𑐫𑐾𑑃 – 𑐳𑐶𑐎𑑂𑐎𑐶𑐩𑐫𑐵 𑐣𑐾𑐰𑐵𑑅𑐟𑐫𑑂𑐟 𑐣𑐾𑐰𑐵𑑅 𑐨𑐵𑐫𑑂 𑐳𑑂𑐫𑐣𑐾𑐐𑐸 𑐎𑐎𑑂𑐲𑐵 𑐴𑐵𑐣𑑄 𑐱𑐸𑐬𑐸 𑐖𑐹𑐐𑐸 𑐡𑐸 𑑋 𑐔𑐶𑐎𑐸𑐮𑐵𑐫𑐵 𑐂𑐮𑐫𑑂 𑐨𑐵𑐫𑑂 𑐳𑑂𑐫𑐣𑐾𑐐𑐸 𑐎𑐠𑑄 𑐰𑑄𑐐𑐸 𑐰𑐵𑐮𑐫𑑂 𑐳𑐶𑐎𑑂𑐎𑐶𑐩𑐫𑐵 𑐳𑐶𑐒𑐟𑐵𑐩𑐫𑑂 𑐠𑑂𑐰 𑐎𑐎𑑂𑐲𑐵 𑐱𑐸𑐬𑐸 𑐖𑐹𑐐𑐸 𑐏𑑅 𑑋 𑐣𑐾𑐰𑐵𑑅 𑐨𑐵𑐫𑑂 𑐧𑑂𑐰𑐣𑐾𑐎𑐸𑐠𑐶𑐫𑐵 𑐐𑑂𑐰𑐳𑐵𑐮𑐫𑑂 𑐮𑐕𑐶𑐫𑑄𑐎𑑄 𑐣𑑂𑐴𑑂𑐫𑐵𑐂𑐐𑐸 𑐎𑐠𑑄 𑐠𑑂𑐰 𑐎𑐎𑑂𑐲𑐵 𑐣𑑂𑐴𑑂𑐫𑐵𑑅𑐐𑐸 𑐏𑑅 𑑋 𑐳𑐶𑐎𑑂𑐎𑐶𑐩 𑐥𑑂𑐬𑐴𑐬𑐷𑐫𑐵 𑐩𑑀𑐚𑑀𑐬 𑐨𑐾𑐴𑐶𑐎𑐮 𑐂𑐣𑑂𑐳𑑂𑐥𑐾𑐎𑑂𑐚𑐬 𑐩𑐴𑐾𑐣𑑂𑐡𑑂𑐬 𑐥𑑂𑐬𑐢𑐵𑐣 𑐩𑐹 𑐥𑐵𑐴𑐵𑑄 𑐎𑐠𑑄 𑐗𑐵𑑅𑐐𑐸 𑐎𑐎𑑂𑐲𑐵𑐫𑐵 𑐄𑐮𑐾𑐖𑑂𑐫𑐵 𑐳𑐩𑐵𑐬𑑀𑐴𑐫𑑂 𑐣𑐵𑑄𑐖𑐵𑑅𑐩𑑂𑐴 𑐎𑐮𑐵𑐎𑐵𑐬 𑐄𑐟𑑂𑐟𑐩 𑐎𑐮𑐵𑐎𑐵𑐬 𑐥𑐵𑐴𑐵𑑄 𑐎𑐠𑑄 𑐗𑐵𑑅𑐐𑐸 𑐏𑑅 𑑋 𑐮𑐶𑐳𑐾𑑄 𑐖𑑂𑐫𑐵𑐗𑑂𑐰𑐮𑐫𑑂 𑐩𑐾𑐥𑐶𑑄 𑐣𑑄 𑐠𑐷𑐠𑐷 𑐴𑐣𑐾𑐧𑐴𑑅𑐥𑐶𑑄𑐳𑑄 𑐧𑑂𑐰𑐟𑐶 𑐎𑐵𑑅𑐐𑐸 𑐏𑑅 𑑋

𑐄𑐐𑐸 𑐎𑐎𑑂𑐲𑐵𑐫𑑂 𑐧𑑂𑐰𑐟𑐶 𑐎𑐵𑐫𑐾𑐟 𑑔𑑐 𑐩𑑂𑐴 𑐩𑐶𑐳𑐵 𑐩𑐶𑐖𑑄 𑐳𑐴𑐨𑐵𑐐𑐷𑐟𑐫𑑂𑐳𑑄 𑐣𑐵𑑄 𑐔𑑂𑐰𑐎𑐹𑐐𑐸 𑐡𑐸 𑑋 𑐎𑐎𑑂𑐲𑐵 𑐱𑐶𑐎𑑂𑐲𑐎 𑐩𑐫𑑂𑐖𑐸 𑐣𑐶𑐱𑐵 𑐥𑑂𑐬𑐢𑐵𑐣𑑄 𑐎𑐫𑐵𑐡𑐷 𑑋 𑐣𑐾𑐰𑐵𑑅 𑐨𑐵𑐫𑑂 𑐳𑑂𑐫𑐣𑐾𑐎𑐸𑐠𑐶𑐥𑐵𑐏𑐾𑑄 𑐰𑑄𑐐𑐸 𑐟𑐵𑐮𑑂𑐮𑐵𑐫𑑂 𑐣𑑄 𑐨𑐵𑐲𑐵 𑐮𑐐𑐵𑐫𑐟 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶 𑐰 𑐣𑐳𑐵𑐟𑑂𑐰𑑃𑐳𑐵 𑐡𑐫𑐾𑐎𑐾𑐐𑐸 𑐟𑐵𑐮𑐶𑐩 𑐎𑐎𑑂𑐲𑐵 𑐳𑐘𑑂𑐔𑐵𑐮𑐣 𑐫𑐵𑑅𑐐𑐸 𑐏𑑅 𑑋 𑐄𑐐𑐸 𑐎𑐎𑑂𑐲𑐵𑐫𑑂 𑑖𑑐 𑐩𑑂𑐴𑐾𑐳𑑂𑐫𑐵𑑄 𑐧𑑂𑐰𑐟𑐶 𑐎𑐵𑑅𑐐𑐸 𑐏𑑅 𑑋 𑐰𑐫𑐵𑑄 𑐮𑐶𑐥𑐵 𑐳𑑂𑐫𑐣𑐾𑐎𑐸𑐠𑐶𑑄 𑐠𑑂𑐰 𑐎𑐎𑑂𑐲𑐵 𑐣𑐶𑐫𑐩𑐶𑐟 𑐳𑐘𑑂𑐔𑐵𑐮𑐣 𑐫𑐵𑐫𑐾𑐐𑐸 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐏𑑅 𑑋

𑐣𑐾𑐰𑐵𑑅 𑐨𑐵𑐫𑑂 𑐳𑑂𑐫𑐣𑐾𑐎𑐸𑐠𑐶𑐫𑐵 𑐣𑐵𑐫𑑅 𑐰𑐶𑐣𑑀𑐡 𑐥𑑂𑐬𑐢𑐵𑐣𑑄 𑐣𑐾𑐰𑐵𑑅 𑐖𑐵𑐟𑐶𑐫𑐵 𑐡𑐎𑐮𑐫𑑂 𑐩𑐴𑐟𑑂𑐰𑐥𑐹𑐬𑑂𑐞 𑐀𑑄𑐐 𑐨𑐵𑐫𑑂 𑐏𑑅 𑐢𑐵𑐳𑐾𑑄 𑐳𑐶𑐎𑑂𑐎𑐶𑐩𑐫𑑂 𑐣𑐾𑐰𑐵𑑅𑐟𑐫𑑂 𑐥𑐴𑐶𑐔𑐵𑐣 𑐎𑐵𑐫𑐩 𑐫𑐵𑐫𑐾𑐐𑐸 𑐏𑑅𑐳𑐵 𑐨𑐵𑐲𑐵 𑐳𑑂𑐫𑐣𑐾𑐐𑐸 𑐀𑐟𑐶𑐎𑑄 𑐩𑐴𑐟𑑂𑐰𑐥𑐹𑐬𑑂𑐞 𑐖𑐹𑐐𑐸 𑐎𑐵𑐬𑐞𑑄 𑐠𑐖𑑂𑐫𑐵𑑅𑐐𑐸 𑐎𑐎𑑂𑐲𑐵 𑐳𑐘𑑂𑐔𑐵𑐮𑐣 𑐫𑐵𑐣𑐵𑐐𑐸 𑐏𑑃 𑐎𑐣𑐵𑐡𑐶𑐮 𑑋 𑐕𑐎𑑂𑐰𑑅 𑐎𑐎𑑂𑐲𑐵 𑐳𑐘𑑂𑐔𑐵𑐮𑐣 𑐫𑐵𑐫𑐾𑐢𑐸𑑄𑐎𑐵𑑅 𑐴𑐵𑐣𑑄 𑐴𑐵𑐣𑑄 𑐎𑐎𑑂𑐲𑐵 𑐔𑐮𑐾 𑐫𑐵𑐫𑐾 𑐩𑐵𑐮 𑐢𑐎𑐵𑑅 𑐟𑑅𑐐𑐹𑐠𑐵𑐳𑑄 𑐂𑐣𑐵𑐥 𑐰𑑅𑐐𑐸𑐮𑐶𑑄 𑐠𑑅𑐥𑐶𑑄𑐳𑑄 𑐴𑐵𑐣𑑄 𑐎𑐎𑑂𑐲𑐵 𑐳𑐘𑑂𑐔𑐵𑐮𑐣 𑐫𑐵𑐣𑐵𑐐𑐸 𑐏𑑃 𑐣𑑄 𑐰𑐫𑑂𑐎𑐮𑑄 𑐎𑐣𑐵𑐡𑐶𑐮 𑑋 𑐣𑐾𑐰𑐵𑑅 𑐨𑐵𑐫𑑂 𑐳𑑂𑐫𑐣𑐾𑐎𑐸𑐠𑐶𑑄 𑐖𑑂𑐫𑐵 𑐴𑐾 𑐫𑐵𑐣𑐵𑑅 𑐣𑐾𑐰𑐵𑑅𑐟𑐫𑑂𑐟 𑐖𑐵𑐐𑐺𑐟 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋