𑐀𑐣𑐮𑐵𑐂𑐣 𑐳𑑄𑐳𑑂𑐎𑐬𑐞𑐫𑑂 𑐣𑐾𑐰𑐵𑑅 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐘𑐵𑐣𑐎𑑀𑐱

𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶 𑐰 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐖𑐵𑐣𑐵𑑅 𑐥𑐶𑐡𑑄𑐐𑐸 “𑐣𑐾𑐰𑐵𑑅 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐘𑐵𑐣𑐎𑑀𑐱” 𑐫𑐵𑐟 𑐀𑐗 𑐀𑐥𑑂𑐰𑑅 𑐖𑑂𑐰𑐮𑑄 𑐰 𑐳𑐸𑐔𑑄 𑐡𑐸𑐠𑑂𑐫𑐵𑐎𑐵𑑅 𑐀𑐣𑐮𑐵𑐂𑐣 𑐩𑐵𑐢𑑂𑐫𑐩𑑄 𑐥𑐶𑐠𑐣𑐾𑐐𑐸 𑐖𑑂𑐫𑐵 𑐣𑑂𑐴𑑂𑐫𑐵𑐎𑐸𑐐𑐸 𑐡𑐸 𑑋 𑐠𑐸𑐐𑐸 𑐀𑐣𑐮𑐵𑐂𑐣 𑐳𑑄𑐳𑑂𑐎𑐬𑐞𑐫𑑂 𑐠𑐷𑐠𑐷 𑐮𑑂𑐰𑑅𑐰𑐣𑐵𑐥𑐸𑐐𑐸 𑐱𑐿𑐮𑐷 𑐰 𑐳𑐾𑐰𑐵 𑐣𑑄 𑐟𑐣𑐵𑑅 𑐫𑑄𑐎𑐾𑐐𑐸𑐫𑐵 𑐮𑐶𑐳𑐾𑐮𑐶𑐳𑐾𑑄 𑐴𑐮𑐶𑑄𑐣𑑂𑐫𑑄𑐎𑐫𑐵 𑐧𑑂𑐰𑑃𑐩𑐶𑐥𑐶𑐣𑑂𑐳𑑄 𑐣𑑄 𑐧𑑂𑐰𑐣𑐾𑐦𑐂𑐎𑐠𑑄 𑐠𑐷𑐠𑐷 𑐨𑐵𑐲𑐵𑑄 𑐨𑐵𑐫𑑂 𑐴𑐶𑐮𑐾𑐐𑐸 𑐖𑑂𑐫𑐵 𑐣𑑄 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐏𑑃 𑐠𑐸𑐎𑐶𑐫𑐵 𑐎𑐖𑐶 𑐀𑐣𑐶𑐮 𑐳𑑂𑐠𑐵𑐥𑐶𑐟𑑄 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐡𑐸 𑑋

𑐣𑐾𑐰𑐵𑑅 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐘𑐵𑐣𑐎𑑀𑐱 𑐀𑐣𑐮𑐵𑐂𑐣 𑐳𑑄𑐳𑑂𑐎𑐬𑐞𑐫𑑂 𑐟𑐣𑐾𑐩𑐵𑑅𑐐𑐸, 𑐨𑐶𑑄𑐎𑐾𑐩𑐵𑑅𑐐𑐸 𑐰 𑐣𑑂𑐴𑐹𑐐𑐸 𑐡𑐸𑐠𑑂𑐫𑐵𑐎𑐾𑐩𑐵𑑅𑐐𑐸 𑐖𑑂𑐰𑐮𑑄 𑐡𑐸𑐳𑐵𑑄 𑐣𑐾𑐰𑐵𑑅 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐘𑐵𑐣𑐎𑑀𑐱𑐫𑐵 𑐰𑐾𑐰𑐳𑐵𑐂𑐚𑐫𑑂 𑐠𑑅𑐩𑑂𑐴𑑄 𑐴𑐾 𑐔𑑂𑐰𑐳𑐸 𑐰𑐵 𑐰𑐶𑐰𑐬𑐞 𑐡𑐸𑐠𑑂𑐫𑐵𑐎𑐵𑐡𑐷𑐟 𑐣𑑄 𑐰𑐫𑐎𑐮𑑄 𑐧𑐸𑐢𑐧𑐵𑐬 𑐖𑐹𑐐𑐸 𑐕𑐐𑐹 𑐖𑑂𑐫𑐵𑐗𑑂𑐰𑐮𑐫𑐰𑑂 𑐳𑐎𑐳𑐶𑐟𑑄 𑐂𑐣𑐵𑐥 𑐫𑐵𑐣𑐵𑐡𑐷𑐐𑐸 𑐡𑐸 𑑋

𑐗𑐷𑐐𑐸 𑐩𑑂𑐴𑐳𑐶𑐎𑐵 𑐜𑐶𑐖𑐶𑐚𑐮 𑐩𑐵𑐢𑑂𑐫𑐩𑐫𑑂 𑐎𑑂𑐰𑐵𑐟𑐸𑐎𑐵 𑐫𑑄𑐎𑐾𑐟 𑐣𑑄 𑐠𑐸𑐎𑐠𑑄𑐫𑐵 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐗𑐷𑐐𑐸 𑐳𑑄𑐳𑑂𑐎𑐺𑐟𑐶 𑐰 𑐐𑑁𑐬𑐰𑐫𑐵 𑐟𑑅𑐢𑑄𑐐𑐸 𑐨𑐞𑑂𑐜𑐵𑐬 𑐖𑐸𑐫𑐵𑑅 𑐰𑐫𑐵𑐔𑑂𑐰𑑄𑐐𑐸 𑐠𑐸𑐎𑐠𑑄𑐫𑐵 𑐖𑑂𑐰𑑅𑐩𑐡𑐸𑐐𑐸 𑐖𑑂𑐫𑐵𑐫𑐵𑐟 𑐀𑐗 𑐧𑐵𑑄𑐮𑐵𑐎 𑐣𑑂𑐴𑑂𑐫𑐵𑐎𑐾𑐐𑐸 𑐟𑐵𑐟𑐸𑐣𑐵 𑐎𑐫𑐵𑑅 ’𑐎𑐣𑑂𑐚𑐾𑐣𑑂𑐚 𑐎𑑂𑐬𑐶𑐊𑐚𑐬’ 𑐥𑐶𑐣𑑂𑐟 𑐰𑑅𑐔𑐵𑐢𑑄𑐐𑐸 𑐕𑐐𑐹 𑐟𑐵𑐮𑐶𑐩 𑐧𑐸𑐢𑐰𑐵𑑅 𑐏𑐾𑐔𑐵𑐥𑐸𑐏𑐸𑐮𑐶𑐂 𑐖𑐹𑐐𑐸 𑐏𑑅 𑑋 𑐄𑐐𑐸 𑐜𑐶𑐖𑐶𑐚𑐮𑐫𑐵 𑐏𑑃𑐫𑐵𑐟 𑐰𑐶𑐱𑐾𑐲 𑐧𑑅 𑐧𑐶𑐫𑐵 𑐣𑑂𑐴𑑂𑐫𑐵𑐎𑐹𑐐𑐸 𑐟𑐵𑐮𑐶𑐩𑐫𑑂 𑐳𑐴𑐨𑐵𑐐𑐶𑐥𑐶𑐣𑑂𑐟 𑐕𑐸𑑄 𑐩𑐸𑐏𑑂𑐫 𑐏𑑃𑐫𑐵 𑐖𑐵𑐣𑐎𑐵𑐬𑐷 𑐧𑐶𑐂𑐐𑐸 𑐖𑑂𑐫𑐵 𑐋𑐮𑐾𑐣 𑐰𑐿𑐮𑑀𑐔𑐣 𑐟𑐸𑐮𑐵𑐢𑐬𑑄 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐰𑐫𑐎𑐮𑑄 𑐧𑐶𑐫𑐵𑐡𑐷𑐐𑐸 𑐖𑐵𑐣𑐎𑐵𑐬𑐷𑐂 𑐖𑑂𑐘𑐵𑐣𑐫𑐵 𑐜𑐶𑐖𑐶𑐚𑐮𑐵𑐂𑐖𑐾𑐱𑐣 𑐫𑐵𑐫𑐐𑐸𑑂 𑐗𑑂𑐰𑐮𑐫𑑂 𑑕 𑐐𑐹 𑐏𑐞𑑂𑐜𑐫𑑂 𑐡𑐸𑐐𑐸 𑐟𑐳𑐎𑑄 𑐴𑐾 𑐩𑐾𑐴𑐣𑐟 𑐫𑐵𑐣𑐵 𑐟𑐫𑐵𑐬 𑐫𑐵𑑅𑐐𑐸 𑐠𑐸𑐐 𑐣𑐾𑐰𑐵𑑅 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐘𑐵𑐣𑐎𑑀𑐱 𑐋𑐟𑐶𑐴𑐵𑐳𑐶𑐎 𑐰 𑐳𑐵𑑄𑐳𑑂𑐎𑐺𑐟𑐶𑐎 𑐖𑐵𑐣𑐎𑐵𑐬𑐷𑐫𑐵𑐟 𑐀𑐣𑐮𑐵𑐂𑐣𑐫𑑂 𑐫𑑄𑐎𑐾𑐐𑐸 𑐖𑑂𑐫𑐵𑐏𑑃𑐫𑐵 𑐖𑐵𑐣𑐎𑐵𑐬𑐷, 𑐳𑐷𑐥 𑐰𑐶𑐎𑐵𑐳𑑅 𑐣𑐾𑐥𑐵𑐮𑐨𑐵𑐲𑐵𑐫𑐵 𑐱𑐸𑐡𑑂𑐢𑐟𑐵 𑐎𑐵𑐫𑐩 𑐫𑐵𑐳𑐾𑑄 𑐣𑑂𑐴𑐸𑐐𑐸 𑐥𑑂𑐬𑐰𑐶𑐢𑐶 𑐕𑑂𑐫𑐮𑐵𑑅 𑐎𑐣𑑂𑐚𑐾𑐣𑑂𑐚 𑐀𑐥𑐜𑐾𑐚 𑐫𑐵𑐫𑐾𑐐𑐸 𑐳𑐷𑐥𑐫𑐵 𑐖𑐵𑐣𑐎𑐵𑐬𑐷, 𑐖𑑂𑐘𑐵𑐣𑐎𑑀𑐱 𑐀𑐥𑐜𑐾𑐚𑑅 𑐗𑐷𑐐𑐸 𑐂𑐟𑐶𑐴𑐵𑐳, 𑐎𑐮𑐵, 𑐰 𑐥𑐬𑐩𑑂𑐥𑐬𑐵𑐫𑐵𑐟 𑐁𑑅𑐫𑐵 𑐃 𑐎𑐠𑑄 𑐀𑐗 𑐥𑐬𑐶𑐲𑑂𑐎𑐺𑐟 𑐫𑐵𑐫𑑂𑐐𑐸 𑐖𑑂𑐫𑐵𑐏𑑃𑐫𑐵 𑐖𑐵𑐣𑐎𑐵𑐬𑐷, 𑐣𑐾𑐰𑐵𑑅 𑐖𑑂𑐘𑐵𑐣𑐎𑑀𑐱𑐫𑐵𑐟 𑐣𑐾𑐥𑐵𑐮𑐨𑐵𑐲𑐵𑐫𑐵 𑐡𑐎𑐮𑐾 𑐟𑑅𑐢𑑄𑐐𑐸 𑐰 𑐨𑐬𑐥𑐬𑑂𑐡𑑀 𑐜𑐶𑐖𑐶𑐚𑐮 𑐩𑐵𑐢𑑂𑐫𑐩 𑐡𑐫𑑂𑐎𑐾𑐐𑐸 𑐖𑐹𑐐𑐸𑐮𑐶𑑄 𑐠𑐸𑐸𑐐𑐸 𑐟𑑅𑐖𑐶𑐐𑐸 𑐖𑑂𑐫𑐵𑐫𑑂 𑐠𑑅𑐐𑐸 𑐃 𑐰 𑐖𑐵𑑃𑐐𑐬 𑐧𑐶𑐫𑐵𑐡𑐷𑐥𑐶𑑄 𑐳𑐎𑐮 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐷𑐥𑐶𑐣𑑂𑐟 𑐟𑑅𑐢𑑄𑐐𑐸 𑐳𑐸𑐨𑐵𑐫𑑂 𑐣𑑄 𑐰𑐫𑐎𑐮𑑄 𑐧𑐶𑐫𑐵𑐡𑐷𑐐𑐸 𑐡𑐸 𑑋

𑐗𑐷𑐐𑐸 𑐨𑐵𑐫𑑂, 𑐗𑐷𑐐𑐸 𑐩𑑂𑐴𑐳𑐶𑐎𑐵 𑐰 𑐗𑐷𑐐𑐸 𑐐𑑁𑐬𑐰𑐫𑐵𑐟 𑐠𑐸𑐎𑐠𑑄 𑐠𑑁𑑄𑐫𑐵 𑐂𑐮𑐫𑑂 𑐜𑐶𑐖𑐶𑐚𑐮 𑐩𑐵𑐢𑑂𑐫𑐩𑑄 𑐣𑑄 𑐣𑑂𑐴𑑂𑐫𑐵𑐎𑐵 𑐫𑑄𑐎𑐾𑐐𑐸 𑐟𑐔𑑂𑐰𑐟𑑄 𑐁𑐰𑐱𑑂𑐫𑐎 𑐖𑐸𑐫𑐵𑐔𑑂𑐰𑑄𑐐𑐸 𑐰𑐵𑑅𑐔𑐵𑐫𑐎𑐵 𑐴𑐾 𑐠𑐸𑐎𑐠𑑄𑐫𑐵 𑐖𑑂𑐫𑐵 𑐣𑑂𑐴𑑂𑐫𑐵𑐎𑐾𑐐𑐸 𑐫𑐵𑑅𑐐𑐸 𑐏𑑅 𑑋 𑐠𑐸𑐐𑐸 𑐖𑑂𑐫𑐵𑐏𑑃𑐫𑑂 𑐳𑐎𑐮 𑐣𑐾𑐰𑐵𑑅𑐟𑐳𑐾𑑄 𑐠𑑅𑐎𑐾 𑐡𑐸𑐐𑐸 𑐖𑑂𑐘𑐵𑐣 𑐂𑐣𑐵 𑐧𑐶𑐫𑐵 𑐠𑐸𑐐𑐸 𑐖𑑂𑐘𑐵𑐣 𑐎𑑀𑐱𑐫𑑂 𑐡𑐸𑐠𑑂𑐫𑐵𑐎𑐾𑐟 𑐬𑐔𑐣𑐵 𑐔𑑂𑐰𑐫𑐵 𑐰 𑐎𑐩𑐾𑐣𑑂𑐚 𑐫𑐵𑐣𑐵 𑐧𑐶𑐫𑐵𑐡𑐷𑐟 𑐣𑑄 𑐂𑐣𑐵𑐥 𑐫𑐵𑑅𑐐𑐸 𑐡𑐸 𑑋 𑐠𑐸𑐐𑐸 𑐟𑐵𑐮𑐶𑐩𑐫𑐵 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐥𑐵𑐮𑐨𑐵𑐲𑐵 𑐁𑐎𑐵𑐡𑐾𑐩𑐶𑐫𑐵 𑐔𑐵𑐣𑑂𑐳𑐮𑐬 𑐩𑐮𑑂𑐮 𑐎𑐾 𑐳𑐸𑐣𑑂𑐡𑐬𑑄 𑐣𑑄 𑐠𑐸𑐐𑐸 𑐖𑑂𑐫𑐵𑐗𑑂𑐰𑑅𑐫𑐵 𑐧𑐵𑐬𑐾 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶𑑄 𑐥𑐶𑐠𑑄𑐐𑐸 𑐣𑐾𑐰𑐵𑑅 𑐖𑑂𑐘𑐵𑐣𑐎𑑀𑐱 𑑕 𑐐𑐹 𑐏𑐞𑑂𑐜𑐫𑑂 𑐥𑐶𑐠𑐣𑐾 𑐦𑐹𑐐𑐸 𑐟𑐳𑐎𑑄 𑐮𑐳𑐟𑐵𑐫𑐵 𑐏𑑃 𑐖𑐸𑐫𑐵𑐧𑑂𑐫𑐹𑐐𑐸 𑐡𑐸𑐳𑐵 𑐠𑑂𑐰 𑐕𑐐𑐹 𑐋𑐟𑐶𑐴𑐵𑐳𑐶𑐎 𑐐𑑂𑐬𑐣𑑂𑐠 𑐟𑐎𑑄 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐁𑑅 𑐠𑐸𑐐𑐸 𑐟𑑅𑐢𑑄𑐐𑐸 𑐖𑑂𑐘𑐵𑐣𑐫𑐵𑐟 𑐃 𑐎𑐠𑑄 𑐜𑐶𑐖𑐶𑐚𑐮 𑐩𑐵𑐢𑑂𑐫𑐩𑐫𑑂 𑐡𑐸𑐠𑑂𑐫𑐵𑐎𑐵𑑅 𑐳𑐎𑐮 𑐣𑐾𑐰𑐵𑑅 𑐰 𑐰𑐶𑐱𑑂𑐰𑐣𑑂𑐫𑑄𑐎𑑄 𑐔𑑂𑐰𑑄𑐥𑐶𑑄 𑐩𑐣𑐹𑐟𑐫𑑂𑐐𑐸 𑐮𑑂𑐴𑐵𑐟𑐫𑑂 𑐠𑑂𑐫𑑄𑐎𑐾𑐐𑐸 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐢𑐿𑐐𑐸 𑐣𑑄 𑐗𑐷 𑐣𑐾𑐥𑐵𑑅𑐩𑐶𑐟𑐫𑐐𑐸 𑐣𑐶𑐟𑐶𑑄 𑐴𑐬𑑂𑐲𑐫𑐵 𑐏𑑃 𑐟𑐵𑐫𑐎𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐡𑐸 𑑋