𑐣𑐾𑐥𑐵𑐮𑐨𑐵𑐲𑐵 𑐀𑐣𑐶𑐰𑐵𑐬𑑂𑐫 𑐧𑑂𑐰𑑄𑐎𑐾𑐐𑐸 𑐣𑐶𑐟𑐶𑑄 𑐎𑐶𑐥𑐹𑐫𑐵 𑐩𑐾𑐫𑐬 𑐜𑑄𑐐𑑀𑐮𑐫𑐵𑐟 𑐢𑑂𑐫𑐵𑐣𑐵𑐎𑐬𑑂𑐲𑐞

𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑐵 𑐣𑐐𑐬 𑐥𑑂𑐬𑐩𑐸𑐏 𑐎𑐺𑐲𑑂𑐞𑐩𑐵𑐣 𑐜𑑄𑐐𑑀𑐮𑐫𑐵𑐟 𑐳𑑀𑐩𑐰𑐵𑑅 𑐎𑐶𑐥𑐹 𑐣𑐐𑐬 𑐡𑐸𑐣𑐾𑐫𑐵 𑐣𑐷𑐖𑐶 𑐳𑑂𑐎𑐹𑐮𑐫𑑂 𑐣𑐾𑐥𑐵𑐮𑐨𑐵𑐲𑐵 𑐀𑐣𑐶𑐰𑐵𑐬𑑂𑐫 𑐫𑐵𑐫𑐾𑐩𑐵𑑅𑐐𑐸 𑐏𑑃𑐫𑑂 𑐳𑑂𑐠𑐵𑐣𑐷𑐫 𑐳𑐬𑐎𑐵𑐬𑐫𑐵𑐟 𑐢𑑂𑐫𑐵𑐣𑐵𑐎𑐬𑑂𑐲𑐞 𑐫𑐵𑐎𑐹𑐐𑐸 𑐡𑐸 𑑋

𑐣𑐾𑐥𑐵𑐮𑐨𑐵𑐲𑐵 𑐀𑐨𑐶𑐫𑐵𑐣𑐎𑐬𑑂𑐟𑐵𑐥𑐶𑑄 𑐣𑐾𑐰𑐵𑑅 𑐧𑐳𑑂𑐟𑐷 𑐣𑐾𑐰𑐵𑑅 𑐳𑑂𑐎𑐹𑐮 𑐀𑐨𑐶𑐫𑐵𑐣𑐫𑐵 𑐎𑐖𑐶 𑐡𑐷𑐥𑐎 𑐟𑐸𑐮𑐵𑐢𑐬 𑐰 𑐣𑐾𑐰𑐵𑑅 𑐰𑐶𑐡𑑂𑐫𑐵𑐬𑑂𑐠𑐷 𑐫𑐸𑐣𑐶𑐫𑐣𑐫𑐵 𑐣𑐵𑐫𑑅 𑐬𑐶𑐡𑐾𑐣 𑐩𑐴𑐬𑑂𑐖𑐣𑑄 𑐩𑑄𑐎𑐵𑑅 𑐎𑐠𑑄 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑐾𑐫𑐬 𑐎𑐺𑐲𑑂𑐞𑐩𑐵𑐣 𑐜𑑄𑐐𑑀𑐮𑐫𑐵𑐟 𑐢𑑂𑐫𑐵𑐣𑐵𑐎𑐬𑑂𑐲𑐞 𑐥𑑁 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑐎𑐶𑐥𑐹 𑐣𑐐𑐬𑐫𑐵 𑐩𑐾𑐫𑐬 𑐜𑑄𑐐𑑀𑐮𑐫𑐵𑐟 𑐣𑐾𑐰𑐵𑑅 𑐰𑐶𑐡𑑂𑐫𑐵𑐬𑑂𑐠𑐷 𑐳𑑄𑐑𑐫𑐵 𑐣𑐵𑐫𑑅 𑐬𑐶𑐡𑐾𑐣 𑐩𑐴𑐬𑑂𑐖𑐣𑑄 𑐎𑐶𑐥𑐹 𑐣𑐐𑐬 𑐡𑐸𑐣𑐾𑐫𑐵 𑐣𑐷𑐖𑐶 𑐳𑑂𑐎𑐹𑐮𑐫𑑂 𑐳𑐸𑐠𑐵𑑄𑐮𑐵𑐎𑑂𑐎 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫 𑐀𑐣𑐶𑐰𑐵𑐬𑑂𑐫 𑐎𑐠𑑄 𑐧𑑂𑐰𑑄𑐎𑐾𑐐𑐸 𑐰𑑂𑐫𑐰𑐳𑑂𑐠𑐵 𑐕𑐵𑐫𑑂 𑐩𑐖𑐹𑐐𑐸 𑐢𑐿𑐐𑐸 𑐰𑐶𑐲𑐫𑐫𑐵𑐟 𑐮𑑂𑐴𑑂𑐰𑐣𑐵𑑅 𑐄𑐐𑐸 𑐏𑑃𑐫𑑂 𑐢𑑂𑐫𑐵𑐣𑐵𑐎𑐬𑑂𑐲𑐞 𑐫𑐵𑐎𑐹𑐐𑐸 𑐏𑑅 𑑋

𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑐾𑐫𑐬 𑐜𑑄𑐐𑑀𑐮𑑄 𑐠𑑁𑑄𑐎𑐣𑑂𑐴𑐫𑑂 𑐎𑐶𑐥𑐹 𑐣𑐐𑐬 𑐡𑐸𑐣𑐾𑐫𑐵 𑐳𑑂𑐠𑐵𑐣𑐷𑐫 𑐳𑐬𑐎𑐵𑐬𑐷 𑐳𑑂𑐎𑐹𑐮𑐫𑑂 𑐏𑐸𑐐𑐹 𑐟𑐐𑐶𑑄𑐟𑐎 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐐𑐸 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐀𑐠𑐾𑐴𑐾, 𑐣𑐾𑐰𑐵𑑅 𑐰𑐳𑑂𑐟𑐷 𑐣𑐾𑐰𑐵𑑅 𑐳𑑂𑐎𑐹𑐮 𑐀𑐨𑐶𑐫𑐵𑐣𑐫𑐵 𑐎𑐖𑐶 𑐡𑐷𑐥𑐎 𑐟𑐸𑐮𑐵𑐢𑐬𑑄 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑐾𑐫𑐬 𑐜𑑄𑐐𑑀𑐮𑐫𑐵𑐟 𑐢𑑂𑐫𑐵𑐣𑐵𑐎𑐬𑑂𑐲𑐞 𑐫𑐵𑐎𑐹𑐳𑐾𑑄 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐰𑑂𑐫𑐰𑐳𑑂𑐠𑐶𑐟 𑐀𑐢𑑂𑐫𑐫𑐣 𑐳𑐸𑐣𑐶𑐱𑑂𑐔𑐶𑐟 𑐫𑐵𑐫𑐾𑐟 𑐀𑐣𑐸𑐐𑐩𑐣 𑐳𑐩𑐶𑐟𑐶 𑐡𑐫𑐾𑐎𑐾𑐩𑐵𑑅𑐐𑐸 𑐏𑑃𑐫𑑂 𑐣𑑄 𑐢𑑂𑐫𑐵𑐣𑐵𑐎𑐬𑑂𑐲𑐞 𑐫𑐵𑐎𑐵𑐡𑐷𑐐𑐸 𑐏𑑅 𑑋