𑐏𑑂𑐰𑐥 – 𑐏𑑂𑐰𑐥𑐫𑐵 𑐡𑐎𑑂𑐰𑑄 𑐳𑑂𑐎𑐸𑐮𑐫𑑂 𑐁𑐰𑑄𑐮𑐶 𑐣𑐾𑐥𑐵𑐮 𑐮𑐶𑐥𑐶, 𑐣𑐾𑐥𑐵𑐮𑐨𑐵𑐲𑐵 𑐰 𑐳𑑄𑐳𑑂𑐎𑐺𑐟𑐶𑐫𑐵 𑐰𑐶𑐲𑐫 𑐀𑐣𑐶𑐰𑐵𑐬𑑂𑐫 𑐫𑐵𑐂𑐐𑐸 𑐖𑐹𑐐𑐸 𑐡𑐸 𑑋 𑐏𑑂𑐰𑐥 𑐣𑐐𑐬𑐥𑐵𑐥𑑂𑐬𑐩𑐸𑐏 𑐳𑐸𑐣𑐷𑐮 𑐥𑑂𑐬𑐖𑐵𑐥𑐟𑐶𑑄 𑐁𑑅 𑐏𑑂𑐰𑐥𑐫𑐵 𑐡𑐎𑑂𑐰𑑄 𑐳𑑂𑐎𑐸𑐮𑐫𑑂 𑐣𑐾𑐥𑐵𑐮 𑐮𑐶𑐥𑐶, 𑐣𑐾𑐥𑐵𑐮𑐨𑐵𑐲𑐵 𑐰 𑐳𑑄𑐳𑑂𑐎𑐺𑐟𑐶𑐫𑐵 𑐰𑐶𑐲𑐫 𑐀𑐢𑑂𑐫𑐵𑐥𑐣 𑐀𑐣𑐶𑐰𑐵𑐬𑑂𑐫 𑐬𑐸𑐥𑑄 𑐮𑐵𑐐𑐹 𑐫𑐵𑐫𑐾𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐏𑑅 𑑋

𑐣𑐾𑐥𑐵𑐮𑐨𑐵𑐲𑐵, 𑐮𑐶𑐥𑐶 𑐰 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶 𑐣𑐾𑐰𑐵𑑅 𑐖𑐵𑐟𑐶𑐫𑐵 𑐥𑐴𑐶𑐔𑐵𑐣 𑐏𑑅 𑐢𑐵𑐳𑐾𑑄 𑐄𑐎𑐶𑐫𑐵 𑐳𑑄𑐬𑐎𑑂𑐲𑐞 𑐫𑐵𑐫𑐾 𑐩𑐦𑐸𑐟 𑐢𑐵𑑅𑐳𑐵 𑐣𑐾𑐰𑐵𑑅𑐟𑐫𑑂 𑐀𑐳𑑂𑐟𑐶𑐟𑑂𑐰 𑐴𑐾 𑐣𑑂𑐴𑐣𑐵 𑐰𑐣𑐾𑐦𑐸𑐐𑐸 𑐏𑐟𑐬𑐵 𑐡𑐸𑐐𑐸 𑐣𑑄 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮 𑑋 𑐏𑑂𑐰𑐥 𑐩𑐶𑐜𑐶𑐫𑐵 𑐳𑐬𑑂𑐎𑐮𑐫𑐵 𑐥𑑂𑐬𑐳𑑂𑐟𑐸𑐟𑐶 𑐎𑐠𑑄 𑐨𑐵𑐡𑐐𑐵𑐄𑑃 𑐚𑐾𑐮𑐶𑐨𑐶𑐖𑐣 𑐰 𑐣𑐩𑐳𑑂𑐟𑐾 𑐏𑑂𑐰𑐥 𑐚𑐾𑐮𑐶𑐨𑐶𑐖𑐣𑐫𑑂 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐖𑑂𑐫𑐵𑐗𑑂𑐰𑑅 ‘𑐗𑐷 𑐀𑐖𑐶 𑐧𑐵𑐖𑑂𑐫𑐵’ 𑐣𑐷𑐣𑑂𑐫𑐵𑐐𑐹 𑐧𑑂𑐰 𑐠𑑂𑐫𑑄𑐐𑐸 𑐮𑐳𑐟𑐵𑐫𑑂 𑐖𑐹𑐐𑐸 𑐴𑐣𑐵𑐖𑑂𑐫𑐵𑐗𑑂𑐰𑐮𑐫𑑂 𑐣𑐰𑐵𑐳𑐾𑑄 𑐥𑑂𑐬𑐩𑐸𑐏 𑐥𑑂𑐬𑐖𑐵𑐥𑐟𑐶𑑄 𑐄𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑐰𑐵𑐳𑐾𑑄 𑐰𑐫𑑂𑐎𑐮𑑄 𑐳𑐬𑐎𑐵𑐬𑑄 𑐐𑐸𑐠𑐶 𑐰𑐶𑐢𑐾𑐫𑐎𑐫𑑂 𑐩𑑀𑐴𑐶𑐫𑐵𑐣𑐷 𑐴𑐎, 𑐬𑐿𑐟𑐵𑐣𑐷𑐫𑐵 𑐀𑐢𑐶𑐎𑐵𑐬 𑐠𑐾𑑄𑐖𑑂𑐫𑐵𑑅𑐐𑐸 𑐰𑐶𑐲𑐫 𑐡𑐸𑐠𑑂𑐫𑐵𑐎𑐵𑑅 𑐴𑐵𑐎𑐣𑑄 𑐰𑐶𑐢𑐾𑐫𑐎 𑐳𑐡𑐣𑐫𑑂 𑐴𑐫𑐾𑐩𑐵𑑅𑐐𑐸 𑐢𑐵𑐬𑐞𑐵 𑐟𑐫𑐵𑐡𑐶𑐮 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐰𑐫𑑂𑐎𑐮𑑄 𑑑𑑐𑑖 𑐡𑑃 𑐡𑐸𑐩𑑂𑐴 𑐨𑐶𑐩𑐠𑐎𑐸 𑐥𑑂𑐬𑐖𑐵𑐥𑐟𑐶 𑐰 𑑑𑑐𑑐 𑐡𑑃 𑐡𑐸𑐩𑑂𑐴 𑐐𑑀𑐥𑐳𑐶𑑄 𑐧𑑀𑐫𑐖𑐸 𑐡𑑀𑐳𑐮𑑂𑐮𑐵𑑄 𑐣𑑂𑐫𑐫𑐾𑐎𑐵𑑅 𑐴𑐣𑐵𑐡𑐷𑐐𑐸 𑐏𑑅𑐳𑐵 𑐎𑐮𑐵𑐎𑐵𑐬, 𑐥𑑂𑐬𑐵𑐰𑐶𑐢𑐶𑐎 𑐰 𑐐𑑂𑐰𑐵𑐴𑐵𑐮𑐶𑐩𑐶𑐥𑐶𑑄 𑐳𑐸𑐨𑐵𑐫𑑂 𑐥𑑁 𑐣𑑄 𑐮𑑅𑐮𑑂𑐴𑐵𑐣𑐵𑐡𑐶𑐮 𑑋

𑐳𑐬𑑂𑐎𑐮𑐫𑐵 𑐀𑐢𑑂𑐫𑐎𑑂𑐲 𑐬𑐵𑐖𑐸 𑐩𑐵𑐣𑐣𑑂𑐢𑐬𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐣𑐵𑑄𑐖𑐵𑑅𑐥𑐶𑑄 𑐎𑐮𑐵𑐎𑐵𑐬 𑐁𑐱𑐵𑐎𑐵𑐖𑐷 𑐠𑐎𑐸, 𑐱𑑂𑐫𑐵𑐩𑐳𑐸𑐣𑑂𑐡𑐬 𑐱𑐶𑐮𑑂𑐥𑐎𑐵𑐬, 𑐣𑐩𑐳𑑂𑐟𑐾 𑐏𑑂𑐰𑐥 𑐚𑐾𑐮𑐶𑐨𑐶𑐖𑐣𑐫𑐵 𑐆𑐲𑐶𑐎𑐾𑐱 𑐱𑑂𑐬𑐾𑐲𑑂𑐛, 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐟𑑅𑐩𑐸𑑃𑐖𑑂𑐫𑐵 𑐩𑐹𑐐𑐸𑐠𑐶𑐫𑐵 𑐣𑐵𑐫𑑅 𑐔𑐣𑑂𑐡𑑂𑐬𑐧𑐴𑐵𑐡𑐸𑐬 𑐄𑐮𑐎 𑐮𑐐𑐵𑐫𑐟𑑄 𑐠𑑅𑐠𑑅𑐐𑐸 𑐣𑐸𑐐𑑅𑐏𑑃 𑐥𑑂𑐰𑑄𑐎𑐵𑐡𑐷𑐐𑐸 𑐏𑑅 𑑋