𑐥𑑂𑐬𑐵.𑐜𑐵. 𑐢𑐬𑑂𑐩𑐬𑐵𑐖 𑐜𑑄𑐐𑑀𑐮

𑐱𑐿𑐎𑑂𑐲𑐶𑐎 𑐨𑑂𑐬𑐩𑐞 𑐕𑐸 ? 𑐠𑐸𑐎𑐶𑐫𑐵𑐐𑐸 𑐩𑐴𑐟𑑂𑐰 𑐕𑐸 𑐡𑐸𑐸 ?
𑐳𑑂𑐎𑐹𑐮𑐫𑐵 𑐎𑐎𑑂𑐲𑐵 𑐎𑑂𑐰𑐠𑐵𑐫𑑂 𑐔𑑂𑐰𑐣𑐵𑑅, 𑐳𑑂𑐎𑐹𑐮𑐫𑐵𑐐𑐸 𑐥𑐸𑐳𑑂𑐟𑐎𑐵𑐮𑐫𑐫𑑂 𑐔𑑂𑐰𑐣𑐵𑑅, 𑐠𑑅𑐐𑐸 𑐴𑐾 𑐕𑐾𑑃𑐫𑑂 𑐔𑑂𑐰𑐣𑐵𑑅 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐳𑑄 𑐧𑑂𑐰𑐣𑐷, 𑐔𑑂𑐰𑐂, 𑐳𑐫𑐾𑐎𑐷 𑐣𑐵𑐥𑑄 𑐳𑑂𑐎𑐹𑐮𑑄 𑐱𑐿𑐎𑑂𑐲𑐶𑐎 𑐨𑑂𑐬𑐩𑐞 𑐫𑑄𑐎𑐷𑐧𑐮𑐫𑑂 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐳𑑄 𑐠𑑅𑐴𑐾 𑐐𑐸𑐬𑐸𑐧𑐵𑑅 𑐐𑐸𑐬𑐹𑐩𑐵𑑄𑐥𑐶𑐣𑐶 𑐥𑐵𑐏𑐾𑑄 𑐥𑐵𑐛𑑂𑐫𑐎𑑂𑐬𑐩𑐫𑑂 𑐡𑐸𑐐𑐸 𑐰 𑐩𑐡𑐸𑐐𑐸, 𑐖𑑂𑐘𑐵𑐣, 𑐳𑐷𑐥 𑐰 𑐥𑑂𑐬𑐰𑐶𑐢𑐶 𑐳𑐫𑐾𑐎𑐷, 𑐱𑐿𑐎𑑂𑐲𑐶𑐎 𑐨𑑂𑐬𑐩𑐞𑐫𑑂 𑐠𑑂𑐫𑑄𑐐𑐸 𑐠𑐵𑐳𑑄 𑑋

𑐣𑐵𑐥𑑄 𑐱𑐿𑐎𑑂𑐲𑐶𑐎 𑐨𑑂𑐬𑐩𑐞 𑐰𑑄𑐐𑐸 𑐠𑐵𑐳𑐫𑑂 𑐡𑐸𑐐𑐸 𑐣𑐩𑐸𑐣𑐵𑐟 𑐳𑑂𑐰𑐫𑐵𑑅, 𑐣𑐩𑐸𑐣𑐵𑐟 𑐡𑐫𑐾𑐎𑐷𑐐𑐸 𑐰𑐶𑐢𑐶, 𑐳𑐷𑐥 𑐰 𑐥𑑂𑐬𑐰𑐶𑐢𑐶 𑐣𑑄 𑐳𑐫𑐾𑐎𑐷, 𑐠𑐸𑐂𑐎𑐷, 𑐀𑐮𑐾 𑐱𑐿𑐎𑑂𑐲𑐶𑐎 𑐨𑑂𑐬𑐩𑐞 𑐰𑑄𑐐𑐸 𑐠𑐵𑐳𑐫𑑂 𑐰𑐶𑐡𑑂𑐫𑐵𑐬𑑂𑐠𑐷 𑐰 𑐐𑐸𑐬𑐸𑐧𑐵𑑅 𑐐𑐸𑐬𑐸𑐩𑐵𑑄𑐥𑐶𑑄𑐳 𑐀𑐣𑐫𑐵 𑐳𑑄𑐳𑑂𑐠𑐵𑐟𑐮𑐶𑐳𑐾, 𑐳𑑄𑐳𑑂𑐠𑐵𑐫𑑂 𑐖𑑂𑐫𑐵 𑐫𑐵𑐣𑐵𑐔𑑂𑐰𑐥𑐶𑑄 𑐮𑐶𑐳𑐾 𑐳𑑂𑐰𑐵𑐥𑐹 𑐟𑐂 𑑋 𑐠𑑂𑐰 𑐱𑐿𑐎𑑂𑐲𑐶𑐎 𑐨𑑂𑐬𑐩𑐞𑑄 𑐳𑐦𑐹𑐫𑐵 𑐖𑑂𑐘𑐵𑐣 𑐖𑐎 𑐩𑐏𑐸, 𑐖𑑂𑐘𑐵𑐣, 𑐳𑐷𑐥 𑐰 𑐥𑑂𑐬𑐰𑐶𑐢𑐶 𑐳𑐫𑐾𑐎𑐾𑐐𑐸, 𑐳𑑂𑐰𑐫𑐾𑐐𑐸 𑐣𑐵𑐥𑑄 𑐱𑐿𑐎𑑂𑐲𑐶𑐎 𑐳𑐵𑐩𑐵𑐐𑑂𑐬𑐷 𑐳𑑄𑐎𑐮𑐣 𑐫𑐵𑐣𑐵𑑅 𑐳𑑂𑐎𑐹𑐮𑐫𑐵𑐟 𑐣𑐵𑐥𑑄 𑐳𑐴𑐫𑑀𑐐 𑐫𑐵𑐫𑐾 𑐖𑑂𑐫𑐹 𑑋 𑐀𑐠𑐾 𑐖𑐸𑐫𑐵𑑅 𑐱𑐿𑐎𑑂𑐲𑐶𑐎 𑐨𑑂𑐬𑐩𑐞𑐫𑐵 𑐧𑐵𑑄𑐮𑐵𑑅𑐐𑐸 𑐩𑐴𑐟𑑂𑐰 𑐡𑐸 𑑋

𑐱𑐿𑐎𑑂𑐲𑐶𑐎 𑐨𑑂𑐬𑐩𑐞 𑐐𑐣 𑐫𑑄𑐎𑐾𑐐𑐸 ?
𑐱𑐿𑐎𑑂𑐲𑐶𑐎 𑐨𑑂𑐬𑐩𑐞 𑐄𑐥𑐮𑐧𑑂𑐢𑐶𑐩𑐹𑐮𑐎 𑐖𑐸𑐂𑐩𑐵𑑅, 𑐕𑐵𑐫𑑂𑐢𑐵𑐳𑐵 𑐱𑐿𑐎𑑂𑐲𑐶𑐎 𑐨𑑂𑐬𑐩𑐞 𑐫𑑄𑐎𑐷𑐧𑐮𑐫𑑂 𑐃 𑐏𑐬𑑂𑐔 𑐖𑐸𑐂, 𑐢𑑂𑐫𑐧𑐵 𑐣𑑄 𑐏𑐬𑑂𑐔 𑐖𑐸𑐂 𑑋 𑐀𑐠𑐾 𑐖𑐹𑐐𑐸𑐮𑐶𑑄 𑐳𑑂𑐎𑐹𑐮𑑄 𑐱𑐿𑐎𑑂𑐲𑐶𑐎 𑐨𑑂𑐬𑐩𑐞 𑐐𑐣 𑐫𑑄𑐎𑐾𑐐𑐸 ? 𑐰 𑐠𑐵𑐳𑐫𑑂 𑐕𑐵𑐫𑑂 𑐫𑑄𑐎𑐾𑐐𑐸 ? 𑐢𑐫𑐵𑐐𑐸 𑐏𑑃𑐫𑑂 𑐳𑑂𑐥𑐲𑑂𑐚 𑐖𑐸𑐂𑐩𑐵𑑅 𑑋 𑐥𑐵𑐛𑑂𑐫𑐎𑑂𑐬𑐩𑐫𑑂 𑐡𑐸𑐐𑐸 𑐕𑐸 𑐕𑐸 𑐰𑐶𑐲𑐫𑐰𑐳𑑂𑐟𑐸 𑐳𑑂𑐫𑐣𑐾𑐟 𑐀𑐣 𑐫𑑄𑐎𑐾𑐐𑐸 𑐢𑐎𑐵𑑅 𑐣𑑄 𑐥𑑂𑐬𑐲𑑂𑐚 𑐖𑐸𑐂𑐩𑐵𑑅 𑑋

𑐱𑐿𑐎𑑂𑐲𑐶𑐎 𑐨𑑂𑐬𑐩𑐞 𑐳𑐵𑐩𑐵𑐖𑐶𑐎 𑐱𑐶𑐎𑑂𑐲𑐵𑐫𑐵 𑐏𑑃𑐟 𑐠𑐸𑐂𑐎𑐾𑐟, 𑐰𑐶𑐖𑑂𑐘𑐵𑐣 𑐱𑐶𑐎𑑂𑐲𑐵𑐫𑑂 𑐥𑑂𑐬𑐫𑑀𑐐 𑐖𑐸𑐫𑐵𑐔𑑂𑐰𑑄𑐐𑐸 𑐣𑐩𑐹𑐣𑐵𑐟 𑐠𑑅𑐐𑐸 𑐴𑐾 𑐩𑐶𑐏𑐵𑑄 𑐳𑑂𑐰𑐫𑐵𑑅, 𑐠𑐷𑐠𑐷 𑐐𑐟𑐶𑐰𑐶𑐢𑐶𑐂 𑐨𑐵𑐐 𑐎𑐫𑐵𑑅 𑐳𑐫𑐾𑐎𑐾𑐟 𑐠𑐸𑐂𑐎𑐾𑐟 𑐫𑑄𑐎𑐾𑐐𑐸 𑐫𑐵𑐣𑐵𑐟𑑅𑐐𑐸 𑐏𑑅 𑑋 𑐀𑐥𑑂𑐰𑑅 𑐫𑐵𑐣𑐵𑑅 𑐳𑑂𑐰𑐣𑐶𑐐𑑅𑐫𑐵 𑐳𑑂𑐎𑐹𑐮𑐟𑐫𑑂𑐳𑑄 𑐳𑐟𑐶𑐎 𑐱𑐿𑐎𑑂𑐲𑐶𑐎 𑐨𑑂𑐬𑐩𑐞 𑐫𑑄𑐎𑐷𑐐𑐸 𑐠𑐵𑐫𑑂𑐟 𑐳𑑂𑐰𑐫𑐩𑑂𑐨𑐹, 𑐥𑐱𑐸𑐥𑐟𑐶, 𑐎𑐷𑐬𑑂𑐟𑐶𑐥𑐸𑐬, 𑐳𑑄𑐐𑑂𑐬𑐴𑐵𑐮𑐫, 𑐐𑑀𑐡𑐵𑐰𑐬𑐷 𑐰𑐣𑐳𑑂𑐥𑐟𑐶 𑐄𑐡𑑂𑐫𑐵𑐣 𑐁𑐡𑐶 𑐏𑑅 𑑋 𑐐𑐸𑐮𑐶𑑄 𑐐𑐸𑐮𑐶𑑄 𑐱𑐿𑐎𑑂𑐲𑐶𑐎 𑐨𑑂𑐬𑐩𑐞 𑐥𑑀𑐏𑐬𑐵, 𑐐𑑀𑐬𑐏𑐵 𑐡𑐬𑐰𑐵𑐬 𑐟𑐎 𑐣𑑄 𑐠𑑂𑐫𑐣𑐷, 𑐬𑐵𑐲𑑂𑐚𑑂𑐬𑐶𑐫 𑐣𑐶𑐎𑐸𑐘𑑂𑐖 𑐣𑑄 𑐫𑑄𑐎𑐷, 𑐎𑐺𑐲𑐶 𑐎𑑂𑐫𑐵𑐩𑑂𑐥𑐳, 𑐰𑐣 𑐰𑐶𑐖𑑂𑐘𑐵𑐣 𑐀𑐢𑑂𑐫𑐫𑐣 𑐳𑑄𑐳𑑂𑐠𑐵𑐣, 𑐎𑐺𑐲𑐶 𑐰 𑐰𑐣 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫 𑐫𑑄𑐎𑐷 𑑋 𑐐𑐸𑐮𑐶𑑄 𑐐𑐸𑐮𑐶𑑄 𑐎𑐺𑐲𑐶 𑐰𑐶𑐲𑐫 𑐣𑑄 𑐧𑑂𑐰𑐎𑐵𑐔𑑂𑐰𑑄𑐐𑐸 𑐳𑑂𑐎𑐸𑐮𑑄 𑐏𑐸𑐩𑐮𑐚𑐵𑐬𑐫𑑂 𑐔𑑂𑐰𑑄𑐐𑐸 𑐣𑐾𑐥𑐵𑐮 𑐎𑐺𑐲𑐶 𑐀𑐣𑐸𑐳𑐣𑑂𑐢𑐵𑐣 𑐥𑐬𑐶𑐲𑐡, 𑐰𑐵𑐐𑐧𑐵𑐣𑐷 𑐎𑐾𑐣𑑂𑐡𑑂𑐬 𑐣𑑄 𑐎𑑂𑐫𑐣𑐾 𑐫𑑄𑐎𑐷 𑑋 𑐎𑐮𑐎𑐵𑐬𑐏𑐵𑐣𑐵𑐟 𑐣𑑄 𑐎𑑂𑐫𑐣𑐾 𑐫𑑄𑐎𑐷, 𑐫𑑄𑐎𑐵𑐔𑑂𑐰𑑄𑐐𑐸 𑐡𑐸 𑑋

𑐰𑐣𑐾 𑐣𑑂𑐴𑑂𑐫𑑅 𑐕𑐸 𑐕𑐸 𑐫𑐵𑐫𑐾𑐩𑐵𑑅 ?
𑐱𑐿𑐎𑑂𑐲𑐶𑐎 𑐨𑑂𑐬𑐩𑐞 𑐫𑑄𑐎𑐾 𑐣𑑂𑐴𑑂𑐫𑑅 𑐫𑑀𑐖𑐣𑐵 𑐡𑐫𑐾𑐎𑐾𑐩𑐵𑑅 𑑋 𑐱𑐿𑐎𑑂𑐲𑐶𑐎 𑐨𑑂𑐬𑐩𑐞 𑐫𑑄𑐎𑐾𑐐𑐸 𑐠𑐵𑐳𑐫𑑂 𑐰𑐣𑐾𑐐𑐸 𑐡𑐶𑐣 𑐎𑐣𑐵𑑅 𑐠𑑅𑐥𑐶𑑄 𑐱𑐿𑐎𑑂𑐲𑐶𑐎 𑐨𑑂𑐬𑐩𑐞 𑐰𑐣𑐾𑐧𑐮𑐵𑐫𑑂 𑐀𑐣 𑐔𑑂𑐰𑑄𑐐𑐸 𑐳𑑄𑐳𑑂𑐠𑐵𑐥𑐵𑐏𑐾𑑄 𑐕𑐸 𑐕𑐸 𑐐𑑂𑐰𑐵𑐴𑐵𑐮𑐶 𑐠𑑅𑐥𑐶𑑄𑐟 𑐩𑐵𑐮𑐷𑐐𑐸 𑐏𑑅, 𑐐𑐸𑐎𑐸𑐣𑑂𑐴𑐸 𑐰𑐣𑐾𑐐𑐸, 𑐐𑐸𑐮𑐶 𑐟𑐐𑐶𑑄𑐫𑐵𑐥𑐶𑑄, 𑐕𑐸 𑐧𑐶𑐲𑐫𑐫𑐵𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐟 𑐰𑐂𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑑅 𑐄𑐐𑐸 𑐠𑐵𑐳𑐫𑑂 𑐩𑑂𑐴𑑀𑐟𑐶𑑄 𑐐𑐸𑐮𑐶 𑐃 𑐔𑑂𑐰𑐣𑐵𑑅 𑐔𑐵𑐴𑐶𑐮𑐾 𑐩𑐵𑑅 𑐢𑐎𑐵𑑅 𑐣𑑂𑐫𑐣𑐵𑐡𑐶𑐳𑑃 𑑋 𑐣𑐵𑐥 𑐀𑐣 𑐫𑑄𑐎𑐾 𑐣𑑂𑐴𑑂𑐫𑑅 𑐰𑐣𑐷𑐥𑐶𑑄 𑐩𑐳𑑂𑐟𑐫𑑂𑐳𑑄 𑐀𑐣𑐫𑐵𑐐𑐸 𑐰𑐶𑐲𑐫𑐧𑐳𑑂𑐟𑐸 𑐐𑐸𑐮𑐶 𑐳𑑂𑐫𑐹 𑐩𑐳𑑂𑐫𑐹 𑐢𑐎𑐵𑑅 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑑄𑐎𑐾 𑐣𑑂𑐴𑑂𑐫𑐳𑑅 𑐫𑐵𑐣𑐵𑑅 𑐮𑐶𑐳𑑅 𑐎𑐫𑐵𑐡𑐶𑐳𑑃 𑑋 𑐰 𑐣𑑂𑐴𑑂𑐫𑐳𑑅 𑐖𑑂𑐫𑐹 𑐩𑐖𑑂𑐫𑐹 𑐢𑐎𑐵𑑅 𑐖𑐵𑑃𑐔𑐫𑑂 𑐫𑐵𑐣𑐵 𑐡𑐶𑐳𑑃 𑑋 𑐩𑐵𑐣𑑁𑑄 𑐰 𑐳𑑄𑐳𑑂𑐠𑐵𑐫𑐵 𑐧𑐵𑐬𑐾 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑑄𑐳 𑑑𑑐–𑑒𑑐 𑐥𑑂𑐬𑐟𑐶𑐱𑐟 𑐖𑐎 𑐳𑑂𑐫𑐹𑐐𑐸 𑐖𑐸𑐮 𑐢𑐵𑐫𑐾 𑑋 𑐰 𑐳𑑄𑐳𑑂𑐠𑐵𑐫𑑂 𑐰𑐣𑐵 𑐰𑐫𑐾𑐢𑐸𑑄𑐎𑐵𑑅 𑐀𑐣 𑐳𑑂𑐰𑐫𑐵𑑅, 𑐣𑑂𑐫𑐣𑐵𑑅, 𑐧𑑂𑐰𑐣𑐵𑑅 𑐳𑐫𑐾𑐎𑐷𑐧𑐮𑐫𑑂 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑑄𑐳𑑄 𑐩𑑂𑐴𑑀𑐟𑐶𑑄 𑐣𑑄 𑑘𑑐–𑑙𑑐 𑐥𑑂𑐬𑐟𑐶𑐱𑐟 𑐳𑐫𑐾𑐎𑐾𑐐𑐸, 𑐠𑐸𑐂𑐎𑐾𑐐𑐸 𑐫𑐵𑑅𑐐𑐸 𑐖𑐸𑐂 𑐩𑐵𑐮 𑑋

𑐰𑐶𑐡𑑂𑐫𑐵𑐮𑐫𑑄 𑐱𑐿𑐎𑑂𑐲𑐶𑐎 𑐨𑑂𑐬𑐩𑐞 𑐫𑑄𑐎𑐷𑐥𑐶𑑄 𑐐𑐸𑐬𑐸𑐰𑐵𑑅, 𑐐𑐸𑐬𑐹𑐩𑐵𑑄𑐥𑐶𑑄𑐟 𑐏𑑃 𑐠𑐸𑐂𑐎𑐵𑐡𑐶𑐳𑑃 𑑋 𑐣𑑂𑐴𑑂𑐫𑐳𑑅 𑐟𑐫𑐵𑐬 𑐫𑐵𑐎𑐵𑐡𑐶𑐳𑑃 𑑋 𑐣𑑂𑐴𑑂𑐫𑐳𑑅 𑐟𑐫𑐵𑐬 𑐫𑐵𑐎𑐾𑐟 𑐱𑐿𑐎𑑂𑐲𑐶𑐎 𑐨𑑂𑐬𑐩𑐞 𑐫𑑄𑐎𑐾𑐐𑐸 𑐳𑑄𑐳𑑂𑐠𑐵𑐫𑑂 𑐱𑐿𑐎𑑂𑐲𑐶𑐎 𑐨𑑂𑐬𑐩𑐞 𑐫𑑄𑐎𑐾 𑐣𑑂𑐴𑑂𑐫𑑅 𑐣𑑄 𑐨𑑂𑐬𑐩𑐞 𑐫𑐵𑐎𑐵𑐡𑐶𑐳𑑃 𑑋

𑐨𑑂𑐬𑐩𑐞 𑐰𑐣𑐵𑐐𑐸 𑐠𑐵𑐳𑐫𑑂 𑐕𑐸 𑐕𑐸 𑐫𑐵𑐎𑐾𑐩𑐵𑑅 ?

𑐨𑑂𑐬𑐩𑐞 𑐰𑐣𑐾𑐐𑐸 𑐠𑐵𑐳𑐫𑑂 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑑄𑐟 𑐧𑐵𑑄𑐮𑐵𑐎 𑐀𑐰𑐮𑑀𑐎𑐣 𑐫𑐵𑐫𑐾𑐐𑐸, 𑐏𑑃 𑐣𑑂𑐫𑐣𑐾𑐐𑐸, 𑐔𑑂𑐰𑐎𑐾𑐐𑐸 𑐫𑐵𑐎𑐾𑐩𑐵𑑅 𑑋 𑐦𑐸𑐎𑑂𑐎𑐳𑐶𑐣𑑄 𑐠𑐸𑐂𑐎𑐾 𑐩𑐵𑑅𑐐𑐸, 𑐣𑑂𑐫𑐣𑐾 𑐩𑐵𑑅𑐐𑐸, 𑐔𑑂𑐰𑐫𑐾 𑐩𑐵𑑅𑐐𑐸 𑐏𑑃𑐟 𑐣𑑂𑐴𑑂𑐫𑐳𑑅𑐟 𑐡𑐫𑐾𑐎𑐾𑐩𑐵𑑅, 𑐄𑐎𑐷 𑐧𑑅𑐎𑐫𑐵𑑅 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐳𑑄 𑐔𑑂𑐰𑐂, 𑐣𑑂𑐫𑐣𑐷 𑑋 𑐨𑑂𑐬𑐩𑐞 𑐫𑐵𑑅𑐐𑐸 𑐠𑐵𑐫𑑂𑐫𑐵𑐐𑐸, 𑐨𑑂𑐬𑐩𑐞 𑐫𑐵𑐣𑐵𑐔𑑂𑐰𑑄𑐐𑐸, 𑐀𑐰𑐮𑑀𑐎𑐣 𑐫𑐵𑐣𑐵𑐔𑑂𑐰𑑄𑐐𑐸 𑐦𑑀𑐚𑑀 𑐣𑑄𑑄 𑐎𑐵𑐫𑐾𑐎𑐵𑐡𑐶𑐳𑑃 𑑋 𑐣𑐵𑐥𑑄 𑐐𑑂𑐬𑐸𑐥 𑐦𑑀𑐚𑑀 𑐣 𑐕𑐥𑐵𑑅 𑐣𑐶𑐥𑐵𑑅 𑐎𑐫𑐵𑐡𑐶𑐳𑑃 𑑋

𑐨𑑂𑐬𑐩𑐞 𑐫𑐵𑐫𑐾𑐐𑐸 𑐠𑐵𑐫𑑂𑐫𑐵 𑐧𑐵𑐬𑐾 𑐳𑐶𑐂𑐎𑐾𑐟, 𑐠𑐸𑐂𑐎𑐾𑐟 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑑄𑐟 𑐳𑑄𑐳𑑂𑐠𑐵𑐫𑐵𑐐𑐸 𑐧𑑂𑐬𑑀𑐳𑐬 𑐄𑐥𑐮𑐧𑑂𑐢 𑐫𑐵𑐎𑐵𑐡𑐶𑐳𑑃 𑑋 𑐣𑐵𑐥𑑄 𑐰 𑐳𑑄𑐳𑑂𑐠𑐵𑐫𑐵𑐩𑑂𑐴 𑐕𑐩𑑂𑐴 𑐖𑐎 𑐖𑐹𑐳𑐵𑑄 𑐰𑐶𑐖𑑂𑐘 𑐣𑐵𑐥 𑐮𑐵𑐎𑐵𑑅 𑐰𑐶𑐖𑑂𑐘 𑐥𑐵𑐏𑐾𑑄 𑑑𑑐–𑑑𑑕 𑐩𑐶𑐣𑐾𑐚 𑐖𑐎 𑐖𑐹𑐳𑐵𑑄 𑐀𑐣𑑂𑐟𑐬𑐎𑑂𑐬𑐶𑐫𑐵 𑐫𑐵𑐫𑐾𑐐𑐸 𑐃 𑐔𑐹𑐮𑐵𑐎𑐵𑐡𑐶𑐳𑑃 𑑋 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑑄𑐳𑑄 𑐄𑐩𑐶 𑐂𑐔𑑂𑐕𑐵 𑐡𑐸𑐳𑐵 𑐰𑐶𑐖𑑂𑐘𑐟𑐫𑑂𑐐𑐸 𑐀𑐣𑑂𑐟𑐰𑐵𑐬𑑂𑐟𑐵 𑐎𑐵𑐫𑐾𑐎𑐵𑐡𑐶𑐳𑑃 𑑋 𑐣𑑂𑐴𑐹𑐐𑐸 𑐖𑑂𑐫𑐵𑐗𑑂𑐰𑑅 𑐕𑐸 𑐕𑐸 𑐟𑑅𑐳𑐵, 𑐐𑐸𑐎𑐠𑑄 𑐟𑑅𑐳𑐵 𑐧𑐵𑑄𑐮𑐵𑐂 𑐢𑐎𑐵𑑅 𑐠𑐥𑐶𑑄𑐳𑑄 𑐢𑐵𑐫𑐾 𑐣𑑂𑐴𑑂𑐫𑑅 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑐣𑐶𑐐𑐸 𑐧𑐶𑐔𑐵𑑅 𑐎𑐫𑐵𑐡𑐶𑐳𑑃, 𑐣𑑂𑐴𑐹𑐐𑐸 𑐳𑐶𑐬𑑂𑐖𑐣𑐱𑐷𑐮 𑐰𑑂𑐫𑐎𑑂𑐟𑐶𑐟𑑂𑐰 𑐣𑐶𑐬𑑂𑐩𑐵𑐞 𑐫𑐵𑐫𑐾𑐐𑐸𑐮𑐶 𑐴𑑅𑐥𑐵𑑅 𑐧𑐶𑐫𑐵𑐡𑐶𑐳𑑃 𑑋

𑐨𑑂𑐬𑐩𑐞𑑄 𑐮𑐶𑐴𑐵𑑄 𑐰𑐫𑐾 𑐢𑐸𑑄𑐎𑐵𑑅 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑑄𑐟 𑐕𑐸 𑐕𑐸 𑐫𑐵𑐎𑐾𑐐𑐸 ?

𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑑄𑐳𑑄 𑐔𑑂𑐰𑐫𑐵 𑐴𑑅𑐐𑐸, 𑐦𑑀𑐚𑑀 𑐎𑐵𑑅𑐐𑐸, 𑐀𑐣𑑂𑐟𑐰𑐵𑐬𑑂𑐟𑐵 𑐎𑐵𑑅𑐐𑐸, 𑐱𑐿𑐎𑑂𑐲𑐶𑐎 𑐨𑑂𑐬𑐩𑐞𑐫𑐵𑐐𑐸 𑐠𑐵𑐳𑑄 𑐥𑑂𑐬𑐵𑐥𑑂𑐟 𑐖𑐹𑐐𑐸 𑐱𑐿𑐎𑑂𑐲𑐶𑐎 𑐳𑐵𑐩𑐵𑐐𑑂𑐬𑐷 𑐩𑐸𑐣𑐵𑑅 𑐬𑐶𑐥𑑀𑐬𑑂𑐚 𑐔𑑂𑐰𑐎𑐵𑐡𑐶𑐳𑑃, 𑐥𑐵𑐰𑐬𑐥𑑂𑐰𑐵𑐃𑐣𑑂𑐚 𑐥𑑂𑐬𑐶𑐖𑐾𑐣𑑂𑐚𑐾𑐳𑐣 𑐫𑐵𑐎𑐵𑐡𑐶𑐳𑑃 𑑋 𑐧𑐵𑑄𑐮𑐵𑐎 𑐔𑑂𑐰𑑅𑐐𑐸 𑐬𑐶𑐥𑑀𑐬𑑂𑐚𑐫𑐵 𑐧𑑅𑐎𑐫𑐵𑑅 𑐧𑐵𑐏𑑄, 𑐔𑐶𑐣𑐵𑐏𑑃, 𑐔𑑂𑐰𑐳𑐸𑐟 𑐔𑑂𑐰𑐎𑐵𑐡𑐶𑐳𑑃, 𑐳𑐩𑑂𑐥𑐵𑐡𑐣 𑐫𑐵𑐣𑐵 𑐥𑑂𑐬𑐎𑐵𑐱𑐣 𑐫𑐵𑐣𑐵𑐡𑐶𑐳𑑃 𑑋 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑑄𑐳𑑄 𑐎𑐵𑑅𑐐𑐸 𑐧𑐵𑑄𑐮𑐵𑑅𑐐𑐸 𑐦𑑀𑐚𑑀𑐟 𑐰𑐶𑐡𑑂𑐫𑐵𑐮𑐫𑐫𑐵 𑐥𑐟𑑂𑐬𑐶𑐎𑐵𑐫𑑂 𑐧𑑂𑐰𑐫𑐵𑐡𑐶𑐳𑑃 𑑋 𑐄𑐩𑐶𑐳𑑄 𑐫𑐵𑑅𑐐𑐸 𑐧𑐵𑑄𑐮𑐵𑐐𑐸 𑐖𑑂𑐫𑐵𑐫𑐵𑐟 𑐥𑑂𑐬𑐱𑑄𑐳𑐵 𑐫𑐵𑐣𑐵𑐡𑐶𑐳𑑃 𑑋

𑐠𑑂𑐰 𑐱𑐿𑐎𑑂𑐲𑐶𑐎 𑐨𑑂𑐬𑐩𑐞𑐫𑐵𑐟 𑐧𑑅𑑅𑐎𑐫𑐵𑑅 𑐐𑐠𑐾 𑐫𑐵𑐣𑐵 𑐧𑐵𑐏𑑄÷𑐔𑐶𑐣𑐵𑐏𑑄 𑐔𑑂𑐰𑐫𑐾𑐐𑐸 𑐢𑐎𑐵𑑅 𑐎𑐠𑐵𑐎𑐵𑐬, 𑐎𑐰𑐶𑐥𑐶𑑄 𑐥𑐵𑐏𑐾𑑄 𑐳𑑂𑐫𑑄𑐎𑐾 𑐧𑐶𑐫𑐵𑐡𑐶𑐳𑑃 𑑋 𑐣𑐵𑐥𑑄 𑐩𑐳𑑂𑐟𑐫𑑂𑐳𑑄 𑐡𑐫𑐾𑐎𑐹𑐐𑐸 𑐥𑐵𑐰𑐬𑐥𑑂𑐰𑐵𑐃𑐣𑑂𑐚 𑐳𑐾𑐩𑐶𑐣𑐵𑐬𑐫𑑂 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐴𑐾 𑐥𑑂𑐬𑐶𑐖𑐾𑐣𑑂𑐚𑐾𑐳𑐣 𑐫𑐵𑐎𑐵𑐡𑐶𑐳𑑃 𑑋 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐳𑑄 𑐥𑑂𑐬𑐶𑐖𑐾𑐣𑑂𑐚𑐾𑐱𑐣 𑐫𑐵𑐂𑐧𑐮𑐫𑑂 𑐀𑐨𑐶𑐨𑐵𑐰𑐎𑐟 𑐣𑑄 𑐳𑑅𑐟𑐵𑐡𑐶𑐳𑑃, 𑐰𑐶𑐖𑑂𑐘𑐟 𑐣𑑄 𑐳𑑅𑐟𑐵𑐡𑐶𑐳𑑃, 𑐕𑐶𑐎𑐥𑐶𑐣𑐶𑐐𑐸 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑐣𑐶𑐐𑐸 𑐳𑐵𑐬𑑂𑐠𑐎 𑐱𑐿𑐎𑑂𑐲𑐶𑐎 𑐨𑑂𑐬𑐩𑐞𑑄 𑐳𑑂𑐎𑐹𑐮𑐫𑐵𑐐𑐸 𑐰𑐶𑐎𑐵𑐳𑐫𑑂 𑐧𑐵𑑄𑐮𑐵𑐐𑐸 𑐫𑑀𑐐𑐡𑐵𑐣 𑐫𑐵𑐂 𑐢𑐎𑐵𑑅 𑐠𑐸𑐂𑐎𑐵𑐡𑐶𑐳𑑃 𑑋

𑐱𑐿𑐎𑑂𑐲𑐶𑐎 𑐨𑑂𑐬𑐩𑐞 𑐄𑐥𑐮𑐧𑑂𑐢𑐶𑐩𑐹𑐮𑐎 𑐖𑐹 𑐩𑐖𑐹 𑐢𑐎𑐵𑑅 𑐩𑐸𑐮𑑂𑐫𑐵𑑄𑐎𑐣 𑐫𑐵𑐫𑐾𑐐𑐸 𑐰𑐶𑐢𑐶 𑐕𑐸 ?
𑐳𑑂𑐎𑐹𑐮𑑄 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑑄𑐟 𑐨𑑂𑐬𑐩𑐞 𑐫𑑄𑐎𑐾 𑐣𑑂𑐴𑑂𑐫𑑅 𑐖𑐵𑐫𑐾𑐎𑐾 𑐧𑐶𑐄𑐐𑐸 𑐥𑑂𑐬𑐱𑑂𑐣𑐵𑐰𑐮𑐷 𑐴𑐵𑐣𑑄 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐧𑐶𑐫𑐵𑑅 𑐨𑐬𑐾 𑐫𑐵𑐎𑐵𑐡𑐶𑐳𑑃 𑑋 𑐕𑐶𑐎𑐥𑐶𑐣𑐶𑐐𑐸 𑐣𑑂𑐴𑐵𑐥𑐵𑐫𑐵𑐐𑐸 𑐣𑑂𑐴𑑂𑐫𑐳𑑅 𑐩𑐳𑑂𑐟𑐫𑑂𑐳𑑄 𑐐𑐸𑐮𑐶 𑐩𑐶𑐮𑐾 𑐫𑐵𑐟 𑐳𑑂𑐰𑐫𑐵𑐡𑐶𑐳𑑃 𑑋 𑐀𑐥𑑂𑐰𑑅𑐠𑐾𑑄 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐳𑑄 𑑘𑑐–𑑙𑑐 𑐥𑑂𑐬𑐟𑐶𑐱𑐟 𑐩𑐶𑐮𑐾 𑐫𑐵𑑅𑐳𑐵 𑐱𑐿𑐎𑑂𑐲𑐶𑐎 𑐨𑑂𑐬𑐩𑐞 𑐄𑐥𑐮𑐧𑑂𑐢𑐶𑐩𑐹𑐮𑐎 𑐰 𑐳𑐵𑐬𑑂𑐠𑐎 𑐖𑐸𑐮 𑐢𑐎𑐵 𑐳𑐶𑐂𑐎𑐵𑐡𑐶𑐳𑑃 𑑋 𑐩𑐏𑐸 𑐩𑐹𑐮𑑂𑐫𑐵𑑄𑐎𑐣 𑐎𑐩 𑐥𑑂𑐬𑐟𑐶𑐱𑐟 𑐖𑐎 𑐩𑐳𑑂𑐟𑐫𑑂𑐳𑑄 𑐩𑐶𑐮𑐾 𑐫𑐵𑐟 𑐢𑐵𑑅𑐳𑐵 𑐎𑐩 𑐥𑑂𑐬𑐐𑐟𑐶 𑐖𑐹𑐐𑐸𑐫𑐵 𑐎𑐵𑐬𑐞 𑐩𑐵𑐮𑐵𑐡𑐶𑐳𑑃 𑑋

𑐱𑐿𑐎𑑂𑐲𑐶𑐎 𑐨𑑂𑐬𑐩𑐞 𑐫𑐵𑐎𑐹𑐥𑐶𑑄 𑐐𑐸𑐬𑐸𑐧𑐵𑑅 𑐐𑐸𑐬𑐸𑐩𑐵𑑄𑐥𑐶𑑄𑐳𑑄 𑐕𑐸 𑐕𑐸 𑐫𑐵𑐫𑐾𑐩𑐵𑑅 ?
𑐩𑐳𑑂𑐟𑐫𑑂𑐳𑑄 𑐖𑐎 𑐩𑐏𑐸 𑐐𑐸𑐬𑐸𑐧𑐵𑑅 𑐐𑐸𑐬𑐸𑐩𑐵𑑄𑐥𑐶𑑄𑐳𑑄 𑐣𑑄 𑐨𑑂𑐬𑐩𑐞 𑐰𑐣𑐵𑐐𑐸 𑐠𑐵𑐳𑐫𑑂 𑐧𑐵𑑄𑐮𑐵𑐎 𑐳𑑂𑐰𑐫𑐾𑐐𑐸, 𑐣𑑂𑐫𑐣𑐾𑐐𑐸 𑐰 𑐬𑐶𑐥𑑀𑐬𑑂𑐚 𑐔𑑂𑐰𑐫𑐾𑐐𑐸 𑐫𑐵𑐫𑐾𑐩𑐵𑑅 𑑋 𑐠𑑅𑐥𑐶𑑄𑐟 𑐐𑐠𑐾 𑐱𑐿𑐎𑑂𑐲𑐶𑐎 𑐨𑑂𑐬𑐩𑐞 𑐟𑐵𑐮, 𑐳𑐸 𑐳𑐸 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑑄𑐳𑑄 𑐀𑐣𑐸𑐱𑐵𑐳𑐣𑐫𑑂 𑐔𑑂𑐰𑐣𑐵 𑐱𑐿𑐎𑑂𑐲𑐶𑐎 𑐨𑑂𑐬𑐩𑐞 𑐳𑐦𑐮 𑐫𑐵𑐟, 𑐳𑐸𑐣𑐵𑑄 𑐳𑐸𑐣𑐵𑑄 𑐩𑐫𑐵𑑅 𑐢𑐫𑐵𑐐𑐸 𑐀𑐰𑐮𑑀𑐎𑐣 𑐫𑐵𑐫𑐾𑐩𑐵𑑅 𑑋 𑐨𑑂𑐬𑐩𑐞 𑐧𑐵𑑄𑐮𑐵𑐎 𑐳𑐦𑐮 𑐫𑐵𑐫𑐾𑐟 𑐕𑐸 𑐕𑐸 𑐳𑐮𑑂𑐮𑐵𑐴 𑐳𑐸𑐗𑐵𑐰 𑐡𑐸, 𑐬𑐶𑐥𑑀𑐬𑑂𑐚 𑐡𑐫𑐾𑐎𑐵 𑐧𑐷𑐩𑐵𑑅 𑑋

𑐰𑐶𑐡𑑂𑐫𑐵𑐮𑐫𑑄 𑐕𑐸 𑐕𑐸 𑐫𑐵𑐫𑐾𑐩𑐵𑑅 ?
𑐰𑐶𑐡𑑂𑐫𑐵𑐮𑐫𑑄 𑐱𑐿𑐎𑑂𑐲𑐶𑐎 𑐨𑑂𑐬𑐩𑐞 𑐧𑐵𑑄𑐮𑐵𑐎 𑐳𑐩𑑂𑐥𑐣𑑂𑐣 𑐫𑐵𑐫𑐾𑐐𑐸 𑐰𑐵𑐟𑐵𑐰𑐬𑐞 𑐡𑐫𑐾𑐎𑐵 𑐧𑐶𑐂𑐩𑐵 𑑋 𑐐𑐸𑐬𑐸𑐧𑐵𑑅 𑐐𑐸𑐬𑐸𑐩𑐵𑑄𑐥𑐶𑑄𑐳𑑄 𑐠𑑅 𑐧𑑂𑐰𑑄𑐧𑐮𑐫𑑂 𑐱𑐿𑐎𑑂𑐲𑐶𑐎 𑐨𑑂𑐬𑐩𑐞 𑐐𑐠𑐾 𑐫𑐵𑐣𑐵𑑅 𑐐𑑂𑐰𑐳𑐵𑑅 𑐐𑑂𑐰𑐫𑐾𑐐𑐸, 𑐐𑐣 𑐐𑐣 𑐰𑐣𑐾 𑐖𑑂𑐫𑐹, 𑐕𑐸 𑐕𑐸 𑐠𑐵𑐳𑐫𑑂 𑐫𑑄𑐎𑐾𑐐𑐸 𑐢𑐎𑐵𑑅 𑐥𑐵𑐛𑑂𑐫𑐎𑑂𑐬𑐩𑐫𑑂 𑐧𑑂𑐰𑐣𑐾 𑐩𑑂𑐰𑐵𑑅𑐐𑐸𑐮𑐶𑑄 𑐱𑐿𑐎𑑂𑐲𑐶𑐎 𑐨𑑂𑐬𑐩𑐞𑐫𑐵 𑐧𑐵𑐬𑐾 𑐐𑐸𑐬𑐸𑐧𑐵 𑐐𑐸𑐬𑐸𑐩𑐵𑑄𑐥𑐶𑑄𑐟 𑐳𑐾𑐩𑐶𑐣𑐵𑐬𑐫𑑂 𑐟𑐫𑐵𑑅 𑐎𑑂𑐲𑐩𑐟𑐵 𑐀𑐨𑐶𑐧𑐺𑐡𑑂𑐢𑐶 𑐫𑐵𑐫𑐾𑐩𑐵𑑅 𑑋

𑐀𑐣𑑂𑐟𑐫𑑂
𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐳𑑄 𑐧𑑂𑐫𑐹𑐐𑐸, 𑐐𑐸𑐬𑐸𑐧𑐵𑑅 𑐐𑐸𑐬𑐸𑐩𑐵𑑄𑐥𑐶𑑄𑐳𑑄 𑐣𑑄 𑐧𑑂𑐫𑐹𑐐𑐸 𑐥𑑂𑐬𑐟𑐶𑐰𑐾𑐡𑐣, 𑐦𑑀𑐚𑑀𑐟 𑐣𑐵𑐥𑑄 𑐳𑑄𑐎𑐮𑐶𑐟 𑐱𑐿𑐎𑑂𑐲𑐶𑐎 𑐳𑐵𑐩𑐵𑐐𑑂𑐬𑐷𑐟, 𑐥𑐵𑐰𑐬𑐥𑑂𑐰𑐵𑐂𑐣𑑂𑐚, 𑐥𑑂𑐬𑐶𑐖𑐾𑐣𑑂𑐚𑐾𑐱𑐣 𑐩𑐸𑐣𑐵𑑅 𑐳𑑂𑐎𑐹𑐮𑐫𑑂 𑐩𑐸𑑄𑐎𑐵𑑅 𑐳𑐸𑐬𑐎𑑂𑐲𑐶𑐟 𑐫𑐵𑐣𑐵 𑐟𑐫𑐾𑐩𑐵𑑅 𑑋 𑐮𑐶𑐥𑐵 𑐴𑐵𑐣𑑄 𑐱𑐿𑐎𑑂𑐲𑐶𑐎 𑐨𑑂𑐬𑐩𑐞 𑐫𑑄𑐎𑐾 𑐣𑑂𑐴𑑂𑐫𑑅 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑑄𑐟 𑐠𑐸𑐂𑐎𑐵 𑐧𑐷𑐩𑐵𑑅 𑑋 𑐠𑑅𑐥𑐶𑑄𑐳𑑄 𑐰𑐶𑐨𑐶𑐣𑑂𑐣 𑐎𑐎𑑂𑐲𑐵𑐫𑐵𑐥𑐶𑑄 𑐱𑐿𑐎𑑂𑐲𑐶𑐎 𑐨𑑂𑐬𑐩𑐞 𑐫𑑄𑐎𑐵𑐐𑐸𑐫𑐵 𑐩𑐹𑐮𑑂𑐫𑐵𑑄𑐎𑐣 𑐳𑐴𑐶𑐟 𑐕𑐥𑐸 𑐣𑐶𑐥𑐸 𑐔𑑂𑐰𑐳𑐸 𑐬𑐵𑐲𑑂𑐚𑑂𑐬𑐶𑐫 𑐥𑐟𑑂𑐬𑐶𑐎𑐵𑐫𑑂 𑐥𑐶𑐎𑐵𑐫𑐾𑐐𑐸 𑐫𑐵𑐫𑐾𑐩𑐵𑑅 𑑋 𑐠𑑅𑐥𑐶𑐣𑐶𑐐𑐸 𑐠𑑂𑐰 𑐥𑑂𑐬𑐎𑐵𑐱𑐣 𑐩𑐾𑐩𑐾𑐐𑐸 𑐳𑑂𑐎𑐹𑐮𑐫𑐵𑐟 𑐣𑑄 𑐱𑐿𑐎𑑂𑐲𑐶𑐎 𑐨𑑂𑐬𑐩𑐞 𑐳𑐵𑐬𑑂𑐠𑐎 𑐰 𑐄𑐥𑐮𑐧𑑂𑐢𑐷𑐩𑐸𑐎 𑐫𑐵𑐫𑐾𑐐𑐸 𑐟𑐬𑐷𑐎𑐵 𑐠𑐸𑐂𑐎𑐾𑐟 𑐖𑑂𑐫𑐵 𑐮𑐐𑐾 𑐖𑐸𑐂 𑑋