𑐫𑐾𑑃𑐩𑐥𑐵𑑄 𑐁𑐢𑐵𑐬𑐨𑐹𑐟 𑐟𑐐𑐶𑑄𑐫𑐵 ‘𑐣𑑂𑐴𑑂𑐫𑐳𑑅 𑐥𑑁 𑐣𑐶𑐬𑑂𑐩𑐵𑐞 𑐮𑐶𑐳𑐾𑑄 𑐩𑐹𑐮𑑂𑐫𑐵𑐒𑑂𑐎𑐣’ 𑐫𑐵𑐂𑐐𑐸

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐁𑐢𑐵𑐬𑐨𑐹𑐟 𑐟𑐐𑐶𑑄𑐫𑐵 ‘𑐣𑑂𑐴𑑂𑐫𑐳𑑅 𑐥𑑁 𑐣𑐶𑐬𑑂𑐩𑐵𑐞 𑐮𑐶𑐳𑐾𑑄 𑐩𑐹𑐮𑑂𑐫𑐵𑐒𑑂𑐎𑐣’𑐫𑐵 𑐖𑑂𑐫𑐵 𑐣𑑂𑐴𑑂𑐫𑐵𑐎𑐹𑐐𑐸 𑐡𑐸 𑑋 𑐰𑐶𑐡𑑂𑐫𑐵𑐬𑑂𑐠𑐷𑐫𑐵 𑐩𑐹𑐮𑑂𑐫𑐵𑐒𑑂𑐎𑐣𑐫𑐵 𑐥𑐴𑑅 𑐰 𑐣𑑂𑐴𑑂𑐫𑐳𑑅 𑐥𑑁 𑐣𑐶𑐬𑑂𑐩𑐵𑐞𑐫𑐵𑐟 𑐳𑑂𑐟𑐬𑐷𑐫 𑐮𑐶𑐳𑐾𑑄 𑐖𑑂𑐰𑑅𑐮𑐵𑐐𑐸, 𑐃 𑐎𑐠𑑄 𑐣𑐵𑐥𑑄 𑐰𑐿𑐖𑑂𑐘𑐵𑐣𑐶𑐎 𑐡𑐫𑐾𑐎𑐾𑐐𑐸 𑐣𑐶𑑄𑐟𑐶𑑄 𑐫𑐾𑑃𑐩𑐥𑐵𑑄 𑐥𑑂𑐬𑐱𑐶𑐎𑑂𑐲𑐞 𑐣𑑂𑐴𑑂𑐫𑐵𑐎𑐾𑐢𑐸𑑄𑐎𑐹𑐐𑐸 𑐡𑐸 𑑋

𑐫𑐾𑑃𑐩𑐥𑐵 𑐱𑐶𑐎𑑂𑐲𑐵 𑐮𑐶𑐳𑐾𑑄 𑐳𑑂𑐰𑐵𑐳𑑂𑐠𑑂𑐫 𑐳𑐩𑐶𑐟𑐶𑐫𑐵 𑐎𑐖𑐶 𑐔𑐶𑐣𑐷𑐎𑐵𑐖𑐷 𑐩𑐴𑐬𑑂𑐖𑐣𑑄 𑐢𑐫𑐵𑐡𑐶𑐮, “𑐱𑐶𑐎𑑂𑐲𑐵 𑐢𑐂𑐐𑐸 𑐫𑑀𑐐𑑂𑐫𑐟𑐵 𑐩𑐵𑐥𑐣𑐫𑐵 𑐳𑐹𑐔𑐎 𑐖𑐎 𑐩𑐏𑐸 𑑋 𑐱𑐶𑐎𑑂𑐲𑐵𑑄 𑐩𑐣𑐹𑐫𑐵𑐟 𑐔𑐷𑐩𑐶 𑐥𑐵𑐏𑐾𑑄 𑐟𑑅𑐩𑐶 𑐡𑐫𑐾𑐎𑐵 𑐧𑐶𑐂 𑐦𑐫𑐾𑐩𑐵𑑅 𑑋 𑐠𑐸𑐎𑐶𑐫𑐵 𑐣𑐶𑑄𑐟𑐶𑑄 𑐫𑐾𑑃𑐩𑐥𑐵𑐫𑐵 𑐳𑐵𑐩𑐸𑐡𑐵𑐫𑐶𑐎 𑐧𑑂𑐰𑐣𑐾𑐎𑐸𑐠𑐶𑐂 𑐳𑐒𑑂𑐑 𑐳𑐬𑐎𑐵𑐬𑐫𑐵 𑐮𑐐𑐵𑐣𑐷𑐂 𑐫𑐾𑑃𑐩𑐥𑐵𑑄 𑐎𑐵𑐮𑐶𑐎𑐵𑑄 𑐕𑐐𑐹 𑐏𑐬𑑂𑐧 𑑓𑑒 𑐎𑑂𑐰𑐟𑐶 𑐮𑐐𑐵𑐣𑐷 𑐟𑐣𑐾 𑐢𑐸𑑄𑐎𑐹𑐐𑐸 𑐡𑐸 𑑋 𑐴𑐵𑐩𑐵𑐫𑐵 𑐁𑐬𑑂𑐠𑐶𑐎, 𑐳𑐵𑐩𑐵𑐖𑐶𑐎 𑐀𑐰𑐳𑑂𑐠𑐵𑑄 𑐣𑐵𑐥𑑄 𑐱𑐿𑐎𑑂𑐲𑐶𑐎 𑐐𑐸𑐞𑐳𑑂𑐟𑐬 𑐣𑑂𑐫𑑄𑐎𑐾𑐟 𑐨𑐹𑐩𑐶𑐎𑐵 𑐩𑑂𑐴𑐶𑐟𑐾𑐐𑐸 𑐫𑐵𑐂 𑑋 𑐁𑐣𑑂𑐟𑐬𑐶𑐎 𑐮𑐶𑐳𑐾𑑄 𑐧𑐵𑐴𑑂𑐫 𑐳𑐩𑐣𑑂𑐰𑐫 𑐧𑐮𑑂𑐮𑐵𑐎𑐾𑐐𑐸 𑐖𑐸𑐂 𑑋”

‘𑐰𑐶𑐡𑑂𑐫𑐵𑐮𑐫 𑐱𑐶𑐎𑑂𑐲𑐵𑐫𑐵 𑐬𑐵𑐲𑑂𑐚𑑂𑐬𑐶𑐫 𑐥𑐵𑐛𑑂𑐫𑐎𑑂𑐬𑐩 𑐥𑑂𑐬𑐵𑐬𑐹𑐥, 𑑒𑑐𑑗𑑖 𑑙𑐣𑐶𑐎𑑂𑐰𑑅𑐐𑐸 𑐳𑑄𑐳𑑂𑐎𑐬𑐞, 𑑒𑑐𑑗𑑙𑑐’ 𑐣𑑄 𑐧𑑂𑐰𑐣𑐾𑐎𑐸𑐠𑐶 𑐱𑐶𑐎𑑂𑐲𑐵𑐫𑐵 𑐬𑐵𑐲𑑂𑐚𑑂𑐬𑐶𑐫, 𑐟𑐴𑐐𑐟, 𑐎𑐎𑑂𑐲𑐵𑐐𑐟 𑐰 𑐰𑐶𑐲𑐫𑐐𑐟 𑐁𑐖𑑂𑐖𑐸, 𑐰𑐶𑐲𑐫𑐐𑐟 𑐳𑐎𑑂𑐲𑐩𑐟𑐵 𑐮𑐶𑐳𑐾𑑄 𑐩𑐹 𑐳𑐶𑐎𑐵𑐂 𑐎𑑂𑐲𑐾𑐟𑑂𑐬 𑐰𑑂𑐫𑐰𑐳𑑂𑐠𑐶𑐟 𑐫𑐵𑐣𑐵𑐐𑐸 𑐢𑐵𑐳𑐾𑑄 𑐰𑐫𑑂𑐎𑐮𑑄 𑐠𑐸𑐎𑐶𑐫𑐵𑐟 𑐧𑑂𑐰𑐣𑐾𑐎𑐸𑐠𑐶 𑐰 𑐎𑐎𑑂𑐲𑐵𑐎𑑂𑐰𑐠𑐵𑐫𑑂 𑐎𑐵𑐬𑑂𑐫𑐵𑐣𑑂𑐰𑐫𑐣 𑐥𑐎𑑂𑐲 𑐔𑐸𑐣𑑁𑐟𑐷𑐥𑐹𑐬𑑂𑐞 𑐖𑐹𑐐𑐸 𑐢𑐫𑐵𑐡𑐶𑐮 𑑋

𑐫𑐾𑑃𑐩𑐥𑐵 𑐰𑐶𑐡𑑂𑐫𑐵𑐮𑐫 𑐰𑑂𑐫𑐰𑐳𑑂𑐠𑐵𑐥𑐣 𑐩𑐴𑐵𑐱𑐵𑐏𑐵 𑐥𑑂𑐬𑐩𑐸𑐏 𑐮𑐶𑐳𑐾𑑄 𑐱𑐶𑐎𑑂𑐲𑐵 𑐀𑐢𑐶𑐎𑐺𑐟 𑐂𑐣𑑂𑐡𑑂𑐬𑐥𑑂𑐬𑐳𑐵𑐡 𑐡𑐵𑐴𑐵𑐮𑑄 𑐢𑐫𑐵𑐡𑐶𑐮, “𑐳𑑂𑐫𑐣𑐵𑐩𑐶 𑐳𑐎𑑂𑐲𑐩𑐟𑐵𑐫𑐵 𑐥𑑂𑐬𑐵𑐬𑐹𑐥, 𑑒𑑐𑑗𑑒 𑐣𑑄 𑐩𑐡𑐶𑐎𑑂𑐎𑑄 𑐳𑑂𑐫𑐣𑐾𑐐𑐸 𑐰 𑐥𑐾𑐳𑐵𑐐𑐟 𑐰𑐶𑐎𑐵𑐳𑐫𑐵𑐟 𑐳𑑂𑐫𑐣𑐵𑐩𑐶𑐫𑐵 𑐕𑐐𑐹 𑐩𑐹 𑐳𑐎𑑂𑐲𑐩𑐟𑐵𑐫𑐵 𑐎𑐠𑑄 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋” 𑐰𑐴𑐾 𑐎𑐠𑑄 𑐳𑑂𑐫𑐣𑐵𑐩𑐶𑐫𑐵𑐟 𑐣𑑂𑐴𑑂𑐫𑐳𑑅 𑐥𑑁 𑐰𑐶𑐎𑐵𑐳𑐮𑐶𑐳𑐾𑑄 𑐩𑐹𑐮𑑂𑐫𑐵𑐒𑑂𑐎𑐣 𑐳𑐩𑑂𑐧𑐣𑑂𑐢𑐷 𑐟𑐵𑐮𑐶𑐩 𑐧𑑂𑐫𑐹𑐐𑐸 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮 𑑋

𑐟𑐵𑐮𑐶𑐩𑐥𑐵𑐏𑐾𑑄 𑐁𑐢𑐵𑐬𑐨𑐹𑐟 𑐟𑐐𑐶𑑄𑐫𑐵 𑐳𑐶𑐎𑐵𑐂 𑐩𑐹𑐮𑑂𑐫𑐵𑐒𑑂𑐎𑐣 𑐫𑐵𑐫𑐾𑐐𑐸 𑐰𑐶𑐢𑐶𑐂 𑐳𑐩𑐵𑐣𑐟𑐵 𑐰𑐂𑐐𑐸 𑐫𑐾𑑃𑐩𑐥𑐵𑑄 𑐰𑐶𑐱𑑂𑐰𑐵𑐳 𑐥𑑂𑐰𑑄𑐎𑐹𑐐𑐸 𑐡𑐸 𑑋 𑐳𑑂𑐬𑑀𑐟 𑐳𑑂𑐫𑐣𑐵𑐩𑐶 𑐬𑐱𑑂𑐩𑐷 𑐟𑐵𑐩𑐵𑐒𑑄 𑐢𑐫𑐵𑐡𑐶𑐮, “𑐳𑑂𑐫𑐣𑐵𑐩𑐶𑐫𑐵 𑐣𑐶𑑄𑐟𑐶𑑄 𑐠𑑂𑐰 𑐣𑑂𑐴𑐹𑐐𑐸 𑐀𑐨𑑂𑐫𑐵𑐳 𑐖𑐸𑐂𑐟𑑂𑐫𑑄𑐐𑐸 𑐡𑐸 𑑋” 𑐬𑐵𑐲𑑂𑐚𑑂𑐬𑐶𑐫 𑐥𑐵𑐛𑐫𑐎𑑂𑐬𑐩 𑐥𑑂𑐬𑐵𑐬𑐹𑐥, 𑑒𑑐𑑗𑑖 𑐁𑐢𑐵𑐬𑐨𑐹𑐟 𑐟𑐴𑐀𑐣𑑂𑐟𑐬𑑂𑐐𑐟 𑐥𑑂𑐫𑐐𑐹 𑐰 𑐣𑑂𑐫𑐵𑐐𑐹 𑐟𑐐𑐶𑑄𑐫𑐵 𑐥𑐵𑐛𑐫𑐎𑑂𑐬𑐩 𑑒𑑐𑑗𑑘 𑐎𑐫𑑂 𑐳𑑂𑐰𑐷𑐎𑐺𑐟 𑐖𑐸𑐫𑐵𑑅 𑐕𑑂𑐫𑐮𑐵𑐧𑐸𑐮𑐵𑐫𑑂 𑐰𑑅𑐐𑐸 𑐡𑐸 𑑋 𑐠𑑂𑐰 𑐥𑑂𑐬𑐵𑐬𑐸𑐥 𑑒𑑐𑑗𑑙 𑐫𑑂 𑐳𑑄𑐱𑑀𑐢𑐣 𑐖𑐹𑐐𑐸 𑐏𑑅 𑑋 𑐁𑐢𑐵𑐬𑐨𑐹𑐟 𑐟𑐴𑐀𑐣𑑂𑐟𑐬𑑂𑐐𑐟 𑐏𑐸𑐐𑐹 𑐣𑐶𑐳𑐾𑑄 𑐔𑑂𑐫𑐵𑐐𑐹 𑐟𑐐𑐶𑑄𑐟𑐎𑐫𑐵 𑐥𑐵𑐛𑑂𑐫𑐎𑑂𑐬𑐩, 𑑒𑑐𑑗𑑗 𑐎𑐫𑑂 𑐳𑑂𑐰𑐷𑐎𑐺𑐟 𑐖𑐸𑐫𑐵𑑅 𑐕𑑂𑐫𑐮𑐵𑐧𑐸𑐮𑐵𑐫𑑂 𑐰𑑅𑐐𑐸 𑐫𑐾𑑃𑐩𑐥𑐵𑐫𑐵 𑐱𑐶𑐎𑑂𑐲𑐵 𑐮𑐶𑐳𑐾𑑄 𑐳𑑂𑐰𑐵𑐳𑑂𑐠𑑂𑐫 𑐳𑐩𑐶𑐟𑐶𑑄 𑐢𑐵𑑅𑐐𑐸 𑐡𑐸 𑑋

𑐥𑐵𑐛𑑂𑐫𑐎𑑂𑐬𑐩 𑐰𑐶𑐎𑐵𑐳 𑐎𑐾𑐣𑑂𑐡𑑂𑐬𑐥𑐵𑐏𑐾𑑄 𑐥𑑂𑐫𑑄𑐐𑐹 𑐣𑐶𑐳𑐾𑑄 𑐔𑑂𑐫𑐵𑐐𑐹 𑐟𑐐𑐶𑑄𑐟𑐎 𑐰 𑐎𑐎𑑂𑐲𑐵𑐐𑐟 𑐰𑐶𑐲𑐫𑐐𑐟 𑐰𑐶𑐱𑐶𑐲𑑂𑐚𑐷𑐎𑐬𑐞 𑐟𑐵𑐮𑐶𑐎𑐵 𑐰𑐶𑐎𑐵𑐳 𑐫𑐵𑑅𑐐𑐸 𑐡𑐸 𑑋 𑐰𑐶𑐡𑑂𑐫𑐵𑐬𑑂𑐠𑐷 𑐳𑐶𑐎𑐵𑐂𑐫𑐵 𑐣𑐶𑑄𑐟𑐶𑑄 𑐁𑐣𑑂𑐟𑐬𑐶𑐎 𑐩𑐹𑐮𑑂𑐫𑐵𑐒𑑂𑐎𑐣 𑐩𑐵𑐥𑐡𑐞𑑂𑐜, 𑑒𑑐𑑘𑑐 𑐖𑐵𑐬𑐷 𑐫𑐵𑐣𑐵 𑐟𑑅𑐐𑐸 𑐡𑐸 𑑋 𑐳𑑂𑐠𑐵𑐣𑐷𑐫 𑐳𑐬𑐎𑐵𑐬 𑐳𑐘𑑂𑐔𑐵𑐮𑐣 𑐋𑐣, 𑑒𑑐𑑗𑑔 𑐫𑐵 𑐡𑐦𑐵 𑑑𑑑𑑙𑑒𑑐 𑑙𑐖𑑐 𑐎𑐫𑑂 𑐁𑐢𑐵𑐬𑐨𑐹𑐟 𑐱𑐶𑐎𑑂𑐲𑐵 𑐮𑐶𑐳𑐾𑑄 𑐩𑐵𑐢𑑂𑐫𑐩𑐶𑐎 𑐱𑐶𑐎𑑂𑐲𑐵𑐀𑐣𑑂𑐟𑐬𑑂𑐐𑐟 𑐳𑑂𑐠𑐵𑐣𑐷𑐫 𑐟𑐐𑐶𑑄𑐫𑐵 𑐖𑑂𑐫𑐵, 𑐎𑐬𑑂𑐟𑐰𑑂𑐫 𑐰 𑐀𑐢𑐶𑐎𑐵𑐬𑐀𑐣𑑂𑐟𑐬𑑂𑐐𑐟 𑐱𑐶𑐎𑑂𑐲𑐞 𑐳𑐶𑐎𑐵𑐂, 𑐳𑑂𑐫𑐣𑐵𑐩𑐶𑐮𑐶𑐳𑐾𑑄 𑐎𑐬𑑂𑐩𑐔𑐵𑐬𑐷𑐫𑐵 𑐟𑐵𑐮𑐶𑐩 𑐰 𑐎𑑂𑐲𑐩𑐟𑐵 𑐰𑐶𑐎𑐵𑐳𑐳𑐩𑑂𑐧𑐣𑑂𑐢𑐷 𑐖𑑂𑐫𑐵 𑐡𑐸𑐠𑑂𑐫𑐵𑐣𑐵 𑐔𑑂𑐰𑑄𑐐𑐸 𑐡𑐸 𑑋