𑐣𑐾𑐰𑐵: 𑐀𑐣𑐮𑐵𑐂𑐣 𑐣𑑂𑐫𑐸𑐖 – 𑐰𑐶𑐖𑐫𑐬𑐟𑑂𑐣 | 𑑒𑑐𑑗𑑖 𑐧𑐿𑐱𑐵𑐏 𑑓𑑑, 𑐩𑑄𑐐𑐮𑐧𑐵𑐬 𑑑𑑘:𑑑𑑐:𑑔𑑓

𑐣𑐾𑐥𑐵𑐮𑐨𑐵𑐲𑐵𑐫𑐵 𑐤𑐵𑐥𑐵𑑄𑐐𑐸 𑐳𑑄𑐳𑑂𑐠𑐵 𑐔𑑂𑐰𑐳𑐵𑐥𑐵𑐳𑐵 𑐥𑐮𑐶𑐳𑑂𑐠𑐵 𑐫𑐵𑐣𑐵𑑅 𑐠𑑅𑐐𑐸 𑐖𑐷𑐰𑑄𑐎𑐵𑐕𑐶 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑑂 𑐳𑐩𑐬𑑂𑐥𑐶𑐟 𑐫𑐵𑐣𑐵𑑅 𑐗𑐵𑑅𑐪 𑐨𑐵𑐲𑐵𑐣𑐶𑐨𑐵𑑅 𑐥𑑂𑐬𑐾𑐩𑐧𑐴𑐵𑐡𑐸𑐬 𑐎𑐳𑐵𑑅𑐫𑐵 𑐠𑑁𑑄 𑐣𑐾.𑐳𑑄. 𑑑𑑑𑑓𑑙 𑐧𑐕𑐮𑐵𑐠𑑂𑐰 𑐡𑐳𑐩𑐶 𑐩𑑄𑐐𑐮𑐰𑐵𑑅 𑐳𑐔𑑂𑐕𑐶 𑐰 𑐣𑐶𑐡𑑃 (𑑑𑑐𑑒 𑐡𑑃) 𑐧𑐸𑐡𑐶𑑄 𑐟𑑅𑐖𑐶𑐎 𑐴𑑄𑐐𑐸 𑐡𑐸 𑑋

𑐰𑐫𑑂𑐎𑑅𑐫𑐵 𑐧𑐸𑐡𑐶𑑄 𑐠𑑁𑑄 𑐰𑐫𑑂𑐎𑐮𑑄 𑐴𑐾 𑐣𑐷𑐳𑑂𑐰𑐣𑐵𑐡𑐷𑐐𑐸 𑐣𑐾𑐥𑐵𑐮𑐨𑐵𑐲𑐵𑐫𑐵 𑐤𑐵𑐥𑐵𑑄𑐐𑐸 𑐳𑑄𑐳𑑂𑐠𑐵 𑐔𑑂𑐰𑐳𑐵𑐥𑐵𑐳𑐵𑐫𑑂 𑐴𑑄𑐐𑐸 𑐏𑑅𑐳𑐵 𑐨𑐵𑐲𑐵𑐣𑐶𑐨𑐵𑑅 𑐎𑐳𑐵𑑅𑐫𑐵 𑐧𑐸𑐡𑐶𑑄 𑐴𑐣𑐾𑐐𑐸 𑐗𑑂𑐰𑐮𑐫𑑂 𑐰𑐫𑑂𑐎𑐮𑑄 𑐴𑐾 𑐔𑑂𑐰𑐫𑐵𑐡𑐷𑐐𑐸 𑐥𑐶𑐩𑐡𑑄𑐣𑐷𑐐𑐸 𑐥𑐹𑐢𑐵𑑅 𑐥𑑂𑐫𑐵𑐏𑑄 ‘𑐎𑐬𑐸𑐞𑐵𑐎𑐸𑐘𑑂𑐖’ 𑐣𑑄 𑐥𑐶𑐟𑐧𑑂𑐰𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋

𑐨𑐵𑐲𑐵𑐣𑐶𑐨𑐵𑑅 𑐥𑑂𑐬𑐾𑐩𑐧𑐴𑐵𑐡𑐸𑐬 𑐎𑐳𑐵𑑅 𑐣𑑄 𑐣𑐾.𑐳𑑄. 𑑑𑑐𑑘𑑔 𑐳𑐵𑐮𑐳𑐶𑐧𑐾𑑄 𑐤𑑂𑐫𑑅 𑐴𑐾 𑐔𑑂𑐰𑐫𑐵𑐟𑑅𑐐𑐸 𑐏𑐳 𑐨𑐵𑐲𑐵𑐫𑐵 𑐥𑐹𑐢𑐵 𑐥𑑂𑐫𑐵𑐏𑑄 ‘𑐥𑑂𑐬𑐵𑐫𑐱𑑂𑐔𑐶𑐟’𑐫𑐵𑐟 𑐨𑐵𑐫𑑂 𑐴𑐶𑐮𑐵𑑅 ‘𑐎𑐬𑐸𑐞𑐵𑐎𑐘𑑂𑐖’𑐫𑐵 𑐣𑐵𑐩𑑄 𑐠𑑁𑑄 𑐩𑑄𑐐𑐮𑐰𑐵𑑅 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐥𑐶𑐟𑐧𑑂𑐰𑐖𑑂𑐫𑐵 𑐫𑐵𑑅𑐐𑐸 𑐡𑐸 𑑋

𑐠𑑂𑐰 𑐳𑐦𑐹𑐫𑐵𑐟 𑐣𑐵𑑄𑐖𑐵𑑅𑐪 𑐳𑐵𑐴𑐶𑐟𑑂𑐫𑐎𑐵𑐬 𑐨𑐸𑐲𑐞 𑐥𑑂𑐬𑐳𑐵𑐡 𑐱𑑂𑐬𑐾𑐲𑑂𑐛𑑄 𑐨𑐵𑐫𑑂 𑐴𑐶𑐮𑐵𑐡𑐷𑐐𑐸 𑐏𑑅 𑑋

𑐣𑐾𑐰𑐵𑑅 𑐤𑑂𑐫𑐮𑐸𑐰𑐵𑑅 𑐨𑐵𑐲𑐵𑐳𑐾𑐰𑐷 𑐴𑐶𑐟𑐎𑐬 𑐰𑐷𑐬 𑐳𑐶𑑄𑐴 𑐎𑑄𑐳𑐵𑐎𑐵𑐬𑐫𑐵 𑐩𑐹𑐥𑐵𑐴𑐵𑑃𑐳𑐸𑐂 𑐤𑑂𑐫𑐵𑑅𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 ‘𑐎𑐬𑐸𑐞𑐵 𑐎𑐸𑐘𑑂𑐖’𑐫𑐵 𑐥𑐶𑐟𑐧𑑂𑐰𑐖𑑂𑐫𑐵 𑐖𑐹𑐐𑐸 𑐏𑑅 𑑋

𑐩𑐹𑐥𑐵𑐴𑐵𑑃 𑐴𑐶𑐟𑐎𑐬 𑐰𑐷𑐬 𑐳𑐶𑑄𑐴 𑐎𑑄𑐳𑐵𑐎𑐵𑐬𑑄 𑐠𑑁𑑄𑐫𑐵 𑐃 𑐳𑐹𑐔𑑄 𑐰 𑐥𑑂𑐬𑐰𑐶𑐢𑐶𑐫𑐵 𑐮𑑂𑐫𑐵𑐏𑑄 𑐟𑐳𑐎𑑄 𑐟𑐧𑑂𑐫𑐵 𑐖𑐸𑐂𑐢𑐸𑑄𑐎𑐹𑐳𑐵𑑄 𑐄𑐐𑐸 𑐥𑑂𑐬𑐰𑐶𑐢𑐶𑐫𑐵 𑐮𑐧𑑅 𑐣𑐾𑐥𑐵𑐮𑐨𑐵𑐲𑐵𑑄 𑐎𑐵𑐫𑐾 𑐦𑐫𑐵𑐔𑑂𑐰𑑄𑐐𑐸 𑐩𑐡𑐸 𑐢𑐎𑐵𑑅 𑐢𑐫𑐵𑐡𑐶𑐮𑐳𑐵 𑐐𑐿𑐬 𑐣𑐾𑐰𑑅𑐟𑐳𑐾𑑄 𑐣𑐾𑐰𑐵𑑅𑐟𑐫𑑂𑐟 𑐳𑐩𑑂𑐧𑑀𑐢𑐣 𑐫𑐵𑐂𑐧𑐮𑐫𑑂 𑐣𑐾𑐰𑐵𑐬𑐷 𑐢𑐎𑐵𑑅 𑐁𑑅𑐟𑐎 𑐣𑑄 𑐢𑐵𑐫𑐾𑐐𑐸 𑐩𑐟𑑂𑐰𑑅𑐟𑐹𑐐𑐸 𑐏𑑃𑐫𑐵𑐟 𑐎𑐸𑑄𑐏𑐶𑐣𑐵 𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐳𑐵𑐴𑐶𑐟𑑂𑐫𑐎𑐵𑐬 𑐰 𑐳𑑄𑐳𑑂𑐎𑐺𑐟𑐶𑐰𑐶𑐡𑑂 𑐜𑐵. 𑐔𑐸𑐣𑑂𑐡𑐵 𑐧𑐖𑑂𑐬𑐵𑐔𑐵𑐬𑑂𑐫𑑄 ‘𑐎𑐬𑐸𑐞𑐵𑐎𑐸𑐘𑑂𑐖’𑐫𑐵 𑐳𑐩𑐵𑐮𑑀𑐔𑐣𑐵 𑐫𑐵𑐣𑐵𑐡𑐶𑐮𑐳𑐵 𑐖𑐣𑐎𑐰𑐶 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛𑑄 𑐳𑐦𑐹 𑐰 𑐨𑐵𑐲𑐵𑐣𑐶𑐨𑐵𑑅𑐫𑐵 𑐧𑐵𑐬𑐾 𑐠𑑅𑐐𑐸 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐄𑐐𑐸 𑐳𑐦𑐸 𑐡𑐸𑐣𑐾 𑐡𑐸𑐠𑑂𑐫𑐵𑐣𑐵𑐔𑑂𑐰𑑄𑐐𑐸 𑐩𑑂𑐫𑐾𑐫𑐵𑐟 𑐖𑐣𑐐𑐵𑐫𑐎 𑐨𑐺𑐐𑐸𑐬𑐵𑐩 𑐱𑑂𑐬𑐾𑐲𑑂𑐛 𑐰 𑐮𑑀𑐎𑑄𑐴𑑂𑐰𑐵𑑅𑐪 𑐩𑑂𑐫𑐾𑐴𑐵𑐮𑐵𑐩𑐶 𑐬𑐷𑐟𑐵 𑐩𑐴𑐬𑑂𑐖𑐣𑑄 𑐴𑐵𑐮𑐵𑑅 𑐣𑑂𑐫𑑄𑐎𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑑅 ‘𑐎𑐬𑐸𑐞𑐵𑐎𑐸𑐘𑑂𑐖’𑐫𑐵𑐟 𑐣𑐾𑐰𑐵𑑅 𑐨𑐵𑐳𑑄 𑐨𑐵𑐫𑑂 𑐴𑐶𑐮𑐵𑐡𑐷𑐪 𑐳𑐵𑐴𑐶𑐟𑑂𑐫𑐎𑐵𑐬 𑐨𑐸𑐲𑐞 𑐥𑑂𑐬𑐳𑐵𑐡 𑐱𑑂𑐬𑐾𑐲𑑂𑐛𑐫𑐵 𑐳𑐨𑐵𑐣𑐵𑐫𑑅𑐳𑐸𑐂 𑐤𑑂𑐫𑐵𑑅𑐐𑐸 𑐏𑑅 𑑋