𑐣𑐶𑐖𑐷 𑐳𑑂𑐎𑐸𑐮𑐥𑐵𑐏𑐾𑑄 𑐁𑐣𑑂𑐡𑑀𑐮𑐣 𑐑𑑀𑐲𑐞𑐵

𑐰𑐶𑐡𑑂𑐫𑐵𑐮𑐫 𑐱𑐶𑐎𑑂𑐲𑐵 𑐳𑐩𑑂𑐧𑐣𑑂𑐢𑐷 𑐰𑐶𑐢𑐾𑐫𑐎–𑑒𑑐𑑘𑑐 𑐳𑑄𑐳𑐡𑐫𑐵 𑐱𑐶𑐎𑑂𑐲𑐵, 𑐳𑑂𑐰𑐵𑐳𑑂𑐠𑑂𑐫 𑐟𑐠𑐵 𑐥𑑂𑐬𑐰𑐶𑐢𑐶 𑐳𑐩𑐶𑐟𑐶𑐂 𑐀𑐣𑑂𑐟𑐶𑐩 𑐳𑐴𑐮𑐴 𑐫𑐵𑐫𑐾𑐟𑑂𑐫𑑄𑐐𑐸 𑐂𑐮𑐫𑑂 𑐣𑐶𑐖𑐷 𑐰𑐶𑐡𑑂𑐫𑐵𑐮𑐫𑐟𑐫𑑂 𑐣𑐶𑐐𑐹 𑐳𑑄𑐐𑐛𑐣 𑐥𑑂𑐫𑐵𑐧𑑂𑐳𑐣 𑐰 𑐊𑐣–𑐥𑑂𑐫𑐵𑐧𑑂𑐳𑐣𑑄 𑐩𑑄𑐎𑐵𑑅 𑐁𑐣𑑂𑐡𑑀𑐮𑐣 𑐫𑐵𑐂𑐐𑐸 𑐖𑐹𑐐𑐸 𑐡𑐸 𑑋 𑐩𑑂𑐴𑐶𑐐𑑅 𑐣𑐶𑐐𑐸𑐮𑐶𑑄 𑐳𑑄𑐐𑐛𑐣𑑄 𑐩𑑄𑐎𑐵𑑅 𑐥𑐟𑑂𑐬𑐎𑐵𑐬 𑐳𑐩𑑂𑐩𑐾𑐮𑐣 𑐩𑐵𑐬𑑂𑐦𑐟 𑐣𑑂𑐫𑐵𑐐𑐹 𑐧𑐸𑑃𑐡𑐵𑐫𑐵 𑐩𑐵𑐐 𑐣𑑂𑐴𑑂𑐫𑐧𑑂𑐰𑐫𑐵𑑅 𑐁𑐣𑑂𑐡𑑀𑐮𑐣 𑐑𑑀𑐲𑐞𑐵 𑐫𑐵𑑅𑐐𑐸 𑐏𑑅 𑑋
𑐣𑐶𑐖𑐷 𑐰𑐶𑐡𑑂𑐫𑐵𑐮𑐫 𑐳𑑄𑐐𑐛𑐣𑐟𑐫𑑂‌𑐳𑑄 𑐠𑑅𑐥𑐶𑐣𑐶 𑐀𑐳𑑂𑐟𑐶𑐟𑑂𑐰 𑐰 𑐫𑑀𑐐𑐡𑐵𑐣𑐫𑐵𑐟 𑐰𑐾𑐰𑐵𑐳𑑂𑐟𑐵 𑐫𑐵𑐫𑐾𑐎𑐠𑑄 𑐰𑐶𑐢𑐾𑐫𑐎𑐫𑑂 𑐀𑐰𑑂𑐫𑐰𑐴𑐵𑐬𑐶𑐎 𑐰 𑐀𑐣𑑂𑐫𑐵𑐫𑐥𑐹𑐬𑑂𑐞 𑐥𑑂𑐬𑐵𑐰𑐢𑐵𑐣 𑐟𑑅𑐐𑐸 𑐡𑑂𑐰𑐥𑑄 𑐧𑐶𑐳𑐾𑑄 𑐄𑐎𑐶𑐫𑐵𑐟 𑐏𑐵𑐬𑐾𑐖 𑐫𑐵𑐫𑐾𑐩𑐵𑑅𑐐𑐸 𑐩𑐵𑐐 𑐫𑐵𑑅𑐐𑐸 𑐡𑐸 𑑋
𑐄𑐩𑐶𑐳𑑄 𑐣𑑂𑐴𑑂𑐫𑐠𑑄𑐐𑐸 𑐣𑑂𑐫𑐵𑐐𑐹 𑐧𑐸𑑃𑐡𑐾 𑐩𑐵𑐐𑐫𑐵 𑐣𑑂𑐴𑐵𑐥𑐵𑑄𑐐𑐸 𑐧𑐸𑑃𑐡𑐵𑐫𑑂 ‘𑐥𑐹𑐬𑑂𑐞 𑐕𑐵𑐟𑑂𑐬𑐰𑐺𑐟𑑂𑐟𑐶’ 𑐢𑐂𑐐𑐸 𑐏𑑃𑐐𑑂𑐰𑑅 𑐔𑐷𑐎𑐾𑐩𑐵𑑅𑐐𑐸, 𑐰𑐶𑐡𑑂𑐫𑐵𑐮𑐫𑐫𑑂 𑐄𑐟𑑂𑐥𑐵𑐡𑐣 𑐩𑐖𑐸𑐂𑐐𑐸 𑐥𑑀𑐳𑐵𑐎, 𑐳𑑂𑐚𑐾𑐱𑐣𑐬𑐷, 𑐱𑐿𑐎𑑂𑐲𑐶𑐎 𑐳𑐵𑐩𑐐𑑂𑐬𑐷, 𑐏𑐵𑐖𑐵 𑐄𑐥𑐮𑐧𑑂𑐢 𑐫𑐵𑐎𑐾𑐩𑐵𑑅𑐐𑐸 𑐥𑑂𑐬𑐵𑐰𑐢𑐵𑐣 𑐏𑐵𑐬𑐾𑐖 𑐫𑐵𑐫𑐾𑐩𑐵𑑅𑐐𑐸, 𑐎𑐩𑑂𑐥𑐣𑐷 𑐋𑐣 𑐎𑐠𑑄 𑐡𑐬𑑂𑐟𑐵 𑐖𑐸𑐫𑐵𑑅 𑐔𑐮𑐾 𑐖𑐸𑐫𑐵𑐔𑑂𑐰𑑄𑐐𑐸 𑐰𑐶𑐡𑑂𑐫𑐵𑐮𑐫𑐫𑐵𑐟 ‘𑐐𑐿𑐬 𑐣𑐵𑐦𑐵𑐩𑐹𑐮𑐎’ 𑐡𑐫𑐾𑐎𑐾𑐐𑐸 𑐥𑑂𑐬𑐵𑐰𑐢𑐵𑐣 𑐔𑐷𑐎𑐾𑐩𑐵𑑅𑐐𑐸 𑐩𑐵𑐐 𑐫𑐵𑑅𑐐𑐸 𑐡𑐸 𑑋

𑐄𑐎𑐠𑑄 𑐴𑐾 𑐕𑐵𑐟𑑂𑐬𑐰𑐺𑐟𑑂𑐟𑐶 𑐂𑐣𑐾𑐐𑐸 𑐀𑐢𑐶𑐎𑐵𑐬 𑐳𑐩𑑂𑐧𑐣𑑂𑐢𑐶𑐟 𑐰𑐶𑐡𑑂𑐫𑐵𑐮𑐫𑐫𑐵𑐟 𑐴𑐾 𑐖𑐸𑐂𑐩𑐵𑑅𑐐𑐸, 𑐟𑐬 𑐥𑐵𑐮𑐶𑐎𑐵𑐫𑐵 𑐥𑑂𑐬𑐟𑐶𑐣𑐶𑐢𑐶𑐥𑐶𑑄 𑐳𑐩𑐾𑐟 𑐔𑑂𑐰𑐣𑐵𑑅 𑐥𑐵𑐬𑐡𑐬𑑂𑐱𑐷 𑐳𑐩𑐶𑐟𑐶 𑐡𑐫𑐾𑐎𑐵𑑅 𑐂𑐣𑐾𑐐𑐸 𑐖𑑂𑐫𑐵 𑐫𑐵𑐫𑐾 𑐦𑐂𑐐𑐸 𑐰 𑑔𑑕 𑐥𑑂𑐬𑐟𑐶𑐱𑐟 𑐁𑐬𑐎𑑂𑐲𑐞𑐫𑐵 𑐥𑑂𑐬𑐵𑐰𑐢𑐵𑐣 𑐏𑐵𑐬𑐾𑐖 𑐫𑐵𑐫𑐾𑐩𑐵𑑅𑐐𑐸 𑐩𑐵𑐐 𑐣𑑄 𑐄𑐩𑐶𑐳𑑄 𑐫𑐵𑑅𑐐𑐸 𑐡𑐸 𑑋
𑐊𑐣–𑐥𑑂𑐫𑐵𑐧𑑂𑐳𑐣 𑐀𑐢𑑂𑐫𑐎𑑂𑐲 𑐳𑐸𑐨𑐵𑐲 𑐣𑑂𑐫𑑁𑐥𑐵𑐣𑐾 𑐰 𑐥𑑂𑐫𑐵𑐧𑑂𑐳𑐣𑐫𑐵 𑐀𑐢𑑂𑐫𑐎𑑂𑐲 𑐎𑐺𑐲𑑂𑐞𑐥𑑂𑐬𑐳𑐵𑐡 𑐀𑐢𑐶𑐎𑐵𑐬𑐷𑑄 𑐴𑐳𑑂𑐟𑐵𑐎𑑂𑐲𑐬 𑐫𑐵𑐣𑐵𑑅 𑐥𑐶𑐟𑐧𑐶𑐄𑐐𑐸 𑐰𑐶𑐖𑑂𑐘𑐥𑑂𑐟𑐶𑐂 𑐠𑑁𑑄 𑐳𑐸𑐠𑐫𑑂 𑑑𑑑 𑐧𑐖𑐾 𑐣𑐶𑐳𑐾𑑄 𑑑 𑐧𑐖𑐾 𑐟𑐎 𑐦𑐶𑐧𑑂𑐰𑐏𑑂𑐫𑑅𑐣𑐶𑐳𑐾𑑄 𑐣𑑂𑐴𑐹 𑐧𑐵𑐣𑐾𑐱𑑂𑐰𑐬 𑐡𑐸𑐰𑐵𑐟𑐫𑑂 𑐟𑐎 𑐧𑑂𑐫𑐵𑐣𑐬 𑐬𑑂‍𑐫𑐵𑐮𑐷 𑐥𑐶𑐎𑐫𑐵𑑅 𑐎𑑀𑐞𑐳𑐨𑐵 𑐫𑐵𑐫𑐾𑐐𑐸, 𑐎𑐣𑑂𑐴𑐫𑑂 𑐡𑐾𑐫𑑂‌𑐣𑑂𑐫𑑄𑐎𑑄𑐫𑐵 𑐳𑑂𑐎𑐸𑐮 𑐧𑐳 𑐳𑐟𑐎 𑐴𑐫𑐵𑑅 𑐣𑐐𑐬 𑐥𑐬𑐶𑐎𑑂𑐬𑐩𑐵 𑐫𑐵𑐫𑐾𑐐𑐸 𑐰 𑑘 𑐐𑐟𑐾 𑐣𑐶𑐬𑑂𑐞𑐵𑐫𑐎 𑐁𑐣𑑂𑐡𑑀𑐮𑐣 𑐫𑐵𑐫𑐾𑐐𑐸 𑐏𑑃 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋
𑐳𑐬𑐎𑐵𑐬𑑄 𑐰𑐶𑐡𑑂𑐫𑐵𑐮𑐫 𑐱𑐶𑐎𑑂𑐲𑐵 𑐰𑐶𑐢𑐾𑐫𑐎 𑐳𑑄𑐳𑐡𑐫𑑂 𑐥𑐾𑐳 𑐫𑐵𑐫𑐾𑐐𑐸 𑐟𑐫𑐵𑐬𑐷 𑐫𑐵𑐣𑐵𑐔𑑂𑐰𑑄𑐐𑐸 𑐂𑐮𑐫𑑂 𑐣𑐶𑐖𑐷 𑐰𑐶𑐡𑑂𑐫𑐵𑐮𑐫𑐟𑐫𑑂‌𑐳𑑄 𑐠𑑂𑐰 𑐀𑐳𑐴𑐩𑐟𑐶 𑐎𑑂𑐫𑑄𑐐𑐸 𑐏𑑅 𑑋 𑐣𑐶𑐖𑐷 𑐰𑐶𑐡𑑂𑐫𑐵𑐮𑐫 𑐳𑐘𑑂𑐔𑐵𑐮𑐎𑐟𑐫𑑂‌𑐳𑑄 𑐀𑐳𑐴𑐩𑐟𑐶 𑐎𑑂𑐫𑑄𑐐𑐸 𑐦𑐸𑐎𑑂𑐎𑑄 𑐢𑐂𑐠𑐾𑑄 𑐧𑐸𑑃𑐡𑐵𑐫𑑂 𑐳𑑄𑐳𑐡𑐷𑐫 𑐳𑐩𑐶𑐟𑐶𑐂 𑐳𑐴𑐩𑐟𑐶 𑐖𑐸𑐂𑐢𑐸𑑄𑐎𑐹𑐐𑐸 𑐡𑐸 𑑋