𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐮𑐶𑐥𑐶 𑐳𑐩𑑂𑐩𑐾𑐮𑐣𑐫𑑂 𑐬𑐘𑑂𑐖𑐣𑐵 𑐧𑐵𑐬𑐾 𑐣𑑂𑐴𑐵𑐥𑐵𑑄𑐏𑐸𑐳𑐷 𑐔𑐬𑑂𑐔𑐵

𑐫𑐾𑑃 – 𑐠𑑁𑑄𑐎𑐣𑑂𑐴𑐫𑑂 𑐡𑐾𑐫𑑂𑐫𑐵 𑐠𑐷𑐠𑐷 𑐠𑐵𑐳𑐫𑑂 𑐎𑐮𑐵𑐟𑑂𑐩𑐎 𑐁𑐏𑑅 𑐔𑑂𑐰𑐫𑐵𑑅 𑐥𑑂𑐬𑐔𑐵𑐬 𑐖𑐸𑐫𑐵𑐔𑑂𑐰𑑄𑐐𑐸 𑐬𑐘𑑂𑐖𑐣𑐵 𑐮𑐶𑐥𑐶 𑐖𑐵𑐥𑐵𑐣𑐫𑑂 𑐖𑐹𑐐𑐸 𑐰𑐶𑐱𑑂𑐰 𑐎𑑂𑐫𑐵𑐮𑐶𑐐𑑂𑐬𑐵𑐦𑐷 𑐳𑐩𑑂𑐩𑐾𑐮𑐣𑐫𑑂 𑐳𑐎𑐳𑑂𑐫𑐵𑑄 𑐟𑐵𑐬𑐶𑐦𑐫𑐵 𑐰𑐶𑐲𑐫 𑐖𑐹𑐐𑐸 𑐡𑐸 𑑋 𑐖𑐵𑐥𑐵𑐣𑐫𑑂 𑐣𑐎𑐟𑐶𑐣𑐶 𑐎𑑂𑐰𑐔𑐵𑑅𑐐𑐸 𑐰𑐶𑐱𑑂𑐰𑐫𑐵 𑐠𑐷𑐠𑐷 𑐁𑐏𑑅𑐫𑐵 𑐎𑑂𑐫𑐵𑐮𑐶𑐐𑑂𑐬𑐵𑐦𑐷 𑐫𑐵𑐂𑐥𑐶𑐣𑐶 𑐳𑐩𑑂𑐩𑐾𑐮𑐣𑐫𑑂 𑐣𑐾𑐥𑐵𑑅𑐥𑐵𑐏𑐾𑑄 𑐧𑑂𑐰𑐟𑐶 𑐎𑐵𑑅 𑐰𑑄𑐥𑐶𑑄 𑐁𑐣𑐣𑑂𑐡𑐎𑐸𑐩𑐵𑐬 𑐩𑐴𑐬𑑂𑐖𑐣 𑐰 𑐳𑐸𑐣𑐶𑐟𑐵 𑐜𑑄𑐐𑑀𑐮𑑄 𑐬𑐘𑑂𑐖𑐣𑐵 𑐮𑐶𑐥𑐶 𑐧𑐵𑐬𑐾 𑐠𑑅𑐥𑐶𑐣𑐶 𑐥𑑂𑐬𑐳𑑂𑐟𑐸𑐟𑐷𑐎𑐬𑐞 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐰𑐫𑑂𑐎𑑅𑐥𑐶𑑄𑐳𑑄 𑐬𑐘𑑂𑐖𑐣𑐵 𑐮𑐶𑐥𑐶𑐫𑐵 𑐎𑐮𑐵𑐟𑑂𑐩𑐎 𑐥𑐎𑑂𑐲, 𑐠𑐸𑐎𑐶𑐫𑐵 𑐩𑐴𑐟𑑂𑐰, 𑐠𑑂𑐰 𑐁𑐏𑑅 𑐔𑑂𑐰𑐫𑐾𑐐𑐸 𑐟𑐬𑐶𑐎𑐵 𑐰 𑐠𑑁𑑄𑐎𑐣𑑂𑐴𑐫𑑂 𑐮𑑂𑐫𑐵𑐫𑑂𑐩𑑂𑐴𑐟𑐫𑑂 𑐡𑐠𑐸𑐂 𑐖𑐸𑐫𑐵𑐔𑑂𑐰𑑄𑐐𑐸 𑐬𑐘𑑂𑐖𑐣𑐵 𑐮𑐶𑐥𑐶𑐫𑐵 𑐥𑐸𑐣𑐬𑑂𑐖𑐵𑐐𑐬𑐞 𑐧𑐵𑐬𑐾 𑐀𑐣 𑐔𑐬𑑂𑐔𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋𑐰𑐫𑑂𑐎𑑅𑐥𑐶𑐣𑐶 𑐥𑑂𑐬𑐳𑑂𑐟𑐸𑐟𑐷𑐎𑐬𑐞 𑐮𑐶𑐥𑐵 𑐀𑐣 𑐧𑑂𑐰𑐟𑐶 𑐎𑐵𑑅 𑐰𑐫𑐵𑐔𑑂𑐰𑑄𑐥𑐶𑑄 𑐁𑐥𑐵𑐮𑑄 𑐳𑐴𑐨𑐵𑐐𑐷𑐟𑐫𑑂𑐳𑑄 𑐠𑑂𑐰 𑐧𑐵𑐬𑐾 𑐳𑐷𑐎𑐾 𑐏𑐣𑐵𑑅 𑐮𑐳𑐟𑐵 𑐥𑑂𑐰𑑄𑐎𑐹𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑑅 𑐥𑑂𑐫𑐣𑑂𑐴𑐸 𑐟𑐎 𑐖𑐹𑐐𑐸 𑐏𑑅𑐳𑐵 𑐣𑐾𑐥𑐵𑑅𑐫𑐵 𑐥𑑂𑐬𑐟𑐶𑐣𑐶𑐢𑐶𑐥𑐶𑑄𑐳𑑄 𑐏𑐵𑐮𑐷𑐐𑐸 𑐂𑐮𑐫𑑂 𑐀𑐣 𑐰𑐫𑐵𑐔𑑂𑐰𑑄𑐥𑐶𑑄 𑐰𑐶𑐡𑐾𑐱𑐷 𑐳𑐴𑐨𑐵𑐐𑐷𑐟𑐫𑑂𑐐𑐸 𑐣𑐵𑑄 𑐬𑐘𑑂𑐖𑐣𑐵 𑐮𑐶𑐥𑐶𑑄 𑐔𑑂𑐰𑐫𑐵𑑅 𑐂𑐣𑐵 𑐧𑐷𑐐𑐸, 𑐬𑐘𑑂𑐖𑐣𑐵 𑐁𑐏𑑅 𑐔𑑂𑐰𑐫𑐵𑐟𑑅𑐐𑐸 𑐧𑑂𑐫𑐵𑐐, 𑐎𑐥 𑐁𑐡𑐶 𑐄𑐥𑐴𑐵𑐬 𑐧𑐷𑐐𑐸 𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐰𑐶𑐡𑐾𑐱𑐷𑐟 𑐣𑐵𑐥𑐮𑐵𑐫𑐾𑐐𑐸 𑐗𑑂𑐰𑐮𑐫𑑂 𑐰𑐫𑑂𑐎𑑅𑐥𑐶𑑄𑐳𑑄 𑐁𑑅 𑐬𑐘𑑂𑐖𑐣𑐵 𑐮𑐶𑐥𑐶𑐫𑐵𑐟 𑐫𑐸𑐣𑐶𑐎𑑀𑐜𑐫𑑂 𑐫𑑄𑐎𑐾𑐩𑐵𑑅𑐐𑐸 𑐁𑐰𑐱𑑂𑐫𑐎𑐟𑐵 𑐧𑐵𑐬𑐾 𑐎𑑃𑐳𑐾𑑄 𑐠𑐸𑐎𑐶𑐫𑐵 𑐧𑐵𑐬𑐾 𑐥𑐴𑐮 𑐫𑐵𑐣𑐵 𑐧𑐷𑐟 𑐣𑑄 𑐳𑐎𑐳𑐶𑐟𑑄 𑐂𑐣𑐵𑐥 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐠𑐖𑑂𑐫𑐵𑑅𑐐𑐸 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐳𑐩𑑂𑐩𑐾𑐮𑐣𑐫𑑂 𑐬𑐘𑑂𑐖𑐣𑐵 𑐮𑐶𑐥𑐶 𑐧𑐵𑐬𑐾 𑐠𑐠𑐾 𑐔𑐬𑑂𑐔𑐵 𑐖𑐹𑐐𑐸 𑐠𑑂𑐰𑐴𑐾 𑐣𑑂𑐴𑐵𑐥𑐵𑑄𑐏𑐸𑐳𑐷 𑐏𑑅 𑑋 𑐠𑑂𑐰 𑐮𑐶𑐥𑐶𑐫𑐵𑐟 𑐳𑐴𑐨𑐵𑐐𑐷𑐟 𑐁𑐥𑐵𑑅𑐳𑐶𑐣𑑄 𑐥𑑂𑐬𑐱𑑄𑐳𑐵 𑐫𑐵𑑅𑐐𑐸 𑐏𑑃 𑐳𑐸𑐣𑐶𑐟𑐵 𑐩𑐴𑐬𑑂𑐖𑐣𑑄 ‘𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳’ 𑐫𑐵𑐟 𑐎𑐣𑐵𑐡𑐶𑐮 𑑋