𑐳𑑂𑐰𑐎𑑂𑐰𑑅𑐐𑐸 𑐩𑐔𑐵 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑐟

𑐣𑐾𑐰𑐵𑑅 𑐰𑐳𑑂𑐟𑐷 𑐣𑐾𑐰𑐵𑑅 𑐳𑑂𑐎𑐹𑐮 𑐀𑐨𑐶𑐫𑐵𑐣𑐫𑐵 𑐐𑑂𑐰𑐳𑐵𑐮𑐫𑑂 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑑒𑑗 𑐰𑐜𑐵𑐰𑑂𑐫𑐵𑐥𑐷 𑐏𑐸𑐐𑐹 𑐧𑑂𑐰𑐣𑐾𑐎𑐸𑐠𑐶𑐂 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫 𑐎𑐫𑐵𑑅 𑐧𑑂𑐰𑐣𑐵𑐔𑑂𑐰𑑄𑐥𑐶𑑄 𑐧𑑂𑐰𑐩𑐶𑐥𑐶𑐣𑑂𑐟 𑐩𑐔𑐵 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑑅𑐐𑐸 𑐡𑐸 𑑋

𑐱𑐸𑐎𑑂𑐬𑐰𑐵𑑅 𑐫𑐾𑑃𑐫𑐵 𑐀𑐣𑑂𑐣𑐥𑐹𑐬𑑂𑐞 𑐩𑐵𑐢𑑂𑐫𑐩𑐶𑐎 𑐰𑐶𑐡𑑂𑐫𑐵𑐮𑐫 𑐎𑐸𑐣𑐵𑐫𑑂 𑐟𑑂𑐰𑐵𑐮𑐫𑑂 𑐔𑑂𑐰𑑄𑐐𑐸 𑐧𑑂𑐰𑐣𑐾𑐎𑐸𑐠𑐶𑐂 𑐕𑐐𑐹 𑐖𑑂𑐫𑐵𑐗𑑂𑐰𑑅 𑐫𑐵𑐳𑐾𑑄 𑐠𑐠𑐾 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋

𑐫𑐾𑑃𑐫𑐵 𑑒𑑗 𑐰𑐜𑐵 𑐡𑐸𑐣𑐾𑐫𑐵 𑐀𑐮𑑂𑐰𑐬𑑂𑐚 𑐁𑐂𑐣𑑂𑐳𑑂𑐚𑐵𑐂𑐣 𑐊𑐎𑐾𑐡𑐾𑐩𑐶, 𑐀𑐣𑑂𑐣𑐥𑐹𑐬𑑂𑐞 𑐄𑐔𑑂𑐔 𑐩𑐵𑐢𑑂𑐫𑐩𑐶𑐎 𑐰𑐶𑐡𑑂𑐫𑐵𑐮𑐫, 𑐟𑑂𑐫𑑁𑐜 𑐩𑐵𑐢𑑂𑐫𑐩𑐶𑐎 𑐰𑐶𑐡𑑂𑐫𑐵𑐮𑐫, 𑐨𑐵𑐣𑐸𑐨𑐎𑑂𑐟 𑐩𑐵𑐢𑑂𑐫𑐩𑐶𑐎 𑐰𑐶𑐡𑑂𑐫𑐵𑐮𑐫 (𑐡𑐬𑐧𑐵𑐬 𑐳𑑂𑐎𑐹𑐮) 𑐰 𑐩𑐴𑐵𑑃𑐎𑐵𑐮 𑐩𑐵𑐢𑑂𑐫𑐩𑐶𑐎 𑐰𑐶𑐡𑑂𑐫𑐵𑐮𑐫𑐫𑐵 𑐕𑐐𑐹 𑐟𑐐𑐶𑑄𑐣𑐶𑐳𑐾𑑄 𑐔𑑂𑐫𑐵𑐐𑐹 𑐟𑐐𑐶𑑄𑐟𑐎 𑐧𑑂𑐰𑐣𑐵𑐔𑑂𑐰𑑄𑐥𑐶𑑄 𑐔𑑂𑐫𑐵𑐩𑑂𑐴 𑐔𑑂𑐫𑐵𑐩𑑂𑐴 𑐧𑑂𑐰𑐩𑐶𑐥𑐶𑐣𑑂𑐟 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋

𑐀𑐠𑐾𑐴𑐾, 𑐳𑑄𑐳𑑂𑐎𑐺𑐟𑐶 𑐩𑐵𑐢𑑂𑐫𑐩𑐶𑐎 𑐰𑐶𑐡𑑂𑐫𑐵𑐮𑐫𑐫𑐵 𑐏𑐸𑐐𑐹 𑐟𑐐𑐶𑑄 𑐧𑑂𑐰𑐣𑐵𑐔𑑂𑐰𑑄𑐥𑐶𑑄 𑐳𑑂𑐰𑐩𑑂𑐴 𑐧𑑂𑐰𑐩𑐶𑐥𑐶𑐣𑑂𑐟 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋

𑐫𑐾𑑃 𑑒𑑗 𑐰𑐜𑐵𑐫𑐵 𑐰𑐜𑐵𑐢𑑂𑐫𑐎𑑂𑐲 𑐫𑑀𑐐𑐾𑐱 𑐏𑐜𑑂𑐐𑐷𑐫𑐵 𑐩𑐹𑐥𑐵𑐴𑐵𑑃𑐳𑐸𑐂 𑐖𑐹𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐔𑐵 𑐳𑐶𑐬𑐥𑐵𑑅𑐫𑐵 𑐁𑐬𑑂𑐠𑐶𑐎 𑐎𑐰𑑅𑐫𑐵 𑐎𑐖𑐶 𑐳𑐸𑐣𑐶𑐮 𑐎𑐸𑐩𑐵𑐬 𑐱𑐵𑐎𑑂𑐫, 𑐳𑐶𑐬𑐥𑐵𑑅 𑐎𑑀𑐲𑐫𑐵 𑐡𑐵𑐟𑐵𑐥𑐶𑑄 𑐖𑐵𑐥𑐣𑐷𑐖 𑐣𑐵𑐐𑐬𑐶𑐎 𑐩𑐵𑐳𑐵𑐴𑐶𑐬𑑀 𑐫𑐵𑐩𑐵𑐎𑐵𑐰𑐵 (𑐧𑑂𑐫𑐵𑑃𑐔𑐵 𑐡𑐵𑐃), 𑐜𑐵. 𑐰𑐶𑐖𑐫 𑐳𑐿𑑄𑐖𑐸, 𑐎𑐸𑐩𑐸𑐡 𑐱𑑂𑐬𑐾𑐲𑑂𑐛𑐮𑐶𑐳𑐾𑑄 𑐠𑐷𑐠𑐷 𑐰𑑂𑐫𑐎𑑂𑐟𑐶𑐥𑐶𑐣𑑂𑐳𑑄 𑐧𑑂𑐰𑐩𑐶𑐥𑐶𑐣𑑂𑐟 𑐴𑐣𑐵𑐥𑑁, 𑐠𑐷𑐠𑐷 𑐐𑐶𑐦𑑂𑐚 𑐴𑑂𑐫𑐵𑐩𑑂𑐥𑐬 𑐰 𑐣𑐐𑐡 𑐣𑑂𑐫𑐵𑐡𑑂𑐰𑑅 𑐟𑐎𑐵 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐩𑐔𑐵 𑐳𑐶𑐬𑐥𑐵𑑅 𑐖𑑂𑐫𑐵𑐗𑑂𑐰𑑅𑐫𑐵𑐟 𑐎𑐫𑐵𑑅 𑐣𑐾𑐰𑐵𑑅 𑐰𑐳𑑂𑐟𑐷 𑐣𑐾𑐰𑐵𑑅 𑐳𑑂𑐎𑐹𑐮 𑐀𑐨𑐶𑐫𑐵𑐣𑐫𑐵 𑐎𑐖𑐶 𑐮𑐶𑐳𑐾𑑄 𑐩𑐔𑐵 𑐳𑐶𑐬𑐥𑐵𑑅 𑐖𑑂𑐫𑐵𑐗𑑂𑐰𑑅𑐫𑐵 𑐎𑐖𑐶 𑐡𑐶𑐥𑐎 𑐟𑐸𑐮𑐵𑐢𑐬𑑄 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅𑐳𑐵 𑐀𑐠𑐾𑐴𑐾 𑐩𑐔𑐵 𑐳𑐶𑐬𑐥𑐵𑑅 𑐖𑑂𑐫𑐵𑐗𑑂𑐰𑑅 𑐩𑐾𑐩𑐾𑐐𑐸 𑐰𑐜𑐵𑐫𑑂 𑐣𑑄 𑐣𑑂𑐴𑑂𑐫𑐵𑐎𑐾𑐐𑐸 𑐰𑐶𑐔𑐵𑑅𑐫𑐵𑐟 𑐎𑐫𑐵𑑅 𑐫𑐾𑑃 𑑑𑑘 𑐰𑐜𑐵𑐫𑐵 𑐰𑐜𑐵𑐢𑑂𑐫𑐎𑑂𑐲 𑐣𑑂𑐴𑐸𑐔𑑂𑐕𑐾𑐎𑐵𑐖𑐷 𑐩𑐴𑐬𑑂𑐖𑐣𑑄 𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐧𑑂𑐰𑐟𑐶 𑐎𑐵𑑅𑐥𑐶𑑄 𑐳𑐎𑐳𑐶𑐟 𑐩𑐔𑐵 𑐳𑐶𑐬𑐥𑐵𑑅 𑐁𑐬𑑂𑐠𑐶𑐎 𑐎𑐰𑑅𑐫𑐵 𑐎𑐖𑐶 𑐳𑐸𑐣𑐶𑐮 𑐎𑐸𑐩𑐵𑐬 𑐱𑐵𑐎𑑂𑐫𑑄 𑐳𑐸𑐨𑐵𑐫𑑂 𑐡𑐾𑐕𑐵𑐣𑐵𑐡𑐷𑐐𑐸 𑐏𑑅𑐳𑐵 𑐀𑐠𑐾𑐴𑐾, 𑐠𑐸𑐐𑐸 𑐖𑑂𑐫𑐵𑐗𑑂𑐰𑑅 𑐟𑐵𑑅𑐮𑐵𑐎𑑂𑐎 𑐣𑑂𑐴𑑂𑐫𑐵𑐎𑐾𑐐𑐸 𑐣𑐶𑐟𑐶𑑄 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐷𑐥𑐶𑑄 𑐳𑐎𑐮𑐳𑐶𑐟 𑐏𑐵𑐡𑐵 𑐣𑑂𑐫𑐫𑐾𑐎𑐵𑑅 𑐳𑐸𑐨𑐵𑐫𑑂 𑐡𑐾𑐕𑐵𑑅𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵 𑐩𑐮𑑂𑐮 𑐎𑐾 𑐳𑐸𑐣𑑂𑐡𑐬𑐮𑐶𑐳𑐾𑑄 𑐨𑐵𑐲𑐵𑐏𑑂𑐫𑑅𑐫𑐵 𑐰𑑂𑐫𑐎𑑂𑐟𑐶𑐥𑐶𑑄 𑐰 𑐠𑐷𑐠𑐷 𑐧𑑂𑐰𑐣𑐾𑐎𑐸𑐠𑐶𑐫𑐵 𑐥𑑂𑐬𑐶𑐣𑑂𑐳𑐶𑐥𑐮𑐮𑐶𑐳𑐾𑑄 𑐱𑐶𑐎𑑂𑐲𑐎 𑐱𑐶𑐎𑑂𑐲𑐶𑐎𑐵𑐥𑐶𑐣𑐶𑐐𑐸 𑐄𑐥𑐳𑑂𑐠𑐶𑐟 𑐡𑐹𑐐𑐸 𑐏𑑅 𑑋