𑐫𑐾𑑃𑐩𑐥𑐵𑐫𑐵 𑐕𑐵𑐟𑑂𑐬𑐰𑐺𑐟𑑂𑐟𑐶𑐫𑐵 𑐣𑐶𑑄𑐟𑐶𑑄 𑐗𑐶𑐏𑐸𑐡𑑂𑐰𑑅 𑐳𑐶𑐧𑑂𑐫𑐾 𑐀𑐥𑑂𑐰𑑅𑐳𑐶𑐣𑑄 𑐧𑑂𑐰𑐟𑐶 𑐎𑐵𑐂𑐐𑐸

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐱𑐿𑐎𑑂𑐲𑐶𑐎𑐳𑐟𑑂𑐬 𑑒𑑐𑑘𑑒– 𑑘𑑓 𑐫𑐵 𑐣𑐶𑑄𑐟𑐶𑑄 𑐟𑐐𑐶𑑄 𑑑𑑑 𑐰 𑑑𑑒 𑐫𑑂 𑐳𑑄𑐳𑑂𑐠𑐵𑐐𑐟 𑐰𑐶𑐡𑑂𑐫𑐵𑐮𑐫𑐎𑐫𑑂 𑐕𑐵𑐟𑑂𑐬𑐰𑐺𑐟𑑂𑐟𑐶 𑐎𑑀𑐚𑐵𑐫𑑂 𑐧𑑂𑐰𑐣𑐾𑐟 𑐂𑐔𑑂𑐕𑐸𑐎 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂 𑐣𑐶𑑄𑐟𑐶𑑄 𑐐𑑂𑐰𑐳𑐵𑑅𑐐𑑂𑐰𑑅𑐐𑐸 𑐥𑑂𑐬𑐰𑐾𑐱 𑐥𑐬𑐷𑐎𑑂𑐲𑐵𑐫𑑂 𑑑𑑖,𑑑𑑓𑑗 𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷𑐟 𑐥𑐬𑐷𑐎𑑂𑐲𑐵𑐫𑑂 𑐧𑑂𑐰𑐟𑐶 𑐎𑐵𑐫𑐾𑐡𑐂𑐐𑐸 𑐖𑐹𑐐𑐸 𑐏𑑅 𑑋 𑐡𑐾𑐫𑑂𑐣𑑂𑐫𑑄𑐎𑑄𑐫𑐵 𑑗𑑗 𑐐𑐹 𑐖𑐶𑐮𑑂𑐮𑐵𑐥𑐵𑐏𑐾𑑄 𑐩𑐸𑐎𑑂𑐎𑑄 𑑑𑑗,𑑒𑑒𑑙 𑐁𑐰𑐾𑐡𑐣𑐩𑐢𑑂𑐫𑐾 𑐣𑑄 𑑑𑑖,𑑑𑑓𑑗 𑐰𑐶𑐡𑑂𑐫𑐵𑐬𑑂𑐠𑐷 𑐕𑐣𑑀𑐚 𑐖𑐹𑐐𑐸 𑐏𑑅 𑑋

𑐫𑐾𑑃𑐩𑐥𑐵 𑐱𑐶𑐎𑑂𑐲𑐵 𑐰𑐶𑐨𑐵𑐐𑐫𑐵 𑐱𑐶𑐎𑑂𑐲𑐵 𑐀𑐢𑐶𑐎𑐺𑐟 𑐮𑐎𑑂𑐲𑑂𑐩𑐷 𑐥𑑁𑐜𑐾𑐮𑐫𑐵 𑐎𑐠𑑄 𑐩𑑂𑐴𑐳𑐷𑐎𑐾𑐐𑐸 𑐣𑐵𑐐𑐬𑐶𑐎𑐟𑐵 𑐰𑐵 𑐖𑐣𑑂𑐩𑐡𑐬𑑂𑐟𑐵, 𑐳𑐵𑐬𑑂𑐰𑐖𑐣𑐶𑐎 𑐰𑐶𑐡𑑂𑐫𑐵𑐮𑐫𑐥𑐵𑐏𑐾𑑄 𑐧𑑂𑐰𑑄𑐐𑐸 𑐖𑐹𑐐𑐸 𑐄𑐎𑐶𑐫𑐵 𑐡𑐳𑐶, 𑐳𑑄𑐳𑑂𑐠𑐵𑐐𑐟 𑐰𑐶𑐡𑑂𑐫𑐵𑐮𑐫𑐎𑐫𑑂 𑐀𑐢𑑂𑐫𑐫𑐣 𑐫𑐵𑑅𑐐𑐸 𑐏𑑅𑐳𑐵 𑐕𑐵𑐟𑑂𑐬𑐰𑐺𑐟𑑂𑐟𑐶𑐂 𑐧𑑂𑐰𑐣𑐵𑐔𑑂𑐰𑑄𑐐𑐸 𑐰𑐵 𑐫𑐾𑑃𑐩𑐥𑐵𑐫𑑂 𑐳𑑂𑐠𑐵𑐫𑐷 𑐧𑐳𑑀𑐧𑐵𑐳 𑐫𑐵𑐣𑐵𑐔𑑂𑐰𑑄𑐐𑐸 𑐡𑐳𑐶 𑐳𑑄𑐮𑐐𑑂𑐣 𑐩𑐖𑐹𑐐𑐸 𑐡𑑂𑐰𑑅𑐕𑐶 𑐰 𑑙𑑒 𑐐𑐹 𑐁𑐰𑐾𑐡𑐣 𑐀𑐳𑑂𑐰𑐷𑐎𑐺𑐟 𑐖𑐹𑐐𑐸 𑐏𑑅 𑑋

𑐱𑐶𑐎𑑂𑐲𑐵 𑐰𑐶𑐨𑐵𑐐𑐫𑐵 𑐎𑐠𑑄 𑐕𑐣𑑀𑐚 𑐖𑐹𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐟 𑐩𑐢𑑂𑐫𑐾 𑐰𑐶𑐖𑑂𑐘𑐵𑐣 𑐳𑐒𑑂𑐎𑐵𑐫𑐎𑐫𑑂 𑑑𑑑 𑐡𑑂𑐰𑑅 𑐰 𑑕𑑙𑑐, 𑐰𑑂𑐫𑐰𑐳𑑂𑐠𑐵𑐥𑐣 𑐳𑐒𑑂𑐎𑐵𑐫𑐎𑐫𑑂 𑑔 𑐡𑑂𑐰𑑅 𑐰 𑑑𑑖𑑔, 𑐩𑐵𑐣𑐰𑐶𑐎𑐷 𑐳𑐒𑑂𑐎𑐵𑐫𑐎𑐫𑑂 𑑓𑑒, 𑐱𑐶𑐎𑑂𑐲𑐵 𑐳𑐒𑑂𑐎𑐵𑐫𑐫𑐵 𑐣𑐶𑑄𑐟𑐶𑑄 𑑙𑑕 𑐰 𑐎𑐵𑐣𑐸𑐣 𑐳𑐒𑑂𑐎𑐵𑐫𑐫𑐵 𑐣𑐶𑑄𑐟𑐶𑑄 𑐣𑐶𑐳𑑅 𑐰 𑑕𑑖 𑐩𑑂𑐴 𑐡𑐸𑐠𑑂𑐫𑐵𑑅 𑑋 𑐕𑐣𑑀𑐚 𑐖𑐹𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐂𑐩𑐾𑐮 𑐰 𑐦𑑀𑐣𑐥𑐵𑐏𑐾𑑄 𑐳𑐸𑐔𑑄 𑐧𑐶𑐂𑐢𑐸𑑄𑐎𑐹𑐐𑐸 𑐫𑐾𑑃𑐩𑐥𑐵𑑄 𑐢𑐵𑑅𑐐𑐸 𑐡𑐸 𑑋

𑐕𑐵𑐟𑑂𑐬𑐰𑐺𑐟𑑂𑐟𑐶 𑐥𑑂𑐬𑐰𑐾𑐱 𑐥𑐬𑐷𑐎𑑂𑐲𑐵 𑐳𑐵𑐄𑐣 𑑓 𑐐𑐟𑐾 𑐳𑐸𑐠𑐳𑐶𑐫𑐵 𑑘 𑐣𑐶𑐳𑐾𑑄 𑑑𑑐 𑐧𑐖𑐾 𑐟𑐵𑑅 𑐃𑐟𑐎 𑐖𑐸𑐂 𑑋 𑐥𑐬𑐷𑐎𑑂𑐲𑐵 𑐟𑐐𑐶𑑄 𑑑𑑐 𑐐𑐹 𑐫𑐵 𑐥𑐵𑐛𑑂𑐫𑐎𑑂𑐬𑐩𑐫𑐵 𑐮𑐶𑐢𑑄𑐳𑐵𑐫𑑂 𑐖𑐸𑐂 𑑋 𑐐𑐸𑐎𑐶𑐂 𑐀𑐣𑐶𑐰𑐵𑐬𑑂𑐫 𑐐𑐞𑐶𑐟, 𑐰𑐶𑐖𑑂𑐘𑐵𑐣 𑐰 𑐀𑐒𑑂𑐐𑑂𑐬𑐾𑐖𑐷 𑐰𑐶𑐲𑐫𑐥𑐵𑐏𑐾𑑄 𑑓𑑐𑐬𑑓𑑐 𑐐𑐸 𑐣𑑂𑐴𑑂𑐫𑐳𑑅 𑐰 𑐳𑐵𑐩𑐵𑐣𑑂𑐫 𑐖𑑂𑐘𑐵𑐣𑐥𑐵𑐏𑐾𑑄 𑑑𑑐 𑐐𑐹 𑐣𑑂𑐴𑑂𑐫𑐳𑑅 𑐫𑐵𑐣𑐵𑑅 𑐩𑐸𑐎𑑂𑐎𑑄 𑑑𑑐𑑐 𑐐𑐹 𑐧𑐴𑐸𑐰𑐿𑐎𑐮𑑂𑐥𑐶𑐎 𑐣𑑂𑐴𑑂𑐫𑐳𑑅 𑐣𑑂𑐫𑐣𑐷 𑑋 𑐥𑐬𑐷𑐎𑑂𑐲𑐵 𑐄𑐟𑑂𑐟𑐷𑐬𑑂𑐞 𑐫𑐵𑐫𑐾𑐟 𑐣𑑂𑐫𑐹𑐣𑐟𑐩 𑑔𑑐 𑐥𑑂𑐬𑐟𑐶𑐱𑐟 𑐮𑑂𑐫𑐵𑑅 𑐴𑐫𑐾𑐩𑐵𑑅 𑑋

𑐥𑐬𑐷𑐎𑑂𑐲𑐵𑐫𑐵 𑐮𑐶𑐔𑑂𑐰𑑅 𑐥𑐶𑐎𑐵𑐫𑐾𑐢𑐸𑑄𑐎𑐵𑑅 𑐩𑐾𑐬𑐶𑐚 𑐢𑐮𑑅𑐫𑐵 𑐮𑐶𑐢𑑄𑐳𑐵𑐫𑑂 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐕𑐵𑐟𑑂𑐬𑐰𑐺𑐟𑑂𑐟𑐶 𑐧𑐶𑐂𑐐𑐸 𑐖𑐸𑐂 𑑋 𑐠𑑂𑐰 𑐖𑑂𑐫𑐵𑐗𑑂𑐰𑐮𑑄 𑐁𑐬𑑂𑐠𑐶𑐎 𑐬𑐹𑐥𑑄 𑐧𑑅𑐩𑐮𑐵𑑅𑐥𑐶𑑄 𑐟𑐬 𑐩𑐾𑐢𑐵𑐰𑐷 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐟𑐐𑐶𑑄 𑑑𑑑 𑐰 𑑑𑑒 𑐫𑑂 𑐠𑑅𑐟 𑐫𑑅𑐐𑐸 𑐳𑑄𑐳𑑂𑐠𑐵𑐐𑐟 𑐰𑐶𑐡𑑂𑐫𑐵𑐮𑐫𑐎𑐫𑑂 𑐐𑐸𑐞𑐳𑑂𑐟𑐬𑐷𑐫 𑐱𑐶𑐎𑑂𑐲𑐵 𑐎𑐵𑐫𑐾𑐟 𑐴𑑂𑐰𑑅𑐟𑐵𑑅 𑐔𑐹𑐮𑐵𑐎𑐹𑐐𑐸 𑐫𑐾𑑃𑐩𑐥𑐵𑐫𑐵 𑐢𑐵𑐥𑐹 𑐡𑐸 𑑋

𑐫𑐾𑑃𑐩𑐥𑐵𑑄 𑐄𑐐𑐸 𑐖𑑂𑐫𑐵𑐗𑑂𑐰𑑅𑐥𑐵𑐏𑐾𑑄 𑐐𑐸𑐞𑐳𑑂𑐟𑐬𑐷𑐫 𑐱𑐶𑐎𑑂𑐲𑐵𑐫𑐵𑐟 𑐥𑐴𑐸𑑃𑐔𑐫𑑀𑐐𑑂𑐫 𑐖𑐸𑐂𑐎𑐾𑐟 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂 𑐱𑐿𑐎𑑂𑐲𑐶𑐎 𑐨𑐰𑐶𑐲𑑂𑐫𑐫𑐵𑐟 𑐨𑐶𑑄𑐎𑐾𑐟 𑐎𑐸𑐟𑑅 𑐫𑐵𑐣𑐵𑐔𑑂𑐰𑑄𑐐𑐸 𑐏𑑅 𑑋 𑐫𑐾𑑃𑐩𑐥𑐵𑑄 𑐀𑐣𑐶𑐰𑐵𑐬𑑂𑐫 𑐬𑐹𑐥𑑄 𑐎𑐵𑐬𑑂𑐫𑐣𑑂𑐰𑐫𑐣𑐫𑑂 𑐴𑑅𑐐𑐸 𑐄𑐐𑐸 𑐰𑑂𑐫𑐰𑐳𑑂𑐠𑐵𑑄 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐱𑐶𑐎𑑂𑐲𑐵 𑐎𑐵𑐫𑐾𑐟 𑐟𑑅𑐢𑑄𑐐𑐸 𑐐𑑂𑐰𑐵𑐴𑐵𑐮𑐶 𑐖𑐸𑐂𑐐𑐸 𑐨𑐮𑐳𑐵 𑐫𑐵𑑅𑐐𑐸 𑐡𑐸 𑑋