𑐳𑑂𑐰𑐎𑑂𑐰𑑅𑐐𑐸 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐣𑐏𑑅 𑐖𑐶𑐐𑐸 𑐩𑐶𑐏𑐵𑐫𑑂

𑐳𑑂𑐰𑐎𑑂𑐰𑑅𑐐𑐸 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐣𑐏𑑅 𑐣𑐎𑐟𑐶𑐣𑐶 𑐴𑐾 𑐟𑑅𑐖𑐶𑐎 𑐎𑑂𑐰𑐔𑐵𑐮 𑑋 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐏𑑂𑐫𑑅𑐫𑐵 𑐰𑐶𑐎𑐵𑐳 𑐫𑐵𑐫𑐾𑐐𑐸 𑐩𑐹 𑐁𑐖𑑂𑐖𑐸 𑐟𑐫𑐵 𑐳𑐣𑑂𑐢𑑂𑐫𑐵 𑐚𑐵𑐂𑐩𑑂𑐳 𑐥𑐶𑐠𑐣𑐵 𑐥𑑂𑐬𑐵.𑐮𑐶.𑐫𑐵 ‘𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳’ 𑐣𑑂𑐴𑐶𑐥𑑁𑐫𑐵 𑐐𑑂𑐰𑐳𑐵𑐮𑐫𑑂 𑐫𑐾𑑃𑐫𑐵 𑐥𑑂𑐬𑐖𑑂𑐘𑐵 𑐨𑐰𑐣𑐫𑐵 𑐔𑐎𑑄 𑐡𑐧𑐸𑐮𑐶𑐂 𑐣𑐶𑐣𑑂𑐴𑐸𑐫𑑄𑐎𑑄 𑐖𑐹𑐐𑐸 𑐠𑑂𑐰 𑐳𑐵𑐴𑐶𑐟𑑂𑐫 𑐣𑐏𑐟𑐫𑑂 𑐖𑐶𑑄 𑐣𑑄 𑐣𑐶𑐣𑑂𑐴𑐸𑐫𑑄𑐎𑑄 𑐧𑑂𑐰𑐟𑐶 𑐎𑐵𑐫𑐾 𑐏𑐣 𑑋

𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐮𑐵 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐣𑐏𑑅𑐫𑐵 𑐐𑑂𑐰𑐳𑐵𑑅 𑐏𑐮𑑅 𑐰 𑐖𑑅𑐡𑐸𑐖𑑅𑐥𑐶𑑄 𑐳𑐎𑐳𑐶𑐟𑑄 𑐳𑐸𑐨𑐵𑐫𑑂 𑐡𑐾𑐕𑐵𑐣𑐵 𑐔𑑂𑐰𑐣𑐵 𑑋 𑐠𑑂𑐰 𑐳𑑂𑐰𑐫𑐵𑑄 𑐣𑑂𑐴𑑂𑐫𑑅 𑐣𑐶𑐡𑑃 𑐟𑐎 𑐕𑐣𑑂𑐴𑐸 𑐕𑐣𑑂𑐴𑐸 𑐖𑐎 𑐖𑐹𑐐𑐸 𑐳𑐵𑐴𑐶𑐟𑑂𑐫 𑐣𑐏𑑅 𑐠𑐸𑐐𑐳𑐷 𑐣𑐶𑐣𑑂𑐴𑐸 𑐖𑐸𑐮 𑑋 𑐖𑑂𑐫𑐵𑐗𑑂𑐰𑑅𑐫𑐵 𑐢𑐮𑑅𑐎𑐠𑑄 𑐣𑐶𑐣𑑂𑐴𑐸𑐫𑑄𑐎𑑄 𑐖𑐹𑐐𑐸 𑐖𑑂𑐫𑐵𑐗𑑂𑐰𑑅 𑐳𑐦𑐮 𑐴𑐾 𑐖𑐹𑐐𑐸 𑐡𑐸 𑑋 𑐢𑐫𑐵𑐟𑑅𑐐𑐸 𑐃 𑐳𑑂𑐰𑐫𑐵𑑄 𑐨𑐔𑐵 𑐮𑐶𑐥𑐵 𑐴𑐾 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐵𑑅𑐐𑐸 𑐏𑑅𑐳𑐵𑑄 𑐖𑑂𑐫𑐵𑐗𑑂𑐰𑑅𑐫𑐵 𑐄𑐮𑐾𑐖𑑂𑐫𑐵, 𑐕𑐐𑐹 𑐴𑐾 𑐡𑐧𑐸𑐮𑐶𑐂 𑐣𑑂𑐴𑐫𑑂𑐐𑐹 𑐳𑐦𑐹𑐫𑐵 𑐰𑐶𑐩𑑀𑐔𑐣, 𑐥𑐵𑐴𑐵𑑄𑐥𑐶𑐣𑐶𑐐𑐸 𑐨𑐶𑑄𑐟𑐸𑐣𑐵 𑐣𑑂𑐰𑐔𑐸 𑐰 𑐳𑐦𑐹𑐫𑐵 𑐳𑐩𑐷𑐎𑑂𑐲𑐵 𑐟𑐳𑐎𑑄 𑐳𑐵𑐣𑑂𑐡𑐬𑑂𑐨𑐶𑐎 𑐖𑐹 𑑋

𑐀𑐣𑑄 𑐮𑐶𑐥𑐵 𑐳𑐦𑐸𑐮𑐶𑐂 𑐳𑑂𑐬𑐲𑑂𑐚𑐵𑐥𑐶𑐣𑐶𑐐𑐸 𑐴𑐳𑑂𑐟𑐵𑐎𑑂𑐲𑐬 𑐰 𑐬𑐘𑑂𑐖𑐣𑐵 𑐮𑐶𑐥𑐶𑐫𑐵 𑐥𑐸𑐣𑐬𑐸𑐟𑑂𑐠𑐵𑐣𑐫𑐵 𑐧𑐵𑐬𑐾 𑐥𑐸𑐔𑑅 𑐳𑐴𑐮𑐴 𑐖𑐹𑐧𑐮𑐫𑑂 𑐡𑐬𑑂𑐱𑐎𑐟𑐫𑑂𑐟 𑐠𑑂𑐰 𑐖𑑂𑐫𑐵𑐗𑑂𑐰𑐮𑑄 𑐳𑐵𑐮𑐵 𑐟𑐫𑐾 𑐩𑐦𑐸𑐟 𑑋 𑐏 𑐮𑐵 𑐀𑐧𑐮𑐫𑑂 𑐡𑐬𑑂𑐱𑐎𑐟𑐫𑑂 𑐥𑑂𑐰𑐵𑐠𑐫𑑂 𑐥𑐶𑐟𑑂𑐫𑐵𑐣𑐵𑑅 𑐣𑐳𑐵𑐫𑐵 𑐳𑑂𑐚𑐮𑐥𑐵𑐏𑐾 𑐧𑑂𑐰𑐵𑑄 𑐰𑑄𑐐𑐸 𑐣𑑄 𑐏𑐣𑐾 𑐡𑐟 𑑋 𑐀𑐣𑑄 𑐮𑐶𑐥𑐵 𑐔𑑂𑐰𑐳𑐸 𑐧𑑂𑐰𑐣𑐾𑐐𑐸 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐵𑐟 𑑋 𑐡𑐬𑑂𑐱𑐎𑐟𑐫𑑂𑐟 𑐕𑐎𑑂𑐰𑑅 𑐔𑐶𑐣𑐵 𑐟𑐫𑐾 𑐩𑐦𑐸𑐟𑐎𑐶 𑐴𑐵𑐎𑐣𑑄 𑐴𑐵𑐎𑐣𑑄 𑐔𑐶𑐂𑐟 𑐟𑐳𑐎𑑄 𑐠𑐵𑐎𑐸𑐂 𑐫𑑅, 𑐠𑐣 𑐣𑑄 𑐀𑐠𑐾𑐴𑐾 𑐖𑐸𑐮 𑑋

𑐳𑐵𑐴𑐶𑐟𑑂𑐫 𑐣𑐏𑐟𑐫𑑂 𑐰𑑅𑐥𑐶𑑄 𑐳𑐵𑐴𑐶𑐟𑑂𑐫 𑐣𑑂𑐫𑐣𑐾𑐟 𑐴𑐾 𑐄𑐮𑐶 𑐄𑐟𑑂𑐳𑐵𑐴𑐶𑐟 𑐖𑐹𑐐𑐸 𑐩𑐏𑐣 𑑋 𑐰 𑐖𑐎 𑐩𑐏𑐸 𑐳𑐵𑐴𑐶𑐟𑑂𑐫 𑐰𑐵𑐔𑐣 𑐫𑐵𑐣𑐵𑐡𑐷𑐥𑐶𑑄 𑐳𑐵𑐴𑐶𑐟𑑂𑐫𑐎𑐵𑐬𑐥𑐶𑑄 𑐟𑐎𑑄 𑐠𑑅𑐐𑐸 𑐬𑐔𑐣𑐵 𑐧𑑂𑐰𑐣𑐾 𑐳𑐶𑐢𑐫𑐾𑐎𑐵𑑅 𑐀𑐣 𑐩𑐔𑑂𑐰𑑄 𑐢𑐂𑐐𑐸 𑐀𑐧𑐮𑐫𑑂 𑐳𑐷 𑐡𑐟 𑐐𑐧𑐮𑐫𑑂 𑐩𑐟𑐶𑐣𑐵𑐫𑐵 𑐔𑐶𑑄 𑐮𑑅𑐮𑑂𑐴𑐵𑐣𑐵 𑐎𑐵𑐫𑐾𑐟 𑐟𑐎𑑄 𑐁𑐥𑐵𑐮𑑄 𑐳𑐵𑐴𑐶𑐟𑑂𑐫𑐎𑐵𑐬𑐟 𑐀𑐣 𑐩𑐡𑐫𑐾 𑐢𑐸𑑄𑐎𑐹𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐱𑐵𑐫𑐡 𑐱𑐸𑐎𑑂𑐬𑐰𑐵𑑅𑐫𑐵 𑐡𑐶𑑄 𑐰𑐶𑐡𑐵 𑐩𑐡𑐸𑐐𑐸𑐮𑐶𑑄 𑐣𑑄 𑐡𑐬𑑂𑐱𑐎 𑐨𑐔𑐵 𑐩𑑂𑐴𑑀 𑐖𑐹𑐐𑐸 𑐏𑑅𑐮𑐵 𑐢𑐂𑐠𑐾𑑄 𑐖𑐸𑐮 𑑋

𑐱𑐣𑐶𑐰𑐵𑑅𑐎𑐸𑐣𑑂𑐴𑐸 𑐣𑑂𑐴𑑂𑐫𑐎𑐸𑐣𑑂𑐴𑐸 𑐳𑑂𑐰𑐫𑐵𑑄𑑄 𑐀𑐥𑑂𑐰𑑅 𑐴𑐾 𑐡𑐸, 𑐡𑐬𑑂𑐱𑐎𑐟 𑑋 𑐴𑐣𑐾𑐧𑐴𑐩𑑂𑐴 𑐳𑐵𑐴𑐶𑐟𑑂𑐫𑐎𑐵𑐬 𑐩𑐠𑐸𑐬𑐵 𑐳𑐵𑐫𑑂𑐩𑐶𑐣𑐵𑐥𑐫𑐵 𑐣𑑂𑐫𑐣𑐾𑐎𑐣𑐾𑐖𑑂𑐫𑐵𑐗𑑂𑐰𑑅 𑐣𑐶𑐣𑑂𑐴𑐸𑐫𑐵 𑐡𑐶𑑄𑐫𑐵 𑐩𑐹 𑐁𑐎𑐬𑑂𑐲𑐞 𑐏𑑅 𑑋 𑐀𑐣𑑄 𑐮𑐶𑐥𑐵 𑐔𑑂𑐰𑐳𑐸 𑐧𑑂𑐰𑐣𑐾𑐐𑐸 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐎𑐸𑐣𑑂𑐴𑐸 𑐠𑐾𑑄 𑐴𑐾 𑐏𑐣𑐾 𑐡𑐟 𑑋 𑐕𑐸𑑄 𑐳𑐵𑐴𑐶𑐟𑑂𑐫𑐎𑐵𑐬 𑐠𑑅𑐐𑐸 𑐔𑑂𑐰𑐳𑐸 𑐧𑑂𑐰𑐣𑐾 𑐳𑐶𑐢𑐫𑐾𑐰𑑄 𑐥𑐶𑑄𑐴𑐵 𑐰𑑄𑐐𑐸 𑐏𑐣𑐾 𑐡𑐟, 𑐣𑐵𑐥𑐣𑐵𑐥𑑄 𑐰𑐫𑑂𑐎𑐮𑑄 𑐧𑑂𑐰𑐣𑐵 𑐴𑑅𑐥𑐶𑑄 𑐥𑐵𑐳𑐵𑐥𑐶𑑄 𑐣𑑄 𑑋

𑐡𑐬𑑂𑐱𑐎𑐡𑐶𑐬𑑂𑐑𑐵𑐫𑑂 𑐔𑑂𑐰𑑃 𑐴𑐾 𑐔𑑂𑐰𑐳𑐵𑑄 𑐠𑐰𑑄𑐠𑐰𑐫𑑂 𑐨𑐶𑑄𑐟𑐸𑐣𑐾𑐐𑐸, 𑐦𑑀𑐚𑑀 𑐰 ‘𑐱𑐾𑐮𑑂𑐦𑐷’ 𑐎𑐵𑐫𑐾𑐐𑐸𑐮𑐶𑐂 𑐖𑐎 𑐢𑑂𑐫𑐵𑐣 𑑋 𑐳𑐵𑐴𑐶𑐟𑑂𑐫 𑐣𑑂𑐫𑐣𑐾𑐐𑐸𑐮𑐶𑐂 𑐢𑑂𑐫𑐵𑐣 𑐩𑐰𑑄 𑑋 𑐠𑑅𑐟 𑐫𑑅𑐥𑐶𑑄 𑐳𑐵𑐴𑐶𑐟𑑂𑐫𑐎𑐵𑐬𑐟𑐫𑑂 𑐦𑑀𑐚𑑀 𑐡𑐧𑐸𑐮𑐶𑐂 𑐴𑐾 𑐠𑐴𑐵𑑄 𑐰𑐣𑐵𑑅 𑐎𑐵𑑅𑐰𑑄𑐥𑐶𑑄𑐳𑑄 𑐀𑐣 𑐩𑐾𑐥𑐶𑑄 𑐳𑐵𑐴𑐶𑐟𑑂𑐫𑐎𑐵𑐬𑑄 𑐕𑐸 𑐳𑐵𑐴𑐶𑐟𑑂𑐫 𑐰𑐵𑐔𑐣𑐫𑐵𑐟 𑐢𑐂𑐐𑐸 𑐱𑐵𑐫𑐡 𑐩𑐳𑐶𑐄 𑐖𑐸𑐂 𑑋 𑐣𑐶𑐣𑑂𑐴𑐸𑐫𑐵 𑐣𑑂𑐴𑐶𑐎𑐸𑐣𑑂𑐴𑐸 ‘𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑐵 𑐰𑐶𑐎𑐵𑐳𑐫𑑂 𑐳𑑄𑐎𑐶𑐥𑐵𑐫𑐵 𑐨𑐹𑐩𑐶𑐎𑐵’ 𑐧𑐵𑐬𑐾 𑐥𑐸𑐔𑑅 𑐳𑐴𑐮𑐴 𑐖𑐹𑐧𑐮𑐫𑑂 𑐢𑐵𑑅𑐳𑐵 𑐡𑐬𑑂𑐱𑐎𑐡𑐶𑐬𑑂𑐑𑐵𑐫𑑂 𑐐𑐵𑐎𑑂𑐎𑑄 𑐴𑐾 𑐏𑐣𑐾𑐡𑐟 𑑋

𑐏 𑐮𑐵 𑐳𑐵𑐴𑐶𑐟𑑂𑐫 𑐣𑐏𑑅 𑐢𑐵𑐫𑐾𑐰𑑄 𑐳𑐵𑐴𑐶𑐟𑑂𑐫 𑐫𑑅𑐥𑐶𑑄 𑐴𑐾 𑐖𑐎 𑐰𑐫𑐾𑐩𑐵𑑅 𑐩𑐾𑐥𑐶𑑄 𑐰𑐫𑐾 𑐩𑐖𑐶𑐄 𑐢𑐂𑐐𑐸 𑐐𑐸𑐐𑐸𑑄 𑐧𑐣𑑂𑐡𑐾𑐖 𑐥𑐎𑑂𑐎𑐵 𑐣𑑄 𑐟𑐫𑐵𑐟𑑅𑐐𑐸 𑐩𑐡𑐸 𑑋 𑐰𑑂𑐫𑐎𑑂𑐟𑐶𑐐𑐟 𑐬𑐸𑐥𑑄 𑐠𑑅𑐟 𑐫𑑅𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐳𑐴𑐨𑐵𑐐𑐶 𑐖𑐸𑐂𑐐𑐸 𑐣𑑄 𑐟𑑅𑐢𑑄𑐐𑐸 𑐏𑑃 𑐏𑑅 𑑋 𑐣𑐶𑐣𑑂𑐴𑐸𑐫𑑄𑐎𑑄𑐫𑐵 𑐳𑐵𑐴𑐶𑐟𑑂𑐫 𑐣𑐏𑑅𑐫𑐵 𑐩𑐾𑐐𑐸 𑐁𑐎𑐬𑑂𑐲𑐞 𑐏𑑅 𑐳𑐵𑑄𑐐𑐷𑐟𑐶𑐎 𑐖𑑂𑐫𑐵𑐗𑑂𑐰𑑅 𑑋 𑐣𑐶𑐣𑑂𑐴𑐸𑐫𑑄𑐎𑑄 𑐖𑑂𑐫𑐵𑐗𑑂𑐰𑐮𑐫𑑂 𑐩𑑂𑐫𑐾𑑃 𑐴𑐵𑐮𑐵𑐡𑐷𑐥𑐶𑑄 𑐬𑑀𑐖𑐷 𑐱𑑂𑐬𑐾𑐲𑑂𑐛 𑐜𑑄𑐐𑑀𑐮 𑐰 𑐬𑐵𑐣𑐷𑐱𑑀𑐨𑐵 𑐩𑐴𑐬𑑂𑐖𑐣𑑄 𑐮𑑀𑐎𑐴𑑂𑐰𑐵𑑅𑐐𑐸 𑐩𑑂𑐫𑐾𑑃 𑐣𑑂𑐴𑑂𑐫𑐧𑑂𑐰𑐫𑐵𑑅 𑐠𑑅𑐠𑑅𑐐𑐸 𑐥𑑂𑐬𑐟𑐶𑐨𑐵 𑐧𑐵𑑄𑐮𑐵𑐎 𑐴𑐾 𑐥𑑂𑐬𑐳𑑂𑐟𑐸𑐟 𑐫𑐵𑐣𑐵𑐡𑐶𑐮 𑑋

𑐣𑑂𑐴𑐵𑐥𑐵𑑄𑐏𑐸𑐳𑐷 𑐐𑐿𑐬 𑐣𑐾𑐰𑐵𑑅 𑐖𑐸𑐫𑐵𑐣𑑄 𑐣𑐾𑐰𑐵𑑅 𑐨𑐵𑐳𑑄 𑐎𑑂𑐫𑐵𑐬𑐶𑐎𑐾𑐔𑐬 𑐫𑐵𑐣𑐵𑐡𑐷𑐩𑑂𑐴 𑐧𑐿𑐎𑐸𑐞𑑂𑐛 𑐨𑐞𑑂𑐜𑐵𑐬𑐷𑐫𑐵𑐟 𑐳𑐎𑐳𑐶𑐫𑐵𑑄 𑐫𑐫𑐾𑐎𑐹𑐐𑐸 𑐏𑐣𑐾𑐡𑐟 𑑋 𑐧𑐬𑐸 𑐫𑐩𑐣 𑐱𑑂𑐬𑐾𑐲𑑂𑐛𑑄 𑐣𑐾𑐰𑐵𑑅 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐰𑐵𑑅 𑐩𑑂𑐫𑐾𑑃 𑐩𑐴𑐵𑐳𑐾 𑐏𑐫𑑂 𑐩𑑂𑐫𑐾𑑃 𑐴𑐵𑑅𑐧𑐮𑐫𑑂 ‘𑐩𑐵𑐎𑐸𑐎 𑐫𑑅𑐩𑐬𑐶 𑐣𑐫𑐵𑐧𑐮𑐫𑑂 𑐦𑐶 𑐔𑐶𑐬𑐔𑐶𑐬 𑐣𑑂𑐴𑑂𑐫𑑅𑐠𑐾𑑄 𑐖𑐸𑐮’ 𑐢𑐵𑑅𑐥𑐶𑑄 𑐫𑐎𑑂𑐰 𑐡𑐟 𑑋 𑐀𑐠𑐾𑐴𑐾 𑐀𑐣 𑐥𑑂𑐬𑐳𑑂𑐟𑐸𑐟 𑐫𑐵𑑅𑐐𑐸 𑐏𑑂𑐫𑐵𑐮𑑅 𑐣𑑂𑐴𑐵𑐥𑐵 𑐴𑐾 𑐎𑑂𑐫𑐣𑐾 𑐢𑐸𑑄𑐎𑐹𑐐𑐸 𑐖𑐹𑐳𑐵𑑄 𑐳𑐎𑐳𑐶𑐣𑑄 𑐫𑐫𑐾𑐎𑐹𑐐𑐸 𑐏𑐣𑐾𑐡𑐟 𑑋

𑐀𑐫𑑂𑐣𑑄 𑐐𑐸𑐩𑑂𑐴 𑐐𑐸𑐩𑑂𑐴𑑄 ‘𑐣𑑂𑐴𑐵𑐥𑐵 𑐳𑑂𑐰𑐫𑐾 𑐢𑐸𑐐𑐸 𑐳𑑂𑐰𑐫𑐾 𑐩𑐏𑐸𑐟, 𑐮𑐶 𑐣𑑄 𑐧𑐵𑐟’ 𑐢𑐎𑐵𑑅 𑐰𑑄𑐥𑐶𑑄 𑐣 𑐩𑐡𑐸𑐐𑐸 𑐩𑐏𑐸 𑑋𑐖𑐶𑐐𑐸 𑐰𑑂𑐫𑐎𑑂𑐟𑐶𑐐𑐟 𑐬𑐸𑐥𑑄 𑐢𑐵𑐫𑐾𑐐𑐸 𑐏𑑅𑐳𑐵 𑐳𑑂𑐰𑐎𑑂𑐰𑑅𑐐𑐸 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐣𑐏𑑅 𑐀𑐰𑐱𑑂𑐫 𑐣𑑄 𑐳𑐦𑐮 𑐖𑐹𑐐𑐸 𑐡𑐸 𑑋 𑐟𑐬 𑐣𑑄 𑐖𑐶𑐐𑐸 𑐧𑐶𑐔𑐵𑑅 𑐰𑐵 𑐳𑐮𑑂𑐮𑐵𑐴 𑐕𑐸 𑐡𑐸 𑐢𑐵𑑅𑐳𑐵 𑐠𑑂𑐰 𑐖𑑂𑐫𑐵𑐗𑑂𑐰𑑅 𑐣𑐶𑐣𑑂𑐴𑐸 𑐩𑐫𑐵𑐳𑐾 𑐕𑐣𑑂𑐴𑐸 𑐴𑐾 𑐖𑐎 𑐫𑐵𑑅𑐳𑐵𑑄 𑐖𑐶𑐄𑐠𑐾𑑄 𑐟𑐵𑐮 𑑋 𑐕𑐵𑐫𑑂𑐢𑐵𑐳𑐵𑑄 𑐗𑐷𑐐𑐸 𑐳𑐵𑐴𑐶𑐟𑑂𑐫 𑐎𑑂𑐲𑐾𑐟𑑂𑐬 𑐐𑐸𑐮𑐶 𑐟𑐧𑑂𑐫𑐵 ? 𑐠𑑂𑐰 𑐣𑑄 𑐕𑐎𑑂𑐰𑑅 𑐧𑐶𑐔𑐵 𑐫𑐵𑐫𑐾𑐩𑐵𑑅𑐐𑐸 𑐀𑐰𑐳𑑂𑐠𑐵 𑐡𑐸 𑑋

𑐏𑑅𑐮𑐵 𑐠𑐖𑑂𑐫𑐵𑑅𑐐𑐸 𑐖𑑂𑐫𑐵𑐗𑑂𑐰𑑅 𑐣𑐶𑐣𑑂𑐴𑐸 𑐩𑐏𑐸 𑐕𑐰𑐵𑑅𑐫𑑄𑐎𑑄 𑐫𑐵𑐫𑐾 𑐡𑑅𑐳𑐵 𑐀𑐗 𑐧𑐵𑑄𑐮𑐵𑐂𑐐𑐸 𑐰 𑐮𑐸𑑃𑐂 𑐣𑐳𑑂𑐰𑐵𑑅 𑐴𑑂𑐰𑐮𑐾𑐠𑐾𑑄 𑐖𑐸𑐂𑐐𑐸 𑐏𑑅 𑑋 𑐟𑐬 𑐗𑐷𑐐𑐸 𑐳𑐵𑐴𑐶𑐟𑑂𑐫 𑐖𑐎 𑐩𑐏𑐸 𑐣𑐾𑐰𑐵𑑅 𑐏𑑂𑐫𑑅 𑐴𑐾 𑐳𑐷𑐩𑐶𑐟 𑐖𑐸𑐫𑐵 𑐰𑐣𑐵𑐔𑑂𑐰𑑄𑐐𑐸 𑐀𑐰𑐳𑑂𑐠𑐵𑐫𑑂 𑐕𑐐𑐹 𑐴𑐾 𑐖𑑂𑐫𑐵𑐗𑑂𑐰𑑅𑐫𑐵 𑐮𑐵𑐐𑐶 𑐣𑐶𑐣𑑂𑐴𑐸 𑐣𑐶𑐣𑑂𑐴𑐸 𑐃 𑐦𑑂𑐫𑐵𑐫𑐾𑐐𑐸 𑐠𑐵𑐎𑐸 𑐠𑐾𑑄 𑐟𑐵𑐮 𑑋 𑐣𑑂𑐴𑑂𑐫𑐵𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐣 𑐰 𑐴𑐾 𑐳𑐷𑐩𑐶𑐟 𑐩𑐣𑐹𑐟 𑐖𑐎 𑐖𑐸𑐂𑐐𑐸 𑐎𑐵𑐬𑐞𑑄 𑐣𑑄 𑐧𑑂𑐰𑐟𑐶 𑐩𑑂𑐴𑑀 𑐖𑐹𑐐𑐸 𑐮𑐵 𑐢𑐂𑐠𑐾𑑄 𑐠𑐾𑑄 𑐔𑑂𑐰𑑄 𑑋

𑐱𑐵𑐫𑐡 𑐠𑑂𑐰𑐴𑐾 𑐎𑐵𑐬𑐞𑑄 𑐖𑐸𑐂 𑐣𑑂𑐴𑐵𑐥𑐵 𑐣𑑂𑐴𑐥𑐵𑐫𑐵 𑐡𑑃𑐫𑑂 𑐏𑐣𑐾 𑐡𑐸𑐐𑐸 𑐠𑐾𑑄𑐖𑑂𑐫𑐵𑑅𑐐𑐸 𑐄𑐟𑑂𑐳𑐵𑐴 𑐠𑐸𑐐𑐸𑐳𑐷 𑐖𑐶𑑄 𑐩𑐏𑐣𑐵 𑑋 𑐖𑑂𑐫𑐵𑐗𑑂𑐰𑑅 𑐮𑐵 𑐖𑐸𑐮 𑐟𑐬 𑐄𑐥𑐳𑑂𑐠𑐶𑐟 𑐖𑐹𑐥𑐶𑑄𑐳𑑄 𑐖𑑂𑐫𑐵𑐗𑑂𑐰𑑅𑐫𑐵 𑐩𑐴𑐟𑑂𑐰𑐫𑐵𑐟 𑐠𑐸𑐂𑐎𑐾𑐐𑐸 𑐎𑐸𑐟𑑅 𑐴𑐾 𑐩𑐫𑐵𑑅 𑐠𑐾𑑄 𑐟𑐵𑐮 𑑋 𑐠𑑅𑐐𑐸 𑐥𑑂𑐬𑐳𑑂𑐟𑐸𑐟𑐶 𑐳𑐶𑐢𑐾𑐰𑑄 𑐁𑐥𑐵𑐮𑑄 𑐔𑑂𑐰𑐩𑐶𑐥𑐶𑑄 𑐐𑐣 𑐰𑑄 𑐐𑐣 𑐳𑐸𑐣𑐵𑑄 𑐩𑐳𑐶𑐄 𑑋 𑐠𑐸𑐎𑐶𑐫𑐵 𑐡𑐳𑐹 𑐩𑐟𑐶𑐣𑐵𑐫𑐵 𑐔𑐶𑑄 𑐎𑐵𑐫𑐾 𑐩𑐵𑑅𑐥𑐶𑑄 𑐐𑐸𑐮𑐶 𑐡𑐣𑐶 𑐢𑐂𑐐𑐸 𑐁𑐫𑑀𑐖𑐎𑑄 𑐳𑐶𑐄, 𑐟𑐬 𑐣𑐵𑑄 𑐎𑐵𑑅𑐧𑐮𑐫𑑂 𑐫𑐎𑑂𑐰 𑐴𑐾 𑐀𑐣𑑄 𑐰𑐣𑐾 𑐢𑐸𑑄𑐎𑐹𑐐𑐸 𑐏𑐣𑐾𑐡𑐣 𑑋

𑐖𑐶𑑄 𑐕𑐎𑑂𑐰𑑅 𑐐𑑂𑐰𑐳𑐵𑑅 𑐏𑐮𑑅𑐫𑐵 𑐕𑐩𑑂𑐴 𑐡𑐸𑐖𑑅𑐫𑐵𑐟 𑐔𑑂𑐰𑐳𑐸 𑐧𑑂𑐰𑐣𑐾𑐩𑐵𑑅𑐥𑐶𑑄 𑐳𑐎𑐳𑐶𑐟𑑄 𑐣𑑂𑐴𑐵𑐥𑐵 𑐴𑐾 𑐡𑐧𑐸𑐮𑐶𑐂 𑐧𑑂𑐰𑐣𑐵𑑅 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐵𑐎𑐹𑐳𑐵 𑐧𑐵𑑄𑐮𑐵𑐂 𑐢𑐎𑐵𑑅 𑐢𑐫𑐵𑐐𑐸 𑐏𑑅 𑑋 𑐠𑐠𑐾 𑐖𑐸𑐮 𑐢𑐵𑑅𑐳𑐵 𑐖𑑂𑐫𑐵𑐗𑑂𑐰𑑅𑐫𑐵 𑐃 𑐣𑑄 𑐩𑑂𑐴𑑄 𑐔𑐵𑐂𑐐𑐸 𑐰 𑐎𑐩𑐳𑐾 𑐎𑐩 𑐀𑐣 𑐡𑐸𑐥𑐶𑑄 𑐳𑐴𑐶𑐟𑑂𑐫𑐎𑐵𑐬𑐥𑐶𑑄𑐳𑑄 𑐣𑑄 𑐕𑐸 𑐐𑐖𑑂𑐫𑐵𑑅𑐐𑐸 𑐳𑐵𑐴𑐶𑐟𑑂𑐫 𑐰𑐵𑐔𑐣 𑐫𑐵𑐟 𑐢𑐂𑐐𑐸 𑐣𑑂𑐫𑐣𑐷 𑐢𑐂𑐐𑐸 𑐖𑐶𑐐𑐸 𑐰𑐶𑐔𑐵𑑅 𑑋 𑐩𑐾𑐐𑐸 𑐏𑑃 𑐣𑑂𑐴𑐶𑐕𑐶𑐫𑑄𑐎𑑄 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐣𑐳𑐵𑐟𑑂𑐰𑑃𑐳𑐵𑐫𑐵 𑐳𑑂𑐚𑐮 𑐩𑐐𑐵𑑅𑐐𑐸 𑐏𑐣𑐾𑐡𑐸 𑑋

𑐩𑑂𑐴𑑀𑐟𑐶𑑄 𑐣 𑐣𑐶𑐐𑐹 𑐰𑐵 𑐰𑐳𑐶𑐧𑐾𑑄 𑐀𑐥𑑂𑐰𑑅 𑐳𑑂𑐚𑐮 𑐡𑐸𑐳𑐵 𑐧𑐵𑑄𑐮𑐵𑐂𑐐𑐸 𑐏𑑅 𑑋 𑐕𑐐𑐹 𑐖𑐎 𑐳𑑂𑐚𑐮𑐫𑐵 𑐎𑐵𑐬𑐞𑑄 𑐠𑐶𑐎𑐾 𑐡𑑄 𑐳𑑂𑐰𑐫𑐵𑑄 𑐣𑑄 𑐫𑑅𑐳𑐵 𑐣 𑐩𑐫𑑅𑐳𑐵 𑐣𑐫𑐾𑐩𑐟𑐾 𑐢𑐵𑑅𑐐𑐸 𑐠𑐾𑑄 𑐏𑐣𑐾𑐡𑐟 𑑋 𑐣𑐫𑐾 𑐥𑐶𑐟𑑂𑐫𑐵𑐣𑐵𑑅 𑐰𑑅𑐥𑐶𑑄 𑐣𑑄 𑐢𑑂𑐫𑐧𑐵 𑐥𑐸𑐮𑐵𑑅 𑐣𑐫𑐾𑐟 𑐗𑑂𑐰𑑅𑐕𑐸𑐣𑐵𑑅 𑐔𑑂𑐰𑐣𑐾 𑐩𑐵𑑅𑐐𑐸 𑐀𑐰𑐳𑑂𑐠𑐵 𑐖𑐸𑐮 𑑋 𑐩𑐐𑐵𑑅𑐩𑐔𑐵𑑅 𑐠𑐾𑑄 𑐟𑐵𑑅𑐐𑐸 𑐕𑐟𑐵 𑐏𑑃 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐣𑐏𑑅𑐫𑐵 𑐣𑐵𑐩𑑄 𑐖𑐹𑐐𑐸 𑐠𑑂𑐰 𑐣𑐏𑐟𑐫𑑂 𑐰𑐵𑐔𑐣 𑐖𑐹𑐐𑐸 𑐬𑐔𑐣𑐵𑐫𑐵𑐟 𑐎𑐫𑐵𑑅 𑐀𑐣𑑂𑐟𑐬𑐎𑑂𑐬𑐶𑐫𑐵 𑐰 𑐳𑐩𑐷𑐎𑑂𑐲𑐵 𑐖𑐹𑐐𑐸 𑐏𑑅𑐳𑐵 𑐀𑐗 𑐧𑐵𑑄𑐮𑐵𑐂𑐐𑐸 𑐠𑐾𑑄 𑐟𑐵𑐫𑐾𑐎𑐵 𑑋

𑐥𑑂𑐬𑐖𑑂𑐘𑐵 𑐨𑐰𑐣𑐫𑑂 𑐩𑐹 𑐖𑑂𑐫𑐵𑐗𑑂𑐰𑑅 𑐖𑐸𑐂 𑐣𑑂𑐴𑑂𑐫𑑅 𑐎𑐶𑐥𑐸𑐮𑐶𑐂 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐣𑐏𑑅𑐫𑐵 𑐬𑐶𑐴𑐬𑑂𑐳𑐮 𑐫𑐵𑑅𑐠𑐾𑑄 𑐕𑐰𑐵𑑅 𑐣𑐶𑐰𑐵𑑅 𑐮𑐶𑐥𑐵 𑐴𑐾 𑐖𑐹𑐳𑐵𑑄 𑐀𑐣 𑐧𑑂𑐰𑐣𑐵𑐡𑐷𑐥𑐶𑑄 𑐳𑐵𑐴𑐶𑐟𑑂𑐫𑐎𑐵𑐬𑐟𑐫𑑂𑐟 𑐕𑐠𑐵𑐫𑑂 𑐟𑐫𑐵𑑅 𑐀𑐣𑑂𑐟𑐬𑐎𑑂𑐬𑐶𑐫𑐵 𑐫𑐵𑐣𑐵𑐡𑐷𑐳𑐵 𑐧𑐵𑑄𑐮𑐵𑐂 𑐠𑐾𑑄 𑐟𑐵𑑅 𑑋 𑐕𑐩𑑂𑐴𑐾𑐳𑐶𑐫𑐵𑑄 𑐕𑐩𑑂𑐴𑐾𑐳𑐶𑐟 𑐕𑐐𑐹 𑐴𑐾 𑐖𑐎 𑐣𑑂𑐴𑑂𑐫𑐳𑑅 𑐟𑐫𑐾 𑐡𑐸𑐐𑐸 𑐫𑐵𑐣𑐵𑑅 𑐀𑐣𑑂𑐟𑐬𑐎𑑂𑐬𑐶𑐫𑐵 𑐫𑐵𑑅𑐳𑐵𑑄 𑐖𑐶𑐄 𑑋

𑐠𑐸𑐎𑐶𑑄 𑐫𑐵𑐣𑐵 𑐣𑑂𑐴𑐸𑐥𑐶𑑄 𑐰 𑐥𑐸𑐮𑐵𑐥𑐶𑑄 𑐔𑑂𑐰𑐩𑐶𑐥𑐶𑐣𑐶𑐐𑐸 𑐡𑐠𑐸𑐂 𑐳𑑂𑐰𑐵𑐥𑐹 𑐎𑑂𑐰𑐵𑐟𑐸𑐫𑐵 𑐰𑐣𑐷𑐐𑐸 𑐰 𑐠𑑅𑐥𑐶𑐣𑐶𑐐𑐸 𑐬𑐔𑐣𑐵 𑐧𑐵𑐬𑐾 𑐳𑐫𑐾𑐎𑐵 𑐳𑐷𑐎𑐵 𑐎𑐵𑐫𑐾𑐐𑐸 𑐀𑐰𑐳𑐬 𑐣𑑄 𑐡𑐂 𑑋𑐀𑐣𑑂𑐟𑑂𑐫𑐫𑑂 𑐖𑐶𑑄 𑐠𑑂𑐰𑐴𑐾 𑐢𑐵𑐫𑐾 𑐎𑐶 𑐠𑑁𑑄𑐫𑐵 𑐂𑐮𑐫𑑂 𑐀𑐟𑐶𑐎𑑄 𑐁𑐰𑐱𑑂𑐫𑐎 𑐏𑑅 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐣𑐏𑑅 𑑋 𑐀𑐮𑐾 𑐠𑑂𑐰 𑐣𑐏𑑅𑐫𑐵 𑐰𑑂𑐫𑐰𑐳𑑂𑐠𑐵𑐥𑐣 𑐥𑐎𑑂𑐲 𑐢𑐵𑑅𑐳𑐵 𑐟𑐳𑐎𑑄 𑐴𑐾 𑐢𑐶𑐳𑐶𑐮𑐵𑑅𑐐𑐸 𑐡𑐸 𑑋 𑐣𑐏𑑅 𑐳𑑂𑐰𑐫𑐾𑐟 𑐰𑑅𑐥𑐶𑑄𑐟 𑐮𑐳𑐎𑐸𑐳 𑐫𑐵𑐫𑐾𑐐𑐸, 𑐣𑐵𑐥𑑄 𑐔𑑂𑐰𑐣𑐾𑐐𑐸, 𑐟𑐵𑑄𑐣𑑂𑐰𑑅𑐧𑐮𑐫𑑂 𑐟𑑂𑐰𑐣𑐾𑐐𑐸 𑐮𑑅𑐫𑐵 𑐰𑑂𑐫𑐰𑐳𑑂𑐠𑐵 𑐴𑐾 𑐕𑐵𑐫𑑂 𑐩𑐖𑐸𑐂𑐩𑐵 𑐟𑐳𑐎𑑄 𑐴𑐾 𑐧𑐵𑑄𑐮𑐵𑑅 𑑋

𑐣𑑂𑐴𑐵𑐥𑐵 𑐥𑐶𑐡𑑄𑐐𑐸 𑐖𑑂𑐫𑐵𑐗𑑂𑐰𑑅𑐫𑐵 𑐢𑐮𑐏𑐫𑑂 𑐩𑐮𑐵𑑅𑐐𑐸 ‘𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳 𑐔𑐷𑐴𑐵𑑅 𑐳𑑄𑐎𑐶𑐥𑐵𑐫𑐵 𑐢𑐾𑑄𑐢𑐾𑑄𑐧𑐮𑑂𑐮𑐵𑑅 𑐎𑐵𑐳𑐵’𑐫𑐵 𑐳𑐶𑐬𑐥𑐵𑑅 𑐂𑐣𑐾𑐐𑐸 𑐖𑑂𑐫𑐵𑐗𑑂𑐰𑑅 𑐠𑐥 𑐖𑐹𑐐𑐸 𑐣𑑄 𑐟𑐳𑐎𑑄 𑐴𑐾 𑐥𑐵𑐫𑑂𑐕𑐶𑐐𑐸 𑐂𑐮𑐫𑑂 𑐖𑐹𑐐𑐸 𑐠𑐾𑑄 𑐖𑐶𑑄 𑐟𑐵𑐫𑐾𑐎𑐵 𑑋 𑐖𑐶𑐐𑐸 𑐠𑑂𑐰 𑐴𑐾 𑐕𑐐𑐹 𑐖𑐎 𑐩𑐣𑐳𑐸𑐰𑐵 𑐡𑐸𑐎𑐶 𑐐𑐧𑐮𑐫𑑂 𑐣𑑄𑑄𑑄 𑐡𑐶𑐥𑐵𑑅 𑐩𑐎𑐵𑐳𑐾 𑐣𑑂𑐴𑑂𑐫𑐵𑐣𑐵𑐔𑑂𑐰𑐣𑐾 𑐦𑐫𑐾𑐩𑐵 𑐠𑑂𑐰 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐣𑐏𑑅 𑑋

𑐬𑐩𑐵, 𑐎𑐵𑐮𑐶𑐩𑐵𑐟𑐶