𑐣𑑂𑐴𑑂𑐫𑐏𑑃

𑐣𑐾𑐥𑐵𑐮𑐨𑐵𑐲𑐵 𑐣𑐾𑐥𑐵𑑅𑐫𑐵 𑐕𑐐𑐹 𑐥𑐸𑐮𑐵𑑄𑐐𑐸 𑐨𑐵𑐲𑐵 𑐏𑑅 𑑋 𑐠𑑂𑐰𑐫𑐵 𑐂𑐟𑐶𑐴𑐵𑐳 𑑑𑑕 𑐳𑑅 𑐡𑑃 𑐳𑑂𑐰𑐫𑐵𑑄 𑐥𑐸𑐮𑐵𑑄 𑑋 𑐧𑑀𑐮𑐶𑐔𑐵𑐮𑐶𑐫𑐵 𑐨𑐵𑐲𑐵 𑐖𑐎 𑐩𑐏𑐸, 𑐣𑐾𑐥𑐵𑐮 𑐳𑑄𑐰𑐟𑑂 𑑒𑑓𑑕 𑐣𑐶𑐳𑐾𑑄 𑐮𑐶𑐏𑐟 𑐨𑐵𑐲𑐵𑐫𑐵 𑐬𑐸𑐥𑐫𑑂 𑐴𑐾 𑐰𑐶𑐎𑐳𑐶𑐟 𑐖𑐸𑐂𑐢𑐸𑑄𑐎𑐹𑐐𑐸 𑐨𑐵𑐲𑐵 𑐏𑑅 𑑋 𑐥𑑂𑐬𑐱𑐵𑐳𑐣, 𑐳𑐵𑐴𑐶𑐟𑑂𑐫, 𑐳𑐘𑑂𑐔𑐵𑐬 𑐁𑐡𑐶 𑐠𑐷𑐠𑐷 𑐏𑑂𑐫𑐮𑐫𑑂 𑐧𑐸𑐮𑐸𑐴𑐸𑑄 𑐣𑑂𑐫𑐣𑐵 𑐰𑐣𑐵𑑅 𑐄𑐟𑑂𑐟𑐬 𑐩𑐮𑑂𑐮𑐎𑐵𑐮 𑐠𑑂𑐫𑑄𑐧𑐮𑐫𑑂 𑐠𑑂𑐰 𑐨𑐵𑐲𑐵𑑄 𑐳𑐩𑐵𑐖𑐫𑑂 𑐧𑑂𑐫𑐵𑐥𑐎 𑐠𑐵𑐫𑑂 𑐎𑐵𑐫𑐾 𑐢𑐸𑑄𑐎𑐹𑐐𑐸 𑐏𑑅 𑑋 𑐡𑐾𑐫𑑂𑐫𑐵 𑐬𑐵𑐖𑐎𑐷𑐫 𑐨𑐵𑐲𑐵 𑐖𑐸𑐂𑐢𑐸𑑄𑐎𑐹𑐐𑐸 𑐏𑑅 𑑋 𑐟𑐬 𑐥𑐺𑐠𑑂𑐰𑐷𑐣𑐵𑐬𑐵𑐫𑐞 𑐱𑐵𑐴𑑄 𑐳𑑂𑐰𑐣𑐶𑐐𑑅 𑐟𑑂𑐫𑐵𑐎𑐾𑐢𑐸𑑄𑐎𑐵𑑅 𑐣𑐾𑐥𑐵𑐮𑐨𑐵𑐲𑐵𑐫𑐵𑐟 𑐬𑐵𑐖𑑂𑐫 𑐨𑐵𑐲𑐵𑐫𑐵 𑐴𑐿𑐳𑐶𑐫𑐟 𑐩𑐡𑐫𑐵𑐰𑐣 𑑋

𑐬𑐵𑐞𑐵 𑐱𑐵𑐳𑐣𑐫𑐵 𑐂𑐮𑐫𑑂 𑐠𑑂𑐰 𑐨𑐵𑐲𑐵𑐫𑐵𑐟 𑐳𑐬𑐎𑐵𑐬𑐥𑐵𑐏𑐾𑑄 𑐟𑐳𑐎𑑄 𑐡𑐩𑐣 𑐖𑐸𑐮 𑑋 𑐠𑑂𑐰 𑐨𑐵𑐲𑐵𑑄 𑐔𑑂𑐰𑐫𑐾𑐐𑐸 𑐴𑐾 𑐳𑐬𑐎𑐵𑐬𑐫𑐵 𑐩𑐶𑐏𑐵𑐫𑑂 𑐀𑐥𑐬𑐵𑐢 𑐖𑐸𑐮 𑑋 𑐟𑐬 𑐠𑐖𑑂𑐫𑐵𑑅𑐐𑐸 𑐖𑑂𑐫𑐵𑐩𑐕𑐶𑑄𑐐𑐸 𑐰 𑐠𑐵𑐎𑐸𑐐𑐸 𑐂𑐮𑐫𑑂 𑐣𑑄 𑐖𑐣𑐟𑐵 𑐳𑐸𑐩𑑂𑐎 𑐩𑐔𑑂𑐰𑑄 𑑋 𑐥𑐞𑑂𑐜𑐶𑐟 𑐣𑐶𑐲𑑂𑐛𑐵𑐣𑐣𑑂𑐡 𑐰𑐖𑑂𑐬𑐵𑐔𑐵𑐬𑑂𑐫, 𑐩𑐴𑐵𑐎𑐰𑐶 𑐳𑐶𑐡𑑂𑐢𑐶𑐡𑐵𑐳 𑐩𑐴𑐵𑐖𑐸, 𑐩𑐵𑐳𑑂𑐟𑐬 𑐖𑐐𑐟 𑐳𑐸𑐣𑑂𑐡𑐬 𑐩𑐮𑑂𑐮, 𑐫𑑀𑐐𑐰𑐷𑐬 𑐳𑐶𑑄, 𑐱𑐴𑐷𑐡 𑐱𑐸𑐎𑑂𑐬𑐬𑐵𑐖 𑐱𑐵𑐳𑑂𑐟𑑂𑐬𑐷, 𑐢𑐬𑑂𑐩𑐵𑐡𑐶𑐟𑑂𑐫 𑐢𑐬𑑂𑐩𑐵𑐔𑐵𑐬𑑂𑐫 𑐠𑐾𑑄𑐖𑑂𑐫𑐵𑑅𑐥𑐶𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐩𑐴𑐵𑐬𑐠𑐶𑐥𑐶𑑄𑐳𑑄 𑐳𑐬𑐎𑐵𑐬𑐷 𑐡𑐩𑐣𑐫𑐵 𑐥𑐬𑐰𑐵𑐴 𑐩𑐫𑐵𑐳𑐾 𑐠𑑅𑐠𑑅𑐐𑐸 𑐠𑐵𑐳𑑄 𑐠𑐷𑐠𑐷 𑐎𑐠𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐥𑐸𑐬𑑂𑐣𑐄𑐟𑑂𑐠𑐵𑐣𑐫𑐵 𑐖𑑂𑐫𑐵 𑐣𑑂𑐴𑑂𑐫𑐵𑐎𑐮 𑑋 𑐩𑐾𑐩𑐾𑐥𑐶𑑄 𑐣𑐾𑐰𑐵𑑅𑐟𑐫𑑂𑐳𑑄 𑐣𑑄 𑐠𑑅𑐐𑐸 𑐨𑐵𑐲𑐵𑐫𑐵 𑐥𑑂𑐬𑐟𑐶𑐬𑐎𑑂𑐲𑐵𑐫𑐵 𑐣𑐶𑑄𑐟𑐶𑑄 𑐣𑐶𑐬𑐣𑑂𑐟𑐬 𑐳𑑄𑐑𑐬𑑂𑐲 𑐫𑐵𑐣𑐵𑐰𑑄 𑐔𑑂𑐰𑐣 𑑋

𑐣𑐾. 𑐳𑑄 𑑑𑑐𑑗𑑑 𑐫𑑂 𑐬𑐵𑐞𑐵 𑐱𑐵𑐳𑐣 𑐎𑑂𑐰𑑅𑐡𑐮𑐵𑑅 𑐥𑑂𑐬𑐖𑐵𑐟𑐣𑑂𑐟𑑂𑐬 𑐰𑐳𑐾𑐮𑐶𑑄 𑐬𑐵𑐖𑑂𑐫𑐫𑐵 𑐨𑐵𑐲𑐵 𑐣𑐷𑐟𑐶 𑐨𑐟𑐶𑐔𑐵 𑐄𑐡𑐵𑐬 𑐖𑐸𑐮 𑑋 𑐧𑑂𑐰𑐣𑐾𑐎𑐸𑐠𑐶𑐂 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫 𑐕𑐐𑐹 𑐍𑐥𑐔𑐵𑐬𑐶𑐎 𑐱𑐶𑐎𑑂𑐲𑐵 𑐎𑐠𑑄 𑐧𑑂𑐰𑐣𑐾 𑐡𑐂𑐐𑐸 𑐖𑐸𑐮 𑑋 𑐥𑑂𑐬𑐖𑐵𑐟𑐵𑐣𑑂𑐟𑑂𑐬𑐶𑐎 𑐁𑐣𑑂𑐡𑑀𑐮𑐣𑐫𑐵 𑐗𑑂𑐰𑐮𑐫𑑂 𑐁𑐣𑑂𑐡𑑀𑐮𑐣𑐎𑐵𑐬𑐷𑐟𑐫𑑂𑐳𑑄 𑐔𑐵𑐫𑐾𑐎𑐹𑐐𑐸 𑐥𑑂𑐬𑐖𑐵𑐟𑐵𑐣𑑂𑐟𑑂𑐬𑐶𑐎 𑐬𑐾𑐜𑐶𑐫𑑀 𑐣𑐾𑐥𑐵𑐮𑑄 𑐧𑐶𑐫𑐵 𑐰𑐫𑐵𑐔𑑂𑐰𑑄𑐐𑐸 𑑕 𑐩𑐶𑐣𑐾𑐚𑐫𑐵 𑐣𑐾𑐥𑐵𑐮𑐨𑐵𑐲𑐵𑑄 𑐧𑐷𑐐𑐸 𑐳𑐩𑐵𑐔𑐵𑐬𑐫𑐵𑐟 𑐥𑑂𑐬𑐖𑐵𑐟𑐣𑑂𑐟𑑂𑐬𑐫𑐵 𑐑𑑀𑐲𑐞𑐵 𑐮𑐶𑐥𑐵 𑐀𑐧𑐮𑐫𑑂𑐫𑐵 𑐕𑐐𑐹 𑐖𑐎 𑐳𑐬𑐎𑐵𑐬𑐷 𑐰𑐶𑐡𑑂𑐫𑐸𑐟𑐷𑐫 𑐁𑐩𑐳𑑄𑐔𑐵𑐬 𑐩𑐵𑐢𑑂𑐫𑐩 𑐬𑐾𑐜𑐶𑐫𑑀 𑐣𑐾𑐥𑐵𑐮𑑄 𑐣𑐶𑐬𑐣𑑂𑐟𑐬𑐟𑐵 𑐧𑐶𑐂𑐐𑐸 𑐖𑑂𑐫𑐵 𑐖𑐸𑐮 𑑋 𑐣𑐾 𑐳𑑄 𑑑𑑐𑑘𑑐 𑐣𑐶𑐳𑐾𑑄 𑐰𑐵𑐮𑐫𑑂 𑐕𑐎𑑅 𑐣𑐾𑐰𑐵𑑅𑐟𑐫𑑂𑐐𑐸 𑐳𑑄𑐐𑐷𑐟, 𑐳𑑄𑐳𑑂𑐎𑐺𑐟𑐶 𑐰 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐥𑐶𑐧𑑂𑐰𑐂𑐐𑐸 𑑑𑑕 𑐩𑐶𑐣𑐾𑐚𑐫𑐵 “𑐖𑐷𑐰𑐣 𑐡𑐧𑐹” 𑐖𑑂𑐫𑐵𑐗𑑂𑐰𑑅 𑐣𑑄 𑐣𑐾𑐥𑐵𑐮𑐨𑐵𑐲𑐵𑑄 𑐥𑑂𑐬𑐳𑐵𑐬𑐞 𑐖𑐸𑐮 𑑋

𑐟𑐬 𑐣𑐾. 𑐳𑑄 𑑑𑑐𑑘𑑑 (𑑒𑑐𑑑𑑗) 𑐳𑐵𑐮𑑄 𑐖𑐸𑐖𑐸𑑄 𑐥𑑂𑐬𑐟𑐶𑐎𑑂𑐬𑐵𑐣𑑂𑐟𑐶 𑐫𑐵𑐣𑐵𑑅 𑐳𑐟𑑂𑐟𑐵 𑐠𑑅𑐐𑐸 𑐮𑑂𑐴𑐵𑐟𑐶𑐂 𑐎𑐫𑐵𑑅 𑐡𑐾𑐱𑐫𑑂 𑐣𑐶𑐬𑑄𑐎𑐸𑐱 𑐥𑑄𑐔𑐵𑐫𑐟𑐷 𑐰𑑂𑐫𑐰𑐳𑑂𑐠𑐵 𑐮𑐵𑐐𑐸 𑐫𑐵𑐳𑐾𑑄𑐮𑐶 𑐨𑐵𑐲𑐵 𑐣𑐷𑐟𑐶 𑐣𑑄 𑐀𑐣𑐸𑐡𑐵𑐬 𑐖𑐸𑐮 𑑋 𑐏𑐳 𑐀𑐴𑑄𑐎𑐵𑐬𑐫𑐵𑐟 𑐬𑐵𑐲𑑂𑐚𑑂𑐬𑐶𑐫𑐟𑐵𑐫𑐵 𑐏𑑀𑐮𑑄 𑐨𑐸𑐣𑐵𑑅 ‘𑐕𑐐𑐹 𑐡𑐾𑐫𑑂 𑐕𑐐𑐹 𑐨𑐵𑐲𑐵’𑐫𑐵 𑐣𑐷𑐟𑐶 𑐣𑐵𑐮𑐵𑑅 𑐏𑐳 𑐨𑐵𑐲𑐵 𑐧𑐵𑐴𑐾𑐎 𑐡𑐾𑐫𑐵 𑐩𑐾𑐩𑐾𑐐𑐸 𑐨𑐵𑐫𑑂 𑐣𑑂𑐴𑑄𑐎𑐵 𑐴𑐾 𑐕𑑂𑐰𑐫𑐾𑐟 𑐳𑑂𑐰𑐮 𑑋 𑐣𑐾.𑐳𑑄. 𑑑𑑐𑑘𑑔 (𑑒𑑐𑑒𑑐) 𑐳𑐵𑐮𑑄 𑐥𑐡𑐩𑐎𑐣𑑂𑐫𑐵 𑐎𑐮𑐾𑐖𑐫𑑂 𑐖𑐹𑐐𑐸 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐳𑐩𑑂𑐩𑐾𑐮𑐣𑐫𑑂 𑐨𑐵𑐲𑐵 𑐀𑐢𑐶𑐎𑐵𑐬𑐫𑐵 𑐏𑑃 𑐮𑑂𑐴𑑂𑐰𑐣 𑐢𑐂𑐐𑐸 𑐟𑑂𑐰𑐴𑑅 𑐔𑐶𑐣𑐵𑑅 𑐴𑐣𑐾𑐧𑐴𑐩𑑂𑐴 𑐔𑑂𑐰𑐩𑐶 𑐰 𑐳𑑂𑐫𑐣𑐵𑐩𑐶 𑐨𑐵𑐖𑐸 𑐳𑐹𑐬𑑂𑐫𑐧𑐴𑐵𑐡𑐸𑐬 𑐥𑐶𑐰𑐵𑑅, 𑐮𑐎𑑂𑐲𑑂𑐩𑐞 𑐬𑐵𑐖𑐰𑑄𑐱𑐷𑐥𑐶𑑄𑐟 𑐖𑑂𑐰𑐣𑐵𑑅 𑐎𑐸𑐣𑐵𑐧𑐶𑐮 𑑋 𑐬𑐾𑐜𑐶𑐫𑑀 𑐣𑐾𑐥𑐵𑐮𑑄 𑐣𑐾𑐥𑐵𑐮𑐨𑐵𑐲𑐵𑑄 𑐧𑐶𑐫𑐵 𑐰𑐫𑐵𑐔𑑂𑐰𑑄𑐐𑐸 𑐣𑑂𑐫𑐵𑐐𑐹 𑐩𑐶𑐣𑐾𑐚𑐫𑐵 𑐧𑐸𑐏𑑃 𑐧𑐷𑐐𑐸 𑐖𑑂𑐫𑐵𑐗𑑂𑐰𑑅 𑐣𑑄 𑑒𑑐𑑒𑑒 𑐳𑐵𑐮 𑐰𑐿𑐱𑐵𑐏 𑑑 𑐐𑐟𑐾 𑐣𑐶𑐳𑐾𑑄 𑐮𑐶𑐎𑐫𑐵 𑐧𑐶𑐮 𑑋 𑐠𑐸𑐎𑐷𑐫𑐵 𑐰𑐶𑐬𑐸𑐡𑑂𑐢 𑐖𑐣𑐟𑐵 𑐡𑐣 𑑋

𑐳𑑂𑐰𑐣𑐶𑐐𑑅 𑐰 𑐮𑐶𑐎𑑂𑐎 𑐮𑐶𑐎𑑂𑐎𑐫𑐵 𑐣𑐾𑐰𑐵𑑅 𑐧𑐳𑑂𑐟𑐷𑐂 𑐧𑐶𑐳𑑂𑐎𑑄𑐫𑐵 𑐕𑐐𑐹 𑐁𑐣𑑂𑐡𑑀𑐮𑐣 𑐧𑑂𑐰𑐮𑐣 𑑋 𑐳𑐵𑐴𑐶𑐟𑑂𑐫 𑐳𑐩𑑂𑐩𑐾𑐮𑐣𑐫𑐵 𑐩𑐵𑐢𑑂𑐫𑐩𑑄 𑐖𑐹𑐐𑐸 𑐠𑑂𑐰 𑐁𑐣𑑂𑐡𑑀𑐮𑐣𑐫𑐵𑐟 𑑒𑑐𑑒𑑒 𑐳𑐵𑐮𑐫𑐵 𑐁𑐣𑑂𑐡𑑀𑐮𑐣 𑐢𑐵𑐫𑐾𑐐𑐸 𑐫𑐵𑑅 𑑋 𑐣𑐾𑐥𑐵𑐮𑐨𑐵𑐲𑐵𑐫𑐵 𑐀𑐰𑐳𑑂𑐠𑐵 𑐠𑑁 𑐣𑑄 𑐳𑑄𑐎𑐚𑐫𑑂 𑐡𑐸 𑑋 𑐬𑐵𑐖𑑂𑐫𑐫𑐵 𑐖𑑂𑐫𑐵𑐏𑑃𑐫𑐵 𑐨𑐵𑐲𑐵𑐫𑐵 𑐬𑐸𑐥𑐫𑑂 𑐀𑐗 𑐣𑑄 𑐠𑐵𑐫𑑂 𑐎𑐵𑐫𑐾 𑐦𑐸𑐐𑐸 𑐩𑐡𑐸𑐣𑐶 𑑋 𑐠𑐸𑐎𑐶𑐫𑐵 𑐥𑐛𑐣𑐥𑐵𑐛𑐣 𑐣𑑄 𑐳𑐸𑐣𑐶𑐱𑑂𑐔𑐶𑐟 𑐩𑐡𑐸 𑑋 𑐣𑐾𑐥𑐵𑐮𑐨𑐵𑐲𑐵𑐨𑐵𑐲𑐷𑐟 𑐀𑐗 𑐣𑑄 𑐁𑐣𑑂𑐡𑑀𑐮𑐣𑐫𑐵 𑐳𑑂𑐠𑐶𑐟𑐶𑐂 𑐴𑐾 𑐟𑐶𑐣𑐶 𑑋 𑐠𑑁𑑄𑐫𑐵 𑐁𑐣𑑂𑐡𑑀𑐮𑐣𑐫𑐵𑐟 𑐳𑐸𑐠𑐵𑑄 𑐮𑐵𑐎𑐾𑐟 𑐰𑐶𑐐𑐟𑐫𑐵 𑐁𑐣𑑂𑐡𑑀𑐮𑐣𑐫𑐵𑐟 𑐮𑐸𑐩𑑄𑐎𑐾𑐐𑐸 𑐰 𑐎𑐸𑐮𑐾𑐐𑐸 𑐟𑐵𑐟𑐸𑐣𑐵𑑅 𑐣𑐾𑐥𑐵𑐮𑐨𑐵𑐲𑐵 𑐩𑑄𑐎𑐵𑑅 𑐏𑐮𑑅 𑐫𑐮 𑐥𑐵𑐏𑐾 𑑑𑑐𑑓𑑘 𑐳𑐶𑐮𑑂𑐮𑐵𑐠𑑂𑐰 𑐔𑐟𑐸𑐬𑑂𑐡𑐱𑐷 𑐩𑑄𑐐𑐮𑐰𑐵𑑅 𑐎𑐸𑐣𑑂𑐴𑐸 𑑑𑑐𑑘𑑕 𑐫𑐵 𑐁𑐣𑑂𑐡𑑀𑐮𑐣 𑐧𑐵𑐬𑐾 𑐕𑐐𑐹 𑐮𑐸𑐩𑐣𑑂𑐟𑐶 𑐐𑑀𑐲𑑂𑐛𑐶 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 𑐏𑑅 𑑋

𑐄𑐐𑐸 𑐐𑑀𑐲𑑂𑐛𑐶𑐂 𑐖𑐶 𑐰 𑐰𑐶𑐲𑑂𑐞𑐸 𑐔𑐶𑐟𑑂𑐬𑐎𑐵𑐬 𑐖𑐵𑐣𑐵𑑅 𑐕𑐸𑑄 𑐕𑐸𑑄 𑐥𑑂𑐬𑐎𑐵𑐱𑐶𑐟 𑐧𑑂𑐰𑐣𑐾𑐖𑑂𑐰𑐮𑑄 𑐰 𑐩𑐹𑐮𑐬𑐸𑐥𑑄 𑐖𑐶𑐩𑐶𑐐𑐸 𑐮𑐸𑐩𑑄𑐟𑐶𑐫𑐵 𑐮𑐶𑐢𑑄𑐳𑐵𑐫𑑂 𑐕𑐐𑐹 𑐳𑐴𑐮𑐴 𑐥𑑁 𑐔𑑂𑐰𑐫𑐵𑑅 𑐣𑑂𑐴𑑂𑐫𑐧𑑂𑐰𑐫𑐵𑐐𑐸 𑐏𑑅 𑑋 𑐄𑐐𑐸 𑐥𑑁 𑐰 𑐐𑑀𑐲𑑂𑐛𑐷𑐂 𑐣𑑂𑐰𑐰𑐵𑐣𑐵𑐡𑐷𑐥𑐶𑑄 𑐴𑐣𑐾𑐧𑐴𑐥𑐶𑑄 𑐜𑐵. 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷, 𑐩𑐮𑑂𑐮 𑐎𑐾.𑐳𑐸𑐣𑑂𑐡𑐬, 𑐥𑑂𑐬𑐵. 𑐥𑑂𑐬𑐾𑐩 𑐱𑐵𑐣𑑂𑐟𑐷 𑐟𑐸𑐮𑐵𑐢𑐬, 𑐕𑐟𑑂𑐬𑐧𑐴𑐵𑐡𑐸𑐬 𑐎𑐵𑐫𑐳𑑂𑐠, 𑐐𑐞𑐾𑐱 𑐳𑐵𑐫𑑂𑐩𑐶, 𑑒𑑐𑑒𑑒 𑐳𑐵𑐮𑐫𑐵 𑐁𑐣𑑂𑐡𑑀𑐮𑐣 𑐧𑐵𑐬𑐾 𑐀𑐢𑑂𑐫𑐫𑐣 𑐫𑐵𑐣𑐵𑐡𑐷𑐩𑑂𑐴 𑐰𑐳𑐣𑑂𑐟 𑐩𑐴𑐬𑑂𑐖𑐣, 𑐣𑐾𑐥𑐵𑐮𑐨𑐵𑐲𑐵 𑐩𑑄𑐎𑐵𑑅 𑐏𑐮𑑅 𑐫𑐮𑐫𑐵 𑐣𑐵𑐫𑑅 𑐆𑐲𑐶𑐥𑑂𑐬𑐳𑐵𑐡 𑐱𑑂𑐬𑐾𑐲𑑂𑐛𑐥𑐶𑑄𑐳𑑄 𑐰𑑂𑐫𑐎𑑂𑐟 𑐫𑐵𑐣𑐵𑐡𑐷𑐐𑐸 𑐏𑑃𑐫𑐵𑐟 𑐣𑑄 𑐎𑑅𑐑𑐵𑐣𑐵𑑅 𑐠𑑂𑐰 𑐔𑑂𑐰𑐳𑐸 𑐔𑑂𑐰𑐫𑐵𑐐𑐸 𑐖𑐸𑐮 𑑋

𑐁𑐣𑑂𑐡𑑀𑐮𑐣𑐫𑐵 𑐮𑐸𑐩𑐣𑑂𑐟𑐶
𑐣𑑂𑐫𑐫𑑂𑐡𑑄 𑐩𑐮𑑂𑐫𑐵𑐎 𑐥𑐸𑐮𑐵𑑄𑐐𑐸 𑐏𑑃 𑐖𑐸𑐫𑐵𑑅 𑐖𑐸𑐂 𑐁𑐣𑑂𑐡𑑀𑐮𑐣𑐫𑐵 𑐥𑐴𑐮 𑐐𑐠𑐾 𑐐𑐸𑐎𑐠𑑄 𑐖𑐸𑐮 𑐢𑐫𑐵𑐐𑐸 𑐧𑐵𑐬𑐾 𑐦𑐸𑐎𑐳𑐶𑐫𑐵𑑄 𑐕𑐥𑑂𑐰𑐵𑑅 𑐩𑑂𑐴𑐸𑐟𑐸 𑐩𑐖𑐹 𑑋 𑐨𑐵𑐖𑐸 𑐰𑐶𑐲𑑂𑐞𑐸 𑐔𑐶𑐟𑑂𑐬𑐎𑐵𑐬𑐫𑐵 𑐎𑐠𑑄 𑐣𑐾.𑐳𑑄 𑑑𑑐𑑘𑑕 𑐔𑑁𑐮𑐵𑐠𑑂𑐰 𑑑𑑑 (𑑒𑑐𑑒𑑑 𑐔𑐿𑐟𑑂𑐬 𑐩𑐳𑐵𑐣𑑂𑐟) 𑐎𑐸𑐣𑑂𑐴𑐸 𑐬𑐾𑐜𑐶𑐫𑑀 𑐣𑐾𑐥𑐵𑐮𑑄 𑐧𑐶𑐫𑐵 𑐰𑐫𑐵𑐔𑑂𑐰𑑄𑐐𑐸 𑑕 𑐩𑐶𑐣𑐾𑐚𑐫𑐵 𑐧𑐸𑐏𑑃 𑐡𑐶𑐎𑐾𑐐𑐸 𑐴𑐳𑐣𑐵 𑐰𑐳𑐾𑑄𑐮𑐶 𑐣𑐾𑐰𑐵𑑅 𑐮𑑂𑐫𑐵𑐫𑑂𑐩𑑂𑐴𑐟𑐫𑑂𑐐𑐸 𑐡𑐠𑐸𑐂 𑐄𑐎𑐸𑐣𑑂𑐴𑐸 𑐴𑐾 𑐧𑐴𑐣𑐶𑐂 𑐮𑐶𑐧𑐵𑐎𑑂𑐎 𑐟𑐎 𑐳𑐴𑐮𑐴 𑐖𑐸𑐫𑐵𑑅 𑐖𑐸𑐡𑑂𑐢𑑀𑐡𑐫 𑐳𑑂𑐎𑐹𑐮𑐫𑐵 𑐧𑑂𑐰𑐣𑐵𑐩𑐶𑐥𑐶𑑄 𑐐𑐞𑐾𑐱 𑐳𑐵𑐫𑑂𑐩𑐶 𑐰 𑐩𑐸𑐎𑑂𑐟𑐶 𑐳𑐵𑐫𑑂𑐩𑐶𑐥𑐶𑑄𑐳𑑄 𑐳𑐧𑑂𑐧𑐸 𑐔𑐵𑐣𑑂𑐴𑐫𑑂 𑐫𑐾𑑃𑐫𑐵 𑐠𑐷𑐠𑐷 𑐟𑑂𑐰𑐵𑐮𑐫𑑂 𑐕𑐩𑑂𑐴𑑄 𑐩𑐾𑐩𑑂𑐴𑐾𑐳𑐶𑐐𑐸 𑐧𑑂𑐰𑐴𑐮𑐫𑑂 𑐐𑐫𑐵𑑅 𑐳𑐸𑐮𑐵𑑅 𑐳𑐸𑐮𑐵𑑅 𑐥𑑀𑐳𑑂𑐚𑐬 𑐟𑐶𑐎𑐾𑐐𑐸 𑐖𑑂𑐫𑐵 𑐫𑐵𑐟 𑑋 𑐠𑑂𑐰 𑐴𑐾 𑐠𑐸𑐐𑐸 𑐁𑐣𑑂𑐡𑑀𑐮𑐣𑐫𑐵 𑐳𑐸𑐬𑐸𑐰𑐵𑐟 𑐏𑑅 𑑋 𑐄𑐐𑐸 𑐥𑑀𑐳𑑂𑐚𑐬𑐫𑑂 𑐂𑐩𑐶𑐳𑑄 𑐠𑑅𑐐𑐸 𑐟𑑄 𑐠𑐸𑐎𑐠𑑄 𑐡𑐶𑐎𑐹𑐐𑐸 𑐏𑑅 𑑋

‘𑐐𑑀𑐬𑐏𑐵𑐮𑐶𑐟𑐫𑑂 𑐐𑑀𑐬𑐏𑐵 𑐬𑐵𑐖
𑐣𑐾𑐰𑐵𑑅𑐟 𑐦𑐸𑐎𑑄 𑐨𑐵𑐐𑐵𑐨𑐵𑐐 !’
𑐰
‘𑐕𑐐𑐹 𑐡𑐾𑐫𑑂, 𑐕𑐐𑐹 𑐖𑐵𑐟𑐶 𑐰 𑐕𑐐𑐹 𑐨𑐵𑐫𑑂𑐫𑐵 𑐣𑐷𑐟𑐶
𑐩𑐹𑐬𑑂𑐡𑐵𑐰𑐵𑐡 ! 𑐩𑐹𑐬𑑂𑐡𑐵𑐰𑐵𑐡 !

𑐎𑐣𑑂𑐴𑐫𑑂𑐎𑐸𑐣𑑂𑐴𑐸 (𑑒𑑐𑑒𑑒 𑐳𑐵𑐮 𑐰𑐿𑐱𑐵𑐏 𑑑 𑐐𑐟𑐾) 𑐟𑐶𑐬𑑂𑐠𑐬𑐵𑐩 𑐜𑑄𑐐𑑀𑐮, 𑐰𑐶𑐲𑑂𑐞𑐸 𑐔𑐶𑐟𑑂𑐬𑐎𑐵𑐬, 𑐩𑐸𑐎𑑂𑐟𑐶 𑐳𑐵𑐫𑑂𑐩𑐶, 𑐐𑐞𑐾𑐱 𑐳𑐵𑐫𑑂𑐩𑐶, 𑐩𑐵𑐂𑐮𑐵𑐎𑐵𑐖𑐷 𑐟𑐸𑐮𑐵𑐢𑐬, 𑐥𑐸𑐲𑑂𑐥𑐬𑐟𑑂𑐣 𑐟𑐸𑐮𑐵𑐢𑐬 𑐣𑑂𑐴𑐹 𑐳𑐟𑐎𑐫𑐵 𑐰𑑄𑐐𑐮𑐳𑐶𑐩𑐵 𑐎𑑂𑐰𑐫𑑂 𑐩𑐸𑐣𑐵𑑅 𑐳𑐷𑐑𑑅 𑐧𑐶𑐴𑐵𑐬𑐫𑑂 𑐰𑐣𑐵𑑅 𑐳𑐴𑐮𑐴 𑐧𑑂𑐫𑐵𑐎𑐾𑐐𑐸 𑐏𑑃 𑐖𑐸𑐮 𑑋 𑐠𑑂𑐰𑐫𑐵𑑄 𑐣𑑂𑐴𑑂𑐫𑑅 𑐰𑐫𑑂𑐎𑑅𑐥𑐶𑐣𑐶 𑐎𑐰𑐶 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛𑐣𑐵𑐥 𑐣𑑄 𑐳𑐴𑐮𑐴 𑐧𑑂𑐫𑐵𑐎𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅 𑑋

𑐳𑐷𑐑𑑅 𑐧𑐶𑐴𑐵𑐬𑐫𑑂 𑐬𑐟𑑂𑐣𑐩𑐵𑐣 𑐜𑑄𑐐𑑀𑐮, 𑐥𑑂𑐬𑐾𑐩𑐬𑐟𑑂𑐣 𑐟𑐸𑐮𑐵𑐢𑐬, 𑐡𑐸𑐬𑑂𑐐𑐵𑐩𑐵𑐣𑐣𑑂𑐡 𑐧𑐖𑑂𑐬𑐵𑐔𑐵𑐬𑑂𑐫 𑐣𑑄 𑐠𑑂𑐫𑐣 𑑋 𑐳𑐷𑐑𑑅 𑐰𑐶𑐴𑐵𑐬𑐫𑑂 𑐖𑐹𑐐𑐸 𑐳𑐴𑐮𑐴𑑄 𑐴𑐾 𑐖𑐸𑐮𑐸𑐳𑐫𑐵 𑐩𑐵𑐢𑑂𑐫𑐩𑑄 𑐰𑐶𑐬𑑀𑐢 𑐫𑐵𑐫𑐾𑐧𑐮𑐫𑑂 𑐖𑑂𑐰𑐣𑐾𑐐𑐸 𑐎𑐸𑐣𑐾𑐐𑐸 𑐫𑐵𑐂𑐐𑐸 𑐰 𑐠𑑅𑐐𑐸 𑐏𑑃 𑐖𑐣𑐟𑐵𑐫𑑂 𑐠𑑂𑐫𑑄𑐎𑐾 𑐩𑐦𑐂𑐐𑐸 𑐟𑐵𑐫𑐾𑐎𑐵𑑅 𑐳𑐵𑐴𑐶𑐟𑑂𑐫 𑐳𑐩𑑂𑐩𑐾𑐮𑐣𑐫𑐵 𑐩𑐵𑐢𑑂𑐫𑐩𑑄 𑐰𑐶𑐬𑑀𑐢𑐫𑐵 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐵𑐎𑐾𑐐𑐸 𑐎𑑂𑐰𑑅𑐕𑐶𑐄𑐐𑐸 𑐏𑑅 𑑋 𑐠𑐠𑐾 𑐠𑑂𑐰 𑐢𑐵𑐥𑐹𑐎𑐠𑑄 𑐕𑐥𑐸𑐔𑑅 𑐮𑑂𑐫𑐵𑐫𑑂𑐩𑑂𑐴𑐟 𑐳𑑂𑐰𑐟𑑅𑐳𑑂𑐥𑐹m𑐬𑑂𑐟 𑐬𑐸𑐥𑑄 𑐡𑐣𑐵𑐰𑐫𑐵𑑅 𑐠𑑂𑐰 𑐁𑐣𑑂𑐡𑑀𑐮𑐣 𑐣𑑂𑐴𑑂𑐫𑐵𑐎𑐹𑐐𑐸 𑐏𑐣𑐾𑐡𑐸 𑑋 𑐟𑐬 𑐨𑐵𑐖𑐸 𑐩𑐮𑑂𑐮 𑐎𑐾 𑐳𑐸𑐣𑑂𑐡𑐬𑐫𑐵 𑐢𑐵𑐥𑐹𑐎𑐠𑑄 𑐣𑐾.𑐳𑑄 𑑑𑑐𑑘𑑓 𑐴𑐾 𑐠𑐵𑐥𑐣𑐵 𑐖𑐸𑐂 𑐢𑐸𑑄𑐎𑐹𑐐𑐸 𑐨𑐶𑐎𑑂𑐲𑐸 𑐳𑐡𑐬𑑂𑐱𑐣, 𑐃𑐱𑑂𑐰𑐬𑐵𑐣𑐣𑑂𑐡 𑐱𑑂𑐬𑐾𑐲𑑂𑐛𑐵𑐔𑐵𑐬𑑂𑐫, 𑐥𑐸𑐲𑑂𑐥𑐧𑐴𑐵𑐡𑐸𑐬 𑐔𑐶𑐟𑑂𑐬𑐎𑐵𑐬 𑐁𑐡𑐶𑐥𑐶𑑄 𑐡𑐸𑐐𑐸 𑐮𑐹𑐖𑑅 𑐣𑐵𑑄𑐫𑐵 𑐳𑑄𑐳𑑂𑐠𑐵𑑄 𑐠𑑂𑐰 𑐁𑐣𑑂𑐡𑑀𑐮𑐣 𑐣𑑂𑐴𑑂𑐫𑐵𑐎𑐹𑐐𑐸 𑐏𑑅 𑑋

𑐠𑑂𑐰 𑐏𑑃 𑐥𑑂𑐬𑐾𑐩𑐱𑐵𑐣𑑂𑐟𑐶 𑐟𑐸𑐮𑐵𑐢𑐬𑐫𑐵 “𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑐵 𑐂𑐟𑐶𑐴𑐵𑐳” 𑐳𑐦𑐸𑐮𑐶𑐂 𑐣𑑄 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋 𑐠𑑂𑐰 𑐳𑑄𑐳𑑂𑐠𑐵𑑄 𑐣𑑄 𑐳𑐷𑐑𑐮𑐫𑑂 𑐴𑐾 𑐩𑐸𑑃𑐖𑑂𑐫𑐵 𑐫𑐵𑑅𑐐𑐸 𑐏𑑃 𑐣𑑄 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋 𑐣𑐵𑐥𑑄 𑐄𑐐𑐸 𑐩𑐸𑑃𑐖𑑂𑐫𑐵𑐫𑑂 𑐔𑑂𑐰𑐫𑑂 𑐣𑑂𑐴𑑂𑐫𑐠𑐣𑐵𑐥𑐶𑑄 𑐮𑑂𑐫𑐵𑐫𑑂𑐩𑑂𑐴𑐟 𑐣𑑄 𑐡𑐸𑐠𑑂𑐫𑐵𑑅 𑐢𑐫𑐵𑐟𑑅𑐐𑐸 𑐡𑐸 𑑋 𑐠𑐠𑐾 𑐣𑑂𑐴𑑂𑐫𑐵𑐩𑑂𑐴𑐳𑑂𑐫𑐵𑑄 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 𑐖𑐹𑐳𑐵𑑄 𑐳𑐷𑐑𑐮𑐫𑑂 𑐕𑐐𑐹 𑐟𑑅𑐢𑑄𑐐𑐸 𑐴𑐾 𑐩𑐸𑑃𑐖𑑂𑐫𑐵 𑐖𑐹𑐐𑐸 𑐏𑐣𑐾𑐡𑐸 𑑋 𑐠𑑂𑐰 𑐩𑐸𑑃𑐖𑑂𑐫𑐵𑑄 𑐳𑐣𑐶𑐰𑐵𑑅 𑐳𑐣𑐶𑐰𑐵𑑅𑐥𑐟𑐶𑐎𑑄 𑐠𑐵𑐫𑑂𑐠𑐵𑐳𑐫𑑂 𑐳𑐵𑐴𑐶𑐟𑑂𑐫 𑐳𑐩𑑂𑐩𑐾𑐮𑐣 𑐫𑐵𑐫𑐾𑐐𑐸𑐫𑐵 𑐣𑐵𑐥𑑄 𑐮𑑂𑐴𑐵𑑅𑐔𑐶𑑄 𑐩𑐸𑑄𑐎𑐵𑑅 𑐬𑐾𑐜𑐶𑐫𑑀 𑐣𑐾𑐥𑐵𑐮𑐫𑑂 𑐮𑑅𑐮𑑂𑐴𑐵𑐫𑐾𑐐𑐸 𑐣𑑄 𑐎𑑂𑐰𑑅𑐕𑐶𑐄𑐐𑐸 𑐏𑑅 𑑋 𑐣𑑂𑐴𑑂𑐫𑐵𑐐𑐸𑐳𑐵𑑄 𑐠𑑂𑐰 𑐁𑐣𑑂𑐡𑑀𑐮𑐣𑐫𑑂 𑐔𑑂𑐰𑐫𑑂 𑐄𑐮𑑂𑐮𑐾𑐏 𑐖𑐹𑐥𑐶𑑄 𑐮𑑂𑐫𑐵𑐫𑑂𑐩𑑂𑐴𑐟𑐫𑑂𑐐𑐸 𑐥𑐸𑐔𑑅𑐫𑐵 𑐀𑐴𑐩𑑂 𑐰 𑐳𑐎𑑂𑐬𑐶𑐫 𑐨𑐹𑐩𑐶𑐎𑐵 𑐡𑐸𑐐𑐸 𑐏𑐣𑐾𑐡𑐸 𑑋

𑐠𑑂𑐰 𑐁𑐣𑑂𑐡𑑀𑐮𑐣 𑐳𑐸𑐠𑐵𑑄 𑐮𑐵𑐎𑐾𑐟 𑐳𑐎𑐮 𑐨𑐵𑐫𑑂𑐴𑑂𑐫𑐩𑐶, 𑐳𑐵𑐴𑐶𑐟𑑂𑐫𑐎𑐵𑐬 𑐰 𑐩𑐾𑐩𑐾𑐥𑐶𑑄𑐣𑐵𑐥 𑐳𑐴𑐮𑐴 𑐧𑑂𑐫𑐵𑐎𑐾𑐐𑐸, 𑐧𑑂𑐰𑐟𑐶 𑐎𑐵𑐫𑐾𑐟 𑐂𑐣𑐵𑐥 𑐫𑐵𑐫𑐾𑐐𑐸, 𑐩𑐸𑑃𑐖𑑂𑐫𑐵 𑐖𑐸𑐂𑐐𑐸 𑐟𑑂𑐰𑐵𑑅 𑐟𑑂𑐰𑐵𑐮𑐫𑑂 𑐰𑐣𑐵𑑅 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸, 𑐩𑐵𑐂𑐎𑐫𑐵 𑐳𑑂𑐰𑐷𑐎𑐺𑐟𑐶 𑐎𑐫𑐵 𑐴𑐫𑐾𑐐𑐸 𑐁𑐡𑐶 𑐖𑑂𑐫𑐵 𑐠𑑂𑐰 𑐴𑐾 𑐥𑐸𑐔𑐮𑑄 𑐫𑐵𑐟 𑑋 𑐠𑑂𑐰 𑐥𑐸𑐔𑑅𑐥𑐵𑐏𑐾𑑄 𑐣𑑂𑐴𑐶𑑄𑐣𑑂𑐴𑐶𑑄 𑐢𑐂𑐠𑐾𑑄 𑐥𑐵𑐳𑐵𑐥𑐶𑑄 𑐩𑐸𑐣𑐵𑑅 𑐳𑐸𑐠𑐫𑑂 𑐧𑐴𑐣𑐶𑐂 𑐳𑐵𑐴𑐶𑐟𑑂𑐫𑐎𑐵𑐬, 𑐨𑐵𑐲𑐵𑐴𑑂𑐫𑐩𑐶𑐥𑐶𑑄𑐠𑐵𑐫𑑂 𑐕𑐾𑑃𑐫𑑂 𑐕𑐾𑑃𑐫𑑂 𑐰𑐣𑐵𑑅 𑐰𑐶𑐬𑑀𑐢 𑐳𑐨𑐵𑐫𑑂 𑐰𑐵 𑐳𑐵𑐴𑐶𑐟𑑂𑐫 𑐳𑐩𑑂𑐩𑐾𑐮𑐣𑐫𑑂 𑐧𑑂𑐰𑐟𑐶 𑐎𑐵𑐫𑐾𑐟 𑐰 𑐠𑑅𑐐𑐸 𑐳𑑅 𑐟𑐫𑐾𑐟 𑐂𑐣𑐵𑐥 𑐫𑐵𑑅𑐰𑐣𑐾𑐐𑐸 𑐖𑑂𑐫𑐵 𑐖𑐸𑐮 𑑋 𑐨𑐵𑐖𑐸 𑐰𑐶𑐲𑑂𑐞𑐸 𑐔𑐶𑐟𑑂𑐬𑐎𑐵𑐬𑐫𑐵 𑐎𑐠𑑄 “𑐣𑐎𑐟𑐶𑐣𑐶 𑐢𑐂𑐠𑐾𑑄 𑐨𑐵𑐲𑐵𑐫𑐵 𑐀𑐢𑐶𑐎𑐵𑐬𑐫𑐵 𑐏𑑃𑐫𑑂 𑐣𑑂𑐰𑐰𑐵𑑅𑐐𑐸𑐮𑐶𑑄 𑐳𑐹𑐬𑑂𑐫 𑐧𑐴𑐵𑐡𑐸𑐬 𑐥𑐶𑐰𑐵𑑅𑐥𑐶𑑄𑐟 𑐖𑑂𑐰𑐣𑐵𑑅 𑐎𑐸𑑄𑐐𑐸 𑐡𑐳𑐶 𑐡𑐸𑐐𑐸 𑐴𑐸𑐣𑐶𑑄 𑐁𑐥𑐵𑐮𑑄 𑐔𑑂𑐰𑐩𑐶𑐥𑐶𑑄𑐳𑑄 𑐠𑐖𑑂𑐫𑐵𑑅𑐐𑐸 𑐩𑐸𑑃𑐖𑑂𑐫𑐵𑐫𑑂 𑐠𑑅𑐥𑐶𑑄𑐳𑑄 𑐟𑐥𑑂𑐫𑑄𑐎 𑐧𑑂𑐰𑐟𑐶 𑐎𑐵𑐫𑐾 𑐩𑐦𑐂𑐐𑐸 𑐰 𑐡𑐸𑐣𑐾𑑄 𑐡𑐸𑐣𑐾𑑄 𑐦𑐸𑐐𑐸 𑐔𑐵𑑅𑐐𑐸 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐧𑐔𑑄 𑐧𑐶𑐫𑐵𑐡𑐶𑐮𑐳𑐵 𑐐𑐸𑐮𑐶𑐳𑐶𑐣𑑄 𑐕𑐸𑑄 𑐮𑐶𑐳𑑅 𑐧𑐶𑐫𑐵𑐩𑐡𑐷 𑑋

𑐀𑐠𑐾 𑐴𑐾 𑐐𑐸𑐮𑐶𑐏𑐾 𑐨𑐵𑐲𑐵𑐴𑑂𑐫𑐩𑐶𑐥𑐶𑑄 𑐄𑐳𑐵𑑃𑐫𑑂 𑐩𑐡𑐫𑐵𑐔𑑂𑐰𑐣𑐳𑐵 𑐐𑐸𑐮𑐶𑐳𑐶𑐟𑑄 𑐣𑐵𑐥𑐮𑐵𑐫𑐾 𑐩𑐦𑐸𑐟 𑑋 𑐀𑐠𑐾 𑐣𑑄 𑐎𑐣𑑂𑐫𑐵 𑐩𑐣𑑂𑐡𑐶𑐬𑐫𑐵 𑐳𑑂𑐫𑐣𑐵𑐩𑐶 𑐰 𑐎𑐰𑐶 𑐡𑐸𑐬𑑂𑐐𑐵𑐮𑐵𑐮, 𑐖𑐸𑐡𑑂𑐢𑑀𑐡𑐫𑐫𑐵 𑐳𑑂𑐫𑐣𑐵𑐩𑐶 𑐰 𑐔𑑂𑐰𑐩𑐶 𑐃𑐱𑑂𑐰𑐬𑐵𑐣𑐣𑑂𑐡 𑐱𑑂𑐬𑐾𑐲𑑂𑐛𑐵𑐔𑐵𑐬𑑂𑐫 𑐰 𑐩𑐔𑐵 𑐳𑐵𑐴𑐶𑐟𑑂𑐫𑐫𑐵 𑐣𑑂𑐴𑑂𑐫𑐮𑐸𑐰𑐵 𑐱𑐵𑐣𑑂𑐟𑐡𑐵𑐳 𑐩𑐵𑐣𑐣𑑂𑐢𑐬𑐥𑐶𑑄𑐳𑑄 𑐢𑐵𑑅𑐳𑐵 𑐩𑐵𑑅𑐐𑐸 𑐐𑑂𑐰𑐵𑐴𑐵𑐮𑐶, 𑐟𑐶𑐧𑑅 𑐧𑐶𑐂𑐐𑐸 𑐰 𑐩𑐸𑑃𑐖𑑂𑐫𑐵𑐫𑑂 𑐣𑑂𑐰𑐰𑐵𑐣𑐵 𑐧𑐶𑐂𑐐𑐸 𑐧𑐔𑑄 𑐣𑑄 𑐧𑐶𑐫𑐵𑐡𑐶𑐮 𑑋 𑐰𑐫𑑂𑐎𑑅𑐥𑐶𑑄𑐳𑑄 𑐳𑐸𑐬𑐸𑑄𑐣𑐶𑐳𑐾𑑄 𑐮𑐶𑐥𑐵 𑐟𑐎𑑄 𑐦𑐸𑐎𑑂𑐎𑑄 𑐠𑐾𑑄 𑐩𑐸𑑃𑐖𑑂𑐫𑐵𑐫𑑂 𑐗𑐵𑐫𑐵𑑅 𑐩𑐵𑑅𑐐𑐸 𑐟𑐶𑐧𑑅 𑐧𑐶𑐂𑐐𑐸 𑐰 𑐠𑑅𑐐𑐸 𑐳𑑅 𑐟𑐫𑐾𑐐𑐸 𑐖𑑂𑐫𑐵 𑐣𑑄 𑐫𑐵𑐣𑐵𑐡𑐶𑐮 𑑋 𑐠𑑂𑐰𑐫𑐵 𑐡𑐠𑐸𑐂 𑐠𑑂𑐰 𑐬𑐾𑐜𑐶𑐫𑑀 𑐣𑐾𑐥𑐵𑐮𑐫𑐵 𑐀𑐣𑑂𑐫𑐵𑐫𑐥𑐹𑐬𑑂𑐞 𑐖𑑂𑐫𑐵𑐫𑐵𑐟 𑐎𑐫𑐵𑑅 𑐔𑑂𑐰𑐳𑐵𑐥𑐵𑐳𑐵𑐫𑑂 𑐳𑐴𑐮𑐴 𑐧𑑂𑐫𑐵𑐎𑐾𑐐𑐸 𑐖𑑂𑐫𑐵 𑐖𑐸𑐮 𑑋 𑐔𑑂𑐰𑐳𑐵𑐥𑐵𑐳𑐵𑐫𑐵 𑐣𑐵𑐫𑑅 𑐥𑑂𑐬𑐾𑐩 𑐧𑐴𑐵𑐡𑐸𑐬 𑐎𑐳𑐵𑑅𑐫𑐵 𑐕𑐾𑑃𑐫𑑂 𑐔𑑂𑐰𑑄𑐐𑐸 𑐩𑐸𑑃𑐖𑑂𑐫𑐵𑐫𑑂 𑐰𑐫𑑂𑐎𑐮𑑄 𑐕𑐐𑐹 𑐥𑑂𑐬𑐳𑑂𑐟𑐵𑐰 𑐣𑑂𑐴𑑂𑐫𑐧𑑂𑐰𑐫𑐵𑐡𑐶𑐮 𑑋 ‘𑐠𑑂𑐰 𑐳𑐬𑐎𑐵𑐬𑑄 𑐣𑐾𑐥𑐵𑐮𑐨𑐵𑐲𑐵𑐫𑐵𑐟 𑐳𑑂𑐫𑐵𑐫𑐾𑐐𑐸 𑐖𑑂𑐫𑐵 𑐫𑐵𑐟 𑑋

𑐄𑐎𑐶𑑄 𑐣𑐾𑐥𑐵𑐮𑐨𑐵𑐲𑐵 𑐳𑐶𑐟 𑐢𑐎𑐵𑑅 𑐳𑐶𑐠𑑄 𑐫𑑄𑐎𑐾 𑐣𑐸, 𑐠𑐸𑐎𑐶𑑄 𑐳𑐬𑐎𑐵𑐬𑐫𑐵 𑐰𑐶𑐬𑑀𑐢 𑐫𑐵𑐫𑐾𑐐𑐸, 𑐖𑐣𑐟𑐵𑐫𑐵𑐟 𑐔𑐾𑐟𑐣𑐵 𑐧𑐶𑐂𑐐𑐸𑐫𑐵 𑐣𑐵𑐥𑑄 𑐴𑐮𑐶𑐩𑐫𑑂 𑐰𑑂𑐫𑐵𑐥𑐎𑐥𑑂𑐬𑐔𑐵𑐬 𑐣𑑄 𑐖𑐸𑐂 𑑋’ 𑐠𑑂𑐰 𑐏𑑃𑐫𑐵𑐟 𑐔𑑂𑐰𑐳𑐵𑐥𑐵𑐳𑐵𑐫𑐵 𑐕𑑂𑐫𑐵𑐘𑑂𑐖𑐾 𑐃𑐱𑑂𑐰𑐬𑐵𑐣𑐣𑑂𑐡 𑐱𑑂𑐬𑐾𑐲𑑂𑐛𑐵𑐔𑐵𑐬𑑂𑐫𑑄 𑐰𑐶𑐬𑑀𑐢 𑐫𑐵𑐣𑐵𑑅 𑐠𑐸𑐮𑐶 𑐖𑑂𑐫𑐵𑑄 𑐣𑐾𑐥𑐵𑐮𑐨𑐵𑐲𑐵 𑐳𑐷𑐩𑐏𑐸, 𑐄𑐎𑐶𑑄 𑐗𑐷𑐳𑑄 𑐠𑑂𑐰𑐫𑐵 𑐰𑐶𑐬𑑀𑐢𑐫𑑂 𑐁𑐣𑑂𑐡𑑀𑐮𑐣 𑐫𑐵𑐫𑐾𑐩𑐵𑑅 𑐢𑐂𑐐𑐸 𑐳𑑅 𑐟𑐫𑐵𑐡𑐶𑐮 𑑋 𑐀𑐣 𑐕𑐸𑑄 𑐏𑑃 𑐎𑑂𑐰𑑅𑐕𑐷 𑐩𑐦𑐸𑐟 𑑋 𑐔𑑂𑐰𑐳𑐵𑐥𑐵𑐳𑐵𑑄 𑐩𑐾𑐐𑐸 𑐕𑐸𑑄 𑐖𑑂𑐫𑐵 𑐩𑐫𑐵𑑅𑐳𑐵𑑄 𑐃𑐱𑑂𑐰𑐬𑐵𑐣𑐣𑑂𑐡𑑄 𑐁𑐣𑑂𑐡𑑀𑐮𑐣𑐫𑐵 𑐣𑐾𑐟𑐺𑐟𑑂𑐰 𑐫𑐵𑐣𑐵𑐡𑐶𑐮 𑑋 𑐥𑑂𑐬𑐾𑐩 𑐧𑐴𑐵𑐡𑐸𑐬 𑐎𑐳𑐵𑑅𑐣𑑄 𑐠𑐷𑐠𑐷 𑐠𑐵𑐳𑐫𑑂 𑐣𑑂𑐰𑐔𑐸 𑐧𑐶𑐂𑐐𑐸 𑐖𑑂𑐫𑐵 𑐫𑐵𑐣𑐵𑐡𑐶𑐮 𑑋 𑐨𑐵𑐖𑐸 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬 𑐰 𑐕𑐟𑑂𑐬𑐧𑐴𑐵𑐡𑐸𑐬 𑐎𑐵𑐫𑐳𑑂𑐠𑐥𑐶𑐣𑐶𑐐𑐸 𑐢𑐵𑐥𑐹 𑐎𑐠𑑄 𑐨𑐶𑐎𑑂𑐲𑐸 𑐳𑐸𑐡𑐬𑑂𑐱𑐣 𑐰 𑐴𑐶𑐟𑐎𑐬𑐧𑐷𑐬 𑐳𑐶𑑄𑐴 𑐎𑑄𑐳𑐵𑐎𑐵𑐬𑐥𑐶𑑄 𑐣𑑄 𑐄𑐐𑐸 𑐁𑐣𑑂𑐡𑑀𑐮𑐣𑐫𑐵 𑐥𑑂𑐬𑐩𑐸𑐏 𑐰 𑐥𑑂𑐬𑐏𑐬 𑐰𑐎𑑂𑐟𑐵𑐥𑐶𑑄 𑐏𑑅 𑑋 𑐰𑐫𑑂𑐎𑑅𑐥𑐶𑑄 𑐐𑐶𑐬𑐦𑑂𑐟𑐵𑐬 𑐣𑑄 𑐖𑐹𑐐𑐸 𑐏𑑅 𑑋

𑐡𑐎𑐮𑐫𑑂 𑐣𑑂𑐴𑐵𑐥𑐵𑑄𑐐𑐸 𑐩𑐸𑑃𑐖𑑂𑐫𑐵 𑑒𑑐𑑒𑑒 𑐧𑐿𑐱𑐵𑐏 𑑕 𑐐𑐟𑐾 𑐳𑐣𑐶𑐰𑐵𑑅 𑐎𑐸𑐣𑑂𑐴𑐸 𑐳𑐷𑐑𑑅 𑐧𑐶𑐴𑐵𑐬 𑐮𑐶𑐄𑐣𑐾𑐫𑐵 𑐎𑑂𑐰𑑄𑐧𑐴𑐵𑐮𑐫𑑂 𑐖𑐸𑐮 𑑋 𑐄𑐐𑐸 𑐩𑐸𑑃𑐖𑑂𑐫𑐵𑐫𑑂 𑐨𑐶𑐎𑑂𑐲𑐸 𑐀𑐱𑑂𑐰𑐑𑑀𑐲, 𑐨𑐶𑐎𑑂𑐲𑐸 𑐎𑐸𑐩𑐵𑐬 𑐎𑐵𑐱𑑂𑐫𑐥 𑐣𑐵𑐥𑑄 𑐃𑐱𑑂𑐰𑐬𑐵𑐣𑐣𑑂𑐡 𑐱𑑂𑐬𑐾𑐲𑑂𑐛𑐵𑐔𑐵𑐬𑑂𑐫, 𑐡𑐸𑐬𑑂𑐐𑐵𑐮𑐵𑐮 𑐰 𑐱𑐵𑐣𑑂𑐟𑐡𑐵𑐳𑐥𑐶𑑄𑐳𑑄 𑐣𑐰𑐵𑐣𑐵𑐡𑐷𑐐𑐸 𑐏𑑅𑐳𑐵 𑐮𑑂𑐫𑐵𑐫𑑂𑐩𑑂𑐴𑐥𑐶𑑄 𑐖𑑂𑐫𑐵𑐎𑑅𑐩𑐶𑐥𑐶𑑄𑐳𑑄 𑐠𑑅𑐠𑑅𑐐𑐸 𑐔𑐶𑐣𑐵𑐏𑑃 𑐧𑑂𑐰𑐣𑐵𑑅 𑐣𑑂𑐫𑑄𑐎𑐹𑐐𑐸 𑐏𑑅 𑑋𑐀𑐣𑑄 𑐮𑐶𑐥𑐵𑐫𑐵 𑐳𑑂𑐰𑑄𑐐𑐹𑐟𑐶 𑐩𑐸𑑃𑐖𑑂𑐫𑐵 𑐰 𑐴𑐾 𑐎𑑂𑐰𑑄𑐧𑐴𑐵𑐮𑐫𑑂 𑐖𑐸𑐮𑐳𑐵 𑐕𑐐𑐹 𑐩𑐸𑑃𑐖𑑂𑐫𑐵 𑐎𑐣𑑂𑐫𑐵 𑐩𑐣𑑂𑐡𑐶𑐬𑐫𑑂 𑐖𑐸𑐮 𑑋 𑐩𑐸𑑃𑐖𑑂𑐫𑐵𑐫𑑂 𑐣𑑂𑐴𑐹𑐣𑑂𑐴𑐹𑐥𑐶𑑄 𑐩𑐣𑐹𑐟𑐳𑐾𑑄 𑐧𑑂𑐰𑐟𑐶 𑐎𑐵𑐫𑐾𑐐𑐸 𑐰 𑐣𑑂𑐴𑐹𑐣𑑂𑐴𑐹𑐥𑐶𑑄 𑐔𑑂𑐰𑐩𑐶𑐥𑐶𑑄𑐳𑑄 𑐠𑑅𑐠𑑅𑐐𑐸 𑐔𑑂𑐰𑐳𑐸 𑐧𑑂𑐰𑐣𑐵𑑅 𑐣𑑂𑐫𑑄𑐎𑐾𑐐𑐸 𑐖𑑂𑐫𑐵 𑐖𑐸𑐮 𑑋𑐠𑑂𑐰 𑐖𑑂𑐫𑐵𑐗𑑂𑐰𑑅𑐫𑐵𑐟 𑐟𑐧𑑂𑐫𑐵𑐎𑐵𑐫𑑄𑐎𑐾𑐟 𑐟𑑂𑐰𑐵𑑅𑐟𑑂𑐰𑐵𑐮𑐫𑑂 𑐥𑐵𑐮𑑄𑐥𑐵𑑅 𑐩𑐸𑑃𑐖𑑂𑐫𑐵 𑐫𑐵𑐣𑐵 𑐰𑐣𑐾𑐐𑐸 𑐰 𑐠𑐷𑐠𑐷 𑐟𑑂𑐰𑐵𑑅𑐫𑐵𑐥𑐶𑑄𑐟 𑐣𑑄 𑐳𑐎𑑂𑐬𑐶𑐫 𑐧𑑂𑐰𑐟𑐶 𑐎𑐵𑐫𑐾𑐎𑐾𑐐𑐸 𑐰 𑐖𑐣𑐟𑐵𑐫𑑂 𑐰𑐵𑑅𑐔𑐵𑑅𑐫𑐵 𑐮𑐴𑐬 𑐠𑐣𑐾 𑐩𑐵𑑅𑐐𑐸 𑐳𑐴𑐮𑐴 𑐖𑐸𑐮 𑑋

𑐄𑐐𑐸 𑐂𑐮𑐫𑑂 𑐠𑐷𑐠𑐷 𑐟𑑂𑐰𑐵𑐮𑐫𑑂 𑐧𑐵𑐩𑐥𑐣𑑂𑐠𑐷 𑐧𑐸𑐡𑑂𑐢𑐶𑐖𑐷𑐰𑐷𑐥𑐶𑑄𑐳𑑄 𑐥𑑄𑐔𑐵𑐫𑐟𑐷 𑐳𑑂𑐠𑐵𑐣𑐷𑐫 𑐔𑐸𑐣𑐵𑐰𑐫𑑂 𑐧𑑂𑐰𑐟𑐶 𑐎𑐫𑐵𑑅 𑐖𑐣𑐟𑐵𑐫𑐵 𑐳𑐾𑐰𑐵 𑐫𑐵𑐫𑐾𑐐𑐸𑐫𑐵 𑐣𑐵𑐥𑐣𑐵𑐥𑑄 𑐖𑐣𑐟𑐵𑐫𑑂 𑐰𑐵𑑅𑐔𑐵𑑅 𑐠𑐣𑐾𑐐𑐸 𑐥𑑄𑐔𑐵𑐫𑐟𑐷 𑐣𑐶𑐬𑑄𑐎𑐸𑐱𑐟𑐵𑐫𑐵𑐟 𑐡𑐸𑐣𑐾𑑄 𑐥𑐶𑐣𑐾𑑄 𑐣𑐶𑐠𑐵𑐳𑑄 𑐥𑑂𑐬𑐴𑐵𑐬 𑐫𑐵𑐫𑐾𑐐𑐸 𑐣𑐷𑐟𑐶 𑐎𑐫𑐵𑑅 𑐣𑑂𑐴𑑂𑐫𑐖𑑂𑐫𑐵𑑅𑐐𑐸 𑐖𑐸𑐮 𑑋 𑐄𑐥𑐶𑑄 𑐩𑐢𑑂𑐫𑐫𑑂 𑐖𑑂𑐫𑐵𑑅𑐧𑐴𑐵𑑅𑐫𑐵 𑐖𑐷𑐰𑐣𑐥𑑂𑐬𑐳𑐵𑐡 𑐱𑑂𑐬𑐾𑐲𑑂𑐛, 𑐎𑐶𑐮𑐵𑐐𑑅𑐫𑐵 𑐔𑐣𑑂𑐡𑐵𑐣𑐣𑑂𑐡 𑐣𑐾𑐰𑐵𑑅, 𑐢𑑂𑐰𑐵𑐏𑐵𑐧𑐴𑐵𑑅𑐫𑐵 𑐖𑑂𑐘𑐵𑐣𑑂𑐩𑐵𑐣𑐣𑑂𑐡 𑐧𑐖𑑂𑐬𑐵𑐔𑐵𑐬𑑂𑐫, 𑐫𑐟𑐏𑐵𑐫𑐵 𑐰𑐶𑐲𑑂𑐞𑐸𑐧𑐴𑐵𑐡𑐸𑐬 𑐱𑑂𑐬𑐾𑐲𑑂𑐛, 𑐨𑐶𑑄𑐡𑑂𑐫𑑅𑐟𑑂𑐰𑐵𑑅𑐫𑐵 𑐎𑐺𑐲𑑂𑐞𑐴𑐬𑐶 𑐳𑑂𑐠𑐵𑐥𑐶𑐟 𑐰 𑐩𑐾𑐩𑐾𑐥𑐶 𑐣𑑄 𑐠𑑂𑐰 𑐰𑐶𑐬𑑀𑐢 𑐀𑐨𑐶𑐫𑐵𑐣𑐫𑐵𑐟 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐟 𑐟𑐫𑐵𑐬 𑐖𑐸𑐮 𑑋 𑐠𑑂𑐰 𑐴𑐾 𑐳𑐶𑐮𑐳𑐶𑐮𑐵𑐫𑑂 𑐖𑐷𑐰𑐣𑐥𑑂𑐬𑐳𑐵𑐡 𑐱𑑂𑐬𑐾𑐲𑑂𑐛𑐫𑐵 𑐣𑐵𑐫𑑅𑐳𑐸𑐂 𑐖𑑂𑐫𑐵𑑅𑐧𑐴𑐵𑐮𑐫𑑂 𑐮𑑂𑐫𑐵𑐫𑑂𑐩𑑂𑐴 𑐥𑐸𑐔𑑅 𑐢𑐂𑐐𑐸 𑐏𑐮𑑅 𑐣𑐷𑐳𑑂𑐰𑐣𑐵𑑅 𑐟𑑅𑐖𑐶𑐎 𑐩𑐸𑑃𑐖𑑂𑐫𑐵 𑐖𑐸𑐮 𑑋

𑐀𑐣 𑐴𑐬𑐶𑐱𑑄𑐎𑐬 𑐬𑑄𑐖𑐶𑐟𑐎𑐵𑐬, 𑐡𑑂𑐰𑐵𑐬𑐶𑐎𑐵𑐮𑐵𑐮 𑐡𑐵𑐄𑐬𑐾𑐥𑐶𑐣𑐶𑐐𑐸 𑐨𑐹𑐩𑐶𑐎𑐵 𑐫𑐎𑑂𑐰 𑐡𑐸 𑑋 𑐖𑐷𑐰𑐣 𑐥𑑂𑐬𑐳𑐵𑐡 𑐱𑑂𑐬𑐾𑐲𑑂𑐛𑐫𑐵 𑐎𑐶𑐖𑐵 𑐳𑐸𑐬𑐾𑐣𑑂𑐡𑑂𑐬𑐥𑑂𑐬𑐳𑐵𑐡 𑐱𑑂𑐬𑐾𑐲𑑂𑐛𑑄 𑐎𑐰𑐶 𑐡𑐸𑐬𑑂𑐐𑐵𑐮𑐵𑐮𑐫𑐵 ‘𑐑𑐵𑑅𑐖𑐸𑐫𑐵𑑅𑐖𑐎 𑐏𑑂𑐰𑐂𑐐𑐸 𑐏𑑅 ………’ 𑐢𑐂𑐐𑐸 𑐟𑐳𑐎𑑄 𑐮𑑀𑐎𑑄𑐴𑑂𑐰𑐵𑑅𑐐𑐸 𑐩𑐾𑐫𑑂 𑐮𑐫𑑂 𑐟𑐫𑐵𑑅 𑐮𑐳𑐎𑐸𑐳 𑐩𑑂𑐫𑐾𑑃 𑐴𑐵𑐮𑐵𑑅 𑐣𑑂𑐫𑑄𑐎𑐹𑐐𑐸 𑐏𑑅 𑑋 𑐠𑐸𑐎𑐠𑑄 𑐴𑐾 𑐳𑑄𑐐𑐷𑐟𑐎𑐵𑐬 𑐳𑐸𑐬𑐾𑐣𑑂𑐡𑑂𑐬𑐥𑑂𑐬𑐳𑐵𑐡 𑐱𑑂𑐬𑐾𑐲𑑂𑐛𑑄 𑐟𑑅𑐥𑐸𑐩𑐕𑐶 𑐎𑐰𑐶 𑐡𑐸𑐬𑑂𑐐𑐵𑐮𑐵𑐮𑐫𑐵 𑐰𑐶𑐬𑑀𑐢𑐫𑐵 𑐩𑑂𑐫𑐾𑑃𑐫𑑂 𑐮𑐫𑑂 𑐟𑐫𑐵𑐡𑐷𑐐𑐸 𑐡𑐸 𑑋𑐀𑐣𑑄𑐮𑐶 𑐩𑐸𑐎𑑂𑐟𑐶 𑐳𑐵𑐫𑑂𑐩𑐶𑑄 𑐎𑐩𑐮𑐵𑐕𑐶 𑐟𑑂𑐰𑐵𑐮𑐫𑑂 𑐩𑐸𑑃𑐖𑑂𑐫𑐵 𑐫𑐵𑐫𑐾𑐐𑐸 𑐥𑐵𑑅 𑐎𑐫𑐵𑐰𑐣 𑑋 𑐠𑑂𑐰 𑐖𑑂𑐫𑐵𑐗𑑂𑐰𑑅 𑐟𑐵𑑅𑐮𑐵𑐎𑐾𑐟 𑐀𑐣 ‘𑐥𑐵𑐳𑐵 𑐥𑐸𑐔𑑅’ 𑐢𑐂𑐐𑐸 𑐏𑐮𑑅 𑐣𑐷𑐳𑑂𑐰𑐣𑐵𑑅 𑐏𑑂𑐫𑐵𑐮𑑅 𑐔𑑂𑐰𑐩𑐶 𑐰 𑐳𑑂𑐫𑐣𑐵𑐩𑐶 𑐱𑑂𑐬𑐷𑐎𑐺𑐲𑑂𑐞 𑐀𑐞𑐸, 𑐩𑐠𑐸𑐬𑐵𑐬𑐵𑐩 𑐱𑑂𑐬𑐾𑐲𑑂𑐛, 𑐰𑐶𑐖𑐫 𑐩𑐵𑐣𑐣𑑂𑐢𑐬 𑐰 𑐩𑐾𑐩𑐾𑐥𑐶𑑄 𑐮𑑂𑐫𑐵𑐫𑑂𑐩𑑂𑐴𑐥𑐶𑑄 𑐳𑐎𑐺𑐫 𑐖𑐸𑐫𑐵𑑅 𑐟𑑅𑐖𑐶𑐎 𑐩𑐸𑑃𑐖𑑂𑐫𑐵 𑐫𑐵𑐟 𑑋

𑐰𑐫𑐵𑑄 𑐮𑐶𑐥𑐵 𑐎𑐰𑐶 𑐣𑐵𑐟𑐶𑐧𑐖𑑂𑐬 𑐧𑐖𑑂𑐬𑐵𑐔𑐵𑐬𑑂𑐫 𑐰 𑐡𑐧𑐮𑐎𑐵𑐖𑐷 𑐟𑐸𑐮𑐵𑐢𑐬 𑐣𑐵𑐥𑑄 𑐨𑑀𑐟𑐵𑐴𑐶𑐟𑐶, 𑐡𑐐𑐸𑐧𑐴𑐵𑑅𑐫𑐵 𑐮𑑂𑐫𑐵𑐫𑑂𑐩𑑂𑐴𑐟 𑐖𑐵𑐣𑐵𑑅 𑐡𑐐𑐸𑐧𑐴𑐵𑐮𑐫𑑂 𑐟𑑅𑐖𑐶𑐎 𑐩𑐸𑑃𑐖𑑂𑐫𑐵 𑐫𑐵𑐟 𑑋 𑐠𑐣𑑄𑐮𑐶 𑐟𑑂𑐰𑐵𑑅𑐟𑑂𑐰𑐵𑐮𑐫𑑂 𑐳𑐵𑐴𑐶𑐟𑑂𑐫 𑐩𑐸𑑃𑐖𑑂𑐫𑐵 𑐫𑐵𑐫𑐾𑐟 𑐗𑑂𑐰𑑅𑐕𑐸𑐂𑐐𑐸 𑐳𑐸𑐬𑐸 𑐖𑐸𑐮 𑑋 𑐩𑐸𑑃𑐖𑑂𑐫𑐵𑐫𑑂 𑐀𑐥𑑂𑐰𑑅 𑐠𑐾𑑄 𑐰𑐶𑐡𑑂𑐬𑑀𑐴𑐫𑐵 𑐔𑐶𑐣𑐵𑐏𑑃, 𑐀𑐳𑐣𑑂𑐟𑑀𑐲𑐫𑐵 𑐔𑐶𑐣𑐵𑐏𑑃, 𑐢𑑂𑐫𑐵𑐔𑐹 𑐔𑐶𑐣𑐵𑐏𑑄 𑐠𑐵𑐫𑑂 𑐎𑐵𑐮 𑑋 𑐩𑐟𑐶𑐣𑐵 𑐰 𑐣𑑂𑐴𑑂𑐫𑐂𑐥𑐸𑐎𑐾𑐐𑐸 𑐏𑑃 𑐖𑐎 𑐡𑐸𑐐𑐸 𑐔𑐶𑐣𑐵𑐏𑑃 𑐰 𑐔𑑂𑐰𑐳𑐸 𑐄𑐐𑐸 𑐩𑐸𑑃𑐖𑑂𑐫𑐵𑐫𑑂 𑐳𑐸𑐣𑐵𑐣𑑄 𑐧𑑂𑐰𑑄𑐰𑑅𑐐𑐸 𑐏𑐣𑐾𑐩𑐡𑐸 𑑋 𑐩𑐸𑑃𑐖𑑂𑐫𑐵𑐫𑑂 𑐣𑑂𑐰𑐰𑐵𑐂𑐥𑐶𑑄𑐳𑑄 𑐣𑑄 𑐰𑐶𑐬𑑀𑐢𑐫𑐵 𑐳𑑅 𑐴𑐾 𑐠𑑂𑐰𑐫𑐾𑐎𑐷𑐐𑐸 𑐏𑑅 𑑋 𑐰𑑂𑐫𑐰𑐳𑑂𑐠𑐵 𑐥𑑂𑐬𑐟𑐶 𑐀𑐳𑐣𑑂𑐟𑑀𑐲𑐫𑐵 𑐳𑑅 𑐣𑑂𑐫𑐣𑐾𑐟 𑐩𑐸𑑃𑐖𑑂𑐫𑐵𑐫𑑂 𑐁𑐥𑐵𑐮𑑄 𑐩𑐣𑐹𑐟 𑐩𑐸𑑄𑐐𑐸 𑐏𑐣𑐾𑐡𑐟 𑑋 𑐥𑑄𑐔𑐵𑐫𑐟𑐷 𑐰𑑂𑐫𑐰𑐳𑑂𑐠𑐵𑐫𑐵𑐟 𑐳𑐷𑐩𑐡𑐫𑐾𑐎 𑐰𑐶𑐬𑑀𑐢 𑐫𑐵𑐫𑐾𑐐𑐸 𑐰 𑐖𑐣𑐟𑐵𑐫𑐵𑐟 𑐔𑐾𑐟𑐣𑐵 𑐠𑐣𑐾𑐐𑐸 𑐖𑑂𑐫𑐵𑐫𑑂 𑐠𑑂𑐰 𑐩𑐸𑑃𑐖𑑂𑐫𑐵 𑐳𑐦𑐮 𑐖𑐹𑐐𑐸 𑐏𑑅𑑋

𑐠𑑂𑐰 𑐩𑐸𑑃𑐖𑑂𑐫𑐵 𑐗𑑂𑐰𑐵𑑅𑐧𑐴𑐵𑐮𑐫𑑂 𑐡𑐸𑐬𑑂𑐐𑐵𑐩𑐵𑐣𑐣𑑂𑐡 𑐧𑐖𑑂𑐬𑐵𑐔𑐵𑐬𑑂𑐫, 𑐢𑑂𑐰𑐵𑐏𑐵𑐧𑐴𑐵𑐮𑐫𑑂 𑐖𑑂𑐘𑐵𑐣𑐶𑐩𑐵𑐣𑐣𑑂𑐡 𑐧𑐖𑑂𑐬𑐵𑐔𑐵𑐬𑑂𑐫𑑄 𑐣𑑂𑐴𑑂𑐫𑐵𑐎𑐵𑐡𑐷𑐐𑐸 𑐏𑑅𑐳𑐵 𑐖𑐩𑑅𑐧𑐴𑐵𑐮𑐫𑑂 𑐣𑑄 𑐕𑐎𑑅 𑐖𑐹𑐐𑐸 𑐡𑐸 𑑋 𑐠𑐸𑐎𑐠𑑄 𑐴𑐾 𑐣𑐎𑑂𑐳𑐵𑐮𑐫𑑂 𑐟𑐸𑐮𑐳𑐶 𑐳𑐵𑐫𑑂𑐩𑐶𑐥𑐶𑑄𑐳𑑄 𑐣𑑄 𑐐𑑂𑐰𑐳𑐵𑑅 𑐐𑑂𑐰𑐫𑐵𑐡𑐷𑐐𑐸 𑐏𑑅 𑑋𑐖𑐣𑐧𑐴𑐵𑐮𑐫𑑂 𑐬𑐵𑐖𑐵 𑐱𑐵𑐎𑑂𑐫 𑐰 𑐩𑐾𑐥𑐶𑑄 𑐥𑐵𑐳𑐵𑐥𑐶𑑄𑐳𑑄 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 𑐏𑑅 𑑋 𑐠𑑂𑐰𑐫𑐵𑑄 𑐮𑐶𑐥𑐵 𑐎𑑂𑐰𑐵𑑅𑐧𑐴𑐵𑐮𑐫𑑂 𑐄𑐟𑑂𑐟𑐩𑐬𑐟𑑂𑐣 𑐧𑐖𑑂𑐬𑐵𑐔𑐵𑐬𑑂𑐫 ‘𑐡𑐷𑐥𑐎’𑐥𑐶𑑄𑐳𑑄 𑐩𑐸𑑃𑐖𑑂𑐫𑐵𑐫𑐵 𑐐𑑂𑐰𑐳𑐵𑑅 𑐐𑑂𑐰𑐮𑐳𑐵 𑐟𑑂𑐫𑑄𑐐𑑅, 𑐎𑐸𑐮𑐵𑑄𑐨𑐸𑐮𑐸𑐂 𑐰𑐶𑐲𑑂𑐞𑐸 𑐔𑐶𑐟𑑂𑐬𑐎𑐵𑐬𑑄 𑐟𑑂𑐰𑐵𑑅𑐫𑐵𑐥𑐶𑑄 𑐩𑐸𑑄𑐎𑐵𑑅 𑐟𑑅𑐖𑐶𑐎 𑐩𑐸𑑃𑐖𑑂𑐫𑐵 𑐫𑐵𑐟 𑑋 𑐀𑐮𑐾 𑐟𑐸𑑄𑐕𑐾𑐧𑐴𑐵𑑅 𑐩𑐏𑑄 𑐐𑐮𑑂𑐮𑐷𑐂 𑐬𑐟𑑂𑐣𑐩𑐵𑐣 𑐜𑑄𑐐𑑀𑐮 𑐰 𑐥𑑂𑐬𑐾𑐩𑐬𑐟𑑂𑐣𑐥𑐶𑐳𑑄 𑐩𑐸𑑃𑐖𑑂𑐫𑐵 𑐫𑐵𑐟 𑑋 𑐩𑐏𑑄 𑐧𑐴𑐵𑐮𑐫𑑂 𑐩𑐵𑐴𑐶𑐮𑐵𑐎𑐵𑐖𑐶 𑐟𑐸𑐮𑐵𑐢𑐬𑑄 𑐩𑐸𑑃𑐖𑑂𑐫𑐵𑐫𑐵 𑐐𑑂𑐰𑐳𑐵𑑅 𑐐𑑂𑐰𑐮 𑑋 𑐀𑐠𑐾 𑐴𑐾 𑐰𑑄𑐑𑑅 𑐟𑑅𑐢𑑄𑐔𑐸𑐎 𑐩𑐴𑐵𑐧𑑁𑐡𑑂𑐢, 𑐦𑐳𑐶𑐎𑑂𑐫𑐧, 𑐰𑐟𑐸 𑐩𑐹𑐧𑐴𑐵𑑅, 𑐂𑐟𑐸𑑄𑐧𑐴𑐵𑑅 𑐎𑐾𑐱𑐔𑐣𑑂𑐡𑑂𑐬 𑐰𑐶𑐴𑐵𑐬𑐫𑑂 𑐣𑑄 𑐩𑐸𑑃𑐖𑑂𑐫𑐵 𑐖𑐹𑐐𑐸 𑐡𑐸 𑑋

𑐟𑐾𑐧𑐴𑐵𑐮𑐫𑑂 𑐖𑐹𑐧𑐮𑐫𑑂 𑐳𑑂𑐰𑐎𑐸𑐩𑐶𑐟 𑐫𑐎𑑂𑐰𑐫𑐎𑑂𑐰 𑐡𑐸𑐐𑐸 𑐖𑐎 𑐩𑐏𑐸 𑐰𑐵 𑐰𑐫𑐾𑐎 𑐰𑐫𑐾𑐎 𑐣𑑄 𑐎𑐸𑐳𑐵𑑄 𑐎𑐸𑐫𑐵𑑅 𑐧𑑂𑐰𑐟𑐶 𑐎𑐫𑐵𑐔𑑂𑐰𑐣 𑑋 𑐠𑐸𑐎𑐠𑑄 𑐴𑐾 𑐩𑐬𑐸𑐧𑐴𑐶𑐮𑐶𑐂 𑐩𑐸𑑃𑐖𑑂𑐫𑐵 𑐖𑐹𑐧𑐮𑐫𑑂 𑐡𑐧𑐸𑐮𑐶𑐂 ‘𑐗𑐷 𑐟𑑂𑐰𑐵𑐎𑑅 𑐖𑐸𑐫𑐵𑑅 𑐩𑐏𑐸 𑐥𑐵 𑐖𑐸𑐫𑐵𑑅 𑐩𑑂𑐰𑐵𑐫𑐾 𑐳𑐫𑐾𑐎𑐾’ 𑐢𑐂𑐐𑐸 𑐥𑑂𑐬𑐾𑐩 𑐧𑐴𑐵𑐡𑐸𑐬 𑐎𑐳𑐵𑐫𑐵 𑐢𑐵𑐥𑐹 𑐡𑐸𑐐𑐸 𑐧𑐵𑐫𑑂𑐣𑐬 𑐟𑐎𑑄 𑐏𑐵𑑅𑐐𑐸 𑐏𑐣𑐾𑐡𑐟 𑐢𑐂𑐐𑐸 𑐨𑐵𑐖𑐸 𑐰𑐶𑐲𑑂𑐞𑐸 𑐔𑐶𑐟𑑂𑐬𑐎𑐵𑐬𑐫𑐵 𑐢𑐵𑐥𑐹 𑐡𑐸 𑑋 𑐟𑐬 𑐮𑐸𑐩𑑄𑐟𑐶 𑐩𑐸𑑃𑐖𑑂𑐫𑐵𑐫𑑂 𑐨𑐵𑐖𑐸 𑐩𑐮𑑂𑐮 𑐎𑐾 𑐳𑐸𑐣𑑂𑐡𑐬𑑄 𑐢𑐫𑐵𑐡𑐷 𑐎𑐠𑑄 𑐠𑑂𑐰 𑐧𑐵𑐫𑐣𑐬 𑐩𑐬𑐸𑐧𑐴𑐶𑐮𑐶𑐂 𑐩𑐏𑐸 𑐟𑐾𑐧𑐴𑐵𑐮𑐫𑑂 𑐧𑑂𑐰𑐫𑐵𑐟𑑅𑐐𑐸 𑐏𑑅, 𑐧𑐬𑐸 𑐩𑐬𑐸𑐧𑐴𑐶𑐮𑐶𑐂 𑐩𑐣𑐹𑐟𑐫𑑂𑐟 𑐁𑐱𑑂𑐔𑐬𑑂𑐫 𑐖𑐸𑐂𑐎 𑐠𑐸𑐎𑐶𑐫𑐵 𑐀𑑅𑐏𑑅 “𑐗𑐷 𑐔𑐸𑐥𑐶 𑐖𑐸𑐫𑐵𑑅 𑐖𑐎 𑐩𑐏𑐸 𑐟𑑂𑐰𑐵𑐎𑑅 𑐖𑐸𑐫𑐵𑑅 𑐣𑑄 𑐩𑑂𑐰𑐵𑐫𑐾 𑐳𑐫𑐾𑐎𑐾𑐩𑐵𑑅” 𑐢𑐂𑐐𑐸 𑐥𑑂𑐬𑐾𑐩𑐧𑐴𑐵𑐡𑐸𑐬 𑐎𑐳𑐵𑑅𑐫𑐵 𑐴𑐾 𑐢𑐵𑐥𑐹 𑐧𑑂𑐰𑐫𑐵 𑐟𑑅𑐐𑐸 𑐏𑑅 𑑋

𑐩𑐸𑑃𑐖𑑂𑐫𑐵𑐫𑑂 𑐟𑐳𑐎𑑄 𑐕𑐵𑐎𑑂𑐎 𑐣𑑂𑐰𑐰𑐵𑐂𑐥𑐶𑑄𑐮𑐫𑑂 𑐥𑑂𑐬𑐾𑐩𑐧𑐴𑐵𑐡𑐸𑐬 𑐎𑐳𑐵𑑅, 𑐩𑑄𑐐𑐮𑐩𑐵𑐣 𑐱𑐵𑐎𑑂𑐫 𑐌𑐩𑐧𑐴𑐵𑑅, 𑐨𑐶𑐎𑑂𑐲𑐸 𑐳𑐸𑐡𑐬𑑂𑐱𑐣 𑐣𑑄 𑐏𑑅 𑑋 𑐳𑑂𑐰𑐫𑐩𑑂𑐨𑐹𑐮𑐵𑐮 𑐱𑑂𑐬𑐾𑐲𑑂𑐛, 𑐩𑐵𑐞𑐶𑐎𑐮𑐵𑐮 𑐱𑑂𑐬𑐾𑐲𑑂𑐛 𑐰 𑐩𑐾𑐩𑐾𑐥𑐶𑑄 𑐫𑐎𑑂𑐰𑐳𑐶𑐣𑑄 𑐣𑑂𑐰𑐰𑐵𑐣𑐵𑐡𑐷𑐐𑐸 𑐡𑐸 𑑋 𑐠𑑂𑐰 𑐩𑐸𑑃𑐖𑑂𑐫𑐵 𑐨𑐶𑑄𑐡𑑂𑐫𑑅 𑐟𑑂𑐰𑐵𑐮𑐫𑑂, 𑐥𑐬𑑀𑐥𑐎𑐵𑐬 𑐳𑑂𑐎𑐸𑐮𑐫𑑂 𑐣𑑄 𑐖𑐹𑐐𑐸 𑐡𑐸 𑑋 𑐂𑐣𑑂𑐡𑑂𑐬𑐩𑐵𑐮𑐶𑑄 𑐎𑐵𑐮𑐶𑐩𑐵𑐟𑐶𑐂 𑐫𑐵𑐫𑐾 𑐢𑐸𑐣𑐾𑐰𑑄 𑐠𑑂𑐰 𑐎𑐶𑐥𑐹, 𑐣𑐐𑐵𑑄, 𑐥𑐵𑑄𑐐𑐵, 𑐧𑑂𑐰𑐳𑐶𑐐𑐵𑑄, 𑐎𑐶𑐥𑐸𑐮𑑂𑐔𑐵 𑐰 𑐳𑐟𑐸𑑄𑐐𑑅𑐥𑐵𑐏𑐾 𑐣𑑂𑐴𑑂𑐫𑐖𑑂𑐫𑐵𑐟 𑑋 𑐠𑐣 𑐎𑐸𑐮𑐧𑐴𑐵𑐡𑐸𑐬 𑐩𑐴𑐬𑑂𑐖𑐣𑐥𑐶𑑄𑐳𑑄 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐷𑐐𑐸 𑐖𑐸𑐮 𑑋 𑐀𑐣𑑄𑐮𑐶 𑐢𑐬𑑂𑐩𑐎𑐺𑐲𑑂𑐞 𑐳𑐸𑐰𑐵𑐮 𑐰 𑐨𑐷𑐩𑐧𑐴𑐵𑐡𑐸𑐬 𑐣𑐎𑑅𑐩𑐶𑐥𑐶𑐣𑐶𑐐𑐸 𑐐𑑂𑐰𑐵𑐴𑐵𑐮𑐶𑑄 𑐧𑐮𑑄𑐧𑐸 𑐰 𑐠𑐎𑑂𑐰𑐵𑐟𑐫𑑂 𑐩𑐸𑑃𑐖𑑂𑐫𑐵 𑐖𑐸𑐮 𑑋 𑐠𑑂𑐰 𑐩𑐸𑑃𑐖𑑂𑐫𑐵𑐫𑐵 𑐡𑐎𑐮𑐫𑑂 𑐮𑐶𑐥𑐵𑑄𑐐𑐸 𑐩𑐸𑑄𑐖𑑂𑐫𑐵 𑑒𑑐𑑒𑑒 𑐳𑐵𑐮 𑐔𑐿𑐟𑑂𑐬 𑑒𑑗 𑐐𑐟𑐾 𑐱𑐣𑐶𑐰𑐵𑑅 𑐎𑐸𑐣𑑂𑐴𑐸 𑐳𑐷𑐑𑐮𑐫𑑂 𑐴𑐾 𑐎𑑂𑐰𑐔𑐵𑐫𑐾𑐎𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅 𑑋

𑐫𑐾𑑃𑐣𑑄 𑐳𑐸𑐬𑐸 𑐖𑐹𑐐𑐸 𑐠𑑂𑐰 𑐩𑐸𑑃𑐖𑑂𑐫𑐵𑐫𑐵 𑐮𑐴𑐬 𑐫𑐮𑐫𑑂 𑐣𑑄 𑐠𑑂𑐫𑐣 𑑋 𑐫𑐮𑐫𑑂 𑐳𑐵𑐴𑐶𑐟𑑂𑐫𑐫𑐵 𑐩𑐹𑐮𑐸𑐏𑐵𑐫𑐵 𑐁𑐴𑑂𑐰𑐵𑐣𑐫𑑂 𑐕𑐟𑑂𑐬𑐧𑐴𑐵𑐡𑐸𑐬 𑐎𑐵𑐫𑐲𑑂𑐛, 𑐬𑑀𑐴𑐶𑐞𑐷 𑐧𑐴𑐵𑐡𑐸𑐬 𑐎𑐵𑐫𑐲𑑂𑐛, 𑐳𑐸𑐰𑐬𑑂𑐞𑐬𑐵𑐩 𑐖𑑀𑐱𑐷, 𑐁𑐱𑐵 𑐧𑐴𑐵𑐡𑐸𑐬 𑐣𑐸𑐐𑑅, 𑐩𑐸𑐎𑐸𑐣𑑂𑐡𑐧𑐴𑐵𑐡𑐸𑐬 𑐱𑑂𑐬𑐾𑐲𑑂𑐛, 𑐩𑐣𑐩𑑀𑐴𑐣 𑐱𑑂𑐬𑐾𑐲𑑂𑐛, 𑐎𑐵𑐖𑐶𑐩𑐵𑐣 𑐖𑐰𑐵𑑅, 𑐥𑐸𑐲𑑂𑐥𑐬𑐵𑐖 𑐬𑐵𑐖𑐎𑐬𑑂𑐞𑐶𑐎𑐵𑐬, 𑐨𑐐𑐟𑐡𑐵𑐳 𑐱𑑂𑐬𑐾𑐲𑑂𑐛 𑐁𑐡𑐶𑐥𑐶𑐣𑐶𑐐𑐸 𑐎𑐸𑐟𑐮𑑄 𑐟𑑂𑐰𑐵𑑅 𑐟𑑂𑐰𑐵𑐮𑐫𑑂 𑐩𑐸𑑃𑐖𑑂𑐫𑐵 𑐖𑐸𑐮 𑑋 𑐣𑑂𑐴𑐵𑐥𑐵𑑄 𑐫𑐮𑐫𑐵 𑐩𑐞𑐶 𑐩𑐞𑑂𑐜𑐥 𑐰𑐶𑐴𑐵𑐬𑐫𑐵 𑐡𑐮𑐵𑐣𑐫𑑂 𑐖𑐹𑐐𑐸 𑐩𑐸𑑃𑐖𑑂𑐫𑐵 𑐮𑐶𑐥𑐵 𑐁𑐡𑐬𑑂𑐱 𑐎𑐣𑑂𑐫𑐵 𑐣𑐶𑐎𑐾𑐟𑐣, 𑐧𑐏𑐸𑑄𑐧𑐴𑐵𑑅, 𑐰𑐩𑑂𑐧𑐵𑐴𑐵𑑅 𑐴𑑁𑐐𑑅, 𑐔𑐎𑑂𑐬𑐰𑐴𑐷, 𑐟𑑂𑐫𑐵𑐐𑑅, 𑐮𑐸𑐏𑐸𑐳𑐷, 𑐀𑐐𑐶𑑄𑐩𑐠𑑅 𑐁𑐡𑐶 𑐟𑑂𑐰𑐵𑐮𑐫𑑂 𑐖𑐸𑐮 𑑋 𑐫𑐮𑐫𑑂 𑐖𑐹𑐐𑐸 𑐩𑐸𑑃𑐖𑑂𑐫𑐵𑐫𑑂 𑐫𑐮𑐫𑐵 𑐔𑑂𑐰𑐩𑐶𑐥𑐶𑑄 𑐣𑐵𑐥𑑄 𑐫𑐾𑑃𑐫𑐵 𑐁𑐥𑐵𑐮𑑄 𑐔𑑂𑐰𑐩𑐶𑐥𑐶𑑄𑐳𑑄 𑐣𑑄 𑐧𑑂𑐰𑐟𑐶 𑐎𑐫𑐵𑐡𑐷𑐐𑐸 𑐏𑑅 𑑋 𑐀𑐠𑐾 𑐴𑐾 𑐰𑐎𑑂𑐟𑐵𑐥𑐶𑑄 𑐣𑑄 𑐀𑐥𑑂𑐰𑑅 𑐢𑐫𑐵𑐠𑐾𑑄 𑐫𑐾𑑃𑐣𑑄 𑐴𑐾 𑐗𑐵𑐂𑐐𑐸 𑐏𑑅 𑑋

𑐩𑐸𑑃𑐖𑑂𑐫𑐵𑐫𑑂 𑐩𑐡𑐶𑐎𑑂𑐎 𑐧𑑂𑐰𑐟𑐶 𑐎𑐫𑐵𑐡𑐷𑐥𑐶𑑄 𑐫𑐮𑐫𑐵 𑐔𑑂𑐰𑐩𑐶𑐥𑐶𑑄 𑐩𑐢𑑂𑐫𑐾 𑐰𑐶𑐬𑐾𑐣𑑂𑐡𑑂𑐬 𑐱𑑂𑐬𑐾𑐲𑑂𑐛, 𑐎𑐵𑐖𑐶𑐩𑐵𑐣 𑐖𑐰𑐵𑑅 𑐰 𑐁𑐱𑐵𑐧𑐴𑐵𑐡𑐸𑐬 𑐣𑐸𑐐𑑅𑐥𑐶𑑄 𑐀𑐧𑐮𑐫𑑂 𑐔𑐸𑐂𑑃𑐔𑐸𑐂𑑃 𑐥𑐹𑐐𑐸 𑐔𑐶𑐣𑐵𑐏𑑃 𑐔𑑂𑐰𑐂𑐥𑐶𑑄 𑐖𑐸𑐫𑐵𑑅 𑐮𑑀𑐎𑑄𑐴𑑂𑐰𑐵𑑅𑐐𑐸 𑐏𑑅 𑑋 𑐀𑐠𑐾 𑐴𑐾 𑐰𑐶𑐡𑑂𑐬𑑀𑐴𑐫𑐵 𑐎𑐰𑐶𑐟𑐵 𑐣𑑂𑐫𑑄𑐎𑐹𑐩𑑂𑐴 𑐣𑐵𑐐𑐧𑐴𑐵𑑅𑐫𑐵 𑐎𑐰𑐶 𑐩𑑄𑐐𑐮𑐩𑐵𑐣 𑐱𑐵𑐎𑑂𑐫𑐫𑐵𑐟 𑐖𑑂𑐰𑐣𑐵 𑐫𑑄𑐎𑐵𑑅 𑐐𑐸𑐮𑐵 𑐟𑐎 𑐣𑐏𑐸 𑐖𑐾𑐮𑐫𑑂 𑐎𑐸𑐣𑐵𑐧𑐶𑐮 𑑋 𑐎𑐾.𑐎𑐾. 𑐴𑑂𑐰𑐵𑐮𑐸, 𑐳𑐎𑐮𑐵𑐣𑐣𑑂𑐡, 𑐣𑐵𑐣𑐶𑐧𑐵𑐧𑐸𑐥𑐶𑑄 𑐫𑐮𑐫𑑂 𑐖𑐸𑐂𑐐𑐸 𑐩𑐸𑑃𑐖𑑂𑐫𑐵𑐫𑑂 𑐩𑑂𑐫𑐾𑑃 𑐴𑐵𑐮𑐷𑐥𑐶𑑄 𑐏𑑅 𑑋 𑐠𑑂𑐰 𑐁𑐣𑑂𑐡𑑀𑐮𑐣𑐫𑐵 𑐗𑑂𑐰𑐮𑐫𑑂 𑐣𑑂𑐴𑐹𑐣𑑂𑐴𑐹𑐐𑐸 𑐳𑑄𑐳𑑂𑐠𑐵𑐟 𑐣𑑄 𑐥𑐮𑐶𑐳𑑂𑐠𑐵 𑐖𑐸𑐮, 𑐐𑐠𑐾 𑐴𑑁𑐐𑐮𑐫𑑂 ‘𑐗𑐷 𑐗𑐷 𑐴𑑁𑐐𑑅’, 𑐟𑑂𑐫𑐵𑐐𑐮𑐫𑑂 ‘𑐠𑑅𑐠𑑅𑐥𑐸𑐔𑑅’ 𑐁𑐡𑐶 𑑋 ‘𑐗𑐷 𑐗𑐷 𑐴𑑁𑐐𑑅’ 𑐮𑐶𑐥𑐵 𑐟𑑅𑐡𑑃 𑐟𑐎 𑐣𑑄 𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑐵 𑐖𑑂𑐫𑐵𑐫𑑂 𑐳𑐎𑑂𑐬𑐶𑐫 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐠𑐠𑐾 𑐟𑑂𑐰𑐵𑑅𑐟𑑂𑐰𑐵𑐮𑐫𑑂 𑐳𑑂𑐰𑑄𑐐𑐸 𑐏𑐮𑑅 𑐥𑐸𑐔𑑅 𑐰𑐵 𑐟𑑂𑐰𑐵𑑅𑐫𑐵𑐥𑐶𑑄 𑐩𑐣𑐹𑐟𑐫𑑂 𑐥𑑂𑐬𑐟𑐶𑐣𑐶𑐢𑐶𑐟 𑐩𑐸𑐣𑐵𑑅 𑐠𑑂𑐰 𑐁𑐣𑑂𑐡𑑀𑐮𑐣𑐫𑐵𑐟 𑐣𑐶𑐬𑐣𑑂𑐟𑐬𑐟𑐵 𑐧𑐷𑐟 𑐕𑐟𑑂𑐬𑐧𑐴𑐵𑐡𑐸𑐬 𑐎𑐵𑐫𑐳𑑂𑐠𑐫𑐵 𑐣𑐾𑐟𑐺𑐟𑑂𑐰𑐫𑑂 𑐕𑐐𑐹 𑐥𑐸𑐸𑐔𑑅 𑐣𑑄 𑐐𑐛𑐣 𑐫𑐵𑑅𑐐𑐸 𑐏𑑅 𑑋

𑐐𑐣𑑄 𑐣𑑄 𑐟𑑂𑐰𑐵𑐮𑑄 𑐥𑐵𑑅𑐎𑐵𑑅 𑐩𑐡𑐸𑐳𑐵𑑄 𑐳𑐵𑐴𑐶𑐟𑑂𑐫 𑐩𑐹𑐮𑐸𑐏𑐵 𑐠𑑅𑐩𑑂𑐴𑑄 𑐴𑐾 𑐩𑐸𑑃𑐖𑑂𑐫𑐵 𑐫𑐵𑐫𑐾𑐐𑐸 𑐑𑑀𑐲𑐞𑐵 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐟𑐬 𑐫𑐾𑑃𑐫𑑂 𑐁𑐣𑑂𑐡𑑀𑐮𑐣 𑐡𑐶𑐳𑐾𑑄𑐮𑐶 𑐫𑐮𑐫𑑂 𑐣𑑄 𑐡𑐶𑐣𑐵𑐰𑐣 𑑋𑐏𑑂𑐰𑐥𑐫𑐵 𑐬𑐟𑑂𑐣𑐐𑑀𑐥𑐵𑐮 𑐳𑐿𑑄𑐖𑐸, 𑐫𑑀𑐐𑐾𑐣𑑂𑐡𑑂𑐬 𑐥𑑂𑐬𑐢𑐵𑐣, 𑐥𑐹𑐬𑑂𑐞 𑐧𑐿𑐡𑑂𑐫𑐥𑐶𑑄𑐳𑑄 𑐏𑑂𑐰𑐥 𑐥𑐵𑐏𑐾𑑄𑑄 𑐧𑑂𑐰𑐟𑐶 𑐎𑐫𑐵𑐡𑐷𑐐𑐸 𑐏𑑅 𑑋 𑐢𑑁𑐏𑑂𑐫𑑅 𑐥𑐵𑐏𑐾𑑄 𑐥𑑄𑐎𑐖 𑐔𑐶𑐟𑑂𑐬𑐎𑐵𑐬, 𑐨𑑂𑐰𑑃𑐟 𑐥𑐵𑐏𑐾𑑄 𑐬𑐵𑐩𑐨𑐎𑑂𑐟 𑐨𑑀𑑄𑐩𑐶, 𑐖𑐰𑐵𑐴𑐬 𑐨𑑀𑑄𑐩𑐶, 𑐩𑑀𑐴𑐣 𑐡𑐸𑐰𑐵𑐮, 𑐎𑐺𑐲𑑂𑐞𑐥𑑂𑐬𑐳𑐵𑐡 𑐡𑐸𑐰𑐵𑐮, 𑐁𑐱𑐵𑐎𑐵𑐖𑐷 𑐳𑐾𑐰𑐎, 𑐖𑑂𑐘𑐵𑐣𑐎𑐵𑐖𑐷 𑐩𑐵𑐣𑐣𑑂𑐢𑐬, 𑐨𑐎𑑂𑐟𑐧𑐴𑐵𑐡𑐸𑐬 𑐣𑑂𑐴𑑂𑐫𑐹𑐏𑑂𑐰𑐵𑑅, 𑐰𑐬𑑂𑐞 𑐧𑐖𑑂𑐬 𑐧𑐖𑑂𑐬𑐵𑐔𑐵𑐬𑑂𑐫, 𑐎𑐾𑐡𑐵𑐬 𑐀𑐰𑐵𑑅 𑐰 𑐥𑐣𑑂𑐟𑐶 𑐥𑐵𑐏𑐾𑑄 𑐮𑐎𑑂𑐲𑑂𑐩𑐞 𑐳𑑄𑐿𑐖𑐸𑐥𑐶𑑄𑐳𑑄 𑐧𑑂𑐰𑐟𑐶 𑐎𑐫𑐵𑐡𑐷𑐐𑐸 𑐏𑑅𑐳𑐵 𑐨𑑂𑐰𑑃𑐟𑐫𑑂 𑐳𑑂𑐰𑐎𑑂𑐰𑑅 𑐥𑑂𑐫𑐎𑑂𑐰𑑅𑐟𑐶 𑐩𑐸𑑃𑐖𑑂𑐫𑐵 𑐖𑐹𑐐𑐸 𑐡𑐸 𑑋 𑐠𑑂𑐰 𑐁𑐣𑑂𑐡𑑀𑐮𑐣𑐫𑑂 𑐩𑐶𑐳𑐵𑐥𑐶𑑄 𑐖𑑂𑐫𑐵𑐎𑑅𑐩𑐶𑐥𑐶𑑄 𑐣𑑄 𑐫𑐎𑑂𑐰 𑐧𑑂𑐰𑐮𑑄𑐎𑐹𑐐𑐸 𑐡𑐸 𑑋 𑐮𑐸𑐩𑐣𑑂𑐟𑐷 𑐐𑑀𑐲𑑂𑐛𑐶𑐂 𑐨𑐵𑐖𑐸 𑐐𑐞𑐾𑐱 𑐳𑐵𑐫𑑂𑐩𑐶𑑄 𑐧𑐶𑐫𑐵𑐡𑐷𑐐𑐸 𑐖𑐵𑐣𑐎𑐵𑐬𑐷 𑐎𑐠𑑄 𑐀𑐧𑐮𑐫𑑂𑐫𑐵 𑐩𑐶𑐳𑐵 𑐖𑑂𑐫𑐵𑐎𑑅𑐩𑐶𑐥𑐶𑑄 𑐡𑐵𑐣𑐴𑐾𑐬𑐵, 𑐔𑐶𑐣𑐶𑐴𑐾𑐬𑐵, 𑐂𑐣𑑂𑐡𑑂𑐬𑐎𑐩𑐮 𑐁𑐡𑐶 𑐏𑑅 𑑋

𑐠𑐷𑐠𑐷 𑐩𑐸𑑃𑐖𑑂𑐫𑐵𑐫𑐵 𑐮𑐵𑐐𑐶 𑐣𑑂𑐴𑐹𑐣𑑂𑐴𑐹𑐐𑐸 𑐴𑐾 𑐮𑐳𑐎𑐸𑐳 𑐩𑑂𑐫𑐾𑑃 𑐡𑐫𑐾𑐎𑐷𑐐𑐸 𑑋 𑐔𑐶𑐎𑐷𑐔𑐵𑐎𑐹𑐐𑐸 𑐎𑑂𑐰𑐠𑐵𑐫𑑂 𑐖𑑂𑐫𑐵𑐎𑑅𑐩𑐶𑐟𑐫𑑂 𑐡𑐠𑐸𑐂 𑐎𑐵𑐮𑐵𑐎𑐸𑐮𑐸 𑐴𑐵𑑅𑐳𑐮𑐫𑑂 𑐳𑑄𑐐𑐷𑐟𑐎𑐵𑐬𑑄 𑐠𑐵𑐂𑐐𑐸 𑐴𑐵𑐬𑑂𑐰𑐶𑐣𑐫𑐵 𑐢𑐸𑐣𑐫𑑂 𑐎𑐰𑐶 𑐡𑐸𑐬𑑂𑐐𑐵𑐮𑐵𑐮𑑄 𑐩𑑂𑐫𑐾𑑃 𑐔𑑂𑐰𑐂𑐐𑐸 𑑋 𑐰𑐶𑐬𑑀𑐢 𑐰 𑐧𑐶𑐡𑑂𑐬𑑀𑐴𑐫𑐵 𑐳𑐮𑑄 𑐖𑐵𑑅𑐐𑐸 𑐠𑐸𑐐𑐸 𑐩𑑂𑐫𑐾𑑃𑐫𑑂 𑐮𑐫𑑂 𑐟𑑅𑐥𑐶𑑄 𑐳𑐸𑐬𑐾𑐣𑑂𑐡𑑂𑐬𑐥𑑂𑐬𑐳𑐵𑐡 𑐱𑑂𑐬𑐾𑐲𑑂𑐛, 𑐎𑐾𑐱𑐬, 𑐡𑑂𑐰𑐵𑐬𑐶𑐎𑐵 𑐳𑐵𑐫𑑂𑐩𑐶, 𑐐𑐖𑐾𑐣𑑂𑐡𑑂𑐬 𑐩𑐴𑐵𑐖𑐸, 𑐳𑐸𑐬𑐾𑐱 𑐥𑑂𑐬𑐢𑐵𑐣, 𑐎𑐺𑐲𑑂𑐞𑐩𑐵𑐣 𑐱𑑂𑐬𑐾𑐲𑑂𑐛, 𑐬𑐵𑐩𑐥𑑂𑐬𑐳𑐵𑐡 𑐩𑐵𑐣𑐣𑑂𑐢𑐬 𑐰 𑐮𑐶𑐥𑐵 𑐡𑑂𑐰𑐵𑐬𑐶𑐎𑐵𑐮𑐵𑐮 𑐖𑑀𑐱𑐷𑐥𑐶𑑄 𑐏𑑅 𑑋 𑐠𑐸𑐥𑐶𑑄 𑐁𑐥𑐵𑑅 𑐠𑐾𑑄 𑐩𑑂𑐫𑐾𑑃 𑐎𑐰𑐶 𑐡𑐸𑐬𑑂𑐐𑐵𑐮𑐵𑐮𑐫𑐵 ‘𑐳𑐬𑑂𑐐𑑅 𑐳𑐶𑐧𑐾𑑄 𑐣𑑄 𑐢𑐬𑑂𑐟𑐶 𑐣𑐩𑐶𑑄𑐐𑑂𑐰𑐵𑑅’ 𑐳𑐦𑐸𑐮𑐶𑐂 𑐥𑐶𑐡𑑄𑐐𑐸 𑐡𑐸𑐳𑐵 𑐮𑐳𑐫𑑂 𑐴𑐣𑐵𑑅 𑐎𑑂𑐫𑐵𑐳𑐾𑐚𑐫𑑂 𑐣𑑄 𑐥𑐶𑐡𑑄𑐐𑐸 𑐡𑐸 𑑋𑐟𑑂𑐰𑐵𑑅𑐟𑑂𑐰𑐵𑐮𑐫𑑂 𑐖𑐹𑐐𑐸 𑐠𑑂𑐰 𑐩𑐸𑑃𑐖𑑂𑐫𑐵𑐫𑑂 𑐔𑐾𑐰𑐵𑑅 𑐎𑐵𑐫𑐾𑐟 𑐔𑐾𑐰𑐵𑑅𑐩𑐶𑐥𑐶𑑄 𑐣𑑄 𑐳𑐬𑐎𑐵𑐬𑑄 𑐕𑑂𑐰𑐫𑐵 𑐴𑐫𑐵𑐟𑐂𑐐𑐸 𑐖𑐸𑐮 𑑋

𑐄𑐩𑐶𑐐𑐸 𑐬𑐶𑐬𑑂𑐥𑑀𑐚𑐫𑐵 𑐮𑐶𑐢𑑄𑐳𑐵𑐫𑑂 𑐣𑑂𑐰𑐔𑐸𑐩𑐶 𑐰 𑐔𑑂𑐰𑐩𑐶𑐥𑐶𑑄𑐟 𑐰𑐵𑐬𑐾𑐣𑑂𑐚 𑐖𑐵𑐬𑐶 𑐖𑐸𑐫𑐵𑑅 𑐟𑑅𑐎𑑂𑐰𑑅 𑐴𑐾 𑐖𑑂𑐰𑐣𑐾𑐐𑐸 𑐎𑐸𑐟𑑅 𑐖𑐹𑐐𑐸𑐮𑐶𑑄 𑐃𑐱𑑂𑐰𑐬𑐵𑐣𑐣𑑂𑐡, 𑐡𑐸𑐬𑑂𑐐𑐵𑐮𑐵𑐮, 𑐱𑐵𑐣𑑂𑐟𑐡𑐵𑐳 𑐰 𑐩𑑄𑐐𑐮𑐩𑐵𑐣 𑐱𑐵𑐎𑑂𑐫𑐥𑐶𑑄 𑐟𑑅𑐎𑑂𑐰𑑅 𑐡𑐸𑐳𑐸𑐮𑐾 𑐩𑐵𑐮 𑑋 𑐀𑐥𑑂𑐰𑑅 𑐡𑐸𑐳𑐸𑐮𑐾𑐟 𑐥𑐸𑐲𑑂𑐥𑐬𑐟𑑂𑐣 𑐟𑐸𑐮𑐵𑐢𑐬𑐫𑐵 𑐣𑑂𑐴𑑂𑐫𑑅𑐏𑐵 𑐐𑐮𑑂𑐮𑐷𑐂 𑐔𑑂𑐰𑑄𑐐𑐸 𑐕𑐾𑑃 𑐖𑑂𑐫𑐵 𑐎𑐵𑐮 𑑋 𑐠𑑂𑐰 𑐴𑐾 𑐗𑑂𑐰𑐮𑐫𑑂 𑐮𑐶𑐥𑐵 𑐣𑐣𑑂𑐡𑐮𑐵𑐮 𑐥𑐵𑐞𑑂𑐜𑐾 𑐢𑐂𑐩𑑂𑐴 𑐕𑐩𑑂𑐴 𑐔𑐾𑐰𑐵𑑅𑐩𑐶 𑐩𑐸𑑃𑐖𑑂𑐫𑐵𑐫𑑂 𑐡𑐸𑐴𑐵𑑄 𑐰𑐮 𑑋 𑐰𑑄 𑐟𑐟𑑅𑐳𑐎𑑄 𑐰 𑐟𑐥𑑂𑐫𑑄𑐎 𑐳𑐬𑐎𑐵𑐬𑐫𑐵𑐟 𑐎𑐸𑑄𑐏𑐶𑐣𑐵𑑅 𑐣𑐰𑐵𑐣𑐵𑑅 𑐖𑑂𑐫𑐵𑐎𑑅𑐩𑐶𑐟𑐫𑑂𑐐𑐸 𑐥𑐟𑑂𑐫𑐵𑑅 𑐎𑐵𑐫𑐾𑐐𑐸 𑐎𑐸𑐟𑑅 𑐫𑐵𑐟 𑑋 𑐠𑑂𑐰 𑐁𑐣𑑂𑐡𑑀𑐮𑐣 𑐐𑐸𑐎𑐠𑑄 𑐢𑐶𑐳𑐶𑐮𑐵𑐎𑑂𑐎 𑐣𑑂𑐴𑑂𑐫𑐵𑐎𑐾𑐐𑐸 𑐢𑐫𑐵𑐐𑐸 𑐏𑑃𑐫𑑂 𑐟𑑅𑐎𑑂𑐰𑑅 𑐳𑐴𑐮𑐴 𑐖𑐹𑐳𑐵𑑄 𑐕𑐸𑑄 𑐎𑑂𑐰𑐵𑐟𑐸𑐐𑐸 𑐳𑑄𑐐𑐛𑐣 𑐡𑐫𑐾𑐎𑐾𑐐𑐸 𑐖𑑂𑐫𑐵 𑐩𑐖𑐹𑐐𑐸 𑐰 𑐣𑑂𑐴𑑂𑐫𑐵𑐧𑑂𑐮𑐾𑑄 𑐳𑐵𑐩𑐸𑐴𑐶𑐎 𑐣𑐾𑐟𑐺𑐟𑑂𑐰𑐫𑐵 𑐏𑑃 𑐖𑐎 𑐣𑑂𑐴𑑂𑐫𑑅𑐣𑐾 𑐰𑐂𑐐𑐸 𑐏𑑅 𑑋

𑐡𑐬𑐧𑐵𑐬𑐫𑐵 𑐔𑐾𑐰𑐵𑑅𑐩𑐶 𑐄𑐩𑑂𑐴 𑐣𑐣𑑂𑐡𑐮𑐵𑐮 𑐥𑐵𑐞𑑂𑐜𑐾𑑄 𑐣𑐾𑐰𑐵𑑅𑐟𑐫𑑂 𑐕𑐸𑑄 𑐳𑑄𑐐𑐛𑐣 𑐩𑐡𑐸 𑐡𑑂𑐫𑑅𑐣𑐾𑑄 𑐡𑑂𑐫𑑅𑐣𑐾𑑄 𑐖𑐎 𑐴𑐵𑐮𑐵𑐖𑐹𑐐𑐸 𑐢𑐂𑐐𑐸 𑐏𑑃 𑐳𑐶𑐂𑐎𑐮 𑑋 𑐩𑐏𑐸𑐳𑐵 𑐟𑑅𑐢𑑄𑐐𑐸 𑐡𑐩𑐣 𑐫𑐵𑐫𑐾𑐐𑐸 𑐳𑐬𑐎𑐵𑐬𑐫𑐵 𑐎𑐸𑐟𑑅 𑐖𑐹𑐐𑐸 𑐣𑑄 𑐏𑑅 𑑋 𑐨𑐵𑐲𑐵 𑐳𑐵𑐴𑐶𑐟𑑂𑐫 𑐧𑑂𑐰𑐮𑑄𑐎𑐾𑐟 𑐳𑐵𑐴𑐶𑐟𑑂𑐫 𑐩𑐸𑑃𑐖𑑂𑐫𑐵 𑐫𑐵𑑅𑐥𑐶𑑄𑐟 𑐟𑐎𑑄 𑐡𑐩𑐣 𑐫𑐵𑐟 𑐢𑐵𑐂𑐧𑐮𑐫𑑂 𑐖𑐣𑐟𑐵𑐫𑑂 𑐰 𑐴𑐮𑐶𑐩𑐫𑑂 𑐣𑑄 𑐟𑐳𑐎𑑄 𑐧𑐵𑑄𑐩𑐮𑐵𑐂𑐐𑐸 𑐰𑐵𑑅𑐔𑐵𑐫𑐾𑐎𑐵𑑅 𑐟𑑅𑐢𑑄𑐐𑐸 𑐡𑐩𑐣 𑐩𑐫𑐵𑑅𑐳𑐵𑑄 𑐨𑐟𑐶𑐔𑐵 𑐕𑐵𑐎𑑂𑐎 𑐣𑐰𑐵𑑅𑐥𑐶𑑄𑐟 𑐖𑑂𑐰𑐣𑐾𑐐𑐸, 𑐎𑐸𑐣𑐾𑐐𑐸 𑐰 𑐏𑑂𑐫𑐵𑐫𑐾𑐐𑐸 𑐖𑑂𑐫𑐵 𑐖𑐸𑐮 𑑋 𑐎𑑂𑐰𑐴𑐶𑐟𑐶𑐫𑐵 𑐬𑐵𑐩𑐔𑐣𑑂𑐡𑑂𑐬 𑐰 𑐰𑐫𑐵 𑐥𑐵𑐳𑐵𑐫𑐵𑐟 𑐖𑑂𑐰𑐣𑐵𑑅 𑐨𑑂𑐰𑑄 𑐫𑐵𑐎𑐵𑑅 𑐟𑐶𑐣𑐶 𑐟𑑂𑐰𑑅𑐟𑐮 𑑋 𑐫𑐎𑑂𑐰𑐳𑐶𑐟 𑐰𑐵𑐬𑐾𑐣𑑂𑐚 𑐖𑐵𑐬𑐶 𑐫𑐵𑐣𑐵𑑅 𑐖𑑂𑐰𑐣𑐾𑐐𑐸 𑐎𑐸𑐟𑑅 𑐫𑐵𑐟 𑑋 𑐠𑐸𑐎𑐶𑑄 𑐫𑐵𑐣𑐵𑑅 𑐫𑐎𑑂𑐰 𑐩𑐣𑐹𑐟 𑐂𑐮𑐫𑑂 𑐧𑑂𑐫𑐮𑐫𑑂 𑐡𑐸𑐳𑐸𑐮𑐾 𑐩𑐵𑐮 𑑋 𑐀𑐮𑐾 𑐁𑐣𑑂𑐡𑑀𑐮𑐣 𑐏𑑂𑐰𑐵𑐄𑑃𑐫𑐵 𑐰𑑃𑐰𑑄 𑐩𑐵𑐐 𑐥𑐹𑐩𑐰𑑄𑐎𑑄 𑐀𑐬𑑂𑐠𑐵𑐟 𑐬𑐾𑐜𑐶𑐫𑑀 𑐣𑐾𑐥𑐵𑐮𑑄 𑐣𑐾𑐥𑐵𑐮𑐨𑐵𑐲𑐵𑑄 𑐧𑐸𑐏𑑄 𑐧𑐷𑐐𑐸 𑐖𑑂𑐫𑐵𑐗𑑂𑐰𑑅𑐫𑐵 𑐥𑐸𑐣𑐳𑑂𑐬𑑂𑐠𑐵𑐥𑐣𑐵 𑐩𑐖𑐸𑐂𑐎 𑐴𑐾 𑐡𑐶𑐎𑐾𑐩𑐵𑑅𑐐𑐸 𑐀𑐰𑐳𑑂𑐠𑐵𑐫𑑂 𑐠𑑂𑐫𑐣 𑑋

𑐁𑐣𑑂𑐡𑑀𑐮𑐣𑐫𑐵 𑐮𑐶𑐔𑑂𑐰𑑅
𑐩𑐵𑐐 𑐥𑐹𑐩𑐰𑑄𑐐𑐸 𑐮𑑂𑐫𑐵𑐏𑑄 𑐠𑑂𑐰 𑐕𑐐𑐹 𑐀𑐳𑐦𑐮 𑐁𑐣𑑂𑐡𑑀𑐮𑐣 𑐏𑑅 𑑋 𑐀𑐠𑐾 𑐖𑐹𑐳𑐵𑑄 𑐠𑑂𑐰 𑐁𑐣𑑂𑐡𑑀𑐮𑐣𑑄 𑐳𑐶𑐂𑐡𑐫𑐾𑐎 𑐣𑐶𑐟𑐵 𑐖𑑂𑐫𑐵 𑐫𑐵𑑅𑐐𑐸 𑐡𑐸 𑑋 𑐕𑐟𑐵 𑐨𑐵𑐲𑐵 𑐳𑐵𑐴𑐶𑐟𑑂𑐫 𑐧𑑂𑐰𑐮𑑄𑐎𑐾𑐐𑐸 𑐖𑑂𑐫𑐵𑐫𑑂 𑐟𑐶𑐧𑑅 𑐧𑐶𑐮 𑑋 𑐣𑑂𑐴𑐹𑐣𑑂𑐴𑐹𑐥𑐶𑑄 𑐰 𑐡𑐎𑑂𑐲𑐥𑐶𑑄 𑐔𑑂𑐰𑐩𑐶𑐥𑐶𑑄 𑐧𑑂𑐰𑐮𑑄𑐎𑐮 𑑋 𑐠𑐸𑐎𑐶𑑄 𑐎𑐰𑐶 𑐧𑐸𑐡𑑂𑐢 𑐳𑐵𑐫𑑂𑐩𑐶, 𑐎𑐰𑐶 𑐫𑑀𑐐𑐾𑐣𑑂𑐡𑑂𑐬 𑐥𑑂𑐬𑐢𑐵𑐣, 𑐩𑑄𑐐𑐮𑐩𑐵𑐣 𑐱𑐵𑐎𑑂𑐫, 𑐥𑐸𑐲𑑂𑐥𑐬𑐵𑐖 𑐬𑐵𑐖𑐎𑐬𑑂𑐞𑐶𑐎𑐵𑐬, 𑐨𑐐𑐟𑐡𑐵𑐳 𑐰 𑐩𑐾𑐩𑐾𑐥𑐶𑑄 𑐫𑐎𑑂𑐰 𑐔𑑂𑐰𑐩𑐶𑐥𑐶𑑄 𑐧𑑂𑐰𑐮𑑄𑐎𑐾𑐐𑐸 𑐖𑑂𑐫𑐵 𑐫𑐵𑐟 𑑋 𑐠𑑂𑐰 𑐩𑐸𑑃𑐖𑑂𑐫𑐵𑐫𑑂 𑐧𑑂𑐰𑐟𑐶 𑐎𑐵𑑅𑐥𑐶𑑄 𑐔𑑂𑐰𑐩𑐶𑐥𑐶𑑄𑐳𑑄 𑐀𑐥𑑂𑐰𑑅 𑐠𑐾𑑄 𑐳𑐵𑐩𑐵𑐖𑐶𑐎 𑐬𑐵𑐖𑐣𑐿𑐟𑐶𑐎 𑐬𑐸𑐥𑐵𑐣𑑂𑐟𑐬𑐞 𑐰 𑐀𑐢𑐶𑐎𑐵𑐬𑐫𑐵 𑐣𑐶𑑄𑐟𑐶𑑄 𑐔𑑂𑐰𑐮 𑑋 𑐄𑐎𑐶𑑄 𑐣𑐾𑐥𑐵𑐮𑐨𑐵𑐲𑐵𑐫𑑂 𑐥𑑂𑐬𑐐𑐟𑐶𑐱𑐷𑐮 𑐳𑐵𑐴𑐶𑐟𑑂𑐫𑐫𑐵𑐟 𑐧𑑂𑐰𑐮𑑄𑐎𑐮 𑑋 𑐠𑑂𑐰 𑐁𑐣𑑂𑐡𑑀𑐮𑐣𑑄 𑐥𑐶𑐟𑐧𑐶𑐄𑐥𑐶𑑄 𑐔𑑂𑐰𑐩𑐶𑐥𑐶𑑄 𑐩𑐢𑑂𑐫𑐾 𑐐𑐸𑐮𑐶𑐳𑐶𑐣𑑄 𑐔𑑂𑐰𑐫𑐾𑐐𑐸 𑐟𑑂𑐰𑑅𑐟𑐹𑐳𑐵𑑄 𑐐𑐸𑐮𑐶𑐳𑐶𑐣𑑄 𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑐵 𑐳𑐾𑐰𑐵𑐫𑑂 𑐠𑑅𑐟 𑐣𑐶𑐬𑐣𑑂𑐟𑐬 𑐥𑐵𑐣𑐵𑐰𑐣 𑐰𑐵 𑐥𑐵𑐣𑐵𑐔𑑂𑐰𑑄𑐐𑐸 𑐴𑐾 𑐡𑐸 𑑋

𑐀𑐮𑐾 𑐩𑐾𑐐𑐸 𑐠𑐸𑐎𑐶𑑄 𑐮𑐶𑐥𑐵 𑐫𑐎𑑂𑐰 𑐟𑐟𑑅𑐢𑑄𑐐𑐸 𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑐵 𑐖𑑂𑐫𑐵𑐏𑑃 𑐫𑐵𑐫𑐾𑐟 𑐴𑑅𑐥𑐵𑑅 𑐧𑐶𑐮 𑑋 𑐐𑐠𑐾 𑐀𑐣𑑂𑐟𑐬 𑐴𑐵𑐂𑐳𑑂𑐎𑐸𑐮 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐳𑐩𑑂𑐩𑐾𑐮𑐣, 𑐀𑐣𑑂𑐟𑐬 𑐎𑐮𑐾𑐖 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐳𑐩𑑂𑐩𑐾𑐮𑐣, 𑐣𑑂𑐴𑑂𑐫𑐳𑑅 𑐮𑐶𑐳𑑅 𑐎𑐵𑐳𑐵𑐫𑐵 𑐐𑑂𑐰𑐳𑐵𑑅 𑐐𑑂𑐰𑐫𑐾𑐐𑐸𑐫𑐵 𑐣𑐵𑐥𑑄 𑐁𑐥𑐵𑐮𑑄 𑐳𑐥𑐹m 𑐥𑐟𑑂𑐬𑐥𑐟𑑂𑐬𑐶𑐎𑐵 𑐥𑐶𑐡𑐣 𑑋 𑐀𑐠𑐾 𑐴𑐾 𑐩𑐾𑐩𑐾𑐐𑐸 𑐣𑑄 𑐁𑐥𑐵𑐮𑑄 𑐖𑑂𑐫𑐵𑐏𑑃 𑐖𑐸𑐮 𑑋 𑐀𑐮𑐾 𑐠𑐠𑐾 𑐖𑑂𑐫𑐵𑐫𑑂 𑐣𑑂𑐴𑑂𑐫𑐔𑐶𑐮𑐷𑐥𑐶𑑄 𑐖𑑂𑐫𑐵𑐎𑑅𑐩𑐶𑐥𑐶𑑄 𑐧𑑂𑐰𑐮𑑄𑐎𑐮 𑑋𑐩𑐾𑐐𑐸 𑐖𑑂𑐫𑐵 𑐢𑐂𑐐𑐸 𑐖𑐣𑐟𑐵𑐫𑑂 𑐬𑐵𑐖𑐣𑐷𑐟𑐶𑐎 𑐔𑐾𑐟𑐣𑐵 𑐧𑑂𑐰𑐮𑑄𑐎𑐾𑐐𑐸 𑐰 𑐥𑑄𑐔𑐵𑐫𑐟𑐷 𑐰𑑂𑐫𑐰𑐳𑑂𑐠𑐵𑐫𑐵 𑐧𑐵𑑄𑐩𑐮𑐵𑑅𑐐𑐸 𑐥𑐎𑑂𑐲𑐫𑐵𑐟 𑐄𑐮𑐾𑐐𑐸 𑐖𑑂𑐫𑐵 𑐫𑐵𑐟, 𑐐𑐸𑐎𑐶𑑄 𑐮𑐶𑐥𑐵𑐫𑐵 𑐬𑐵𑐖𑐣𑐷𑐟𑐶𑐎 𑐁𑐣𑑂𑐡𑑀𑐮𑐣𑐫𑑂 𑐟𑑅𑐢𑑄𑐐𑐸 𑐟𑐶𑐧𑑅 𑐖𑐹𑐰𑐣 𑑋

𑐟𑐬 𑐠𑑂𑐰 𑐁𑐣𑑂𑐡𑑀𑐮𑐣𑑄 𑐳𑐫𑐾𑐎𑐾 𑐩𑐵𑑅𑐐𑐸 𑐕𑐟𑐵 𑐥𑐵𑐛 𑐕𑐸 𑐢𑐵𑑅𑐳𑐵 𑐢𑐶𑐳𑐶𑐮𑐵𑑅𑐐𑐸 𑐳𑑄𑐐𑐛𑐣 𑐧𑐶𑐣𑐵 𑐁𑐣𑑂𑐡𑑀𑐮𑐣 𑐟𑐵𑑅𑐮𑐵𑐂 𑐩𑐏𑐸 𑑋 𑐟𑐟𑑅𑐢𑑄𑐐𑐸 𑐣𑐵𑐬𑐵 𑐖𑐎 𑐧𑐶𑐫𑐵𑑄 𑐩𑐐𑐵𑑅 𑑋 𑐄𑐎𑐶𑐫𑐵𑐟 𑐎𑐸𑐧𑐶𑐫𑐵𑑅 𑐣𑑂𑐴𑑂𑐫𑑅𑐣𑐾 𑐫𑑄𑐎𑐾𑐐𑐸 𑐱𑐎𑑂𑐟𑐶 𑐣𑑄 𑐩𑐵𑑅 𑑋 𑐩𑐏𑐸𑐳𑐵 𑐣𑑂𑐴𑑂𑐫𑐵𑐠𑐾𑑄 𑐴𑐾 𑐖𑐵𑐫𑐖𑐐𑐸 𑐩𑐵𑐐𑐫𑐵𑐟 𑐣𑑄 𑐡𑐩𑐣 𑐫𑐵𑐫𑐾𑐦𑐸 𑑋 𑐠𑑂𑐰 𑐁𑐣𑑂𑐡𑑀𑐮𑐣𑐫𑐵 𑐳𑐣𑑂𑐡𑐬𑑂𑐨𑐫𑑂 𑐣𑑄 𑐠𑐠𑐾 𑐴𑐾 𑐖𑐸𑐮 𑐮𑐵 𑐢𑐂𑐐𑐸 𑐀𑐣𑐸𑐩𑐵𑐣 𑐫𑐵𑐫𑐾𑐠𑐵𑐫𑑂 𑐡𑐸 𑑋 𑐨𑐵𑐖𑐸 𑐩𑐮𑑂𑐮 𑐎𑐾 𑐳𑐸𑐣𑑂𑐡𑐬𑑄 𑐧𑐶𑐄𑐐𑐸 𑐖𑐵𑐣𑐎𑐵𑐬𑐷 𑐎𑐠𑑄 𑐦𑐮𑑂𑐔𑐵 𑐳𑐵𑐮𑐫𑑂 𑐖𑐹𑐐𑐸 𑐩𑑃𑐖𑑂𑐫𑐵𑐫𑑂 “𑐣𑐾𑐰𑐵𑑅 𑐳𑐵𑑄𑐳𑑂𑐎𑐺𑐟𑐶𑐎 𑐀𑐨𑐶𑐫𑐵𑐣” 𑐢𑐂𑐐𑐸 𑐧𑐵𑐫𑑂𑐣𑐬 𑐏𑐣𑐾𑐡𑐟 𑑋 𑐠𑑂𑐰 𑐁𑐣𑑂𑐡𑑀𑐮𑐣𑐫𑐵 𑐃 𑐢𑐂𑐐𑐸 𑐔𑐷𑐣𑐫𑑂 𑐳𑐵𑑄𑐳𑑂𑐎𑐺𑐟𑐶𑐎 𑐎𑑂𑐬𑐵𑐣𑑂𑐟𑐶𑐫𑐵 𑐥𑐹𑐬𑑂𑐰 𑐳𑐣𑑂𑐢𑑂𑐫𑐵 𑐰 𑐣𑐾𑐥𑐵𑐮𑐫𑑂 𑐣𑐶𑐬𑑄𑐎𑐸𑐱 𑐥𑑄𑐔𑐵𑐫𑐟𑐷 𑐟𑐵𑐣𑐵𑐱𑐵𑐴𑐷𑐫𑐵 𑐃 𑐏𑑅 𑑋

𑐠𑐖𑑂𑐫𑐵𑑅𑐐𑐸 𑐂𑐮𑐫𑑂 𑐠𑐣 𑐣𑑄 𑐳𑐵𑑄𑐳𑑂𑐎𑐺𑐟𑐶𑐎 𑐀𑐨𑐶𑐫𑐵𑐣𑐫𑐵 𑐧𑐵𑐫𑐣𑐬 𑐏𑐣𑐵𑑅 𑐩𑐣𑐹𑐟 𑐐𑑂𑐫𑐵𑐣𑐵𑑅 𑐁𑐣𑑂𑐡𑑀𑐮𑐣𑐥𑐵𑐏𑐾𑑄 𑐮𑐶𑐔𑐶𑐄𑐐𑐸 𑐏𑑅 𑐮𑐵 𑐢𑐂𑐐𑐸 𑐱𑑄𑐎𑐵 𑐫𑐵𑐫𑐾𑐠𑐵𑐫𑑂 𑐡𑐸 𑑋 𑐏𑐮𑐵 𑐁𑐣𑑂𑐡𑑀𑐮𑐣 𑐢𑐂𑐐𑐸 𑐐𑑂𑐫𑐵𑐣𑐵𑑅 𑐥𑐹𑐰𑐣𑐷 𑐩𑐏𑐸, 𑐀𑐫𑑂𑐣𑑄 𑐳𑐬𑑂𑐰𑐳𑐵𑐢𑐵𑐬𑐞 𑐳𑐎𑐳𑐶𑐎𑐾𑑄 𑐄𑐮𑐶 𑐴𑐾 𑐳𑐵𑐴𑐳 𑐡𑐂 𑐢𑐂𑐐𑐸 𑐁𑐱𑐵 𑐫𑐵𑐫𑐾 𑐣𑑄 𑐩𑐖𑐶𑐄 𑑋 𑐢𑐵𑐠𑐾𑑄 𑐳𑐵𑑄𑐳𑑂𑐎𑐺𑐟𑐶𑐎 𑐀𑐨𑐶𑐫𑐵𑐣𑐫𑐵 𑐏𑑃 𑐰𑑅𑐐𑐸 𑐏𑑅𑐳𑐵 𑐐𑐿𑐬𑐎𑐩𑑂𑐫𑐹𑐣𑐶𑐲𑑂𑐚 𑐧𑐶𑐔𑐵𑑅𑐫𑐵𑐥𑐶𑑄 𑐩𑐣𑐹𑐟 𑐮𑐶𑐔𑐶𑐮𑐾𑐐𑐸 𑐳𑑂𑐰𑐵𑐨𑐵𑐰𑐶𑐎 𑐴𑐾 𑐖𑐸𑐮 𑑋 𑐩𑐏𑐸𑐳𑐵 𑐟𑐾𑐧𑐴𑐵𑑅 𑐖𑐵𑐫𑐾𑐎 𑐩𑐸𑑄𑐥𑐶𑑄 𑐩𑐣𑐹𑐟 𑐐𑐣 𑐰𑐣 ? 𑑋 𑐨𑐵𑐖𑐸 𑐰𑐳𑐣𑑂𑐟 𑐩𑐵𑐣𑐣𑑂𑐢𑐬𑐫𑐵 𑐢𑐵𑐥𑐹 𑐎𑐠𑑄 𑐮𑐶𑐥𑐵 𑐐𑐵𑐩𑐫𑑂 𑐐𑐵𑐩𑐫𑑂 𑐖𑐹𑐐𑐸 𑐩𑐸𑑃𑐖𑑂𑐫𑐵𑐫𑑂 𑐣𑑄 𑐩𑐣𑐹 𑐴𑐾 𑐩𑐩𑐸𑑄 𑐴𑑃 𑑋 𑐄𑐎𑐶𑑄 𑐁𑑅 𑐣𑑄 𑐗𑐷𑐳𑑄 𑐗𑐷𑐐𑐸 𑐁𑐣𑑂𑐡𑑀𑐮𑐣 𑐟𑐵𑑅𑐮𑐵𑐎𑐾𑐐𑐸 𑐖𑐹𑐳𑐵 𑐢𑐶𑐳𑐶𑐮𑐵𑐎𑑂𑐎 𑐳𑑄𑐐𑐛𑐶𑐟 𑐖𑐸𑐂 𑐴𑐾 𑐩𑐵𑑅 𑑋 𑐁𑐣𑑂𑐡𑑀𑐮𑐣𑐫𑐵𑐟 𑐄𑐐𑑂𑐬𑐰𑐵𑐡 𑐥𑐵𑐏𑐾𑑄 𑐣𑑄 𑐧𑐔𑐾 𑐫𑐵𑐣𑐵𑑅 𑐫𑑄𑐎𑐾𑐩𑐵𑑅 𑑋

–𑐜𑐵‍ 𑐥𑐸𑐲𑑂𑐥 𑐬𑐵𑐖 𑐬𑐵𑐖𑐎𑐬𑑂𑐣𑐶𑐎𑐵𑐬