𑐎𑐵𑐛𑐩𑐵𑐜𑑁𑑄 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐳 𑐣𑐾𑐥𑐵𑐮𑐨𑐵𑐲𑐵𑐫𑐵 𑐥𑐷𑐖𑐷𑐜𑐷 𑐎𑐎𑑂𑐲𑐵 𑐣𑑂𑐴𑑂𑐫𑐵𑐎𑐷𑐐𑐸

𑐎𑐵𑐛𑐩𑐵𑐜𑑁𑑄 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐥𑐵𑐏𑐾𑑄 𑐣𑐾𑐥𑐵𑐮𑐨𑐵𑐲𑐵 𑐱𑐶𑐎𑑂𑐲𑐞𑐫𑐵 𑐣𑐶𑐟𑐶𑑄 𑐩𑐵𑐮𑐵𑐔𑑂𑐰𑑄𑐐𑐸 𑐣𑐾𑐥𑐵𑐮𑐨𑐵𑐲𑐵 𑐱𑐶𑐎𑑂𑐲𑐵 𑐳𑐩𑑂𑐧𑐣𑑂𑐢𑐷 𑐥𑑀𑐲𑑂𑐚 𑐐𑑂𑐬𑐵𑐖𑐸𑐊𑐜 𑐜𑐶𑐥𑑂𑐮𑑀𑐩𑐵 (𑐥𑐷𑐖𑐷𑐜𑐷) 𑐎𑐎𑑂𑐲𑐵 𑐣𑑂𑐴𑑂𑐫𑐵𑐎𑐾𑐐𑐸 𑐟𑐫𑐵𑐬𑐷 𑐫𑐵𑑅𑐐𑐸 𑐡𑐸 𑑋

𑐩𑑂𑐴𑐶𑐐𑑅 𑐧𑐸𑐢𑐰𑐵𑑅 𑐴𑐵𑐟𑑂𑐟𑐷𑐰𑐣𑐫𑑂 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑐵 𑐠𑑅𑐐𑐸 𑐖𑑂𑐫𑐵𑐎𑐸𑐠𑐶𑐂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐠𑐸𑐐𑐸 𑐏𑑃𑐫𑐵 𑐖𑐵𑐣𑐎𑐵𑐬𑐷 𑐧𑑂𑐫𑐹𑐐𑐸 𑐏𑑅 𑑋

𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐥𑐵𑐏𑐾𑑄 𑐣𑐾𑐥𑐵𑐮𑐨𑐵𑐲𑐵𑐮𑐶𑐳𑐾𑑄 𑐟𑐵𑐩𑐵𑐒 𑐨𑐵𑐲𑐵𑐫𑐵 𑐣𑑄 𑐎𑑀𑐬𑑂𑐲 𑐟𑑅𑐐𑐸 𑐡𑐸 𑑋

𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐥𑐵𑐏𑐾𑑄 𑐠𑐠𑐾 𑐖𑐵𑐣𑐎𑐵𑐬𑐷 𑐧𑐶𑐂𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶𑐫𑐵 𑐔𑐵𑐣𑑂𑐳𑐮𑐬 𑐩𑐮𑑂𑐮 𑐎𑐾 𑐳𑐸𑐣𑑂𑐡𑐬, 𑐧𑐵𑐐𑐩𑐟𑐷 𑐥𑑂𑐬𑐡𑐾𑐱𑐫𑐵 𑐳𑐵𑑄𑐳𑐡 𑐬𑐵𑐩𑐎𑐺𑐲𑑂𑐞 𑐔𑐶𑐟𑑂𑐬𑐎𑐵𑐬, 𑐣𑐾𑐥𑐵𑐮𑐨𑐵𑐲𑐵 𑐎𑐾𑐣𑑂𑐡𑑂𑐬𑐷𑐫 𑐰𑐶𑐨𑐵𑐐𑐫𑐵 𑐥𑑂𑐬𑐩𑐸𑐏 𑐳𑐴–𑐥𑑂𑐬𑐵𑐢𑑂𑐫𑐵𑐥𑐎 𑐜𑐵. 𑐬𑐵𑐖𑐣𑐮𑐵𑐮 𑐖𑑀𑐱𑐷, 𑐥𑐸𑐮𑐵𑑄𑐩𑑂𑐴 𑐥𑑂𑐬𑐩𑐸𑐏 𑐥𑑂𑐬𑐵.𑐜𑐵. 𑐌𑐩𑐎𑐵𑐬𑐾𑐱𑑂𑐰𑐬 𑐱𑑂𑐬𑐾𑐲𑑂𑐛, 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫 𑐜𑐷𑐣 𑐥𑑂𑐬𑐵.𑐜𑐵. 𑐧𑐵𑐮𑐔𑐣𑑂𑐡𑑂𑐬 𑐮𑐸𑑃𑐂𑐚𑐾𑐮, 𑐥𑑂𑐬𑐵.𑐜𑐵. 𑐴𑐾𑐩𑐬𑐵𑐖 𑐎𑐵𑐦𑑂𑐮𑐾, 𑐱𑐶𑐎𑑂𑐲𑐎 𑐳𑐾𑐰𑐵 𑐁𑐫𑑀𑐐𑐫𑐵 𑐄𑐥𑐳𑐔𑐶𑐰 𑐐𑐞𑐾𑐱𑐥𑑂𑐬𑐳𑐵𑐡 𑐥𑑁𑐜𑐾𑐮, 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐫𑐵 𑐣𑐵𑐫𑑅 𑐥𑐰𑐶𑐟𑑂𑐬 𑐧𑐖𑑂𑐬𑐵𑐔𑐵𑐬𑑂𑐫, 𑐨𑐵𑐲𑐵 𑐁𑐫𑑀𑐐𑐫𑐵 𑐡𑐸𑐖𑑅 𑐳𑐸𑐬𑐾𑐱 𑐩𑐵𑐣𑐣𑑂𑐢𑐬𑐥𑐶𑑄 𑐄𑐥𑐳𑑂𑐠𑐶𑐟 𑐖𑐹𑐐𑐸 𑐏𑑅 𑑋

𑐎𑐵𑐛𑐩𑐵𑐜𑑁𑑄 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫 𑐳𑑄𑐎𑐵𑐫𑐥𑐵𑐏𑐾𑑄 𑐣𑑂𑐴𑑂𑐫𑐵𑐎𑐹𑐐𑐸 𑐠𑐸𑐐𑐸 𑐎𑑀𑐬𑑂𑐲 𑐩𑐸𑐎𑑂𑐎𑑄 𑐡𑐔𑑂𑐕𑐶𑐫𑐵 𑐏𑑅𑐳𑐵 𑐣𑐶𑐐𑐹 𑐳𑐾𑐩𑐶𑐳𑑂𑐚𑐬 𑐫𑐵𑐫𑐾𑐩𑐵𑑅𑐐𑐸 𑐰𑑂𑐫𑐰𑐳𑑂𑐠𑐵 𑐫𑐵𑐣𑐵𑐟𑑅𑐐𑐸 𑐡𑐸 𑑋

𑐣𑑂𑐴𑑂𑐫𑐵𑐐𑑂𑐐𑐸 𑐰𑐶𑐲𑐫𑐳 𑐣𑑄 𑐧𑐶𑐊 𑐥𑐵𑐳 𑐖𑐸𑐂𑐢𑐸𑑄𑐎𑐹𑐥𑐶𑐣𑑂𑐳𑑄 𑐧𑑂𑐰𑐣𑐾𑐦𑐂𑐐𑐸 𑐏𑑃 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑑄 𑐢𑐵𑑅𑐐𑐸 𑐡𑐸 𑑋

𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑑄 𑐢𑐵𑑅𑐎𑐠𑑄 𑐠𑐸𑐎𑐶𑐫𑐵 𑐎𑐎𑑂𑐲𑐵 𑐀𑐣𑐮𑐵𑐂𑐣𑐥𑐵𑐏𑐾𑑄 𑐖𑐸𑐂𑐐𑐸 𑐟𑐬 𑐖𑐵𑑃𑐔 𑐨𑑁𑐟𑐶𑐎 𑐎𑐠𑑄 𑐖𑐸𑐂𑐐𑐸 𑐰 𑐕𑐐𑐹 𑐎𑑀𑐬𑑂𑐲𑐫𑐵 𑐣𑐶𑐟𑐶𑑄 𑑑 𑐮𑐏 𑑔𑑐 𑐴𑐖𑐵𑐬 𑐟𑐎𑐵 𑐟𑐸𑐂𑐐𑐸 𑐖𑐹𑐐𑐸 𑐡𑐸 𑑋