𑐰𑐶𑐡𑑂𑐫𑐵𑐮𑐫 𑐱𑐶𑐎𑑂𑐲𑐵 𑐋𑐣𑐫𑑂 𑐣𑐶𑐖𑐷 𑐧𑑂𑐰𑐣𑐾𑐎𑐸𑐠𑐶𑐫𑐵 𑐰𑐶𑐲𑐫 𑐳𑐩𑑂𑐧𑑀𑐢𑐣 𑐫𑐵𑐫𑐾𑐟 𑐩𑐵𑐐

𑐬𑐵𑐲𑑂𑐚𑑂𑐬𑐶𑐫 𑐣𑐶𑐖𑐷 𑐮𑐶𑐳𑐾𑑄 𑐁𑐰𑐵𑐳𑐷𑐫 𑐰𑐶𑐡𑑂𑐫𑐵𑐮𑐫 𑐊𑐳𑑀𑐳𑐶𑐊𑐳𑐣 𑐣𑐾𑐱𑐣𑐮 𑐥𑑂𑐫𑐵𑐧𑑂𑐳𑐣𑑄 𑐰𑐶𑐡𑑂𑐫𑐵𑐮𑐫 𑐱𑐶𑐎𑑂𑐲𑐵 𑐋𑐣𑐫𑐵 𑐥𑑂𑐬𑐳𑑂𑐟𑐵𑐰𑐶𑐟 𑐰𑐶𑐢𑐾𑐫𑐎 𑐫𑐵𑐎𑐣𑑄 𑐖𑐵𑐬𑐷 𑐫𑐵𑐫𑐟𑐾 𑐩𑐵𑐐 𑐫𑐵𑑅𑐐𑐸 𑐡𑐸 𑑋 𑐣𑐾𑐱𑐣𑐮 𑐥𑑂𑐫𑐵𑐧𑑂𑐳𑐣𑑄 𑐠𑑁𑑄 𑐥𑐟𑑂𑐬𑐎𑐵𑐬 𑐳𑐩𑑂𑐩𑐾𑐮𑐣 𑐫𑐵𑐣𑐵𑑅 𑐰𑐶𑐡𑑂𑐫𑐵𑐮𑐫 𑐱𑐶𑐎𑑂𑐲𑐵 𑐋𑐣𑐫𑐵 𑐥𑑂𑐬𑐳𑑂𑐟𑐵𑐰𑐶𑐟 𑐰𑐶𑐢𑐾𑐫𑐎 𑐡𑐸𑐬𑐡𑐺𑐲𑑂𑐚𑐶𑐫𑐵 𑐣𑐵𑐥𑐣𑐵𑐥𑑄 𑐃 𑐎𑐠𑑄 𑐥𑐬𑐶𑐩𑐵𑐬𑑂𑐖𑐶𑐣 𑐫𑐵𑐣𑐵𑑅 𑐖𑐵𑐬𑐷 𑐫𑐵𑐫𑐾𑐟 𑐩𑐵𑐐 𑐫𑐵𑑅𑐐𑐸 𑐏𑑅 𑑋

𑐳𑑄𑐰𑐶𑐢𑐵𑐣𑐫𑐵 𑐀𑐰𑐢𑐵𑐬𑐞𑐵 𑐎𑐠𑑄 𑐳𑐩𑐸𑐣𑑂𑐣𑐟 𑐣𑐾𑐥𑐵𑑅𑐫𑐵 𑐩𑐹𑐮 𑐁𑐢𑐵𑐬 𑐳𑐵𑐬𑑂𑐰𑐖𑐣𑐶𑐎, 𑐣𑐶𑐖𑐷 𑐰 𑐳𑐴𑐎𑐵𑐬𑐷 𑐏𑑂𑐫𑑅𑐫𑐵 𑐳𑐴𑐨𑐵𑐐𑐶𑐟𑐵𑐫𑐵 𑐍𑐔𑐶𑐟𑑂𑐫, 𑐁𑐖𑑂𑐖𑐸 𑐎𑐠𑑄 𑐰𑐶𑐡𑑂𑐫𑐵𑐮𑐫 𑐱𑐶𑐎𑑂𑐲𑐵 𑐋𑐣 𑐰𑐶𑐨𑐾𑐡 𑐩𑐡𑐹𑐐𑐸 𑐎𑐠𑑄 𑐣𑐶𑐬𑑂𑐩𑐵𑐞 𑐫𑐵𑐫𑐾𑐟 𑐂𑐣𑐵𑐥 𑐫𑐵𑐳𑐾𑑄 𑐣𑐾𑐱𑐣𑐮 𑐥𑑂𑐫𑐵𑐧𑑂𑐳𑐣𑑄 𑐎𑐵𑐣𑐸𑐣𑐎𑐠𑑄 𑐁𑑅𑐟𑐎 𑐎𑐩𑑂𑐥𑐣𑐷 𑐀𑐣𑑂𑐟𑐬𑑂𑐐𑐟 𑐡𑐹𑐐𑐸 𑐣𑐶𑐖𑐷 𑐧𑑂𑐰𑐣𑐾𑐎𑐸𑐠𑐶𑐫𑐵𑐟 𑐎𑐩𑑂𑐥𑐣𑐷 𑐋𑐣 𑐀𑐣𑑂𑐟𑐬𑑂𑐐𑐟 𑐴𑐾 𑐳𑐘𑑂𑐔𑐵𑐮𑐣 𑐖𑐸𑐂𑐐𑐸 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾𑐟 𑐩𑐵𑐐 𑐫𑐵𑑅𑐐𑐸 𑐡𑐸 𑑋

𑐥𑐟𑑂𑐬𑐎𑐵𑐬 𑐳𑐩𑑂𑐩𑐾𑐮𑐣𑐫𑑂 𑐣𑐾𑐱𑐣𑐮 𑐥𑑂𑐫𑐵𑐧𑑂𑐳𑐣𑐫𑐵 𑐣𑐵𑐫𑑅 𑐳𑐸𑐰𑐵𑐳 𑐣𑑂𑐫𑑁𑐥𑐵𑐣𑐾𑑄 𑐎𑐩𑑂𑐥𑐣𑐷 𑐋𑐣𑐫𑐵 𑐥𑑂𑐬𑐎𑐺𑐟𑐶 𑐰 𑐁𑐖𑑂𑐖𑐸 𑐎𑐠𑑄 𑐎𑐩𑑂𑐥𑐣𑐷 𑐋𑐣 𑐀𑐣𑑂𑐟𑐬𑑂𑐐𑐟 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐧𑑂𑐰𑐣𑐾𑐎𑐸𑐠𑐶 𑐐𑐿𑐬𑐣𑐵𑐦𑐵𑐩𑐹𑐮𑐎 𑐖𑐸𑐂𑐩𑐦𑐂𑐐𑐸 𑐏𑑃𑐫𑐵𑐟 𑐢𑑂𑐰𑐵𑐠𑐸𑐂𑐎 𑐋𑐣𑐫𑑂 𑐣𑑂𑐴𑑂𑐫𑐠𑐣𑐾𑐟 𑐂𑐣𑐵𑐥 𑐫𑐵𑐣𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐕𑐵𑐟𑑂𑐬𑐰𑐺𑐟𑑂𑐟𑐶𑐫𑐵 𑐖𑑂𑐰𑑅𑐮𑐵𑑅𑐐𑐸 𑐴𑑂𑐰𑑅𑐟𑐵𑑅𑐥𑐵𑐏𑐾𑑄 𑐦𑐸𑐎𑑂𑐎𑑄 𑐟𑐐𑐶𑑄𑐩𑐫𑑂 𑐣𑐾𑐥𑐵𑐮𑐷 𑐩𑐳𑑂𑐟 𑐮𑐶𑐄𑐣𑐾 𑐩𑐮𑐵𑐫𑐾𑐩𑐵𑑅 𑐢𑐎𑐵𑑅 𑐣𑐶𑐖𑐷 𑐧𑑂𑐰𑐣𑐾𑐎𑐸𑐠𑐶𑐫𑐵𑐟 𑐀𑐣𑐶𑐫𑐩𑐶𑐟 𑐮𑑂𑐫𑐵𑑅𑐔𑐵𑑅 𑐎𑑂𑐰𑐧𑐶𑐎𑐾𑐟 𑐳𑑂𑐰𑑅𑐐𑐸 𑑑𑑕 𑐥𑑂𑐬𑐟𑐶𑐱𑐟 𑐥𑐹𑐰𑑄𑐎𑑄 𑐕𑐵𑐟𑑂𑐬𑐰𑐺𑐟𑑂𑐟𑐶𑐫𑐵 𑐰𑑂𑐫𑐰𑐳𑑂𑐠𑐵 𑐔𑐶𑐂𑐎𑐵𑑅 𑐣𑑂𑐫𑐵𑐫𑑀𑐔𑐶𑐟 𑐕𑐵𑐟𑑂𑐬𑐰𑐺𑐟𑑂𑐟𑐶𑐫𑐵 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾𑐟 𑐩𑐵𑐐 𑐫𑐵𑑅𑐐𑐸 𑐡𑐸 𑑋

𑐰𑐶𑐡𑑂𑐫𑐵𑐮𑐫 𑐱𑐶𑐎𑑂𑐲𑐵𑐫𑐵 𑐰𑐶𑐱𑑂𑐰–𑐥𑐬𑐶𑐰𑐾𑐱𑐫𑐵𑐟 𑐀𑐢𑑂𑐫𑐫𑐣 𑐫𑐵𑐫𑐾𑐧𑐮𑐫𑑂 𑐬𑐵𑐖𑑂𑐫𑐎𑑀𑐲𑐥𑐵𑐏𑐾𑑄 𑐳𑐘𑑂𑐔𑐵𑐮𑐣 𑐖𑐹𑐐𑐸 𑐧𑑂𑐰𑐣𑐾𑐎𑐸𑐠𑐶 𑐧𑐵𑐴𑐾𑐎𑑄𑐫𑐵 𑐩𑐾𑐩𑐾𑐐𑐸 𑐣𑐶𑐖𑐷 𑐧𑑂𑐰𑐣𑐾𑐎𑐸𑐠𑐶 𑐣𑐶𑑅𑐱𑐸𑐮𑑂𑐎 𑐖𑐸𑐂 𑐩𑐦𑐂𑐐𑐸 𑐫𑐠𑐵𑐬𑑂𑐠𑐟𑐵𑐫𑐵𑐟 𑐐𑐨𑑂𑐩𑐷𑐬𑐎𑐠𑑄 𑐳𑐩𑐷𑐎𑑂𑐲𑐵 𑐫𑐵𑐫𑐾𑐟 𑐂𑐣𑐵𑐥 𑐫𑐵𑑅𑐐𑐸 𑐡𑐸 𑑋 𑐣𑐾𑐱𑐣𑐮 𑐥𑑂𑐫𑐵𑐧𑑂𑐳𑐣𑑄 𑐱𑐶𑐎𑑂𑐲𑐵, 𑐣𑐷𑐟𑐶 𑐮𑐶𑐳𑐾𑑄 𑐎𑐵𑐣𑐸𑐣 𑐣𑐶𑐬𑑂𑐩𑐵𑐞𑐫𑑂 𑐣𑐶𑐖𑐷 𑐏𑑂𑐫𑑅𑐫𑐵 𑐧𑑂𑐰𑐟𑐶 𑐀𑐣𑐶𑐰𑐵𑐬𑑂𑐫 𑐰 𑐳𑐸𑐣𑐶𑐱𑑂𑐔𑐶𑐟 𑐫𑐵𑐫𑐾𑐟 𑐳𑐬𑑀𑐎𑐵𑐬𑐰𑐵𑐮𑐵𑐫𑐵 𑐢𑑂𑐫𑐵𑐣𑐵𑐎𑐬𑑂𑐲𑐞 𑐫𑐵𑑅𑐐𑐸 𑐡𑐸 𑑋

𑐣𑐾𑐱𑐣𑐮 𑐥𑑂𑐫𑐵𑐧𑑂𑐳𑐣𑐫𑐵 𑐎𑐠𑑄 𑐣𑐾𑐥𑐵𑐮𑐫𑑂 𑐧𑑂𑐰𑐣𑐾𑐎𑐸𑐠𑐶 𑐟𑐐𑐶𑑄𑐫𑐵 𑑓𑑔 𑐥𑑂𑐬𑐟𑐶𑐱𑐟 𑐧𑑂𑐰𑑅 𑐎𑑂𑐰𑐧𑐶𑐣𑐵𑐔𑑂𑐰𑑄𑐐𑐸 𑐣𑐶𑐖𑐷 𑐱𑐿𑐎𑑂𑐲𑐶𑐎 𑐳𑑄𑐳𑑂𑐠𑐵𑐫𑑂 𑐠𑑁𑑄𑐫𑐵 𑐡𑐶𑑄𑐣𑐫𑑂 𑐔𑑂𑐫𑐵𑐐𑐹 𑐀𑐬𑑂𑐧𑐳𑐶𑐧𑐾𑑄 𑐀𑐥𑑂𑐰𑑅 𑐮𑐐𑐵𑐣𑐷 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐣𑐶𑐐𑐹 𑐮𑐏𑐳𑐶𑐧𑐾𑑄 𑐀𑐥𑑂𑐰𑑅 𑐱𑐶𑐎𑑂𑐲𑐎–𑐎𑐬𑑂𑐩𑐔𑐵𑐬𑐷𑐂 𑑕𑑕 𑐥𑑂𑐬𑐟𑐶𑐱𑐟 𑐩𑐶𑐳𑐵𑐥𑐶𑑄𑐟 𑐮𑐖𑐐𑐵𑑅𑐫𑐵 𑐴𑑂𑐰𑑅𑐟𑐵𑑅 𑐔𑐸𑐮𑐵𑐎𑐵𑐧𑐶𑐫𑐵 𑐔𑑂𑐰𑑄𑐐𑐸 𑐰 𑐊𑐣𑐥𑑂𑐫𑐵𑐧𑑂𑐳𑐣𑐮𑐶𑐳𑐾𑑄 𑐳𑑂𑐰𑐵𑐣𑐵𑐔𑑂𑐰𑑄𑐐𑐸 𑐧𑑂𑐰𑐣𑐾𑐎𑐸𑐠𑐶𑐂 𑐠𑑂𑐫𑑄𑐩𑐠𑑂𑐫𑑄 𑑓𑑐𑐐𑐹 𑐮𑐏 𑐰𑐶𑐡𑑂𑐫𑐵𑐬𑑂𑐠𑐷𑐟 𑐧𑑂𑐰𑐣𑐵𑐔𑑂𑐰𑑄𑐐𑐸 𑐢𑐵𑑅𑐐𑐸 𑐡𑐸 𑑋