𑐳𑑂𑐎𑐸𑐮𑐫𑑂 𑐬𑐵𑐖𑐣𑐷𑐟𑐶𑐎 𑐡𑐮𑐫𑐵𑐟 𑐥𑐣𑐾 𑐦𑐂𑐐𑐸 𑐀𑐰𑐳𑑂𑐠𑐵 𑐩𑐡𑐸

𑐳𑑂𑐎𑐸𑐮𑐫𑑂 𑐬𑐵𑐖𑐣𑐷𑐟𑐶𑐎 𑐥𑐵𑐬𑑂𑐚𑐷 𑐰 𑐄𑐩𑐶 𑐨𑐵𑐟𑐺 𑐳𑑄𑐐𑐛𑐣𑐟𑐫𑑂𑐳𑑄 𑐕𑐸𑑄 𑐣𑑄 𑐎𑐠𑑄𑐫𑐵 𑐬𑐵𑐖𑐣𑐷𑐟𑐶𑐎 𑐖𑑂𑐫𑐵𑐏𑑃 𑐫𑐵𑐫𑐾 𑐡𑐂 𑐩𑐏𑐸 𑐢𑐎𑐵𑑅 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐥𑐶𑐎𑐵𑑅𑐐𑐸 𑐳𑐸𑐔𑑄𑐫𑐵 𑐰𑐶𑐬𑑀𑐢 𑐫𑐵𑐳𑐾𑑄 𑐰𑐶𑐥𑑂𑐮𑐰 𑐥𑐎𑑂𑐲𑐫𑐵 𑐩𑐵𑐌𑐰𑐵𑐡𑐷 𑐎𑐵𑐬𑑂𑐫𑐎𑐬𑑂𑐟𑐵𑐟𑐫𑑂𑐳𑑄 𑐩𑑂𑐴𑐷𑐐 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐱𑐶𑐎𑑂𑐲𑐵 𑐰𑐶𑐨𑐵𑐐𑐫𑑂 𑐟𑐵𑐮𑑄 𑐐𑑂𑐰𑐫𑐵 𑐧𑐶𑐄𑐐𑐸 𑐡𑐸 𑑋

𑐩𑑂𑐴𑐷𑐐 𑐣𑑂𑐴𑐶𑐣𑐫𑑂 𑐕𑐵𑐥𑐵𑐩𑐵𑐬 𑐱𑐿𑐮𑐷𑑄 𑐟𑐵𑐴𑐵𑐔𑑅𑐫𑐵 𑐱𑐶𑐎𑑂𑐲𑐵 𑐰𑐶𑐨𑐵𑐐𑐫𑑂 𑐰𑑅𑐥𑐶𑑄 𑐩𑐵𑐌𑐰𑐵𑐡𑐷 𑐎𑐵𑐬𑑂𑐫𑐎𑐬𑑂𑐟𑐵𑐟𑐫𑑂𑐳𑑄 𑐳𑑂𑐎𑐸𑐮𑐫𑑂 𑐬𑐵𑐖𑐣𑐷𑐟𑐶𑐎 𑐥𑐵𑐬𑑂𑐚𑐷𑐫𑐵 𑐖𑑂𑐫𑐵𑐗𑑂𑐰𑑅 𑐫𑐵𑐫𑐾 𑐡𑐂 𑐩𑐏𑐸 𑐢𑐎𑐵𑑅 𑐳𑐸𑐔𑑄 𑐥𑐶𑐎𑐵𑑅𑐐𑐸 𑐐𑐮𑐟 𑐏𑑅 𑐢𑐵𑐳𑐾𑑄 𑐱𑐶𑐎𑑂𑐲𑐵 𑐰𑐶𑐨𑐵𑐐𑐫𑐵 𑐎𑑂𑐰𑐠𑐵𑐫𑑂 𑐟𑐵𑐮𑑄 𑐐𑑂𑐰𑐫𑐵 𑐧𑐶𑐄𑐐𑐸 𑐏𑑅 𑑋 𑐩𑐵𑐌𑐰𑐵𑐡𑐷 𑐎𑐵𑐬𑑂𑐫𑐎𑐬𑑂𑐟𑐵𑐟𑐫𑑂 𑐠𑑂𑐰 𑐥𑐮𑐵𑐏𑑄 𑐫𑐵𑐣𑐵𑑅 𑐰𑐶𑐨𑐵𑐐𑐫𑑂 𑐕𑐸𑑄 𑐃 𑐟𑐣𑐵𑐰 𑐳𑐶𑐬𑑂𑐖𑐣𑐵 𑐖𑐹𑐐𑐸 𑐏𑑅 𑑋

𑐟𑐵𑐮𑑄 𑐐𑑂𑐰𑐫𑐵𑑅 𑐩𑐵𑐌𑐰𑐵𑐡𑐷 𑐎𑐵𑐬𑑂𑐫𑐎𑐬𑑂𑐟𑐵𑐟 𑐰𑐣𑐾𑐢𑐸𑑄𑐎𑐵𑑅 𑐣𑐐𑐬 𑐥𑑂𑐬𑐴𑐬𑐷 𑐰𑐫𑐵𑑅 𑐄𑐐𑐸 𑐟𑐵𑑅𑐦𑑂𑐰𑑅 𑐟𑐕𑑂𑐫𑐵𑑅𑐐𑐸 𑐏𑑅 𑑋 𑐟𑐵𑐮𑑄 𑐐𑑂𑐰𑑅𑐐𑐸 𑐏𑑃𑐫𑐵 𑐁𑐮𑑀𑐔𑐣𑐵 𑐫𑐵𑐳𑐾𑑄 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑐾𑐫𑐬 𑐧𑐵𑐮𑐾𑐣 𑐳𑐵𑐴𑑄 𑐳𑐵𑐩𑐵𑐖𑐶𑐎 𑐳𑐘𑑂𑐖𑐵𑐮𑐫𑑂 𑐳𑑂𑐎𑐸𑐮 𑐢𑐂𑐐𑐸 𑐁𑐏𑑅 𑐧𑑂𑐰𑐣𑐾𑐐𑐸 𑐠𑐵𑐫𑑂 𑐏𑑅, 𑐬𑐵𑐖𑐣𑐷𑐟𑐶 𑐫𑐵𑐫𑐾𑐐𑐸 𑐠𑐵𑐫𑑂 𑐩𑐏𑐸 𑐢𑐎𑐵𑑅 𑐧𑐶𑐔𑐵𑑅 𑐟𑐫𑐵𑐡𑐷𑐐𑐸 𑐡𑐸 𑑋

𑐩𑐾𑐏𑐾 𑐫𑐾𑑃𑐫𑐵 𑐠𑐷𑐠𑐷 𑐳𑑂𑐎𑐸𑐮𑐟𑐫𑑂𑐳𑑄 𑐱𑐶𑐎𑑂𑐲𑐵 𑐰𑐶𑐨𑐵𑐐𑑄 𑐀𑐖𑑂𑐫𑐵𑑅𑐐𑐸 𑐳𑐸𑐔𑑄 𑐥𑐶𑐎𑐵𑑅𑐳𑐵𑑄 𑐳𑑂𑐎𑐸𑐮𑐫𑑂 𑐬𑐵𑐖𑐣𑐷𑐟𑐶𑐎 𑐡𑐮 𑐰𑐵 𑐄𑐩𑐶 𑐨𑐵𑐟𑐺 𑐳𑑄𑐐𑐛𑐣𑐫𑐵 𑐖𑑂𑐫𑐵𑐗𑑂𑐰𑑅 𑐫𑐵𑐎𑐾 𑐧𑐷 𑐩𑐏𑐸 𑐢𑐎𑐵𑑅 𑐥𑐣𑐾 𑐦𑐂𑐐𑐸 𑐀𑐰𑐳𑑂𑐠𑐵 𑐩𑐡𑐸𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐳𑑂𑐎𑐸𑐮𑑄 𑐕𑐸𑑄 𑐖𑑂𑐫𑐵𑐏𑑃 𑐫𑐵𑐫𑐾𑐩𑐵𑑅𑐳𑐵 𑐳𑑂𑐠𑐵𑐣𑐷𑐫 𑐬𑐵𑐖𑐣𑐷𑐟𑐶𑐎 𑐥𑐵𑐬𑑂𑐚𑐷𑐫𑐵 𑐎𑐵𑐬𑑂𑐫𑐎𑐬𑑂𑐟𑐵𑐟𑐫𑑂𑐎𑐾 𑐐𑑂𑐰𑐵𑐴𑐵𑐮𑐶 𑐦𑑂𑐰𑐣𑐾 𑐩𑐵𑐮𑐷𑐐𑐸 𑐰 𑐳𑑂𑐎𑐸𑐮𑐫𑑂 𑐣𑑄 𑐄𑐩𑐶𑐐𑐸 𑐫𑐎𑑂𑐰 𑐥𑑂𑐬𑐨𑐵𑐰 𑐡𑐂𑐐𑐸 𑐖𑐸𑐫𑐵𑑅 𑐄𑐩𑐶𑐟 𑐳𑑂𑐎𑐸𑐮 𑐡𑐸𑐣𑐾 𑐕𑐸𑑄 𑐎𑐵𑐬𑑂𑐫𑐎𑑂𑐬𑐩 𑐫𑐵𑐎𑐾 𑐧𑐷 𑐩𑐏𑐸 𑐢𑐎𑐵𑑅 𑐥𑐣𑐾𑐐𑐸 𑐰𑑂𑐫𑐵𑐰𑐴𑐵𑐬𑐶𑐎 𑐩𑐖𑐸𑐂𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐧𑐬𑐸 𑐬𑐵𑐖𑐣𑐷𑐟𑐶𑐎 𑐥𑐵𑐬𑑂𑐚𑐷𑐟𑐫𑑂𑐟 𑐳𑑂𑐎𑐸𑐮 𑐂𑐮𑐫𑑂 𑐀𑐖𑑂𑐫𑐵𑑅𑐐𑐸 𑐖𑑂𑐫𑐵𑐗𑑂𑐰𑑅 𑐫𑐵𑐫𑐾 𑐡𑐂 𑐩𑐏𑐸 𑐢𑐎𑐵𑑅 𑐖𑐎 𑐥𑐣𑐾 𑐦𑐂 𑐟𑐬 𑐧𑐶𑐡𑐵𑐫𑐵 𑐂𑐮𑐫𑑂 𑐥𑐣𑐾𑐟 𑐠𑐵𑐎𑐸𑐂𑐐𑐸 𑐏𑑃 𑐣𑑄 𑐄𑐩𑐶𑐳𑑄 𑐢𑐵𑑅𑐐𑐸 𑐡𑐸 𑑋