𑐫𑐾𑑃𑐩𑐣𑐥𑐵 𑐕𑐵𑐟𑑂𑐬𑐰𑐺𑐟𑑂𑐟𑐶 𑐎𑑀𑐚𑐵𑐫𑐵 𑐣𑐶𑐐𑐹𑐐𑐸 𑐔𑐬𑐞𑐫𑐵 𑐢𑐮𑑅 𑐥𑐶𑐟𑐧𑐶𑐮

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐱𑐿𑐎𑑂𑐲𑐶𑐎 𑐳𑐟𑑂𑐬 𑑒𑑐𑑘𑑒–𑑘𑑓 𑐫𑐵 𑐣𑐶𑑄𑐟𑐶𑑄 𑐟𑐐𑐶𑑄 𑑑𑑑 𑐰 𑑑𑑒 𑐫𑐵 𑐕𑐵𑐟𑑂𑐬𑐰𑐺𑐟𑑂𑐟𑐶 𑐎𑑀𑐚𑐵𑐫𑐵 𑐣𑐶𑐐𑐹𑐐𑐸 𑐔𑐬𑐞𑐫𑐵 𑐩𑐣𑑀𑐣𑐫𑐣 𑐢𑐮𑑅 𑐥𑐶𑐟𑐧𑑂𑐰𑑅𑐐𑐸 𑐡𑐸 𑑋

𑐠𑑂𑐰 𑐔𑐬𑐞𑐫𑑂 𑐰𑐶𑐖𑑂𑐘𑐵𑐣𑐫𑑂 𑑔𑑑𑑔 𑐩𑑂𑐴, 𑐰𑑂𑐫𑐰𑐳𑑂𑐠𑐵𑐥𑐣𑐫𑑂 𑑑𑑐𑑖 𑐩𑑂𑐴, 𑐩𑐵𑐣𑐰𑐶𑐎𑐷 𑐕𑐩𑑂𑐴, 𑐱𑐶𑐎𑑂𑐲𑐵 𑐳𑐒𑑂𑐎𑐵𑐫𑐮𑐫𑑂 𑐳𑑂𑐰𑐩𑑂𑐴 𑐰 𑐎𑐵𑐣𑐸𑐣𑐫𑑂 𑑓𑑐 𑐩𑑂𑐴 𑐫𑐵𑐣𑐵𑑅 𑐩𑐸𑐎𑑂𑐎𑑄 𑑕𑑕𑑔 𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷 𑐕𑐣𑑀𑐚 𑐖𑐹𑐐𑐸 𑐫𑐾𑑃𑐩𑐥𑐵𑑄 𑐖𑐵𑐣𑐎𑐵𑐬𑐷 𑐧𑑂𑐫𑐹𑐐𑐸 𑐏𑑅 𑑋 𑐫𑐾𑑃𑐩𑐥𑐵 𑐱𑐶𑐎𑑂𑐲𑐵 𑐰𑐶𑐨𑐵𑐐𑐫𑐵 𑐣𑐶𑐩𑐶𑐟𑑂𑐟 𑐰𑐶𑐨𑐵𑐐𑐷𑐫 𑐥𑑂𑐬𑐩𑐸𑐏 𑐎𑐾𑐱𑐰 𑐖𑑂𑐘𑐵𑐰𑐵𑐮𑐷𑐫𑐵 𑐎𑐠𑑄 𑐣𑑂𑐴𑐵𑐥𑐵𑑄𑐐𑐸 𑐔𑐬𑐞𑐫𑐵 𑐩𑐣𑑀𑐣𑐫𑐣 𑐢𑐮𑑅 𑐳𑐵𑐄𑐣 𑑖 𑐫𑑂 𑐥𑐶𑐎𑐫𑐵𑑅 𑐳𑐵𑐄𑐣 𑑙 𑐐𑐟𑐾𑐡𑐸𑐣𑐾 𑐳𑐩𑑂𑐧𑐣𑑂𑐢𑐶𑐟 𑐱𑐶𑐎𑑂𑐲𑐞 𑐳𑑄𑐳𑑂𑐠𑐵𑐫𑑂 𑐨𑐬𑑂𑐣𑐵 𑐥𑑂𑐬𑐎𑑂𑐬𑐶𑐫𑐵 𑐥𑐹𑐰𑑄𑐐𑐸 𑐏𑑅 𑑋 𑐩𑐣𑑀𑐣𑐫𑐣 𑐏𑐵𑐮𑐶𑐐𑐸 𑐳𑐶𑐚𑐟𑐫𑑂𑐎𑐾 𑐁𑐰𑐾𑐡𑐣𑐫𑐵 𑐥𑑂𑐬𑐵𑐠𑐩𑐶𑐎𑐟𑐵𑐎𑑂𑐬𑐩 𑐰 𑐎𑑀𑐚𑐵𑐫𑐵 𑐁𑐢𑐵𑐬𑐫𑑂 𑐣𑐶𑐐𑐹𑐐𑐸 𑐩𑐣𑑀𑐣𑐫𑐣 𑐢𑐮𑑅 𑐥𑐶𑐟𑐧𑑂𑐫𑐹𑐐𑐸 𑐏𑑅 𑑋

𑐩𑐣𑑀𑐣𑐫𑐣 𑐖𑐹𑐥𑐶𑑄𑐳𑑄 𑐠𑑂𑐰 𑐴𑐾 𑐳𑐵𑐄𑐣 𑑑𑑕 𑐐𑐟𑐾𑐡𑐸𑐣𑐾 𑐳𑐩𑑂𑐧𑐣𑑂𑐢𑐶𑐟 𑐱𑐶𑐎𑑂𑐲𑐞 𑐳𑑄𑐳𑑂𑐠𑐵𑐫𑑂 𑐨𑐬𑑂𑐣𑐵 𑐖𑐸𑐂𑐩𑐵𑑅 𑑋 𑐎𑑂𑐰𑑅𑐕𑐶𑐣𑐵𑐟𑑅𑐐𑐸 𑐃𑐡𑐸𑐣𑐾 𑐨𑐬𑑂𑐣𑐵 𑐩𑐖𑐹𑐳𑐵 𑐕𑐵𑐟𑑂𑐬𑐰𑐺𑐟𑑂𑐟𑐶𑐂 𑐡𑐵𑐧𑐷 𑐫𑐵𑐫𑐾 𑐩𑐡𑐂𑐐𑐸 𑐖𑑂𑐘𑐵𑐰𑐵𑐮𑐷𑑄 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋 𑐣𑑂𑐴𑐵𑐥𑐵𑑄𑐐𑐸 𑐰 𑐣𑐶𑐐𑐹𑐐𑐸 𑐔𑐬𑐞𑐫𑑂 𑐩𑐣𑑀𑐣𑐫𑐣 𑐖𑐸𑐂 𑐩𑐦𑐸𑐥𑐶𑑄 𑐟𑐬 𑐥𑐬𑐷𑐎𑑂𑐲𑐵𑐫𑑂 𑐄𑐟𑑂𑐟𑐷𑐬𑑂𑐞 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂 𑐣𑐶𑑄𑐟𑐶𑑄 𑐳𑐵𑐄𑐣 𑑑𑑖 𑐐𑐟𑐾𑐮𑐶𑐥𑐵 𑐏𑐵𑐮𑐶𑐐𑐸 𑐳𑐶𑐚𑐫𑑂 𑐨𑐬𑑂𑐣𑐵𑐫𑐵 𑐴𑑂𑐰𑑅𑐟𑐵𑑅 𑐧𑐶𑐂𑐐𑐸 𑐰𑐶𑐲𑐫 𑐰 𑐎𑐮𑐾𑐖 𑐥𑑂𑐬𑐵𑐠𑐩𑐶𑐎𑐟𑐵𑐳𑐩𑑂𑐧𑐣𑑂𑐢𑐷 𑐳𑐸𑐔𑑄 𑐥𑐶𑐎𑐵𑐂𑐐𑐸 𑐰𑐶𑐨𑐵𑐐𑐫𑐵 𑐢𑐵𑐥𑐹 𑐡𑐸 𑑋

𑐩𑐣𑑀𑐣𑐫𑐣 𑐢𑐮𑑅 𑐫𑑀𑐐𑑂𑐫𑐟𑐵𑐎𑑂𑐬𑐩 𑐰 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐳𑑄 𑐁𑐰𑐾𑐡𑐣𑐫𑑂 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐱𑐶𑐎𑑂𑐲𑐞 𑐳𑑄𑐳𑑂𑐠𑐵𑐫𑐵 𑐥𑑂𑐬𑐵𑐠𑐩𑐶𑐎𑐟𑐵𑐎𑑂𑐬𑐩𑐫𑐵 𑐁𑐢𑐵𑐬𑐫𑑂 𑐟𑐫𑐵𑐬 𑐫𑐵𑑅𑐐𑐸 𑐏𑑅 𑑋 𑐕𑐣𑑀𑐚 𑐖𑐸𑐫𑐵𑑅 𑐧𑑂𑐰𑐣𑐾𑐟 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫, 𑐳𑑄𑐳𑑂𑐠𑐵𑐐𑐟 𑐰𑐶𑐡𑑂𑐫𑐵𑐮𑐫, 𑐫𑐾𑑃 𑐩𑐴𑐵𑐣𑐐𑐬𑐫𑐵 𑐳𑑂𑐠𑐵𑐫𑐷 𑐧𑐵𑐳𑐶𑐣𑑂𑐡𑐵 𑐰 𑐮𑑂𑐫𑐵𑐞𑑂𑐜𑐦𑐶𑐮 𑐳𑐵𑐂𑐚 𑐮𑐵𑐐𑐵𑐫𑐵 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐥𑑂𑐬𑐵𑐠𑐩𑐶𑐎𑐟𑐵 𑐧𑐶𑐫𑐵𑐟𑑅𑐐𑐸 𑐏𑑅 𑑋 𑐁𑐬𑐎𑑂𑐲𑐞 𑐎𑑀𑐚𑐵𑐫𑑂 𑐕𑐵𑐟𑑂𑐬𑐵, 𑐁𑐡𑐶𑐰𑐵𑐳𑐷 𑐰 𑐖𑐣𑐖𑐵𑐟𑐶, 𑐩𑐢𑐾𑐳𑐷, 𑐏𑐳 𑐁𑐬𑑂𑐫, 𑐡𑐮𑐶𑐟, 𑐩𑐸𑐳𑑂𑐮𑐶𑐩, 𑐠𑐵𑐬𑐸, 𑐀𑐥𑐵𑐒𑑂𑐐𑐟𑐵 𑐖𑐹𑐥𑐶𑑄, 𑐮𑑂𑐫𑐹𑐣𑐾 𑐮𑐵𑑅𑐐𑐸 𑐠𑐵𑐫𑑂𑐫𑐵 𑐩𑐣𑐹, 𑐳𑐴𑐶𑐡 𑐰 𑐧𑐾𑐥𑐟𑑂𑐟𑐵 𑐡𑑂𑐰𑐣𑑂𑐡𑑂𑐰𑐥𑐷𑐜𑐶𑐟 𑐕𑐾𑑃𑐖𑑅𑐫𑐵 𑐰𑐶𑐡𑑂𑐫𑐵𑐬𑑂𑐠𑐷 𑐡𑐸𑐠𑑂𑐫𑐵𑑅 𑑋

𑐰𑐶𑐳𑑄 𑑒𑑐𑑘𑑒 𑐳𑐵𑐄𑐣 𑑓 𑐐𑐟𑐾 𑑕𑑔 𑐥𑐬𑐷𑐎𑑂𑐲𑐵 𑐎𑐾𑐣𑑂𑐡𑑂𑐬𑐟𑐫𑑂𑐎𑐾 𑐳𑐘𑑂𑐔𑐵𑐮𑐶𑐟 𑐥𑑂𑐬𑐰𑐾𑐱 𑐥𑐬𑐷𑐎𑑂𑐲𑐵𑐫𑑂 𑑑𑑔 𑐡𑑂𑐰𑑅 𑐰 𑑑𑑗𑑓 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐳𑑄 𑐧𑑂𑐰𑐟𑐶 𑐎𑐵𑑅𑐐𑐸 𑐏𑑅 𑑋 𑐟𑐐𑐶𑑄 𑑑𑑐 𑐫𑐵 𑐥𑐵𑐛𑑂𑐫𑐎𑑂𑐬𑐩𑐫𑑂 𑐁𑐢𑐵𑐬𑐶𑐟 𑐄𑐐𑐸 𑐥𑐬𑐷𑐎𑑂𑐲𑐵𑐫𑑂 𑐐𑐞𑐶𑐟, 𑐰𑐶𑐖𑑂𑐘𑐵𑐣 𑐰 𑐀𑐒𑑂𑐐𑑂𑐬𑐾𑐖𑐷𑑄 𑑓𑑐–𑑓𑑐 𑐐𑐹 𑐣𑑂𑐴𑑂𑐫𑐳𑑅 𑐰 𑐳𑐵𑐩𑐵𑐣𑑂𑐫 𑐖𑑂𑐘𑐵𑐣𑐥𑐵𑐏𑐾𑑄 𑑑𑑐 𑐐𑐹 𑐣𑑂𑐴𑑂𑐫𑐳𑑅 𑐫𑐵𑐣𑐵𑑅 𑐩𑐸𑐎𑑂𑐎𑑄 𑑑𑑐𑑐 𑐐𑐹 𑐧𑐴𑐸𑐰𑐿𑐎𑐮𑑂𑐥𑐶𑐎 𑐣𑑂𑐴𑑂𑐫𑐳𑑅 𑐡𑐸𑐠𑑂𑐫𑐵𑑅𑐐𑐸 𑐏𑑅 𑑋 𑐥𑑂𑐬𑐵𑐬𑐩𑑂𑐨𑐶𑐎 𑐮𑐶𑐔𑑂𑐰𑑅 𑐳𑐵𑐄𑐣 𑑔 𑐫𑑂 𑐰 𑐥𑐸𑐣𑐬𑑂𑐫𑑀𑐐𑐫𑐵 𑐮𑐶𑐔𑑂𑐰𑑅 𑐳𑐵𑐄𑐣 𑑖 𑐐𑐟𑐾 𑐥𑐶𑐎𑐵𑑅𑐐𑐸 𑐏𑑅 𑑋