𑐣𑐾𑐥𑐵𑐮𑐨𑐵𑐲𑐵 𑐖𑐬𑑂𑐣𑐮 𑐥𑐶𑐟𑐧𑑂𑐰𑐖𑑂𑐫𑐵 𑐣𑐵𑐥 𑐠𑐷 𑐠𑐷 𑐕𑐵𑐟𑑂𑐬𑐰𑐺𑐟𑑂𑐟𑐶 𑐰 𑐳𑐶𑐬𑐥𑐵𑑅 𑐂𑐣𑐾𑐖𑑂𑐫𑐵

𑐣𑐾𑐥𑐵𑐮𑐨𑐵𑐲𑐵 𑐎𑐾𑐣𑑂𑐡𑑂𑐬𑐷𑐫 𑐰𑐶𑐨𑐵𑐐 𑐫𑐮𑐢𑑂𑐰𑐵𑐎𑐵𑐫𑑂 𑐧𑐸𑐢𑐧𑐵𑐬 ‘𑐣𑐾𑐥𑐵𑐮𑐨𑐵𑐲𑐵 𑐖𑐬𑑂𑐣𑐮’ 𑐥𑐶𑐟𑐧𑑂𑐰𑐖𑑂𑐫𑐵 𑐣𑐵𑐥𑑄 𑐠𑐷𑐠𑐷 𑐕𑐵𑐟𑑂𑐬𑐰𑐺𑐟𑑂𑐟𑐶 𑐰 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑑅𑐐𑐸 𑐡𑐸 𑑋

𑐳𑐵𑐴𑐸 𑐥𑐘𑑂𑐔𑐰𑐷𑐬 𑐳𑐶𑑄𑐴 𑐟𑐸𑐮𑐵𑐢𑐬𑐫𑐵 𑐩𑐹𑐥𑐵𑐴𑐵𑑃𑐳𑐸𑐂 𑐖𑐹𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐀𑐣𑐸𑐳𑐣𑑂𑐢𑐵𑐣𑐩𑐹𑐮𑐎 𑐠𑐷𑐠𑐷 𑐔𑑂𑐰𑐳𑐹 𑐡𑐸𑐠𑑂𑐫𑐵𑑅𑐐𑐸 ‘𑐣𑐾𑐥𑐵𑐮𑐨𑐵𑐲𑐵 𑐖𑐬𑑂𑐣𑐮’ 𑐰𑐶𑐱𑐾𑐲 𑐥𑐵𑐴𑐵𑑃 𑐨𑐵𑐲𑐵𑐁𑐫𑑀𑐐𑐫𑐵 𑐡𑐸𑐖𑑅 𑐱𑐸𑐬𑐾𑐱 𑐎𑐶𑐬𑐞 𑐩𑐵𑐣𑐣𑑂𑐢𑐬, 𑐎𑐾𑐣𑑂𑐡𑑂𑐬𑐷𑐫 𑐰𑐶𑐨𑐵𑐐𑐎𑐵 𑐥𑑂𑐬𑐩𑐸𑐏 𑐜𑐵. 𑐬𑐵𑐖𑐣𑐮𑐵𑐮 𑐖𑑀𑐱𑐷, 𑐣𑐶𑐬𑑂𑐰𑐟𑐩𑐵𑐣 𑐥𑑂𑐬𑐩𑐸𑐏 𑐥𑑂𑐬𑐵.𑐜𑐵. 𑐌𑐩𑐎𑐵𑐬𑐾𑐱𑑂𑐰𑐬 𑐱𑑂𑐬𑐾𑐲𑑂𑐛 𑐰 𑐥𑐵𑐚𑐣 𑐎𑐮𑐾𑐖𑐫𑐵 𑐥𑑂𑐬𑐩𑐸𑐏 𑐜𑐵. 𑐬𑐑𑐸𑐰𑐷𑐬 𑐰𑐶𑐲𑑂𑐚𑑄 𑐩𑑄𑐎𑐵𑑅 𑐥𑐶𑐟𑐧𑑂𑐰𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐄𑐐𑐸𑐴𑐾 𑐖𑑂𑐫𑐵𑐗𑑂𑐰𑐮𑐫𑑂 𑐎𑐾𑐣𑑂𑐡𑑂𑐬𑐷𑐫 𑐰𑐶𑐨𑐵𑐐 𑐰 𑐡𑐵𑐟𑐵𑐥𑐵𑐏𑐾𑑄 𑐧𑐶𑐫𑐵𑐰𑐫𑐵 𑐔𑑂𑐰𑑄𑐐𑐸 𑐠𑐷𑐠𑐷 𑐟𑑂𑐬𑐶𑐰𑐶𑐰𑐶 𑐕𑐵𑐟𑑂𑐬𑐰𑐺𑐟𑑂𑐟𑐶 𑐰 𑐳𑐶𑐬𑐥𑐵𑑅 𑐣𑑄 𑐮𑑅𑐮𑑂𑐴𑐵𑐐𑐸 𑐡𑐸 𑑋

𑐣𑐾𑐥𑐵𑐮𑐨𑐵𑐲𑐵 𑐳𑑂𑐣𑐵𑐟𑐎𑑀𑐟𑑂𑐟𑐬 𑐟𑐐𑐶𑐩𑐫𑑂 𑐠𑐷𑐠𑐷 𑐳𑐾𑐩𑐾𑐲𑑂𑐚𑐬𑐫𑑂 𑐄𑐟𑑂𑐎𑐺𑐲𑑂𑐚 𑐮𑑂𑐫𑐵𑑅 𑐴𑐫𑐾𑐟 𑐟𑐵𑑅𑐮𑐵𑑅𑐥𑐶𑑄 𑐰 𑐀𑐣𑐸𑐳𑐣𑑂𑐢𑐵𑐣 𑐱𑑀𑐢𑐐𑑂𑐬𑐣𑑂𑐠 𑐟𑐫𑐵𑐬 𑐫𑐵𑑅𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑐣𑑂𑐟 𑐧𑐷𑐐𑐸 𑐫𑐵𑐣𑐵𑐰𑐫𑐵𑐔𑑂𑐰𑑄𑐐𑐸 𑐠𑐷𑐠𑐷 𑐕𑐵𑐟𑑂𑐬𑐰𑐺𑐟𑑂𑐟𑐶 𑐰 𑐳𑐶𑐬𑐥𑐵𑑅 ‘𑐟𑑂𑐬𑐶𑐰𑐶𑐰𑐶 𑐕𑐵𑐟𑑂𑐬𑐰𑐺𑐟𑑂𑐟𑐶’, ‘𑐫𑑀𑐐𑐰𑐷𑐬 𑐳𑐶𑑄𑐴 𑐀𑐣𑐸𑐳𑐣𑑂𑐢𑐵𑐣 𑐳𑐶𑐬𑐥𑐵𑑅’, ‘𑐳𑐟𑑂𑐫𑐴𑐾𑐬𑐵 𑐀𑐣𑐸𑐳𑐣𑑂𑐢𑐵𑐣 𑐳𑐶𑐬𑐥𑐵𑑅’, ‘𑐥𑐸𑐲𑑂𑐥𑐡𑐾𑐰𑐷 𑐕𑐵𑐟𑑂𑐬𑐰𑐺𑐟𑑂𑐟𑐶’, ‘𑐎𑐺𑐲𑑂𑐞𑐡𑐾𑐰𑐷 𑐴𑐬𑐶𑐐𑑀𑐥𑐵𑐮 𑐏𑐫𑐬𑐐𑐸𑐮𑐷 𑐕𑐵𑐟𑑂𑐬𑐰𑐺𑐟𑑂𑐟𑐶’, 𑐰 ‘𑐱𑑂𑐬𑐾𑐲𑑂𑐛 𑐥𑐡𑐎’ 𑐎𑐵𑐫𑐾𑐟 𑐟𑐵𑑅𑐮𑐵𑑅𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑐣𑑂𑐟 𑐥𑐡𑐎, 𑐴𑐣𑐵–𑐥𑑁 𑐣𑐵𑐥𑑄 𑐡𑐵𑑄 𑐡𑐵𑐟𑐵 𑐰 𑐩𑐹𑐥𑐵𑐴𑐵𑑃 𑐟𑐸𑐮𑐵𑐢𑐬𑑄 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋 𑐣𑐾𑐥𑐵𑐮 𑐳𑐬𑐎𑐵𑐬𑐫𑐵 𑐠𑐷𑐠𑐷 𑐖𑑂𑐫𑐵𑐎𑐹𑐫𑐵𑐣𑐶𑐟𑐶𑑄 𑐩𑐵𑑅𑐐𑐸 𑐎𑐠𑑄𑐫𑐵 𑐫𑑀𑐐𑑂𑐫 𑐰 𑐡𑐎𑑂𑐲 𑐥𑑂𑐬𑐵𑐖𑑂𑐘𑐶𑐎 𑐣𑐵𑐥𑑄 𑐧𑑁𑐡𑑂𑐢𑐶𑐎 𑐖𑐣𑐱𑐎𑑂𑐟𑐶 𑐣𑐾𑐥𑐵𑐮𑐨𑐵𑐲𑐵 𑐎𑐾𑐣𑑂𑐡𑑂𑐬𑐷𑐫 𑐰𑐶𑐨𑐵𑐐𑑄 𑐄𑐟𑑂𑐥𑐵𑐡𑐣 𑐫𑐵𑐫𑐾𑐩𑐵𑑅𑐐𑐸 𑐠𑑁𑑄𑐫𑐵 𑐁𑐰𑐱𑑂𑐫𑐎 𑐖𑐹𑐐𑐸 𑐰𑐶𑐱𑐾𑐲 𑐥𑐵𑐴𑐵𑑃 𑐩𑐵𑐣𑐣𑑂𑐢𑐬𑑄 𑐣𑑂𑐴𑑂𑐰𑐫𑐠𑐣𑐵𑐡𑐷𑐐𑐸 𑐡𑐸 𑑋

𑐧𑐸𑐏𑑅 𑐎𑐶𑐥𑐵𑑅 𑐀𑐩𑐶𑐬 𑐩𑐿𑐫𑐵 𑐬𑐘𑑂𑐖𑐶𑐟