𑐩𑐵𑐨𑐵𑐳𑑄 𑐣𑑂𑐴𑑂𑐫𑐵𑐎𑐵𑐔𑑂𑐰𑑄𑐐𑐸 𑐥𑐟𑑂𑐬𑐎𑐵𑐬𑐶𑐟𑐵𑐫𑑂 𑐠𑑁𑑄𑐫𑐵 𑐀𑐰𑐳𑑂𑐠𑐵 𑐰𑐶𑐲𑐫𑐳 𑐠𑑁𑑄 𑐁𑐂𑐟𑐰𑐵𑑅 𑐕𑐐𑐹 𑐐𑑀𑐲𑑂𑐛𑐷 𑐖𑐹𑐐𑐸 𑐡𑐸 𑑋 𑐫𑐾𑑃𑐫𑐵 𑐰𑐶𑐱𑐵𑐮𑐧𑐖𑐵𑐬𑐫𑑂 𑐔𑑂𑐰𑑄𑐐𑐸 𑐧𑐾𑐣𑑂𑐚𑑀𑐫𑑂 𑐖𑐹𑐐𑐸 𑐠𑐸𑐐𑐸 𑐐𑑀𑐲𑑂𑐛𑐷𑐫𑐵 𑐩𑐹𑐥𑐵𑐴𑐵𑑃 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐄𑐥–𑐥𑑂𑐬𑐩𑐸𑐏 𑐳𑐸𑐣𑐶𑐟𑐵 𑐜𑑄𑐐𑑀𑐮𑑄 𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑑅𑐫𑐵 𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐶𑐳𑐾𑑄 𑐄𑐥–𑐥𑑂𑐬𑐩𑐸𑐏 𑐜𑑄𑐐𑑀𑐮𑑄 𑐩𑐵𑑄𑐨𑐵𑐳𑑄 𑐥𑐟𑑂𑐬𑐎𑐵𑐬𑐶𑐟𑐵𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐔𑑂𑐰𑐕𑐵𑐫𑐾𑐧𑐴𑑅𑐖𑐹 𑐢𑐫𑐵𑐡𑐶𑐳𑐾𑑄 𑐨𑐵𑐫𑑂 𑐣𑐵𑐥𑐣𑐵𑐥𑑄 𑐮𑐶𑐥𑐶𑐫𑐵 𑐣𑑄 𑐰𑐶𑐎𑐵𑐳 𑐫𑐵𑐫𑐾𑐩𑐵𑑅𑐐𑐸 𑐏𑑃𑐫𑑂 𑐧𑑅 𑐧𑐶𑐫𑐵𑐡𑐶𑐮 𑑋 𑐐𑐸𑐮𑐶𑐏𑐾 𑐩𑐣𑐹𑐟𑐫𑐳𑑄 𑐨𑐵𑐫𑑂 𑐰 𑐮𑐶𑐥𑐶 𑐧𑐶𑐳𑑂𑐎𑑄 𑐢𑐎𑐵𑑅 𑐠𑐸𑐂𑐎𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸𑐮𑐶𑑄 𑐀𑐠𑐾 𑐩𑐏𑐸𑐳𑐾 𑐨𑐵𑐫𑑂 𑐰 𑐮𑐶𑐥𑐶 𑐣𑐵𑐥𑐣𑐵𑐥𑑄 𑐫𑑄𑐎𑐾𑐩𑐵𑑅𑐐𑐸 𑐢𑐫𑐵𑐡𑐶𑐮 𑑋 𑐮𑐶𑐥𑐶 𑐳𑐸𑐣𑑂𑐡𑐬𑐷𑐫𑐵 𑐄𑐥𑐣𑐵𑐩𑑄 𑐣𑐵𑑄𑐖𑐵𑑅𑐩𑑂𑐴 𑐄𑐥–𑐥𑑂𑐬𑐩𑐸𑐏 𑐜𑑄𑐐𑑀𑐮𑑄 𑐥𑐟𑑂𑐬𑐎𑐵𑐬𑐶𑐟𑐵 𑐏𑑂𑐫𑐮𑐫𑑂 𑐣𑑄 𑐥𑐬𑐩𑑂𑐥𑐬𑐵𑐐𑐟 𑐧𑐶𑐔𑐵𑑅𑐫𑐵𑐟 𑐴𑐵𑐔𑐵𑑄 𑐐𑐵𑐫𑐵𑑅 𑐣𑑂𑐴𑐹𑐐𑐸 𑐎𑐠𑑄 𑐣𑑂𑐴𑑂𑐫𑐵𑑄𑐰𑐣𑐾𑐩𑐵𑑅𑐐𑐸 𑐢𑐫𑐵𑐡𑐶𑐮 𑑋 𑐄𑐥–𑐥𑑂𑐬𑐩𑐸𑐏 𑐜𑑄𑐐𑑀𑐮𑑄 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐰𑑄𑐐𑐸 𑐡𑑃𑐣𑐶𑐳𑐾𑑄 𑐳𑑂𑐠𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐮𑐵𑐐𑐸 𑐫𑐵𑑅𑐐𑐸 𑐟𑐳𑐎𑑄 𑐧𑐵𑑄𑐮𑐵𑑅𑐐𑐸 𑐖𑑂𑐫𑐵 𑐖𑐹𑐐𑐸𑐮𑐶𑑄 𑐩𑐵𑑅𑐐𑐸 𑐐𑑂𑐰𑐴𑐵𑐮𑐶𑐫𑐵𑐣𑐵𑑄 𑐠𑐸𑐎𑐷𑐫𑐵𑐟 𑐩𑐡𑑂𑐡𑐶𑐎𑑂𑐎 𑐣𑑂𑐴𑑂𑐫𑐵𑐎𑐵𑐫𑑄𑐎𑐾𑐐𑐸 𑐖𑐸𑐂 𑐢𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐨𑐵𑐖𑐸 𑐬𑐵𑐎𑐾𑐱 𑐩𑐴𑐬𑑂𑐖𑐣𑑄 𑐔𑑂𑐰𑐫𑐵𑐡𑐷𑐐𑐸 𑐰 𑐣𑐾𑐰𑐵𑑅 𑐥𑐟𑑂𑐬𑐎𑐵𑐬 𑐬𑐵𑐲𑑂𑐚𑑂𑐬𑐶𑐫 𑐡𑐧𑐹, 𑐫𑐾𑑃 𑐎𑐔𑐵𑑄 𑐥𑐶𑐠𑑄𑐐𑐸 𑐥𑐟𑑂𑐬𑐎𑐵𑐬𑐶𑐟𑐵𑐫𑐵 𑐰𑐶𑐲𑐫𑐫𑐵 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑑂𑐣𑐵𑐟𑐎 𑐟𑐴𑐫𑐵 𑐥𑐵𑐛𑑂𑐫𑐎𑑂𑐬𑐩𑐫𑑂 𑐡𑐸𑐠𑑂𑐫𑐵𑑅𑐐𑐸 “𑐁𑐩 𑐳𑐘𑑂𑐔𑐵𑐬 𑐰 𑐣𑐾𑐥𑐵𑐮𑐨𑐵𑐲𑐵𑐫𑐵 𑐥𑐟𑑂𑐬𑐎𑐵𑐬𑐶𑐟𑐵” 𑐳𑐦𑐹𑐫𑐵 𑐣𑑄 𑐩𑐹 𑐥𑐵𑐴𑐵𑑃 𑐄𑐥–𑐥𑑂𑐬𑐩𑐸𑐏 𑐜𑑄𑐐𑑀𑐮𑐮𑐶𑐳𑐾𑑄 𑐥𑐵𑐴𑐵𑑃𑐥𑐶𑑄 𑐳𑐎𑐳𑐶𑐣𑑄 𑐩𑑄𑐎𑐵𑑅 𑐎𑐠𑑄 𑐔𑐶𑐏𑐶𑐦𑑂𑐫𑐣𑐵𑐡𑐷𑐐𑐸 𑐏𑑅𑐳𑐵 𑐥𑐟𑑂𑐬𑐎𑐵𑐬 𑐩𑐣𑑀𑐖𑐬𑐟𑑂𑐣 𑐱𑐵𑐴𑐷𑑄 𑐕𑐵𑐫𑐵𑑃𑐒𑑂𑐎𑐣 𑐰 𑐣𑐶𑐬𑑂𑐡𑐾𑐱𑐣 𑐫𑐵𑐣𑐵𑐡𑐷𑐐𑐸 𑐰𑐶𑐱𑑂𑐰 𑐳𑐩𑑂𑐥𑐡𑐵 𑐢𑐮𑐏𑐫𑑂 𑐮𑐵𑑅𑐐𑐸 “𑐳𑑂𑐰𑐫𑐩𑑂𑐨𑐸”𑐫𑐵 𑐰𑐺𑐟𑑂𑐟𑐔𑐶𑐟𑑂𑐬𑐫𑐵 𑐣𑑄 𑐄𑐥–𑐥𑑂𑐬𑐩𑐸𑐏 𑐜𑑄𑐐𑑀𑐮𑑄 𑐳𑐵𑐬𑑂𑐰𑐖𑐣𑐶𑐎 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐥𑐵𑐮𑐨𑐵𑐲𑐵, 𑐩𑐿𑐠𑐶𑐮𑐶, 𑐮𑐶𑐩𑑂𑐧𑐹, 𑐟𑐵𑐩𑐵𑐒, 𑐬𑐵𑐖𑐰𑑄𑐱𑐷, 𑐩𑐾𑐔𑐾, 𑐳𑑄𑐳𑑂𑐎𑐺𑐟, 𑐱𑐾𑐬𑑂𑐥𑐵, 𑐠𑐵𑐬𑐸 𑐁𑐡𑐶𑐳𑐴𑐶𑐟 𑐗𑐶𑑄𑐣𑑂𑐫𑐵𑐐𑐹 𑐨𑐵𑐫𑐫𑐵 𑐥𑐟𑑂𑐬𑐎𑐵𑐬𑐶𑐟𑐵𑐫𑐵 𑐀𑐰𑐳𑑂𑐠𑐵𑐧𑐵𑐬𑐾 𑐎𑐵𑐬𑑂𑐫𑐥𑐟𑑂𑐬 𑐣𑑂𑐴𑑂𑐫𑐧𑑂𑐰𑑅𑐐𑐸 𑐏𑑅 𑑋

𑐣𑐾𑐰𑐵𑑅 𑐥𑐟𑑂𑐬𑐎𑐵𑐬 𑐬𑐵𑐲𑑂𑐚𑑂𑐬𑐶𑐫 𑐡𑐧𑐹, 𑐫𑐾𑑃 𑐎𑐔𑐵𑐫𑐵 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑑅 𑐐𑑂𑐰𑐳𑐵𑑅 𑐏𑐮𑑅𑐫𑐵 𑐣𑐵𑐫𑑅 𑐀𑐬𑑂𑐧𑐶𑐣𑑂𑐡𑑂𑐬𑐣𑐩𑐵𑐣 𑐳𑐶𑑄𑐴𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐏𑑅𑐳𑐵 𑐳𑐸𑐲𑑂𑐩𑐵 𑐩𑐴𑐬𑑂𑐖𑐣𑑄 𑐖𑑂𑐫𑐵𑐗𑑂𑐰: 𑐣𑑂𑐴𑑂𑐫𑐵𑐎𑐵𑐡𑐷𑐐𑐸 𑐏𑑅 𑑋