𑐔𑑂𑐰𑐩𑐶 𑐨𑐰𑐵𑐣𑐷 𑐟𑐸𑐮𑐵𑐢𑐬

𑐠𑐶𑑄𑐮𑐵𑐠𑑂𑐰 𑐔𑐟𑐸𑐬𑑂𑐡𑐱𑐷

𑐣𑐾𑐰𑐵𑑅𑐟𑐫𑑂𑐳𑑄 𑐂𑐮𑐫𑑂𑐧𑑂𑐫𑐮𑐫𑑂 𑐴𑐣𑐵 𑐰𑐫𑐵𑐔𑑂𑐰𑑄𑐐𑐸 𑐣𑐾𑐰𑐵𑑅 𑐣𑐳𑐵 𑐣𑐏𑑅 𑐩𑐢𑑂𑐫𑐾 𑐠𑐶𑑄𑐮𑐵 𑐥𑐸𑐣𑑂𑐴𑐶 𑐰𑐵 𑐫𑑅𑐩𑐬𑐶 𑐥𑐸𑐣𑑂𑐴𑐶𑐧𑐮𑐫𑑂 𑐫𑑅𑐩𑐬𑐶 𑐣𑐫𑐵𑑅 𑐴𑐣𑐷 𑑋 𑐠𑑂𑐰 𑐕𑐐𑐹 𑐠𑑅𑐐𑐸 𑐴𑐾 𑐥𑐴𑑅 𑐡𑐹𑐐𑐸 𑐧𑐶𑐳𑑂𑐎𑑄 𑐥𑐴𑑅𑐫𑐵 𑐔𑑂𑐰𑐖𑐵𑑅𑐐𑐸 𑐣𑐏𑑅 𑐏𑑅 𑑋 𑐠𑐸𑐐𑐸 𑐂𑐮𑐫𑑂 “𑐫𑑅𑐩𑐬𑐶 𑐔𑐵𑐎𑐸, 𑐄𑐎𑐶𑐂 𑐡𑐸𑐣𑐾 𑐴𑐵𑐎𑐸, 𑐧𑑂𑐫𑐹𑐩𑑂𑐴 𑐮𑑂𑐫𑐵𑐳𑐾, 𑐩𑐧𑑂𑐫𑐹𑐩𑑂𑐴 𑐧𑐸𑐬𑐶𑐎𑐸𑐟𑐶“ 𑐢𑐎𑐵𑑅 𑐕𑐾𑑃𑐏𑐵𑐥𑐟𑐶𑑄 𑐦𑑂𑐰𑐣𑐵𑑅 𑐫𑑅𑐩𑐬𑐶 𑐣𑐫𑐾𑐐𑐸 𑐔𑐮𑐣 𑐡𑐸 𑑋

𑐫𑑅𑐩𑐬𑐶 𑐳𑐎𑐳𑐶𑐟𑑄 𑐫𑑅𑐐𑐸 𑐩𑐬𑐶 𑐏𑑅 𑑋 𑐀𑐥𑑂𑐰𑑅𑐳𑐶𑐟 𑐫𑑅𑐐𑐸 𑐩𑐬𑐶 𑐖𑐸𑐫𑐵 𑐴𑐾 𑐠𑐸𑐎𑐶𑐫𑐵 𑐣𑐵𑑄 𑐫𑑅𑐩𑐬𑐶 𑐖𑐸𑐮 𑑋 𑐠𑐸𑐎𑐶𑐫𑐵 𑐰𑐶𑐱𑐾𑐲𑐟𑐵 𑐫𑐎𑑂𑐰 𑐡𑐸 𑑋 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐕𑐐𑐹 𑐣𑐏𑑅 𑐎𑐠𑑄 𑐫𑑅𑐩𑐬𑐶 𑐣𑐏𑑅 𑐴𑐣𑐶 𑑋 𑐩𑐾𑐩𑐾𑐎𑐠𑑄 𑐂𑐮𑐫𑑂𑐧𑑂𑐫𑐮𑐫𑑂 𑐟𑑅𑐟𑐵𑑅 𑐎𑐠𑑄𑐫𑐵 𑐖𑑂𑐫𑐵𑐏𑑃𑐫𑑂 𑐕𑑂𑐫𑐮𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐫𑑅𑐩𑐬𑐶 𑐕𑐐𑐹 𑐎𑐠𑑄 𑐳𑐐𑑄𑐫𑐵 𑐥𑑂𑐬𑐟𑐷𑐎 𑐣𑑄 𑐏𑑅 𑑋 𑐡𑑂𑐫𑑅𑐥𑐶𑐣𑑂𑐟 𑐰 𑐗𑐷𑐟 𑐫𑑅𑐩𑐬𑐶 𑐩𑐡𑐫𑐾𑐎𑑄 𑐩𑐐𑐵𑑅 𑑋 𑐠𑐸𑐎𑐶𑐫𑐵 𑐩𑐴𑐶𑐩𑐵 𑐣𑑄 𑐁𑐥𑐵𑐮𑑄 𑐡𑐸 𑑋 𑐖𑐵𑐎𑐶𑐔𑐸𑑄𑐮𑑄 𑐡𑐫𑐾𑐎𑐾𑐐𑐸 𑐣𑐳𑐵𑐟 𑐩𑐢𑑂𑐫𑐾 𑐔𑐟𑐵𑑄𑐩𑐬𑐶 𑐖𑐵𑐎𑐶 𑐩𑐬𑐶, 𑐳𑐾𑐮 𑐰 𑐫𑑅𑐩𑐬𑐶 𑐏𑑅 𑑋

𑐖𑐵𑐎𑐶 𑐧𑐵𑑄𑐮𑐵𑐎 𑐳𑐶𑐮𑐵𑑅 𑐐𑑄𑐎𑐵𑑅 𑐎𑑂𑐫𑐮𑐵𑐟𑑅𑐐𑐸 𑐖𑐵𑐎𑐶𑐔𑐸𑑄 𑐎𑑂𑐰𑐵𑑅𑐮𑐏𑐫𑑂 𑐣𑑂𑐴𑐵𑐧𑐸𑐎𑑂𑐎 𑐣𑑂𑐴𑐵𑐫𑐵𑑅 𑐔𑑂𑐰𑐮𑐵 𑐥𑐟𑐶𑐣𑑄 𑐢𑑂𑐫𑐸𑑄𑐢𑑂𑐫𑐸𑑄 𑐴𑑂𑐰𑑅 𑐡𑐫𑐾𑐎𑐵𑑅 𑐔𑐵𑐎𑐸, 𑐴𑐵𑐩𑑂𑐰𑑅 𑐟𑐫𑐵𑑅 𑐳𑑄𑐎𑐵𑐐𑐸 𑐟𑐵𑐎𑐹𑐐𑐸 𑐗𑑀𑐮 𑐟𑐫𑐵𑑅 𑐥𑑂𑐰𑐵𑑅 𑐟𑐶𑐣𑐵 𑐩𑐩𑑅𑐔𑐵 𑐴𑐵𑐫𑐾𑐠𑐾𑑄 𑐴𑐵𑐫𑐵𑑅 𑐡𑐫𑐾𑐎𑐾𑐐𑐸 𑐩𑐬𑐶𑐫𑐵𑐟 𑐴𑐾 𑐗𑐷𑐳𑑃 𑐫𑑅𑐩𑐬𑐶 𑐢𑐫𑐵𑐔𑑂𑐰𑐣𑐵 𑑋

𑐠𑑂𑐰 𑐗𑐷𑐳𑑃 𑐡𑑂𑐫𑑅𑐫𑐵𑐟 𑐣𑑄 𑐕𑐵𑐫𑐵 𑐰𑐫𑐵𑐔𑑂𑐰𑐣𑐵 𑑋 𑐡𑑂𑐫𑑅𑐫𑐵𑐟 𑐡𑐫𑐾𑐎𑐾𑐐𑐸 𑐫𑑅𑐩𑐬𑐶 𑐁𑐏𑐾 𑐟𑐫𑐵 𑐡𑐫𑐾𑐎𑐷 𑑋 𑐖𑐣𑑂𑐩𑐣𑑂𑐴𑐶𑐧𑐮𑐫𑑂 𑐫𑑅𑐩𑐬𑐶𑐫𑐵𑐟 𑐣𑐶𑐡𑑃, 𑐥𑑂𑐫𑐡𑑃 𑐧𑐸𑐣𑑂𑐴𑐶𑐣𑐶𑐳𑐾𑑄 𑐗𑐶𑑄𑐣𑐶𑐡𑑃 𑐟𑐎 𑐣𑐶𑐐𑑅 𑐥𑑂𑐫𑐐𑑄𑐣𑐶𑐳𑐾𑑄 𑐗𑐶𑑄𑐣𑐶𑐐𑑅 𑐎𑑂𑐰𑐏𑐵𑐫𑐾𑐎𑐷 𑑋 𑐀𑐠𑐾𑐴𑐾 𑐩𑐶𑐳𑐵𑐩𑐔𑐵𑐟𑐫𑑂 𑐩𑐔𑐵𑐧𑐸𑐂𑐐𑐸 𑐃 𑐟𑑂𑐫𑐂𑐧𑐮𑐫𑑂 𑐩𑑂𑐴𑑂𑐫𑐵𑐫𑑂 𑐖𑐸𑐂𑐩𑐵𑑅 𑐰𑐵 𑐨𑑁 𑐖𑐸𑐂𑐩𑐵𑑅 𑐫𑑅𑐩𑐬𑐶 𑐣𑐎𑐾𑐐𑐸 𑐔𑐮𑐣 𑐡𑐸 𑑋 𑐖𑐣𑐧𑐴𑐵𑑅 𑐡𑑂𑐫𑑅𑐫𑐵 𑐡𑑂𑐫𑑅𑐫𑐵 𑐏𑑅 𑐳𑐵𑐮𑐷𑐧𑐮𑐫𑑂 𑐫𑑅𑐩𑐬𑐶 𑐮𑐸𑐂𑐐𑐸 𑐣𑑄 𑐔𑐮𑐣 𑐡𑐸 𑑋 𑐄𑐐𑐸 𑐫𑑅𑐩𑐬𑐶 𑐮𑐵𑐣𑐵 𑐎𑐵𑐫𑐾 𑐦𑐹𑐳𑐵 𑐎𑐵𑐫𑑂 𑐧𑐸𑐂 𑐢𑐂𑐐𑐸 𑐢𑐵𑐥𑐹 𑐡𑐸 𑑋

𑐠𑐠𑐾 𑐢𑐵𑐬𑑂𑐩𑐶𑐎 𑐰 𑐖𑐵𑐟𑐶 𑐰𑐶𑐱𑐾𑐲𑐟𑐵 𑐎𑐠𑑄 𑐗𑐷𑐳𑑃 𑐫𑑅𑐩𑐬𑐶 𑐫𑐎𑑂𑐰 𑐎𑐠𑑄 𑐕𑑂𑐫𑐮𑐵 𑐰𑐫𑐵𑐔𑑂𑐰𑐣𑐵𑐐𑐸 𑐡𑐸 𑑋 𑐫𑑅𑐩𑐬𑐶 𑐟𑑅𑐟𑐵𑐎𑐠𑑄 𑐡𑐫𑐾𑐎𑐵 𑐣𑐫𑐾𑐖𑑂𑐫𑐹 𑑋 𑐐𑐠𑐾𑐎𑐷 𑐔𑐵𑐎𑐸, 𑐴𑐵𑐩𑑂𑐰𑑅 𑐟𑐫𑐵𑑅, 𑐏𑐸𑐰𑐵 𑐟𑐫𑐵𑑅, 𑐩𑐵𑐫𑑂 𑐟𑐫𑐵𑑅, 𑐁𑐮𑐸 𑐟𑐫𑐵𑑅, 𑐔𑐸𑑄𑐮𑐵 𑐟𑐫𑐵𑑅 𑑋 𑐟𑐬 𑐀𑐥𑑂𑐰𑐳𑐶𑐫𑐵𑑄 𑐮𑐵 𑐟𑐫𑐵 𑐣𑐫𑐾𑐐𑐸 𑐢𑐵𑑅𑐳𑐵 𑐩𑐫𑐵𑑅 𑐠𑑂𑐰 𑐠𑑅𑐥𑐶𑐣𑑂𑐟 𑐫𑑅𑐐𑐸 𑐎𑐠𑑄𑐫𑐵 𑐟𑐫𑐵 𑐣𑐫𑐾𑐐𑐸 𑐏𑐟 𑑋

𑐠𑐣 𑐔𑐵𑐎𑐸 𑐴𑐵𑐩𑑂𑐰𑑅 𑐰 𑐩𑐵𑐫𑑂 𑐟𑐫𑐵𑑅 𑐫𑑅𑐩𑐬𑐶 𑐡𑐫𑐾𑐎𑐾𑐐𑐸 𑐰𑐶𑐢𑐶 𑐣𑑂𑐴𑑂𑐫𑐧𑑂𑐰𑐫𑐾 𑑋

𑐔𑐵𑐎𑐸 𑐴𑐵𑐩𑑂𑐰𑑅𑐫𑐵 𑐫𑑅𑐩𑐬𑐶 𑐡𑐫𑐾𑐎𑐾𑐐𑐸 𑐰𑐶𑐢𑐶

𑑑) 𑐥𑐸𑐮𑐵𑑄𑐐𑐸 𑐟𑐵𑐂𑐔𑐶𑐣 𑐖𑐵𑐎𑐶 𑐧𑐵𑑄𑐮𑐵𑐎 𑐳𑐶𑐮𑐵 𑐐𑑄𑐎𑐵𑑅 𑐔𑐸𑑄 𑐡𑐫𑐾𑐎𑐵𑐟𑑅𑐐𑐸 𑐖𑐵𑐎𑐶𑐔𑐸𑑄 𑑒𑑐𑑐 𑐐𑑂𑐬𑐵𑐩

𑑒) 𑐮𑑂𑐫𑐫𑐵𑑅 𑐴𑐵𑐫𑐵𑑅 𑐳𑐶𑐫𑐵𑑅 𑐣𑐔𑐸𑐎 𑐣𑐶𑐣𑐵𑐟𑑅𑐐𑐸 𑐳𑐶𑐫𑐸𑐐𑐸 𑐰𑐵 𑐟𑐸𑐫𑐸𑐐𑐸 𑐴𑐵𑐩𑑂𑐰𑑅 𑑕𑑐𑑐 𑐐𑑂𑐬𑐵𑐩

𑑓) 𑐕𑐐𑐹 𑐎𑐥 𑐟𑐶 𑐮𑐏𑐫𑑂 𑐔𑐵𑐎𑐸 𑐡𑐵𑐫𑐾𑐎𑐾𑐐𑐸 𑑋 𑐀𑐮𑐾 𑐩𑐮𑐩𑐮 𑐎𑐵𑐥𑐟𑐫𑑂 𑐔𑐵𑐮𑐾 𑐫𑐵𑐣𑐵𑑅 𑐳𑐶𑐫𑐸𑐐𑐸 𑐰𑐵 𑐟𑐸𑐫𑐸𑐐𑐸 𑐣𑐔𑐹𑐐𑐸 𑐴𑐵𑐩𑑂𑐰𑑅 𑐮𑑂𑐰𑐵𑐎𑐕𑑂𑐫𑐵𑐣𑐵𑑅 𑐳𑑄𑐎𑐾𑐐𑐸 𑑋 𑐠𑑂𑐰 𑐳𑑄𑐎𑐾𑐧𑐮𑐫𑑂 𑐥𑐵𑐫𑑂𑐕𑐶 𑐖𑐸𑐂𑐎 𑐡𑐫𑐾𑐎𑐩𑐵𑑅 𑑋 𑐟𑐔𑑂𑐰𑐎𑑄 𑐟𑐵𑐎𑐸𑐎𑐾 𑐣𑑄 𑐩𑐖𑑂𑐫𑐹 𑐕𑑂𑐰𑐵𑐮𑐸𑐎𑐾 𑐣𑑄 𑐩𑐖𑑂𑐫𑐹 𑑋 𑐠𑐸𑐎𑐶𑐫𑐵 𑐳𑐰𑐵𑑅 𑐀𑐗 𑐠𑐎𑐵𑐫𑐾𑐟 𑐣𑐿𑑄𑐎𑑂𑐫𑐵 𑐔𑐸𑑄 𑐨𑐔𑐵, 𑐳𑐸𑐎𑐸𑐩𑐾𑐮 𑐔𑐸𑑄 𑐨𑐔𑐵 𑐣𑑄 𑐟𑐫𑐾𑐖𑑂𑐫𑐹 𑑋

𑑔) 𑐖𑐵𑐎𑐶𑐔𑐸𑑄𑐫𑐵𑐟 𑐩𑐵𑐎𑑂𑐰𑑅 𑐮𑑅 𑐡𑐵𑐫𑐾𑐎𑐵𑑅 𑐖𑐵𑐎𑐶𑐔𑐸𑑄 𑐕𑐐𑑅 𑐠𑐮𑐫𑑂 𑐟𑐫𑐵𑑅 𑐴𑐶𑐣𑐾 𑐠𑐾𑑄 𑐳𑑄𑐎𑐵𑑅 𑐮𑐶𑐥𑐵𑑅 𑐎𑑂𑐰𑐵𑑅 𑐎𑑂𑐰𑐵𑑅 𑐣𑑂𑐴𑐵𑐧𑐸𑐎 𑐣𑑂𑐴𑐵𑐫𑐾𑐐𑐸 𑑋 𑐣𑑂𑐴𑐵𑐫𑐾 𑐢𑐸𑑄𑐎𑐵𑑅 𑐩𑐮𑐩𑐮 𑐎𑐵𑐥𑐟𑐫𑑂 𑐥𑑂𑐰𑑅 𑐔𑐶𑐣𑐵𑑅 𑐰𑐵 𑐴𑐚𑐎𑐾𑐳𑐫𑑂 𑐳𑐵𑑄 𑐟𑐫𑐵𑑅 𑐟𑐫𑐾𑐐𑐸 𑑋 𑐕𑐵𑐫𑑂𑐢𑐵𑑅𑐳𑐵𑑄 𑐠𑑂𑐰 𑐣𑑂𑐴𑐵𑐫𑐵 𑐟𑑅𑐐𑐸 𑐏𑑂𑐰𑐵𑑃𑐄𑐎𑐾 𑐩𑐖𑑂𑐫𑐹 𑑋

𑑕) 𑐫𑑅𑐩𑐬𑐶 𑐡𑐫𑐾𑐎𑐾𑐟 𑐥𑐵𑐫𑑂𑐕𑐶 𑐎𑐠𑑄 𑐖𑐸𑐂𑐎 𑐐𑑂𑐰𑐵𑐬𑐵 𑐎𑐫𑐵𑑅 𑐏𑐾𑑃 𑐧𑐵𑑄 𑐮𑐸𑐂𑐎 𑐐𑑂𑐰𑐵𑐬𑐵 𑐔𑐶𑐣𑐵𑑅 𑐮𑑅 𑐰 𑐔𑐶𑐎𑑄 𑐮𑑂𑐰𑐵𑐎𑐕𑑂𑐫𑐵𑐣𑐵𑐟𑑅𑐐𑐸 𑐮𑐏𑐫𑑂 𑐥𑐟𑐶𑑄 𑐠𑐸𑐣𑐵𑑅 𑐮𑑂𑐴𑐵𑐟𑐫𑑂 𑐟𑐫𑐵𑑅𑐟𑑅𑐐𑐸 𑐖𑐵𑐎𑐶𑐔𑐸𑑄 𑐐𑑂𑐰𑐵𑐬𑐵𑐫𑑂 𑐥𑐟𑐶𑐣𑑄 𑐢𑑂𑐫𑐸𑑄𑐢𑑂𑐫𑐹𑑄 𑐑𑑂𑐰𑐵𑐣𑐵𑑅 𑐴𑑂𑐰𑑅 𑐡𑐫𑐾𑐎𑐾𑐐𑐸 𑑋 𑐀𑐮𑐾 𑐠𑑅𑐟 𑐩𑐵𑑅𑐐𑐸 𑐳𑐵𑐂𑐖𑐫𑐵 𑐖𑐸𑐮𑐎𑐶 𑐄𑐎𑐶𑐂 𑐴𑐵𑐩𑑂𑐰𑑅 𑐟𑐶 𑐟𑐫𑐵𑑅 𑐕𑐔𑐵𑐏𑐾𑐬𑑄 𑐥𑐟𑐶𑑄𑐔𑐵𑑄 𑐑𑑂𑐰𑐵𑐣𑐵 𑐴𑑂𑐰𑑅 𑐥𑑂𑐰𑐵𑐟𑐶𑐂𑐐𑐸 𑑋 𑐀𑐮𑐾 𑐩𑐩𑑅𑐔𑐵 𑐴𑐵𑐫𑐾𑐠𑐾𑑄 𑐨𑐵𑐮𑐔𑐵𑐫𑑂 𑐰𑐵 𑐩𑐩𑑅𑐔𑐵 𑐠𑐮𑐫𑑂 𑐩𑐠𑐶𑐂𑐎 𑐟𑐫𑐵𑑅 𑐴𑐵𑐫𑐾𑐐𑐸 𑑋 𑐀𑐠𑐾𑐴𑐾 𑑑𑑒 𑐣𑐶𑐳𑐾𑑄 𑑑𑑔 𑐩𑐶𑐣𑐾𑐚 𑐟𑐎 𑐴𑐵𑐫𑐾𑐢𑐸𑑄𑐎𑐵𑑅 𑐮𑑂𑐴𑑂𑐰𑐣𑐵𑑅 𑐥𑑄𑐏𑐵𑑄 𑐐𑐵𑐮𑐵𑑅
𑐏𑑂𑐰𑐵𑐄𑑃𑐎𑐾𑐐𑐸 𑑋

𑐩𑐵𑐫𑑂𑐫𑐵 𑐫𑑅𑐩𑐬𑐶 𑐡𑐫𑐾𑐎𑐾𑐐𑐸 𑐰𑐶𑐢𑐶

𑑑) 𑐧𑐵𑑄𑐮𑐵𑐎 𑐳𑐶𑐮𑐵𑑅 𑐎𑐾𑐮𑐵𑐟𑑅𑐐𑐸 𑐖𑐵𑐎𑐶𑐔𑐸𑑄 𑑒𑑐𑑐 𑐐𑑂𑐬𑐵𑐩

𑑒) 𑐩𑐵𑐫𑑂 𑐮𑐏𑐫𑑂 𑐦𑑂𑐰𑐫𑐵𑑅 𑐏𑑂𑐰𑐮𑐵 𑐠𑐵𑐣𑐵 𑐫𑐔𑐸𑐎 𑐣𑐶𑐣𑐵𑐟𑑅𑐐𑐸 𑐩𑐵𑐫𑑂 𑑑𑑐𑑐 𑐐𑑂𑐬𑐵𑐩

𑑓) 𑐣𑐔𑐸𑐎 𑐕𑑂𑐫𑐵𑐣𑐵 𑐟𑑅𑐐𑐸 𑐥𑐵𑐮𑐸 𑐩𑐵𑑅 𑑑𑑐 𑐐𑑂𑐬𑐵𑐩

𑑔) 𑐟𑐸𑐔𑐶𑐎𑑄, 𑐔𑐶 𑐳𑐰𑐵𑑅 𑐎𑐠𑑄, 𑐖𑐶 𑐔𑐹𑑄 𑐨𑐟𑐶𑐔𑐵, 𑐴𑐶𑑄 𑐨𑐟𑐶𑐔𑐵

𑐠𑑂𑐰 𑐳𑐎𑐟𑐵𑑄 𑐩𑐳𑐮𑐵 𑐟𑐫𑐵𑑅 𑐩𑐵𑑅 𑐳𑐵 𑐖𑐎 𑐮𑑅 𑐨𑐔𑐵 𑐠𑐥 𑐫𑐵𑐣𑐵 𑐩𑐵𑐫𑑂𑐫𑐵𑐟 𑐴𑐶𑐣𑐵 𑐀𑐠𑐾 𑐢𑐫𑐵𑐐𑐸 𑐔𑐵𑐎𑐮𑐵𑐎 𑐁𑐎𑐵𑐬𑑄 𑐳𑑄𑐎𑐾𑐐𑐸 𑑋

𑐫𑑅𑐩𑐬𑐶 𑐡𑐫𑐾𑐎𑐾𑐐𑐸 𑐰𑐶𑐢𑐶 𑐖𑐵𑐎𑐶𑐔𑐸𑑄𑐫𑐵 𑐴𑐵𑐩𑑂𑐰𑑅 𑐟𑐫𑐵 𑐡𑐫𑐾𑐎𑐾 𑐠𑐾𑑄 𑐴𑐾 𑐫𑐵𑐫𑐾𑐐𑐸 𑐏𑑅 𑐩𑐵𑐟𑑂𑐬 𑐔𑐵𑐎𑐸, 𑐴𑐵𑐩𑑂𑐰𑑅 𑐟𑐶𑐫𑐵 𑐥𑐮𑐾𑐳𑐵 𑐩𑐵𑐫𑑂 𑐟𑐫𑐾𑐐𑐸 𑐏𑑅 𑑋

𑐳𑐵𑐨𑐵𑐬 𑐳𑑂𑐰𑐣𑐶𑐐𑑅 𑐰𑐵𑑅 𑐥𑑁 𑑋

source:www.jheegu.com