“𑐳𑐟𑑂𑐫” 𑐟𑑂𑐰𑐥𑐸𑐂𑐐𑐸 𑐎𑐸𑐟𑐮𑐫𑑂 𑐳𑐟𑑂𑐫𑐫𑐵 𑐳𑑅 𑐟𑐂𑐥𑐶𑑄…

𑐥𑐟𑑂𑐬𑐎𑐵𑐬𑐶𑐟𑐵𑑄 𑐳𑐟𑑂𑐫𑐟𑐠𑑂𑐫 𑐧𑑂𑐰𑑃𑐩𑐶, 𑐣𑑂𑐫𑑃𑐩𑐶, 𑐳𑑂𑐰𑐎𑐸𑐩𑐶 𑐟𑐎 𑐠𑑂𑐫𑑄𑐎𑐷 𑑋 𑐥𑐟𑑂𑐬𑐎𑐵𑐬𑐥𑐶𑑄𑐳𑑄 𑐨𑑂𑐬𑐩 𑐴𑑂𑐰𑐮𑐾𑐩𑐖𑑂𑐫𑐹, 𑐳𑐟𑑂𑐫 𑐎𑐣𑐾𑐩𑐵𑑅, 𑐳𑐟𑑂𑐫 𑐳𑑂𑐠𑐵𑐥𑐶𑐟 𑐫𑐵𑐫𑐾𑐟 𑐨𑐹𑐩𑐶𑐎𑐵 𑐩𑑂𑐴𑐶𑐟𑐾𑐩𑐵𑑅𑑋 𑐟𑐬 𑐳𑑄𑐔𑐵𑐬 𑐏𑑂𑐫𑐮𑑄 𑐴𑐾 𑐫𑐵𑐣𑐵𑐔𑑂𑐰𑑄𑐐𑐸 𑐰𑐶𑐨𑐾𑐡 𑐗𑐷 𑐣𑐾𑐰𑐵𑑅𑐟 𑐮𑐐𑐵𑐫𑐟 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶𑐟𑐫𑑂𑐐𑐸 𑐁𑐥𑐵𑐮𑑄 𑐩𑐸𑐡𑑂𑐡𑐵𑐫𑑂 𑐮𑐸𑐫𑐵𑐔𑑂𑐰𑑄𑐐𑐸 𑐡𑐸, 𑐄𑐎𑐶𑐫𑐵 𑐰𑐶𑐬𑐸𑐡𑑂𑐢𑐫𑑂 𑐳𑑅 𑐠𑑂𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐎𑐠𑑄 𑐴𑐾 𑐠𑑂𑐰𑐫𑐵𑐔𑑂𑐰𑑄𑐐𑐸 𑐳𑑅 𑐰 𑐕𑐐𑐹 𑐁𑐣𑑂𑐡𑑀𑐮𑐣 𑐏𑑅 𑐳𑐟𑑂𑐫𑐣𑐵𑐬𑐵𑐫𑐞 𑐧𑐴𑐵𑐡𑐸𑐬 𑐱𑑂𑐬𑐾𑐲𑑂𑐛𑐫𑐵 𑐫𑑀𑐐𑐡𑐵𑐣𑐫𑐵 𑐎𑐡𑐬 𑐰 𑐩𑐵𑐣𑐫𑐵 𑐣𑐶𑑄𑐟𑐶𑑄 𑐠𑑂𑐰𑐫𑐵𑐔𑑂𑐰𑑄𑐐𑐸 𑐳𑑅 𑐰 𑐖𑐸𑐫𑐵𑐔𑑂𑐰𑑄𑐐𑐸 𑐁𑐣𑑂𑐡𑑀𑐮𑐣𑑋
𑐥𑐟𑑂𑐬𑐎𑐵𑐬𑐶𑐟𑐵𑐫𑐵 𑐢𑐬𑑂𑐩 𑐰 𑐄𑐐𑐸 𑐨𑐵𑐮𑐵 𑐧𑑀𑐢 𑐫𑐵𑐣𑐵𑑅 𑐣𑑂𑐴𑑂𑐫𑐖𑑂𑐫𑐵𑐫𑐾𑐩𑐵𑑅𑐐𑐸 𑐬𑐵𑐲𑑂𑐚𑑂𑐬𑐫𑐵 𑐥𑑂𑐫𑑄𑐐𑐹𑐐𑐸 𑐀𑐒𑑂𑐐𑑄 𑐫𑐵𑐣𑐵𑐔𑑂𑐰𑑄𑐐𑐸 𑐠𑐷𑐠𑐷 𑐰𑐶𑐨𑐾𑐡𑐫𑐵 𑐴𑐸𑐣𑐶𑑄 𑐢𑐂𑐐𑐸 𑐣𑐶𑐲𑑂𑐥𑐎𑑂𑐲 𑐖𑐸𑐂𑐩𑐵𑑅𑐥𑐶𑑄 𑐥𑐟𑑂𑐬𑐎𑐵𑐬𑐟 𑐬𑐵𑐖𑐣𑐷𑐟𑐶𑐎 𑐡𑐮𑐫𑐵 𑐰𑐶𑐔𑐵𑐬𑑄 𑐠𑑅𑐟 𑐨𑐸𑑄𑐎𑐵𑑅 𑐂𑐩𑐶𑐐𑐸 𑐮𑑂𑐫𑐹𑐮𑑂𑐫𑐹 𑐖𑐸𑐂𑐐𑐸 𑐰 𑐡𑐮𑐫𑐵 𑐳𑑂𑐰𑐵𑐬𑑂𑐠𑐫𑐵𑐟 𑐩𑐶𑐏𑐵 𑐟𑐶𑐳𑐶𑐣𑐵𑑅 𑐳𑐩𑐬𑑂𑐠𑐣 𑐫𑐵𑐳𑐾𑑄 𑐥𑐟𑑂𑐬𑐎𑐵𑐬𑐶𑐟𑐵𑐫𑐵 𑐳𑐶𑐡𑑂𑐢𑐵𑐣𑑂𑐟 𑐰 𑐢𑐬𑑂𑐩 𑐮𑑂𑐰𑑅𑐩𑑄𑐎𑐷𑐐𑐸 𑐥𑑂𑐬𑐰𑐺𑐟𑑂𑐟𑐶𑐫𑐵 𑐴𑐸𑐣𑐶𑑄 𑐏𑑅 𑑋 𑐠𑐖𑐵𑑅𑐐𑐸 𑐴𑐾 𑐀𑐰𑐳𑑂𑐠𑐵𑑄 𑐀𑐣𑑂𑐫𑐵𑐫 𑐣𑑂𑐫𑐵𑐫𑐫𑑂 𑐴𑐶𑐮𑐾𑐩𑐦𑐸𑐣𑐶𑑋

𑐣𑐾𑐥𑐵𑑅𑐫𑐵 𑐥𑐟𑑂𑐬𑐎𑐵𑐬𑐟 𑐕𑐰𑐵𑑅 𑐫𑐵𑐫𑐾𑐐𑐸 𑐟𑐵𑐟𑐸𑐣𑐵𑑄 𑐣𑑂𑐴𑐵𑐥𑐵𑑄𑐐𑐸 𑐏𑐸𑐳𑐷 𑐰𑐶.𑐳𑑄. 𑑒𑑐𑑐𑑘 𑐳𑐵𑐮𑐫𑑂 𑐣𑐾𑐥𑐵𑐮 𑐚𑐸𑐜𑐾𑐫𑐵 𑐳𑐩𑑂𑐥𑐵𑐡𑐎 𑐳𑐟𑑂𑐫𑐣𑐵𑐬𑐵𑐫𑐞 𑐧𑐴𑐵𑐡𑐸𑐬 𑐱𑑂𑐬𑐾𑐲𑑂𑐛𑑄 𑐣𑐾𑐥𑐵𑐮 𑐥𑐟𑑂𑐬𑐎𑐵𑐬 𑐳𑑄𑐑 𑐣𑐷𑐳𑑂𑐰𑐣𑐵𑐡𑐶𑐮 𑑋 𑑒𑑐𑑐𑑗 𑐳𑐵𑐮𑐫𑐵 𑐎𑑂𑐬𑐵𑐣𑑂𑐟𑐶 𑐮𑐶𑐥𑐵 𑐥𑐟𑑂𑐬𑐎𑐵𑐬𑐟 𑐕𑐰𑐵𑑅 𑐫𑐵𑐫𑐾𑐐𑐸, 𑐥𑐟𑑂𑐬𑐎𑐵𑐬𑐶𑐟𑐵 𑐏𑑂𑐫𑑅𑐫𑐵 𑐰𑐶𑐎𑐵𑐳 𑐰 𑐥𑐟𑑂𑐬𑐎𑐵𑐬𑐥𑐶𑐣𑐶𑐐𑐸 𑐴𑐎 𑐀𑐢𑐶𑐎𑐵𑐬𑐫𑐵 𑐣𑐶𑑄𑐟𑐶𑑄 𑐳𑐎𑐳𑐶𑐟 𑐕𑐐𑐹 𑐳𑑄𑐑𑐫𑑂 𑐩𑐸𑑄𑐎𑐾𑐐𑐸 𑐎𑐸𑐟𑑅 𑐐𑐸𑐮𑐶 𑐟𑑅𑐖𑐶𑐐𑐸 𑐎𑐸𑐟𑑅 𑐖𑐸𑐂 𑐢𑐂𑐐𑐸 𑐠𑑁𑑄𑐫𑐵 𑐣𑐾𑐥𑐵𑐮 𑐥𑐟𑑂𑐬𑐎𑐵𑐬 𑐩𑐴𑐵𑐳𑑄𑐑𑑄 𑐣𑑄 𑐔𑐎𑑂𑐎𑑄𑐎 𑐎𑑂𑐫𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐰 𑐴𑐾 𑐖𑐐𑐫𑑂 𑐠𑑁𑑄 𑐣𑐾𑐥𑐵𑐮 𑐥𑐟𑑂𑐬𑐎𑐵𑐬 𑐩𑐴𑐵𑐳𑑄𑐑 𑐡𑐣𑐵𑐔𑑂𑐰𑑄𑐐𑐸 𑐡𑐸, 𑐰 𑐴𑐾 𑐰𑐶𑐨𑐾𑐡𑑄 𑐖𑐵𑑅𑐐𑐸 𑐣𑐷𑐟𑐶 𑐎𑐫𑑂𑐔𑑂𑐫𑐵𑐣𑐵𑑅 𑐥𑐟𑑂𑐬𑐎𑐵𑐬𑐥𑐶𑑄 𑐕𑐰𑐵𑑅 𑐫𑐵𑐣𑐵𑐔𑑂𑐰𑐣𑐵𑐐𑐸 𑐡𑐩𑑂𑐨 𑐧𑑂𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐩𑑂𑐴𑐶𑐐𑑅 𑐳𑐟𑑂𑐫𑐣𑐵𑐬𑐵𑐫𑐞 𑐧𑐴𑐵𑐡𑐸𑐬 𑐱𑑂𑐬𑐾𑐲𑑂𑐛 𑐳𑑄𑐳𑑂𑐠𑐵𑐥𑐎 𑐣𑐵𑐫𑑅 𑐖𑐸𑐫𑐵𑑅 𑐣𑐷𑐳𑑂𑐰𑑄𑐐𑐸 𑐣𑐾𑐥𑐵𑐮 𑐥𑐟𑑂𑐬𑐎𑐵𑐬 𑐳𑑄𑐑𑐫𑐵 𑐳𑐾𑐎𑑂𑐬𑐾𑐚𑐬𑐷𑐫𑐵 𑐨𑐵𑐮𑐵 𑐨𑑀𑐖𑐧𑐴𑐵𑐡𑐸𑐬 𑐳𑐶𑑃𑐴 𑐣𑑂𑐫𑑁𑐥𑐵𑐣𑐾𑑄 𑐥𑐹𑐰𑑄𑐎𑐵𑐡𑐷𑐐𑐸 𑐐𑑂𑐬𑐷𑐲𑑂𑐩𑐧𑐴𑐵𑐡𑐸𑐬 𑐡𑐾𑐰𑐎𑑀𑐚𑐵𑑄 ‘𑐣𑐾𑐥𑐵𑐮𑐎𑑀 𑐕𑐵𑐥𑐵𑐏𑐵𑐣𑐵 𑐬 𑐥𑐟𑑂𑐬–𑐥𑐟𑑂𑐬𑐶𑐎𑐵𑐎𑑀 𑐂𑐟𑐶𑐴𑐵𑐳’ 𑐳𑐦𑐸𑐟𑐶𑐂 𑐎𑐶𑐫𑐵𑐟𑑅𑐐𑐸 𑐡𑐸 𑑋 𑐥𑐟𑑂𑐬𑐎𑐵𑐬𑐶𑐟𑐵 𑐧𑑂𑐰𑐩𑐶𑐥𑐶𑐣𑐶𑐐𑐸 𑐣𑐶𑑄𑐟𑐶𑑄 𑐠𑑂𑐰 𑐣𑑂𑐴𑐹𑐐𑐸 𑐟𑐠𑑂𑐫 𑐩𑐏𑐸𑑋 𑑒𑑐𑑐𑑙 𑐳𑐵𑐮 𑐰𑐿𑐱𑐵𑐏 𑑒𑑘 𑐐𑐟𑐾 𑐁𑐬𑑂𑐫 𑐳𑐩𑐵𑐖 𑐩𑐣𑑂𑐡𑐶𑐬, 𑐨𑑀𑐟𑐵𑐴𑐶𑐟𑐶𑐂 𑐖𑐹𑐐𑐸 𑐳𑑄𑐑𑐫𑐵 𑐣𑐶𑐎𑑂𑐰𑑅𑐐𑐸 𑐳𑐨𑐵𑑄 𑐴𑐵𑐎𑐣𑑄 𑐣𑐾𑐥𑐵𑐮 𑐚𑐸𑐜𑐾𑐫𑐵 𑐳𑐩𑑂𑐥𑐵𑐡𑐎 𑐳𑐟𑑂𑐫𑐣𑐵𑐬𑐵𑐫𑐞 𑐧𑐴𑐵𑐡𑐸𑐬 𑐱𑑂𑐬𑐾𑐲𑑂𑐛𑐫𑐵𑐟 𑐴𑐾 𑐣𑐵𑐫𑑅 𑐮𑑂𑐫𑐮𑑋

𑐎𑐵𑐬𑑂𑐫𑐳𑐩𑐶𑐟𑐶𑐂 𑐄𑐥𑐳𑐨𑐵𑐥𑐟𑐶 𑐥𑑂𑐬𑐾𑐩𑐬𑐵𑐖 𑐱𑐬𑑂𑐩𑐵 (𑐳𑑄, 𑐐𑑀𑐬𑐏𑐵𑐥𑐟𑑂𑐬), 𑐳𑐾𑐎𑑂𑐬𑐾𑐚𑐬𑐷 𑐨𑑀𑐖𑐧𑐴𑐵𑐡𑐸𑐬 𑐳𑐶𑑃𑐴 𑐣𑑂𑐫𑑁𑐥𑐵𑐣𑐾, (𑐳𑑄, 𑐟𑐬𑑄𑐐), 𑐖𑑂𑐰𑐵𑐂𑐣𑑂𑐚 𑐳𑐾𑐎𑑂𑐬𑐾𑐚𑐬𑐷 𑐬𑐵𑐩𑐴𑐬𑐶 𑐖𑑀𑐱𑐷, (𑐳𑑄, 𑐣𑐾𑐥𑐵𑐮 𑐥𑐸𑐎𑐵𑐬), 𑐎𑑀𑐲𑐵𑐢𑑂𑐫𑐎𑑂𑐲 𑐬𑐵𑐩𑐬𑐵𑐖 𑐱𑐬𑑂𑐩𑐵, (𑐣𑐾𑐥𑐵𑐮 𑐥𑐸𑐎𑐵𑐬) 𑐰 𑐳𑐡𑐳𑑂𑐫 𑐣𑐵𑐬𑐵𑐫𑐞𑐥𑑂𑐬𑐳𑐵𑐡 𑐄𑐥𑐵𑐢𑑂𑐫𑐵𑐫, 𑐡𑐾𑐰𑐾𑐣𑑂𑐡𑑂𑐬𑐬𑐵𑐖 𑐱𑐬𑑂𑐩𑐵, 𑐨𑐷𑐩𑐨𑐎𑑂𑐟 𑐖𑑀𑐱𑐷, 𑐥𑑂𑐬𑐎𑐵𑐱𑐔𑐣𑑂𑐡𑑂𑐬 𑐚𑐞𑑂𑐜𑐣𑐥𑐶𑑄𑐟 𑐮𑑂𑐫𑐮𑑋 𑐠𑐸𑐐𑐸 𑐳𑐩𑐶𑐟𑐶𑑄 𑐄𑐧𑐮𑐫𑑂 𑐡𑐾𑐱𑐫𑑂 𑐡𑐸𑐣𑐾𑐔𑑂𑐰𑑄𑐥𑐶𑑄 𑐰 𑐥𑐶𑐣𑐾𑐔𑑂𑐰𑑄𑐥𑐶𑑄 𑐥𑐟𑑂𑐬𑐎𑐵𑐬𑐥𑐶𑑄 𑐡𑐠𑐸𑐂 𑐳𑑂𑐰𑐵𑐥𑐹 𑐢𑐶𑐳𑐶 𑐢𑐵𑐫𑐾𑐎𑐾𑐐𑐸𑐣𑐶𑐳𑐾𑑄 𑐱𑑂𑐬𑐩𑐖𑐷𑐰𑐷 𑐥𑐟𑑂𑐬𑐎𑐵𑐬 𑐰 𑐳𑐩𑐵𑐔𑐵𑐬𑐥𑐟𑑂𑐬𑐫𑐵 𑐀𑐢𑐶𑐎𑐵𑐬 𑐬𑐎𑑂𑐲𑐵 𑐫𑐵𑐫𑐾𑐐𑐸 𑐟𑐵𑐟𑐸𑐣𑐵𑑄 𑐣𑑂𑐴𑑂𑐫𑐖𑑂𑐫𑐵𑑅𑐐𑐸 𑐏𑐣𑐾𑐡𑐸 𑑋 𑐳𑑄𑐔𑐵𑐬 𑐏𑑂𑐫𑐮𑐫𑑂 𑐡𑐸𑐐𑐸 𑐀𑐳𑑂𑐥𑐲𑑂𑐚𑐟𑐵 𑐣𑑂𑐴𑑄𑐎𑐾𑐟𑑅 𑐖𑑂𑐫𑐵 𑐣𑑂𑐴𑑂𑐫𑐵𑐎𑐹𑐐𑐸 𑐏𑐣𑐾𑐡𑐸 𑑋 𑐩𑐾𑐏𑐾 𑐄𑐧𑐮𑐫𑑂𑐫𑐵 𑐳𑐬𑐎𑐵𑐬𑑄 𑐡𑐫𑐾𑐎𑐹𑐐𑐸 𑐎𑐵𑐣𑐹𑐣𑑄 𑐳𑑄𑐔𑐵𑐬 𑐏𑑂𑐫𑐮𑐫𑑂 𑐴𑐳𑑂𑐟𑐎𑑂𑐲𑐾𑐥 𑐖𑐸𑐂𑐐𑐸 𑐏𑑃 𑐣𑑂𑐴𑑂𑐫𑐠𑑄𑐳𑐾𑑄 𑐠𑐸𑐎𑐶𑐫𑐵 𑐰𑐶𑐬𑐸𑐡𑑂𑐢 𑐠𑑅𑐐𑐸 𑐳𑑅 𑐣𑑄 𑐠𑑂𑐰𑐫𑐾𑐎𑐹𑐐𑐸 𑐏𑑅𑑋

𑐐𑑂𑐬𑐷𑐲𑑂𑐩𑐧𑐴𑐵𑐡𑐸𑐬 𑐡𑐾𑐰𑐎𑑀𑐚𑐵𑑄 𑐠𑑅𑐐𑐸 𑐳𑐦𑐹 “𑐣𑐾𑐥𑐵𑐮𑐎𑑀 𑐕𑐵𑐥𑐵𑐏𑐵𑐣𑐵 𑐬 𑐥𑐟𑑂𑐬𑐥𑐟𑑂𑐬𑐶𑐎𑐵𑐎𑑀 𑐂𑐟𑐶𑐴𑐵𑐳”𑐫𑑂 𑐣𑐾𑐥𑐵𑐮𑐫𑑂 𑐥𑐟𑑂𑐬𑐎𑐵𑐬𑐟 𑐳𑑄𑐐𑐛𑐶𑐟 𑐫𑐵𑐫𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑃 𑐣𑑂𑐴𑑂𑐫𑐠𑐣𑐵𑐡𑐷 𑐎𑐠𑑄 “𑐣𑐾𑐥𑐵𑐮 𑐥𑐟𑑂𑐬𑐎𑐵𑐬 𑐳𑑄𑐑𑐫𑐵 𑐥𑐮𑐶𑐳𑑂𑐠𑐵 𑑒𑑐𑑐𑑘 𑐳𑐵𑐮𑐫𑑂 𑐖𑐹𑐐𑐸 𑐏𑑅 𑑋 𑐠𑐸𑐎𑐶𑐫𑐵 𑐳𑑄𑐳𑑂𑐠𑐵𑐥𑐎 𑐀𑐢𑑂𑐫𑐎𑑂𑐲 𑐳𑐟𑑂𑐫𑐣𑐵𑐬𑐵𑐫𑐞 𑐧𑐴𑐵𑐡𑐸𑐬 𑐱𑑂𑐬𑐾𑐲𑑂𑐛 𑐏𑑅 𑑋” 𑐢𑐎𑐵𑑅 𑐔𑑂𑐰𑐫𑐵𑐡𑐷𑐐𑐸 𑐡𑐸𑐳𑐵 𑐐𑑀𑐬𑐏𑐵𑐥𑐟𑑂𑐬𑐫𑑂 𑑒𑑐𑑐𑑙 𑐳𑐵𑐮𑐩𑐵 𑐥𑐶𑐡𑑄𑐐𑐸 𑐳𑐩𑐵𑐔𑐵𑐬𑑄 𑐣𑑄 𑐰 𑐴𑐾 𑐢𑐵𑑅 𑑋

“𑑒𑑐𑑐𑑘 𑐳𑐵𑐮𑐫𑑂 𑐥𑐟𑑂𑐬𑐎𑐵𑐬 𑐊𑐎𑐟𑐵𑐫𑐵 𑐟𑐵𑐟𑐸𑐣𑐵𑑄 𑐳𑐟𑑂𑐫𑐣𑐵𑐬𑐵𑐫𑐞 𑐧𑐴𑐵𑐡𑐸𑐬 𑐱𑑂𑐬𑐾𑐲𑑂𑐛𑑄 𑐠𑑅𑐐𑐸 𑐣𑐾𑐟𑐺𑐟𑑂𑐰𑐫𑑂 𑐣𑐾𑐥𑐵𑐮 𑐥𑐟𑑂𑐬𑐎𑐵𑐬 𑐳𑑄𑐑 𑐣𑐷𑐳𑑂𑐰𑐣𑐵𑐡𑐷𑐐𑐸 𑐏𑑅 𑑋” 𑐠𑐸𑐐𑐸 𑐟𑐠𑑂𑐫𑑄 𑐳𑐟𑑂𑐫𑐣𑐵𑐬𑐵𑐫𑐞 𑐧𑐴𑐵𑐡𑐸𑐬 𑐱𑑂𑐬𑐾𑐲𑑂𑐛 𑐴𑐾 𑐣𑐾𑐥𑐵𑐮 𑐥𑐟𑑂𑐬𑐎𑐵𑐬 𑐩𑐴𑐵𑐳𑑄𑐑𑐫𑐵 𑐳𑑄𑐳𑑂𑐠𑐵𑐥𑐎 𑐏𑑅 𑐢𑐎𑐵𑑅 𑐥𑑂𑐬𑐩𑐵𑐞𑐶𑐟 𑐫𑐵𑐂 𑑋 𑐟𑐬 𑐣𑑂𑐴𑑂𑐫𑑅 𑐰𑑅𑐥𑐶𑑄𑐟 𑐠𑐣𑐾 𑐦𑐂, 𑐣𑑂𑐴𑑂𑐫𑑅 𑐰𑑅 𑐥𑐴𑑅 𑐫𑐵𑐣𑐵𑐔𑑂𑐰𑑄𑐥𑐶𑑄𑐟 𑐠𑐣𑐾𑐦𑐂𑐩𑐏𑐸 𑐢𑐵𑑅𑐠𑐾𑑄𑐖𑐵𑑅𑐐𑐸 𑐥𑐬𑐶𑐳𑑂𑐠𑐶𑐟𑐶 𑐣𑐾𑐥𑐵𑐮 𑐥𑐟𑑂𑐬𑐎𑐵𑐬 𑐩𑐴𑐵𑐳𑑄𑐑𑐫𑑂 𑐡𑐸, 𑐀𑐮𑐾 𑐄𑐐𑐸 𑐩𑐴𑐵𑐳𑑄𑐑𑐫𑑂 𑐬𑐵𑐖𑐣𑐷𑐟𑐶𑐎 𑐡𑐮𑐫𑐵 𑐧𑐮 𑐖𑑂𑐰𑐣𑐵𑑅 𑐡𑐸𑐴𑐵𑑄 𑐰𑐣𑐷𑐐𑐸 𑐎𑐵𑐬𑑂𑐫𑐳𑐩𑐶𑐟𑐶𑐫𑐵𑐎𑐾 𑐣𑑄 𑐳𑐟𑑂𑐫𑐫𑐵 𑐣𑐶𑑄𑐟𑐶𑑄 𑐮𑑂𑐰𑐵𑐫𑐾𑐟 𑐟𑐵𑐐𑐟 𑐩𑐐𑐵𑑅 𑑋 𑐠𑐸𑐐𑐸 𑐳𑑅 𑐠𑐣𑐵𑑅 𑐳𑐟𑑂𑐫𑐫𑐵 𑐥𑐎𑑂𑐲𑐫𑑂 𑐁𑐣𑑂𑐡𑑀𑐮𑐣 𑐫𑐵𑐣𑐵𑐔𑑂𑐰𑑄𑐐𑐸 𑐣𑐾𑐰𑐵𑑅 𑐥𑐟𑑂𑐬𑐎𑐵𑐬 𑐬𑐵𑐲𑑂𑐚𑑂𑐬𑐶𑐫 𑐡𑐧𑐹, 𑐣𑐾𑐥𑐵𑐮 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐥𑐟𑑂𑐬𑐎𑐵𑐬 𑐩𑐴𑐵𑐳𑑄𑐑𑐫𑐵 𑐨𑑀𑐚 𑐎𑐵𑐫𑐾𑐟 𑐳𑐟𑑂𑐫𑐣𑐵𑐬𑐵𑐫𑐵𑐞𑐫𑐵 𑐫𑑀𑐐𑐡𑐵𑐣 𑐎𑐡𑐬 𑐫𑐵𑐫𑐾𑐐𑐸÷𑐫𑐵𑐎𑐾𑐐𑐸 𑐰 𑐖𑐸𑐫𑐵𑐔𑑂𑐰𑑄𑐐𑐸 𑐀𑐣𑑂𑐫𑐵𑐫𑐫𑐵 𑐰𑐶𑐬𑐸𑐡𑑂𑐢 𑐳𑑅 𑐟𑐫𑐾𑐢𑐎𑐵𑑅 𑐟𑑂𑐫𑐵𑐎𑐵 𑐰𑑄𑐥𑐶𑐣𑐶𑐐𑐸 𑐣𑑄 𑐏𑑂𑐰𑐵𑑅 𑐴𑐶𑐮𑐵𑐰𑑄𑐐𑐸 𑐣𑑄 𑐡𑐸 𑑋 𑐄𑐎𑐠𑑄 𑐧𑐾𑐂𑐩𑐵𑐣𑐷 𑐫𑐵𑑅𑐥𑐶𑑄 𑐬𑐵𑐖𑐣𑐷𑐟𑐶𑐖𑑂𑐘 𑐥𑐟𑑂𑐬𑐎𑐵𑐬𑐟𑐫𑑂 𑐡𑐠𑐸𑐂 𑐣𑐾𑐰𑐵𑑅 𑐰 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐥𑐟𑑂𑐬𑐎𑐵𑐬𑐥𑐶𑑄 𑐣𑑄 𑐮𑐵𑑅𑐳𑐵 𑐠𑐸𑐐𑐸 𑐴𑐾 𑐟𑐠𑑂𑐫𑑄 𑐥𑐟𑑂𑐬𑐎𑐵𑐬 𑐩𑐴𑐵𑐳𑑄𑐑 𑐡𑐸𑐣𑐾 𑐣𑐶𑐐𑐹 𑐢𑐵𑐬𑐫𑑂 𑐥𑐟𑑂𑐬𑐎𑐵𑐬𑐟 𑐏𑐣𑐾𑐡𑐸𑐐𑐸 𑐀𑐰𑐳𑑂𑐠𑐵 𑐣𑑄 𑐩𑐾𑐏𑐾 𑐡𑐸 𑑋
𑐗𑐷𑐐𑐸 𑐳𑑅 𑐟𑑂𑐰𑐥𑐸𑐂𑐐𑐸 𑐎𑐸𑐟𑑅 𑐫𑐵𑐣𑐵𑐔𑑂𑐰𑑄𑐥𑐶𑑄𑐳𑑄 𑐢𑐫𑐵𑐔𑑂𑐰𑑄𑐐𑐸 𑐡𑐸 “𑐣𑐾𑐥𑐵𑐮𑐷 𑐎𑐵𑑃𑐐𑑂𑐬𑐾𑐳𑐫𑐵 𑐳𑑄𑐳𑑂𑐠𑐵𑐥𑐎 𑐣𑐾𑐟𑐵 𑐰 𑐥𑐹𑐬𑑂𑐰𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐎𑐺𑐲𑑂𑐞𑐥𑑂𑐬𑐳𑐵𑐡 𑐨𑐚𑑂𑐚𑐬𑐵𑐃𑑄 𑑒𑑐𑑑𑑒 𑐳𑐵𑐮𑐫𑑂 𑐳𑑄𑐳𑑂𑐠𑐵𑐥𑐎 𑐀𑐢𑑂𑐫𑐎𑑂𑐲 𑐎𑐠𑑄 𑐣𑐾𑐥𑐵𑐮 𑐥𑐟𑑂𑐬𑐎𑐵𑐬 𑐩𑐴𑐵𑐳𑑄𑐑𑐫𑐵 𑐖𑐐 𑐳𑑂𑐰𑑄𑐐𑐸 𑐏𑑅 𑑋 𑐣𑐾𑐥𑐵𑐮 𑐥𑐟𑑂𑐬𑐎𑐵𑐬 𑐳𑑄𑐑𑐫𑐵 𑐥𑐸𑐣𑐬𑑂𑐐𑐛𑐣𑐫𑐵 𑐠𑑂𑐰 𑐑𑐚𑐣𑐵𑐫𑐵𑐟 𑐴𑐾 𑐣𑐾𑐥𑐵𑐮 𑐥𑐟𑑂𑐬𑐎𑐵𑐬 𑐩𑐴𑐵𑐳𑑄𑐑𑐫𑐵 𑐣𑐷𑐳𑑂𑐰𑐣𑐵 𑐏𑑅 𑐢𑐎𑐵𑑅 𑑘 𑐳𑐵𑐮𑐫𑐵 𑐂𑐟𑐶𑐴𑐵𑐳 𑐴𑐸𑐂𑐐𑐸 𑐎𑐸𑐟𑑅 𑐂𑐩𑐶𑐳𑑄 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰 𑐴𑐾 𑐟𑐠𑑂𑐫𑐫𑐵𑐟 𑐰𑐶𑐢𑐵𑐣𑐫𑑂 𑐟𑐎𑑄 𑐡𑐸𑐠𑑂𑐫𑐵𑐎𑐵𑑅 𑐕𑐐𑐹 𑐧𑐮𑑂𑐮𑐵𑑅𑐐𑐸 𑐁𑐢𑐵𑐬 𑐢𑐎𑐵𑑅 𑐧𑑂𑐰𑐫𑐵𑐔𑑂𑐰𑑄𑐐𑐸 𑐣𑐾𑐥𑐵𑐮 𑐥𑐟𑑂𑐬𑐎𑐵𑐬 𑐩𑐴𑐵𑐳𑑄𑐑𑑄 𑐠𑑅𑐐𑐸 𑐥𑐮𑐶𑐳𑑂𑐠𑐵 𑐡𑐶𑑄 𑐴𑐾 𑑒𑑐𑑑𑑒 𑐔𑐿𑐟𑑂𑐬 𑑑𑑖 𑐐𑐟𑐾 𑐢𑐎𑐵𑑅 𑐴𑐣𑐵𑑅 𑐰𑐫𑐵𑐔𑑂𑐰𑑄𑐐𑐸 𑐡𑐸𑐳𑐵 𑐣𑐵𑐫𑑅𑐥𑐶𑐣𑐶𑐐𑐸 𑐎𑐶𑐥𑐵𑐫𑐵 𑐢𑐮𑐏𑐫𑑂 𑐣𑑄 𑐎𑐺𑐲𑑂𑐞𑐥𑑂𑐬𑐳𑐵𑐡 𑐨𑐚𑑂𑐚𑐬𑐵𑐃 𑐴𑐾 𑐣𑑂𑐴𑐵𑐥𑐵𑑄𑐩𑑂𑐴 𑐣𑐵𑐫𑑅 𑐎𑐠𑑄 𑐧𑑂𑐰𑐫𑐵𑑅 𑐳𑐟𑑂𑐫𑐣𑐵𑐬𑐵𑐫𑐞 𑐧𑐴𑐵𑐡𑐸𑐬 𑐱𑑂𑐬𑐾𑐲𑑂𑐛𑐫𑐵𑐟 𑐀𑐥𑐩𑐵𑐣 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋
𑐠𑐖𑐵𑑅𑐐𑐸 𑐥𑑂𑐬𑐰𑐺𑐟𑑂𑐟𑐶𑐫𑐵 𑐰𑐶𑐬𑑀𑐢 𑐫𑐵𑐳𑐾𑑄 𑐳𑐟𑑂𑐫𑐟𑐠𑑂𑐫𑐫𑐵𑐟 𑐩𑐣𑐣 𑐫𑐵𑐫𑐾𑐐𑐸 𑐳𑑅 𑐠𑑂𑐰𑐫𑐾𑐎𑐵𑑅 𑐣𑑂𑐴𑑂𑐫𑐖𑑂𑐫𑐵𑐣𑐵 𑐔𑑂𑐰𑐣𑐵𑐥𑐶𑑄 𑐗𑐷𑐳𑑄 𑐠𑐸𑐐𑐸 𑐳𑐮𑐫𑑂 𑐟𑐶𑐧𑑅 𑐖𑐸𑐂𑐎 𑐳𑐟𑑂𑐫𑐣𑐵𑐬𑐵𑐫𑐞 𑐧𑐴𑐵𑐡𑐸𑐬 𑐱𑑂𑐬𑐾𑐲𑑂𑐛𑐫𑐵 𑐖𑐣𑑂𑐩𑐖𑐫𑐣𑑂𑐟𑐷 𑐴𑐣𑐾𑐐𑐸 𑐥𑐬𑐩𑑂𑐥𑐬𑐵 𑐣𑑂𑐴𑑂𑐫𑐵𑐎𑐵 𑑋
𑐣𑐾𑐰𑐵𑑅 𑐥𑐟𑑂𑐬𑐎𑐵𑐬𑐟𑐫𑑂𑐐𑐸 𑐬𑐵𑐲𑑂𑐚𑑂𑐬𑐶𑐫 𑐳𑑄𑐐𑐛𑐣 𑐣𑐾𑐰𑐵𑑅 𑐥𑐟𑑂𑐬𑐎𑐵𑐬 𑐬𑐵𑐲𑑂𑐚𑑂𑐬𑐶𑐫 𑐡𑐧𑐸𑐮𑐶𑑄 𑐣𑐾.𑐳𑑄. 𑑑𑑑𑑔𑑐 (𑑒𑑐𑑗𑑖) 𑐳𑐵𑐮𑐫𑑂 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄𑐏𑐸𑐳𑐷 𑐳𑐟𑑂𑐫𑐣𑐵𑐬𑐵𑐫𑐞 𑐧𑐴𑐵𑐡𑐸𑐬 𑐱𑑂𑐬𑐾𑐲𑑂𑐛𑐫𑐵 𑑑𑑐𑑔 𑐎𑑂𑐰𑑅𑐐𑐸 𑐖𑐣𑑂𑐩𑐖𑐫𑐣𑑂𑐟𑐷 𑐴𑐣𑐵𑑄 𑐠𑐸𑐐𑐸 𑐥𑐬𑐩𑑂𑐥𑐬𑐵 𑐣𑑂𑐴𑑂𑐫𑐵𑐎𑐹𑐐𑐸 𑐏𑑅 𑑋 𑑒𑑐𑑗𑑗 𑐳𑐵𑐮𑐫𑑂 𑑑𑑐𑑕 𑐎𑑂𑐰𑑅𑐐𑐸 𑐖𑐣𑑂𑐩𑐖𑐫𑐣𑑂𑐟𑐷𑐂 𑐄𑐧𑐮𑐫𑑂𑐫𑐵 𑐳𑐘𑑂𑐔𑐵𑐬 𑐟𑐠𑐵 𑐳𑐹𑐔𑐣𑐵 𑐥𑑂𑐬𑐰𑐶𑐢𑐶 𑐩𑐣𑑂𑐟𑑂𑐬𑐷 𑐥𑐵𑐬𑑂𑐰𑐟 𑐐𑐸𑐬𑐸𑐒𑐫𑐵 𑐩𑐹𑐥𑐵𑐴𑐵𑑄𑐎𑐠𑑄 𑐧𑑂𑐰𑐟𑐶 𑐡𑐸𑐐𑐸 𑐏𑑅 𑑋 𑑑𑑐𑑖 𑐎𑑂𑐰𑑅𑐐𑐸 𑐖𑐣𑑂𑐩𑐖𑐫𑐣𑑂𑐟𑐷 𑐣𑐾𑐥𑐵𑐮 𑐥𑐟𑑂𑐬𑐎𑐵𑐬 𑐩𑐴𑐵𑐳𑑄𑐑𑐫𑐵 𑐳𑐨𑐵𑐴𑐮𑐫𑑂 𑐴𑐣𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅𑐳𑐵 𑐠𑐸𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐥𑐵𑐮 𑐥𑐟𑑂𑐬𑐎𑐵𑐬 𑐩𑐴𑐵𑐳𑑄𑐑𑑄 𑐩𑐵𑑅𑐐𑐸 𑐳𑐎𑐟𑐵𑑄 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑑅 𑐣𑑄 𑐳𑐸𑑄 𑐴𑐾 𑐄𑐥𑐳𑑂𑐠𑐶𑐟𑐶 𑐩𑐖𑐹𑐳𑐾 𑐠𑐸𑐐𑐸 𑐟𑐠𑑂𑐫 𑐳𑑂𑐰𑐷𑐎𑐵𑐬 𑐫𑐵𑐫𑐾𑐐𑐸 𑐴𑐶𑐩𑑂𑐩𑐟 𑐩𑐡𑐸𑐐𑐸 𑐏𑑃 𑐩𑑁𑐣 𑐬𑐸𑐥𑑄 𑐟𑑅𑐐𑐸 𑐖𑐸𑐮 𑑋 𑐰𑐫𑑂𑐎𑑅𑐫𑐵 𑑑𑑐𑑗 𑐎𑑂𑐰𑑅𑐐𑐸 𑐖𑐣𑑂𑐩𑐖𑐫𑐣𑑂𑐟𑐷 𑐫𑐮𑐫𑐵 𑐖𑑂𑐰𑐵𑐐𑐮 𑐧𑐿𑑄𑐎𑑂𑐰𑐚𑐫𑑂 𑐖𑐹𑐐𑐸 𑐏𑑅𑐳𑐵 𑑑𑑐𑑘 𑐎𑑂𑐰𑑅𑐐𑐸 𑐖𑐣𑑂𑐩𑐖𑐫𑐣𑑂𑐟𑐷 𑐴𑐣𑐾𑐐𑐸 𑐗𑑂𑐰𑐮𑐫𑑂 𑐬𑐎𑑂𑐟𑐡𑐵𑐣 𑐰 𑐥𑐟𑑂𑐬𑐎𑐵𑐬–𑐎𑐮𑐵𑐎𑐵𑐬 𑐡𑐠𑐸𑐂 𑐦𑐸𑐚𑐳𑐮 𑐎𑐵𑐳𑐵 𑐣𑑄 𑐖𑐹𑐐𑐸 𑐖𑐸𑐮 𑑋 𑐠𑐸𑐐𑐸 𑐁𑐣𑑂𑐡𑑀𑐮𑐣𑐫𑐵 𑐀𑐗 𑐧𑑂𑐫𑐵𑐥𑐎 𑐖𑐸𑐂𑐎 𑐖𑐹𑐐𑐸 𑐖𑑂𑐫𑐵 𑐦𑐸𑐚𑐳𑐮 𑐎𑐵𑐳𑐵 𑐠𑑁𑑄𑐟𑐎 𑐣𑑄 𑐣𑐶𑐬𑐣𑑂𑐟𑐬 𑐖𑐸𑐫𑐵𑐔𑑂𑐰𑑄𑐐𑐸 𑐖𑐸𑐮 𑑋 𑐠𑐸𑐎𑐠𑑄 𑐁𑐣𑑂𑐡𑑀𑐮𑐣𑐫𑐵 𑐳𑑂𑐰𑐬𑐸𑐥𑐫𑑂 𑐰𑐶𑐰𑐶𑐢𑐟𑐵 𑐴𑐫𑐵𑑅 𑐳𑑅 𑐟𑐫𑐾𑐐𑐸 𑐖𑑂𑐫𑐵 𑐩𑐡𑑂𑐡𑐶𑐎𑑂𑐎 𑐖𑐸𑐫𑐵𑐔𑑂𑐰𑑄𑐐𑐸 𑐴𑐾 𑐖𑐸𑐮𑐳𑐵 𑐠𑐸𑐐𑐸 𑐖𑑂𑐫𑐵𑐫𑐵 𑐀𑑅𑐏𑑅 𑐎𑐺𑐲𑑂𑐞𑐥𑑂𑐬𑐳𑐵𑐡 𑐨𑐚𑑂𑐚𑐬𑐵𑐃𑐫𑐵 𑐣𑐵𑐩𑑄 𑐁𑐩𑐳𑑄𑐔𑐵𑐬 𑐥𑑂𑐬𑐱𑐶𑐎𑑂𑐲𑐞 𑐥𑑂𑐬𑐟𑐶𑐲𑑂𑐛𑐵𑐣 𑐐𑐛𑐣 𑐫𑐵𑐫𑐾𑐐𑐸 𑐎𑐸𑐟𑑅 𑐠𑐷𑐠𑐷 𑐳𑐬𑐎𑐵𑐬𑑄 𑐧𑐵𑐬𑐩𑑂𑐧𑐵𑐬 𑐫𑐵𑐣𑐵𑐰𑑄 𑐔𑑂𑐰𑐣 𑑋 𑐳𑐸𑐱𑐷𑐮 𑐎𑑀𑐂𑐬𑐵𑐮𑐵 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐖𑐸𑐫𑐵𑐔𑑂𑐰𑑄𑐧𑐮𑐫𑑂 𑐄𑐧𑐮𑐫𑑂𑐫𑐵 𑐳𑐘𑑂𑐔𑐵𑐬 𑐩𑐣𑑂𑐟𑑂𑐬𑐷 𑐩𑐶𑐣𑐾𑐣𑑂𑐡𑑂𑐬 𑐬𑐶𑐖𑐵𑐮𑐫𑐵 𑐥𑑂𑐬𑐳𑑂𑐟𑐵𑐰𑐫𑑂 𑐩𑐣𑑂𑐟𑑂𑐬𑐶𑐥𑐬𑐶𑐲𑐡𑑄 ‘𑐎𑐺𑐲𑑂𑐞𑐥𑑂𑐬𑐳𑐵𑐡 𑐨𑐚𑑂𑐚𑐬𑐵𑐃 𑐬𑐵𑐲𑑂𑐚𑑂𑐬𑐶𑐫 𑐁𑐩 𑐳𑐘𑑂𑐔𑐵𑐬 𑐥𑑂𑐬𑐟𑐶𑐲𑑂𑐛𑐵𑐣’ 𑐣𑐷𑐳𑑂𑐰𑐣𑐾𑐐𑐸 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐏𑑃 𑐟𑐮 𑑋 𑐠𑐸𑐐𑐸 𑐣𑐶𑐬𑑂𑐞𑐫𑐫𑐵 𑐰𑐶𑐬𑐸𑐡𑑂𑐢𑐫𑑂 𑐳𑑅 𑐠𑑂𑐰𑐫𑐾𑐰𑑄 𑐠𑐸𑐐𑐸 𑐖𑑂𑐫𑐵𑑄 𑐳𑐬𑐎𑐵𑐬 𑐮𑐶𑐔𑐶𑐮 𑑋 ‘𑐎𑐺𑐲𑑂𑐞𑐥𑑂𑐬𑐳𑐵𑐡 𑐨𑐚𑑂𑐚𑐬𑐵𑐃 𑐬𑐵𑐲𑑂𑐚𑑂𑐬𑐶𑐫 𑐁𑐩 𑐳𑐘𑑂𑐔𑐵𑐬 𑐥𑑂𑐬𑐟𑐶𑐲𑑂𑐛𑐵𑐣’ 𑐫𑐵 𑐣𑐵𑑄 𑐴𑐶𑐮𑐵𑑅 ‘𑐬𑐵𑐲𑑂𑐚𑑂𑐬𑐶𑐫 𑐁𑐩 𑐳𑐘𑑂𑐔𑐵𑐬 𑐥𑑂𑐬𑐟𑐶𑐲𑑂𑐛𑐵𑐣’ 𑐟𑑅𑐐𑐸 𑐏𑑅 𑑋 𑐳𑐘𑑂𑐔𑐵𑐬𑐎𑐬𑑂𑐩𑐷𑐟𑐫𑑂𑐐𑐸 𑐎𑑂𑐲𑐩𑐟𑐵 𑐰𑐶𑐎𑐵𑐳𑐫𑐵 𑐣𑐶𑑄𑐟𑐶𑑄 𑐥𑑂𑐬𑐟𑐶𑐲𑑂𑐛𑐵𑐣 𑐣𑐷𑐳𑑂𑐰𑐣𑐾𑐐𑐸 𑐨𑐶𑑄𑐐𑐸 𑐖𑑂𑐫𑐵 𑐏𑑅𑐳𑐵𑑄 𑐠𑐸𑐎𑐶𑑄 𑐎𑐺𑐲𑑂𑐞𑐥𑑂𑐬𑐳𑐵𑐡 𑐨𑐚𑑂𑐚𑐬𑐵𑐃𑐫𑐵𑐟 𑐣𑐾𑐥𑐵𑐮 𑐥𑐟𑑂𑐬𑐎𑐵𑐬 𑐩𑐴𑐵𑐳𑑄𑐑𑐫𑐵 𑐳𑑄𑐳𑑂𑐠𑐵𑐥𑐎 𑐣𑐵𑐫𑑅𑐫𑐵 𑐣𑐵𑑄𑑄 𑐧𑐷𑐐𑐸 𑐠𑐾𑑄𑐖𑐵𑑅𑐐𑐸 𑐐𑐮𑐟 𑐟𑐠𑑂𑐫𑐫𑑂 𑐁𑐢𑐵𑐬𑐶𑐟 𑐖𑑂𑐫𑐵𑐫𑐵 𑐰𑐶𑐬𑑀𑐢 𑐳𑐎𑐨𑐣𑑄 𑐖𑐹𑐐𑐸 𑐖𑐸𑐮 𑑋
𑑒𑑐𑑗𑑒 𑐳𑐵𑐮𑐫𑐵 𑐧𑐖𑐾𑐚𑐫𑑂 𑐀𑐬𑑂𑐠𑐩𑐣𑑂𑐟𑑂𑐬𑐷 𑐬𑐵𑐩𑐱𑐬𑐞 𑐩𑐴𑐟𑑄 𑐣𑐾𑐥𑐵𑐮𑐷 𑐎𑐵𑑃𑐐𑑂𑐬𑐾𑐳𑐫𑐵 𑐳𑑄𑐳𑑂𑐠𑐵𑐥𑐎 𑐣𑐾𑐟𑐵 𑐎𑐺𑐲𑑂𑐞𑐥𑑂𑐬𑐳𑐵𑐡 𑐨𑐚𑑂𑐚𑐬𑐵𑐃𑐫𑐵 𑐮𑐸𑐩𑐣𑑂𑐟𑐶 𑐁𑐩𑐳𑑄𑐔𑐵𑐬 𑐥𑑂𑐬𑐟𑐶𑐲𑑂𑐛𑐵𑐣 𑐣𑐷𑐳𑑂𑐰𑐣𑐾𑐐𑐸 𑐏𑑃 𑐣𑑂𑐴𑑂𑐫𑐠𑐣 𑑋 𑑐𑑗𑑔 𑐳𑐵𑐮𑐫𑑂 𑐩𑑀𑐴𑐣𑐧𑐴𑐵𑐡𑐸𑐬 𑐧𑐳𑑂𑐣𑐾𑐟 𑐳𑐘𑑂𑐔𑐵𑐬𑐩𑐣𑑂𑐟𑑂𑐬𑐷 𑐖𑐹𑐧𑐮𑐫𑑂 𑐣𑑄 𑐠𑐸𑐐𑐸 𑐏𑑃 𑐣𑑂𑐴𑑂𑐫𑐠𑐣 𑑋 𑑒𑑐𑑗𑑙 𑐳𑐵𑐮𑐫𑑂 𑐣𑑄 𑐳𑐬𑐎𑐵𑐬𑑄 𑐠𑑅𑐐𑐸 𑐣𑐷𑐟𑐶 𑐰 𑐎𑐵𑐬𑑂𑐫𑐎𑑂𑐬𑐩𑐫𑑂 𑐎𑐺𑐲𑑂𑐞𑐥𑑂𑐬𑐳𑐵𑐡 𑐨𑐚𑑂𑐚𑐬𑐵𑐃 𑐁𑐩𑐳𑐘𑑂𑐔𑐵𑐬 𑐥𑑂𑐬𑐱𑐶𑐎𑑂𑐲𑐞 𑐥𑑂𑐬𑐟𑐶𑐲𑑂𑐛𑐵𑐣 𑐣𑐷𑐳𑑂𑐰𑐣𑐾𑐐𑐸 𑐏𑑃 𑐣𑑂𑐴𑑂𑐫𑐠𑐣 𑑋 𑐠𑐠𑐾 𑐳𑐬𑐎𑐵𑐬𑑄 𑐐𑐸𑐧𑐮𑐾 𑐐𑐸𑐧𑐮𑐾 𑐠𑐸𑐐𑐸 𑐐𑐮𑐟 𑐟𑐠𑑂𑐫 𑐳𑑂𑐰𑐣𑐾𑐟𑑅 𑐎𑐸𑐟𑑅 𑐫𑐵𑐟, 𑐠𑐸𑐎𑐶𑐫𑐵 𑐳𑐎𑐨𑐣𑑄 𑐰𑐶𑐬𑑀𑐢 𑐖𑐸𑐮 𑑋 𑐣𑐾𑐥𑐵𑐮 𑐥𑐟𑑂𑐬𑐎𑐵𑐬 𑐩𑐴𑐵𑐳𑑄𑐑𑐫𑐵 𑐣𑐶𑐰𑐬𑑂𑐟𑐩𑐵𑐣 𑐣𑐵𑐫𑑅 𑐰𑐶𑐥𑐸𑐮 𑐥𑑀𑐏𑐬𑐾𑐮 𑐰 𑐖𑑂𑐫𑐵𑐳𑐣𑐵 𑐥𑐸𑐔𑑅𑐣𑐵𑐥 𑐣𑐾𑐰𑐵𑑅 𑐥𑐟𑑂𑐬𑐎𑐵𑐬 𑐣𑑄 𑐳𑐴𑐨𑐵𑐐𑐷 𑐖𑐸𑐫𑐵𑑅 𑐣𑐾𑐥𑐵𑐮 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐩𑐴𑐵𑐳𑑄𑐑 𑐦𑑀𑐣𑐶𑐖𑑄 𑐧𑐵𑐬𑐩𑑂𑐧𑐵𑐬 𑐏𑑃 𑐧𑑂𑐫𑐵𑐎𑐵𑑅 𑐠𑐸𑐐𑐸 𑐰𑐶𑐲𑐫 𑐀𑐢𑑂𑐫𑐫𑐣𑐫𑐵 𑐖𑑂𑐫𑐵 𑐣𑑂𑐴𑑂𑐫𑐵𑐎𑐾𑐐𑐸 𑐳𑑅 𑐟𑑅𑐐𑐸 𑐏𑑅 𑑋 𑐥𑐟𑑂𑐬𑐎𑐵𑐬 𑐡𑐧𑐸𑐮𑐶𑑄 𑐟𑐠𑑂𑐫𑑄 𑐕𑐬𑑂𑐮𑐒𑑂𑐐𑐐𑐸 𑐠𑐸𑐐𑐸 𑐏𑑃𑐫𑐵 𑐴𑐵𑐣𑑄 𑐀𑐢𑑂𑐫𑐫𑐣 𑐫𑐵𑐫𑐾𑐐𑐸 𑐢𑐵𑐫𑐾𑐐𑐸 𑐢𑐂𑐐𑐸 𑐴𑐾 𑐩𑐾𑐐𑐸 𑐲𑐜𑐫𑐣𑑂𑐟𑑂𑐬 𑐏𑑅, 𑐠𑐸𑐎𑐶𑐫𑐵𑐟 𑐐𑐠𑐾 𑐏𑑅 𑐀𑐠𑐾 𑐴𑐾 𑐳𑑂𑐰𑐷𑐎𑐵𑐬 𑐫𑐵𑐫𑐾𑐩𑐵𑑅 𑐢𑐎𑐵𑑅 𑐳𑑅 𑐟𑑅𑐐𑐸 𑐏𑑅𑐳𑐵 𑐥𑐟𑑂𑐬𑐎𑐵𑐬 𑐩𑐴𑐵𑐳𑑄𑐑𑐫𑐵 𑑒𑑗 𑐎𑑂𑐰𑑅𑐐𑐸 𑐩𑐴𑐵𑐢𑐶𑐰𑐾𑐱𑐣𑐫𑐵 𑐩𑐵𑐂𑐣𑑂𑐜𑐾𑐚𑐫𑐵𑐟 𑐩𑐵𑐣 𑐟𑐫𑐵𑑅 𑐠𑐸𑐐𑐸 𑐎𑐸𑐟𑑅𑐫𑐵𑐟 𑐳𑑂𑐰𑐷𑐎𑐵𑐬 𑐫𑐵𑐫𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅 𑑋

𑐩𑐴𑐵𑐳𑑄𑐑𑐫𑐵 𑑒𑑗 𑐎𑑂𑐰𑑅𑐐𑐸 𑐩𑐴𑐵𑐢𑐶𑐰𑐾𑐱𑐣𑑄 𑐟𑑂𑐬𑐶𑐨𑐸𑐰𑐣 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑐵 𑐁𑐩𑐳𑐘𑑂𑐔𑐵𑐬 𑐟𑐠𑐵 𑐥𑐟𑑂𑐬𑐎𑐵𑐬𑐶𑐟𑐵 𑐰𑐶𑐨𑐵𑐐 𑐬 𑐂𑐟𑐶𑐴𑐵𑐳 𑐰𑐶𑐨𑐵𑐐 𑐡𑐸𑐠𑑂𑐫𑐵𑐎𑐵𑑅 𑐀𑐢𑑂𑐫𑐫𑐣 𑐎𑐵𑐬𑑂𑐫𑐡𑐮 𑐡𑐫𑐾𑐎𑐵𑑅 𑐠𑐸𑐐𑐸 𑐏𑑃𑐫𑐵 𑐳𑐟𑑂𑐫𑐟𑐠𑑂𑐫 𑐎𑑂𑐰𑑅𑐕𑐷𑐟 𑐩𑑂𑐫𑐵𑐣𑑂𑐜𑐾𑐚 𑐧𑑂𑐫𑐹𑐐𑐸 𑐏𑑅 𑑋 𑐠𑐸𑐐𑐸 𑐏𑑃𑐫𑑂 𑐦𑑀𑐣𑐶𑐖𑐫𑐵 𑐣𑐾𑐟𑐺𑐟𑑂𑐰𑐫𑑂 𑐣𑐾𑐰𑐵𑑅 𑐥𑐟𑑂𑐬𑐎𑐵𑐬, 𑐩𑐢𑐾𑐱𑐷 𑐥𑐟𑑂𑐬𑐎𑐵𑐬𑐥𑐶𑑄𑐳𑑄 𑐧𑑅 𑐧𑐶𑐫𑐵𑑅 𑐰𑐫𑐵𑐔𑑂𑐰𑑄𑐐𑐸 𑐖𑐸𑐮 𑑋 𑐠𑐸𑐐𑐸 𑐖𑑂𑐫𑐵𑐫𑑂 𑐮𑐶𑐧𑐵𑐎𑐾 𑐩𑐖𑑂𑐫𑐹𑐐𑐸 𑐏𑑃𑐫𑑂 𑐧𑐵𑐬𑐩𑑂𑐧𑐵𑐬 𑐢𑑂𑐫𑐵𑐣𑐵𑐎𑐬𑑂𑐲𑐞 𑐫𑐵𑐎𑐹𑐐𑐸 𑐏𑑅 𑑋 𑐠𑐸𑐐𑐸 𑐳𑑅𑐫𑐵 𑐳𑐩𑑂𑐧𑑀𑐢𑐣 𑐁𑑅𑐟𑐎 𑐣𑑄 𑐩𑐖𑐹𑐣𑐶 𑑋 𑐀𑐗 𑐄𑐐𑐸 𑐩𑑂𑐫𑐵𑐣𑑂𑐜𑐾𑐚 𑐀𑑅𑐏𑑅 𑐩𑐴𑐵𑐳𑑄𑐑𑐫𑐵 𑐥𑐹𑐬𑑂𑐰 𑐀𑐢𑑂𑐫𑐎𑑂𑐲𑐥𑐶𑐣𑐶𑐐𑐸 𑐧𑑂𑐫𑐎𑑂𑐟𑐶𑐟𑑂𑐰𑐫𑐵 𑐩𑐸𑐣𑐵 “𑐀𑐐𑑂𑐬 𑐀𑐣𑐸𑐴𑐵𑐬” 𑐳𑐦𑐹 𑐥𑐶𑐠𑐣𑐵 𑐩𑐴𑐵𑐳𑑄𑐑𑑄 𑐠𑐸𑐐𑐸 𑐳𑑅𑐫𑐵 𑐀𑑅𑐏𑑅 𑐴𑐵𑐣𑑄 𑐎𑐺𑐲𑑂𑐞𑐥𑑂𑐬𑐳𑐵𑐡 𑐨𑐚𑑂𑐚𑐬𑐵𑐃 𑐴𑐾 𑐳𑑄𑐳𑑂𑐠𑐵𑐥𑐎 𑐣𑐵𑐫𑑅 𑐏𑑅 𑐢𑐂𑐐𑐸 𑐨𑑂𑐬𑐩𑐫𑐵𑐟 𑐳𑑄𑐳𑑂𑐠𑐵𑐥𑐎 𑐫𑐵𑐫𑐾𑐐𑐸 𑐩𑐾𑐐𑐸 𑐎𑐸𑐟𑑅 𑐫𑐵𑐟 𑑋 𑐐𑐸𑐎𑐶𑐫𑐵 𑐣𑐾𑐥𑐵𑐮 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐥𑐟𑑂𑐬𑐎𑐵𑐬 𑐩𑐴𑐵𑐳𑑄𑐑 (𑐦𑑀𑐣𑐶𑐖), 𑐩𑐢𑐾𑐳𑐷 𑐥𑐟𑑂𑐬𑐎𑐵𑐬 𑐳𑐩𑐵𑐖, 𑐣𑐾𑐰𑐵𑑅 𑐥𑐟𑑂𑐬𑐎𑐵𑐬 𑐬𑐵𑐲𑑂𑐚𑑂𑐬𑐶𑐫 𑐡𑐧𑐹 𑐮𑐐𑐵𑐫𑐟 𑐳𑑄𑐐𑐛𑐣𑑄 𑐳𑐦𑐹𑐫𑐵 𑐥𑐶𑐟𑐧𑑂𑐰𑐖𑑂𑐫𑐵𑐫𑑂 𑐴𑐾 𑐰𑐣𑐵𑑅 𑐰𑐶𑐬𑑀𑐢 𑐫𑐵𑐳𑐾𑑄 𑐡𑐧𑐸𑐮𑐶𑐂 𑐴𑐾 𑐄𑐐𑐸 𑐳𑐦𑐹 𑐏𑐸𑐣𑐵𑑅 𑐟𑐎𑑄 𑐰𑐶𑐬𑑀𑐢 𑐫𑐵𑑅𑐐𑐸 𑐖𑐸𑐮 𑑋

𑐣𑐾𑐥𑐵𑐮 𑐥𑐟𑑂𑐬𑐎𑐵𑐬 𑐩𑐴𑐵𑐳𑑄𑐑𑑄 𑐂𑐩𑐵𑐣𑑂𑐡𑐵𑐬 𑐖𑐸𑐫𑐵𑑅 𑐩𑐴𑐵𑐢𑐶𑐰𑐾𑐱𑐣𑐫𑐵 𑐩𑑂𑐫𑐵𑐣𑑂𑐜𑐾𑐚𑐫𑐵𑐟 𑐢𑑂𑐫𑐵𑐣 𑐟𑐫𑐵𑑅 𑐎𑐟𑑂𑐟𑐵𑐎𑑂𑐎 𑐖𑑂𑐫𑐵 𑐩𑐣𑑂𑐴𑑂𑐫𑐵𑐎𑐹𑐐𑐸 𑐴𑐸𑐣𑐶𑑄 𑐠𑐸𑐐𑐸 𑐏𑑃 𑐐𑐣 𑐏𑑅 𑐀𑐣 𑐴𑐾 𑐡𑐶𑐣𑐵𑐔𑑂𑐰𑑄 𑐠𑐾𑑄 𑐟𑐵𑑅 𑑋 𑐟𑐬 𑐠𑐸𑐎𑐷 “𑐖𑑂𑐫𑐹𑐖𑑂𑐫𑐹 𑐢𑐵𑐫𑐾𑐐𑐸–𑐖𑑂𑐫𑐵 𑐩𑐫𑐵𑐫𑐾𑐐𑐸” 𑐥𑐴𑑅𑐫𑐵 𑐲𑐜𑐫𑐣𑑂𑐟𑑂𑐬 𑐖𑐸𑐫𑐵𑐔𑑂𑐰𑑄𑐐𑐸 𑐗𑐷𑐳𑑄 𑐰𑐵𑑅 𑐔𑐵𑐫𑐾𑐎𑐾𑐩𑐵𑑅 𑑋 𑐁𑐣𑑂𑐡𑑀𑐮𑐣 𑐫𑐵𑐂𑐥𑐶𑐣𑐶𑐐𑐸 𑐥𑐮𑐵𑑅 𑐀𑐗 𑐢𑐶𑐳𑐶 𑐢𑐵𑐫𑐾𑐩𑐵𑑅, 𑐳𑑅 𑐀𑐗 𑐳𑐱𑐎𑑂𑐟 𑐖𑐸𑐂𑐎 𑐧𑑂𑐰𑐮𑑄𑐎𑐾𑐩𑐵𑑅, 𑐴𑑂𑐫𑐹𑐥𑐵 𑐕𑐣𑑂𑐴𑐸 𑐀𑐰𑐱𑑂𑐫 𑐰𑐂 𑑋 𑐳𑐟𑑂𑐫𑐣𑐵𑐬𑐵𑐫𑐞 𑐧𑐴𑐵𑐡𑐸𑐬 𑐱𑑂𑐬𑐾𑐲𑑂𑐛𑐫𑐵 𑐫𑑀𑐐𑐡𑐵𑐣𑐫𑐵 𑐎𑐡𑐬 𑐕𑐣𑑂𑐴𑐸 𑐀𑐰𑐱𑑂𑐫 𑐖𑐸𑐂𑑋