𑐣𑐵𑐬𑐡 𑐰𑐖𑑂𑐬𑐵𑐔𑐵𑐬𑑂𑐫

𑐂𑐣𑑂𑐡𑑂𑐬 𑐩𑐵𑐮𑐷 𑑋 𑐣𑐵𑐩𑑄 𑐴𑐾 𑐐𑐵𑑅 𑑋 𑐕𑐩𑑂𑐴 𑐳𑐳𑐎𑑂𑐟 𑐳𑐩𑐵𑐮𑑀𑐔𑐎, 𑐳𑐩𑐷𑐎𑑂𑐲𑐎, 𑐨𑐵𑐲𑐵𑐰𑐶𑐡𑑂,𑐎𑑀𑐲𑐎𑐵𑐬 𑐰 𑐎𑐰𑐶 𑑋 ‘𑐖𑐶 𑐎𑐵𑐮𑐶𑐩𑐵𑐟𑐶𑐂 𑐡𑐣𑐵𑐔𑑂𑐰𑐣𑐵’ 𑐢𑐎𑐵𑑅 𑐴𑐸𑑄𑐎𑐵𑐬 𑐫𑐵𑐣𑐵 𑐎𑐰𑐶𑐟𑐵 𑐔𑑂𑐰𑐫𑐵𑐡𑐷𑐩𑑂𑐴 𑐰𑐫𑐾𑐎𑐮𑑄 𑐮𑐶𑐥𑐵 𑐰𑐣𑐵 𑐕𑐵𑐫𑑂 𑐏𑑅 𑐎𑐰𑐶𑐟𑐵𑐫𑑂 𑐣𑐶𑐬𑐣𑑂𑐟𑐬𑐟𑐵 𑐧𑐶𑐫𑐵 𑐩𑐡𑐶𑐮 𑑋 𑐟𑐬 𑐰𑐫𑐾𑐎𑐮𑑄 𑐳𑐸𑐬𑐸𑑄 𑐣𑐶𑐳𑐾𑑄 𑐴𑐾 𑐣𑑂𑐴𑐹 𑐎𑐰𑐶𑐟𑐵𑐫𑐵 𑐰𑐎𑐵𑐮𑐟 𑐫𑐵𑐫𑐾𑐐𑐸 𑐖𑑂𑐫𑐵 𑐢𑐵𑑅𑐳𑐵 𑐣𑐶𑐬𑐣𑑂𑐟𑐬 𑐬𑐸𑐥𑑄 𑐫𑐵𑐣𑐵 𑐴𑐾 𑐰𑐫𑐵𑐔𑑂𑐰𑐣𑐵𑐡𑐶𑐮 𑑋 𑐀𑐮𑐾 𑐰𑐫𑐾𑐎𑐮𑑄 𑐠𑑅𑐟 𑐢𑐵𑑅𑐳𑐵 𑐳𑐩𑐵𑐮𑑀𑐔𑐣𑐵 𑐰 𑐎𑑀𑐲𑐫𑑂 𑐳𑐩𑐬𑑂𑐥𑐶𑐟 𑐫𑐵𑐣𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐩𑐵𑐮𑑀𑐔𑐣𑐵 𑐮𑐵𑐐𑐵𑐫𑑂 𑐠𑐩𑑂𑐴𑑄 𑐣𑑄 𑐔𑑂𑐰𑐫𑐵𑐡𑐶𑐮 𑐀𑐮𑐾 𑐐𑐸𑐮𑐶𑐏𑐾 𑐧𑐶𑐲𑐫 𑐧𑐳𑑂𑐟𑐸𑐂 𑐩𑐾𑐩𑐾𑐥𑐶𑑄 𑐳𑐩𑐵𑐮𑑀𑐔𑐎𑐥𑐶𑐣𑑂𑐟 𑐣𑑄 𑐧𑐶𑐲𑐫 𑐧𑐶𑐫𑐵𑑅 𑐔𑑂𑐰𑐎𑐵𑐡𑐷𑐐𑐸 𑐖𑑂𑐫𑐵 𑐫𑐵𑐣𑐵𑐡𑐷𑐮 𑑋 𑐏𑑃𑐫𑑂 𑐨𑐵𑐲𑐵𑐫𑐵 𑐨𑐵𑐲𑐵𑐰𑐶𑐡𑑂𑐟𑐫𑑂 𑐡𑐠𑑂𑐰𑐷 𑐣𑐾𑐥𑐵𑐮 𑐨𑐵𑐲𑐵𑐫𑐵 𑐧𑐶𑐲𑐫 (𑐢𑑂𑐰𑐣𑐶 𑐰 𑐏𑑃𑐐𑑂𑐰) 𑐳 𑐡𑐸𑐐𑐸 𑐨𑑂𑐬𑐩𑐫𑐵 𑐟𑐬𑑂𑐎𑐥𑐹𑐬𑑂𑐞 𑐳𑐩𑐷𑐎𑑂𑐲𑐵 𑐰𑐫𑐾𑐎𑐮𑑄 𑐫𑐵𑐣𑐵𑐡𑐷𑐐𑐸 𑐡𑐸 𑑋 𑐗𑑂𑐫𑐵𑐮 𑐎𑐳𑐎𑑀 ? 𑐢𑐎𑐵𑑅 𑐏𑑃𑐫𑑂 𑐨𑐵𑐲𑐵𑐫𑐵 𑐖𑑂𑐘𑐵𑐟𑐵 𑐩𑐴𑐵𑐣𑐣𑑂𑐡 𑐳𑐵𑐥𑐎𑑀𑐚𑐵𑑄 𑐬𑐸𑐥 𑐬𑐾𑐏𑐵 𑐥𑐟𑑂𑐬𑐶𑐎𑐵𑐫𑑂 𑐔𑑂𑐰𑑅𑐐𑐸 𑐔𑑂𑐰𑐳𑐹𑐫𑐵𑐟 𑐰𑐫𑑂𑐎𑐮𑑄 𑐏𑑃𑐫𑑂 𑐨𑐵𑐲𑐵𑑄 𑐴𑐾 𑐔𑑂𑐰𑐳𑐹 𑐔𑑂𑐰𑐫𑐵 𑐩𑑂𑐴𑐸𑐟𑐸𑐥𑑂𑐰𑐵𑑅 𑐟𑐶𑐎𑑂𑐎 𑐮𑐶𑐳𑑅 𑐧𑐶𑐫𑐵𑐡𑐷𑐐𑐸 𑐣𑑄 𑐠𑐣 𑐣𑑂𑐴𑑂𑐫𑐠𑐣𑐾 𑐧𑐴𑑅𑐖𑐹 𑑋 𑐀𑐠𑐾𑐴𑐾 𑐣𑐾𑐥𑐵𑐮𑐨𑐵𑐲𑐵𑐫𑐵 𑐎𑐰𑐶𑐟𑐵𑐫𑐵𑐟 𑐏𑑃𑐫𑑂 𑐨𑐵𑐲𑐵𑐫𑑂 𑐫𑑄𑐎𑐵𑑅 𑐣𑐾𑐥𑐵𑐮𑐨𑐵𑐲𑐫𑐵 𑐎𑐰𑐶𑐟𑐵𑐫𑐵𑐟 𑐡𑐾𑐫𑑂 𑐣𑑂𑐫𑑄𑐎 𑐣𑑂𑐫𑑄𑐎𑐾𑐐𑐸 𑐖𑑂𑐫𑐵 𑐣𑑄 𑐰𑐫𑐾𑐎𑐮𑑄 𑐫𑐵𑐣𑐵𑐡𑐷𑐐𑐸 𑐡𑐸 𑑋 𑐐𑐸𑐎𑐾𑑄 𑐫𑐵𑐣𑐵𑑅 𑐰𑐫𑐾𑐎𑑅 𑐏𑑃𑐫𑑂 𑐨𑐵𑐲𑐵𑐫𑐵 𑐮𑐵𑐐𑐵𑐫𑑂 𑐣𑑄 𑐕𑐩𑑂𑐴 𑐳𑐳𑐎𑑂𑐟𑐩𑑂𑐴 𑐨𑐵𑐲𑐵𑐰𑐶𑐡𑑂, 𑐳𑐩𑐷𑐎𑑂𑐲𑐎𑐫𑐵 𑐬𑐸𑐥𑐫𑑂 𑐳𑐸𑐥𑐬𑐷𑐔𑐶𑐟 𑑋 𑐣𑐵𑑄 𑐖𑐵𑑅 𑑋 𑐰𑐫𑐾𑐎𑐮𑑄 𑐣𑑂𑐴𑑂𑐫𑐵𑐩𑑂𑐴 𑐮𑐶𑐳𑐾 𑐣𑑄 𑐣𑑂𑐴𑐵𑐥𑐵𑑄 𑐣𑐶𑐳𑐾𑑄 𑐩𑑂𑐴𑐳𑐶𑐄𑐥𑐶𑑄 𑐥𑐵𑐳𑐵𑐥𑐶𑑄 𑐠𑐾𑑄 𑐫𑐵𑐣𑐵𑑅 𑐰𑑂𑐫𑐰𑐴𑐵𑐬 𑐫𑐵𑐣𑐵𑐡𑐷 𑑋 𑐐𑐸𑐎𑐾𑑄 𑐫𑐵𑐣𑐵𑑅 𑐣𑑂𑐴𑐹𑐣𑑂𑐴𑐹𑐥𑐶𑑄 𑐔𑑂𑐰𑐩𑐶𑐥𑐶𑑄 𑐣𑑄 𑐰𑐫𑐾𑐎𑑅 𑐣𑐵𑐥 𑐑𑑁𑐥𑐮𑐏 𑐖𑐎 𑐏𑑃 𑐮𑑂𑐴𑐵𑐫𑑂𑐰𑑄 𑐴𑐾 𑐳𑐟𑑂𑐟𑐶𑐂 𑑋 𑐀𑐮𑐾 𑐰𑐫𑑂𑐎𑐮𑑄 𑐠𑐩𑑂𑐴𑑄 𑐫𑐵𑐫𑐾𑐥𑐹m𑐐𑐸 𑐐𑑂𑐰𑐴𑐵𑐮𑐶 𑐨𑐟𑐷𑐔𑐵 𑐴𑐾 𑐄𑐳𑐶 𑐩𑐔𑐵𑐳𑐾𑑄 𑐫𑐵𑐣𑐵𑐡𑐷 𑑋 𑐰𑐫𑑂𑐎𑐮𑑄 𑐳𑐸𑐫𑐵𑐟 𑐣𑑄 𑐣𑐶𑐬𑐵𑐳 𑐫𑐵𑐣𑐵𑐩𑐡𑐷 𑑋 𑐠𑑂𑐰 𑐗𑐶𑐡𑑃𑐫𑐵 𑐀𑐰𑐢𑐶𑐫𑐵𑐟 𑐡𑐸𑐰𑐵𑐮𑐾𑐐𑐸 𑐏𑑅𑐳𑐵 𑐫𑐎𑑂𑐰 𑐠𑐾𑑄 𑐣𑑂𑐴𑐹 𑐥𑐸𑐮𑐵𑑄 𑐔𑑂𑐰𑐩𑐶𑐥𑐶𑐣𑐶𑐐𑐸 𑐳𑐥𑐹m𑐫𑐵 𑐨𑐹𑐩𑐶𑐎𑐵 𑐰𑐫𑐾𑐎𑐮𑑄 𑐔𑑂𑐰𑐫𑐵𑐡𑐷𑐐𑐸 𑐗𑐷𑐳𑑄 𑐏𑑄𑐎𑐾𑐦𑐸 𑑋 𑐮𑐖𑐐𑐵 𑐎𑐠𑑄 𑐰𑐫𑐾𑐎𑑅 𑐳𑐬𑐎𑐵𑐬𑐫𑐵 𑐎𑐬𑑂𑐩𑐔𑐵𑐬𑐷 𑐏𑑅 𑑋 𑐰𑐫𑐾𑐎𑑅 𑐄𑐥 𑐳𑐔𑐶𑐰 𑐥𑐡𑐫𑑂 𑐬𑐵𑐖𑐳𑐨𑐵𑐫𑑂 𑐖𑑂𑐫𑐵𑐫𑐵𑐣𑐵 𑐔𑑂𑐰𑐔𑑂𑐰𑑃 𑐬𑐶𑐚𑐵𑐫𑐬𑑂𑐜 𑐖𑐸𑐫𑐵𑐡𑐶𑐮 𑑋 𑐰𑐫𑐾𑐎𑑅 𑐥𑑀𑐏𑐬𑐵𑐫𑑂 𑐳𑐬𑐸𑐰𑐵 𑐖𑐸𑐫𑐵 𑐰𑑄𑐧𑐮𑐫𑑂 𑐀𑐣𑐫𑐵 𑐣𑐾𑐰𑐵𑑅𑐟𑐫𑐾𑐟 𑐣𑑂𑐴𑑂𑐫𑐔𑐶𑐎𑐵𑑅 𑐗𑐷 𑐎𑐰𑐶 𑐔𑐶𑐟𑑂𑐟𑐢𑐬 𑐴𑐺𑐡𑐫𑐖𑐸𑐫𑐵 𑐩𑐹 𑐥𑐵𑐴𑐵𑑄𑐳𑐸𑐂 𑐟𑑅𑐢𑑄𑐐𑐸 𑐳𑐵𑐴𑐶𑐟𑑂𑐫 𑐳𑐩𑑂𑐩𑐾𑐮𑐣 𑐫𑐵𑐣𑐵𑐡𑐷𑐐𑐸 𑐮𑐸𑐩𑑄𑐎𑐾 𑐧𑐴𑑅𑐖𑐹 𑑋 𑐰 𑐕𑐐𑐹 𑐳𑑂𑐰𑐣𑐶𑐐𑐮𑑄 𑐥𑐶𑐣𑐾𑐫𑐵 𑐋𑐟𑐶𑐴𑐵𑐳𑐶𑐎 𑐳𑐵𑐴𑐶𑐟𑑂𑐫 𑐳𑐩𑑂𑐩𑐾𑐮𑐣 𑐏𑑅 𑑋

𑐣𑐸𑐐𑑅𑐔𑐸𑐫𑐵 𑐀𑐥𑑂𑐬𑐾𑐳𑐣 𑐮𑐶𑐥𑐵 𑐫𑐎𑑂𑐰 𑐠𑐾𑑄 𑐕𑐾𑑄𑐫𑑂 𑐴𑐾 𑐔𑑂𑐰𑐣𑐾𑐩𑐵𑑅𑐳𑐵𑑄 𑐰𑐫𑐾𑐎𑑅 𑐐𑐸𑐧𑐮𑐾𑑄 𑐴𑐾 𑐳𑐸𑐩𑑂𑐎 𑐩𑐡𑐸 𑑋 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐵𑐴𑐶𑐟𑑂𑐫𑐫𑐵 𑐢𑐸𑐎𑐹 𑐟𑑅𑐩𑐶 𑐫𑐵𑐫𑐾𑐫𑐵 𑐣𑐶𑑄𑐟𑐶𑑄 𑐗𑐷𑐳𑑄 𑐕𑐸𑑄 𑐣𑑄 𑐕𑐸𑑄 𑐫𑐵𑐣𑐵 𑐴𑐾 𑐔𑑂𑐰𑐣𑐾𑐩𑐵𑑅 𑐢𑐫𑐵𑐐𑐸 𑐨𑐵𑐰𑐣𑐵 𑐡𑐸𑐩𑑂𑐴 𑐰𑐫𑐾𑐎𑑅 𑐳𑐡𑐵𑑄 𑐴𑐾 𑐳𑐎𑑂𑐬𑐶𑐫 𑑋 𑐳𑐡𑐵𑑄 𑐴𑐾 𑐀𑐢𑑂𑐫𑐫𑐣 𑐰 𑐀𑐣𑐸𑐳𑐣𑑂𑐢𑐵𑐣𑐫𑑂 𑐰𑑂𑐫𑐳𑑂𑐟 𑑋]

𑐗𑐷𑐐𑐸 𑐨𑐵𑐲𑐵 𑐰 𑐳𑐵𑐴𑐶𑐟𑑂𑐫𑐫𑑂 𑐳𑐩𑐬𑑂𑐥𑐶𑐟 𑐀𑐖𑐵𑑅𑐩𑑂𑐴 𑐰𑑂𑐫𑐎𑑂𑐟𑐶𑐟𑑂𑐰 𑐨𑐵𑐖𑐸 𑐂𑐣𑑂𑐡𑑂𑐬 𑐩𑐵𑐮𑐷𑐫𑐵 𑐖𑐣𑑂𑐩 𑐣𑐾.𑐳𑑄 𑐖𑐣𑑂𑐩 𑑑𑑐𑑖𑑓 𑐐𑐸𑑄𑐮𑐵𑐠𑑂𑐰 𑑑 𑐳 𑐖𑐹𑐐𑐸 𑐏𑑅 𑑋 𑐀𑐮𑐾 𑐰𑐫𑑂𑐎𑑅 𑐠𑑁𑑄 𑐣𑐾.𑐳𑑄.𑑑𑑑𑑔𑑑 𑐔𑑁𑐮𑐵𑐐𑐵 𑑑𑑐 (𑑐𑑗𑑘 𑐧𑐿𑐳𑐵𑐏 𑑒𑑓) 𑐎𑐸𑐣𑑂𑐴𑐸 𑑗𑑘 𑐡𑑃𑐫𑐵 𑐧𑐿𑑄𑐳𑐫𑑂 𑐡𑐶𑐰𑑄𑐐𑐟 𑐖𑐸𑐫𑐵𑐡𑐶𑐮 𑑋 𑐰𑐫𑑂𑐎𑑅 𑐩𑐡𑐫𑐵𑑅 𑐗𑐷𑐐𑐸 𑐨𑐵𑐲𑐵𑐫𑐵 𑐳𑐩𑐵𑐮𑑀𑐔𑐣𑐵 𑐰 𑐀𑐣𑑂𑐰𑐾𑐲𑐣𑐫𑐵 𑐮𑐵𑐐𑐵𑐫𑑂 𑐟𑑅𑐢𑑄𑐐𑐸 𑐎𑑂𑐲𑐟𑐶 𑐮𑐵𑑅 𑐰𑐣𑐷𑐐𑐸 𑐥𑐎𑑂𑐎𑐵 𑐏𑑅 𑑋 𑐀𑐠𑐾𑐏𑑅𑐳𑐵𑑄 𑐰𑐫𑐾𑐎𑐮𑑄 𑐖𑐷𑐰𑑄𑐎𑐵𑐕𑐶 𑐗𑐷𑐐𑐸 𑐨𑐵𑐲𑐵𑐫𑐵𑐟 𑐟𑑅𑐩𑐶 𑐫𑐵𑐫𑐾𑐫𑐵 𑐣𑐶𑑄𑐟𑐶𑑄 𑐫𑐵𑐣𑐵𑐡𑐷𑐐𑐸 𑐐𑐸𑐐𑐸 𑐫𑑀𑐐𑐡𑐵𑐣𑑄 𑐏𑑅 𑐄𑐎𑐾𑑄 𑐫𑐵𑐣𑐵𑑅 𑐰𑐫𑐾𑐎𑑅 𑐳𑐡𑐵𑑄 𑐴𑐾 𑐗𑐷𑐐𑐸 𑐨𑐵𑐲𑐵𑐫𑐵 𑐏𑑂𑐫𑐮𑐫𑑂 𑐠𑐷𑐐𑐸 𑐣𑐐𑐸 𑐠𑐾𑑄 𑐖𑐸𑐫𑐵𑑅 𑐠𑐶𑐣𑐵 𑐴𑐾 𑐔𑑂𑐰𑐣𑐷 𑑋 𑐮𑑂𑐫𑐣𑐵𑐔𑑂𑐰𑐣𑐷 𑑋 𑐩𑑂𑐰𑐵𑐣𑐵𑐔𑑂𑐰𑐣𑐷 𑑋

𑐰𑐫𑐾𑐎𑑅𑐫𑐵 𑐥𑐶𑐡𑐣𑐾 𑐢𑐸𑑄𑐎𑐹𑐐𑐸 𑐳𑐦𑐹𑐫𑐵 𑐣𑐵𑑄 𑐢𑐮𑑅 𑐠𑐸𑐎𑐠𑑄 𑐡𑐸 –

𑐣𑐾𑐥𑐵𑐮𑐨𑐵𑐲𑐵𑐫𑑂 :

𑑑. 𑐣𑑂𑐴𑐹𑐥𑐸𑐏𑐸𑐮𑐶𑐂 𑐎𑐳𑐵𑑅𑐫𑐵 𑐏𑑂𑐰𑐵𑑅𑐥𑐵𑑅, 𑑑𑑐𑑙𑑑 𑐔𑑂𑐰𑐳𑐵𑐥𑐵𑐳𑐵,𑐫𑐾𑑃 𑑋

𑑒. 𑐗𑐷𑐐𑐸 𑐨𑐵𑐫𑑂 𑐗𑐷𑐐𑐸 𑐏𑑃𑐐𑑂𑐰𑑅 , 𑑑𑑐𑑙𑑘 𑐩𑐵𑑄𑐨𑐵𑐫𑑂 𑐩𑐹𑐮𑐸𑐏𑐵,𑐥𑑀𑐏𑐬𑐵 𑑋

𑑓𑑄. 𑐡𑑀𑐮𑐏𑐵 𑐨𑐵𑐲𑐶𑐎𑐵 𑐰 𑐕𑐸𑑄 , 𑑑𑑐𑑙𑑙 𑐔𑐷𑐨𑐵𑑅 𑐥𑑂𑐬𑐎𑐵𑐱𑐣, 𑐫𑐾𑑃 𑑋

𑑔. 𑐥𑐴𑐬𑐶 𑐨𑐵𑐲𑐶𑐎𑐵 𑐕𑐐𑐹 𑐀𑐢𑑂𑐫𑐫𑐣, 𑑑𑑑𑑐𑑒, 𑐠𑐥𑐸 𑐥𑐸𑐔𑑅,𑐫𑐮 𑑋

𑑕. 𑐥𑐸𑐮𑐵𑑄𑐐𑐸 𑐎𑐳𑐶  𑐣𑑂𑐴𑐹𑐐𑐸 𑐡𑐵𑐥𑐸, 𑑑𑑑𑑑𑑗 𑐟𑑂𑐬𑐶𑐰𑐾𑐞𑐷 𑐳𑐵𑐴𑐶𑐟𑑂𑐫 𑐥𑑂𑐬𑐟𑐶𑐳𑑂𑐠𑐵𑐣,𑐫𑐾𑑃 𑑋

𑑖. 𑐣𑐾𑐥𑐵𑐮 𑐨𑐵𑐲𑐵 𑐩𑑂𑐴𑐶𑐐𑑅 𑐠𑑁𑑄 𑐰 𑐎𑐣𑑂𑐴𑐾

𑑗. 𑐰𑐶𑐡𑑂𑐬𑑀𑐴𑐷 𑐎𑐰𑐶 𑐧𑐸𑐡𑑂𑐢 𑐳𑐵𑐫𑑂𑐩𑐶, 𑑑𑑑𑑑𑑗 𑐥𑑂𑐬𑐟𑐶𑐣𑐶𑐢𑐶 𑐥𑑂𑐬𑐎𑐵𑐱𑐣,𑐫𑐾𑑃 𑑋

𑑘. 𑐣𑐾𑐥𑐵𑐮𑐨𑐵𑐲𑐵 𑐩𑐵𑐢𑑂𑐫𑐩𑐶𑐎 𑐎𑐵𑐮𑐫𑐵 𑐕𑐸𑑄 , 𑑑𑑑𑑑𑑙 𑐎𑐸𑐟𑑅 𑐥𑐶𑐎𑐵𑐎,𑐏𑑂𑐰𑐥 𑑋

𑑙.  𑐴𑐵𑐂𑐎𑐸  𑐕𑐐𑐹 𑐀𑐢𑑂𑐫𑐫𑐣 𑑑𑑑𑑑𑑒𑑘 𑐎𑐸𑐟𑑅 𑐥𑐶𑐎𑐵𑐎𑑅,𑐏𑑂𑐰𑐥 𑑋

𑑑𑑐. 𑐠𑑅𑐐𑐸 𑐎𑐳𑐶  𑐠𑑅𑐐𑐸 𑐡𑐵𑐥𑐸, 𑑑𑑑𑑒𑑘 𑐣𑐾𑐥𑐵𑐮𑐨𑐵𑐲𑐵 𑐀𑐎𑐵𑐡𑐾𑐩𑐶,𑐎𑐶𑐥𑐹 𑑋

𑑑𑑑. 𑐣𑐾𑐥𑐵𑐮𑐨𑐵𑐲𑐵𑐫𑐵 𑐫𑐵𑐳𑐸 𑐢𑐸𑐎𑐹 ,𑑑𑑑𑑓𑑙 𑐎𑐸𑐟𑑅 𑐥𑐶𑐎𑐵𑐎𑑅, 𑐏𑑂𑐰𑐥 𑑋

𑐏𑑃𑐫𑑂𑐨𑐵𑐲𑐵𑐫𑑂

𑑑𑑄  𑐨𑐵𑐰𑐣𑐵 𑐳𑐵𑐩𑐫𑐶𑐎 𑐳𑑄𑐎𑐮𑐣, 𑑒𑑐𑑑𑑖 𑐥𑑂𑐬𑐟𑐶𑐣𑐶𑐢𑐶 𑐥𑑂𑐬𑐎𑐵𑐱𑐣,𑐫𑐾𑑃 𑑋

𑑒. 𑐱𑐱𑐷𑐎𑐵 𑐎𑐾𑐴𑐷 𑐐𑐷𑐟, (𑐳𑑄𑐥𑐵𑐡𑐣)𑑒𑑐𑑑𑑖 𑐥𑑂𑐬𑐟𑐶𑐣𑐶𑐢𑐶 𑐥𑑂𑐬𑐎𑐵𑐱𑐣,𑐫𑐾𑑃 𑑋

𑑓. 𑐖𑐷𑐰𑐣𑐎𑐵 𑐩𑑀𑐜, 𑑒𑑐𑑓𑑔 𑐟𑑂𑐬𑐶𑐰𑐾𑐞𑐷 𑐳𑐵𑐴𑐶𑐟𑑂𑐫 𑐥𑑂𑐬𑐟𑐶𑐳𑑂𑐠𑐵𑐣,𑐫𑐾𑑃 𑑋

𑑔. 𑐣𑐾𑐰𑐵𑐬𑐷𑐨𑐵𑐲𑐵𑐎𑐵 𑐎𑐾𑐴𑐶 𑐁𑐢𑐸𑐣𑐶𑐎 𑐎𑐰𑐶𑐟𑐵, (𑐳𑑄𑐥𑐵𑐡𑐣)𑑒𑑐𑑔𑑙 𑐣𑐾𑐬𑐵𑐥𑑂𑐬𑐥𑑂𑐬

𑑕. 𑐳𑐸𑐣𑑂𑐡𑐬 𑐩𑐢𑐶𑐎𑐬𑑂𑐩𑐷𑐎𑐵 𑐎𑐰𑐶𑐟𑐵 𑐳𑑄𑐐𑑂𑐬𑐴, 𑑒𑑐𑑔𑑙 𑐰𑐶𑐣𑐾𑐳𑐵𑐳 𑐐𑐸𑐠𑐶, 𑐏𑑂𑐰𑐥 𑑋

𑐳𑑄𑐥𑐵𑐡𑐣

𑑑. 𑐣𑐾𑐥𑐵𑐮𑐨𑐵𑐲𑐵 𑐣𑐶𑐰𑐣𑑂𑐢 𑐥𑐸𑐔𑑅, (𑑑𑑑𑑐𑑓 𑐥𑐵𑐳𑐵 𑐥𑐸𑐔𑑅,𑐫𑐾𑑃 𑑋

𑑒. 𑐣𑐾𑐥𑐵𑐮𑐨𑐵𑐲𑐵 𑐎𑐰𑐶𑐟𑐵 𑐳𑑄𑐐𑑂𑐬𑐴,(𑐳𑑄𑐫𑐸𑐎𑑂𑐟 𑐳𑑄𑐥𑐵𑐡𑐣)𑑑𑑑𑑑𑑖 𑐣𑐾𑐥𑐵𑐮𑐨𑐵𑐲𑐵 𑐥𑐬𑐶𑐲𑐡

𑑓. 𑐩𑐟 𑐎𑑂𑐰𑐫𑑂 𑐏𑐶𑐄𑑃 (𑐎𑐰𑐶𑐟𑐵) 𑑑𑑑𑑒𑑑 𑐎𑐸𑐟𑑅 𑐥𑐶𑐎𑐵𑐎𑑅, 𑐏𑑂𑐰𑐥

𑑔. 𑐎𑐸𑐔𑐵 𑐎𑐸𑐔𑐵𑐐𑐸 𑐎𑐶𑐥𑐵 𑐡𑐸𑐣𑐾, 𑑑𑑑𑑒𑑑 𑐱𑐵𑐎𑑂𑐫 𑐖𑑅, 𑐫𑐾𑑃 𑑋

𑑕. 𑐣𑑂𑐴𑐹𑐐𑐸 𑐥𑐮𑐵𑑅 (𑐧𑐵𑐏𑑄 𑐩𑐸𑐣𑐵) 𑑑𑑑𑑒𑑘 𑐣𑐾𑐥𑐵𑐮𑐨𑐵𑐲𑐵 𑐀𑐎𑐵𑐡𑐾𑐩𑐶, 𑐎𑐶𑐥𑐹 𑑋

𑑖𑑄  𑐣𑑂𑐴𑑂𑐫𑐮𑐸𑐰𑐵𑑅 (𑐳𑐵𑐩𑐫𑐶𑐎 𑐳𑑄𑐎𑐮𑐣) 𑑑𑑑𑑒𑑘 𑐣𑐾𑐥𑐵𑐮𑐨𑐵𑐲𑐵 𑐀𑐎𑐵𑐡𑐾𑐩𑐶, 𑐎𑐶𑐥𑐹 𑑋

𑑗. 𑐠𑑁𑑄𑐫𑐵 𑐴𑐵𑐂𑐎𑐸 𑐎𑐰𑐶𑐟𑐵–𑐕𑐧𑑂𑐰 (𑐴𑐵𑐂𑐎𑐸 𑐩𑐸𑐣𑐵)𑑑𑑑𑑓𑑔 𑐴𑐵𑐂𑐎𑐵𑐣,𑐫𑐾𑑃 𑑋

𑑘. 𑐠𑑁𑑄𑐫𑐵 𑐴𑐵𑐂𑐎𑐸 𑐎𑐰𑐶𑐟𑐵–𑐣𑐶𑐧𑑂𑐰,(𑐴𑐵𑐂𑐎𑐸 𑐩𑐸𑐣𑐵)𑑑𑑑𑑓𑑖 𑐴𑐵𑐂𑐎𑐵𑐣, 𑐫𑐾𑑃 𑑋

𑑙. 𑐣𑐾𑐰𑐵𑑅 𑐴𑐵𑐂𑐎𑐸 (𑐣𑐶𑐮𑐵𑐥𑑁)

𑑑𑑐. 𑐠𑑁𑑄𑐫𑐵 𑐎𑐰𑐶𑐟𑐵 (𑐳𑑂𑐰𑐮𑐵𑐥𑑁)

𑐳𑐶𑐬𑐥𑐵:

• 𑐱𑑂𑐬𑐾𑐲𑑂𑐛 𑐳𑐶𑐬𑐥𑐵𑑅 𑑑𑑐𑑙𑑖
• 𑐣𑑅𑐮𑐶 𑐥𑑂𑐬𑐢𑐵𑐣 𑐳𑐶𑐬𑐥𑐵𑑅 𑑑𑑑𑑒𑑖
• 𑐛𑐵𑐎𑐸𑐬𑐮𑐵𑐮 𑐳𑐶𑐬𑐥𑐵𑑅 𑑑𑑑𑑒𑑗
• 𑐴𑐾𑐩𑐬𑐵𑐖 𑐳𑐶𑐬𑐥𑐵𑑅 𑑑𑑑𑑓𑑙