𑐫𑐾𑑃 – 𑐨𑐵𑐬𑐟𑐫𑐵 𑐳𑐶𑐎𑑂𑐎𑐶𑐩𑐫𑑂 𑐮𑐕𑐶𑐫𑑄𑐎𑑄 𑐣𑐾𑐰𑐵𑑅 𑐨𑐵𑐫𑑂 𑐳𑑂𑐫𑐣𑐾𑐐𑐸 𑐥𑑂𑐬𑐱𑐶𑐎𑑂𑐲𑐞 𑐱𑐸𑐬𑐸 𑐖𑐹𑐐𑐸 𑐡𑐸 𑑋 𑐳𑐶𑐎𑑂𑐎𑐶𑐩𑐫𑐵 𑐳𑐶𑐒𑑂𑐟𑐵𑐩𑐫𑑂 𑐳𑑂𑐠𑐵𑐣𑐷𑐫 𑐣𑐾𑐰𑐵𑑅𑐟𑐫𑑂 𑐡𑐠𑐸𑐂 𑐠𑑂𑐰 𑐎𑐎𑑂𑐲𑐵 𑐱𑐸𑐬𑐸 𑐫𑐵𑑅𑐐𑐸 𑐏𑑅 𑑋 𑐳𑐶𑐒𑑂𑐟𑐵𑐩𑐫𑐵 𑐣𑐾𑐰𑐵𑑅 𑐨𑐵𑐫𑑂 𑐧𑑂𑐰𑐣𑐾𑐎𑐸𑐠𑐶𑐫𑐵 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐄𑐐𑐸 𑐣𑐾𑐰𑐵𑑅 𑐨𑐵𑐫𑑂𑐫𑐵 𑐎𑐎𑑂𑐲𑐵𑐫𑑂 𑐳𑐶𑐒𑑂𑐟𑐵𑐩 𑐰 𑐖𑑅𑐏𑑅 𑐔𑑂𑐰𑑄𑐥𑐶𑑄 𑐣𑐵𑐥𑑄 𑐫𑐵𑐣𑐵𑑅 𑑔𑑖 𑐪 𑐧𑑂𑐰𑑃𑐩𑐶𑐟𑐫𑑂𑐳𑑄 𑐧𑑂𑐰𑐟𑐶 𑐎𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐠𑑂𑐰 𑐎𑐎𑑂𑐲𑐵 𑐖𑑂𑐫𑐵𑐫𑑂 𑐰𑐣𑐾𑐩𑐵𑑅𑐥𑐶𑑄 𑐩𑐣𑐹𑐟𑐫𑑂 𑐮𑐵𑐐𑐶𑑄 𑐳𑐣𑐶𑐮𑐫𑑂 𑐰 𑐩𑐾𑐥𑐶𑐣𑐶 𑐮𑐵𑐐𑐶𑑄 𑐳𑐸𑐠𑐫𑑂 𑐫𑐵𑐣𑐵𑑅 𑐣𑐶𑐐𑐹 𑐱𑐶𑐦𑑂𑐚 𑐳𑐘𑑂𑐔𑐵𑐮𑐣 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋
𑐎𑐎𑑂𑐲𑐵𑐫𑐵 𑐄𑐮𑐾𑐖𑑂𑐫𑐵 𑐳𑐩𑐵𑐬𑑀𑐴𑐫𑑂 𑐰𑐬𑐶𑐲𑑂𑐛 𑐳𑐩𑐵𑐖𑐳𑐾𑐰𑐷 𑐡𑐾𑐰𑐎𑐸𑐩𑐵𑐬𑐷 𑐥𑑂𑐬𑐢𑐵𑐣 𑐩𑐹𑐥𑐵𑐴𑐵𑑄 𑐎𑐠𑑄 𑐗𑐵𑑅𑐐𑐸 𑐏𑑅𑐳𑐵 𑐱𑐵𑐣𑑂𑐟𑐶𑐣𑐐𑐬 𑐐𑐵𑐄𑑃 𑐳𑐸𑐢𑐵𑐬 𑐳𑐩𑐶𑐟𑐶𑐫𑐵 𑐣𑐵𑐫𑑅 𑐎𑐺𑐲𑑂𑐞 𑐎𑑂𑐲𑐾𑐟𑑂𑐬𑐷 𑐰𑐶𑐱𑐾𑐲 𑐥𑐵𑐴𑐵𑑄 𑐎𑐠𑑄 𑐗𑐵𑑅𑐐𑐸 𑐏𑑅 𑑋

𑐣𑐾𑐰𑐵𑑅 𑐨𑐵𑐫𑑂 𑐰𑐶𑐨𑐵𑐐𑐫𑐵 𑐥𑑂𑐬𑐩𑐸𑐏 𑐰𑐶𑐎𑐵𑐳 𑐥𑑂𑐬𑐢𑐵𑐣𑑄 𑐟𑐫𑐵𑐬 𑐫𑐵𑐣𑐵𑐡𑐷𑐐𑐸 𑐮𑐕𑐶𑐫𑑄𑐎𑑄𑐫𑐵 𑐎𑑀𑐬𑑂‍𑐱𑐫𑐵 𑐁𑐢𑐵𑐬𑐫𑑂 𑐥𑑂𑐫𑐪 𑐱𑐶𑐎𑑂𑐲𑐶𑐎𑐵𑐥𑐶𑑄 𑐩𑐷𑐣𑐵 𑐥𑑂𑐬𑐢𑐵𑐣, 𑐟𑐵𑐬𑐵 𑐥𑑂𑐬𑐢𑐵𑐣, 𑐧𑐧𑐶𑐟𑐵 𑐥𑑂𑐬𑐢𑐵𑐣 𑐰 𑐣𑐶𑐬𑑂‍𑐩𑐮𑐵 𑐥𑑂𑐬𑐢𑐵𑐣𑐥𑐶𑑄𑐳𑑄 𑐨𑐵𑐫𑑂 𑐳𑑂𑐫𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐰𑐫𑑂𑐎𑑅𑐥𑐶𑑄 𑐥𑑂𑐫𑐪𑑄 𑐫𑐾𑑃𑐫𑑂 𑐰𑐫𑐵𑑅 𑐣𑐾𑐰𑐵𑑅 𑐨𑐵𑐫𑑂, 𑐎𑐮𑐵 𑐰 𑐳𑑄𑐳𑑂𑐎𑐺𑐟𑐶 𑐧𑐵𑐬𑐾 𑐎𑐎𑑂𑐲𑐵 𑐎𑐫𑐵𑑅 𑐳𑐫𑐾𑐎𑐵 𑐰𑑄𑐥𑐶𑑄 𑐏𑑅 𑑋
𑐨𑐵𑐫𑑂 𑐧𑑂𑐰𑐣𑐾𑐎𑐸𑐠𑐶𑐫𑐵 𑐳𑐔𑐶𑐰 𑐀𑐖𑐶𑐟 𑐥𑑂𑐬𑐢𑐵𑐣𑑄 𑐮𑐳𑐎𑐸𑐳 𑐫𑐵𑐳𑐾𑑄 𑐤𑑂𑐫𑐵𑐎𑐹𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐳𑑄𑐫𑑀𑐖𑐎 𑐰𑐶𑐎𑐵𑐳 𑐥𑑂𑐬𑐢𑐵𑐣, 𑐥𑑂𑐬𑐱𑐶𑐎𑑂𑐲𑐎 𑐮𑐶𑐳𑐾𑑄 𑐣𑐾𑐰𑐵𑑅 𑐳𑐶𑐎𑑂𑐎𑐶𑐩 𑐴𑐾𑐬𑐵𑐮𑑂𑐜𑐫𑐵 𑐳𑐩𑑂𑐥𑐵𑐡𑐎 𑐩𑐷𑐣𑐵 𑐥𑑂𑐬𑐢𑐵𑐣𑐥𑐶𑑄𑐳𑑄 𑐣𑐾𑐰𑐵𑑅 𑐨𑐵𑐫𑑂 𑐰 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶 𑐳𑐫𑐾𑐎𑐵𑑅 𑐤𑑂𑐫𑑅𑐣𑐾 𑐤𑑂𑐫𑐵𑑅 𑐰𑐣𑐾𑐐𑐸 𑐠𑑂𑐰 𑐕𑐐𑐹 𑐀𑐰𑐳𑐬 𑐏𑑅 𑐢𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐧𑑂𑐰𑐣𑐾𑐎𑐸𑐠𑐶𑐫𑐵 𑐣𑐵𑐫𑑅 𑐰𑐶𑐣𑑀𑐡 𑐥𑑂𑐬𑐢𑐵𑐣, 𑐳𑐮𑑂𑐮𑐵𑐴𑐎𑐵𑐬 𑐊𑐮𑐊𑐣 𑐥𑑂𑐬𑐢𑐵𑐣𑐥𑐶𑑄𑐳𑑄 𑐣𑑄 𑐣𑐸𑐐𑑅𑐏𑑃 𑐟𑐳𑐾𑑄 𑐠𑑂𑐰 𑐐𑑂𑐰𑐳𑐵𑑅𑐥𑐵𑐏𑐾𑑄 𑐳𑐶𑐎𑑂𑐎𑐶𑐩𑐫𑐵 𑐣𑐾𑐰𑐵𑑅𑐟𑐫𑑂𑐳𑑄 𑐮𑐵𑐨 𑐎𑐵𑐫𑐾 𑐦𑐂𑐐𑐸 𑐧𑐶𑐔𑐵𑑅 𑐟𑐫𑐵𑐡𑐶𑐮 𑑋 𑐠𑑂𑐰 𑐎𑐎𑑂𑐲𑐵𑐫𑑂 𑐂𑐔𑑂𑐕𑐸𑐎𑐥𑐶𑑄 𑐳𑐸𑑄 𑐣𑑄 𑐩𑐣𑐸𑐏𑑄 𑐡𑐠𑐸𑐂 𑐎𑐎𑑂𑐲𑐵𑐫𑑂 𑐔𑑂𑐰𑐣𑐾 𑐦𑐂𑐐𑐸 𑐰𑑂𑐫𑐰𑐳𑑂𑐠𑐵 𑐫𑐵𑑅𑐐𑐸 𑐡𑐸 𑑋 𑐳𑐶𑐎𑑂𑐎𑐶𑐩𑐫𑐵 𑐠𑑅𑐐𑐸 𑐴𑐾 𑐖𑐣𑐱𑐎𑑂𑐟𑐶 𑐕𑑂𑐫𑐮𑐵𑑅 𑐮𑐕𑐶𑐫𑑄𑐎𑑄 𑐣𑐾𑐰𑐵𑑅 𑐨𑐵𑐫𑑂 𑐳𑑂𑐫𑐣𑐾𑐐𑐸 𑐎𑐎𑑂𑐲𑐵 𑐳𑐘𑑂𑐔𑐵𑐮𑐣 𑐖𑐹𑐐𑐸 𑐠𑑂𑐰𑐴𑐾 𑐤𑐵𑐥𑐵𑑄𑐏𑐸𑐳𑐷 𑐏𑑅 𑑋