𑐬𑐵𑐲𑑂𑐚𑑂𑐬𑐥𑐟𑐶𑐫𑐵𑐟 𑐨𑐵𑐲𑐵 𑐁𑐫𑑀𑐐𑐫𑐵 𑐥𑑂𑐬𑐟𑐶𑐰𑐾𑐡𑐣

𑐨𑐵𑐲𑐵 𑐁𑐫𑑀𑐐𑑄 𑐠𑑅𑐥𑐶𑐣𑐶 𑐁𑐬𑑂𑐠𑐶𑐎 𑐰𑐬𑑂𑐲 𑑒𑑐𑑘𑑑/𑑐𑑘𑑒 𑐫𑐵 𑐥𑑂𑐬𑐟𑐶𑐰𑐾𑐡𑐣 𑐩𑑂𑐴𑐷𑐐 𑐬𑐵𑐲𑑂𑐚𑑂𑐬𑐥𑐟𑐶 𑐬𑐵𑐩𑐔𑐣𑑂𑐡𑑂𑐬 𑐥𑑁𑐜𑐾𑐮𑐫𑐵𑐟 𑐮𑑅𑐮𑑂𑐴𑐵𑐟 𑑋 𑐁𑐫𑑀𑐐𑑄 𑐡𑑃𑐫𑑂‌𑐡𑐳𑑄 𑐠𑑅𑐥𑐶𑐣𑐶 𑐥𑑂𑐬𑐟𑐶𑐰𑐾𑐡𑐣 𑐟𑐫𑐵𑐬 𑐫𑐵𑐣𑐵𑑅 𑐬𑐵𑐲𑑂𑐚𑑂𑐬𑐥𑑂𑐬𑐩𑐸𑐏𑐫𑐵 𑐮𑑂𑐫𑐵𑐏𑑄 𑐬𑐵𑐲𑑂𑐚𑑂𑐬𑐥𑐟𑐶𑐫𑐵𑐟 𑐮𑑅𑐮𑑂𑐴𑐵𑐫𑐾𑐩𑐵𑑅 𑑋

𑐨𑐵𑐲𑐵 𑐁𑐫𑑀𑐐𑐫𑐵 𑐀𑐢𑑂𑐫𑐎𑑂𑐲 𑐜𑐵. 𑐐𑑀𑐥𑐵𑐮 𑐛𑐵𑐎𑐸𑐬𑑄 𑐩𑑂𑐴𑐷𑐐 𑐱𑐶𑐟𑐮 𑐣𑐶𑐰𑐵𑐳 𑐰𑐣𑐵𑑅 𑐬𑐵𑐲𑑂𑐚𑑂𑐬𑐥𑐟𑐶 𑐥𑑁𑐜𑐾𑐮𑐫𑐵𑐟 𑐄𑐐𑐸 𑐥𑑂𑐬𑐟𑐶𑐰𑐾𑐡𑐣 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑐥𑑂𑐬𑐟𑐶𑐰𑐾𑐡𑐣 𑐮𑑅𑐮𑑂𑐴𑐵𑐣𑐵 𑐎𑐵𑐫𑐾𑐐𑐸 𑐗𑑂𑐰𑐮𑐫𑑂 𑐬𑐵𑐲𑑂𑐚𑑂𑐬𑐥𑐟𑐶 𑐥𑑁𑐜𑐾𑐮𑑄 𑐠𑑅𑐐𑐸 𑐖𑐶𑐮𑑂𑐮𑐵 𑐟𑐣𑐴𑐸𑑃𑐮𑐫𑑂 𑐡𑐾𑐫𑑂𑐫𑐵 𑐠𑐷𑐠𑐷 𑐨𑐵𑐲𑐵𑐫𑐵 𑐁𑐡𑐶𑐎𑐰𑐶 𑐥𑐶𑐣𑐶𑐐𑐸 𑐳𑐵𑐮𑐶𑐎 𑐡𑐫𑐾𑐎𑐵𑑅 𑐟𑐫𑐾𑐐𑐸 𑐫𑑀𑐖𑐣𑐵 𑐎𑐠𑑄 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐢𑐵𑐳𑐾𑑄 𑐳𑐵𑐮𑐶𑐎 𑐡𑐫𑐾𑐎𑐾𑐐𑐸 𑐣𑐶𑑄𑐟𑐶𑑄 𑐨𑐵𑐲𑐵 𑐁𑐫𑑀𑐐𑑄 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐩𑐵𑑅𑐐𑐸 𑐢𑐵𑐳𑐾𑑄 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐟 𑐂𑐣𑐵𑐥 𑐫𑐵𑐣𑐵𑐡𑐷𑐐𑐸 𑐡𑐸 𑑋 𑐄𑐐𑐸 𑐂𑐮𑐫𑑂 𑐨𑐵𑐲𑐵 𑐁𑐫𑑀𑐐𑐫𑐵 𑐡𑐸𑐖𑑅𑐥𑐶𑑄, 𑐎𑐬𑑂𑐩𑐔𑐵𑐬𑐷 𑐮𑐶𑐳𑐾𑑄 𑐬𑐵𑐲𑑂𑐚𑑂𑐬𑐥𑐟𑐶 𑐎𑐵𑐬𑑂𑐫𑐵𑐮𑐫𑐫𑐵 𑐄𑐔𑑂𑐔𑐥𑐡𑐳𑑂𑐠 𑐎𑐬𑑂𑐩𑐔𑐵𑐬𑐷𑐟𑐫𑑂‌𑐐𑐸 𑐄𑐥𑐳𑑂𑐠𑐶𑐟𑐶 𑐡𑐸𑐐𑐸 𑐏𑑅 𑑋

𑐨𑐵𑐲𑐵 𑐁𑐫𑑀𑐐𑑄 𑐫𑐵𑑅𑐐𑐸 𑐳𑐶𑐦𑐵𑐬𑐶𑐳𑐫𑐵 𑐮𑐶𑐢𑑄𑐳𑐵𑐫𑑂 𑐧𑐵𑐐𑐩𑐟𑐶 𑐥𑑂𑐬𑐡𑐾𑐱𑑄 𑐣𑐾𑐥𑐵𑐮𑐨𑐵𑐲𑐵 𑐰 𑐟𑐵𑐩𑐵𑐒 𑐨𑐵𑐲𑐵 𑐀𑐮𑐾 𑐐𑐞𑑂𑐜𑐎𑐷 𑐥𑑂𑐬𑐡𑐾𑐱𑑄 𑐐𑐸𑐬𑐸𑐒 𑐰 𑐩𑐐𑑅 𑐨𑐵𑐫𑑂𑐫𑐵𑐟 𑐳𑐬𑐎𑐵𑐬𑐷 𑐖𑑂𑐫𑐵𑐏𑑃𑐫𑐵 𑐨𑐵𑐲𑐵 𑐡𑐫𑐾𑐎𑐾𑐐𑐸 𑐎𑐠𑑄 𑐎𑐵𑐣𑐸𑐣 𑐥𑐵𑐬𑐶𑐟 𑐫𑐵𑐣𑐵𑑅 𑐮𑐵𑐐𑐹 𑐫𑐵𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐁𑑅 𑑑 𑐣𑐩𑑂𑐧𑐬 (𑐎𑑀𑐱𑐷) 𑐥𑑂𑐬𑐡𑐾𑐱𑐫𑑂 𑐣𑑄 𑐮𑐶𑐩𑑂𑐧𑐸 𑐰 𑐩𑐿𑐠𑐶𑐮𑐷 𑐨𑐵𑐫𑑂𑐫𑐵𑐟 𑐳𑐬𑐎𑐵𑐬𑐷 𑐖𑑂𑐫𑐵𑐏𑑃𑐫𑐵 𑐨𑐵𑐲𑐵 𑐡𑐫𑐾𑐎𑐾𑐐𑐸 𑐎𑐠𑑄 𑐥𑑂𑐬𑐡𑐾𑐱𑐳𑐨𑐵𑐫𑑂 𑐰𑐶𑐢𑐾𑐫𑐎 𑐥𑐾𑐱 𑐖𑐸𑐂𑐢𑐸𑑄𑐎𑐹𑐐𑐸 𑐡𑐸𑐳𑐵 𑐄𑐎𑐶𑐫𑐵𑐟 𑐎𑐫𑐵𑑅 𑐁𑑅 𑐕𑐮𑐦𑐮 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

‘𑐎𑑀𑐱𑐷’ 𑐥𑑂𑐬𑐡𑐾𑐱𑐫𑑂 𑐮𑐶𑐩𑑂𑐧𑐸 𑐰 𑐩𑐿𑐠𑐶𑐮𑐷 𑐣𑐶𑐐𑐹 𑐨𑐵𑐫𑑂𑐫𑐵𑐟 𑐳𑐬𑐎𑐵𑐬𑐷 𑐖𑑂𑐫𑐵𑐏𑑃𑐫𑐵 𑐨𑐵𑐲𑐵 𑐡𑐫𑐾𑐎𑐾𑐐𑐸 𑐰𑐶𑐢𑐾𑐫𑐎 𑐰𑑅𑐐𑐸 𑐏𑑅𑐳𑐵𑑄 𑐀𑐣 𑐬𑐵𑐃 𑐳𑐩𑐸𑐡𑐵𑐫𑐫𑐵 𑐔𑐵𑐩𑐮𑐶𑐒 𑐰 𑐧𑐵𑐣𑑂𑐟𑐰𑐵 𑐮𑐶𑐳𑐾𑑄 𑐠𑐵𑐬𑐸 𑐨𑐵𑐫𑑂𑐫𑐵𑐟 𑐣𑑄 𑐳𑐬𑐎𑐵𑐬𑐷 𑐖𑑂𑐫𑐵𑐏𑑃𑐫𑐵 𑐨𑐵𑐲𑐵 𑐡𑐫𑐾𑐎𑐾𑐩𑐵𑑅 𑐢𑐎𑐵𑑅 𑐳𑑄𑐱𑑀𑐢𑐣 𑐥𑑂𑐬𑐳𑑂𑐟𑐵𑐰 𑐡𑐬𑑂𑐟𑐵 𑐖𑐹𑐐𑐸 𑐡𑐸 𑑋