𑐕𑐎𑑂𑐰𑑅𑐫𑐵 𑐏𑑃 𑐏𑑅, 𑐕𑐐𑐹 𑐑𑐣𑐵 𑐖𑑄𑐐𑐮𑐫𑑂 𑐕𑐩𑑂𑐴 𑐎𑐶𑐳𑐶𑑄 𑐳𑐵𑐥 𑐴𑐾 𑐄𑐟𑑂𑐥𑐵𑐟 𑐩𑐔𑐾 𑐫𑐵𑐣𑐵𑐔𑑂𑐰𑐣 𑑋 𑐰𑐫𑐵𑐎𑐾 𑐠𑑅 𑐟𑐳𑐎𑑄 𑐧𑐮𑑂𑐮𑐵𑑅 𑐢𑐫𑐵𑐐𑐸 𑐑𑐩𑐞𑑂𑐜 𑐡𑐸𑑋 𑐀𑐠𑐾 𑐖𑐸𑐫𑐵𑑅 𑐰𑑄 𑐳𑐸𑐫𑐵𑐟𑑄 𑐴𑐾 𑐮𑑂𑐫𑐵𑐏𑐫𑑂 𑐩𑐟𑑅 𑑋
𑐕𑐩𑐵 𑐳𑐶𑐩𑐵𑐫𑑂 𑐕𑐖𑑂𑐰𑑅 𑐔𑐏𑐸𑑄𑐔𑐵𑐟 𑐔𑑂𑐰𑐣𑐵𑐔𑑂𑐰𑑄𑐐𑐸 𑐡𑐸𑑋 𑐩𑐵𑐔𑐏𑐸𑑄 𑐣𑑄 𑐠𑑅𑐐𑐸 𑐏𑑂𑐫𑐾𑑃𑐔𑐫𑑂 𑐎𑐸𑐎𑐸 𑐔𑑂𑐰𑐣𑐵𑑅 𑐫𑐂𑐥𑐸𑐳𑐾 𑐔𑑂𑐰𑑄𑐥𑐶𑑄 𑐩𑐳𑑂𑐟 𑐥𑐶𑐴𑐵𑑄 𑐰𑐂𑐐𑐸 𑐣𑑂𑐴𑑂𑐫𑐂𑐥𑐸𑐐𑐸 𑐩𑑂𑐴𑐐𑐳 𑐏𑑄𑐎𑐵𑐔𑑂𑐰𑑄𑐐𑐸 𑐡𑐸𑑋 𑐕𑐣𑑂𑐴𑐸 𑐰 𑐴𑐵𑐬𑐵𑑄𑐩𑑂𑐴 𑐎𑐶𑐳𑐶 𑐟𑐟𑑅𑐳𑐎𑑄 ‘𑐎𑑂𑐰𑑄..𑐎𑑂𑐰𑑄…’ 𑐴𑐵𑐮𑐵𑑅 𑐠𑑅𑐐𑐸 𑐣𑑂𑐴𑑂𑐫𑑅𑐣𑐾 𑐮𑐵𑑅𑐐𑐸 𑐳𑐶𑐩𑐵 𑐎𑑂𑐰𑑅𑐠𑐮𑐵𑑅 𑐎𑐔𑐵 𑐟𑑂𑐰𑑅𑐠𑐸𑐮𑐵𑑅 𑐂𑐩𑐶𑐠𑐵𑐫𑑂𑐥𑐵𑐏𑐾 𑐴𑐾 𑐣𑑂𑐴𑑂𑐫𑐵𑑅𑐰𑐮 𑑋 𑐳𑑂𑐰𑐳𑑂𑐰𑑄 𑐴𑐾 𑐰𑑄 𑐔𑐏𑐸𑑄𑐔𑐵𑐟𑐫𑑂𑐐𑐸 𑐳𑑂𑐰𑑅 𑐡𑐸𑐐𑐸 𑐳𑐶𑐩𑐵 𑐣𑑄 𑐎𑑂𑐰𑑅𑐠𑐮𑐵𑐧𑐶𑐮 𑑋 𑐳𑑂𑐰𑑅 𑐧𑑃𑐫𑑂 𑐎𑐸𑐟𑐸𑑄 𑐰𑐮 𑑋 𑐏𑑂𑐫𑐾𑑄 𑐟𑐖𑑂𑐫𑐵𑐟 𑑋 𑐀𑐮𑐾 𑐎𑐶𑐳𑐶 𑐄𑐎𑐶𑐫𑐵 𑐡𑑂𑐫𑑅𑐣𑐾𑐴𑐾 𑐥𑐮𑐵𑑅 𑐟𑐫𑐵𑑅 𑐣𑑂𑐴𑑂𑐫𑐵𑑅𑐰𑐣 𑑋
𑐩𑐵𑐔𑐏𑐸𑑄 𑐧𑐵𑐔𑐏𑐸𑑄 𑐣𑐶𑐩𑑂𑐴𑑄 𑐔𑐶𑐮𑑂𑐮𑐵𑐫𑑂 𑐔𑐶𑐮𑑂𑐮𑐵𑐫𑑂 𑐡𑐣𑐵𑑅 𑐴𑐵𑐮𑐵𑐔𑑂𑐰𑐣 𑑋 𑐟𑐬 𑐕𑐸 𑐫𑐵𑐫𑐾 ? 𑐂𑐩𑐶𑐳𑑄 𑐫𑐵𑐫𑐾𑐦𑐸𑐐𑐸 𑐕𑐸𑑄 𑐩𑐏𑐸𑑋 𑐎𑐶𑐳𑐶 𑐰𑐣𑐾 𑐢𑐸𑑄𑐎𑐵𑑅 𑐩𑐵𑐔𑐏𑐸𑑄 𑐕𑐵𑐟𑐶 𑐡𑐵𑐟𑐵𑑄 𑐏𑑂𑐰𑐮 𑑋 𑐄𑐧𑐮𑐫𑑂 𑐮𑐵𑐎 𑐴𑐾 𑐀𑐣 𑐳𑐶𑑃𑐎𑑂𑐰𑐵𑑅𑐗𑑄𑐐𑑅 𑐠𑑂𑐫𑑄𑐎𑑅𑐰𑐮 𑑋 𑐰 𑐔𑐏𑐸𑑄𑐫𑐵 𑐳𑐟𑐷𑐩𑑂𑐴 𑐥𑐵𑐳𑐵 𑐏𑑅 𑑋 𑐳𑐶𑑃𑐎𑑂𑐰𑐵𑑅𑐗𑑄𑐐𑐮𑑄 𑐰𑐫𑐵𑐎𑐾 𑐕𑐵𑐫 𑐏𑑂𑐰𑐫𑐵𑐐𑐸 𑐢𑐎𑐵𑑅 𑐣𑑂𑐫𑑄𑐧𑐮𑐫𑑂 𑐰𑑄 𑐠𑑅𑐐𑐸 𑐧𑐵𑐏𑑄 𑐡𑐎𑑂𑐰𑑄 𑐎𑐣 𑑋 𑐳𑐶𑑃𑐎𑑂𑐰𑐵𑐗𑑄𑐐𑐮𑑄 𑐢𑐵𑐮, ‘𑐠𑐠𑐾 𑐫𑐵𑐣𑐵𑑅 𑐣𑐸𑐐𑑅 𑐩𑐕𑐶𑑄𑐎𑐵 𑐖𑐎 𑐔𑑂𑐰𑐣𑐵𑑄 𑐕𑐸𑑄 𑐖𑐸𑐂𑐩𑐏𑐸𑑋 𑐰 𑐩𑐨𑐶𑑄𑐩𑑂𑐴 𑐎𑐶𑐳𑐶𑐫𑐵𑐟 𑐠𑐵𑐳𑐫𑑂 𑐩𑐴𑐳𑐾𑑄 𑐖𑐶 𑐴𑐾 𑐩𑐖𑐶𑐮 𑑋’
𑐔𑐏𑐸𑑄𑐔𑐵𑑄 𑐏𑑂𑐰𑐵𑑅 𑐏𑐶𑐄𑑃𑐎 𑐟𑐫𑐵𑑅 𑐢𑐵𑐮, ‘𑐗𑐷 𑐠𑐾𑑄𑐖𑑂𑐫𑐵𑑅𑐥𑐶𑑄 𑐔𑐶𑐔𑐶𑐢𑐶𑐎𑑅𑐥𑐶𑑄 𑐖𑐷𑐰𑐣𑐫𑑂𑐎𑐾 𑐰 𑐀𑐥𑐵𑐫𑑂𑐩𑐕𑐶 𑐢𑐶𑐎𑑅𑐩𑑂𑐴 𑐎𑐶𑐳𑐶𑐮𑐶𑐳𑐾 𑐐𑐠𑐾 𑐫𑐵𑐣𑐵𑑅 𑐚𑐎𑑂𑐎𑐬 𑐎𑐵𑐫𑐾𑐦𑐂 ?’
𑐳𑐶𑑃𑐎𑑂𑐰𑐵𑑅𑐗𑑄𑐐𑐮𑑄 𑐢𑐵𑐮, ‘𑐗𑐷 𑐳𑐎𑐮𑐾𑑄 𑐖𑐵𑐣𑐵𑑅 𑐧𑐸𑐡𑑂𑐢𑐶 𑐕𑑂𑐫𑐮𑐾𑐦𑐟 𑐢𑐵𑑅𑐳𑐵 𑐩𑐦𑐫𑐾𑐩𑐵𑑅𑐐𑐸 𑐕𑐸 𑐡𑐸?’
‘𑐀𑐫𑑂𑐳𑐵 𑐕𑐸 𑐫𑐵𑐫𑐾𑐐𑐸 𑐮𑐾 𑐗𑐷𑐳𑑄 ?’ 𑐔𑐏𑐸𑑄𑐔𑐵𑑄 𑐣𑑂𑐫𑐣 𑑋
‘𑐖𑐶 𑐨𑐩𑑂𑐧𑑅 𑐥𑐵𑐳𑐵 𑐕𑐩𑑂𑐴 𑐡𑐸𑑋 𑐗𑐷𑐳𑑄 𑐰𑐫𑐵𑐎𑐾 𑐳𑐮𑑂𑐴𑐵 𑐎𑐵𑐫𑐾𑐩𑐵𑐮𑐷 𑑋’
𑐔𑐏𑐸𑑄 𑐰 𑐳𑐶𑑃𑐎𑑂𑐰𑐵𑑅𑐗𑑄𑐐𑐮𑑄 𑐨𑐩𑑂𑐧𑑅 𑐣𑐵𑐥𑐮𑐵𑑅𑐰𑐣 𑑋 𑐨𑐩𑑂𑐧𑐮𑑄 𑐢𑐵𑐮, ‘𑐠𑑂𑐰 𑐮𑐵 𑐟𑐳𑐎𑑄 𑐧𑐵𑑄𑐩𑐮𑐵𑑅𑐐𑐸 𑐖𑐸𑐮 𑑋 𑐖𑐶 𑐧𑑂𑐫𑐵𑑄𑐔𑐵 𑐕𑐩𑑂𑐴 𑐥𑐵𑐳𑐵 𑐡𑐸, 𑐣𑐸 𑐰𑐫𑐵𑐎𑐾 𑐴𑐾 𑐐𑑂𑐰𑐵𑐴𑐵𑐮𑐶 𑐎𑐵𑑅𑐰𑐣𑐾 𑑋’
𑐁𑑅 𑐂𑐥𑐶𑑄 𑐳𑑂𑐰𑐩𑑂𑐴𑑄 𑐄𑐐𑐸 𑐥𑐸𑐏𑐹 𑐳𑐶𑐠𑐫𑑂 𑐰𑐣, 𑐐𑐣 𑐧𑑂𑐫𑐵𑑄 𑐔𑑂𑐰𑐣𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐏𑑅 𑑋 𑐨𑐩𑑂𑐧𑐮𑑄 𑐰𑐫𑐵𑐟 𑐡𑐎𑑂𑐰𑑄 𑐳𑐩𑐳𑑂𑐫𑐵 𑐎𑐣 𑑋 𑐧𑑂𑐫𑐵𑑄𑐔𑐵𑑄 𑐢𑐵𑐮, ‘𑐕𑐶𑐎𑐥𑐶𑑄 𑐢𑐿𑐬𑑂𑐫 𑐟𑐫𑐵𑑅 𑐠𑐣 𑐴𑐾 𑐖𑐶𑐟𑑅 𑐥𑐶𑐫𑐵𑐔𑑂𑐰𑐣𑐵𑐡𑐶𑐳𑑃 𑑋 𑐖𑐶 𑐮𑐏𑐫𑑂 𑐎𑐸𑐴𑐵𑑄 𑐰𑐣𑐵𑑅 𑐕𑐎𑑂𑐰𑑅 𑐧𑐶𑐔𑐵𑑅 𑐫𑐵𑐫𑐾 𑑋’
𑐠𑐸𑐮𑐶 𑐢𑐫𑐵𑑅 𑐧𑑂𑐫𑐵𑑄 𑐮𑐏𑐫𑑂 𑐟𑐶𑑄𑐣𑑂𑐴𑐸𑐫𑐵𑑅𑐰𑐣 𑑋 𑐧𑐵𑐑𑑁 𑐮𑐶𑐥𑐵 𑐰 𑐮𑐏𑑄 𑐠𑐴𑐵𑑄 𑐰𑐫𑐾𑐰𑑄 𑐩𑐸𑐳𑐸𑐎 𑐣𑑂𑐴𑐶𑐮𑐵𑑅 𑐢𑐵𑐮, ‘𑐥𑐵𑐳𑐵𑐥𑐶𑑄 ! 𑐰 𑐖𑑂𑐫𑐵𑐣𑐩𑐬𑐵 𑐎𑐶𑐳𑐶𑐫𑐵𑐟 𑐳𑐶𑐢𑐫𑐾𑐎𑐾𑐐𑐸 𑐣𑐶𑑄𑐟𑐶𑑄 𑐖𑐶𑐐𑐸 𑐣𑑂𑐴𑑂𑐫𑐥𑐸𑐂 𑐕𑐐𑐹 𑐄𑐥𑐵𑐫 𑐮𑐸𑐫𑐵𑐰𑑅𑐐𑐸 𑐡𑐸𑑋 𑐄𑐎𑐷 𑐗𑐷 𑐳𑐎𑐮𑐾𑑄 𑐖𑐵𑐫𑐾𑐩𑐵𑑅 𑑋’
𑐧𑑂𑐫𑐵𑑄𑐔𑐵𑑄 𑐠𑑅𑐐𑐸 𑐐𑑂𑐰𑐳𑐵𑑅 𑐎𑑄𑐧𑐮𑐫𑑂 𑐳𑐎𑐮𑐾𑑄 𑐮𑐫𑑂𑐟𑐵𑐮 𑑋 𑐠𑑂𑐰 𑐖𑑂𑐫𑐵𑐫𑑂 𑐳𑐸𑐣𑐵𑑄 𑐕𑐸 𑐕𑐸 𑐫𑐵𑐫𑐾𑐩𑐵𑑅 𑐢𑐫𑐵𑐐𑐸 𑐏𑑃 𑐣𑑄 𑐧𑑂𑐫𑐵𑑄𑐔𑐵𑑄 𑐂𑐥𑐶𑑄 𑐳𑐎𑐳𑐶𑐟𑑄 𑐢𑑂𑐰𑐵𑐠𑐸𑐂𑐎𑐮 𑑋 𑐨𑐔𑐵 𑐖𑐵𑐫𑐾𑐎𑐵 𑐰 𑐴𑐵𑐬𑐵𑑄𑐩𑑂𑐴 𑐎𑐶𑐳𑐶 𑐀𑐣𑑄 𑐨𑐔𑐵 𑐟𑐵𑐥𑐵𑐎𑑄 𑐣𑐶𑐳𑐾𑑄 𑐴𑐾 𑐟𑑀𑐜𑐦𑑀𑐜𑐵 𑐫𑐵𑐫𑐵𑑄 𑐥𑑂𑐰𑐵𑑅 𑐟𑑂𑐫𑑄𑐎 𑐔𑐸𑐮𑐶 𑐰𑑅𑐐𑐸 𑐳𑐶𑐩𑐵𑐎𑐔𑐵 𑐣𑐣𑑄 𑐣𑑂𑐫𑐵𑐳𑐶 𑐔𑐵𑐔𑐵𑑄 𑐰𑐫𑐵𑐔𑑂𑐰𑐣 𑑋 𑐣𑑂𑐴𑐵𑐥𑐵𑑄𑐐𑐸 𑐖𑑂𑐫𑐵 𑐨𑐩𑑂𑐧𑑅𑐫𑐵𑐐𑐸 𑐖𑐸𑐮 𑑋 𑐰𑑄 𑐎𑐶𑐳𑐶𑐫𑐵 𑐣𑑂𑐴𑐵𑐫𑑂𑐥𑐣𑐫𑑂 𑐰𑐣𑐵𑑅 𑐩𑐢𑐸𑐬 𑐬𑐵𑐐 𑐣𑑂𑐫𑑄𑐎𑐮 𑑋 𑐬𑐵𑐐 𑐣𑑂𑐫𑑄𑐧𑐮𑐫𑑂 𑐎𑐶𑐳𑐶𑐫𑐵𑐟 𑐁𑐣𑐣𑑂𑐡 𑐰𑐮 𑑋 𑐰𑑄 𑐩𑐶𑐏𑐵 𑐟𑐶𑐳𑑂𑐳𑐶𑐣𑐵𑑅 𑐕𑑂𑐫𑑄 𑐳𑑄𑐎𑐵𑐔𑑂𑐰𑐣 𑑋
𑐠𑐸𑐧𑐮𑐫𑑂 𑐴𑐾 𑐳𑐶𑑃𑐎𑑂𑐰𑐵𑑅𑐗𑑄𑐐𑐮𑑄 𑐠𑑅𑐐𑐸 𑐖𑑂𑐫𑐵 𑐎𑑂𑐫𑐣 𑑋 𑐩𑐸𑐮𑐸 𑐠𑐾𑑄 𑐔𑑂𑐰𑐵𑐩𑐸𑐐𑐸 𑐟𑑂𑐰𑐵𑐠𑑄 𑐰𑑄 𑐎𑐶𑐳𑐶𑐫𑐵 𑐣𑐶𑐐𑐮𑑄 𑐩𑐶𑐏𑐵𑐫𑑂 𑐎𑑂𑐰𑐵𑐣𑐵𑐧𑐶𑐮 𑑋 𑐎𑐶𑐳𑐶𑐫𑐵 𑐩𑐶𑐏𑐵 𑐟𑐖𑑂𑐫𑐵𑐟 𑑋 𑐰 𑐎𑐵𑑄 𑐖𑐸𑐫𑐵𑑅 𑐰𑐵𑐠𑐵𑐰𑐵𑐠𑐵 𑐎𑐣𑐵𑑅 𑐄𑐏𑐾𑑄 𑐠𑐸𑐏𑐾𑑄 𑐧𑑂𑐰𑐵𑑃𑐫𑑂 𑐖𑐸𑐮 𑑋
𑐃 𑐧𑐶𑐣𑐵𑐰𑐮𑐶𑐳𑐾 𑐎𑐶𑐳𑐶𑐫𑐵 𑐟𑑄 𑐟𑐔𑑂𑐰𑐫𑐵𑐰𑐮 𑑋 𑐩𑐶𑐏𑐵𑑄 𑐏𑑄𑐎𑐾 𑐩𑐦𑐸𑐧𑐮𑐫𑑂 𑐰𑐫𑐵 𑐩𑑂𑐴 𑐄𑐏𑐾𑐠𑐸𑐏𑐾 𑐩𑐡𑐫𑐾𑐎 𑐴𑐵𑐟 𑑋 𑐳𑑂𑐫𑐵𑐣𑐵𑑅 𑐰 ‘𑐎𑑂𑐰𑑄… 𑐎𑑂𑐰𑑄…’ 𑐴𑐵𑐮 𑑋
𑐔𑐏𑐸𑑄𑐔𑐵𑑄 𑐧𑑂𑐫𑐵𑑄𑐫𑐵𑐟 𑐢𑐵𑐮, ‘𑐡𑐵𑐂, 𑐕𑐶𑐟𑑅 𑐫𑐎𑑂𑐰 𑐫𑐎𑑂𑐰 𑐳𑐸𑐨𑐵𑐫𑑂 𑑋 𑐕𑐶𑑄 𑐖𑐶𑐟𑑅 𑐠𑐥𑐵𑐫𑑂𑐢𑑄𑐐𑐸 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐶𑐮 𑑋’
𑐧𑑂𑐫𑐵𑑄𑐔𑐵𑑄 𑐢𑐵𑐮, ‘𑐕𑐵𑐫𑑂 𑐳𑐸𑐨𑐵𑐫𑑂 𑐧𑐷𑐩𑐵𑑅𑐐𑐸? 𑐥𑐵𑐳𑐵 𑐴𑐾 𑐥𑐵𑐳𑐵𑐫𑐵𑐟 𑐖𑑂𑐫𑐵 𑐰𑐂𑐐𑐸 𑐮𑐵 𑐏𑑅 𑐣𑐶 𑑋’ 𑐕𑐟𑐵 𑐮𑐵 𑐩𑐶𑐏𑐵𑐫𑑂 𑐴𑐶𑐂𑐳𑐾𑐔𑑂𑐰𑐣𑐵𑐔𑑂𑐰𑑄𑐐𑐸 𑐡𑐸, 𑐄𑐎𑐶𑐳𑐣𑑄 𑐣𑑂𑐫𑐣𑐵𑑄 𑐣𑑂𑐫𑐣𑐾 𑐩𑐖𑐶𑐂𑐎 ‘𑐎𑑂𑐰𑑄… 𑐎𑑂𑐰𑑄…’ 𑐴𑐵𑑅𑐧𑐮𑐫𑑂 𑐎𑐶𑐳𑐶𑐫𑐵 𑐎𑐠𑐸 𑐐𑐣 𑑋 𑐰𑐫𑐵𑐟 𑐟𑐳𑐎𑑄 𑐥𑑂𑐫𑐵𑑅𑐔𑐵𑐫𑐵𑐰𑐮 𑑋 𑐁𑑅 𑐰𑑄 𑐕𑐟𑐵 𑐴𑐾 𑐔𑐷𑐖 𑐖𑐎 𑐩𑐵𑐮𑐵𑐔𑑂𑐰𑑄𑐐𑐸 𑐡𑐸 – 𑐰 𑐏𑑅 𑐮𑑅 𑑋
𑐧𑑂𑐫𑐵𑑄𑐔𑐵𑑄 𑐠𑑅𑐠𑐶𑐟𑐶 𑐰 𑐥𑐵𑐳𑐵𑐥𑐶𑑄𑐟 𑐕𑐠𑐵𑐳𑑄 𑐩𑐸𑑄𑐎𑐮, 𑐀𑐮𑐾 𑐂𑐩𑐶𑐟 𑐦𑐸𑐎𑑂𑐎𑐳𑐶𑐟 𑐨𑐔𑐵 𑐟𑐵𑐥𑐵𑐎 𑐔𑑂𑐰𑑄𑐐𑐸 𑐟𑐐𑐵𑑅𑐐𑐸 𑐐𑐵𑑅 𑐕𑐐𑐵𑑅𑐫𑐵 𑐳𑐶𑐠𑐫𑑂 𑐔𑑂𑐰𑐣𑐵𑑅 ‘𑐟𑑂𑐰𑐵𑐬𑑂𑐬… 𑐟𑑂𑐰𑐵𑐬𑑂𑐬..’ 𑐴𑐵 𑐢𑐎𑐵𑑅 𑐢𑐵𑐮 𑑋 𑐡𑐎𑑂𑐰𑑄 𑐧𑑂𑐫𑐵𑑄𑐫𑐵𑐟 𑐣𑑂𑐫𑐣𑐵𑑄 𑐣𑑂𑐫𑐣𑐾 𑐩𑐖𑐷𑐎 ‘𑐟𑑂𑐰𑐵𑐬𑑂𑐬…𑐟𑑂𑐰𑐵𑐬𑑂𑐬…’ 𑐴𑐵𑐮𑐵𑐔𑑂𑐰𑐣 𑑋
𑐧𑑂𑐫𑐵𑑄𑐔𑐵𑐟 𑐴𑐵𑑅𑐐𑐸 𑐳𑑅 𑐟𑐵𑐫𑐵𑑅 𑐎𑐶𑐳𑐶𑐫𑐵 𑐣𑑂𑐴𑐵𑐫𑑂𑐥𑑄 𑐟𑐶𑑄𑐳𑑂𑐰𑐵𑐟 𑑋 𑐰𑑄 𑐧𑑂𑐫𑐵𑑄𑐔𑐵 𑐢𑐂𑐥𑐶𑑄 𑐮𑑅 𑐡𑐸𑐠𑐵𑐫𑑂 𑐔𑑂𑐰𑐣𑐵𑑅 𑐴𑐵𑐮𑐷 𑐢𑐫𑐵𑐐𑐸 𑐏𑑃 𑐳𑐶𑐄 𑑋 𑐰 𑐄𑐐𑐸 𑐴𑐾 𑐡𑐶𑐱𑐵𑐫𑑂 𑐣𑑂𑐴𑑂𑐫𑐵𑑅𑐰𑐣 𑑋 𑐧𑑂𑐫𑐵𑑄𑐔𑐵𑐟 𑐗𑐣𑑂𑐗𑐣𑑂 𑐟𑐟𑑅𑐳𑐮𑑄 𑐴𑐵𑐮 𑑋 𑐥𑑂𑐫𑐵𑑅𑐔𑐵𑑅𑐩𑑂𑐴 𑐎𑐶𑐳𑐶 𑐣𑑄 𑐗𑐣𑑂 𑐟𑐳𑐎𑑄 𑐧𑑂𑐰𑐵𑑃𑐫𑑂 𑐰𑐣 𑑋
𑐎𑐶𑐳𑐶 𑐐𑐵𑑅𑐫𑐵 𑐣𑑂𑐴𑑂𑐫𑑅𑐣𑐾 𑐠𑑂𑐫𑐣𑐷𑐠𑐾 𑐔𑑂𑐰𑑄𑐧𑐮𑐫𑑂 𑐧𑑂𑐫𑐵𑑄𑐔𑐵𑐟 𑐗𑐣 𑐐𑑅𑐥𑑅 𑐴𑐾 𑐔𑐧𑑂𑐧𑐸𑐂 𑐠𑐾𑑄 𑐔𑑂𑐰𑑄𑐎 𑐴𑐵𑐮 𑑋 𑐎𑐶𑐳𑐶 𑐣𑑂𑐴𑑂𑐫𑐵𑑅𑐰𑐣 𑑋 𑐀𑐮𑐾 𑐨𑐬𑐵𑐫𑑂𑐐𑑂𑐰𑑅𑐐𑐸 𑐮𑑂𑐰𑐴𑑄 𑐠𑐾𑑄 𑐰 𑐐𑐵𑐮𑐫𑑂 𑐎𑐸𑐟𑑄 𑐰𑐣 𑑋 𑐰 𑐀𑐣 𑐴𑐾 𑐳𑐶𑐟 𑑋
𑐠𑐸𑐎𑐠𑑄 𑐀𑐴𑑄𑐎𑐵𑐬𑐷 𑐎𑐶𑐳𑐶𑐫𑐵𑐐𑐸 𑐀𑐣𑑂𑐟 𑐖𑐸𑐮 𑑋