𑐩𑐷𑐣𑐵 𑐧𑐖𑑂𑐬𑐵𑐔𑐵𑐬𑑂𑐫
— “𑐕𑐶𑐐𑐸 𑐎𑑂𑐰𑐵𑐮𑐶𑐦𑐶𑐎𑐾𑐱𑐣 𑐟𑐳𑐎𑑄 𑐧𑐵𑑄𑐮𑐵 𑑋 𑐀𑐩𑐾𑐬𑐷𑐎𑐵𑐫𑐵 𑐣𑐵𑑄𑐡𑑄𑐐𑐸 𑐫𑐸𑐣𑐶𑐨𑐬𑑂𑐳𑐶𑐚𑐷𑑄 𑐴𑐾 𑐜𑐶𑐐𑑂𑐬𑐷 𑐎𑐫𑐵 𑐡𑐷𑐐𑐸 𑐖𑐸𑐫𑐵𑐔𑑂𑐰𑐣 𑑋”
𑐠𑐠𑐾 𑐢𑐎𑐵 𑐕𑐩𑑂𑐴 𑐂𑐣𑑂𑐚𑐬𑐨𑑂𑐫𑐸 𑐎𑐫𑐵𑐔𑑂𑐰𑑄𑐩𑑂𑐴 𑐩𑐣𑐹𑐏𑑃 𑐟𑐵𑐬𑐷𑐦 𑐫𑐵𑑅𑐧𑐮𑐾 𑐰𑐷𑐬 𑐧𑐴𑐵𑐡𑐸𑐬 𑐢𑐸𑐎𑑂𑐎 𑐖𑐸𑐮 𑑋 𑐖𑐵𑐐𑐶𑐬𑐮𑐵 𑐡𑐂𑐐𑐸 𑐥𑐎𑑂𑐎𑐵 𑐖𑐸𑐮 𑐢𑐎𑐵 𑐩𑐟𑐶 𑐟𑐮 𑑋 𑐂𑐣𑑂𑐚𑐬𑐨𑑂𑐫𑐸 𑐎𑑂𑐰𑐔𑐵𑐫𑐾𑐎𑐵 𑐮𑐶𑐴𑐵𑑃 𑐰𑑅𑐩𑑂𑐴 𑐰𑐫𑐵𑐐𑐸 𑐣𑐸𑐐𑑅 𑐮𑐳𑐟𑐵𑑄 𑐖𑐵𑑅 𑑋 𑐰𑐫𑐵𑐐𑐸 𑐣𑑂𑐴𑑂𑐫𑑅𑐣𑐾 𑐐𑐵𑑄𑐩𑐫𑑂 𑐔𑑂𑐰𑐣𑐵 𑐔𑑂𑐰𑑄𑐥𑐶𑑄 𑐠𑑅𑐩𑐵𑑄 𑐀𑐧𑐸𑐫𑐵 𑐡𑐸𑑅𑐏 𑐔𑐵𑐴𑐶𑐮 𑑋 𑐂𑐩𑐶𑐳𑑄 𑐠𑑅 𑐡𑑂𑐫𑐵𑑄𑐮𑐵𑐣𑐵 𑐁𑐏𑑅 𑐧𑑂𑐰𑑄𑐎𑐹𑐐𑐸 𑐮𑐸𑐩𑑄𑐎𑐮 𑑋 𑐟𑑂𑐫𑐵𑐳𑐵 𑐎𑐫𑐵 𑐖𑐹𑐳𑐵𑑄 𑐰𑐶𑐡𑐾𑐱𑐫𑑂 𑐄𑐔𑑂𑐔 𑐱𑐶𑐎𑑂𑐲𑐵 𑐴𑐵𑐳𑐶𑐮 𑐫𑐵𑐎𑐾𑐟 𑐕𑑂𑐰𑐐𑐸 𑐮𑐸𑐩𑑄𑐎𑐮 𑑋 𑐠𑑅𑐥𑐶𑑄 𑐀𑐣𑐥𑐝 𑐖𑐹𑐳𑐵𑑄 𑐰𑐷𑐬 𑐧𑐴𑐵𑐡𑐸𑐬𑐫𑐵𑐟 𑐱𑐶𑐎𑑂𑐲𑐵 𑐡𑐶𑐎𑑂𑐲𑐵 𑐧𑐶𑐂𑐎𑐾𑐫𑐵 𑐣𑐶𑐟𑐶𑑄 𑐕𑐾𑑃 𑐧𑐸𑑃 𑐟𑐎𑑂𑐎𑑄 𑐡𑐵𑐄𑐮𑐾 𑐟𑐮 𑑋 𑐠𑐖𑑂𑐫𑐵𑐐𑐸 𑐏𑑃𑐫𑑂 𑐟𑐣𑐵𑐔𑑂𑐰𑑄𑐩𑑂𑐴 𑐰𑑄 𑐁 𑐳𑐎𑐟𑐵𑑄 𑐟𑑂𑐫𑐵𑐳𑐵 𑐥𑐸𑐮𑐵 𑐳𑐸𑐏𑑄 𑐳𑐵𑐳 𑐮𑑂𑐴𑐵𑐫𑐾 𑐡𑐂𑐐𑐸 𑐖𑐸𑐮 𑐢𑐎𑐵 𑐩𑐟𑐶 𑐟𑐮 𑑋 𑐟𑐬 𑐰𑑄 𑐩𑐟𑐶𑐟𑑅𑐐𑐸 𑐏𑑃 𑐥𑐹𑐩𑐰𑐣 𑑋 𑐂𑐣𑑂𑐚𑐬𑐨𑑂𑐫𑐸 𑐧𑐵𑑄𑐮𑐵𑐳𑐵𑑄 𑐖𑐵𑐐𑐶𑐬 𑐢𑐵𑑅𑐳𑐵 𑐩𑐾𑐩𑐾𑐳𑐶𑐟 𑐴𑐾 𑐧𑐶𑐮 𑑋 𑐰 𑐮𑐵𑐏𑐾 𑐩𑐣𑑂𑐟𑑂𑐬𑐷𑐫𑐵 𑐳𑐶𑐦𑐵𑐬𑐷𑐱 𑐡𑐸𑐩𑑂𑐴 𑐴𑑃 𑑋 𑐩𑐾𑐠𑐵𑐫𑑂 𑐕𑐠𑐵𑐫𑑂 𑐰𑐫𑐵𑐎𑐾 𑐮𑐵𑐏𑑁𑑄 𑐡𑐵𑑃 𑐑𑐸𑐳 𑐦𑑂𑐰𑐣 𑑋 𑐣 𑐰𑐫𑐵𑐎𑐾 𑐑𑐸𑐳 𑐣𑐎𑐾𑐟 𑐡𑐵𑑃 𑐡𑐸 𑐣 𑐟 𑐩𑐣𑑂𑐟𑑂𑐬𑐷𑐫𑐵 𑐳𑐶𑐦𑐵𑐬𑐷𑐱 𑑋 𑐣 𑐟 𑐬𑐵𑐖𑐣𑐷𑐟𑐶 𑐥𑐵𑐬𑑂𑐚𑐷𑐫𑐵 𑐴𑐾 𑐳𑐶𑐦𑐵𑐬𑐷𑐱 𑐡𑐸 𑑋
𑐠𑐖𑑂𑐫𑐵𑐐𑐸 𑐠𑐷 𑐠𑐷 𑐗𑐩𑐾𑐮𑐵𑑄 𑐫𑐵𑐣𑐵 𑐰 𑐴𑐶𑐩𑐶𑐔𑐵𑐮 𑑋 𑐀𑐩𑐾𑐬𑐷𑐎𑐵𑐫𑑂 𑐴𑐾 𑐰𑐫𑐵𑐟 𑐖𑑂𑐫𑐵𑑅 𑐔𑐹𑐮𑐵𑐐𑐸 𑐣𑑄 𑐏𑑅 𑑋 𑐰𑑄 𑐠𑑅𑐐𑐸 𑐩𑐾𑐴𑐣𑐟𑐫𑐵 𑐴𑐶 𑐔𑑅𑐟𑐶 𑐠𑑅𑐐𑐸 𑐴𑐾 𑐡𑐾𑐱𑐫𑑂 𑐴𑐵𑐫𑐾𑐎𑐾𑐐𑐸 𑐧𑐶𑐔𑐵 𑐫𑐵𑐣𑐵𑑅 𑐠𑑅𑐐𑐸 𑐩𑐵𑐟𑐺𑐨𑐹𑐩𑐶𑐂 𑐮𑐶𑐴𑐵𑑃 𑐰𑐮 𑑋 𑐟𑐬 𑐠𑐣𑐫𑐵 𑐣𑐵𑐟𑐵𑐰𑐵𑐡 𑐰 𑐎𑐺𑐥𑐵𑐰𑐵𑐡𑐫𑐵 𑐔𑐮𑐏𑐾𑐮𑑄 𑐰 𑐣𑐶𑐬𑐵𑐱 𑐖𑐸𑐮 𑑋 𑐧𑐬𑐸 𑐀𑐩𑐾𑐬𑐷𑐎𑐵𑐫𑑂 𑐴𑐾 𑐖𑑂𑐫𑐵𑑅 𑐫𑐵𑐣𑐵𑑅𑐔𑑂𑐰𑑄𑐐𑐸 𑐖𑐸𑐳𑐵 𑐠𑑁𑑄 𑐠𑑅 𑐥𑐵𑐳𑐵𑐥𑐶𑑄𑐠𑐾𑑄 𑐜𑐮𑐬𑐫𑐵 𑐩𑐣𑐹 𑐖𑐸𑐂𑐢𑐸𑑄𑐎𑐮 𑐖𑐸𑐂 𑐢𑐎𑐵 𑐥𑐱𑑂𑐔𑐵𑐟𑐵𑐥 𑐫𑐵𑐟 𑑋 𑐴𑐵𑐎𑐣 𑐀𑐣 𑐴𑐾 𑐰𑐣𑐾𑐐𑐸 𑐎𑐸𑐟𑑅 𑐩𑐫𑐵𑐐𑐸 𑐣𑑄 𑐩𑐏𑐸 𑑋 𑐮𑐶𑐔𑑂𑐰𑑅 𑐟𑐵𑑅𑐩𑐮𑐵𑐟 𑑋 𑐠𑑂𑐰𑐴𑐾 𑐗𑑂𑐰𑐮𑐫𑑂 𑐕𑐐𑐸 𑐎𑐩𑑂𑐥𑐣𑐷𑐫𑐵 𑐕𑐩𑑂𑐴 𑐩𑐖𑐡𑐸𑐬 𑐣𑐾𑐟𑐵𑑄 𑐰𑐫𑐵𑐟 𑐳𑐵𑐠 𑐧𑐶𑐮 𑑋 𑐠𑑅𑐐𑐸 𑐫𑐸𑐣𑐶𑐫𑐣𑐫𑑂 𑐡𑐸𑐖𑑅 𑐖𑐸𑐂𑐐𑐸 𑐏𑑅𑐳𑐵 𑐖𑐵𑐐𑐶𑐬 𑐔𑐹𑐮𑐵𑐎𑐵 𑐧𑐶𑐂𑐐𑐸 𑐱𑐬𑑂𑐟 𑐟𑐮 𑑋 𑐖𑐵𑐐𑐶𑐬 𑐩𑐵𑑄𑐩𑐵𑑄 𑐴𑐵𑐬𑐾𑐔𑐵𑐫𑐾 𑐢𑐸𑑄𑐎𑐹𑐩𑑂𑐴 𑐰𑐷𑐬 𑐧𑐴𑐵𑐡𑐸𑐬𑑄 𑐄𑐏𑐾𑑄𑐠𑐸𑐏𑐾𑑄 𑐐𑐣𑑄 𑐩𑐳𑑂𑐰𑐳𑐾 𑐖𑐵𑐐𑐶𑐬 𑐣𑐫𑐵𑑅 𑐕𑑂𑐰𑐟 𑑋
𑐖𑐵𑐐𑐶𑐬𑐮𑐵 𑐧𑐮𑑂𑐮 𑐧𑐮𑑂𑐮 𑐮𑐸𑐫𑐵 𑐰𑐮 𑑋 𑐟𑐬 𑐱𑐴𑐬𑐫𑑂 𑐔𑑂𑐰𑐣𑐵 𑐖𑐵𑐐𑐶𑐬 𑐣𑐫𑐵𑐐𑐸 𑐢𑐾𑐧𑐵 𑐠𑑅𑐫𑐵𑐟 𑐖𑐎 𑐴𑐾 𑐖𑐾𑐣𑐟𑐾𑐣 𑐐𑐵𑐎𑐵𑑅 𑐔𑑂𑐰𑐩𑑂𑐴𑑄 𑐰𑐷𑐬 𑐧𑐴𑐵𑐡𑐸𑐬𑑄 𑐠𑑅 𑐥𑐬𑐶𑐰𑐵𑐬𑐫𑐵𑐟 𑐢𑐾𑐧𑐵 𑐕𑑂𑐰𑐫𑐾 𑐩𑐦𑐹 𑑋 𑐀𑐧𑐵𑐫𑑂𑐟𑐶 𑐴𑐾 𑐩𑐖𑐡𑐸𑐬 𑐴𑐎 𑐴𑐶𑐟𑐫𑐵 𑐣𑐶𑐟𑐶𑑄 𑐢𑐎𑐵 𑐁𑐣𑑂𑐡𑑀𑐮𑐣 𑐫𑐵𑐟 𑑋 𑐳𑐎𑐮 𑐩𑐖𑐡𑐸𑐬 𑐟𑐫𑑂𑐳𑑄 𑐁𑐣𑑂𑐡𑑀𑐮𑐣𑐫𑐵 𑐣𑑂𑐴𑑂𑐫𑐮𑐸𑐰𑐵𑑅 𑐫𑐵𑐣𑐵 𑐰𑐷𑐬 𑐧𑐴𑐵𑐡𑐸𑐬𑐫𑐵𑐟 𑐣𑑂𑐴𑑂𑐫𑑅𑐣𑐾 𑐟𑐮 𑑋 𑐩𑐖𑐡𑐸𑐬 𑐁𑐣𑑂𑐡𑑀𑐮𑐣 𑐔𑐬𑑂𑐎𑐾 𑐖𑐸𑐖𑐸𑑄 𑐰𑐣 𑑋 𑐁𑐏𑐶𑐬 𑐰𑐷𑐬 𑐧𑐴𑐵𑐡𑐸𑐬𑐫𑐵𑐟 𑐖𑐾𑐮𑐫𑑂 𑐣𑑂𑐫𑐵𑐡𑑃𑐫𑐵 𑐣𑐶𑐟𑐶𑑄 𑐔𑐮𑐵𑐣 𑐫𑐵𑐟 𑑋 𑐣𑑂𑐫𑐵𑐡𑑃𑐫𑐵 𑐖𑐾𑐮 𑐳𑑃𑐖𑐵𑐫 𑐨𑑀𑐐𑐾𑐫𑐵𑐣𑐵 𑐮𑐶𑐴𑐵𑑃 𑐰𑐩𑑂𑐴 𑐰𑐷𑐬 𑐧𑐴𑐵𑐡𑐸𑐬𑐫𑐵 𑐳𑐵𑐴𑐵𑐬𑐵 𑐳𑐸𑑄 𑐩𑐣𑑂𑐟 𑑋 𑐰𑐫𑐵𑐐𑐸 𑐖𑐵𑐐𑐶𑐬 𑐣𑑄 𑐩𑐣𑑂𑐟 𑑋 𑐟𑐬 𑐀𑐣 𑐔𑑂𑐰𑑄𑐥𑐶𑑄 𑐩𑐖𑐡𑐸𑐬𑐟 𑐢𑐵𑑅𑐳𑐵 𑐀𑐣 𑐴𑐾 𑐎𑐩𑑂𑐥𑐣𑐷𑐂 𑐖𑑂𑐫𑐵𑑅 𑐫𑐵𑐣𑐵𑐔𑑂𑐰𑑄𑐐𑐸 𑐡𑐣𑐷 𑑋 𑐰𑐶𑐰𑐱 𑐖𑐸𑐫𑐵𑑅 𑐠𑑅𑐐𑐸 𑐴𑐾 𑐐𑐵𑑃𑐩𑐫𑑂 𑐮𑐶𑐴𑐵𑑃 𑐰𑐣 𑑋
𑐣𑑂𑐫𑐵𑐡𑑃 𑐮𑐶𑐥𑐵 𑐠𑑅𑐐𑐸 𑐕𑐾𑑃𑐫𑑂 𑐮𑐶𑐴𑐵𑑃 𑐰𑐩𑑂𑐴𑑄 𑐰𑐷𑐬 𑐧𑐴𑐵𑐡𑐸𑐬𑐫𑐵 𑐕𑐾𑑃 𑐧𑐸𑑃 𑐖𑐎 𑐩𑐏𑐸 𑐩𑐵𑑄 𑐀𑐧𑐸 𑐣𑑄 𑐩𑐡𑐾𑐫 𑐢𑐸𑑄𑐎𑐹𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐠𑑅 𑐎𑐵𑐫𑑂𑐫𑐵 𑐁𑐱𑑄 𑐩𑑂𑐰𑐵𑐣𑐵𑐔𑑂𑐰𑑄𑐥𑐶𑑄 𑐩𑐵𑑄 𑐀𑐧𑐸𑐫𑐵𑐟 𑐩𑐣𑐹𑐟𑐫𑑂𑐳𑑄 𑐰𑐷𑐬 𑐧𑐴𑐵𑐡𑐸𑐬 𑐖𑐸𑐮𑐸𑐳𑐫𑑂 𑐰𑑄𑐩𑑂𑐴 𑐐𑑀𑐮𑐶𑑄 𑐎𑐫𑐵𑑅 𑐳𑐷𑐟 𑐢𑐎𑐵 𑐏𑐧𑐬 𑐠𑑂𑐫𑑄𑐎𑐮 𑐏𑐣𑐷 𑑋 𑐠𑐸𑐎𑐾𑑄𑐫𑐵𑐣𑐵 𑐣𑐶𑐩𑑂𑐴𑑄 𑐥𑐬𑐮𑑀𑐎 𑐖𑐸𑐮 𑑋 𑐀𑐮𑐾 𑐖𑐒𑑂𑐐𑐾 𑐎𑐵𑐖𑐷 𑐳𑐵𑐴𑐾𑐧𑑄 𑐂𑐩𑐶𑐐𑐸 𑐕𑐾𑑃𑐫𑑂 𑐧𑐸𑑃 𑐎𑐧𑑂𑐖𑐵 𑐫𑐵𑐟 𑑋 𑐀𑐣 𑐐𑐵𑑄𑐩𑐫𑑂 𑐎𑐵𑐖𑐷 𑐳𑐵𑐴𑐾𑐧𑐫𑐵 𑐀𑐟𑑂𑐫𑐵𑐔𑐵𑐬 𑐰 𑐀𑐣𑑂𑐫𑐵𑐫 𑐰𑐷𑐬 𑐧𑐴𑐵𑐡𑐸𑐬𑐫𑐵𑐟 𑐖𑐎 𑐩𑐏𑐸 𑐐𑐬𑐷𑐧 𑐖𑐣𑐟𑐵 𑐰 𑐎𑐶𑐳𑐵𑐣𑐟𑐫𑑂𑐟 𑐣𑑄 𑐫𑐎𑑂𑐰 𑐖𑐸𑐫𑐵𑐔𑑂𑐰𑐣 𑑋 𑐟𑐬 𑐂𑐩𑐶𑐐𑐸 𑐰𑐶𑐬𑐸𑐡𑑂𑐢𑐫𑑂 𑐳𑑅 𑐟𑐫𑐾 𑐦𑐹𑐥𑐶𑑄 𑐳𑐸𑑄𑐩𑐡𑐸 𑑋 𑐠𑑂𑐰𑑅 𑐀𑐣𑑂𑐫𑐵𑐫 𑐀𑐟𑑂𑐫𑐵𑐔𑐵𑐬 𑐰𑑄 𑐳𑐴𑐫𑐵𑐫𑐾 𑐩𑐦𑐹𑐟 𑑋 𑐄𑐎𑐶𑑄 𑐖𑐒𑑂𑐐𑐾 𑐎𑐵𑐖𑐷 𑐳𑐵𑐴𑐾𑐧𑐫𑐵 𑐰𑐶𑐬𑐸𑐡𑑂𑐢𑐫𑑂 𑐮𑑂𑐰𑐵𑐫𑐾𑐐𑐸 𑐢𑐎𑐵 𑐐𑐵𑑄𑐩𑐫𑑂 𑐔𑑂𑐰𑑄𑐥𑐶𑑄𑐮𑐶𑐳𑐾 𑐳𑐴𑐮𑐴 𑐧𑑂𑐫𑐵𑐎𑐮 𑑋 𑐣𑑂𑐴𑐵𑐥𑐵𑑄 𑐰𑐫𑐵𑐐𑐸 𑐏𑑃 𑐳𑐸𑐣𑐵𑐣𑑄 𑐥𑐟𑑂𑐫𑐵 𑐩𑐫𑐵 𑑋 𑐟𑐬 𑐧𑐸𑐮𑐸𑑄 𑐧𑐸𑐮𑐸𑑄 𑐰𑑄 𑐀𑐣𑐔𑑂𑐰𑑄𑐥𑐶𑑄 𑐩𑐣𑐹𑐟𑐫𑑂𑐟 𑐣𑐶𑐜𑐬 𑐫𑐵𑐣𑐵𑑅 𑐫𑑄𑐎𑐮 𑑋 𑐮𑑂𑐰𑐵𑐫𑐾𑐐𑐸 𑐎𑐮𑐵 𑐳𑑂𑐫𑐣𑐵 𑐫𑑄𑐎𑐮 𑑋 𑐮𑐶𑐥𑐵 𑐐𑐵𑑄𑐩𑐫𑑂 𑐳𑐎𑐳𑐶𑐫𑐵𑑄 𑐰𑐫𑐵𑐟 𑐴𑐾 𑐳𑐵𑐠 𑐧𑐶𑐮 𑑋 𑐄𑐎𑐶𑑄𑐫𑐵𑐣𑐵 𑐐𑐬𑐷𑐧 𑐖𑐣𑐟𑐵 𑐎𑐶𑐳𑐵𑐣𑐟𑐫𑑂𑐟 𑐳𑐸𑐣𑐵𑐣𑑄 𑐀𑐣𑑂𑐫𑐵𑐫 𑐀𑐟𑑂𑐫𑐵𑐔𑐵𑐬 𑐫𑐵𑐫𑐾 𑐩𑐦𑐹𑐟 𑑋 𑐖𑐩𑐷𑐣𑑂𑐡𑐵𑐬 𑐰 𑐎𑐵𑐖𑐷 𑐳𑐵𑐴𑐾𑐧 𑐢𑐵𑑅𑐥𑐶𑑄 𑐢𑐩𑐵𑐢𑐩 𑐐𑐵𑑃𑐩𑑄 𑐧𑐶𑐳𑑂𑐫𑐸𑑄 𑐰𑐣𑐾 𑐩𑐵𑐮 𑑋
𑐠𑑁𑑄𑐎𑐣𑑂𑐴𑐾𑐫𑑂 𑐐𑐵𑑄𑐫𑐵 𑐳𑐎𑐮 𑐩𑐣𑐹𑐟𑐫𑑂𑐳𑑄 𑐰𑐫𑐵𑐟 𑐕𑐩𑑂𑐴 𑐀𑐨𑐶𑐨𑐵𑐰𑐎 𑐴𑐾 𑐟𑐵𑐫𑐾𑐎𑐮 𑑋 𑐰𑐫𑐵𑐐𑐸 𑐏𑑃 𑐳𑐎𑐳𑐶𑐣 𑐩𑐵𑐣𑐾𑐖𑐹 𑑋 𑐰𑐫𑐵𑐟 𑐳𑐎𑐳𑐶𑐣 𑐡𑑂𑐫𑑅 𑐴𑐾 𑐨𑐵𑑅𑐥𑐶𑐮 𑑋 𑐰𑐫𑐵𑐐𑐸 𑐔𑐬𑑂𑐔𑐵 𑐀𑐣 𑐐𑐵𑑃𑐩𑐫𑑂 𑐖𑐎 𑐩𑐏𑐸 𑐣𑐵𑐥𑐣𑐵𑐥𑑄 𑐔𑑂𑐰𑑄𑐐𑐸 𑐐𑐵𑑃𑐩𑐫𑑂 𑐣𑑄 𑐖𑐸𑐮 𑑋 𑐂𑐩𑐶𑐳𑑄 𑐣𑑄 𑐰𑐷𑐬 𑐧𑐴𑐵𑐡𑐸𑐬𑐫𑐵𑐟 𑐠𑑅𑐥𑐶𑐣𑐶𑐐𑐸 𑐳𑐩𑐳𑑂𑐫𑐵 𑐎𑐣 𑑋 𑐡𑐎𑑂𑐰 𑐖𑐵𑐣𑐵 𑐳𑐩𑐳𑑂𑐫𑐵 𑐖𑑂𑐫𑑄𑐎𑐮 𑑋 𑐰𑐷𑐬 𑐧𑐴𑐵𑐡𑐸𑐬 𑐢𑐵𑐟𑑂𑐠𑐾𑑄 𑐰𑐷𑐬 𑐥𑐸𑐬𑐸𑐲 𑐖𑐸𑐂𑐢𑐸𑑄𑐎𑐮 𑑋 𑐀𑐣𑑂𑐫𑐵𑐫 𑐰 𑐀𑐟𑑂𑐫𑐵𑐔𑐵𑐬𑐫𑐵 𑐰𑐶𑐬𑐸𑐡𑑂𑐢𑐫𑑂 𑐮𑑂𑐰𑐵𑐫𑐾𑐟 𑐂𑐩𑐶𑐐𑐸 𑐦𑑁𑐖 𑐳𑐡𑐵𑑄 𑐟𑐫𑐵𑐬 𑐡𑐸 𑑋 𑐠𑐠𑐾𑐴𑐾 𑐫𑐵𑐫𑐵𑑄 𑐂𑐩𑐶𑐐𑐸 𑐱𑐎𑑂𑐟𑐶𑐫𑐵 𑐔𑐬𑑂𑐔𑐵 𑐁 𑐐𑐵𑑄𑐩𑐫𑑂 𑐖𑐎 𑐩𑐏𑐸 𑐱𑐴𑐬𑐫𑑂 𑐟𑐎𑑂𑐎𑑄 𑐠𑑂𑐫𑐣 𑑋 𑐱𑐴𑐬𑐫𑑂 𑐣𑑄 𑐰𑑄 𑐠𑑅𑐫𑐵𑐟 𑐣𑑂𑐴𑐵𑐥𑐵 𑐀𑐣𑑂𑐫𑐵𑐫 𑐫𑐵𑑅𑐥𑐶𑐣𑑂𑐟 𑐧𑐡𑐮𑐵 𑐎𑐵𑐫𑐾𑐐𑐸 𑐧𑐶𑐔𑐵𑑅 𑐫𑐵𑐟 𑑋 𑐰𑐷𑐬 𑐧𑐴𑐵𑐡𑐸𑐬𑐫𑐵 𑐂𑐱𑐵𑐬𑐵𑐫𑑂 𑐩𑐣𑐹𑐟 𑐳𑐷𑐟 𑐰 𑐳𑑂𑐫𑐵𑐫𑐾𑐟 𑐳𑐡𑐵𑑃 𑐟𑐫𑐵𑐬 𑐡𑐸 𑑋 𑐄𑐎𑐶𑑄 𑐰𑑄 𑐱𑐴𑐬𑐫𑑂 𑐣𑑄 𑐠𑑅𑐐𑐸 𑐱𑐎𑑂𑐟𑐶 𑐥𑑂𑐬𑐡𑐬𑑂𑐱𑐣 𑐫𑐵𑐫𑐾 𑐩𑐵𑑅𑐐𑐸 𑐁𑐰𑐱𑑂𑐫𑐎𑐟𑐵 𑐩𑐴𑐳𑐸𑐳 𑐫𑐵𑐟 𑑋 𑐰𑑄 𑐳𑐵𑐩𑐣𑑂𑐟𑐷 𑐟𑐫𑐾𑐐𑐸 𑐡𑐵𑑃 𑐮𑐸𑐚𑐾𑐫𑐵𑐣𑐵 𑐐𑐬𑐷𑐧 𑐡𑐸𑐠𑐸𑐂 𑐂𑐣𑐵 𑐧𑐶𑐮 𑑋 𑐀𑐮𑐾 𑐠𑑅𑐐𑐸 𑐦𑑁𑐖𑐫𑐵𑐟 𑐥𑐵𑐮𑐣 𑐥𑑀𑐲𑐞 𑐰 𑐟𑐵𑐮𑐶𑐩𑐫𑐵 𑐰𑑂𑐫𑐰𑐳𑑂𑐠𑐵 𑐫𑐵𑐟 𑑋 𑐰𑐷𑐬 𑐧𑐴𑐵𑐡𑐸𑐬 𑐰 𑐰𑐫𑐵 𑐦𑑁𑐖𑐫𑐵𑐟 𑐠𑑅𑐥𑐶𑐣𑐶𑐐𑐸 𑐱𑐎𑑂𑐟𑐶𑐥𑑂𑐬𑐟𑐶 𑐑𑐩𑐞𑑂𑐜 𑐣𑑄 𑐡𑐫𑐵 𑐰𑐮 𑑋 𑐄𑐎𑐶𑑄 𑐂𑐩𑐶𑐳𑑄 𑐡𑐎𑑂𑐰𑐳𑐶𑐟 𑐠𑑅𑐐𑐸 𑐃𑐱𑐵𑐬𑐵𑐫𑑂 𑐖𑑂𑐫𑐵𑑅𑐫𑐵𑐎𑐾𑐐𑐸 𑐳𑑂𑐰𑐮 𑑋 𑐠𑑅𑐥𑐶𑐣𑐶 𑐳𑑂𑐰𑐵𑐬𑑂𑐠𑐥𑐹𑐬𑑂𑐟𑐶 𑐫𑐵𑐫𑐾𑐫𑐵 𑐣𑐶𑐟𑐶𑑄 𑐂𑐩𑐶𑐳𑑄 𑐣𑑂𑐴𑑂𑐫𑐵𑑅𑐐𑐸 𑐫𑐵𑐫𑐾𑐟 𑐣𑑄 𑐮𑐶𑐦𑑅 𑐩𑐳𑑂𑐰𑐮 𑑋 𑐖𑐬𑑂𑐧𑐖𑐳𑑂𑐟𑐷 𑐐𑐵𑑄𑐩𑐫𑑂 𑐔𑑂𑐰𑑄𑐥𑐶𑐣𑑂𑐟 𑐠𑑅𑐐𑐸 𑐦𑑁𑐖𑐫𑑂 𑐨𑐬𑑂𑐟𑐶 𑐫𑐵𑐟 𑑋 𑐩𑐵𑐣𑐾𑐩𑐖𑐸𑐥𑐶𑐣𑑂𑐟 𑐫𑐵𑐟𑐣𑐵 𑐧𑐶𑐂𑐐𑐸, 𑐐𑐵𑑃𑐩𑑄 𑐥𑐶𑐟𑐶𑐣𑐵 𑐕𑑂𑐰𑐫𑐾𑐐𑐸 𑐖𑐎 𑐩𑐏𑐸 𑐴𑐟𑑂𑐫𑐵 𑐫𑐵𑐫𑐾𑐟 𑐣𑑄 𑐮𑐶𑐦𑑅 𑐩𑐳𑑂𑐰𑐮 𑑋 𑐄𑐎𑐶𑑄 𑐩𑐣𑐹𑐟𑐫𑑂𑐳𑑄 𑐐𑑂𑐫𑐵𑐣𑐵𑑅 𑐴𑐾 𑐰𑐫𑐵𑐟 𑐳𑐵𑐠 𑐧𑐶𑐫𑐵𑐔𑑂𑐰𑐣 𑑋 𑐟𑐬 𑐐𑐸𑐮𑐶𑑄 𑐐𑐵𑑄 𑐟𑑂𑐰𑐟𑐵 𑐐𑐸𑐮𑐶𑑄 𑐡𑐾𑐱 𑐴𑐾 𑐟𑑂𑐰𑐟𑐵 𑐰𑐶𑐡𑐾𑐱𑐫𑑂 𑐥𑐮𑐵𑐫𑐣 𑐖𑐸𑐖𑐸𑑄 𑐰𑐣 𑑋
𑐰𑐷𑐬 𑐧𑐴𑐵𑐡𑐸𑐬𑐫𑐵 𑐦𑑁𑐖 𑐰𑐫𑐵𑑅 𑐱𑐴𑐬𑐫𑑂 𑐴𑐩𑐮𑐵 𑐫𑐵𑐟 𑑋 𑐁𑐣𑑂𑐡𑑀𑐮𑐣 𑐔𑐬𑑂𑐎𑐾 𑐖𑐸𑐖𑐸𑑄 𑐰𑐣 𑑋 𑐳𑑂𑐎𑐹𑐮, 𑐎𑐮𑐾𑐖, 𑐀𑐦𑐶𑐳, 𑐥𑐳𑑅 𑐣𑑂𑐴𑑂𑐫𑐵𑑅𑐧𑐮𑐾𑑄 𑐧𑐣𑑂𑐡 𑐖𑐸𑐂𑐐𑐸 𑐖𑐸𑐮 𑑋 𑐱𑐴𑐬 𑐕𑐐𑐸 𑐫𑐸𑐡𑑂𑐢 𑐨𑐹𑐩𑐶 𑐠𑐾𑑄 𑐖𑐸𑐮 𑑋 𑐐𑐺𑐴𑐫𑐸𑐡𑑂𑐢𑑄 𑐫𑐵𑐣𑐵 𑐖𑐣𑐟𑐵 𑐖𑐎 𑐩𑐏𑐸 𑐳𑐵𑑃𑐳𑑂𑐎𑐺𑐟𑐶𑐎 𑐢𑐬𑑀𑐴𑐬, 𑐥𑑁𑐬𑐵𑐞𑐶𑐎 𑐳𑐩𑑂𑐥𑐡𑐵 𑐰 𑐥𑑂𑐬𑐵𑐎𑐺𑐟𑐶𑐎 𑐰 𑐳𑐵𑑄𑐎𑐺𑐟𑐶𑐎 𑐳𑐩𑑂𑐥𑐟𑑂𑐟𑐶 𑐡𑐎𑑂𑐰 𑐣𑐲𑑂𑐚 𑐖𑐸𑐮 𑑋 𑐰𑐷𑐬 𑐧𑐴𑐵𑐡𑐸𑐬𑐫𑐵 𑐱𑐎𑑂𑐟𑐶 𑐗𑐣 𑐗𑐣 𑐀𑐥𑑂𑐰𑐫𑐵 𑐰𑑅𑐮𑐶𑐳𑐾 𑐠𑐣 𑐔𑑂𑐰𑑄𑐥𑐶𑑄 𑐩𑐣𑐹𑐟 𑐣𑑄 𑐰𑐶𑐡𑐾𑐱𑐫𑑂 𑐥𑐮𑐵𑐫𑐣 𑐖𑐸𑐖𑐸𑑄 𑐰𑐣𑐵𑐔𑑂𑐰𑐣 𑑋 𑐁 𑐀𑐣 𑐮𑐜𑐵𑐎𑐸, 𑐐𑐬𑐷𑐧, 𑐀𑐥𑐵𑐒𑑂𑐐, 𑐧𑐸𑐬𑐵𑐧𑐸𑐬𑐷 𑐰 𑐮𑑂𑐰𑐐𑐷𑐟 𑐳𑐶𑐰𑐵𑐫𑑂 𑐩𑐾𑐥𑐶𑑄 𑐩𑐡𑐫𑐵 𑐰𑐮 𑑋 𑐁𑐏𑐶𑐬 𑐕𑐣𑑂𑐴𑐸 𑐱𑐴𑐬𑐫𑑂 𑐣𑑄 𑐰𑐷𑐬 𑐧𑐴𑐵𑐡𑐸𑐬𑐫𑐵 𑐴𑐾 𑐦𑑁𑐖𑑄 𑐎𑐧𑑂𑐖𑐵 𑐫𑐵𑐟 𑑋 𑐁 𑐡𑐾𑐱𑐫𑐵 𑐣𑐾𑐟𑐵 𑐰𑐷𑐬 𑐧𑐴𑐵𑐡𑐸𑐬 𑐖𑐸𑐮 𑑋 𑐠𑑅 𑐣𑐾𑐟𑐵 𑐖𑐸𑐂 𑐢𑐸𑑄𑐎𑐵 𑐰 𑐡𑐾𑐱 𑐨𑑂𑐬𑐩𑐞𑐫𑑂 𑐰𑐣𑐾𑐐𑐸 𑐧𑐶𑐔𑐵𑑅𑐫𑐵𑐟 𑑋 𑐡𑐎𑐮𑐾 𑐣𑑂𑐴𑐵𑐥𑐵 𑐰 𑐠𑑅𑐐𑐸 𑐴𑐾 𑐐𑐵𑑃𑐩𑐫𑑂 𑐰𑐣 𑑋 𑐰𑑄 𑐧𑐶𑐔𑐵 𑐫𑐵𑐟 𑐡𑐎𑑂𑐰 𑐐𑐵𑑄𑐫𑐵 𑐩𑐣𑐹𑐟 𑐰𑐫𑐵 𑐰𑐫𑐵𑐟 𑐖𑐫 𑐖𑐫𑐎𑐵𑐬 𑐫𑐵𑐣𑐵𑑅 𑐮𑐳𑐎𑐸𑐳 𑐫𑐵𑐂 𑑋 𑐟𑐬 𑐰𑑄 𑐧𑐶𑐔𑐵𑑅 𑐫𑐵𑑅𑐐𑐸 𑐀𑐏𑑅 𑐕𑐩𑑂𑐴 𑐴𑐾 𑐩𑐰𑑅 𑑋
𑐐𑐵𑑄 𑐩𑐏𑐸 𑐰𑐮𑐵 𑐕𑐐𑐸 𑐩𑐳𑐵𑐣𑐑𑐵𑐚 𑐠𑐾𑑄 𑑋 𑐳𑑂𑐰𑐳𑑂𑐰𑑅𑐠𑐵𑐫𑑂 𑐳𑐷 𑐣𑐰𑑅 𑐳𑐸𑐣𑐳𑐵𑐣 𑑋 𑐗𑐶𑑄𑐖𑐵𑐩𑐶𑐖𑐵𑑄 𑐡𑑄 𑑋 𑐠𑐖𑑂𑐫𑐵𑐐𑐸 𑐡𑐺𑐲𑑂𑐫 𑐏𑐣𑐵 𑐰𑐷𑐬 𑐧𑐴𑐵𑐡𑐸𑐬𑑄 𑐠𑑅 𑐎𑐵𑐬𑑂𑐫𑐎𑐬𑑂𑐟𑐵𑐟𑐫𑑂𑐟 𑐣𑑂𑐫
—“𑐠𑑂𑐰𑑅 𑐐𑐵𑑄𑐫𑐵 𑐩𑐣𑐹𑐟 𑐡𑐎𑑂𑐰 𑐐𑐣 𑐰𑐣 ? 𑐖𑐶 𑐰𑐮 𑐢𑐎𑐵 𑐳𑐸𑐣𑐵𑐣𑑄 𑐕𑐵𑐫𑑂 𑐳𑑂𑐰𑐵𑐐𑐟 𑐫𑐵𑑅𑐩𑐰𑐐𑐸 𑐴𑐵𑑃 ? 𑐖𑐶 𑐰𑐫𑐵𑐔𑑂𑐰𑑄𑐐𑐸 𑐡𑐸 𑐢𑐎𑐵 𑐂𑐩𑐶𑐟 𑐏𑐧𑐬 𑐕𑐶𑐩𑐶𑐳𑑄 𑐩𑐧𑐶𑐫𑐵 𑐎𑐶 𑐕𑐸 ?” 𑐎𑐵𑐬𑑂𑐫𑐎𑐬𑑂𑐟𑐵𑐟𑐫𑑂𑐳𑑄 𑐕𑐸𑑄 𑐖𑐰𑐵𑐦 𑐩𑐧𑑂𑐫𑐸𑐳𑐾 𑐕𑑂𑑂𑐫𑑀𑑃 𑐎𑑂𑐰𑐕𑐸𑐎𑐵 𑐔𑑂𑐰𑐣𑐵𑐔𑑂𑐰𑐣 𑑋 𑐄𑐧𑐮𑐾 𑐴𑐾 𑐟𑐵𑐥𑐵𑐎𑑂𑐎𑑄 𑐕𑐠𑑂𑐰𑑅 𑐩𑐣𑐹𑐟 𑐴𑐵𑐮𑐵𑑅 𑐰𑑅𑐐𑐸 𑐳𑑅 𑐟𑐵𑐫𑐾 𑐡𑐟 𑑋 𑐰 𑐡𑐒𑑂𑐐 𑐖𑐸𑐮 𑑋 𑐟𑐬 𑐂𑐩𑐶𑐳𑑄 𑐕𑐸 𑐢𑐎𑐵𑑅 𑐴𑐵𑐮𑐵𑑅 𑐰𑑅𑐐𑐸 𑐏𑑅 𑐰 𑐢𑐵𑑅𑐳𑐵 𑐟𑐶𑐦𑑂𑐫𑐵𑐫𑐾 𑐩𑐦𑐹𑐟 𑑋 𑐂𑐥𑐶𑑄 𑐗𑐣 𑐗𑐣 𑐣𑑂𑐴𑑂𑐫𑐣𑐾 𑐠𑑂𑐫𑑄𑐎 𑐰𑐮 𑑋
— 𑐰𑐷𑐬 𑐧𑐴𑐵𑐡𑐸𑐬 𑐩𑐸𑐬𑑂𑐡𑐵𑐧𑐵𑐡 ! 𑐰𑐷𑐬 𑐧𑐴𑐵𑐡𑐸𑐬 𑐩𑐸𑐬𑑂𑐡𑐵𑐧𑐵𑐡 !! 𑐣𑐾𑐟𑐵 𑐢𑐵𑐎𑑂𑐰 𑐏𑐶𑐔𑐵𑐫𑐵 𑐎𑐫𑑂𑐟𑐵 ! 𑐰𑐷𑐬 𑐧𑐴𑐵𑐡𑐸𑐬 𑐩𑐸𑐬𑑂𑐡𑐵𑐧𑐵𑐡 !!!
𑐠𑐖𑑂𑐫𑐵𑐐𑐸 𑐣𑐵𑐬𑐵 𑐣𑑂𑐫𑐣𑐵𑑅 𑐰𑐷𑐬 𑐧𑐴𑐵𑐡𑐸𑐬 𑐰𑐵𑐟𑐵𑐴𑐵𑑃 𑐖𑐸𑐫𑐵𑐔𑑂𑐰𑐣 𑑋 𑐴𑐵𑐮𑐵𑐰𑑅𑐥𑐶𑑄 𑐩𑐣𑐹𑐟 𑐡𑐎𑑂𑐰 𑐴𑐾 𑐧𑐸𑐬𑐵𑐧𑐸𑐬𑐷𑐥𑐶𑑄, 𑐮𑑂𑐰𑐐𑐷𑐥𑐶𑑄, 𑐀𑐥𑐵𑐒𑑂𑐐𑐟 𑐰 𑐣𑐫𑐾 𑐩𑐏𑑄𑐏𑑂𑐰𑐵𑑅𑐰𑐥𑐶𑑄 𑐎𑑂𑐰𑐫𑑃𑑂𑐎𑐵𑐮𑐷𑐟 𑐖𑐎 𑐴𑐾 𑑋 𑐂𑐩𑐶𑐐𑐸 𑐩𑑂𑐴𑐾 𑐎𑑂𑐰𑐫𑐾𑑃 𑐰 𑐳𑐵𑐮𑐸𑐐𑐸 𑐕𑑂𑐫𑑄𑐐𑐸 𑐳𑐶𑐰𑐵𑐫𑑂 𑐏𑐣𑐾𑐩𑐡𑐸 𑑋 𑐮𑑄𑐫𑐵 𑐣𑐵𑐩𑑄 𑐨𑑂𑐰𑐵𑐠𑑅 𑐕𑐎𑐸𑐔𑐵𑑄 𑐠𑑅𑐐𑐸 𑐮𑐖𑑂𑐖𑐵 𑐖𑐎 𑐟𑑂𑐰𑐥𑐸𑐫𑐵𑑅 𑐟𑑅𑐐𑐸 𑐡𑐸 𑑋 𑐳𑑂𑐰𑐫𑐾𑐧𑐮𑐾 𑐣𑑄 𑐀𑐮𑐐𑑂𑐐 𑐴𑐾 𑐡𑐸𑐣𑐶𑐫𑐵𑑃 𑐰𑑅𑐥𑐶𑑄 𑐊𑐮𑐾𑐣𑐟 𑐠𑐾𑑄 𑑋 𑐄𑐧𑐮𑐾 𑐴𑐾 𑐳𑑃 𑐖𑐶𑑄𑐬𑐶𑐒𑑂𑐐 𑐔𑑂𑐰𑐩𑑂𑐴 𑐄𑐃𑑄𑐠𑐾𑑄 𑐖𑐵𑐩𑑂𑐴 𑐧𑐸𑐬𑐷𑑄 𑐩𑐶𑐏𑐵 𑐴𑑂𑑂𑐫𑐵𑐄𑑃𑐎 𑐟𑐟𑑅𑐐𑑂𑐰𑐫𑐾𑐎 𑐎𑐣𑐵𑑅 𑐰𑐷𑐬 𑐧𑐴𑐵𑐡𑐸𑐬𑐫𑐵 𑐣𑑂𑐴𑑂𑐫𑐣𑐾 𑐰𑐫𑐵𑑅 𑐥𑐟𑐶𑑄𑐔𑐵 𑐢𑐳𑑂𑐰𑐵𑐎𑐵 𑐢𑐵𑐮 —“𑐥𑐵𑐥𑐷 𑐬𑐵𑐎𑑂𑐲𑐳 ! 𑐕 𑐴𑐵𑐎𑐣 𑐠𑐣 𑐳𑐸𑐫𑐵𑐟 𑐳𑑂𑐫𑐵𑐫𑐾 𑐢𑐎𑐵 𑐰𑐫𑐵𑐐𑐸 ? 𑐠𑐣 𑐔𑑂𑐰𑐥𑐶𑑄 𑐳𑐎𑐳𑐶𑐟 𑐳𑑂𑐫𑐵𑐣𑐵 𑐮𑐵 𑐴𑐶 𑐣𑐮 𑐁 𑐕𑐸 𑐖𑐶𑐩𑐶𑐐𑐸 𑐎𑑂𑐰𑐫𑑃𑑂 𑐔𑐹𑐔𑐹𑐥𑑂𑐫𑐵𑐫𑐾 𑐢𑐎𑐵 𑐰𑐫𑐵𑐐𑐸𑐮𑐵 ? 𑐎𑐵 𑐳𑑂𑐫𑐵 𑐖𑐶𑐩𑐶𑐟 𑐣𑑄 𑑋 𑐖𑐶𑐩𑐶 𑐠𑑅𑐠𑐶𑐟𑐶 𑐨𑐵𑐰𑐷 𑐳𑐣𑑂𑐟𑐟𑐷 𑐴𑐾 𑐩𑐡𑐾𑐫𑑂𑐎𑐵 𑐖𑐶𑐩𑐶𑐟 𑐖𑐎 𑐕𑐵𑐫𑑂 𑐩𑑂𑐰𑐵𑐎𑐵 𑐟𑐫𑐵𑐐𑐸 ? 𑐳𑑂𑐫𑐵𑐣𑐵 𑐕𑑂𑐰 𑐖𑐶𑐩𑐶𑐟 𑐣𑑄” 𑐢𑐎𑐵 𑐏𑑂𑐰𑐮 𑑋
𑐴𑐵𑐎𑐣 𑐩𑐾𑐩𑑂𑐴 𑐢𑐸𑐳𑐷 𑐮𑐸𑐩𑑂𑐴 𑐮𑑄𑐐𑐜𑐵 𑐰𑐫𑐵 𑐟𑐸𑐟𑐵𑑄 𑐧𑑅𑐧𑑅𑐳𑑂𑐰𑐵𑐣𑐵 𑐴𑐵𑐮—“𑐠𑑂𑐰𑑅 𑐣𑐬𑐨𑐎𑑂𑐲𑐷 𑐎𑐵𑐫𑐬 𑐎𑐵𑐟𑐬𑑄 𑐗𑐷𑐟 𑐕𑐸 𑐳𑑂𑐫𑐵𑐫𑐾 𑐦𑐂 ? 𑐗𑐷𑐮𑐵 𑐠𑑁𑑄𑐳𑑂𑐰𑐫𑐵𑑄 𑐗𑐶𑑄𑐣𑐶𑐡𑑃 𑐣𑑂𑐴𑑂𑐫𑑅𑐴𑐾 𑐳𑐷𑐂𑐢𑐸𑑄𑐎𑐮 𑑋 𑐗𑐷𑐥𑐶𑑄𑐮𑐵 𑐎𑐾𑐰𑐮 𑐩𑑂𑐰𑐵𑐣𑐵𑐔𑑂𑐰𑑄𑐐𑐸 𑐮𑐵𑐳 𑐖𑐎 𑐏𑑅 𑑋 𑐖𑐷𑐄𑑃𑐡𑑀 𑐮𑐵𑐳 𑑋”
𑐴𑐵𑐎𑐣 𑐩𑐾𑐩𑑂𑐴 𑐧𑐸𑐬𑐵 𑐩𑐸𑐳𑐸 𑐟𑐟𑑄 𑐡𑐩 𑐳𑑂𑐰𑐵𑑃 𑐳𑑂𑐰𑐵𑑃 𑐰𑐫𑐾𑐎𑐵 —“𑐴𑐾 𑐣𑐵𑐩𑐬𑑂𑐡 𑐣𑐎𑑂𑐔𑐬𑐵 𑐣𑐾𑐟𑐵 ! 𑐕 𑐳𑐸𑐫𑐵𑐐𑐸 𑐣𑐾𑐟𑐵 𑐖𑐸𑐮 𑐢𑐎𑐵 𑐠𑐣 𑐦𑐸𑐃𑑄 𑐫𑐵𑑅𑐰𑐫𑐵𑐐𑐸 ? 𑐠𑑂𑐰𑑅 𑐩𑐳𑐵𑐣𑐫𑑂 𑐮𑐵𑐳 𑐧𑐵𑐴𑐾𑐎 𑐳𑐸𑑄 𑐩𑐡𑐸 𑑋 𑐩𑐸𑐬𑑂𑐡𑐵𑐟𑐫𑑂𑐟 𑐕𑑄 𑐕𑐸 𑐬𑐵𑐖 𑐫𑐵𑐂 ? 𑐴𑐵…..𑐴𑐵….𑐴𑐵…..𑑋
𑐴𑐵𑐎𑐣 𑐳𑐎𑐳𑐶𑐫𑐵𑑄 𑐕𑐳𑑅𑐮𑑄 𑐳𑐴𑑂𑐬𑐵𑑅 𑐧𑐶𑐮 —“𑐕𑐮𑐵 𑐮𑐵𑐳𑐟𑐫𑑂 𑐣𑐾𑐟𑐵 𑐏𑑅 𑑋 𑐠𑐣 𑐡𑐾𑐱𑐫𑑂 𑐁 𑐮𑐵𑐳 𑐖𑐎 𑐡𑐸 𑐮𑐵𑐳 𑑋 𑐟𑐬 𑐕𑑄 𑐩𑐺𑐟𑑂𑐫𑐸𑐫𑐵 𑐨𑐷𑐏 𑐩𑐵𑐐𑐾𑐫𑐵𑐳𑐵𑑄 𑐩𑐺𑐟𑑂𑐫𑐸 𑐕𑑄𑐣𑑂𑐟 𑐮𑐸𑐂𑐩𑐏𑐸 𑑋 𑐕 𑐥𑐵𑐥𑐷𑐫𑐵𑐟 𑐐𑐣𑑄 𑐧𑐵𑐳 𑐡𑐂𑐩𑐏𑐸 𑑋 𑐴𑐵…𑐴𑐵…𑐴𑐵……….𑑋
𑐠𑐠𑐾 𑐢𑐎𑐵 𑐡𑐎𑑂𑐰𑑄 𑐣𑑂𑐴𑐶𑐮 𑑋 𑐠𑑂𑐰𑑅 𑐣𑑂𑐴𑐶𑐮𑐵 𑐳𑑅 𑐠𑐸𑐮𑐶 𑐨𑐫𑐵𑐣𑐎 𑐐𑑂𑐫𑐵𑐣𑐵𑐥𑐸𑐮𑐎𑐶 𑐣𑐾𑐟𑐵𑐫𑐵 𑐔𑑅𑐟𑐶 𑐴𑐾 𑐨𑐸𑐳𑐸𑐨𑐸𑐳𑐸 𑐰𑐮 𑑋 𑐀𑐣 𑐰 𑐥𑐮𑐏 𑐴𑐾 𑐔𑑂𑐰𑐣𑐾 𑐩𑐦𑐹𑐟 𑑋 𑐐𑑂𑐫𑐵𑐣𑐵 𑐰 𑐴𑐵𑐎𑐣 𑐱𑐴𑐬𑐥𑐵𑐏𑐾 𑐴𑐾 𑐮𑐶𑐴𑐵𑑃 𑐰𑐫𑐵 𑐕𑑂𑐰𑐟 𑑋 𑐮𑑃𑐫𑑂 𑐰𑑄 𑐰𑐾𑑃𑐫𑑂 𑐄𑐃𑑄, 𑐧𑐸𑐬𑐵𑐧𑐸𑐬𑐷𑐟, 𑐀𑐥𑐵𑐒𑑂𑐐𑐟, 𑐮𑑂𑐰𑐐𑐷𑐟 𑐳𑐶𑐰𑐵𑐫𑑂 𑐩𑐾𑐥𑐶𑑄 𑐳𑐸𑑄 𑐣𑐵𑐥𑐩𑐮𑐵 𑑋 𑐡𑐾𑐱𑐫𑐵 𑐡𑐎𑑂𑐰 𑐎𑐮𑐵𑐎𑐺𑐟𑐶, 𑐩𑐛𑐩𑐣𑑂𑐡𑐶𑐬, 𑐥𑐸𑐬𑑂𑐏𑐵𑑄 𑐢𑐳𑑂𑐰𑐵𑐎𑐵 𑐠𑐎𑐸𑐐𑐸 𑐳𑐩𑑂𑐥𑐟𑑂𑐟𑐶 𑐡𑐎𑑂𑐰 𑐢𑑂𑐰𑐳𑑂𑐟 𑐖𑐸𑐫𑐵 𑐖𑐶𑐬𑑂𑐞 𑐀𑐰𑐳𑑂𑐠𑐵𑐫𑑂 𑐠𑑂𑐫𑐣𑐵𑐔𑑂𑐰𑐣 𑑋
𑐠𑐖𑑂𑐫𑐵𑐐𑐸 𑐨𑐫𑐵𑐰𑐴 𑐡𑐺𑐲𑑂𑐫 𑐏𑐣𑐵 𑐰𑐷𑐬 𑐧𑐴𑐵𑐡𑐸𑐬𑐫𑐵 𑐗𑐳𑑄𑐐 𑐖𑐸𑐮 𑑋 𑐰𑑄 𑐥𑐱𑑂𑐔𑐵𑐟𑐵𑐥 𑐫𑐵𑐟 𑑋 𑐠𑑅𑐐𑐸 𑐳𑑂𑐰𑐵𑐬𑑂𑐠𑐫𑐵 𑐱𑐎𑑂𑐟𑐶 𑐥𑑂𑐬𑐡𑐬𑑂𑐱𑐣 𑐫𑐵𑐫𑐾𑐐𑐸 𑐗𑑂𑐰𑐮𑐫𑑂 𑐰𑑄 𑐠𑑅𑐐𑐸 𑐎𑐬𑑂𑐟𑐧𑑂𑐫 𑐮𑑂𑐰𑐩𑑄𑐎𑐸𑐐𑐸 𑐮𑐸𑐩𑑄𑐳𑐾 𑐰𑐮 𑑋 𑐁𑐰𑑄𑐣𑐶𑐳𑐾𑑄 𑐀𑐖𑑂𑐫𑐵𑐐𑐸 𑐥𑐵𑐥 𑐫𑐵𑐫𑐾𑐩𑐏𑐸 𑑋 𑐧𑐬𑐸 𑐡𑐾𑐱𑐫𑐵𑐐𑐸 𑐰𑐶𑐎𑐵𑐳 𑐫𑐵𑐫𑐾, 𑐖𑐣𑐟𑐵𑐫𑐵 𑐎𑐮𑑂𑐫𑐵𑐞 𑐖𑐸𑐂𑐐𑐸 𑐖𑑂𑐫𑐵𑑅𑐫𑐵𑐫𑐾 𑐀𑐮𑐾 𑐖𑐶𑐐𑐸 𑐥𑐵𑐥𑐫𑐵 𑐥𑑂𑐬𑐵𑐫𑐱𑑂𑐔𑐶𑐟 𑐖𑐸𑐂 𑐢𑐎𑐵 𑐧𑐶𑐔𑐵𑑅 𑐫𑐵𑐟 𑑋 𑐳𑐎𑐮 𑐠𑑅 𑐎𑐵𑐬𑑂𑐫𑐎𑐬𑑂𑐟𑐵𑐟𑐫𑑂𑐟 𑐳𑑅𑐟𑐮 𑑋 𑐡𑐾𑐱 𑐰𑐶𑐎𑐵𑐳𑐫𑐵 𑐧𑐵𑐬𑐾 𑐳𑐴𑐮𑐴 𑐫𑐵𑐟 𑑋 𑐟𑐬 𑐫𑐎𑑂𑐰 𑐴𑐾 𑐮𑐶𑐧𑐵𑐫 𑐢𑐸𑑄𑐎𑐮 𑑋 𑐀𑐣𑐮𑐵 𑐰𑐩 𑐧𑐵𑐬𑐸𑐡 𑐡𑐫𑐾𑐎𑐾 𑐳𑑅𑐥𑐶𑑄 𑐰 𑐧𑐣𑑂𑐡𑐸𑐎 𑐔𑐮𑐾 𑐫𑐵𑐫𑐾 𑐳𑑅𑐥𑐶𑑄 𑐳𑐶𑐰𑐵𑐫𑑂 𑐡𑐾𑐱 𑐡𑐫𑐾𑐎𑐾 𑐳𑑅𑐥𑐶𑑄 𑐳𑐸𑑄 𑐩𑐰𑑅 𑑋 𑐀𑐣 𑐮𑐜𑐵𑐎𑐸𑐟 𑐴𑐟𑑂𑐫𑐵𑐬𑐵 𑐰 𑐏𑐸𑑃 𑐜𑐵𑐎𑐵𑐟 𑐳𑐶𑐰𑐵𑐫𑑂 𑐱𑐶𑐎𑑂𑐲𑐶𑐟 𑐰 𑐧𑐸𑐡𑑂𑐢𑐶𑐖𑐷𑐰𑐷𑐟 𑐩𑐡𑐸 𑑋 𑐐𑐬𑐷𑐧 𑐣𑐵𑐒𑑂𑐐𑐵𑐟 𑐳𑐶𑐰𑐵𑐫𑑂 𑐰𑑂𑐫𑐵𑐥𑐵𑐬𑐷 𑐰 𑐄𑐡𑑂𑐫𑑀𑐐𑐷𑐟 𑐩𑐡𑐸 𑑋 𑐣𑑂𑐴𑑂𑐫𑐵𑐠𑐵𑐫𑑂 𑐳𑑂𑐰𑐳𑐵𑑄 𑐎𑐾𑐰𑐮 𑐬𑑀𑐐, 𑐳𑐩𑐳𑑂𑐫𑐵, 𑐀𑐨𑐵𑐰, 𑐨𑑀𑐎𑐩𑐬𑐷, 𑐀𑐣𑑂𑐢𑐎𑐵𑐬 𑐰 𑐮𑑂𑐰𑐵𑐥𑐸 𑐖𑐎 𑑋 𑐠𑑅𑐰𑑄 𑐠𑑅𑐴𑐾 𑐮𑑂𑐰𑐵𑐣𑐵 𑐔𑑂𑐰𑐣 𑑋 𑐠𑐖𑑂𑐫𑐵𑐐𑐸 𑐡𑐸𑐬𑑂𑐡𑐱𑐵 𑐗𑐣 𑐗𑐣 𑐀𑐥𑑂𑐰𑐫𑐵 𑐰𑐮 𑑋 𑐀𑐣𑑂𑐣 𑐳𑐫𑐾𑐎𑐾𑐐𑐸 𑐧𑐸𑑃 𑐫𑐸𑐡𑑂𑐢 𑐨𑐹𑐩𑐶𑐃 𑐥𑐬𑐶𑐞𑐟 𑐖𑐸𑐫𑐵𑐧𑐶𑐮 𑑋 𑐱𑐶𑐎𑑂𑐲𑐵 𑐎𑐵𑐫𑐾𑐐𑐸 𑐳𑑂𑐎𑐹𑐮 𑐎𑑂𑐫𑐵𑐩𑑂𑐥𑐳 𑐮𑐜𑐵𑐎𑐸𑐟𑐫𑑂𑐐𑐸 𑐟𑐵𑐮𑐶𑐩 𑐎𑐵𑐫𑐾𑐐𑐸 𑐠𑐵𑐫𑑂 𑐖𑐸𑐫𑐵𑐧𑐶𑐮 𑑋 𑐎𑐵𑐣𑐹𑐣 𑐰 𑐣𑑂𑐫𑐵𑐫 𑐧𑐶𑐂𑐐𑐸 𑐀𑐡𑐵𑐮𑐟 𑐏𑐸𑑃 𑐜𑐵𑐎𑐵 𑐰 𑐨𑑂𑐬𑐲𑑂𑐚𑐵𑐔𑐵𑐬𑐟𑐫𑑂𑐐𑐸 𑐀𑐜𑑂𑐜𑐵 𑐖𑐸𑐂𑐢𑐸𑑄𑐎𑐮 𑑋 𑐳𑑄𑐳𑐡 𑐨𑐰𑐣 𑐖𑐣𑐟𑐵 𑐳𑑂𑐫𑐵𑐣𑐵 𑐑𑐸𑐳 𑐣𑐫𑐾𑐐𑐸 𑐰 𑐰𑐶𑐡𑐾𑐱𑐟𑐫𑑂𑐐𑐸 𑐃𑐱𑐵𑐬𑐵𑐫𑑂 𑐥𑑂𑐫𑐵𑐏𑑄 𑐮𑑂𑐴𑐸𑐂𑐐𑐸 𑐡𑐧𑐸 𑐖𑐸𑐂𑐢𑐸𑑄𑐎𑐮 𑑋 𑐡𑐾𑐱 𑐕𑐐𑐸𑐮𑐶𑑄 𑐀𑐣𑑂𑐢𑐎𑐵𑐬 𑐧𑐵𑐴𑐾𑐎 𑐖𑑅 𑐐𑐣𑑄 𑐏𑐣𑐾𑐩𑐡𑐸 𑑋 𑐕𑐳𑐵𑑅 𑐣𑐫𑐾𑐟 𑐣𑑄 𑐖𑐣𑐟𑐵𑐫𑐵𑐟 𑐠𑐵𑐎𑐸𑐫𑐵 𑐰𑐮 𑑋 𑐣𑐫𑐾𑐐𑐸 𑐩𑐡𑐫𑐵 𑐨𑑀𑐎𑐩𑐬𑐷 𑐰 𑐎𑐸𑐥𑑀𑐲𑐞𑑄 𑐖𑐣𑐟𑐵 𑐎𑐰𑑄 𑐖𑐸𑐫𑐵𑐔𑑂𑐰𑐣 𑐳𑐵 𑐣𑐾𑐟𑐵𑐟 𑐏𑑂𑐫𑐵𑐐𑑂𑐰𑐵𑐬𑐵 𑐠𑐾𑑄 𑐮𑑂𑐴𑑂𑐣𑐵𑐔𑑂𑐰𑐣 𑑋
𑐡𑐾𑐱𑐫𑐵 𑐠𑐖𑑂𑐫𑐵𑐐𑐸 𑐡𑐸𑐬𑑂𑐡𑐱𑐵 𑐏𑐣𑐵 𑐖𑑅𑐮𑐵𑐏𑑅𑐮𑐵 𑐡𑐾𑐱𑑄 𑐡𑐵𑐄 𑐳𑑂𑐰𑐫𑐵𑐔𑑂𑐰𑐣 𑑋 𑐠𑑅𑐐𑐸 𑐡𑐾𑐱𑐫𑐵 𑐧𑐵𑐬𑐾 𑐠𑑁𑑄 𑐎𑐟𑑅 𑐡𑐾𑐱𑑄 𑐣𑐶𑐬𑑂𑐞𑐫 𑐫𑐵𑐂𑐐𑐸 𑐖𑐸𑐫𑐵𑐰𑐮 𑑋 𑐀𑐫𑑂𑐣𑑄 𑐡𑐎𑑂𑐰 𑐔𑐸𑐥𑐔𑐵𑐥 𑐖𑐸𑐫𑐵 𑐳𑐴𑐫𑐵𑐣𑐵 𑐔𑑂𑐰𑐣𑐾𑐟 𑐧𑐵𑐢𑑂𑐫 𑐖𑐸𑐮 𑑋 𑐠𑑅𑐐𑐸 𑐢𑐂𑐐𑐸 𑐕𑐸𑑄 𑐩𑐡𑐫𑐵 𑐰𑐣 𑑋 𑐣𑑂𑐴𑑂𑐫𑐵𑐐𑐸 𑐏𑑃𑐫𑑂 𑐣𑑄 𑐰𑐶𑐡𑐾𑐱𑐷 𑐴𑐳𑑂𑐟𑐎𑑂𑐲𑐾𑐥 𑐖𑐸𑐫𑐵𑐰𑐮 𑑋 𑐡𑐾𑐱𑐫𑐵 𑐐𑐵𑑄 𑐱𑐴𑐬, 𑐖𑐣𑐟𑐵, 𑐢𑐬𑑂𑐩 , 𑐳𑐳𑑂𑐎𑐺𑐟𑐶 𑐟𑐎𑑂𑐎𑑄 𑐎𑐟𑐫𑐵𑐐𑐸 𑐖𑐸𑐮 𑑋 𑐴𑐵𑑅𑐣𑐵𑑅 𑐩𑐡𑐸𑐥𑐶𑑄 𑐠𑐾𑑄 𑐩𑑂𑐰𑐵𑐣𑐵 𑐔𑑂𑐰𑐣𑐾𑐟 𑐖𑐣𑐟𑐵 𑐖𑐎 𑐩𑐏𑐸 𑐣𑐾𑐟𑐵𑐟 𑐟𑐎𑑂𑐎𑑄 𑐧𑐵𑐢𑑂𑐫 𑐖𑐸𑐫𑐵𑐔𑑂𑐰𑐣𑐾 𑐩𑐵𑐮 𑑋 𑐀𑐧𑐮𑐾 𑐟𑐶𑐣𑐷 𑐰𑐷𑐬 𑐧𑐴𑐵𑐡𑐸𑐬𑑄 𑐰𑐵𑑅𑐔𑐵𑐫𑐾𑐎𑐮 𑐎𑐶 𑐠𑐩𑑂𑐴𑐾𑐳𑐶𑐣𑑄 𑐰𑐵𑑅𑐩𑐔𑐵𑐫𑐾𑐎 𑐴𑐾 𑐡𑐾𑐱 𑐎𑐟𑑅𑐫𑐵𑐟 𑐩𑐷 𑐢𑐹𑑄𑐎𑐵𑑅𑐐𑐸 𑐏𑑃 𑑋 𑐏𑑅 𑐡𑐾𑐱 𑐩𑐶𑐫𑐵 𑐩𑑂𑐰𑐵𑐣𑐵 𑐔𑑂𑐰𑑄𑐥𑐶𑑄 𑐩𑐣𑐹𑐟, 𑐣𑑄 𑐠𑑅𑐐𑐸 𑐡𑐾𑐱𑐫𑐵 𑐖𑐣𑐟𑐵 𑐖𑐸𑐫𑐵 𑐩𑑂𑐰𑐵𑐫𑑂 𑐦𑐟 𑑋 𑐣 𑐟 𑐎𑐟 𑐡𑐾𑐱𑐫𑐵 𑐖𑐸𑐫𑐵 𑐩𑑂𑐰𑐵𑐫𑑂 𑐦𑐟 𑑋 𑐧𑐳𑑂 𑐥𑐱𑐸 𑐳𑐩𑐵𑐣 𑐖𑐷𑐰𑐣 𑐴𑐣𑐵𑐔𑑂𑐰𑐣 𑑋 𑐎𑐾𑐰𑐮 𑐥𑐱𑐸 𑐳𑐬𑐴 𑐡𑐾𑐱 𑐳𑑂𑐫𑐵𑐣𑐵 𑐩𑑂𑐰𑐵𑐣𑐵 𑐔𑑂𑐰𑐣 𑑋
(𑐣𑐾𑐰𑐵𑑅 𑐀𑐩𑐾𑐬𑐶𑐎𑐣 𑐡𑐧𑐸 𑐳𑐶𑐎𑐵𑐐𑑀 𑐣𑐾𑐰𑐵𑑅 𑐣𑐾.𑐳𑑄. 𑑑𑑑𑑓𑑒)