𑐣𑐾𑐰𑐵: 𑐀𑐣𑐮𑐵𑐂𑐣 𑐣𑑂𑐫𑐸𑐖 – 𑐣𑐶𑐱𑑂𑐔𑐮 | 𑑒𑑐𑑗𑑖 𑐱𑑂𑐬𑐵𑐰𑐞 𑑓𑑒, 𑐱𑐣𑐶𑐧𑐵𑐬 𑑑𑑑:𑑓𑑖:𑑐𑑒

𑐳𑐵𑐣𑐸𑐬𑐵𑐖𑐵 𑐱𑐵𑐎𑑂𑐫
𑑑𑑐𑑗𑑑 𑐡𑑃𑐫𑑂 𑐥𑑂𑐬𑐖𑐵𑐟𑐣𑑂𑐟𑑂𑐬 𑐰𑐫𑑂𑐢𑐸𑑄𑐎𑐵 𑐣𑐾𑐰𑐵𑑅 𑐰𑐶𑐡𑑂𑐫𑐵𑐬𑑂𑐠𑐷𑐟𑐳𑐾𑑄 𑐣𑐾𑐥𑐵𑐮𑐨𑐵𑐲𑐵 𑐣𑑄 𑐧𑑂𑐰𑐣𑐾 𑐡𑐫𑑂𑐩𑐵𑑅𑐐𑐸 𑐩𑐵𑐐𑐫𑐵𑐟 𑑋 𑑑𑑐𑑗𑑔 𑐡𑑃𑐫𑑂 𑐩𑐵𑐢𑑂𑐫𑐩𑐶𑐎 𑐟𑐐𑐶𑐣𑐫𑑂 𑐥𑐹𑐬𑑂𑐰𑐷𑐫 𑐨𑐵𑐲𑐵𑐎𑐠𑑄 𑐣𑐾𑐥𑐵𑐮𑐨𑐵𑐲𑐵 𑐣𑑄 𑐡𑐸𑐠𑑂𑐫𑐵𑐟 𑑋 𑐄𑐧𑐮𑐾 𑐳𑑂𑐰𑐣𑐶𑐐𑐮𑐫𑑂 𑐣𑐾𑐥𑐵𑐮𑐨𑐵𑐲𑐵 𑐮𑑀𑐎𑐥𑑂𑐬𑐶𑐫 𑐰𑐶𑐲𑐫 𑐖𑐹𑐐𑐸𑐮𑐶𑑄 𑐧𑑂𑐰𑐣𑐶𑐥𑐶𑑄 𑐫𑐎𑑂𑐰 𑐡𑐸 𑑋 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑐣𑐾𑐐𑐸 𑐧𑑂𑐫𑐰𑐳𑑂𑐠𑐵 𑐳𑑂𑐰𑐣𑐶𑐐𑐮𑑄 𑐥𑐶𑐣𑐾 𑐰𑐷𑐬𑐐𑐘𑑂𑐖𑐫𑐵 𑐬𑐵𑐲𑑂𑐚𑑂𑐬𑐶𑐫 𑐰𑐶𑐡𑑂𑐫𑐵𑐥𑐷𑐛𑑄 𑐣𑐾𑐥𑐵𑐮𑐨𑐵𑐲𑐵𑐫𑐵𑐟 𑐥𑑂𑐬𑐰𑐾𑐱𑐶𑐎𑐵𑑄𑐣𑐶𑐳𑐾𑑄 𑐰𑐶𑐡𑑂𑐫𑐵𑐮𑑄𑐎𑐵𑐬 𑐠𑑂𑐫𑑄𑐎 𑐕𑐐𑐹 𑐰𑐶𑐲𑐫 𑐧𑑂𑐰𑐣𑐾 𑐡𑐿𑐐𑐸𑐎𑐠𑑄 𑐩𑐵𑐣𑑂𑐫𑐟𑐵 𑐧𑐶𑐮 𑑋 𑐣𑐾𑐥𑐵𑐮 𑐬𑐵𑐲𑑂𑐚𑑂𑐬𑐶𑐫 𑐰𑐶𑐡𑑂𑐫𑐵𑐥𑐷𑐛𑐫𑑂 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐟 𑐩𑐵𑑅𑐐𑐸 𑐥𑐵𑐛𑑂𑐫𑐎𑑂𑐬𑐩𑐟 𑐣𑐾𑐥𑐵𑐮𑐨𑐵𑐲𑐵 𑐥𑐬𑐶𑐲𑐡𑑂𑑄 𑐡𑐫𑑂𑐎𑐵 𑐧𑐶𑐮 (𑐴𑐺𑐡𑐫; 𑑑𑑑𑑐𑑔𑑅𑑑𑑐) 𑑋
𑐥𑑄𑐔𑐵𑐫𑐟𑐷 𑐰𑑂𑐫𑐰𑐳𑑂𑐠𑐵 𑐰𑐫𑑂 𑐣𑑂𑐴𑑂𑐫𑑅 𑐥𑑂𑐬𑐖𑐵𑐟𑐵𑐣𑑂𑐟𑑂𑐬𑐶𑐎 𑐰𑑂𑐫𑐰𑐳𑑂𑐠𑐵𑐫𑐵 𑐕𑐐𑐹 𑐡𑐱𑐎 𑐡𑐸𑐣𑐾 𑐩𑐵𑐢𑑂𑐫𑐩𑐶𑐎 𑐟𑐐𑐶𑐣𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐀𑐢𑑂𑐫𑐵𑐥𑐣 𑐖𑐸𑐫𑐵𑑅 𑐀𑐣𑑄 𑐄𑐟𑑂𑐥𑐵𑐡𑐣 𑐖𑐹𑐥𑐶𑐣𑐶 𑐮𑐵𑐐𑐶 𑐄𑐔𑑂𑐔 𑐱𑐶𑐎𑑂𑐲𑐵𑐫𑐵 𑐁𑐂.𑐊. 𑐟𑐐𑐶𑐣𑐫𑑂 𑑑𑑐𑑘𑑐 𑐣𑐶𑐳𑐾𑑄 𑐧𑑂𑐰𑐣𑐾𑐐𑐸 𑐰𑑂𑐫𑐰𑐳𑑂𑐠𑐵 𑐖𑐸𑐮 𑑋 𑐥𑑄𑐔𑐵𑐫𑐟𑐷 𑐰𑑂𑐫𑐰𑐳𑑂𑐠𑐵 𑐰𑐫𑑂𑐢𑐸𑑄𑐎𑐵𑑅 𑐣𑐾𑐥𑐵𑐮𑐨𑐵𑐲𑐵𑐫𑐵 𑐱𑐿𑐎𑑂𑐲𑐶𑐎 𑐀𑐨𑐶𑐫𑐵𑐣𑐫𑑂 𑐥𑑄𑐐 𑐠𑐣𑐾𑐟 𑐳𑑂𑐰𑐮 𑑋 𑐣𑐾𑐥𑐵𑐮𑐨𑐵𑐲𑐵𑐫𑐵𑐟 𑐥𑑂𑐬𑐵𑐠𑐩𑐶𑐎𑐟𑐵 𑐩𑐡𑐂𑐐𑐸 𑐎𑐠𑑄 𑐣𑐾𑐥𑐵𑐮𑐨𑐵𑐲𑐵𑐫𑐵𑐟 𑐠𑐷 𑐠𑐷 𑐨𑐵𑐲𑐵 𑐥𑐸𑐔𑐮𑐫𑑂 𑐡𑐸𑐠𑑂𑐫𑐵𑐎𑐵𑐧𑐶𑐮 𑑋 𑐠𑑂𑐰 𑐏𑑃𑐫𑐵𑐟 𑐣𑐾𑐰𑐵𑑅𑐟𑐫𑑂𑐳𑑄 𑐳𑐸𑐢𑐵𑐬 𑐖𑐸𑐂𑐩𑐵𑑅𑐐𑐸 𑐩𑐵𑐐 𑐟𑐮 𑑋 𑐔𑑂𑐰𑐳𑐵𑐥𑐵𑐳𑐵𑐫𑐵 𑐰𑐿𑐎𑐞𑑂𑐛𑐥𑑂𑐬𑐳𑐵𑐡 𑐮𑐵𑐎𑑁𑐮, 𑐥𑑂𑐬𑐾𑐩𑐧𑐴𑐵𑐡𑐸𑐬 𑐎𑐳𑐵𑑅 𑐰 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷𑐥𑐶𑐳𑑄 𑑑𑑐𑑘𑑓 𑐡𑑃𑐫𑑂 𑐖𑐸𑐖𑐸 𑐩𑐴𑐾𑐣𑑂𑐡𑑂𑐬𑐫𑐵𑐟 𑐧𑐶𑐄𑐐𑐸 𑐳𑑂𑐩𑐺𑐟𑐶𑐥𑐟𑑂𑐬𑐫𑑂 𑐊𑐳.𑐊𑐮.𑐳𑐷 𑐳𑑄𑐳𑑂𑐎𑐺𑐟𑐫𑐵𑐟 𑐀𑐣𑐶𑐰𑐵𑐬𑑂𑐫 𑐫𑐵𑐟 𑐟𑐬 𑐣𑐾𑐥𑐵𑐮𑐨𑐵𑐲𑐵𑐫𑐵𑐟 𑐩𑐾𑐩𑐾𑐐𑐸 𑐨𑐵𑐲𑐵 𑐥𑐸𑐔𑐮𑐫𑑂 𑐟𑐫𑐵𑑅 𑐣𑐾𑐥𑐵𑐮𑐨𑐵𑐲𑐵 𑐥𑐵𑐛𑑂𑐫𑐎𑑂𑐬𑐩𑐫𑑂 𑐡𑐸𑐠𑑂𑐫𑐵𑐎𑐾𑐐𑐸 𑐟𑐬 𑐳𑐸𑐣𑐵𑑄 𑐣𑑄 𑐩𑐧𑑂𑐰𑐣𑐷𑐐𑐸 𑐎𑐠𑑄 𑐰𑑂𑐫𑐰𑐳𑑂𑐠𑐵𑐫𑐵𑐟 𑐠𑐸𑐎𑐶 𑐳𑑄𑐱𑑀𑐢𑐣 𑐖𑐸𑐂𑐩𑐵𑑅 𑐢𑐿𑐐𑐸 𑐏𑑃 𑐡𑐸 (𑐧𑐖𑑂𑐬𑐵𑐔𑐵𑐬𑑂𑐫; 𑑑𑑑𑑐𑑙𑑅𑑑𑑑𑑒) 𑑋
𑑑𑑐𑑙𑑑 𑐡𑑃𑐣𑐶𑐳𑐾𑑄 𑐱𑐸𑐬𑐸𑐖𑐹𑐐𑐸 𑐬𑐵𑐲𑑂𑐚𑑂𑐬𑐶𑐫 𑐱𑐶𑐎𑑂𑐲𑐵 𑐫𑑀𑐖𑐣𑐵𑐫𑐵 𑐣𑑂𑐴𑐹𑐐𑐸 𑐥𑐡𑑂𑐢𑐟𑐶 𑐕𑑂𑐫𑐮𑐵𑑅 𑐩𑐵𑐢𑑂𑐫𑐩𑐶𑐎 𑐰𑐶𑐡𑑂𑐫𑐵𑐮𑐫𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵𑐟 𑐮𑐶𑐎𑐫𑐵 𑐀𑑄𑐐𑑂𑐬𑐾𑐖𑐷, 𑐦𑑂𑐬𑐾𑐣𑑂𑐔, 𑐖𑐬𑑂𑐩𑐣, 𑐖𑐵𑐥𑐵𑐣𑐷 𑐮𑐐𑐵𑐫𑐟 𑐳𑑂𑐰𑐡𑐾𑐱𑐷 𑐰 𑐰𑐶𑐡𑐾𑐱𑐷 𑑑𑑗 𑐐𑐹 𑐨𑐵𑐲𑐵 𑐥𑐸𑐔𑐮𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵𑐟 𑐡𑐸𑐠𑑂𑐫𑐵𑐎𑐵𑐧𑐶𑐮 𑑋 𑐠𑑂𑐰 𑑑𑑗 𑐐𑐹 𑐨𑐵𑐲𑐵 𑐰 𑐩𑐾𑐩𑐾𑐐𑐸 𑑗 𑐐𑐹 𑐧𑐶𑐲𑐫 (𑐨𑑁𑐟𑐶𑐎𑐱𑐵𑐳𑑂𑐟𑑂𑐬, 𑐬𑐳𑐵𑐫𑐣𑐱𑐵𑐳𑑂𑐟𑑂𑐬, 𑐖𑐷𑐰𑐱𑐵𑐳𑑂𑐟𑑂𑐬, 𑐩𑐵𑐣𑐰 𑐱𑐬𑐷𑐬 𑐱𑐵𑐳𑑂𑐟𑑂𑐬, 𑐀𑐟𑐶𑐬𑐶𑐎𑑂𑐟 𑐐𑐞𑐶𑐟, 𑐐𑑂𑐬𑐵𑐩𑐶𑐞 𑐀𑐬𑑂𑐠𑐱𑐵𑐳𑑂𑐟𑑂𑐬 𑐰 𑐐𑐵𑐬𑑂𑐴𑐳𑑂𑐠 𑐰𑐶𑐖𑑂𑐘𑐵𑐣) 𑐣𑐵𑐥𑑄 𑐫𑐵𑐣𑐵𑑅 𑑒𑑔 𑐐𑐹 𑐰𑐶𑐲𑐫𑐫𑐵 𑐰𑐶𑐎𑐮𑑂𑐥𑐫𑑂 𑐕𑐐𑐹 𑐧𑑂𑐰𑐣𑐾𑐐𑐸 𑐫𑐵𑐣𑐵𑑅 𑐟𑐫𑐵𑐧𑐶𑐮 (𑐱𑐶𑐎𑑂𑐲𑐵 𑐩𑐣𑑂𑐟𑑂𑐬𑐵𑐮𑐫; 𑑑𑑐𑑙𑑒𑑅𑑑𑑐) 𑑋 𑐮𑐶𑐥𑐵 𑐠𑐸𑐎𑐶𑐣𑑄 𑐳𑑄𑐱𑑀𑐢𑐣 𑐫𑐵𑐣𑐵𑑅 𑐣𑐾𑐥𑐵𑐮𑐨𑐵𑐲𑐵𑐫𑐵𑐟 𑐢𑑂𑐫𑐵𑐎𑐸𑐣𑐾 𑐕𑑂𑐰𑐫𑐵𑐧𑐶𑐮 𑑋
𑐀𑐨𑐶𑐰𑐵𑐰𑐎𑑄 𑐠𑑅 𑐩𑐳𑑂𑐟𑐫𑑂 𑐮𑐵𑐐𑐶 𑐰𑐶𑐲𑐫 𑐮𑑂𑐫𑐫𑐧𑐮𑐫𑑂 𑐁𑐬𑑂𑐠𑐶𑐎 𑐡𑐺𑐲𑑂𑐚𑐶𑑄 𑐨𑐰𑐶𑐲𑑂𑐫𑐫𑐵 𑐧𑐶𑐔𑐵𑑅 𑐫𑐵𑐣𑐵𑑅 𑐖𑐎 𑐮𑑂𑐫𑐂 𑑋 𑐰𑐶𑐡𑑂𑐫𑐵𑐮𑐫𑑄 𑐋𑐔𑑂𑐕𑐶𑐎𑐫𑑂 𑐣𑑂𑐴𑑂𑐫𑐠𑐣𑐵𑑅 𑐟𑐎𑑂𑐰 𑐦𑐸𑐎𑑂𑐎 𑐰𑐶𑐲𑐫 𑐟𑐫𑑂 𑐩𑐦𑐂𑐐𑐸𑐮𑐶𑑄 𑐠𑐵𑐫𑑂 𑐳𑑂𑐰𑐫𑐵𑑅 𑐀𑐥𑑂𑐰𑑅 𑐧𑑂𑐰𑑄 𑐡𑐿𑐐𑐸 𑐰 𑐰𑐶𑐲𑐫 𑐱𑐶𑐎𑑂𑐲𑐎 𑐣𑑄 𑐳𑐸𑐮𑐨 𑐖𑐹𑐐𑐸 𑐧𑐶𑐔𑐵𑑅 𑐫𑐵𑐣𑐵𑑅 𑐖𑐎 𑐟𑐂 𑑋 𑐬𑐵𑐲𑑂𑐚𑑂𑐬𑐶𑐫 𑐱𑐶𑐎𑑂𑐲𑐵 𑐫𑑀𑐖𑐣𑐵𑐫𑐵 𑐣𑑂𑐴𑐹𑐐𑐸 𑐥𑐡𑑂𑐢𑐟𑐶 𑑑𑑐𑑙𑑑 𑐣𑐶𑐳𑐾𑑄 𑐕𑑂𑐫𑐮𑐾𑐰𑑄 𑐟𑐬𑐵𑐂𑐮𑐫𑑂 𑐩𑐿𑐠𑐶𑐮𑐷 𑐰 𑐳𑑂𑐰𑐣𑐶𑐐𑐮𑐫𑑂 𑐣𑐾𑐥𑐵𑐮𑐨𑐵𑐲𑐵 𑐎𑐫𑐵𑑅 𑐧𑑂𑐰𑐣𑐷𑐥𑐶𑑄 𑐳𑐷𑐡𑐫𑑂𑐎 𑐥𑐵𑑅 𑐖𑐸𑐮, 𑐧𑑂𑐰𑑄 𑐩𑐡𑐳𑐾𑑄𑐮𑐶 𑐳𑑂𑐎𑐹𑐮 𑐳𑑂𑐎𑐹𑐮𑑄 𑐣𑐾𑐥𑐵𑐮𑐨𑐵𑐲𑐵 𑐨𑐚𑐵𑐨𑐚 𑐮𑐶𑐎𑐫𑐵𑑅 𑐴𑐮 𑑋 𑐣𑐾𑐥𑐵𑑅𑐫𑐵 𑐬𑐵𑐲𑑂𑐚𑑂𑐬 𑐨𑐵𑐲𑐵 𑐧𑐵𑐴𑐾𑐎 𑐩𑐾𑐐𑐸 𑐡𑐎𑑂𑐰 𑐨𑐵𑐫𑑂 𑐳𑑂𑐫𑐵𑐣𑐵𑑅 𑐕𑑂𑐰𑐫𑑂𑐩𑐵𑑅 𑐢𑐵𑐂𑐥𑐶𑐣𑐶 𑐩𑐣𑑄𑐟𑐸𑑄𑐠𑐾𑑄 𑐖𑐵𑑅𑐐𑐸 𑐳𑑂𑐠𑐶𑐟𑐶 𑐣𑑂𑐴𑑂𑐫𑐵𑑄𑐰𑐮 𑑋
𑑑𑑑𑑑𑑓 𑐡𑑃𑐫𑑂 𑐬𑐵𑐖𑐨𑐵𑐂 𑐖𑐎𑑅𑐩𑐶𑐥𑐶𑐳𑑄 𑐱𑑂𑐬𑐷 𑑕 𑐫𑐵 𑐳𑐬𑐎𑐵𑐬, 𑐖𑐶𑐮𑑂𑐮𑐵 𑐱𑐶𑐎𑑂𑐲𑐵 𑐣𑐶𑐬𑐶𑐎𑑂𑐲𑐎𑐫𑐵 𑐖𑑂𑐫𑐵𑐎𑐸𑐠𑐷 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐩𑐵𑐟𑐺𑐨𑐵𑐲𑐵𑑄 (𑐣𑐾𑐥𑐵𑐮𑐨𑐵𑐲𑐵) 𑐧𑑂𑐰𑑄𑐎𑐷𑐐𑐸 ‘𑐖𑐐𑐟𑐳𑐸𑐣𑑂𑐡𑐬 𑐧𑑂𑐰𑐣𑐾𑐎𑐸𑐠𑐶 𑐥𑐹𑐬𑑂𑐰 𑐥𑑂𑐬𑐵𑐠𑐩𑐶𑐎 𑐰𑐶𑐡𑑂𑐫𑐵𑐮𑐫’ 𑐡𑐬𑑂𑐟𑐵 𑐫𑐵𑐟 𑑋 𑐠𑑁𑐎𑐣𑑂𑐴𑐾 𑐠𑑂𑐰 𑐰𑐶𑐡𑑂𑐫𑐵𑐮𑐫 𑐩𑐵𑐢𑑂𑐫𑐩𑐶𑐎 𑐎𑐎𑑂𑐲𑐵 𑐟𑐎 𑐳𑑄𑐔𑐵𑐮𑐣 𑐖𑐸𑐫𑐵 𑐊𑐳.𑐊𑐮.𑐳𑐶.𑐫𑐵 𑐥𑐬𑐶𑐎𑑂𑐲𑐵 𑐣𑐶𑐫𑐩𑐶𑐟 𑐧𑐶𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐣𑐾𑐥𑐵𑐮𑐨𑐵𑐲𑐵𑐫𑐵 𑐩𑐵𑐢𑑂𑐫𑐩𑑄 𑐧𑑂𑐰𑑄𑐎𑐷𑐐𑐸 𑐰𑐶𑐡𑑂𑐫𑐵𑐮𑐫 𑐖𑐐𑐟𑐳𑐸𑐣𑑂𑐡𑐬 𑐧𑑂𑐰𑐣𑐾𑐎𑐸𑐠𑐶 𑐣𑐾𑐰𑐵𑑅 𑐁𑐣𑑂𑐡𑑀𑐮𑐣𑐎𑐬𑑂𑐩𑐶𑐟𑐳𑐾𑑄 𑐴𑐾 𑐔𑐵𑐫𑑂𑐎𑐹𑐐𑐸 𑐏𑑅 𑑋 𑐄𑐎𑐶𑑄 𑐣𑐾𑐰𑐵𑑅 𑐁𑐣𑑂𑐡𑑀𑐮𑐣𑑄 𑐧𑐸𑐂𑐎𑐹𑐐𑐸 𑐳𑑂𑐎𑐹𑐮 𑐏𑑅 𑐖𑐐𑐟𑐳𑐸𑐣𑑂𑐡𑐬 𑐧𑑂𑐰𑐣𑐾𑐎𑐸𑐠𑐶 𑑋
(𑐔𑑂𑐰𑐩𑐶 𑐱𑐵𑐎𑑂𑐫𑑄 𑐣𑐾𑐥𑐵𑐮 𑐨𑐵𑐲𑐵 𑐁𑐣𑑂𑐡𑑀𑐮𑐣 𑑑𑑑𑑑𑑐 𑐣𑐶𑐳𑐾𑑄 𑑑𑑑𑑒𑑖 𑐟𑐎 𑐫𑐵𑐟 𑐎𑐫𑐵𑑅 𑐔𑑂𑐰𑐫𑐵𑐡𑐶𑐐𑐸 𑐱𑑀𑐢 – 𑐥𑑂𑐬𑐰𑐣𑑂𑐢 𑐥𑐵𑐏𑐾𑑄 𑐳𑐵𑐨𑐵𑐬)