑐴𑐣 𑑋𑐖𑑂𑐫𑐵𑐗𑑂𑐰𑐮𑐫𑑂 𑐠𑐸𑐐𑐸 𑐡𑑃𑐫𑑂 𑐊𑐳𑐂𑐃 𑐧𑐶𑐄𑐥𑐶𑑄 𑐧𑑂𑐰𑐣𑐵𑐩𑐶𑐥𑐶𑑄 𑐩𑐢𑑂𑐫𑐾 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫𑐫𑑂 𑐡𑐎𑐮𑐫𑑂 𑐀𑐥𑑂𑐰𑑅 𑐮𑑂𑐫𑐵𑑅 𑐴𑑅𑐥𑐶𑑄 𑐩𑐶𑐳𑐵𑐥𑐵𑐏𑐾𑑄 𑐳𑐸𑐖𑐶𑐣𑐵 𑐟𑐵𑐩𑐵𑐒 𑐰 𑐩𑐶𑐖𑑄 𑐥𑐵𑐏𑐾𑑄 𑐬𑐶𑐟𑐾𑐱 𑐱𑑂𑐬𑐾𑐲𑑂𑐛𑐫𑐵𑐟 𑐩𑑂𑐴𑐟𑐶𑑄 𑐣𑑂𑐫𑐵𑐡𑑂𑐰𑑅 𑐣𑑂𑐫𑐵𑐡𑑂𑐰𑑅 𑐟𑐎𑐵 𑐡𑐵𑑄 𑐳𑐶𑐬𑐥𑐵𑑅 𑐰 𑐡𑐳𑐶𑐥𑑁 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋 𑐠𑑂𑐰 𑐳𑐶𑐬𑐥𑐵𑑅 𑐡𑑃𑐫𑑂𑐡𑐳𑑄 𑐣𑐶𑐬𑐣𑑂𑐟𑐬 𑐮𑑅𑐮𑑂𑐴𑐵𑐫𑐾𑐐𑐸 𑐣𑐶𑑄𑐟𑐶𑑄 𑐩𑐵𑐣𑐣𑑂𑐢𑐬𑐫𑐵 𑐥𑐬𑐶𑐰𑐵𑐬𑐥𑐵𑐏𑐾𑑄 𑐀𑐎𑑂𑐲𑐫 𑐎𑑀𑐲 𑐡𑐫𑐾𑐎𑐾𑐟 𑐕𑐐𑐹 𑐮𑐏 𑐟𑐎𑐵𑐫𑐵 𑐔𑐾𑐎 𑐰 𑐥𑑂𑐬𑑁𑐝 𑐱𑐶𑐎𑑂𑐲𑐵𑐫𑐵 𑐣𑐶𑑄𑐟𑐶𑑄 𑐣𑑂𑐫𑐫𑑂𑐡𑑂𑐰𑑅 𑐟𑐎𑐵𑐫𑐵 𑐔𑐾𑐎 𑐧𑑂𑐰𑐣𑐵𑐎𑐸𑐠𑐶𑐫𑐵 𑐣𑐵𑐫𑑅 𑐮𑐎𑑂𑐲𑑂𑐩𑐷𑐣𑐵𑐳 𑐩𑐵𑐣𑐣𑑂𑐢𑐬𑐫𑐵𑐟 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋𑐀𑐠𑐾 𑐴𑐾 𑐧𑑂𑐰𑐣𑐾𑐎𑐸𑐠𑐶𑐂 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐐𑐸 𑐣𑐶𑑄𑐟𑐶𑑄 𑐣𑐵𑐫𑑅 𑐨𑐵𑐖𑐸 𑐩𑐵𑐣𑐣𑑂𑐢𑐬𑑄 𑐣𑑄 𑐣𑑂𑐫𑑂𑐡𑑂𑐰𑑅 𑐟𑐎𑐵 𑐔𑐾𑐎 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐊𑐳𑐂𑐃 𑐥𑐬𑐷𑐎𑑂𑐲𑐵𑐫𑑂 𑐡𑐎𑐮𑐫 𑐀𑐥𑑂𑐰𑑅 𑐮𑑂𑐫𑐵𑑅 𑐴𑑅𑐥𑐶𑑄 𑐧𑑂𑐰𑐣𑐵𑐩𑐶𑐥𑐶𑑄𑐟 𑐧𑑂𑐰𑐣𑐾𑐎𑐸𑐠𑐶𑐫𑐵 𑐱𑐶𑐎𑑂𑐲𑐶𑐎𑐵 𑐱𑐵𑐣𑑂𑐟𑐶 𑐩𑐵𑐣𑐣𑑂𑐢𑐬𑐫𑐵 𑐣𑐵𑐩𑐫 𑐣𑐷𑐳𑑂𑐰𑐣𑐵𑐟𑑅𑐐𑐸 𑐱𑐵𑐣𑑂𑐟𑐶 𑐳𑐶𑐬𑐥𑐵𑑅 𑐥𑐵𑐏𑐾 𑐣𑑄 𑐴𑐣𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅 𑑋 𑐧𑑂𑐰𑐣𑐾𑐎𑐸𑐠𑐶𑐫𑐵 𑐥𑑂𑐬𑐶𑐣𑑂𑐳𑐶𑐥𑐮 𑐩𑐫𑑂𑐖𑐸 𑐳𑐸𑐣𑐶𑐟𑐵 𑐩𑐵𑐣𑐣𑑂𑐢𑐬𑑄 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑑅 𑐧𑑂𑐰𑐣𑐾𑐎𑐸𑐠𑐶𑐫𑐵 𑐣𑐵𑐫𑑅 𑐮𑐎𑑂𑐲𑑂𑐩𑐷𑐡𑐵𑐳 𑐩𑐵𑐣𑐣𑑂𑐢𑐬𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐜𑐵. 𑐔𑐸𑐣𑑂𑐡𑐵 𑐰𑐖𑑂𑐬𑐵𑐔𑐵𑐬𑑂𑐫, 𑐥𑐸𑐮𑐵𑑄𑐩𑑂𑐴 𑐥𑑂𑐬𑐶𑐣𑑂𑐳𑐶𑐥𑐮 𑐩𑐵𑐫𑐵 𑐩𑐵𑐣𑐣𑑂𑐢𑐬, 𑐱𑐵𑐣𑑂𑐟𑐶 𑐳𑐶𑐬𑐥𑐵𑑅𑐫𑐵 𑐡𑐵𑐟𑐵 𑐖𑑂𑐘𑐵𑐣𑐾𑐣𑑂𑐡𑑂𑐬 𑐩𑐵𑐣𑐣𑑂𑐢𑐬, 𑐀𑐎𑑂𑐲𑐎𑑀𑐲𑐫𑐵 𑐡𑐵𑐟𑐵 𑐐𑐸𑐴𑑂𑐫𑐱𑑂𑐰𑐬𑐷𑐬𑐵𑐖 𑐩𑐵𑐣𑐣𑑂𑐢𑐬𑐥𑐶𑑄𑐳𑑄 𑐧𑑂𑐰𑐣𑐾𑐎𑐸𑐠𑐶𑐫𑐵 𑐧𑐵𑐬𑐾 𑐠𑑅𑐠𑑅𑐐𑐸 𑐣𑐸𑐐𑑅𑐏𑑃 𑐥𑑂𑐰𑑄𑐎𑐵𑐡𑐷𑐐𑐸 𑐏𑑅𑐳𑐵 𑐮𑑀𑐎𑐎𑐰𑐶 𑐬𑐵𑐖𑐨𑐵𑐃 𑐖𑐎𑑅𑐩𑐶𑑄 𑐎𑐰𑐶𑐟𑐵 𑐰𑐵𑐔𑐣 𑐫𑐵𑐣𑐵𑐡𑐷𑐐𑐸 𑐏𑑅 𑑋𑐖𑑂𑐫𑐵𑐗𑑂𑐰𑐮𑐫𑑂 𑑒𑑐𑑖𑑗 𑐫𑐵 𑐊𑐳𑐊𑐮𑐳𑐷 𑐧𑑂𑐫𑐵𑐔𑐫𑐵 𑐥𑐸𑐮𑐵𑑄𑐥𑐶𑑄 𑐧𑑂𑐰𑐣𑐵𑐩𑐶𑐥𑐵𑐏𑐾𑑄 𑐧𑑂𑐰𑐣𑐾𑐎𑐸𑐠𑐶𑐫𑐵𑐟 𑐥𑑂𑐫𑐥𑐵𑑅 𑐴𑑂𑐰𑐵𑐂𑐟 𑐧𑑀𑐬𑑂𑐜 𑐣𑑄 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋 𑐠𑑂𑐰𑐴𑐾 𑐡𑐠𑐸𑐂 𑐠𑐷𑐠𑐷 𑐂𑐮𑐫𑑂 𑐠𑐷𑐠𑐷 𑐎𑐠𑑄 𑐧𑑂𑐰𑐣𑐾𑐎𑐸𑐠𑐶𑐫𑐵𑐟 𑐐𑑂𑐰𑐵𑐴𑐵𑐮𑐶 𑐫𑐵𑑅𑐥𑐶𑑄𑐟 𑐡𑐳𑐶𑐥𑑁 𑐧𑐶𑐫𑐵m 𑐴𑐣𑐾𑐐𑐸 𑐖𑑂𑐫𑐵 𑐣𑑄 𑐖𑐹𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑑅 𑐮𑐶𑐥𑐵 𑐧𑑂𑐰𑐣𑐾𑐎𑐸𑐠𑐶𑐫𑐵 𑐧𑑂𑐰𑐣𑐵𑐩𑐶𑐥𑐶𑑄𑐳𑑄 𑐳𑐵𑑃𑐳𑑂𑐎𑐺𑐟𑐶𑐎 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐧𑑂𑐰𑑅𑐐𑐸 𑐏𑑅 𑑋