𑐫𑐮 -𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐡𑐸𑐣𑐾𑐫𑐵 𑐳𑑂𑐎𑐸𑐮𑐫𑑂 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐐𑐸 𑐣𑐶𑑄𑐟𑐶𑑄 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐟𑐫𑐵𑐬 𑐖𑐹𑐐𑐸 𑐡𑐸 𑑋 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑐾𑐫𑐬 𑐔𑐶𑐬𑐶𑐧𑐵𑐧𑐸 𑐩𑐴𑐬𑑂𑐖𑐣𑐫𑐵𑐟 𑐁𑐂𑐟𑐰𑐵𑑅 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐥𑐵𑐛𑑂𑐫𑐎𑑂𑐬𑐩 𑐮𑑅𑐮𑑂𑐴𑐵𑑅𑐐𑐸 𑐡𑐸 𑑋 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐟𑐫𑐵𑐬𑐷 𑐎𑐩𑐶𑐚𑐷𑐫𑐵 𑐳𑑄𑐫𑑀𑐖𑐎 𑐰 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐱𑐶𑐎𑑂𑐲𑐵𑐢𑐶𑐎𑐵𑐬𑐷 𑐩𑐴𑐾𑐣𑑂𑐡𑑂𑐬𑐧𑐴𑐵𑐡𑐸𑐬 𑐎𑑂𑐲𑐾𑐟𑑂𑐬𑐷 𑐰 𑐳𑐴–𑐳𑑄𑐫𑑀𑐖𑐎 𑐟𑐸𑐮𑐳𑐷𑐮𑐵𑐮 𑐳𑐶𑑄𑐴𑑄 𑐥𑐵𑐛𑑂𑐫𑐎𑑂𑐬𑐩 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑐥𑐵𑐛𑐫𑑂𑐎𑑂𑐬𑐩 𑐮𑑅𑐮𑑂𑐴𑐵𑐣𑐵 𑐎𑐫𑐵𑐡𑐶𑐳𑐾𑑄 𑐩𑐾𑐫𑐬 𑐩𑐴𑐬𑑂𑐖𑐣𑑄 𑐰𑐂𑐐𑐸 𑐱𑐿𑐎𑑂𑐲𑐶𑐎 𑐳𑐟𑑂𑐬𑐫𑑂 𑐴𑐾 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐐𑐸 𑐥𑑂𑐬𑐟𑐶𑐧𑐡𑑂𑐢𑐟𑐵 𑐥𑑂𑐰𑑄𑐎𑐵𑐡𑐶𑐳𑐾𑑄 𑐢𑐫𑐵𑐡𑐶𑐮, ‘𑐣𑑂𑐴𑐹𑐐𑐸 𑐱𑐿𑐎𑑂𑐲𑐶𑐎 𑐳𑐟𑑂𑐬 𑐳𑐸𑐬𑐸 𑐖𑐸𑐂𑐟 𑐫𑐎𑑂𑐰 𑐃 𑐩𑐡𑐫𑐾𑐢𑐸𑑄𑐎𑐮 𑑋 𑐥𑐵𑐛𑑂𑐫𑐥𑐸𑐳𑑂𑐟𑐎 𑐥𑐶𑐠𑐣𑐾𑐐𑐸, 𑐖𑐣𑐱𑐎𑑂𑐟𑐶 𑐟𑐫𑐵𑐬 𑐫𑐵𑐫𑐾𑐐𑐸 𑐖𑑂𑐫𑐵 𑐮𑐶𑐳𑐾𑑄 𑐩𑐾𑐩𑐾𑐐𑐸 𑐖𑑂𑐫𑐵 𑐫𑐎𑑂𑐰 𑐮𑑂𑐫𑑄 𑐡𑐣𑐶, 𑐀𑐠𑐾 𑐏𑑅𑐳𑐵𑑄 𑐰𑐂𑐐𑐸 𑐱𑐿𑐎𑑂𑐲𑐶𑐎 𑐳𑐟𑑂𑐬𑐫𑑂 𑐴𑐾 𑐮𑐵𑐐𑐹 𑐫𑐵𑐫𑐾𑐐𑐸 𑐎𑐠𑑄 𑐣𑑂𑐴𑑂𑐫𑐵𑑅 𑐰𑐣𑐾𑐐𑐸 𑐖𑐸𑐂 𑑋’

𑐰𑐫𑑂𑐎𑐮𑑄 𑐥𑐵𑐛𑑂𑐫𑐥𑐸𑐳𑑂𑐟𑐎 𑐥𑐶𑐎𑐵𑐫𑐾𑐟, 𑐧𑑂𑐰𑑄𑐎𑐷𑐥𑐶𑑄 𑐣𑑂𑐴𑐹𑐥𑐶𑑄 𑐖𑐣𑐱𑐎𑑂𑐟𑐶 𑐟𑐫𑐵𑐬 𑐫𑐵𑐫𑐾𑐐𑐸 𑐏𑐬𑑂𑐔 𑐠𑐸𑐐𑐸𑐳𑐷𑐫𑐵 𑐧𑐖𑐾𑐚𑐫𑑂 𑐡𑐸𑐠𑑂𑐫𑐵𑐣𑐵 𑐩𑐔𑑂𑐰𑑄𑐐𑐸 𑐏𑑃 𑐣𑑂𑐴𑑂𑐫𑐠𑐣𑐵𑐡𑐶𑐳𑐾𑑄 𑐀𑐠𑐾 𑐏𑑅𑐳𑐵𑑄 𑐩𑐾𑐩𑐾𑐐𑐸 𑐏𑐬𑑂𑐔 𑐩𑐖𑐹𑐐𑐸 𑐧𑐖𑐾𑐚 𑐬𑐎𑐩𑐵𑐣𑑂𑐟𑐬 𑐫𑐵𑐣𑐵𑑅 𑐖𑐹𑐳𑐵𑑄 𑐖𑑂𑐫𑐵 𑐣𑑂𑐴𑑂𑐫𑐵𑐎𑐾𑐐𑐸 𑐏𑑃 𑐣𑑄 𑐢𑐫𑐵𑐡𑐷𑐐𑐸 𑐡𑐸 𑑋 ‘𑐠𑐸𑐐𑐸 𑐁𑐬𑑂𑐠𑐶𑐎 𑐡𑑃𑐫𑐵 𑐧𑐖𑐾𑐚𑐫𑑂 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩𑐫𑐵 𑐣𑐶𑑄𑐟𑐶𑑄 𑐩𑐵𑑅𑐐𑐸 𑐧𑐖𑐾𑐚 𑐦𑑂𑐫𑐵𑐣𑐵𑐟𑑅𑐐𑐸 𑐩𑐡𑐸, 𑐀𑐠𑐾 𑐏𑑅𑐳𑐵𑑄 𑐩𑐾𑐐𑐸 𑐏𑐬𑑂𑐔 𑐩𑐖𑐹𑐐𑐸 𑐱𑐷𑐬𑑂𑐲𑐎𑐥𑐵𑐏𑐾𑑄 𑐖𑐹𑐳𑐵𑑄 𑐬𑐎𑐩𑐵𑐣𑑂𑐟𑐬 𑐫𑐵𑐣𑐵𑑅 𑐧𑐖𑐾𑐚 𑐴𑐫𑐾𑐐𑐸 𑐖𑐸𑐂 𑑋 𑐧𑐖𑐾𑐚 𑐬𑐎𑐩𑐵𑐣𑑂𑐟𑐬 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐣𑐐𑐬 𑐥𑐬𑐶𑐲𑐡𑑂𑐫𑐵 𑐳𑑂𑐰𑐷𑐎𑐺𑐟𑐶 𑐩𑐵𑑅, 𑐄𑐎𑐶𑑄 𑐣𑐐𑐬 𑐥𑐬𑐶𑐲𑐡𑑂 𑐥𑐵𑐏𑐾𑑄 𑐳𑑂𑐰𑐷𑐎𑐺𑐟𑐶 𑐎𑐵𑐫𑐾𑐐𑐸 𑐣𑐶𑑄𑐟𑐶𑑄 𑐎𑐸𑐟𑑅 𑐫𑐵𑐫𑐾𑐐𑐸 𑐖𑐸𑐂’ 𑐰𑐫𑑂𑐎𑐮𑑄 𑐢𑐫𑐵𑐡𑐷𑐐𑐸 𑐡𑐸 𑑋

𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐀𑐣𑑂𑐟𑐬𑑂𑐐𑐟𑐫𑑂 𑐮𑐵𑑅𑐐𑐸 𑐳𑐵𑐩𑐸𑐡𑐵𑐫𑐶𑐎 𑐰 𑐣𑐶𑐖𑐷 𑐳𑑂𑐎𑐸𑐮𑐫𑑂 𑐂𑐳𑐷𑐜𑐷 (𑐀𑐬𑑂𑐮𑐷 𑐔𑐵𑐂𑐮𑑂𑐜 𑐜𑐾𑐨𑐮𑐥𑐩𑐾𑐣𑑂𑐚) 𑐎𑐎𑑂𑐲𑐵 𑐣𑐶𑐳𑐾𑑄 𑑓 𑐎𑐎𑑂𑐲𑐵 𑐟𑐎 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐮𑐵𑐐𑐸 𑐫𑐵𑐫𑐾𑐐𑐸 𑐎𑐠𑑄 𑐥𑐵𑐛𑑂𑐫𑐎𑑂𑐬𑐩 𑐟𑐫𑐵𑐬 𑐫𑐵𑑅𑐐𑐸 𑐏𑑅 𑑋 𑐥𑐵𑐛𑑂𑐫𑐎𑑂𑐬𑐩 𑐮𑑅𑐮𑑂𑐴𑐵𑐣𑐵𑐡𑐶𑐳𑐾𑑄 𑐳𑐴𑐳𑑄𑐫𑑀𑐖𑐎 𑐟𑐸𑐮𑐳𑐷𑐮𑐵𑐮 𑐳𑐶𑑄𑐴𑑄 𑐩𑐳𑑂𑐟𑐫𑑂𑐳𑑄 𑐀𑑅𑐥𑐸𑐎 𑐧𑑂𑐰𑐣𑐾𑐦𑐂 𑐎𑐠𑑄 𑐥𑐵𑐛𑑂𑐫𑐎𑑂𑐬𑐩 𑐟𑐫𑐵𑐬 𑐫𑐵𑐣𑐵𑐐𑐸 𑐏𑑃 𑐢𑐫𑐵𑐡𑐶𑐮 𑑋

𑐔𑐶𑐔𑐶𑐢𑐶𑐎𑑅𑐥𑐶𑑄 𑐩𑐳𑑂𑐟𑐫𑑂𑐳𑑄 𑐫𑐵𑐄𑑃𑐎 𑐧𑑂𑐰𑐣𑐾 𑐦𑐂𑐎𑐠𑑄, 𑐠𑐸𑐂𑐎𑐾 𑐦𑐂𑐎𑐠𑑄 𑐧𑑂𑐫𑐵𑐎𑐬𑐞𑐫𑐵𑐟 𑐳𑑂𑐰𑐫𑐵𑑄 𑐣𑑄 𑐣𑐵𑑄 𑐏𑑃𑐐𑑂𑐰𑑅𑐫𑐵𑐟 𑐰𑐶𑐱𑐾𑐲 𑐥𑑂𑐬𑐵𑐠𑐩𑐶𑐎𑐟𑐵 𑐧𑐶𑐫𑐵𑑅 𑐥𑐵𑐛𑑂𑐫𑐎𑑂𑐬𑐩 𑐟𑐫𑐵𑐬 𑐫𑐵𑐣𑐵𑐐𑐸 𑐏𑑃 𑐎𑐣𑐵𑐡𑐶𑐳𑐾𑑄 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮, ‘𑐟𑑅𑐢𑐶𑐎𑑅𑐥𑐶𑑄𑐟 𑐕𑐎𑑂𑐰𑐮𑑄 𑐨𑐵𑐫𑑂 𑐧𑑂𑐰𑑄𑐎𑐾𑐧𑐮𑐫𑑂 𑐠𑐵𑐎𑐸𑐂𑐦𑐸, 𑐀𑐠𑐾 𑐖𑐸𑐮 𑐢𑐵𑑅𑐳𑐵 𑐥𑐵𑐛𑑂𑐫𑐎𑑂𑐬𑐩𑐫𑐵𑐟 𑐮𑐵𑐐𑐹 𑐫𑐵𑐫𑐾𑐟 𑐣𑑄 𑐳𑐩𑐳𑑂𑐫𑐵 𑐰𑐫𑐾𑐦𑐸 𑐢𑐫𑐵𑐐𑐸 𑐩𑐾𑐫𑐬 𑐩𑐴𑐬𑑂𑐖𑐣𑐫𑐵 𑐢𑐵𑐥𑐹 𑐏𑑅 𑑋 𑐮𑐶𑐥𑐵 𑐳𑐩𑐳𑑂𑐫𑐵 𑐩𑐰𑐫𑐾𑐎 𑐮𑐵𑐐𑐹 𑐫𑐵𑐣𑐵𑐫𑑄𑐎𑐾𑐐𑐸 𑐏𑑅𑐳𑐵 𑐩𑐔𑐵𑐧𑐮𑐫𑑂 𑐣𑐶𑐳𑐾𑑄 𑐧𑑂𑐰𑑄𑐎𑐾𑐐𑐸 𑐴𑐾 𑐡𑐎𑐮𑐫𑑂 𑐧𑐵𑑄𑐮𑐵𑑅𑐐𑐸 𑐄𑐥𑐵𑐫 𑐖𑐸𑐂 𑑋 𑐰 𑐴𑐾 𑐎𑐠𑑄 𑐁𑑅𑐫𑐵𑐟 𑐂𑐳𑐷𑐜𑐷 𑐎𑐎𑑂𑐲𑐵 𑐣𑐶𑐳𑐾𑑄 𑑓 𑐎𑐎𑑂𑐲𑐵 𑐟𑐎 𑐮𑐵𑐐𑐸 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐥𑐵𑐛𑑂𑐫𑐎𑑂𑐬𑐩 𑐟𑐫𑐵𑐬 𑐖𑐹𑐐𑐸 𑐡𑐸 𑑋 𑐠𑑂𑐰 𑐢𑐸𑑄𑐎𑐵𑑅 𑐧𑐸𑐮𑐸𑐴𑐸𑑃 𑐩𑐾𑐩𑐾𑐐𑐸 𑐟𑐐𑐶𑐩𑐫𑑂 𑐣𑑄 𑐧𑑂𑐰𑑄𑐎𑐵 𑐫𑑄𑐎𑐾𑐐𑐸 𑐁𑐢𑐵𑐬 𑐟𑐫𑐵𑐬 𑐖𑐸𑐂𑐐𑐸 𑐖𑐶𑐩𑐶𑐐𑐸 𑐰𑐶𑐱𑑂𑐰𑐵𑐳 𑐡𑐸 𑑋’

𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑑂 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐎𑐠𑑄 𑐣𑐾𑐥𑐵𑐮𑐨𑐵𑐲𑐵 𑐮𑐵𑐐𑐸 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐟𑐵𑑅𑐃 𑐣𑑂𑐴𑑂𑐫𑐰 𑐴𑐾 𑐏𑑃 𑐖𑐹𑐐𑐸 𑐏𑑅𑐳𑐵𑑄 𑐮𑐶𑐥𑐵 𑐀𑐠𑐾𑑄 𑐡𑐶𑐣𑐵𑐔𑑂𑐰𑑄𑐐𑐸 𑐏𑑅 𑑋 𑐠𑐸𑐎𑐶𑐫𑐵𑐟 𑐖𑑂𑐫𑐵𑐥𑐸 𑐳𑐩𑐵𑐖𑐫𑐵 𑐣𑐵𑐫𑑅 𑐟𑐷𑐬𑑂𑐠𑐮𑐵𑐮 𑐩𑐴𑐬𑑂𑐖𑐣𑐫𑐵 𑐥𑐴𑐮𑐫𑑂 𑐴𑐵𑐎𑐣𑑄 𑐣𑑂𑐴𑑂𑐫𑐵𑐎𑐵𑐐𑐸 𑐏𑑃 𑐣𑑄 𑐳𑐴𑐳𑑄𑐫𑑀𑐖𑐎 𑐩𑐴𑐬𑑂𑐖𑐣𑑄 𑐎𑐣𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐣𑐵𑐡𑐶𑐳𑐾𑑄 𑐥𑐵𑐛𑑂𑐫𑐎𑑂𑐬𑐩 𑐟𑐫𑐵𑐬𑐷 𑐎𑐩𑐶𑐚𑐷𑐫𑐵 𑐡𑐸𑐖𑑅 𑐡𑐶𑐥𑐎 𑐟𑐸𑐮𑐵𑐢𑐬𑑄 𑐳𑑂𑐠𑐵𑐣𑐷𑐫 𑐟𑐴𑑄 𑐧𑐖𑐾𑐚 𑐧𑐶𑐫𑐵𑑅 𑐥𑐵𑐛𑑂𑐫𑐎𑑂𑐬𑐩 𑐮𑐵𑐐𑐹 𑐖𑐎 𑐫𑐵𑐫𑐾𑐰𑑄 𑐳𑐦𑐮 𑐖𑐸𑐂 𑐢𑐫𑐵𑐐𑐸 𑐡𑐂𑐩𑐏𑐸 𑐢𑐵𑐳𑐾𑑄 𑐠𑐸𑐎𑐶𑐫𑐵 𑐣𑐶𑑄𑐟𑐶𑑄 𑐀𑐨𑐶𑐨𑐵𑐰𑐎𑐥𑐶𑑄𑐳𑑄 𑐣𑑄 𑐎𑐸𑐟𑑅 𑐫𑐵𑐫𑐾𑐩𑐵𑑅𑐐𑐸 𑐏𑑃 𑐢𑐫𑐵𑐡𑐶𑐮 𑑋 ‘𑐀𑐨𑐶𑐨𑐵𑐰𑐎𑐥𑐶𑑄𑐳𑑄 𑐠𑑅 𑐩𑐳𑑂𑐟 𑐧𑑂𑐰𑑄𑐎𑐵𑐟𑐫𑐵𑐐𑐸 𑐳𑑂𑐎𑐸𑐮𑐫𑑂 𑐥𑐵𑐛𑑂𑐫𑐎𑑂𑐬𑐩 𑐐𑐸𑐎𑐠𑑄 𑐧𑑂𑐰𑑄𑐎𑐵𑐔𑑂𑐰𑑄𑐐𑐸 𑐡𑐸 𑐢𑐎𑐵𑑅 𑐣𑑂𑐫𑐣𑐾𑐎𑐣𑐾 𑐫𑐵𑐣𑐵𑑅 𑐣𑐶𑐬𑐣𑑂𑐟𑐬 𑐬𑐸𑐥𑑄 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐟 𑐥𑑂𑐬𑑀𑐟𑑂𑐳𑐵𑐴𑐶𑐟 𑐫𑐵𑐣𑐵𑐔𑑂𑐰𑐣𑐾𑐩𑐵𑑅 𑑋 𑐠𑐸𑐎𑐶𑐫𑐵 𑐣𑐶𑑄𑐟𑐶𑑄 𑐫𑐮𑐫𑑂 𑐖𑐵𑐟𑐷𑐫 𑐏𑐮𑑅𑐥𑐸𑐔𑑅𑐟𑐫𑑂𑐐𑐸 𑐣𑑄 𑐰𑐶𑐱𑐾𑐲 𑐨𑐹𑐩𑐶𑐎𑐵 𑐖𑐸𑐂’ 𑐰𑐫𑑂𑐎𑐮𑑄 𑐢𑐫𑐵𑐡𑐷𑐐𑐸 𑐡𑐸 𑑋

𑐖𑐵𑐟𑐷𑐫 𑐳𑐩𑐵𑐖 𑐫𑐮𑐥𑐵𑐏𑐾𑑄 𑐥𑐵𑐛𑑂𑐫𑐎𑑂𑐬𑐩 𑐮𑐵𑐐𑐹 𑐖𑐸𑐂𑐰𑑄 𑐳𑑂𑐎𑐸𑐮𑐫𑑂 𑐀𑐣𑐸𑐐𑐩𑐣 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐳𑐩𑐵𑐖𑐥𑐵𑐏𑐾𑑄 𑐣𑐾𑐥𑐵𑐮𑐨𑐵𑐲𑐵 𑐩𑑄𑐎𑐵𑑅 𑐏𑐮𑑅 𑐫𑐮𑐫𑐵 𑐣𑐵𑐫𑑅 𑐆𑐲𑐶𑐥𑑂𑐬𑐳𑐵𑐡 𑐱𑑂𑐬𑐾𑐲𑑂𑐛𑐫𑐵 𑐳𑑄𑐫𑑀𑐖𑐎𑐟𑑂𑐰𑐫𑑂 𑐕𑐐𑐹 𑐎𑐵𑐬𑑂𑐫𑐡𑐮 𑐡𑐫𑐾𑐎𑐾𑐢𑐸𑐣𑐵𑐐𑐸 𑐖𑐵𑐣𑐎𑐵𑐬𑐷 𑐣𑑄 𑐧𑐶𑐄𑐐𑐸 𑐏𑑅 𑑋 𑐀𑐠𑐾𑐴𑐾 𑐩𑐴𑐵𑐣𑐐𑐬 𑐥𑑂𑐬𑐩𑐸𑐏 𑐩𑐴𑐬𑑂𑐖𑐣𑑄 𑐀𑐣𑐸𑐐𑐩𑐣 𑐰 𑐳𑐴𑐖𑐷𑐎𑐬𑐞𑐫𑐵 𑐣𑐶𑑄𑐟𑐶𑑄 𑐥𑐵𑐛𑑂𑐫𑐎𑑂𑐬𑐩 𑐟𑐫𑐵𑐬𑐷 𑐎𑐩𑐶𑐚𑐷𑐫𑐵𑐟 𑐴𑐾 𑐣𑐶𑐬𑐣𑑂𑐟𑐬𑐟𑐵 𑐧𑐶𑐫𑐵𑑅 𑐰𑐣𑐾𑐐𑐸 𑐥𑑂𑐬𑐟𑐶𑐧𑐡𑑂𑐢𑐟𑐵 𑐣𑑄 𑐥𑑂𑐰𑑄𑐎𑐵𑐡𑐷𑐐𑐸 𑐏𑑅 𑑋

https://nepalbhasatimes.com/46145