𑐣𑐾𑐰𑐵: 𑐀𑐣𑐮𑐵𑐂𑐣 𑐣𑑂𑐫𑐸𑐖 – 𑐮𑐮𑐾𑐣𑑂𑐡𑑂𑐬 𑐱𑐵𑐎𑑂𑐫 | 𑑒𑑐𑑗𑑕 𑐔𑐿𑐟𑑂𑐬 𑑑𑑓, 𑐧𑐸𑐢𑐧𑐵𑐬 𑑑𑑓:𑑕𑑔:𑑑𑑓

𑐣𑐾𑐥𑐵𑐮 𑐮𑐶𑐥𑐶 𑐐𑐸𑐠𑐶𑐫𑐵 𑐤𑐹𑐐𑐸 𑐥𑐶𑐠𑐣𑐵 𑐣𑐾𑐥𑐵𑑅𑐫𑐵 𑐐𑑁𑐬𑐰 𑐰 𑐥𑐴𑐶𑐔𑐵𑐣𑐫𑐵 𑐔𑐶𑑄 ‘𑐬𑑄𑐖𑐣𑐵 𑐮𑐶𑐥𑐶 𑐰𑐬𑑂‍𑐞𑐩𑐵𑐮𑐵’ 𑐳𑐦𑐹 𑐁𑑅 𑐳𑑂𑐰𑐣𑐶𑐐𑑅𑐣𑑂𑐫𑑄𑐎𑑄 𑐧𑐖𑐵𑐬𑐫𑑂 𑐰𑑅𑐐𑐸 𑐡𑐸 𑑋

𑐣𑐾𑐥𑐵𑐮 𑐮𑐶𑐥𑐶𑑄 𑐐𑐸𑐠𑐶𑑄 𑐕𑐸𑑄 𑐡𑐶𑑄 𑐤𑑂𑐫𑑅 𑐖𑐎 𑐫𑐾𑑃𑐫𑐵 𑐣𑐾𑐥𑐵𑑅 𑐧𑑂𑐫𑐵𑑄𑐎𑑂𑐰𑐾𑐚𑐫𑑂 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐠𑐸𑐐𑐸 ‘𑐬𑑄𑐖𑐣𑐵 𑐮𑐶𑐥𑐶 𑐰𑐬𑑂‍𑐞𑐩𑐵𑐮𑐵’ 𑐳𑐦𑐹 𑐳𑐵𑐬𑑂‍𑐰𑐖𑐣𑐶𑐎 𑐫𑐵𑑅𑐐𑐸 𑐏𑑅 𑑋

𑐁𑑅 𑐠𑐸𑐐𑐸 𑐳𑐦𑐹 𑐳𑑂𑐰𑐣𑐶𑐐𑑅𑐫𑐵 𑐫𑐾𑑃, 𑐠𑐶𑐩𑐶, 𑐏𑑂𑐰𑐥 𑐰 𑐤𑐹𑐐𑐸 𑐠𑐶𑐩𑐶𑐂 𑐣𑑂𑐫𑐵𑐫𑐾𑐡𑐂𑐐𑐸 𑐖𑐹𑐐𑐸 𑐡𑐸 𑑋

𑐣𑐾𑐥𑐵𑐮 𑐮𑐶𑐥𑐶 𑐐𑐸𑐠𑐶𑑄 𑐖𑐵𑐣𑐎𑐵𑐬𑐷 𑐧𑑂𑐫𑐹 𑐎𑐠𑑄 𑐫𑐾𑑃𑐫𑐵 𑐣𑐶𑐟𑐶𑑄 𑐬𑐎𑑂𑐟𑐎𑐵𑐮𑐷𑐂 𑐔𑑂𑐰𑑄𑐐𑐸 𑐩𑑄𑐎𑐵𑑅 𑐳𑐦𑐹 𑐢𑐸𑐎𑐹 𑐰 𑐨𑑀𑐟𑐵𑐴𑐶𑐟𑐶 𑐡𑐐𑐸𑐧𑐴𑐵𑐮𑐫𑑂 𑐔𑑂𑐰𑑄𑐐𑐸 𑐣𑐵𑐟𑐶𑐧𑐖𑑂𑐬𑐫𑐵 𑐳𑐦𑐹 𑐢𑐸𑐎𑐸𑐟𑐷 𑐠𑐸𑐐𑐸 𑐳𑐦𑐹 𑐩𑐶𑐂𑐐𑐸 𑐣𑐶𑐟𑐶𑑄 𑐟𑐫𑐵𑐟𑑅𑐐𑐸 𑐡𑐸 𑑋

𑐀𑐠𑐾𑐴𑐾, 𑐠𑐶𑐩𑐶𑐂 𑐧𑐴𑐵𑐏𑐵 𑐧𑐖𑐵𑐬𑐫𑑂 𑐔𑑂𑐰𑑄𑐐𑐸 𑐧𑐶𑐎𑑂𑐎𑐷 𑐧𑐖𑑂𑐬𑐵𑐔𑐵𑐬𑑂‍𑐫𑐫𑐵 𑐧𑐶𑐎𑑂𑐎𑐷 𑐁𑐬𑑂‍𑐚 (𑐳𑑂𑐚𑐶𑐎𑐬 𑐳𑐥)𑐫𑑂 𑐠𑐸𑐐𑐸 𑐳𑐦𑐹 𑐩𑐶𑐂𑐐𑐸 𑐣𑐶𑐟𑐶𑑄 𑐟𑐫𑐵𑐟𑑅𑐐𑐸 𑐡𑐸𑐳𑐵 𑐤𑐹𑐐𑐸 𑐠𑐶𑐩𑐶𑐂 𑐱𑑄𑐏𑐢𑐬 𑐔𑑀𑐎 𑐤𑐹𑐐𑐸 𑐮𑑃𑐫𑑂 𑐔𑑂𑐰𑑄𑐐𑐸 𑐧𑐵𑐧𑐸𑐎𑐵𑐖𑐷 𑐳𑐵𑐕𑐾𑑃 𑐥𑐮𑑂𑐥𑐳𑐵 𑐥𑑂𑐬𑐶𑐣𑑂𑐚𑐶𑐒 𑐥𑑂𑐬𑐾𑐳𑐫𑑂 𑐣𑑄 𑐠𑐸𑐐𑐸 𑐳𑐦𑐹 𑐩𑐶𑐂𑐐𑐸 𑐣𑐶𑐟𑐶𑑄 𑐟𑐫𑐵𑐟𑑅𑐐𑐸 𑐡𑐸 𑑋

‘𑐬𑑄𑐖𑐣𑐵 𑐮𑐶𑐥𑐶 𑐰𑐬𑑂‍𑐞𑐩𑐵𑐮𑐵’ 𑐳𑐦𑐹 𑐩𑐶𑐂𑐐𑐸 𑐣𑐶𑐟𑐶𑑄 𑐏𑑂𑐰𑐥𑐫𑑂 𑐬𑐵𑐩 𑐩𑐣𑑂𑐡𑐶𑐬 𑐨𑐸𑐮𑐵𑑄𑐔𑐵𑐫𑑂 𑐰𑐶𑐩𑐮 𑐟𑐵𑐩𑑂𑐬𑐵𑐎𑐵𑐬𑐫𑐵 𑐎𑐸𑐟𑑅 𑐥𑐶𑐎𑐵𑐎𑑅 𑐡𑐸𑐣𑐾 𑐟𑐫𑐵𑐟𑑅𑐐𑐸 𑐡𑐸 𑑋

𑐣𑐶𑐳𑐟𑑂𑐫𑐵𑑅 (𑑒𑑕𑑐–) 𑐟𑐎𑐵 𑐡𑐵𑑄 𑐖𑐎 𑐟𑐹𑐐𑐸 𑐠𑐸𑐐𑐸 𑐳𑐦𑐹 𑐣𑐾𑐥𑐵𑐮 𑐮𑐶𑐥𑐶 𑐐𑐸𑐠𑐶𑐂 𑐣𑑄 𑐩𑐶𑐂𑐐𑐸 𑐣𑐶𑐟𑐶𑑄 𑐟𑐫𑐵𑐟𑑅𑐐𑐸 𑐡𑐸𑐳𑐵 𑐣𑐵𑑄𑐖𑐵𑑅𑐪 𑐩𑑂𑐫𑐾𑐴𑐵𑐮𑐵𑐩𑐶𑐮𑐶𑐳𑐾𑑄 𑐐𑐸𑐠𑐶𑐫𑐵 𑐕𑑂𑐫𑐵𑐘𑑂𑐖𑐾 𑐥𑐰𑐶𑐟𑑂𑐬 𑐎𑐳𑐵𑑅𑐫𑐵 𑐥𑐳𑑅 𑐫𑐾𑑃𑐫𑐵 𑐎𑐾𑐮𑐟𑑂𑐰𑐵𑑅 𑐖𑐣𑐧𑐴𑐵𑑅 𑐥𑐶𑐣𑐾 𑐣𑐾𑐥𑐵𑐮𑐷 𑐎𑐵𑐥𑑅 𑐥𑐳𑐮𑐫𑑂 𑐩𑐶𑐂𑐐𑐸 𑐣𑐶𑐟𑐶𑑄 𑐟𑐫𑐵𑐟𑑅𑐐𑐸 𑐡𑐸 𑑋

𑐬𑑄𑐖𑐣𑐵 𑐮𑐶𑐥𑐶 𑐣𑐾𑐥𑐵𑑅𑐫𑐵 𑐩𑑁𑐮𑐶𑐎 𑐎𑐮𑐵𑐟𑑂𑐩𑐎 𑐮𑐶𑐥𑐶 𑐏𑑅𑐳𑐵 𑐠𑐸𑐐𑐸 𑐮𑐶𑐥𑐶 𑐳𑑄𑐳𑐵𑐬𑐫𑐵 𑐡𑐎𑐮𑐾 𑐧𑐵𑑄𑐮𑐵𑑅𑐐𑐸 𑐮𑐶𑐥𑐶𑐩𑐢𑑂𑐫𑐾 𑐡𑐸𑐠𑑂𑐫𑐵𑐣𑐵𑐔𑑂𑐰𑑄𑐐𑐸 𑐕𑐐𑐹 𑐮𑐶𑐥𑐶 𑐏𑑅 𑑋 𑐀𑐠𑐾𑐴𑐾, 𑐠𑐸𑐐𑐸 𑐴𑐾 𑐬𑑄𑐖𑐣𑐵 𑐮𑐶𑐥𑐶𑑄 𑐳𑑄𑐫𑐸𑐎𑑂𑐟 𑐬𑐵𑐲𑑂𑐚𑑂𑐬 𑐳𑑄𑐑𑐫𑑂 ‘𑐣𑐾𑐥𑐵𑐮’ 𑐢𑐎𑐵𑑅 𑐡𑐬𑑂‍𑐟𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋