𑐰𑐶𑐱𑑂𑐰 𑐳𑐵𑐴𑐶𑐟𑑂𑐫 𑐡𑐧𑐸𑐮𑐷 𑐣𑐾𑐥𑐵𑐮𑐨𑐵𑐲𑐵𑐫𑐵 𑐄𑐥𑐣𑑂𑐫𑐵𑐳

𑐎𑑂𑐫𑐵𑐣𑐵𑐜𑐵𑐫𑐵 𑐎𑑂𑐰𑐵𑐣𑑂𑐚𑐮𑐾𑐣 𑐥𑑀𑐮𑐶𑐚𑐾𑐎𑑂𑐣𑐷𑐎𑐮 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫, 𑐡𑐎𑑂𑐲𑐶𑐞 𑐊𑐳𑐶𑐫𑐵𑐮𑐷 𑐳𑐵𑐴𑐶𑐟𑑂𑐫 𑐰 𑐀𑐣𑐸𑐳𑐣𑑂𑐢𑐵𑐣 𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 ‘𑐰𑐶𑐱𑑂𑐰 𑐳𑐵𑐴𑐶𑐟𑑂𑐫 𑐡𑐧𑐸𑐮𑐷 𑐣𑐾𑐥𑐵𑑅𑐫𑐵 𑐳𑐵𑐴𑐶𑐟𑑂𑐫’ 𑐱𑐶𑐬𑑂𑐲𑐎𑐫𑐵 𑐀𑐣𑑂𑐟𑐬𑐬𑐵𑐲𑑂𑐚𑑂𑐬𑐶𑐫 𑐳𑑄𑐐𑑀𑐲𑑂𑐛𑐷 𑐰 𑐳𑐾𑐩𑐶𑐣𑐵𑐬𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐄𑐥𑐣𑑂𑐫𑐵𑐳 ‘𑐳𑐾𑐥𑑂𑐚𑐾𑐩𑑂𑐧𑐬 – 𑑑𑑗’ 𑐰 ‘𑐎𑑀𑐬𑐣𑐵𑐫𑐵 𑐎𑐶𑐔𑐮𑐫𑑂‌’ 𑐫𑐵𑐟 𑐎𑐫𑐵𑑅 𑐕𑐐𑐹 𑐧𑐶𑐱𑐾𑐲 𑐳𑐟𑑂𑐬𑐫𑐵 𑐳𑐴𑐮𑐴 𑐖𑐹𑐐𑐸 𑐡𑐸 𑑋

𑐳𑑄𑐫𑐸𑐎𑑂𑐟 𑐬𑐵𑐖𑑂𑐫 𑐀𑐩𑐾𑐬𑐶𑐎𑐵, 𑐌𑐬𑐾𑐐𑐣 𑐬𑐵𑐖𑑂𑐫 𑐥𑑀𑐬𑑂𑐚𑐮𑐿𑐞𑑂𑐜 𑐬𑐷𑐜 𑐎𑐵𑐮𑐾𑐖𑐫𑐵 𑐩𑐵𑐣𑐰𑐶𑐎𑐶 𑐰 𑐀𑑄𑐐𑑂𑐬𑐾𑐖𑐷 𑐳𑐵𑐴𑐶𑐟𑑂𑐫𑐫𑐵 𑐳𑐴𑐵𑐫𑐎 𑐥𑑂𑐬𑐵𑐢𑑂𑐫𑐵𑐥𑐎 𑐎𑑂𑐬𑐶𑐚𑐶𑐳 𑐬𑐵𑐖𑐨𑐞𑑂𑐜𑐵𑐬𑐷𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐠𑐸𑐐𑐸 𑐣𑐶𑐐𑐹 𑐄𑐥𑐣𑑂𑐫𑐵𑐳𑐫𑐵𑐟 𑐎𑐫𑐵𑑅 𑐰𑐶𑐱𑑂𑐰 𑐁𑐏𑑂𑐫𑐵𑐣 𑐳𑐵𑐴𑐶𑐟𑑂𑐫 𑐏𑑂𑐫𑐮𑐫𑑂 𑐠𑐸𑐩𑐶𑐐𑐸 𑐠𑐵𑐫𑑂 𑐕𑐸 𑐖𑐸𑐂𑐦𑐸 𑐢𑐿𑐐𑐸 𑐕𑐐𑐹 𑐡𑐸𑐐𑑂𑐫𑑄𑐐𑐸 𑐎𑐵𑐬𑑂𑐫𑐥𑐟𑑂𑐬 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅 𑑋 𑐳𑑄𑐳𑐵𑐬𑐫𑐵 𑐟𑑅𑐐𑐹 𑐡𑐾𑐫𑑂𑐫𑐵 𑐰𑐶𑐡𑑂𑐰𑐵𑐣, 𑐰𑐶𑐖𑑂𑐘, 𑐔𑑂𑐰𑐩𑐶𑐥𑐶𑑄𑐳𑑄 𑐨𑑁𑐟𑐶𑐎 𑐬𑐸𑐥𑐫𑑂 𑐰 𑐀𑐣𑐮𑐵𑐂𑐣𑐫𑑂 𑐧𑑂𑐰𑐟𑐶 𑐎𑐵𑑅𑐐𑐸 𑐠𑐸𑐐𑐸 𑐖𑑂𑐫𑐵𑐗𑑂𑐰𑑅 𑐠𑑂𑐰𑐴𑐾 𑐀𑐐𑐲𑑂𑐚 𑑒𑑗 𑐰 𑑒𑑘 𑐣𑐶𑐣𑑂𑐴𑐸𑐫𑑄𑐎 𑐖𑐹𑐐𑐸 𑐏𑑅 𑑋

𑐣𑐾𑐥𑐵𑐮𑐨𑐵𑐲𑐵𑐫𑐵 𑐄𑐥𑐣𑑂𑐫𑐵𑐳 ‘𑐳𑐾𑐥𑑂𑐚𑐾𑐩𑑂𑐧𑐬 – 𑑑𑑗’ 𑐨𑐵𑐖𑐸 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬 𑐰 ‘𑐎𑑀𑐬𑐣𑐵𑐫𑐵 𑐎𑐶𑐔𑐮𑐫𑑂‌’ 𑐩𑐫𑑂‌𑐖𑐸 𑐱𑑂𑐬𑐷𑐮𑐎𑑂𑐲𑑂𑐩𑐷 𑐱𑑂𑐬𑐾𑐲𑑂𑐛𑐫𑐵 𑐔𑑂𑐰𑐳𑐵𑑄 𑐥𑐶𑐡𑑄𑐐𑐸 𑐏𑑅 𑑋 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑐵 𑐰𑐶𑐖𑑂𑐘𑐥𑐶𑐣𑐶 𑐢𑐵𑐥𑐹 𑐎𑐠𑑄 𑐠𑐸𑐎𑐠𑑄 𑐣𑐾𑐥𑐵𑐮𑐨𑐵𑐲𑐵 𑐁𑐏𑑂𑐫𑐵𑐣 𑐰𑐶𑐢𑐵𑐫𑐵𑐟 𑐎𑐫𑐵𑑅 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐳𑐵𑐴𑐶𑐟𑑂𑐫𑐶𑐎 𑐡𑐺𑐲𑑂𑐚𑐶𑐎𑑀𑐞𑑄 𑐣𑐾𑐥𑐵𑐮𑑄𑐥𑐶𑐣𑐾 𑐧𑑁𑐡𑑂𑐢𑐶𑐎 𑐏𑑂𑐫𑐮𑐫𑑂 𑐳𑐴𑐮𑐴 𑐖𑐹𑐐𑐸 𑐠𑑂𑐰 𑐣𑑂𑐴𑐵𑐥𑐵𑑄 𑐖𑐸𑐂 𑑋

𑐄𑐐𑐸 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑐵 𑐡𑐎𑑂𑐲𑐶𑐞 𑐊𑐳𑐶𑐫𑐵𑐮𑐷 𑐳𑐵𑐴𑐶𑐟𑑂𑐫 𑐰 𑐀𑐣𑐸𑐳𑐣𑑂𑐢𑐵𑐣 𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐣𑐎𑐶𑑄 𑐜𑐵. 𑐁𑐳𑑂𑐩𑐵 𑐳𑐿𑐫𑐡𑐫𑐵 𑐣𑐾𑐟𑐺𑐟𑑂𑐰𑐫𑑂 𑐣𑑂𑐴𑑂𑐫𑐵𑑅𑐐𑐸 𑐠𑐸𑐐𑐸 𑐖𑑂𑐫𑐵𑐫𑐵𑐟 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑐵 𑐳𑐩𑐵𑐖 𑐰𑐶𑐖𑑂𑐘𑐵𑐣 𑐰 𑐩𑐵𑐣𑐰𑐶𑐎𑐷 𑐀𑐣𑐸𑐳𑐣𑑂𑐢𑐵𑐣 𑐥𑐬𑐶𑐲𑐡𑐥𑐵𑐏𑐾𑑄 𑐰𑐶𑐱𑐾𑐲 𑐁𑐬𑑂𑐠𑐶𑐎 𑐟𑐶𑐧𑑅 𑐔𑐹𑐮𑐵𑐎𑐹𑐐𑐸 𑐏𑑅 𑑋

𑐠𑐷𑐠𑐷 𑐗𑐶𑑄𑐣𑐶𑐐𑐹 𑐳𑐟𑑂𑐬𑐫𑑂 𑐧𑑂𑐰𑐠𑐮𑐵𑑅 𑐣𑑂𑐴𑑂𑐫𑐵𑐎𑐹𑐐𑐸 ‘𑐰𑐶𑐱𑑂𑐰 𑐳𑐵𑐴𑐶𑐟𑑂𑐫 𑐡𑐧𑐸𑐮𑐷 𑐣𑐾𑐥𑐵𑑅𑐫𑐵 𑐳𑐵𑐴𑐶𑐟𑑂𑐫’ 𑐰𑐶𑐲𑐫𑐎 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑐵𑐟 𑐎𑐫𑐵𑑅 𑐩𑐮𑑂𑐮𑐎𑐵𑐮𑐷𑐣 𑐣𑐾𑐰𑐵𑑅 𑐳𑐵𑐴𑐶𑐟𑑂𑐫 (𑐂𑐳𑑂𑐰𑐷 𑑑𑑒𑑐𑑐–𑑑𑑘𑑐𑑐 𑐟𑐎), 𑐣𑐾𑐰𑐵𑑅 𑐧𑑁𑐡𑑂𑐢 𑐀𑐰𑐡𑐵𑐣 𑐎𑐾𑐣𑑂𑐡𑑂𑐬𑐷𑐫 𑐧𑑁𑐡𑑂𑐢 𑐳𑐵𑐴𑐶𑐟𑑂𑐫, 𑐎𑐰𑐶𑐎𑐾𑐱𑐬𑐷 𑐔𑐶𑐟𑑂𑐟𑐢𑐬 𑐴𑐺𑐡𑐫𑐫𑐵 ‘𑐥𑑁’ 𑐣𑑂𑐴𑐹𑐧𑐵𑐏𑑄 𑐰 𑐄𑐎𑐶𑐫𑐵 𑐀𑑄𑐐𑑂𑐬𑐾𑐖𑐷 𑐨𑐵𑐫𑑂 𑐴𑐶𑐮𑐵𑐫𑐵𑐟 𑐎𑐫𑐵𑑅 𑐣𑑄 𑐧𑐶𑐳𑑂𑐎𑑄 𑐧𑐶𑐳𑑂𑐎𑑄 𑐳𑐟𑑂𑐬𑐫𑑂 𑐖𑑂𑐫𑐵𑐥𑑁𑐟 𑐣𑑂𑐴𑑂𑐫𑐧𑑂𑐰𑐫𑐾𑐐𑐸 𑐀𑐮𑐾 𑐳𑐴𑐮𑐴𑐫𑐵 𑐖𑑂𑐫𑐵 𑐖𑐹𑐐𑐸 𑐏𑑅 𑑋

𑐀𑐠𑐾𑐴𑐾 𑐣𑐾𑐥𑐵𑐮𑐷 𑐨𑐵𑐫𑑂𑐫𑐵 𑐩𑐴𑐵𑐎𑐵𑐧𑑂𑐫 𑐰𑐶𑐢𑐵𑐫𑑂 𑐩𑐴𑐵𑐎𑐰𑐶 𑐮𑐎𑑂𑐲𑑂𑐩𑐷𑐥𑑂𑐬𑐳𑐵𑐡 𑐡𑐾𑐰𑐎𑑀𑐚𑐵𑐫𑐵 ‘𑐩𑐸𑐣𑐵𑐩𑐡𑐣’ 𑐰 ‘𑐱𑐎𑐸𑐣𑑂𑐟𑐮𑐵’𑐫𑐵 𑐀𑑄𑐐𑐾𑑂𑐬𑐖𑐷 𑐨𑐵𑐫𑑂 𑐴𑐶𑐮𑐵𑐫𑐵 𑐣𑐵𑐥𑐣𑐵𑐥𑑄 𑐧𑐵𑐮𑐎𑐺𑐲𑑂𑐞 𑐳𑐩𑐫𑐵 𑐥𑑂𑐫𑐵𑐏𑑄 𑐳𑐦𑐹𑐫𑐵𑐟 𑐎𑐫𑐵𑑅 𑐣𑑄 𑐧𑐶𑐳𑑂𑐎𑑄 𑐧𑐶𑐳𑑂𑐎𑑄 𑐳𑐴𑐮𑐴 𑐣𑑂𑐴𑑂𑐫𑐵𑐎𑐹𑐐𑐸 𑐏𑑅 𑑋 𑐀𑐠𑐾𑐴𑐾 𑐂𑐣𑑂𑐡𑑂𑐬𑐧𑐴𑐵𑐡𑐸𑐬𑐫𑐵 𑐮𑐶𑐮𑐵 𑐮𑐾𑐏𑐣, 𑐥𑐵𑐬𑐶𑐖𑐵𑐟𑐫𑐵 𑐱𑐶𑐬𑐶𑐲𑐎𑑀 𑐦𑐹𑐮𑐫𑐵 𑐀𑑄𑐐𑑂𑐬𑐾𑐖𑐷 𑐨𑐵𑐫𑑂 𑐴𑐷𑐎𑐵 𑐀𑐮𑐾 𑐱𑐬𑐡 𑐥𑑁𑐜𑐫𑐵𑐮𑐫𑐵 ‘𑐮𑐶𑐏𑐾’ 𑐄𑐥𑐣𑑂𑐫𑐵𑐳𑐫𑐵 𑐮𑐶𑐢𑑄𑐳𑐵𑐫𑑂 𑐣𑐾𑐥𑐵𑑅𑐫𑐵 𑐖𑐵𑐟 𑐰𑑂𑐫𑐰𑐳𑑂𑐠𑐵𑐫𑐵𑐟 𑐎𑐫𑐵𑑅 𑐣𑑄 𑐎𑐸𑐮𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅 𑑋
𑐠𑐸𑐐𑐸 𑐧𑑁𑐡𑑂𑐢𑐶𑐎 𑐖𑑂𑐫𑐵𑐗𑑂𑐰𑑅𑐫𑐵 𑐳𑐴𑐮𑐴 𑐀𑐮𑐾 𑐖𑑂𑐫𑐵𑐥𑑁𑐟 𑐡𑐸𑐠𑑂𑐫𑐵𑐎𑐵𑑅 𑐫𑐵𑐎𑐣𑑄 𑐕𑐐𑐹 𑐳𑐦𑐹 𑐴𑐾 𑐥𑐶𑐠𑐣𑐷𑐐𑐸 𑐏𑑃 𑐣𑑄 𑐐𑑂𑐰𑐳𑐵𑑅 𑐏𑐮𑐎𑑄 𑐢𑐵𑑅𑐐𑐸 𑐡𑐸 𑑋