𑑑𑑒 𑐐𑐹 𑐟𑐐𑐶𑑄𑐟𑐎 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐟 𑐖𑑂𑐘𑐵𑐥𑐣 𑐥𑑁

𑐬𑐟𑑂𑐣𑐬𑐵𑐖𑑂𑐫 (𑐁𑐬𑐁𑐬) 𑐎𑑂𑐫𑐵𑐩𑑂𑐥𑐳𑐫𑐵 𑐣𑐾𑐰𑐵𑑅 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂 𑐳𑑄𑐐𑐛𑐣 𑐣𑐾𑐰𑐵𑑅 𑐰𑐶𑐡𑑂𑐫𑐵𑐬𑑂𑐠𑐷 𑐫𑐸𑐣𑐶𑐫𑐣𑑄 𑑑𑑒 𑐐𑐹 𑐟𑐐𑐶𑑄 𑐟𑐎 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫 𑐧𑑂𑐰𑑄𑐎𑐾𑐐𑐸 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾𑐟 𑐩𑐵𑐐 𑐫𑐵𑑅𑐐𑐸 𑐡𑐸 𑑋 𑐫𑐸𑐣𑐶𑐫𑐣𑑄 𑑑𑑒 𑐐𑐹 𑐟𑐐𑐶𑑄 𑐟𑐎 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫 𑐀𑐢𑑂𑐫𑐫𑐣, 𑐀𑐢𑑂𑐫𑐵𑐥𑐣𑐫𑐵 𑐰𑑂𑐫𑐰𑐳𑑂𑐠𑐠𑐵 𑐫𑐵𑐫𑐾𑐟 𑐩𑐵𑐐 𑐫𑐵𑐳𑐾𑑄 𑐱𑐶𑐎𑑂𑐲𑐵, 𑐰𑐶𑐖𑑂𑐘𑐵𑐣 𑐰 𑐥𑑂𑐬𑐰𑐶𑐢𑐶 𑐩𑐣𑑂𑐟𑑂𑐬𑐷 𑐀𑐱𑑀𑐎 𑐬𑐵𑐃𑐫𑐵𑐟 𑐣𑐵𑐥 𑐮𑐵𑐣𑐵𑑅 𑐖𑑂𑐘𑐵𑐥𑐣 𑐥𑑁 𑐮𑑅𑐮𑑂𑐴𑐵𑐳𑐾 𑐄𑐎𑐠𑑄 𑐩𑐵𑐐 𑐫𑐵𑑅𑐐𑐸 𑐏𑑅 𑑋

𑐫𑐸𑐣𑐶𑐫𑐣𑐫𑐵 𑐀𑐢𑑂𑐫𑐎𑑂𑐲 𑐬𑐶𑐡𑐾𑐣 𑐩𑐴𑐬𑑂𑐖𑐣, 𑐡𑐸𑐖𑑅 𑐳𑐸𑐩𑐶𑐟 𑐬𑑄𑐖𑐶𑐟 𑐮𑐐𑐵𑐫𑐟𑑄 𑐩𑐣𑑂𑐟𑑂𑐬𑐷 𑐬𑐵𑐃𑐫𑐵𑐟 𑐣𑐵𑐥 𑐮𑐵𑐣𑐵𑑅 𑐖𑑂𑐘𑐵𑐥𑐣 𑐥𑑁 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋 𑐫𑐸𑐣𑐶𑐫𑐣𑑄 𑐩𑐣𑑂𑐟𑑂𑐬𑐷 𑐬𑐵𑐃𑐫𑐵𑐟 𑐮𑑅𑐮𑑂𑐴𑐵𑑅𑐐𑐸 𑐖𑑂𑐘𑐵𑐥𑐣 𑐥𑐟𑐷 𑐣𑐾𑐥𑐵𑑅𑐫𑐵 𑐳𑑄𑐰𑐶𑐢𑐵𑐣𑐫𑑂 𑐩𑐵𑐟𑐺𑐨𑐵𑐲𑐵 𑐱𑐶𑐎𑑂𑐲𑐵𑐫𑐵 𑐀𑐢𑐶𑐎𑐵𑐬 𑐏𑑃 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐖𑐹𑐳𑐵𑑄 𑐳𑑄𑐰𑐶𑐢𑐵𑐣 𑐎𑐵𑐬𑑂𑐫𑐵𑐣𑑂𑐰𑐫𑐣𑐫𑑂 𑐰𑑅𑐐𑐸 𑐠𑑁𑑄 𑐔𑑂𑐫𑐵𑐡𑑃 𑐡𑐫𑐾𑐢𑐸𑑄𑐎𑐵𑑅 𑐣𑑄 𑐰𑑂𑐫𑐰𑐴𑐵𑐬𑐶𑐎 𑐬𑐸𑐥𑑄 𑐎𑐵𑐬𑑂𑐫𑐵𑐣𑑂𑐰𑐫𑐣𑐫𑑂 𑐩𑐰𑑅𑐐𑐸 𑐰 𑐨𑐵𑐲𑐵 𑐁𑐫𑑀𑐐𑑄 𑐟𑐎𑑄 𑐔𑑂𑐫𑐵𑐐𑐹 𑐟𑐐𑐶𑑄𑐣𑐶𑐳𑐾𑑄 𑐔𑑂𑐰𑐫𑑂𑐫𑐵 𑐟𑐐𑐶𑐩𑐫𑑂 𑐩𑐵𑑄𑐨𑐵𑐳𑑄 𑐀𑐣𑐶𑐰𑐵𑐬𑑂𑐫 𑐥𑐛𑐣𑐥𑐵𑐛𑐣𑐫𑐵 𑐫𑐵𑐎𑐾𑐐𑐸 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾𑐟 𑐳𑐶𑐦𑐵𑐬𑐶𑐳 𑐫𑐵𑑅𑐐𑐸𑐫𑐵𑐟 𑐫𑐵𑐎𑐣𑑄 𑐎𑐵𑐬𑑂𑐫𑐵𑐣𑑂𑐰𑐫𑐣𑐫𑑂 𑐴𑐫𑐾𑐟 𑐩𑐵𑐐 𑐫𑐵𑑅𑐐𑐸 𑐡𑐸 𑑋

𑑒𑑐𑑒𑑘 𑐳𑐵𑐮𑐫𑑂 𑐣𑑂𑐴𑐹𑐐𑐸 𑐱𑐶𑐎𑑂𑐲𑐵 𑐣𑐷𑐟𑐶 𑐮𑐵𑐐𑐹 𑐖𑐸𑐂𑐢𑐸𑑄𑐎𑐵𑑅 𑐳𑑂𑐰𑐣𑐶𑐐𑑅𑐫𑐵 𑐡𑐎𑑂𑐰𑑄 𑐧𑑂𑐰𑐣𑐾𑐎𑐸𑐠𑐶𑐫𑐵 𑐎𑑂𑐰𑐫𑑂𑐫𑐵 𑐟𑐐𑐶𑐩𑐫𑑂 𑐐𑐣𑑄 𑐣𑑄 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐐𑐸 𑐩𑐫𑐵𑑅𑐐𑐸 𑐰 𑐐𑐸𑑄𑐐𑐹 𑐟𑐐𑐶𑑄𑐣𑐶𑐳𑐾𑑄 𑐊𑐳𑐂𑐂 (𑐊𑐳𑐊𑐮𑐳𑐷) 𑐥𑐬𑐷𑐵𑐎𑑂𑐲𑐵 𑐧𑐷𑐐𑐸 𑐂𑐮𑐫𑑂 𑐎𑐩𑑂𑐥𑑂𑐫𑐚𑐬 𑐰𑐶𑐖𑑂𑐘𑐵𑐣, 𑐋𑐔𑑂𑐕𑐶𑐎 𑐐𑐞𑐶𑐟𑐮𑐶𑐳𑐾𑑄 𑐋𑐔𑑂𑐕𑐶𑐎 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫 𑐡𑐸𑐠𑑂𑐫𑐵𑐎𑐵𑑅 𑐩𑐵𑑄𑐨𑐵𑐳𑑄 𑐁𑐏𑑅 𑐧𑑂𑐰𑐣𑐾 𑐡𑐂𑐐𑐸 𑐀𑐢𑐶𑐎𑐵𑐬𑐫𑐵𑐟 𑐧𑐘𑑂𑐔𑐶𑐟 𑐫𑐵𑐫𑐾𑐟 𑐳𑑂𑐰𑑅𑐐𑐸 𑐢𑐵𑐳𑐾𑑄 𑐄𑐎𑐶𑐫𑐵𑐟 𑐏𑐵𑐬𑐾𑐖 𑐫𑐵𑐫𑐾𑐟 𑐣𑑄 𑐫𑐸𑐣𑐶𑐫𑐣𑑄 𑐩𑐵𑐐 𑐫𑐵𑑅𑐐𑐸 𑐡𑐸 𑑋

𑐣𑑂𑐴𑐵𑐥𑐵 𑐳𑑂𑐰𑐣𑐶𑐐𑑅𑐫𑐵 𑐡𑐎𑑂𑐰𑑄 𑐎𑐮𑐾𑐖𑐫𑑂 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫 𑐀𑐢𑑂𑐫𑐫𑐣 𑐫𑐵𑐂𑐥𑐶𑑄 𑐧𑑂𑐰𑑃𑐩𑐶𑐥𑐶𑑄 𑐁𑐥𑐵𑐮𑑄 𑐡𑐸𑐐𑐸 𑐟𑐬 𑐣𑑂𑐴𑐹𑐐𑐸 𑐱𑐶𑐎𑑂𑐲𑐵 𑐣𑐷𑐟𑐶 𑐰𑐫𑐾𑐢𑐸𑑄𑐎𑐵𑑅 𑐄𑐎𑐷 𑐖𑐸𑐫𑐵𑐔𑑂𑐰𑑄𑐐𑐸 𑐰𑑂𑐫𑐰𑐳𑑂𑐠𑐵𑑄 𑐫𑐵𑐣𑐵𑑅 𑐎𑐮𑐾𑐖𑐫𑑂 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑐣𑐷𑐥𑐶𑑄 𑐐𑐵𑐎𑑂𑐎𑑄 𑐩𑑂𑐴𑑀 𑐖𑐹𑐐𑐸 𑐏𑑃 𑐣𑑂𑐴𑐫𑐠𑑃𑐳𑐾𑑄 𑐁𑑅 𑐔𑑂𑐫𑐵𑐐𑐹 𑐟𑐐𑐶𑑄 𑐟𑐎 𑐖𑐎 𑐩𑐏𑐳𑐾 𑐗𑐶𑑄𑐣𑐶𑐐𑐹 𑐟𑐐𑐶𑑄 𑐟𑐎 𑐴𑐾 𑐀𑐣𑐶𑐰𑐵𑐬𑑂𑐫 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫 𑐧𑑂𑐰𑑄𑐎𑐾𑐐𑐸 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾𑐩𑐵𑑅𑐐𑐸 𑐫𑐸𑐣𑐶𑐫𑐣𑑄 𑐮𑑅𑐮𑑂𑐴𑐵𑑅𑐐𑐸 𑐖𑑂𑐘𑐵𑐥𑐣 𑐥𑐟𑐷 𑐩𑐵𑐐 𑐫𑐵𑐣𑐵𑐟𑑅𑐐𑐸 𑐡𑐸 𑑋

𑐰𑑂𑐫𑐎𑑂𑐟𑐶𑐐𑐟 𑐰𑐵 𑐳𑑄𑐳𑑂𑐠𑐵𑐐𑐟 𑐬𑐸𑐥𑑄 𑐣𑐾𑐥𑐵𑐮𑐨𑐵𑐲𑐵𑑄 𑐧𑑂𑐰𑑄𑐎𑐾𑐐𑐸 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾𑐟 𑐁𑐥𑐵𑐮𑑄 𑐎𑐸𑐟𑑅 𑐖𑐸𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸𑐳𑐵𑑄 𑐬𑐵𑐖𑑂𑐫𑐥𑐵𑐏𑐾𑑄 𑐡𑐎𑑂𑐰𑑄 𑐳𑑂𑐎𑐸𑐮𑐫𑑂 𑐧𑑂𑐰𑑄𑐎𑐾𑐐𑐸 𑐰𑑂𑐫𑐰𑐳𑑂𑐠𑐵 𑐩𑐫𑐵𑑅𑐟𑐮𑐾 𑐄𑐎𑐠𑑄𑐫𑐵 𑐎𑐸𑐟𑑅 𑐰𑐵 𑐀𑐨𑐶𑐫𑐵𑐣𑑄 𑐳𑐵𑐬𑑂𑐠𑐎𑐟𑐵 𑐎𑐵𑐂𑐐𑐸 𑐳𑐩𑑂𑐨𑐵𑐰𑐣𑐵 𑐩𑐡𑐸 𑐢𑐵𑐳𑐾𑑄 𑐏𑐳 𑐨𑐵𑐫𑑂𑐫𑐵 𑐣𑐶𑑄𑐟𑐶𑑄 𑐬𑐵𑐖𑑂𑐫𑐫𑐵 𑐢𑐸𑐎𑐹𑐥𑐵𑐏𑐾𑑄 𑐐𑐵𑐎𑑂𑐎𑑄 𑐏𑐬𑑂𑐔 𑐫𑐵𑐫𑐾𑐐𑐸 𑐟𑐬 𑐣𑐾𑐥𑐵𑐮𑐨𑐵𑐲𑐵𑐫𑐵 𑐣𑐶𑑄𑐟𑐶𑑄 𑐢𑐵𑑅𑐳𑐵 𑐠𑑂𑐰 𑐁𑐣𑑂𑐡𑑀𑐮𑐣𑐫𑑂 𑐮𑐐𑐾 𑐖𑐸𑐫𑐵𑐔𑑂𑐰𑑄𑐥𑐶𑑄𑐳𑑄 𑐠𑑅𑐐𑐸 𑐏𑐮𑑂𑐟𑐷𑑄 𑐏𑐬𑑂𑐔 𑐫𑐵𑐣𑐵𑐔𑑂𑐰𑐣𑐾𑐐𑐸 𑐳𑐩𑑂𑐨𑐰 𑐩𑐖𑐸𑐂𑐐𑐸𑐮𑐶𑑄 𑐬𑐵𑐖𑑂𑐫𑑄 𑐴𑐾 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐟 𑐧𑐖𑐾𑐚𑐫𑐵 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾𑐟𑐟𑐎𑑄 𑐖𑑂𑐘𑐵𑐥𑐣 𑐥𑐟𑐷 𑐢𑐫𑐵𑐟𑑅𑐐𑐸 𑐡𑐸 𑑋

𑐩𑐣𑑂𑐟𑑂𑐬𑐷 𑐬𑐵𑐃 𑐳𑑂𑐰𑐫𑐩 𑐕𑐩𑑂𑐴 𑐬𑐵𑐖𑑂𑐫𑐥𑐵𑐏𑐾𑑄 𑐄𑐟𑑂𑐥𑐷𑐜𑐣𑐫𑑂 𑐮𑐵𑐎𑐵𑐟𑑅𑐐𑐸 𑐖𑐵𑐟𑐶𑐥𑐵𑐏𑐾𑑄 𑐥𑑂𑐬𑐟𑐶𑐣𑐶𑐢𑐶𑐟𑑂𑐰 𑐫𑐵𑐣𑐵𑐔𑑂𑐰𑑄𑐩𑑂𑐴 𑐖𑐹𑐐𑐸𑐮𑐶𑑄 𑐦𑐟𑑂𑐟𑐮𑐾 𑐕𑐶𑐐𑐸 𑐴𑐾 𑐎𑐵𑐬𑑂𑐫𑐎𑐵𑐮𑐫𑑂 𑐠𑑂𑐰 𑐋𑐟𑐶𑐴𑐵𑐳𑐶𑐎 𑐡𑐵𑐫𑐶𑐟𑑂𑐰 𑐥𑐹𑐰𑑄𑐎𑐾𑐐𑐸 𑐖𑑂𑐫𑐵 𑐖𑐸𑐂 𑐢𑐂𑐐𑐸 𑐨𑐮𑐳𑐵 𑐎𑐫𑐵𑐔𑑂𑐰𑐣𑐵 𑐢𑐎𑐵𑑅 𑐣𑑄 𑐖𑑂𑐘𑐵𑐥𑐣 𑐥𑐟𑐷 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋 𑐄𑐐𑐸 𑐂𑐮𑐫𑑂 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐫𑐵 𑐎𑐾𑐣𑑂𑐡𑑂𑐬𑐷𑐫 𑐣𑐵𑐫𑑅 𑐥𑐰𑐶𑐟𑑂𑐬 𑐰𑐖𑑂𑐬𑐵𑐔𑐵𑐬𑑂𑐫𑐮𑐶𑐳𑐾𑑄 𑐁𑐥𑐵𑐮𑑄 𑐨𑐵𑐲𑐶𑐎 𑐰 𑐩𑐵𑑄𑐨𑐵𑐫𑑂 𑐱𑐶𑐎𑑂𑐲𑐵𑐫𑐵 𑐀𑐨𑐶𑐫𑐣𑑂𑐟𑐵𑐟𑐫𑑂 𑐄𑐥𑐳𑑂𑐠𑐶𑐟𑐶 𑐡𑐸𑐐𑐸 𑐏𑑅 𑑋