‘𑑑𑑑 𑐎𑐎𑑂𑐲𑐵𑐫𑐵 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐀𑐣𑑂𑐫𑐵𑐫 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸’

𑐥𑑂𑐬𑐖𑑂𑐘𑐵 𑐁𑐰𑐵𑐳𑐷𑐫 𑐄𑐔𑑂𑐔 𑐩𑐵𑐢𑑂𑐫𑐩𑐶𑐎 𑐰𑐶𑐡𑑂𑐫𑐵𑐮𑐫 𑑒𑑐𑑕𑑗 𑐳𑐵𑐮𑑄 𑐣𑐶𑐳𑐾𑑄 𑐥𑑂𑐮𑐳 𑐚𑐸 𑐳𑐘𑑂𑐔𑐵𑐮𑐣 𑐫𑐵𑑅𑐐𑐸 𑐏𑑅 𑑋 𑐰𑐶𑐲𑐾𑐱𑐟𑑅 𑐳𑑂𑐠𑐵𑐣𑐷𑐫 𑐰𑐶𑐡𑑂𑐫𑐵𑐬𑑂𑐠𑐷𑐫𑐵𑐟 𑐮𑐎𑑂𑐲𑐶𑐟 𑐫𑐵𑐣𑐵𑑅 𑐥𑑂𑐮𑐳 𑐚𑐸 𑐳𑐘𑑂𑐔𑐵𑐮𑐣 𑐫𑐵𑑅𑐐𑐸 𑐏𑑅𑐳𑐵𑑄 𑐠𑐣 𑐳𑑂𑐠𑐵𑐣𑐷𑐫 𑐰𑐶𑐡𑑂𑐫𑐵𑐬𑑂𑐠𑐷 𑐳𑑂𑐰𑐫𑐵𑑄 𑐣𑑄 𑐥𑐶𑐣𑐾𑐫𑐵 𑐰𑐶𑐡𑑂𑐫𑐵𑐬𑑂𑐠𑐷 𑐧𑑂𑐰𑐣𑐾𑐟 𑐰𑐫𑐵𑐔𑑂𑐰𑑄𑐐𑐸 𑐏𑑃 𑐳𑑄𑐳𑑂𑐠𑐵𑐥𑐎 𑐮𑐶𑐳𑐾𑑄 𑐎𑐮𑐾𑐖𑐫𑐵 𑐥𑑂𑐬𑐶𑐣𑑂𑐳𑐶𑐥𑐮 𑐳𑐟𑑂𑐫𑐣𑐵𑐬𑐵𑐫𑐞 𑐩𑐵𑐣𑐣𑑂𑐢𑐬𑑄 𑐎𑐣𑐵𑐡𑐷 𑑋

𑐠𑐣 𑐀𑐥𑑂𑐰𑑅 𑐢𑐫𑐵𑐠𑐾𑑄 𑐳𑐶𑐣𑑂𑐢𑐸𑐥𑐵𑐮𑑂𑐔𑑀𑐎 𑐰 𑐳𑑀𑐮𑐏𑐸𑐩𑑂𑐧𑐸𑐫𑐵 𑐰𑐶𑐡𑑂𑐫𑐵𑐬𑑂𑐠𑐷 𑐧𑑂𑐰𑐣𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋𑐥𑑂𑐬𑐶𑐣𑑂𑐳𑐶𑐥𑐮 𑐩𑐵𑐣𑐣𑑂𑐢𑐬𑐫𑐵 𑐎𑐠𑑄 𑐣𑑂𑐴𑐵𑐥𑐵 𑐠𑑅𑐩𑑂𑐴𑑄 𑐧𑑂𑐰𑑄𑐎𑐵𑐟𑐫𑐵𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷 𑐄𑐐𑐸 𑐣𑐶𑐐𑐹 𑐖𑐶𑐮𑑂𑐮𑐵𑐫𑐵 𑐠𑐷𑐠𑐷 𑐳𑑂𑐎𑐸𑐮𑐫𑐵 𑐱𑐶𑐎𑑂𑐲𑐎 𑐮𑐶𑐳𑐾𑑄 𑐥𑑂𑐬𑐢𑐵𑐣𑐵𑐢𑑂𑐫𑐵𑐥𑐎 𑐖𑐸𑐫𑐵𑐔𑑂𑐰𑑄𑐐𑐸𑐮𑐶𑑄 𑐠𑑅𑐐𑐸 𑐳𑑂𑐎𑐸𑐮𑐫𑑂 𑐗𑐶𑐐𑐹 𑐟𑐐𑐶𑑄 𑐟𑐎 𑐧𑑂𑐰𑐣𑐾 𑐎𑑂𑐰𑐔𑐵𑑅𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐫𑐵𑐟 𑐠𑑅𑐐𑐸 𑐎𑐮𑐾𑐖𑐫𑑂 𑐳𑐶𑐦𑐵𑐬𑐶𑐳 𑐫𑐵𑐣𑐵 𑐴𑐂𑐐𑐸𑐮𑐶𑑄 𑐣𑑄 𑐠𑐣 𑐠𑐸𑐥𑐶𑑄 𑐣𑐶𑐐𑐹 𑐖𑐶𑐮𑑂𑐮𑐵𑐫𑐵 𑐰𑐶𑐡𑑂𑐫𑐵𑐬𑑂𑐠𑐷 𑐀𑐥𑑂𑐰𑑅 𑐡𑐸𑐐𑐸 𑐏𑑅 𑑋

𑐰𑐶𑐱𑐾𑐲 𑐫𑐵𑐣𑐵𑑅 𑐩𑑂𑐫𑐵𑐣𑐾𑐖𑐩𑐾𑐣𑑂𑐚 𑐧𑑂𑐰𑐣𑐷𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐫𑐵𑐟 𑐮𑐎𑑂𑐲𑐶𑐟 𑐫𑐵𑐣𑐵𑐟𑑅𑐐𑐸 𑐎𑐮𑐾𑐖𑐫𑑂 𑐧𑑂𑐰𑐣𑐵𑐰𑑅𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷 𑐠𑐷𑐠𑐷 𑐳𑐬𑐎𑐵𑐬𑐷 𑐥𑐡𑐫𑑂 𑐠𑑂𑐫𑐣𑐵𑐔𑑂𑐰𑑄𑐐𑐸 𑐰 𑐁𑐥𑐵𑐮𑑄 𑐢𑐫𑐵𑐠𑐾𑑄 𑐰𑑂𑐫𑐵𑐥𑐵𑐬 𑐰𑑂𑐫𑐰𑐳𑐵𑐫 𑐫𑐵𑐣𑐵𑐔𑑂𑐰𑑄𑐐𑐸 𑐖𑐵𑐣𑐎𑐵𑐬𑐷 𑐣𑑄 𑐰𑐫𑑂𑐎𑐮𑑄 𑐧𑐶𑐫𑐵𑐡𑐶𑐮 𑑋 𑐟𑐬 𑐰𑐫𑑂𑐎𑑅𑐫𑐵 𑐡𑐸𑑅𑐏 𑐕𑐸 𑐡𑐸 𑐢𑐵𑑅𑐳𑐵 𑐳𑑂𑐠𑐵𑐣𑐷𑐫 𑐰𑐶𑐡𑑂𑐫𑐵𑐬𑑂𑐠𑐷𑐫𑐵𑐟 𑐮𑐎𑑂𑐲𑐶𑐟 𑐫𑐵𑐣𑐵𑑅 𑐳𑐴𑐸𑐮𑐶𑐫𑐟 𑐱𑐸𑐮𑑂𑐎𑐫𑑂 𑐎𑐮𑐾𑐖 𑐳𑑄𑐔𑐵𑐮𑐣 𑐫𑐵𑐣𑐵𑐡𑐷𑐐𑐸 𑐏𑑅𑐳𑐵𑑄 𑐣𑑄 𑐳𑑂𑐠𑐵𑐣𑐷𑐫 𑐰𑐶𑐡𑑂𑐫𑐵𑐬𑑂𑐠𑐷 𑐀𑐥𑑂𑐰𑑅 𑐢𑑂𑐫𑐧𑐵 𑐥𑐸𑐮𑐵𑑅 𑐩𑐾𑐩𑐾𑐐𑐸 𑐎𑐮𑐾𑐖𑐫𑑂 𑐠𑑂𑐫𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐠𑑅𑐥𑐶𑑄𑐳𑑄 𑐩𑑂𑐴𑑀 𑐖𑐎 𑐱𑐸𑐮𑑂𑐎 𑐎𑐫𑐵𑐐𑐸𑐮𑐶𑑄 𑐐𑐸𑐞𑐳𑑂𑐟𑐬 𑐩𑐡𑐸 𑐢𑐫𑐵𑐐𑐸 𑐩𑐵𑐣𑐳𑐶𑐎𑐟𑐵 𑐀𑐨𑐶𑐨𑐵𑐰𑐎𑐫𑐵𑐎𑐾 𑐡𑐫𑐵𑐔𑑂𑐰𑑄𑐐𑐸𑐮𑐶𑑄 𑐣𑑄 𑐳𑑂𑐠𑐵𑐣𑐷𑐫 𑐰𑐶𑐡𑑂𑐫𑐵𑐬𑑂𑐠𑐷𑐟 𑐠𑑅𑐐𑐸 𑐎𑐮𑐾𑐖𑐫𑑂 𑐩𑑂𑐴𑑀 𑐖𑐹𑐐𑐸 𑐰𑐫𑑂𑐎𑑅𑐫𑐵 𑐧𑐶𑐔𑐵𑑅 𑐡𑐸 𑑋𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐎𑐖𑐾𑐮 𑐳𑐸𑐬𑐸 𑐫𑐵𑐣𑐵𑐧𑐮𑐫𑑂 𑐧𑑂𑐰𑑄𑐎𑐾 𑐠𑐵𑐎𑐸 𑐎𑐶 𑐁𑑅 𑐧𑑂𑐰𑑄𑐎𑐾 𑐠𑐵𑐎𑐸 𑐢𑐂𑐐𑐸 𑐣𑑂𑐴𑑂𑐫𑐳𑐮𑐫𑑂 𑐰𑐫𑑂𑐎𑐮𑑄 𑐢𑐫𑐵𑐡𑐷, ‘𑐣𑑂𑐴𑐵𑐥𑐵 𑐎𑐶𑐟𑐵𑐧𑐫𑐵 𑐨𑐬𑐫𑑂 𑐧𑑂𑐰𑐣𑐾 𑐩𑐵𑑅, 𑐧𑑂𑐰𑐣𑐾𑐟 𑐩𑐵𑑅𑐐𑐸 𑐁𑐰𑐱𑑂𑐫𑐎 ‘𑐎𑑂𑐫𑐵𑐥𑑂𑐳𑐸𑐮’ 𑐩𑐡𑐸 𑑋

𑐟𑐬 𑐠𑑁𑑄𑐎𑐣𑑂𑐴𑐫𑑂 𑐐𑐵𑐂𑐜 𑐧𑐸𑐎 𑐣𑐶𑐳𑐾𑑄 𑐂𑐣𑑂𑐚𑐬𑐣𑐾𑐚 𑐩𑐵𑐬𑑂𑐦𑐟 𑐱𑐶𑐎𑑂𑐲𑐎𑐥𑐶𑑄𑐳𑑄 𑐳𑑂𑐰𑐫𑐵𑑄 𑐣𑑄 𑐰𑐶𑐡𑑂𑐫𑐵𑐬𑑂𑐠𑐷𑑄 𑐴𑐾 𑐣𑑂𑐴𑐵𑐥𑐵 𑐳𑐎𑐾𑐎𑐵𑐔𑑂𑐰𑑄𑐐𑐸𑐮𑐶𑑄 𑐫𑐵𑐣𑐵𑑅 𑐠𑑁𑑄𑐎𑐣𑑂𑐴𑐫𑑂 𑐧𑑂𑐰𑑄𑐎𑐾 𑐀𑑅𑐥𑐹 𑑋 𑐣𑑂𑐴𑐵𑐥𑐵 𑐎𑐖𑐾𑐮𑐫𑑂 𑐖𑐵𑑃𑐔 𑐧𑐷𑐩𑐵𑐮 𑐢𑐵𑑅𑐳𑐵 𑐣𑑀𑐚𑐫𑐵 𑐨𑐬𑐫𑑂 𑐖𑐵𑑃𑐔 𑐧𑐷𑐐𑐸 𑐏𑑅 𑑋 𑐟𑐬 𑐠𑑁𑑄𑐎𑐣𑑂𑐴𑐫𑑂 𑐀𑐖𑑂𑐫𑐵𑑅𑐐𑐸 𑐳𑐩𑐳𑑂𑐫𑐵 𑐩𑐡𑐸 𑑋’ 𑐩𑐢𑑂𑐫𑐩 𑐰 𑐣𑐶𑐩𑑂𑐣 𑐩𑐢𑑂𑐫𑐩 𑐰𑐬𑑂𑐐𑐫𑐵 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑐣𑐶 𑐣𑐶𑑄𑐟𑐶𑑄 𑐠𑑅𑐥𑐶𑐣𑐶 𑐳𑑂𑐎𑐸𑐮 𑐮𑐎𑑂𑐲𑐶𑐟 𑐖𑐹𑐐𑐸 𑐏𑑃 𑐎𑐣𑐵𑐡𑐶𑐳𑐾𑑄 𑐁𑐥𑐵𑐮𑑄 𑐐𑐵𑑄𑐫𑐵 𑐰𑐶𑐡𑑂𑐫𑐵𑐬𑑂𑐠𑐷 𑐧𑑂𑐰𑐣𑐾𑐟 𑐰𑐂𑐐𑐸 𑐏𑑃 𑐎𑐣𑐵𑐡𑐷 𑑋

𑐀𑐠𑐾 𑐏𑑅𑐳𑐵𑑄 𑐣𑑄 𑐠𑑅𑐐𑐸 𑐎𑐮𑐾𑐖𑐫𑑂 𑐥𑑂𑐮𑐳 𑐚𑐸 𑐎𑑂𑐰𑐔𑐵𑐫𑐾𑐎𑐵 𑐰𑑄𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷 𑐠𑐷𑐠𑐷 𑐏𑑂𑐫𑐮𑐫𑑂 𑐧𑐵𑑄𑐮𑐵𑐎 𑐴𑐾 𑐥𑑂𑐬𑐐𑐟𑐶 𑐫𑐵𑐣𑐵𑐔𑑂𑐰𑑄𑐐𑐸 𑐰𑐫𑑂𑐎𑑅𑐫𑐵 𑐡𑐵𑐧𑐷 𑐡𑐸 𑑋 𑐰𑐫𑑂𑐎𑑅𑐫𑐵 𑐀𑐣𑐸𑐨𑐰 𑐎𑐠𑑄 𑐥𑑂𑐮𑐳 𑐚𑐸 𑐧𑑂𑐰𑑄𑐎𑐾𑐐𑐸 𑐗𑑂𑐰𑐮𑐫𑑂 𑑑𑑑 𑐎𑐎𑑂𑐲𑐵𑐫𑐵 𑐰𑐶𑐡𑑂𑐫𑐵𑐬𑑂𑐠𑐷 𑐡𑐕𑐶 𑐥𑐹𑐰𑑄𑐎 𑐴𑐾 𑐧𑑂𑐰𑐣𑐾 𑐩𑐏𑑄 𑑋 𑐀𑐳𑐵𑐬 𑑑𑑕 𑐣𑐶𑐳𑐾𑑄 𑐎𑐮𑐾𑐖 𑐱𑐸𑐬𑐸 𑐖𑐸𑐂 𑑋 𑐠𑐸𑐎𑐶𑐫𑐵 𑐡𑐠𑐸𑐂 𑐠𑐷𑐠𑐷 𑐣𑐏𑑅 𑐔𑐏𑑅 𑐰𑐂 𑑋 𑐐𑐸𑐎𑐶𑑄 𑐫𑐵𑐣𑐵𑑅 𑐰𑐶𑐡𑐵 𑐀𑐥𑑂𑐰𑑅 𑐖𑐸𑐂 𑑋𑐐𑐵𑑄𑐫𑐵 𑐰𑐶𑐡𑑂𑐫𑐵𑐬𑑂𑐠𑐷 𑐣𑑂𑐴𑐵𑐥𑐵𑑄 𑐰𑐂𑐧𑐮𑐫𑑂 𑐊𑐎𑐵𑐄𑐣𑑂𑐚 𑐰 𑐀𑐐𑑂𑐬𑐾𑐖𑐷 𑐨𑐔𑐵 𑐳𑐩𑐳𑑂𑐫𑐵 𑐡𑐂𑐐𑐸 𑐏𑑃 𑐎𑐣𑐵𑐡𑐶𑐳𑐾𑑄 𑐰𑐫𑑂𑐎𑐮𑑄 𑐠𑑅𑐥𑐶𑑄𑐳𑑄 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐄𑐎𑐶𑐫𑐵𑐟 𑐴𑐾 𑐮𑐎𑑂𑐲𑐶𑐟 𑐫𑐵𑐣𑐵𑑅 𑐧𑑂𑐰𑑄𑐎𑐾𑐐𑐸 𑐫𑐵𑐣𑐵𑐔𑑂𑐰𑐣𑐵𑐐𑐸 𑐏𑑃 𑐎𑐣𑐵𑐡𑐶𑐮 𑑋 𑐀𑐠𑐾𑐴𑐾 𑐎𑐮𑐾𑐖𑐫𑑂 𑐧𑑂𑐰𑑄𑐎𑐾𑐟 𑐳𑑂𑐠𑐵𑐣𑐷𑐫𑐫𑐵𑐟 𑐐𑐸𑐮𑐶 𑐀𑑅𑐥𑐸 𑐐𑐵𑐩𑐫𑑂 𑐔𑑂𑐰𑑄𑐥𑐶𑑄𑐟 𑐨𑐔𑐵 𑐠𑐵𑐎𑐹𑐐𑐸 𑐀𑐣𑐸𑐨𑐰 𑐣𑑄 𑐎𑐣𑐵𑐡𑐷 𑑋 𑐠𑐸𑐎𑐶𑐫𑐵 𑐎𑐵𑐬𑐞 𑐢𑐵𑑅𑐳𑐵 𑐳𑑂𑐠𑐵𑐣𑐷𑐫𑐥𑐶𑑄𑐳𑑄 𑐣𑑂𑐴𑐵𑐥𑐵𑑄 𑐣𑐶𑐳𑐾𑑄 𑐀𑐐𑑂𑐬𑐾𑐖𑐷 𑐩𑐵𑐢𑑂𑐫𑐩𑑄 𑐧𑑂𑐰𑐣𑐵𑐔𑑂𑐰𑐣𑐷𑐐𑐸 𑐰 𑐐𑐵𑐩𑐫𑑂 𑐀𑐗 𑐣𑑄 𑐀𑑄𑐐𑑂𑐬𑐾𑐖𑐷 𑐩𑐵𑐢𑑂𑐫𑐩𑑄 𑐧𑑂𑐰𑑄𑐎𑐾𑐐𑐸 𑐩𑑂𑐴𑑀 𑐖𑐹𑐐𑐸𑐮𑐶𑑄 𑐏𑑅 𑐢𑐫𑐵𑐡𑐷 𑑋

𑐰𑐶𑐡𑐵𑐫𑐵 𑐎𑐵𑐬𑐞𑑄 𑐰𑐶𑐡𑑂𑐫𑐵𑐬𑑂𑐠𑐷 𑐧𑐵𑑄𑐮𑐵𑐎 𑐧𑑂𑐰𑐣𑐾 𑐏𑐣𑐷𑐩𑐏𑐸 𑐳𑑂𑐰𑐣𑑂𑐟𑐶 𑐣𑐏𑑅 𑐎𑑂𑐰𑐔𑐵𑐫𑐾𑐰𑑄 𑐖𑐵𑑃𑐔 𑐧𑐷𑐩𑐵𑑅𑐐𑐸 𑐀𑐰𑐳𑑂𑐠𑐵 𑐡𑐸 𑑋 𑐐𑐸𑐎𑐶𑑄 𑐧𑑂𑐰𑑄𑐎𑐷𑐥𑐶𑑄 𑐱𑐶𑐎𑑂𑐲𑐎𑐥𑐶𑑄𑐟 𑐣𑑄 𑐠𑐵𑐎𑐹 𑐧𑑂𑐰𑐣𑐷𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐫𑐵𑐟 𑐣𑑄 𑐠𑐵𑐎𑐹 𑑋 𑑑𑑑 𑐎𑐎𑑂𑐲𑐵𑐫𑐵 𑐰𑐶𑐡𑑂𑐫𑐵𑐬𑑂𑐠𑐷 𑐠𑑅𑐥𑐶𑐣𑐶𑐐𑐸 𑐎𑑀𑐬𑑂𑐳 𑐴𑐾 𑐥𑐹𑐰𑑄𑐎𑐾 𑐧𑑂𑐰𑐣𑐾 𑐩𑐮𑐵𑐫𑐾𑐰𑑄 𑐖𑐵𑑃𑐔 𑐧𑐷𑐩𑐵𑑅𑐐𑐸 𑐀𑐰𑐳𑑂𑐠𑐵 𑐡𑐸𑐐𑐸 𑐏𑑃 𑐎𑐣𑐵𑐡𑐶𑐳𑐾𑑄 𑐄𑐎𑐶𑐫𑐵𑐟 𑐣𑐶𑑄𑐟𑐶𑑄 𑐠𑑅𑐥𑐶𑑄𑐳𑑄 𑐴𑐾 𑐚𑑂𑐫𑐸𑐳𑐣 𑐧𑑂𑐰𑐣𑐾𑐟 𑐢𑐵𑐫𑐾𑐩𑐵𑑅𑐐𑐸 𑐀𑐰𑐳𑑂𑐠𑐵 𑐡𑐸 𑑋

𑐱𑐿𑐎𑑂𑐲𑐶𑐎 𑐎𑑂𑐫𑐵𑐮𑐾𑐣𑑂𑐜𑐬 𑐎𑐠𑑄 𑑒𑑑𑑕 𑐣𑑂𑐴𑐸 𑐁𑐏𑑅 𑐧𑑂𑐰𑑄𑐎𑐾𑐩𑐵𑑅𑐐𑐸 𑐏𑑅𑐳𑐵𑑄 𑐣𑑄 𑑑𑑑 𑐎𑐎𑑂𑐲𑐵𑐫𑐵 𑐰𑐶𑐡𑑂𑐫𑐵𑐬𑑂𑐠𑐷 𑐏𑐸𑐮𑐵 𑐴𑐾 𑐥𑐹𑐰𑑄𑐎 𑐧𑑂𑐰𑐣𑐾 𑐩𑐏𑐣𑐷𑐐𑐸 𑐳𑐩𑐳𑑂𑐫𑐵 𑐡𑐸𑐐𑐸 𑐏𑑃 𑐎𑐣𑐵𑐡𑐷 𑑋 𑐰𑐫𑑂𑐎𑑅𑐫𑐵 𑐎𑐠𑑄 𑑑𑑒 𑐎𑐎𑑂𑐲𑐵𑐫𑐵 𑐰𑐶𑐡𑑂𑐫𑐵𑐬𑑂𑐠𑐷𑑄 𑐢𑐵𑑅𑐳𑐵 𑐥𑐹𑐰𑑄𑐎 𑐴𑐾 𑐎𑑀𑐬𑑂𑐳 𑐧𑑂𑐰𑐣𑐾 𑐡𑐂𑐐𑐸 𑐖𑐸𑐫𑐵𑑅 𑐄𑐩𑐶𑐟 𑐚𑑂𑐫𑐸𑐳𑐣 𑐎𑐎𑑂𑐲𑐵𑐫𑐵 𑐁𑐰𑐱𑑂𑐫𑐎𑐟𑐵 𑐩𑐡𑐸 𑑋 𑑑𑑑 𑐎𑐎𑑂𑐲𑐵𑐫𑐵 𑐱𑐿𑐎𑑂𑐲𑐶𑐎 𑐎𑑂𑐫𑐵𑐮𑐾𑐣𑑂𑐜𑐬 𑐁𑑅 𑐟𑐎 𑐣𑑄 𑐳𑐬𑐎𑐵𑐬𑑄 𑐩𑐶𑐮𑐾 𑐫𑐵𑐫𑐾 𑐩𑐦𑐸𑐐𑐸 𑐢𑐵𑐳𑐾𑑄 𑐄𑐎𑐶𑐫𑐵𑐟 𑐫𑐵𑐎𑐣𑑄 𑐩𑐶𑐮𑐾 𑐫𑐵𑐫𑐾𑐩𑐵𑑅𑐐𑐸 𑐳𑐸𑐗𑐵𑐰 𑐣𑑄 𑐰𑐫𑑂𑐎𑐮𑑄 𑐧𑐶𑐫𑐵𑐡𑐷 𑑋