–𑐰𑐶𑐖𑐫𑐎𑐺𑐲𑑂𑐞 𑐱𑑂𑐬𑐾𑐲𑑂𑐛

𑐰𑐵𑐒𑑂𑐩𑐫 𑐱𑐟𑐵𑐧𑑂𑐡𑐷 𑐥𑐸𑐬𑐸𑐲 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷 𑐕𑐩𑑂𑐴 ‘𑐮𑐶𑐨𑐶𑐒 𑐊𑐣𑑂𑐳𑐵𑐂𑐎𑑂𑐮𑑀 𑐩𑐶𑐜𑐶𑐫𑐵’ 𑐬𑐸𑐥𑐫𑑂 𑐗𑐷𑐐𑐸 𑐣𑑂𑐴𑑂𑐫𑑅𑐣𑐾 𑐢𑐳𑑂𑐰𑐵𑐣𑐵𑑅 𑐔𑑂𑐰𑐣𑐵𑐡𑐷𑐐𑐸 𑐡𑐸 𑑋 𑐣𑐾.𑐳𑑄. 𑑑𑑑𑑓𑑙 𑐧𑐕𑐮𑐵𑐐𑐵 𑐣𑐰𑑅𑐩𑐶𑐎𑐸𑐣𑑂𑐴𑐸 𑐰𑐫𑑂𑐎𑑅 𑐳𑐔𑑂𑐕𑐶 𑐡𑑃𑐫𑑂 𑐔𑑂𑐰𑐣𑐵𑐡𑐷 𑑋

𑐰𑐫𑑂𑐎𑐮𑑄 𑐨𑐵𑐲𑐵, 𑐳𑐵𑐴𑐶𑐟𑑂𑐫, 𑐎𑐮𑐵, 𑐳𑑄𑐳𑑂𑐎𑐺𑐟𑐶𑐫𑐵 𑐢𑐸𑐎𑐹 𑐗𑐷𑐐𑐸 𑐣𑑂𑐴𑑂𑐫𑑅𑐣𑐾 𑐖𑐎 𑐩𑐏𑐸, 𑐳𑐵𑐬𑐵 𑐳𑑄𑐳𑐵𑐬𑐫𑐵 𑐣𑑂𑐴𑑂𑐫𑑅𑐣𑐾 𑐟𑐫𑐵𑐡𑐷 𑐢𑐸𑑄𑐎𑐹𑐐𑐸 𑐡𑐸 𑑋

𑐀𑐗 𑐣𑐶𑐬𑐣𑑂𑐟𑐬 𑐬𑐸𑐥𑑄 𑐰𑐫𑑂𑐎𑐮𑑄 𑐳𑐎𑑂𑐬𑐶𑐫 𑐖𑐷𑐰𑐣 𑐴𑐣𑐵𑐔𑑂𑐰𑐣𑐵𑐡𑐷𑐐𑐸 𑐡𑐸 𑑋 𑐕𑐩𑑂𑐴 𑐏𑑀𑐖𑐎𑐬𑑂𑐟𑐵, 𑐕𑐩𑑂𑐴 𑐀𑐣𑐸𑐳𑐣𑑂𑐢𑐵𑐟𑐵, 𑐕𑐩𑑂𑐴 𑐰𑐶𑐡𑑂𑐰𑐵𑐣, 𑐀𑐮𑐾 𑐕𑐩𑑂𑐴 𑐎𑐸𑐱𑐮 𑐥𑑂𑐬𑐱𑐵𑐳𑐎𑐫𑐵 𑐬𑐸𑐥𑐫𑑂 𑐰𑐫𑑂𑐎𑐮𑑄 𑐠𑑅𑐟 𑐳𑑂𑐠𑐵𑐥𑐶𑐟 𑐫𑐵𑐣𑐵𑐡𑐷𑐐𑐸 𑐡𑐸 𑑋 𑐰𑐫𑑂𑐎𑑅𑐫𑐵 𑐳𑐵𑐴𑐶𑐟𑑂𑐫 𑐣𑑄 𑐎𑐾𑐰𑐮 𑐎𑐵𑐮𑑂𑐥𑐣𑐶𑐎 𑐧𑐵𑐏𑑄 𑐖𑐎 𑐩𑐏𑐸𑐳𑐾 𑐟𑐠𑑂𑐫, 𑐏𑑀𑐖 𑐰 𑐀𑐣𑐸𑐳𑐣𑑂𑐢𑐵𑐣𑐫𑑂 𑐁𑐢𑐵𑐬𑐶𑐟 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐐𑐠𑐾𑐎𑐶 𑐣𑐾𑐥𑐵𑐮𑐨𑐵𑐲𑐵𑐫𑑂 𑐥𑐶𑐡𑑄𑐐𑐸 𑐰𑐫𑑂𑐎𑑅𑐫𑐵 𑐖𑐫𑐥𑑂𑐬𑐎𑐵𑐱 𑐩𑐴𑐵𑐎𑐵𑐰𑑂𑐫 𑐰 𑐳𑐶𑐡𑑂𑐢𑐶𑐡𑐵𑐳 𑐥𑐹𑐢𑐵𑑅𑐥𑑂𑐫𑐵𑐏𑑄 𑐧𑑂𑐰𑐣𑐵 𑐳𑑂𑐰𑐮 𑐢𑐵𑑅𑐳𑐵 𑐥𑑂𑐬𑐎𑐵𑐱𑐶𑐟 𑐟𑐠𑑂𑐫, 𑐣𑑂𑐫𑐣𑐾𑐡𑐹𑐐𑐸 𑐟𑐠𑑂𑐫, 𑐣𑑂𑐫𑐣𑐵 𑐳𑑂𑐰𑐫𑐵𑑅 𑐳𑐷𑐐𑐸 𑐟𑐠𑑂𑐫 𑐮𑐶𑐳𑐾𑐮𑐶𑐳𑐾𑑄 𑐟𑐫𑐵𑑅 𑐠𑑅𑐐𑐸 𑐎𑐮𑑂𑐥𑐣𑐵𑐱𑐷𑐮𑐟𑐵𑑄 𑐎𑐠𑑄 𑐴𑑄𑐎𑐵𑐟𑑅𑐐𑐸 𑐗𑐷𑐳𑑄 𑐏𑑄𑐎𑐾𑐦𑐸 𑑋

𑐄𑐎𑐠𑑄 𑐴𑐾 𑐰𑐫𑑂𑐎𑐮𑑄 𑐥𑐶𑐠𑐣𑐵𑐡𑐷𑐐𑐸 𑐀𑐬𑐣𑐶𑐎𑑀𑐫𑐵 𑐱𑑂𑐰𑐾𑐟𑐔𑐿𑐟𑑂𑐫 𑐩𑐴𑐵𑐎𑐵𑐰𑑂𑐫 𑐰𑐫𑑂𑐎𑐮𑑄 𑐔𑐷𑐣𑐫𑑂 𑐔𑑂𑐰𑐣𑐵𑑅 𑐮𑐸𑐂𑐎𑐵𑐡𑐷𑐐𑐸 𑐟𑐠𑑂𑐫 𑐴𑐾 𑐩𑐴𑐵𑐎𑐵𑐰𑑂𑐫𑐫𑐵 𑐬𑐸𑐥𑐫𑑂 𑐳𑐵𑐴𑐶𑐟𑑂𑐫𑐫𑑂 𑐬𑐳𑑂𑐰𑐵𑐡𑐣 𑐫𑐵𑐂𑐥𑐶𑑄 𑐥𑐵𑐛𑐎𑐐𑐞𑐥𑐶𑐣𑑂𑐟 𑐣𑑂𑐴𑑂𑐫𑐔𑐶𑐎𑐵𑐡𑐷𑐐𑐸 𑐏𑐣𑐾𑐡𑐸 𑑋

𑐣𑐾𑐥𑐵𑐮𑐨𑐵𑐲𑐵𑐫𑑂 𑐣𑐵𑑄𑐡𑑄𑐐𑐸 𑐱𑑂𑐬𑐾𑐲𑑂𑐛 𑐳𑐶𑐬𑐥𑐵𑑅 𑐰 𑐏𑐳 𑐣𑐾𑐥𑐵𑐮𑐷 𑐨𑐵𑐲𑐵𑐫𑑂 𑐳𑑂𑐰𑐎𑑂𑐰𑑅𑐟𑐎 𑐣𑐵𑑄𑐡𑑄𑐐𑐸 𑐩𑐡𑐣 𑐥𑐸𑐬𑐳𑑂𑐎𑐵𑐬 𑐟𑑂𑐫𑐵𑐎𑐵𑐡𑐷𑐩𑑂𑐴 𑐢𑐂𑐩𑑂𑐴 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷 𑐴𑐾 𑐖𑐎 𑐡𑐸 𑑋

𑐠𑑁𑑄𑐎𑐣𑑂𑐴𑐫𑑂 𑐀𑑅𑐥𑐸𑐎 𑐢𑐵𑐂𑐥𑐶𑐣𑑂𑐳𑑄 𑐰𑐫𑑂𑐎𑑅𑐫𑐵𑐟  𑐳𑑄𑐳𑑂𑐎𑐺𑐟𑐶𑐰𑐶𑐡𑑂 𑐢𑐵𑐫𑐾𑐐𑐸 𑐫𑐵𑑅 𑑋 𑐟𑐬 𑐰𑐫𑑂𑐎𑑅 𑐳𑑄𑐳𑑂𑐎𑐺𑐟𑐶𑐰𑐶𑐡𑑂 𑐖𑐎 𑐩𑐏𑐸𑐳𑐾 𑐮𑑀𑐎𑐎𑐮𑐵, 𑐮𑑀𑐎𑐳𑑄𑐳𑑂𑐎𑐺𑐟𑐶, 𑐮𑑀𑐎𑐨𑐵𑐲𑐵, 𑐮𑑀𑐎 𑐳𑐵𑐴𑐶𑐟𑑂𑐫𑐫𑐵 𑐕𑐩𑑂𑐴 𑐩𑐹𑐬𑑂𑐢𑐣𑑂𑐫 𑐀𑐣𑐸𑐳𑐣𑑂𑐢𑐵𑐟𑐵 𑐰 𑐮𑐾𑐏𑐎 𑐏𑑅 𑑋

𑐰𑐫𑑂𑐎𑑅𑐫𑐵𑐟 𑐡𑐸𑐰𑐵𑐮𑐾𑐧𑐮𑐫𑑂 𑐰𑐫𑑂𑐎𑑅𑐫𑐵 𑐰𑑂𑐫𑐎𑑂𑐟𑐶𑐟𑑂𑐰 𑐗𑐷𑐐𑐸 𑐨𑐵𑐲𑐵 𑐁𑐣𑑂𑐡𑑀𑐮𑐣𑑄 𑐎𑐫𑑂 𑐔𑑂𑐫𑐵𑐣𑐵𑐔𑑂𑐰𑑄𑐐𑐸 𑐨𑐵𑐲𑐵, 𑐳𑐵𑐴𑐶𑐟𑑂𑐫, 𑐳𑑄𑐳𑑂𑐎𑐺𑐟𑐶, 𑐎𑐮𑐵, 𑐢𑐬𑑂𑐩 𑐀𑐮𑐾 𑐀𑐢𑐶𑐎𑐵𑐬𑐫𑐵 𑐣𑐶𑐟𑐶𑑄 𑐳𑑄𑐑𑐬𑑂𑐲 𑐮𑐶𑐳𑐾𑑄𑐫𑐵 𑐏𑑂𑐫𑑅𑐮𑐶𑐳𑐾 𑐴𑐾 𑐳𑑂𑐰𑐵𑐣𑐵𑐔𑑂𑐰𑑄𑐐𑐸 𑐏𑐣𑐾𑐡𑐸 𑑋

𑐠𑐠𑐾 𑐢𑐵𑐫𑐾𑐧𑐮𑐫𑑂 𑐰𑐫𑑂𑐎𑑅𑐫𑐵𑐟 𑐗𑐷𑐳𑑄 𑐗𑐷𑐐𑐸 𑐨𑐵𑐲𑐵 𑐖𑐵𑐟𑐶 𑐁𑐣𑑂𑐡𑑀𑐮𑐣𑐫𑐵 𑐱𑐷𑐬𑑂𑐲 𑐥𑐸𑐬𑐸𑐲 𑐢𑐎𑐵𑑅 𑐢𑐵𑐮 𑐢𑐵𑑅𑐳𑐵 𑐥𑐵𑐫𑑂𑐕𑐶 𑐖𑐹𑐰𑐂 𑑋

𑐰𑐫𑑂𑐎𑐮𑑄 𑐠𑐸𑐎𑐶𑐫𑐵 𑐥𑑂𑐬𑐫𑑀𑐐 𑐰 𑐀𑐣𑐸𑐳𑐣𑑂𑐢𑐵𑐣 𑐏𑐳 𑐣𑐾𑐥𑐵𑐮𑐷 𑐨𑐵𑐳𑐫𑑂 𑐣𑑄 𑐫𑐵𑐣𑐵𑐡𑐷𑐐𑐸 𑐏𑐣𑐾𑐡𑐸 𑑋 𑐠𑑂𑐰𑐴𑐾 𑐳𑐵𑐢𑐣𑐵𑑄 𑐰𑐫𑑂𑐎𑑅𑐫𑐵𑐟 𑐠𑑁𑑄 𑐳𑐎𑐳𑐶𑐣𑑄 𑐴𑐣𑐾𑐧𑐴𑑅𑐩𑑂𑐴 𑐰𑐵𑐒𑐩𑐫 𑐱𑐟𑐵𑐧𑑂𑐡𑐷 𑐥𑐸𑐬𑐸𑐲𑐫𑐵 𑐬𑐸𑐥𑐫𑑂 𑐣𑑂𑐴𑑂𑐫𑑅𑐣𑐾 𑐴𑐫𑐵𑐧𑐶𑐮 𑑋

𑐎𑐸𑐮𑐵𑑄𑐨𑐸𑐮𑐸𑐂 𑐩𑐡𑐸𑐩𑑂𑐴 𑐥𑑂𑐬𑐾𑐩𑐧𑐴𑐵𑐡𑐸𑐬 𑐎𑐳𑐵𑑅𑐫𑐵 𑐮𑐸𑐩𑐣𑑂𑐟𑐶𑐂 𑐖𑐹𑐐𑐸 𑐕𑐐𑐹 𑐖𑑂𑐫𑐵𑐗𑑂𑐰𑐮𑐫𑑂 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮, “𑐣𑐾𑐥𑐵𑐮𑐫𑑂 𑐟𑑂𑐰𑐵𑑅𑐡𑐾𑐰𑐵𑐫𑑂 𑐩𑐟 𑐔𑑂𑐫𑐵𑐎𑐵𑑅 𑐄𑐡𑐑𑐵𑐚𑐣 𑐫𑐵𑐫𑐾𑐸 𑐔𑐮𑐣 𑐴𑐾 𑐥𑑂𑐬𑐾𑐩𑐧𑐴𑐵𑐡𑐸𑐬𑑄 𑐴𑐫𑐵𑐡𑐷𑐐𑐸 𑐏𑑅 𑑋 𑐥𑑂𑐬𑐾𑐩𑐧𑐴𑐵𑐡𑐸𑐬𑑄 𑐣𑑂𑐴𑑂𑐫𑐵𑐧𑐮𑐾𑑄 𑐴𑐾 𑐠𑑅𑐐𑐸 𑐏𑑂𑐫𑑅 𑐟𑑂𑐰𑑅𑐟𑐾𑐩𑐖𑑂𑐫𑐹 𑐢𑐎𑐵𑑅 𑐢𑐫𑐵𑐡𑐷𑐐𑐸 𑐏𑑅 𑑋 𑐀𑐮𑐾 𑐠𑑅𑐐𑐸 𑐏𑑂𑐫𑑅 𑐢𑐸𑑄𑐎𑐵𑑅 𑐟𑐶𑐣𑐶 𑐏𑐳 𑐣𑐾𑐥𑐵𑐮𑐷 𑐰 𑐏𑑃𑐫𑑂 𑐨𑐵𑐲𑐵𑐫𑐵 𑐏𑑂𑐫𑐮𑐫𑑂 𑐥𑐮𑐵𑑅 𑐟𑐫𑐾𑐩𑐵𑑅 𑐢𑐎𑐵𑑅 𑐢𑐫𑐵𑐡𑐷𑐐𑐸 𑐏𑑅 𑑋”

𑐠𑐸𑐎𑐶𑑄 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷𑐫𑐵 𑐀𑐥𑐵𑐬 𑐫𑑀𑐐𑐡𑐵𑐣 𑐰 𑐳𑐦𑐮𑐟𑐵𑐫𑐵 𑐮𑑂𑐫𑐹𑐣𑐾 𑐥𑑂𑐬𑐾𑐩𑐧𑐴𑐵𑐡𑐸𑐬 𑐎𑐳𑐵𑑅𑐫𑐵 𑐐𑐸𑐬𑐸𑐩𑐣𑑂𑐟𑑂𑐬𑑄 𑐴𑐾 𑐖𑑂𑐫𑐵 𑐫𑐵𑑅𑐐𑐸 𑐏𑐣𑐾𑐡𑐸 𑑋 𑐟𑐬 𑐥𑑂𑐬𑐾𑐩𑐧𑐴𑐵𑐡𑐸𑐬 𑐎𑐳𑐵𑑅 𑐬𑐵𑐖𑐣𑐷𑐟𑐶𑐎 𑐏𑑂𑐫𑐮𑑄 𑐠𑐟 𑐮𑐷𑐎𑐵𑐡𑐷𑐩𑑂𑐴 𑐖𑐸𑐮 𑐢𑐵𑑅𑐳𑐵 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷 𑐰𑐫𑑂𑐎𑐮𑑄 𑐔𑐵𑐫𑐾𑐎𑐵𑐡𑐷𑐐𑐸 𑐐𑐸𑐬𑐸𑐩𑐣𑑂𑐟𑑂𑐬 𑐖𑑂𑐰𑐣𑐵𑑅 𑐣𑑂𑐴𑑂𑐫𑐵𑐣𑐵𑐡𑐷𑐩𑑂𑐴 𑐏𑐣𑐾𑐡𑐟 𑑋

𑐰𑐬𑑂𑐞𑐩𑐵𑐮𑐵, 𑐧𑑂𑐫𑐵𑐎𑐬𑐞, 𑐏𑑃𑐐𑑂𑐰𑑅 𑐢𑐸𑐎𑐹 𑐠𑐸𑐖𑑂𑐰𑑅𑐐𑐸 𑐳𑐦𑐹𑐣𑐶𑐳𑐾𑑄 𑐎𑐫𑐵𑑅 𑐎𑐵𑐰𑑂𑐫 𑐰 𑐥𑐹𑐢𑐵𑑅𑐥𑑂𑐫𑐵𑐏𑑄 𑐟𑐎𑐫𑐵 𑐳𑐵𑐴𑐶𑐟𑑂𑐫 𑐀𑐮𑐾 𑐣𑐏𑑅𑐔𑐏𑑅, 𑐥𑐬𑐩𑑂𑐥𑐬𑐵, 𑐩𑐸𑐡𑑂𑐬𑐵, 𑐩𑐹𑐬𑑂𑐟𑐶  𑐰 𑐨𑐵𑐲𑐵𑐱𑐵𑐳𑑂𑐟𑑂𑐬 𑐟𑐎𑐫𑐵 𑐰𑐫𑑂𑐎𑐮𑑄 𑐔𑑂𑐰𑐳𑐵 𑐣𑑂𑐴𑑂𑐫𑐵𑐎𑐵𑐡𑐷𑐐𑐸 𑐰𑐶𑐢𑐵 𑐢𑐂𑐐𑐸 𑐗𑐷𑐐𑐸 𑐨𑐵𑐲𑐵 𑐁𑐣𑑂𑐡𑑀𑐮𑐣𑐫𑐵 𑐴𑐾 𑐳𑐬𑑀𑐎𑐵𑐬𑐫𑐵 𑐰𑐶𑐢𑐵 𑐏𑑅 𑐢𑐂𑐐𑐸 𑐏𑑃𑐫𑐵𑐟 𑐴𑐵𑐣𑑄 𑐕𑐎𑑂𑐰𑑅 𑐮𑐸𑐩𑑄𑐎𑐵𑑅 𑐢𑐵𑐫𑐾𑐐𑐸 𑐏𑑅𑐳𑐵 𑐗𑐷𑐐𑐸 𑐨𑐵𑐲𑐵 𑐖𑐵𑐟𑐶 𑐁𑐣𑑂𑐡𑑀𑐮𑐣𑐫𑑂 𑐡𑐎𑐮𑐫𑑂 𑐁𑐥𑐵𑑅 𑐫𑑀𑐐𑐡𑐵𑐣 𑐫𑐵𑐣𑐵𑐡𑐷𑐩𑑂𑐴 𑐀𑐮𑐾 𑐳𑐎𑐟𑐵𑑄 𑐰𑐶𑐢𑐵𑐫𑐵𑐟 𑐎𑑅𑐑𑐵𑐣𑐵𑐡𑐷𑐩𑑂𑐴 𑐄𑐔𑑂𑐔 𑐰 𑐱𑐶𑐏𑐬 𑐥𑐸𑐬𑐸𑐲 𑐢𑐎𑐵𑑅 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷𑐫𑐵𑐟 𑐗𑐷𑐳𑑄 𑐣𑐵𑐮𑐵𑐎𑐵𑐫𑐾𑐩𑐵𑑅 𑑋

𑐢𑐵𑐟𑑂𑐠𑐾𑑄 𑐢𑐵𑐫𑐾𑐐𑐸 𑐏𑑅𑐳𑐵 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷 𑐣𑐾𑐰𑐵𑑅 𑐖𑐹𑐐𑐸 𑐣𑐵𑐟𑐵𑑄 𑐖𑐎 𑐩𑐏𑐸, 𑐗𑐷𑐐𑐸 𑐁𑐣𑑂𑐡𑑀𑐮𑐣 𑐀𑐨𑐶𑐫𑐵𑐣 𑐰 𑐳𑐬𑑀𑐎𑐵𑐬𑐫𑐵 𑐎𑑂𑐲𑐾𑐟𑑂𑐬𑐫𑐵 𑐱𑐷𑐬𑑂𑐲 𑐰𑑂𑐫𑐎𑑂𑐟𑐶𑐟𑑂𑐰 𑐖𑐹𑐐𑐸 𑐴𑐸𑐣𑐶𑑄 𑐣𑑄 𑐗𑐷 𑐩𑐣𑐹 𑐴𑐾 𑐏𑑅 𑑋 𑐥𑐶𑐣𑐾𑑄 𑐣𑑂𑐴𑑂𑐫𑐵𑐐𑑂𑐐𑐸 𑐣𑑂𑐴𑑂𑐫𑐵𑐠𑐾 𑐫𑐵𑐣𑐵𑑅 𑐴𑐣𑐾𑐐𑐸 𑐖𑑂𑐫𑐵 𑐖𑐹𑐳𑐵𑑄 𑐰𑐫𑑂𑐎𑑅𑐫𑐵 𑐖𑑂𑐫𑐵𑐏𑑃𑐫𑐵𑐟 𑐠𑐵𑐟𑑄 𑐟𑐫𑐵𑑅 𑐣𑑂𑐴𑑂𑐫𑐵𑐎𑐾𑐩𑐵𑑅𑐐𑐸 𑐡𑐵𑐫𑐶𑐟𑑂𑐰 𑐣𑐾𑐰𑐵𑑅𑐟𑐫𑑂𑐐𑐸 𑐴𑐾 𑐏𑑅 𑑋

𑐀𑐠𑐾 𑐖𑐸𑐫𑐵𑑅 𑐴𑐾 𑐣𑐾𑐰𑐵𑑅 𑐏𑑂𑐫𑐮𑑄 𑐰𑐫𑑂𑐎𑑅𑐫𑐵𑐟 𑐴𑐣𑐾𑐐𑐸 𑐖𑑂𑐫𑐵 𑐫𑐵𑑅𑐐𑐸 𑐖𑐎 𑐩𑐏𑐸, 𑐠𑐷𑐠𑐷 𑐎𑐠𑑄𑐫𑐵 𑐐𑐟𑐶𑐰𑐶𑐢𑐶 𑐣𑑂𑐴𑑂𑐫𑐵𑐎𑐾𑐐𑐸 𑐣𑐶𑐟𑐶𑑄 𑐰𑐵𑐒𑐩𑐫 𑐱𑐟𑐵𑐧𑑂𑐡𑐷 𑐥𑐸𑐬𑐸𑐲 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷 𑐎𑑀𑐲 𑐥𑐮𑐶𑐳𑑂𑐠𑐵 𑐖𑐸𑐂𑐟𑑂𑐫𑑄𑐐𑐸 𑐏𑑅 𑑋

𑐮𑐸𑐩𑑄𑐎𑐾𑐧𑐴𑑅𑐖𑐹, 𑐰𑑄𑐐𑐸 𑐧𑐿𑐱𑐵𑐏 𑑓𑑐 𑐐𑐟𑐾 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐐𑑂𑐰𑐳𑐵𑐮𑐫𑑂 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷 𑐳𑐔𑑂𑐕𑐶 𑐡𑑃 𑐎𑑂𑐫𑑄𑐐𑐸 𑐮𑐳𑐟𑐵𑐫𑑂 𑐴𑐣𑐾𑐖𑑂𑐫𑐵 𑐖𑐹𑐐𑐸 𑐏𑑅 𑑋

𑐫𑐾𑑃𑐫𑑂 𑐣𑐾𑐰𑐵𑑅 𑐏𑑂𑐫𑐮𑑄 𑐰𑐫𑑂𑐎𑑅 𑐱𑐟𑐵𑐧𑑂𑐡𑐷 𑐥𑐸𑐬𑐸𑐲𑐫𑐵𑐟 𑐣𑐾.𑐳𑑄. 𑑑𑑑𑑓𑑗 𑐫𑑃𑐮𑐵𑐐𑐵 𑐡𑐳𑐩𑐶 (𑑒𑑐𑑗𑑔 𑐨𑐵𑐡𑑂𑐬 𑑓𑑐 𑐐𑐟𑐾) 𑐎𑐸𑐣𑑂𑐴𑐸 𑐟𑑅𑐖𑐶𑐎 𑐴𑐣𑐾𑐐𑐸 𑐖𑑂𑐫𑐵 𑐣𑐾𑐰𑐵𑑅 𑐖𑐵𑐐𑐬𑐞 𑐩𑐘𑑂𑐔𑐫𑐵 𑐳𑑄𑐫𑑀𑐖𑐣𑐫𑑂 𑐨𑐵𑐲𑐵𑐳𑐾𑐰𑐷 𑐮𑐎𑑂𑐲𑑂𑐩𑐷𑐡𑐵𑐳 𑐩𑐵𑐣𑐣𑑂𑐢𑐬𑐫𑐵 𑐀𑐢𑑂𑐫𑐎𑑂𑐲𑐟𑐵𑐫𑑂 𑐖𑐹𑐐𑐸 𑐏𑑅 𑑋

𑐁𑑅 𑐎𑑀𑐲𑐫𑐵 𑐳𑑂𑐠𑐵𑐥𑐣𑐵𑐮𑐶𑐥𑐵 𑐰𑐫𑑂𑐎𑑅𑐫𑐵 𑐣𑐵𑐩𑑄 𑐣𑐾𑐰𑐵𑑅 𑐏𑑂𑐫𑐮𑐫𑑂 𑐠𑐷𑐠𑐷 𑐐𑐟𑐶𑐰𑐶𑐢𑐶 𑐫𑐵𑐫𑐾𑐐𑐸 𑐖𑐸𑐫𑐵𑐰𑐣𑐷𑐐𑐸 𑐣𑑄 𑐁𑐱𑐵 𑐫𑐵𑐫𑐾 𑑋