𑐳𑑂𑐰𑐩𑑂𑐴 𑐣𑑂𑐫𑐵

𑐟𑑅𑐢𑑄𑐐𑐸 𑐖𑐮𑐵𑐱𑐫 𑐕𑐐𑐹 𑐡𑐸𑑋 𑐀𑐣 𑐮𑑅 𑐣𑑄 𑐟𑐳𑐎𑑄 𑐟𑐖𑐵𑐫𑐾𑐎 𑐡𑐸𑑋 𑐀𑐠𑐾 𑐖𑐹𑐧𑐮𑐫𑑂 𑐀𑐣 𑐣𑑂𑐫𑐵𑐟𑐫𑑂𑐟 𑐟𑐳𑐎𑑄 𑐫𑑅𑐐𑐸 𑐣𑐳𑐵 𑐗𑑂𑐫𑐵𑐄 𑐰 𑐩𑐾𑐩𑐾𑐐𑐸 𑐔𑐶𑐔𑐶𑐩𑐵𑑅𑐐𑐸 𑐮𑐏𑐫𑑂 𑐧𑐸𑐫𑐵𑐰𑐂𑐐𑐸 𑐩𑐵 𑐧𑐸𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸𑑋 𑐠𑐖𑑂𑐫𑐵𑑅𑐐𑐸 𑐠𑐵𑐫𑑂 𑐣𑑂𑐫𑐵𑐟𑐫𑑂𑐟 𑐟𑐳𑐎𑑄 𑐫𑐂𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐀𑐠𑐾 𑐖𑐸𑐫𑐵𑑅 𑐀𑐣 𑐫𑐎𑑂𑐰 𑐴𑐾 𑐣𑑂𑐫𑐵𑐟 𑐔𑑂𑐰𑑄 𑐰𑐫𑐵𑐔𑑂𑐰𑑄𑐐𑐸 𑐡𑐸𑑋 𑐏𑑂𑐫𑐾𑑃 𑐠𑑂𑐰𑐫𑐾𑐟 𑐮𑐵 𑐗𑐣𑑂 𑐡𑐎𑑂𑐰𑑄 𑐴𑐾 𑐣𑑂𑐫𑐵𑐟 𑐄𑐐𑐸 𑐖𑐮𑐵𑐱𑐫𑐫𑑂 𑐰𑐂𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐄𑐐𑐸 𑐖𑐮𑐵𑐱𑐫 𑐩𑐣𑐹𑐟𑐫𑑂𑐳𑑄 𑐎𑐵𑐔𑐵𑐎 𑐏𑐣𑐷 𑐩𑐏𑐸𑐐𑐸 𑐠𑐵𑐳𑐫𑑂 𑐮𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐄𑐐𑐸 𑐴𑐾 𑐖𑐮𑐵𑐱𑐫𑐫𑑂 𑐳𑑂𑐰𑐩𑑂𑐴 𑐣𑑂𑐫𑐵𑐟𑐫𑑂𑐐𑐸 𑐕𑐐𑐹 𑐥𑐸𑐔𑑅 𑐣𑑄 𑐔𑑂𑐰𑐣𑐵𑐔𑑂𑐰𑑄𑐐𑐸 𑐡𑐸𑑋 𑐂𑐩𑐶𑐐𑐸 𑐳𑑂𑐰𑐨𑐵𑐰 𑐢𑐵𑑅𑐳𑐵 𑐖𑑂𑐰𑑅𑐩𑐮𑐵𑑅 𑑋 𑐥𑐶𑐫𑐵 𑐣𑐵𑑄𑐫𑐵𑐩𑑂𑐴 𑐣𑑂𑐫𑐵 𑐳𑑄𑐎𑐚 𑐰𑐂𑐐𑐸 𑐮𑐎𑑂𑐲𑐞 𑐏𑐣𑐾𑐡𑐫𑐾𑐰𑑄 𑐴𑐾 𑐳𑑄𑐎𑐚 𑐖𑑂𑐫𑑄𑐎𑐾𑐐𑐸 𑐄𑐥𑐵𑐫 𑐫𑐵𑐫𑐾𑐩𑐵𑑅 𑐢𑐫𑐵𑐐𑐸 𑐏𑑃𑐫𑑂 𑐰𑐶𑐱𑑂𑐰𑐵𑐳 𑐫𑐵𑐂𑐩𑑂𑐴 𑐏𑑅 𑑋 𑐬𑐶𑐫𑐵 𑐢𑐵𑑅𑐳𑐵 𑐳𑑄𑐎𑐚 𑐰𑐫𑐾𑐰𑑄 𑐟𑐶𑐣𑐶 𑐰𑐥𑐵𑐏𑐾𑑄 𑐧𑐔𑐾 𑐖𑐸𑐂𑐐𑐸 𑐎𑐸𑐟𑑅 𑐫𑐵𑐫𑐾𑐩𑐵𑑅 𑐢𑐵𑐂𑐩𑑂𑐴 𑐏𑑅 𑑋 𑐔𑐶𑐫𑐵𑐫𑐵 𑐧𑐶𑐔𑐵𑑅 𑐡𑐸 𑐎𑐶 𑐳𑑄𑐎𑐚𑐫𑐵𑐟 𑐥𑐣𑐾𑐐𑐸 𑐧𑐵𑐫𑑂 𑐰𑐥𑐵𑐏𑐾𑑄 𑐧𑐔𑐾 𑐖𑐸𑐂𑐐𑐸 𑐢𑐂𑐐𑐸 𑐩𑑂𑐰𑐵𑑅𑐩𑐡𑐸𑐐𑐸 𑐏𑑃 𑐏𑑅, 𑐨𑐵𑐐𑑂𑐫𑐫𑑂 𑐕𑐸 𑐔𑑂𑐰𑐫𑐵𑐟𑑅𑐐𑐸 𑐡𑐸, 𑐰 𑐖𑐸𑐫𑐵𑑄 𑐟𑑂𑐰𑑅𑐟𑐷 𑑋

𑐕𑐣𑑂𑐴𑐸 𑐳𑐣𑐶𑐮𑐫𑑂 𑐩𑐵𑐗𑐶𑐟 𑐏𑐸𑐳𑐶𑐂 𑐣𑑂𑐫𑐵𑐮𑐵𑐣𑐵𑑅 𑐕𑐾𑑃𑐫𑑂 𑐮𑐶𑐴𑐵𑑄 𑐰𑐣𑐵𑐔𑑂𑐰𑑄𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐂𑐩𑐶𑐐𑐸 𑐖𑐵𑐮𑐫𑑂 𑐟𑐳𑐎𑑄 𑐎𑐩 𑐖𑐎 𑐣𑑂𑐫𑐵 𑐎𑑂𑐫𑐣𑐵𑐔𑑂𑐰𑑄𑐐𑐸 𑐡𑐸𑑋 𑐀𑐠𑐾 𑐖𑐸𑐫𑐵𑑅 𑐂𑐥𑐶𑑄 𑐳𑐎𑐳𑐶𑐫𑐵𑑄 𑐏𑑂𑐰𑐵𑑅 𑐏𑐶𑐄𑑃 𑑋 𑐠𑐸𑐧𑐮𑐫𑑂𑐮𑐵 𑐎 𑐴𑐾 𑐗𑐵𑑅𑐫𑐵 𑐔𑑂𑐰𑑄𑐔𑑂𑐰𑑄 𑐣𑑂𑐫𑐵 𑐣𑐂𑐥𑐶𑑄 𑐗𑑄𑐐𑑅𑐟𑐫𑑂 𑐧𑐠𑐵𑑄 𑐧𑑂𑐰𑐫𑐵 𑐰𑐣𑐵𑐔𑑂𑐰𑑄𑐐𑐸 𑐏𑐣 𑑋 𑐳𑐎𑐳𑐶𑐐𑐸𑑄 𑐟𑑂𑐰𑐵𑐠𑐫𑑂 𑐣𑑂𑐫𑐵 𑐎𑐟𑐵𑐎𑐵 𑐴𑐫𑐵𑐟𑑅𑐐𑐸 𑐡𑐸𑑋

𑐠𑑂𑐰 𑐏𑐣𑐵𑑅 𑐕𑐩𑑂𑐴𑐾𑐳𑐶𑐣𑑄 𑐀𑐣𑐸𑐩𑐵𑐣 𑐫𑐵𑐟, ‘𑐥𑐵𑐳𑐵𑐥𑐶𑑄 𑐗𑐵𑑅𑐫𑐵 𑐮𑐶𑐄𑐣𑐾 𑐏𑐸𑐳𑐶𑐮𑐶𑐳𑐾 𑐳𑑂𑐰𑐵𑐣𑐵𑐔𑑂𑐰𑑄𑐐𑐸 𑐖𑐮𑐵𑐱𑐫 𑐡𑐸 𑐠𑐾𑑄 𑐔𑑂𑐰𑑄, 𑐀𑐮𑐾 𑐀𑐣 𑐫𑐎𑑂𑐰 𑐴𑐾 𑐣𑑂𑐫𑐵 𑐡𑐸 𑐠𑐾𑑄 𑐔𑑂𑐰𑑄 𑑋

’𑐩𑐵𑐗𑐶𑐟 𑐮𑐫𑑂𑐮𑐫𑑂 𑐟𑐵𑐫𑐵𑑅 𑐗𑐵𑑅 𑐔𑐷𑐎𑐵𑑅 𑐖𑐮𑐵𑐱𑐫 𑐡𑐸𑐠𑐵𑐫𑑂 𑐰𑐣 𑑋 𑐀𑐣 𑐄𑐩𑐶𑐳𑑄 𑐫𑐎𑑂𑐰 𑐴𑐾 𑐣𑑂𑐫𑐵 𑐏𑐣 𑑋
𑐕𑐩𑑂𑐴 𑐩𑐵𑐗𑐶𑑄 𑐢𑐵𑐮, ‘𑐁𑐴𑐵 ! 𑐠𑐣 𑐮𑐵 𑐣𑑂𑐫𑐵𑐫𑐵 𑐣𑑂𑐫𑐵𑑄 𑐴𑐾 𑐖𑐵𑐫𑐵𑐔𑑂𑐰𑑄𑐐𑐸 𑐡𑐸𑑋 𑐠𑑁𑑄 𑐟𑐎 𑐗𑐷𑐳𑑄 𑐮𑐵 𑐳𑐷𑐎𑐾 𑐴𑐾 𑐩𑐦𑐸𑐐𑐸 𑐖𑐸𑐫𑐵𑐔𑑂𑐰𑐣 𑑋’
𑐩𑐾𑐩𑑂𑐴𑐾𑐳𑐶𑐣𑑄 𑐢𑐵𑐮, ‘𑐠𑐣 𑐖𑐵𑑅 𑐟𑑅𑐳𑐵 𑐮𑐵 𑐫𑐎𑑂𑐰 𑐴𑐾 𑐣𑑂𑐫𑐵 𑐎𑑂𑐫𑐣𑐷 𑐎𑐵 𑑋’
𑐴𑐵𑐣𑑄 𑐩𑐾𑐩𑑂𑐴𑑄 𑐢𑐵𑐮, ‘𑐠𑑁𑑄 𑐡𑑂𑐫𑑅 𑐏𑐶𑐄𑑃𑐫𑐵 𑐰𑐫𑐾𑐢𑐸𑑄𑐎𑐮, 𑐩𑑂𑐴𑐵𑑅𑐮 𑑋 𑐎𑐣𑑂𑐴𑐫𑑂 𑐳𑐸𑐠𑐫𑑂 𑐰𑐫𑐵𑑅 𑐖𑐵𑐮 𑐟𑐫𑐾𑐩𑐵𑐮𑐷 𑑋’

𑐠𑐸𑐮𑐶 𑐢𑐫𑐵𑑅 𑐂𑐥𑐶𑑄 𑐮𑐶𑐴𑐵𑑄 𑐰𑐣𑐵𑐕𑑂𑐰𑐟 𑑋 𑐩𑐵𑐗𑐶𑐟𑐫𑑂 𑐏𑑃 𑐮𑑂𑐴𑐵𑑅𑐐𑐸 𑐳𑑂𑐰𑐩𑑂𑐴𑑄 𑐣𑑂𑐫𑐵𑑄 𑐣𑑂𑐫𑐣𑐵𑐔𑑂𑐰𑑄𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐥𑐶𑐫𑐵 𑐣𑑂𑐫𑐵𑑄 𑐢𑐵𑐮, ‘𑐥𑐵𑐳𑐵𑐥𑐶𑑄, 𑐁𑑅 𑐗𑐷 𑐠𑐣 𑐔𑑂𑐰𑐣𑐾 𑐐𑑂𑐫𑐵𑐣𑐵𑐥𑐸𑐮 𑑋 𑐃 𑐡𑐣𑐶𑐧𑐮𑐫𑑂 𑐴𑐾 𑐖𑑂𑐫𑐵𑐣 𑐧𑐔𑐾 𑐫𑐵𑐫𑐾𑐐𑐸 𑐄𑐥𑐵𑐫 𑐫𑐵𑐫𑐾𑐩𑐵𑑅 𑑋 𑐖𑐶 𑐮𑐵 𑐁𑑅 𑐴𑐾 𑐠𑑂𑐰 𑐖𑐮𑐵𑐱𑐫 𑐟𑑂𑐰𑑅𑐟𑐵𑑅 𑐢𑑅𑐫𑐵 𑐮𑑃𑐥𑐸𑑄 𑐏𑐸𑐳𑐶𑐂 𑐰𑐣𑐾 𑐟𑑂𑐫𑐮 𑑋 𑐎𑐣𑑂𑐴𑐫𑑂 𑐳𑐸𑐠𑐫𑑂 𑐩𑐵𑐗𑐶𑐟 𑐰𑐫𑐵𑑅 𑐖𑐵𑐮 𑐟𑐂𑐧𑐮𑐫𑑂 𑐖𑐶 𑐮𑐵 𑐫𑐎𑑂𑐰 𑐴𑐾 𑐟𑐵𑐥𑐵𑐎 𑐠𑑂𑐫𑐣𑐾 𑐢𑐸𑑄𑐎𑐷 𑑋’

𑐬𑐶𑐣𑑂𑐫𑐵𑑄 𑐢𑐵𑐮, ‘𑐕 𑐰𑐣𑐾 𑐳𑐵 𑐴𑐸𑑃, 𑐖𑐶 𑐮𑐵 𑐰𑐫𑐾𑐩𑐏𑐸𑑋 𑐁𑐟𑐎 𑐠𑐣 𑐏𑐟𑐬𑐵 𑐰𑑅𑐐𑐸 𑐴𑐾 𑐐𑐣 𑐡𑐸 𑐢𑐎𑐵𑑅 𑐗𑐷 𑐀𑐥𑐵𑐫𑑂𑐳𑐎𑑄 𑐐𑑂𑐫𑐵𑐫𑐾𑐟 𑑋 𑐖𑐸𑐂𑐦𑐸, 𑐠𑑂𑐰 𑐳𑑄𑐎𑐚 𑐴𑐾 𑐩𑐰𑐂 𑑋 𑐂𑐥𑐶𑑄 𑐩𑐵𑐗𑐶𑐟𑐫𑑂 𑐠𑐣 𑐰𑐫𑐾𑐐𑐸 𑐎𑐵𑐬𑑂𑐫𑐎𑑂𑐬𑐩 𑐴𑐾 𑐬𑐡𑑂𑐡 𑐖𑐂𑐦𑐸𑑋 𑐔𑐵𑐣𑑂𑐴𑐫𑑂 𑐂𑐩𑐶𑐐𑐸 𑐖𑐵𑐮 𑐴𑐾 𑐕𑐸𑑄 𑐟𑑂𑐫𑐵𑐣𑐵𑐧𑐷𑐦𑐸𑑋 𑐂𑐩𑐶𑐐𑐸 𑐧𑐳𑑂𑐟𑐷 𑐴𑐾 𑐩𑐶𑑄 𑐣𑐫𑐾𑐦𑐸𑑋 𑐨𑐸𑐏𑐵𑐫𑑂 𑐧𑑂𑐰𑐫𑐵𑑅 𑐂𑐩𑐶𑐐𑐸 𑐐𑐵𑑄 𑐴𑐾 𑐢𑑂𑐰𑐳𑑂𑐟 𑐖𑐸𑐂𑐦𑐸𑑋 𑐔𑐵𑐣𑑂𑐴𑐫𑑂 𑐎𑐶𑐳𑐶𑐫𑐵 𑐳𑑂𑐰𑑄 𑐥𑐵𑐫𑑂𑐢𑐵𑑅 𑐰𑐵 𑐰𑐫𑐵𑑅 𑐂𑐩𑐶𑐐𑐸 𑐐𑐵𑑄 𑐴𑐾 𑐔𑐸𑐂𑐎𑐵𑐫𑑄𑐎𑐾𑐦𑐸𑑋 𑐀𑐠𑐾 𑐖𑐸𑐫𑐵𑑅 𑐂𑐥𑐶𑑄 𑐰 𑐴𑐾 𑐰𑐂 𑐢𑐎𑐵𑑅 𑐢𑐵𑐫𑐾 𑐦𑐂𑐩𑐏𑐸 𑑋 𑐂𑐥𑐶𑑄 𑐰 𑐴𑐾 𑐰𑐮 𑐢𑐵𑑅𑐳𑐵 𑐄𑐧𑐮𑐫𑑂 𑐴𑐾 𑐧𑐶𑐔𑐵𑑅 𑐫𑐵𑐫𑐾 𑑋 𑐂𑐩𑐶𑐳𑑄 𑐖𑐵𑐮 𑐴𑐾 𑐟𑑅𑐳𑐵𑑄 𑐗𑐷 𑐩𑐎𑑂𑐫𑐣𑐾 𑐣𑑄 𑐦𑐸𑑋’

𑐔𑐶𑐫𑐵 𑐣𑑂𑐫𑐵𑑄 𑐨𑐵𑐐𑑂𑐫𑐰𑐵𑐡𑐷 𑐏𑑃 𑐮𑑂𑐴𑐵𑐟, ‘𑐧𑐶𑐳𑐶𑐄𑑃 𑐰𑐣𑐵𑑄 𑐕𑐸𑑄 𑐖𑐸𑐂𑐐𑐸𑐰𑐵𑐮𑐵 𑐩𑐡𑐸𑑋 𑐩𑐵𑐗𑐶𑐟𑐫𑑂 𑐰𑐫𑐾𑐩𑐵𑑅𑐐𑐸 𑐡𑐸𑐳𑐵 𑐰𑐂 𑑋 𑐗𑐷 𑐖𑐵𑐮𑐫𑑂 𑐎𑑂𑐫𑐣𑐾𑐩𑐵𑑅𑐐𑐸 𑐡𑐸𑐳𑐵 𑐎𑑂𑐫𑐣𑐷 𑑋 𑐨𑐵𑐐𑑂𑐫𑐫𑑂 𑐳𑐷𑐐𑐸 𑐴𑐾 𑐔𑑂𑐰𑐫𑐵𑐟𑑅𑐐𑐸 𑐡𑐸𑐳𑐵 𑐕𑐸 𑐫𑐵𑐫𑐾𑐦𑐂 ?’

𑐠𑐸𑐎𑐠𑑄 𑐥𑐶𑐫𑐵 𑐮𑐵 𑐀𑐣𑑄 𑐰𑐣𑐵 𑐴𑐾 𑐕𑑂𑐰𑐟 𑑋 𑐬𑐶𑐫𑐵 𑐰 𑐔𑐶𑐫𑐵 𑐀𑐣 𑐴𑐾 𑐔𑑂𑐰𑐣𑐵𑐔𑑂𑐰𑐣 𑑋 𑐳𑐸𑐠 𑐖𑐸𑐂𑐰𑑄 𑐩𑐵𑐗𑐶𑐟 𑐖𑐵𑐮 𑐖𑑂𑐰𑐣𑐵𑑅 𑐰𑐮 𑑋 𑐖𑐵𑐮 𑐥𑑂𑐫𑐣𑐵𑑅 𑐢𑐩𑐵𑐢𑐩 𑐣𑑂𑐫𑐵 𑐮𑐵𑐟 𑑋 𑐬𑐶𑐫𑐵𑑄 𑐳𑑄𑐎𑐚 𑐰𑑅𑐐𑐸 𑐏𑐣𑐾𑐰𑑄 𑐖𑑂𑐫𑐵𑐣 𑐧𑐔𑐾 𑐫𑐵𑐫𑐾𑐐𑐸 𑐄𑐥𑐵𑐫 𑐧𑐶𑐔𑐵𑑅 𑐫𑐵𑐟 𑑋 𑐰𑑄 𑐠𑑅𑐐𑐸 𑐣𑑂𑐴𑑂𑐫𑐥𑐸 𑐔𑐵𑑅𑐴𑐶𑐂𑐎𑐵𑐔𑑂𑐰𑐣 𑑋

𑐖𑑅𑐏𑑅 𑐐𑐣𑑄 𑐳𑐸𑐮𑐾𑐠𑐵𑐫𑑂 𑐡𑐸 𑐮𑐵 𑐢𑐎𑐵𑑅 𑐧𑐶𑐔𑐵𑑅 𑐫𑐵𑐟 𑑋 𑐴𑑂𑐰𑑅 𑐥𑑂𑐰𑐵𑑅 𑐐𑐣𑑄 𑐩𑐡𑐸𑑋 𑐠𑐸𑐧𑐮𑐫𑑂 𑐮𑐵𑐎 𑐴𑐾 𑐰𑐫𑐵𑐟 𑐕𑐩𑑂𑐴 𑐥𑐱𑐸 𑐳𑐶𑐣𑐵𑑅 𑐟𑑅𑐣𑑂𑐴𑐸 𑐣𑑂𑐴𑑂𑐫𑐰𑑄𑐣𑐶𑐳𑐾𑑄 𑐴𑐾 𑐄𑐐𑐸 𑐖𑐮𑐵𑐱𑐫𑐫𑑂 𑐮𑑂𑐫𑐴𑐾𑑃 𑐥𑐸𑐫𑐵𑐔𑑂𑐰𑑄𑐐𑐸 𑐮𑐸𑐩𑐣𑐵𑐰𑐮 𑑋 𑐰𑑄 𑐰 𑐮𑐵𑐱 𑐩𑐵𑑅𑐰𑐣 𑑋

𑐮𑐸 𑐣𑑄 𑐮𑐸𑐮 𑑋 𑐮𑐵𑐱 𑐢𑑂𑐰𑐐𑐷 𑐢𑐸𑑄𑐎𑐮 𑑋 𑐬𑐶𑐫𑐵 𑐰 𑐴𑐾 𑐮𑐵𑐱𑐫𑐵 𑐥𑑂𑐰𑐵𑐠𑐫𑑂 𑐡𑐸𑐴𑐵𑑄 𑐰𑐣𑐵𑑅 𑐥𑐶𑐴𑐵𑑄 𑐰𑑅𑐧𑐮𑐫𑑂 𑐰𑐫𑐵𑐐𑐸 𑐩𑑂𑐴 𑐕𑐩𑑂𑐴𑑄 𑐢𑑂𑐰𑐐𑐷 𑐣𑐰𑐮 𑑋 𑐨𑐔𑐵 𑐖𑐵𑐫𑐾𑐎𑐵𑑅 𑐬𑐶𑐫𑐵 𑐩𑐵𑐗𑐶𑐫𑐵 𑐖𑐵𑐮𑐫𑑂 𑐎𑑂𑐫𑐣 𑑋

𑐩𑐵𑐗𑐶𑑄 𑐖𑐵𑐮 𑐳𑐵𑐮, 𑐀𑐮𑐾 𑐄𑐎𑐷 𑐎𑑂𑐫𑑄𑐥𑐶𑑄 𑐣𑑂𑐫𑐵𑐟 𑐖𑐮𑐵𑐱𑐫𑐫𑐵 𑐳𑐶𑐠𑐫𑑂 𑐫𑑄𑐎𑐵𑑅 𑐨𑑂𑐰𑐥𑐸𑐂𑐎𑐮 𑑋 𑐩𑐾𑐥𑐶𑑄 𑐣𑑂𑐫𑐵𑐟 𑐮𑐵 𑐦𑐵𑐟𑐵𑐦𑐵𑐟𑐵 𑐥𑐸𑐮 𑑋 𑐬𑐶𑐫𑐵 𑐕𑐩𑑂𑐴 𑐳𑐷𑐩𑑂𑐴 𑐠𑐾𑑄 𑐔𑑂𑐰𑑄𑐎 𑐳𑐵𑐳𑑅 𑐴𑐾 𑐩𑐮𑑂𑐴𑐵𑐳𑐾 𑐔𑑂𑐰𑐣𑐵𑐔𑑂𑐰𑐣 𑑋 𑐩𑐵𑐗𑐶𑑄 𑐢𑑂𑐰𑐐𑐷 𑐣𑐰𑑅𑐐𑐸 𑐣 𑐟𑐵𑐮, 𑐀𑐮𑐾 𑐐𑐸𑐩𑑂𑐴 𑐣𑑂𑐫𑐵 𑐢𑑂𑐰𑐐𑐷 𑐣𑐰𑑅𑐐𑐸 𑐢𑐎𑐵𑑅 𑐩𑐵𑐮𑐵𑐳𑑂𑐰𑑅𑐧𑐮𑐫𑑂 𑐰 𑐳𑐷𑐩𑑂𑐴 𑐠𑐾𑑄 𑐔𑑂𑐰𑐣𑐵𑐔𑑂𑐰𑑄𑐩𑑂𑐴 𑐬𑐶𑐫𑐵𑐫𑐵𑐟 𑐏𑐣 𑑋 𑐎𑐫𑐵𑑅 𑐣𑐟𑐸𑐣𑐵 𑐳𑑂𑐰𑐮 𑐀𑐮𑐾 𑐠𑑂𑐰 𑐮𑐵 𑐳𑐶𑐣𑐵𑑅 𑐢𑑂𑐰𑐐𑑂𑐐𑐷𑐐𑐸 𑐴𑐾 𑐟𑑅𑐣𑑂𑐴𑐸 𑐡𑐫𑐾𑐢𑐸𑑄𑐎𑐮 𑐏𑐣𑐷 𑐢𑐎𑐵𑑅 𑐮𑐏𑐫𑑂 𑐟𑐸𑑄 𑐰𑐵𑑄𑐕𑑂𑐰𑐫𑐵𑐧𑐶𑐮

𑐬𑐶𑐫𑐵 𑐠𑑅𑐐𑐸 𑐧𑐸𑐡𑑂𑐢𑐶 𑐕𑑂𑐫𑐮𑐵𑑅 𑐳𑑄𑐎𑐚𑑄 𑐥𑐶𑐴𑐵𑑄 𑐰𑐫𑐾𑐟 𑐳𑐦𑐮 𑐖𑐸𑐮 𑑋 𑐮𑐏𑐫𑑂 𑐮𑐵𑐫𑐾𑐰𑑄 𑐴𑐾 𑐰 𑐳𑐸𑐮𑐮𑐮 𑐎𑑂𑐰𑐠𑑂𑐫𑑄𑐎 𑐎𑐸𑐴𑐵𑑄 𑐰𑐣𑐵𑑅 𑐳𑐸𑐬𑐎𑑂𑐲𑐶𑐟 𑐠𑐵𑐳𑐫𑑂 𑐠𑑂𑐫𑑄𑐎𑑅𑐰𑐣 𑑋  𑐔𑐶𑐫𑐵 𑐣𑑂𑐫𑐵 𑐣𑑄 𑐩𑐾𑐩𑑂𑐴 𑐩𑐵𑐗𑐶𑐫𑐵 𑐖𑐵𑐮𑐫𑑂 𑐎𑑂𑐫𑑄𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐀𑐮𑐾 𑐕𑐐𑑅 𑐚𑑀𑐎𑐬𑐶𑐂 𑐟𑐫𑐵𑐧𑐶𑐄𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐨𑐵𑐐𑑂𑐫𑐫𑐵 𑐨𑐬𑐵𑐾𑐳𑐵𑐫𑑂 𑐔𑑂𑐰𑐣𑐷𑐩𑑂𑐴 𑐔𑐶𑐫𑐵 𑐣𑑂𑐫𑐵 𑐄𑐐𑐸 𑐴𑐾 𑐚𑑀𑐎𑐬𑐶𑐂 𑐩𑐾𑐩𑐾𑐥𑐶𑑄 𑐣𑑂𑐫𑐵𑐟 𑐠𑐾𑑄 𑐰𑐵𑐠𑐵𑐰𑐵𑐠𑐵 𑐎𑐣𑐵𑑅 𑐳𑐶𑐣𑐵𑐰𑐣 𑑋