𑐳𑐶𑑄𑐴 𑐩𑐡𑐹𑐐𑐸 𑐳𑐶𑑄𑐐𑐵𑐥𑐸𑐬𑐫𑐵 𑐩𑑂𑐴𑐐𑐳

𑐬𑐵𑐖𑐾𑐣 𑐩𑐵𑐣𑐣𑑂𑐢𑐬
𑐕𑐐𑐹 𑐩𑑂𑐴𑐐𑐳 𑐴𑐾 𑐖𑐎 𑐄𑐮𑐶 𑐮𑐸𑐩𑐸𑐳𑐾𑐔𑑂𑐰𑐣𑐷, 𑐠𑐠𑐾 𑐟𑐵𑐮 𑐖𑐶𑐟𑑅 𑐖𑐧 𑐖𑐶𑑄 𑐳𑐶𑐮 𑐎𑐶 𑐳𑐶𑑄𑐐𑐵𑐥𑐸𑐬𑐫𑑂 𑐖𑐸𑐂𑐐𑐸𑐟𑑂𑐫𑑄𑐐𑐸 𑐕𑐐𑐹 𑐮𑑅 𑐳𑐩𑑂𑐧𑐣𑑂𑐢𑐷 𑐎𑐣𑑂𑐦𑐬𑐾𑐣𑑂𑐳𑐫𑑂 𑐖𑐶 𑐣𑑄 𑐰𑐣𑐷 𑐏𑐣𑐷𑐐𑐸 𑐖𑐸𑐮 𑑋 𑐰𑐣𑐾𑐐𑐸 𑐥𑑂𑐬𑐳𑑂𑐟𑐵𑐰 𑐟𑑅𑐩𑑂𑐴 𑐥𑐵𑐳𑐵 𑐥𑑂𑐬𑐎𑐵𑐱 𑐀𑐩𑐵𑐟𑑂𑐫, 𑐀𑐮𑐾 𑐖𑐶𑐥𑐶𑑄𑐮𑐶𑐳𑐾 𑐰𑐣𑐷𑐩𑑂𑐴 𑐎𑐵𑐛𑐩𑐵𑐞𑑂𑐜𑐹 𑐥𑑀𑐳𑑂𑐚𑐫𑐵 𑐰𑐶𑐎𑐵𑐳 𑐳𑑄𑐐𑑂𑐬𑑁𑐮𑐵 𑐣𑑄 𑐡𑐂𑐐𑐸 𑑋

𑐖𑐶𑑄 𑐢𑐫𑐵, 𑐩𑑂𑐴𑐵𑑅, 𑐖𑐶 𑐰𑐣𑐾𑐩𑐏𑐸𑐟 𑑋 𑐰𑑃𑐫𑑂 𑐔𑐵𑑅𑐐𑐸 𑐩𑐏𑐸 𑐖𑐶𑑄, 𑐟𑐬 𑐖𑐶𑐟𑑅 𑐠𑐠𑐾 𑐴𑐾 𑐢𑐵𑐫𑐾𑐩𑐵𑐮 𑑋 𑐀𑐦𑐶𑐳𑐫𑐵 𑐣𑑂𑐴𑐹𑐩𑑂𑐴 𑐴𑐵𑐎𑐶𑐩, 𑐀𑐣 𑐣𑑂𑐴𑐹𑐐𑐸 𑐐𑐸𑐚𑐧𑐣𑑂𑐡𑐷𑐫𑐵 𑐡𑐸𑐣𑐾 𑐖𑐶𑑄 𑐖𑐶𑐟𑑅 𑐣𑑂𑐴𑑂𑐫𑑄𑐎𑐾𑐩𑐦𑐸𑐐𑐸 𑐖𑐶𑑄 𑐔𑐵𑑅 𑑋 𑐀𑐮𑐾 𑐖𑐶𑐐𑐸 𑐕𑐾𑑃𑐫𑐵 𑐀𑐰𑐳𑑂𑐠𑐵𑑄 𑐣𑑄 𑐁𑑅 𑐩𑑂𑐴𑐵𑐮𑑄𑐎 𑐡𑑂𑐫𑑅 𑐫𑐵𑐫𑐾𑐩𑐵𑑅𑐐𑐸 𑐀𑐰𑐳𑑂𑐠𑐵 𑐰𑐫𑐵𑐔𑑂𑐰𑑄𑐐𑐸 𑐢𑐎𑐵𑑅 𑐣𑑄 𑐖𑐶𑑄 𑐩𑐔𑐵𑐫𑐾𑐎𑐵𑐐𑐸 𑐩𑐏𑐸 𑑋 𑐄𑐏𑐾 𑐮𑐟𑑂𑐫𑐵 𑐮𑐶𑐥𑐵 𑐮𑐕𑐶𑐫𑐵 𑐧𑐶𑐡𑐵 𑐎𑐫𑐵𑑅 𑐖𑐵𑐥𑐵𑐣 𑐰𑐣𑐾𑐐𑐸 𑐩𑐶𑐮𑐾𑐫𑐵𑐣𑐵𑐟𑐫𑐾 𑐣𑑄 𑐢𑐸𑐣 𑑋 𑐟𑐬 𑐮𑐶𑐥𑐵 𑐠𑑅𑐟 𑐔𑐶𑐣𑐵𑐟𑐫𑐾𑐩𑐦𑐸𑐟 𑑋 𑐰𑐣𑐾 𑐴𑐾 𑐎𑑂𑐰𑑅𑐕𑐶𑐣𑐵 𑑋 𑐖𑐹𑐖𑐹𑐐𑐸 𑐖𑐸𑐂𑐎𑐵 𑑋

𑑐𑑐𑑐

𑐳𑐶𑑄𑐐𑐵𑐥𑐸𑐬𑐫𑑂 𑐠𑑂𑐫𑑄𑐧𑐮𑐫𑑂 𑐧𑐵𑐔𑐵 𑐴𑐾 𑐖𑐸𑐮 𑑋 𑐳𑑄𑐳𑐵𑐬𑐫𑑂 𑐀𑐖𑑂𑐫𑐵𑑅𑐐𑐸 𑐕𑐐𑐹 𑐣𑐶𑐐𑐹 𑐖𑐎 𑐡𑐾𑐱 𑐠𑑂𑐰, 𑐐𑐣 𑐣𑐾𑐥𑐵𑑅𑐩𑐶𑐫𑐵𑐟 𑐨𑐶𑐳𑐵 𑐩𑐎𑐵𑐳𑐾𑐰𑑅𑐳𑐵𑑄 𑐀𑐣𑐀𑐬𑐵𑐂𑐨𑐮 𑐨𑐶𑐳𑐵 𑐧𑐶𑐫𑐵𑑅 𑐮𑐳𑐎𑐸𑐳 𑐫𑐵𑐂 𑑋 𑐳𑐶𑑄𑐐𑐵𑐥𑐸𑐬𑑄 𑐖𑐶𑐩𑐶𑐟 𑐮𑐳𑐎𑐸𑐳 𑐫𑐵𑐟 𑑋 𑐩𑐣𑐫𑑂 𑐐𑐖𑑂𑐫𑐵𑑅𑐐𑐖𑑂𑐫𑐵𑑅𑐐𑐸 𑐏𑑃 𑐰𑐫𑐵𑐔𑑂𑐰𑐣 𑑋 𑐣𑑂𑐫𑐣𑐵𑐖𑐎 𑐟𑐫𑐵𑐐𑐸, 𑐀𑐣 𑐧𑑃𑐫𑑂 𑐨𑑂𑐰𑑄 𑐕𑐎𑐹𑐔𑐵 𑐟𑐎𑑄 𑐰𑐵𑑄𑐕𑑂𑐰𑐫𑐵𑐟𑐂𑐩𑐏𑐸 𑐀𑐮𑐾 𑐔𑐸𑐂𑑃𑐐𑐩 𑐖𑐎 𑐣𑑅𑐥𑐶𑐣𑑂𑐟 𑐴𑐾 𑐐𑐸𑐮𑐶 𑐐𑐸𑐮𑐶 𑐧𑑄 𑐥𑐸𑐂𑐎𑐷𑐐𑐸 𑐴𑑃 𑑋 𑐧𑑂𑐰𑐣𑐵𑐖𑐎 𑐔𑑂𑐰𑐣𑐵𑑄 𑐴𑐾 𑐩𑑂𑐴𑐫𑑂 𑐎𑐸𑐔𑐸𑐎𑐸𑐔𑐸 𑐩𑐶𑐣𑐷𑐐𑐸 𑑋

𑐥𑑂𑐬𑐎𑐵𑐱𑐫𑐵 𑐎𑐶𑐖𑐵𑐫𑐵 𑐐𑑂𑐰𑐴𑐵𑐮𑐶𑑄 𑐕𑐐𑐹 𑐔𑐶𑐎𑐷𑐔𑐵 𑐢𑑄𑐐𑐸 𑐴𑑀𑐚𑐮𑐫𑑂 𑐠𑐵𑐫𑑂 𑐡𑐂𑐐𑐸 𑐖𑐸𑐮 𑑋 𑐔𑐵 𑐧𑐶𑐎𑐾 𑐏𑐣𑐷𑐐𑐸 𑐖𑐸𑐮 𑐢𑐎𑐵𑑅 𑐩𑐣 𑐢𑐸𑐎𑑂𑐎 𑐖𑐸𑐮 𑑋 𑐚𑑂𑐫𑐵𑐎𑑂𑐳𑐶𑐂 𑐔𑑂𑐰𑐣𑐵𑑅 𑐰𑐣𑐵 𑐕𑑂𑐰𑐫𑐵 𑑋 𑐔𑐵𑐣𑑂𑐴𑐫𑑂 𑐣𑑄 𑐡𑐣𑑂𑐣 𑐔𑑂𑐰𑑄 𑑋 𑐩𑐣𑐹𑐟 𑐮𑐵 𑐩𑐏𑐸, 𑐩𑑀𑐚𑐬𑐟 𑐢𑐵𑑅𑐳𑐵 𑐖𑐸𑐫𑐵𑑄𑐔𑑂𑐰𑐣 𑑋 𑐐𑐧𑐮𑐾𑑄 𑐩𑐡𑑂𑐫𑐣𑐷𑐐𑐸 𑐡𑐾𑐫𑑂 𑐖𑐸𑐂 𑐠𑑂𑐰 𑑋 𑐖𑐶𑐟𑑅 𑐚𑑂𑐫𑐵𑐎𑑂𑐳𑐶𑑄 𑐎𑐸𑐴𑐵𑑃 𑐰𑐣𑐵𑑅 𑐣𑑂𑐫𑐵𑐳𑐶 𑐴𑐾 𑐰𑐣𑐾𑐠𑐾𑑄 𑐖𑐸𑐮 𑑋 𑐖𑐶𑐐𑐸 𑐩𑐶𑐏𑐵𑐫𑑂 𑐖𑐶𑐐𑐸 𑐫𑐾𑑃𑐫𑐵 𑐗𑑂𑐰𑐵𑐐𑑂𑐬𑐵𑐥𑐵𑐐𑑂𑐬𑐵𑐐𑐸 𑐮𑑃 𑐔𑐵𑑅𑐴𑐶𑐄𑐰𑐮 𑑋 𑐰𑐰𑑄 𑐖𑐶 𑐠𑐳𑑅 𑐥𑐵𑐟 𑐖𑐶𑐐𑐸 𑐬𑐵𑐖𑐢𑐵𑐣𑐷𑐂, 𑐖𑐶 𑐢𑐵𑑅𑐳𑐵 𑐚𑑂𑐫𑐵𑐎𑑂𑐳𑐶𑐂 𑐴𑐾 𑑋

𑑐𑑐𑑐

𑐖𑐸𑐮𑐵𑐂 𑑑𑑒𑐫𑐵 𑐳𑐸𑐠𑐫𑑂 𑑒 𑐧𑐖𑐾 𑐖𑐸𑐮 𑐏𑐂, 𑐖𑐶𑐥𑐶𑑄 𑐖𑐶𑐩𑐶𑐐𑐸 𑐧𑑅𑐔𑐵𑐢𑑄𑐐𑐸 𑐴𑑀𑐚𑐮 𑐡𑐶 𑐴𑐵𑐂𑐨𑐫𑑂 𑐠𑑂𑐫𑑄𑐧𑐮𑐫𑑂 𑑋 𑐕𑐾𑑃𑐔𑐵 𑐖𑐎 𑐠𑐾𑑄𑐔𑑂𑐰𑑄 — 𑐣𑐵𑑄 𑐠𑐾𑑄 𑐴𑐵𑐥𑑂𑐰𑑅𑐔𑐵 𑐖𑐎 𑑋 𑐟𑐬 𑐫𑐔𑐸𑐳𑐾 𑐥𑐶𑐔𑐸𑐳𑐾 𑑋 𑐏𑑃 𑐮𑑂𑐴𑐵𑐂𑐐𑐸 𑐣𑑄 𑐣𑐵𑐂𑐳𑐾 𑐔𑑂𑐰𑑄 𑑋 𑐡𑐎𑑂𑐰 𑐀𑑄𑐐𑑂𑐬𑐾𑐖𑐷 𑐨𑐵𑐫𑑂 𑐳𑑅𑐥𑐶𑑄 𑐖𑐹𑐧𑐮𑐫𑑂 𑐖𑐶𑐩𑐶𑐟 𑐨𑐵𑐫𑑂𑐫𑐵 𑐳𑐩𑐳𑑂𑐫𑐵 𑐩𑐖𑐸𑐮 𑑋 𑐠𑑅𑐐𑐸 𑐴𑐾 𑐕𑐾𑑃𑐫𑐵 𑐎𑑂𑐰𑐠𑐵 𑐠𑐖𑑂𑐫𑐵𑑅𑐐𑐸 𑑋 𑐣𑑂𑐴𑑂𑐫𑐂𑐥𑐸𑐳𑐾 𑐣𑑄 𑐔𑑂𑐰𑐣𑐵𑐔𑑂𑐰𑐣 𑑋 𑐖𑐶𑐐𑐸 𑐏𑐸𑑃𑐩𑐶𑐏𑐵𑑄 𑐀𑐣 𑐡𑐸𑐴𑐵𑑃 𑐰𑐳𑐵𑑄𑐣𑐶𑐳𑐾𑑄 𑐀𑐣 𑐧𑑂𑐰𑐫𑐵𑐟𑑅𑐐𑐸 𑐀𑐖𑐹 𑐔𑐵𑐫𑐵𑐥𑐹𑐐𑐸 𑐎𑐮𑐵𑐎𑐺𑐟𑐶𑐟 𑐏𑐸𑐫𑐵𑑅 𑐏𑐸𑐫𑐵𑑅 𑐳𑑂𑐰𑐫𑐵𑐔𑑂𑐰𑑄𑐐𑐸 𑑋 𑐀𑐡𑐨𑐹𑐟𑐐𑐸 𑐎𑐮𑐵 𑐳𑑄𑐐𑑂𑐬𑐴𑐵𑐮𑐫𑐠𑐾𑑄 𑐔𑑂𑐰𑐣 𑐖𑐶𑐟𑑅 𑐠𑑂𑐰 𑑋 𑐎𑐮𑐵𑐎𑐵𑐬 𑐰𑐵 𑐎𑐮𑐵𑐥𑐵𑐬𑐏𑐷𑐫𑐵 𑐕𑐾𑑃 𑐖𑐸𑐂 𑐠𑑂𑐰 𑐴𑑀𑐚𑐮𑐠𑐸𑐰𑐵𑑅 𑑋

𑐎𑑂𑐰𑐠𑐵𑐫𑑂 𑐮𑐵𑐳𑐵𑐫𑑂 𑐕𑐎𑑅 𑐠𑐳𑑅𑐥𑐵𑐫𑐵 𑑋 𑐳𑐶𑐔𑐸𑐎 𑐩𑑂𑐰𑑅𑐮𑑂𑐴𑐸𑐫𑐵 𑑋 𑐀𑐮𑐾 𑐴𑐵𑐣𑑄 𑐖𑐶𑐩𑐶𑐟 𑐰 𑐴𑐾 𑐫𑐂𑐥𑐸𑐐𑐸 𑐠𑐵𑐫𑑂 𑐣𑑄 𑐴𑐳𑑄𑐩𑐳𑑄 𑐢𑐵𑐮 𑑋 𑐣𑐎𑐟𑐶𑐣𑐶 𑐳𑐶𑑄𑐐𑐵𑐥𑐸𑐬 𑐠𑑂𑐫𑑄𑐐𑐸𑐫𑐵 𑐮𑐳𑐟𑐵 𑐢𑐵𑐫𑐾𑐮𑐵 𑑋 𑐩𑑂𑐴 𑐣𑑂𑐫𑐮𑐾𑐢𑐸𑑄𑐎𑐹𑐐𑐸 𑐏𑑅𑐳𑐵𑑄 𑐖𑐶𑐥𑐶𑑄 𑐴𑐵𑐣𑑄 𑐰𑐳𑑅 𑐴𑐶𑐮𑐵𑑅 𑐥𑐶𑐴𑐵𑑃 𑐰𑐣𑐵 𑑋 𑐔𑐕𑐶 𑐴𑐾 𑐮𑐸𑐏𑐵 𑐔𑐵𑐫𑐵𑐔𑑂𑐰𑐣𑐷𑐐𑐸 𑐴𑑀𑐚𑐮 𑐖𑐸𑐫𑐵𑑅 𑐖𑐶𑐮 𑑋

𑐥𑑂𑐫𑐵𑐏𑑄 𑐴𑐸𑐮𑐵𑐔𑑂𑐰𑑄𑐐𑐸 𑐟𑐸𑐟𑐶𑐫𑐵𑐟 𑐠𑐵𑐟𑐫𑑂 𑐟𑐟𑑄 𑐖𑐶𑐥𑐶𑑄 𑐨𑐔𑐵 𑐄𑐏𑐾 𑐰𑐣𑐵 𑑋 𑐮𑑃𑐫𑑂 𑐩𑐣𑐹𑐟 𑐖𑐹 𑐡𑐸 𑐁𑑅𑐫𑐵 𑐂𑐮𑐫𑑂 𑐣𑑄 𑑋 𑐮𑐶𑐎𑑂𑐎𑐳𑑄 𑑒𑑔𑐑𑑁 𑐴𑐾 𑐔𑐵𑐮𑐵𑐔𑑂𑐰𑐣𑐷𑐐𑐸 𑐩𑐸𑐳𑑂𑐟𑐦𑐵 𑐳𑐾𑐣𑑂𑐚𑐬 𑐢𑐵𑑅𑐐𑐸 𑐜𑐶𑐥𑐵𑐬𑑂𑐚𑐩𑐾𑐣𑑂𑐚𑐮 𑐳𑑂𑐚𑑀𑐬 𑐡𑐹𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐩𑐣𑐹𑐟 𑐁𑑅𑐫𑐵 𑐂𑐮𑐫𑑂 𑐣𑑄 𑐡𑑂𑐰𑑃 𑐡𑑂𑐰𑑃 𑐳𑐵𑐩𑐵𑐣 𑐣𑑂𑐫𑐣𑐵𑐫𑑄𑐎𑐵𑐔𑑂𑐰𑐣 𑑋

𑑐𑑐𑑐

𑐳𑐸𑐠𑐫𑑂 𑐟𑐶𑐣𑐶 𑐡𑑂𑐫𑐣𑐵𑐐𑐸𑐮𑐶𑑄 𑐡𑐣𑐵𑐐𑐸 𑐣𑑄 𑐮𑐶𑐧𑐵𑐎𑑂𑐎 𑐴𑐾 𑐖𑐸𑐮 𑑋 𑐖𑐶𑐩𑐶𑐐𑐸 𑐳𑐶𑑄𑐐𑐵𑐥𑐸𑐬𑐫𑐵 𑐳𑐸𑐡𑑂𑐬𑑂𑐫𑑅 𑐳𑑂𑐰𑐫𑐵𑐐𑐸 𑐣𑑂𑐴𑐵𑐥𑐵𑑄𑐐𑐸 𑐡𑐶𑑄 𑑋 𑐩𑐶𑐏𑐵 𑐔𑐶𑐩𑐔𑐶𑐩 𑐫𑐵𑐫𑐵𑑄 𑐥𑐶𑐴𑐵𑑃 𑐰𑐫𑐵 𑑋 𑐧𑐶𑐔𑐵𑑅 𑐫𑐵𑐫𑐾, 𑐗𑐷𑐐𑐸 𑐡𑐾𑐫𑑂 𑐕𑐵𑐫𑑂 𑐳𑐶𑑄𑐐𑐵𑐥𑐸𑐬 𑐩𑐖𑐸𑐮 ? 𑐣𑑂𑐴𑐵𑐥𑐵 𑑔𑑗𑐳𑐵𑐮𑐥𑐵𑐏𑐾 𑐔𑐸𑐣𑐵𑐰𑐫𑐵 𑐂𑐮𑐫𑑂 𑐮𑐏𑑄 𑐳𑐟𑐎 𑐳𑐶𑐮𑐵𑐧𑐶𑐂, 𑐫𑐾𑑃𑐫𑐵𑐟 𑐳𑐶𑑄𑐐𑐵𑐥𑐸𑐬 𑐡𑐫𑐾𑐎𑐵𑐧𑐶𑐂 𑐢𑐎𑐵𑑅 𑐨𑑀𑐚 𑐎𑐵𑑅𑐥𑐶𑐣𑑂𑐳𑑄 𑐠𑑅𑐐𑐸 𑐮𑐵 𑐳𑐶𑑄𑐐𑐵𑐥𑐸𑐬𑐫𑐵𑐐𑐸 𑐠𑐖𑑂𑐫𑐵𑑅𑐐𑐸 𑐟𑐟𑑅𑐏𑐵𑐐𑐸 𑐩𑐴𑐮 𑐡𑐫𑐾𑐎𑐮, 𑐟𑐬 𑐫𑐾𑑃𑐫𑐵 𑐳𑐟𑐎𑐫𑐵 𑐐𑐟𑐶 𑐰 𑐴𑐾 𑐟𑐶𑐣𑐶 𑑋 𑐣 𑐄𑐩𑐶 𑐨𑐔𑐵 𑐮𑐖𑑂𑐫𑐵 𑐖𑐸𑐮, 𑐣 𑐗𑐷𑐳𑑄 𑐄𑐩𑐶𑐟 𑐎𑐎𑑂𑐎𑐸 𑐖𑑂𑐰𑐣𑐾 𑐏𑐣 𑑋 𑐩𑑂𑐰𑑃𑐡𑑂𑐰𑑃 𑐩𑐏𑑄𑐥𑐶𑐣𑑂𑐟 𑐕𑐎𑐮𑑄 𑐖𑐵𑐎𑐶𑐡𑑂𑐰𑑃 𑐎𑑂𑐫𑐣𑐾𑐠𑐾𑑄 𑐖𑐸𑐮, 𑑔𑑖𑐳𑐵𑐮𑐮𑐶𑐥𑐵 𑐐𑐵𑐩𑑄 𑐐𑐵𑐩𑑄 𑐏𑐸𑐳𑐶𑐧𑐵𑑅 𑐰𑑅𑐠𑐾𑑄 𑐰𑑅𑐥𑐶𑑄 𑐩𑐣𑐹𑐟 𑐀𑐮𑐾 𑐄𑐩𑐶𑐳𑑄 𑐖𑑂𑐰𑐣𑐵𑐰𑑅𑐐𑐸 𑐀𑐰𑑂𑐫𑐰𑐳𑑂𑐠𑐵 𑑋 𑐠𑐣𑐫𑐵 𑐳𑐟𑐎, 𑐕𑐾𑑃, 𑐩𑐣𑐹𑐟 𑐳𑑂𑐰𑐫𑐾𑐧𑐮𑐫𑑂 𑐐𑐸𑐮𑐶 𑐣𑑂𑐴𑐫𑐂𑐥𑐸𑐳𑐾 𑐔𑑂𑐰𑐣𑐷, 𑐰 𑐳𑑂𑐰𑐫𑐵𑑅 𑐠𑑅𑐐𑐸 𑐫𑐾𑑃 𑐡𑐾𑐫𑑂 𑐮𑐸𑐩𑐣𑐎𑐶 𑐣𑐸𑐐𑑅 𑐴𑐶𑐂𑐳𑐾 𑐔𑑂𑐰𑐣𑐷 𑑋

𑐔𑐵𑐴𑐶𑐄𑐴𑐶𑐄𑑄 𑐖𑐶𑐥𑐶𑑄 𑐀𑐣𑐫𑐵 𑐡𑐎𑐮𑐫𑑂 𑐟𑑅𑐢𑑄𑐐𑐸 𑐂𑐮𑐾𑐎𑑂𑐚𑑂𑐬𑑀𑐣𑐶𑐎 𑐳𑐵𑐩𑐵𑐣𑐫𑐵 𑐧𑐖𑐵𑐬 𑐡𑐹𑐐𑐸 𑐱𑐶𑐩𑐮𑐶𑐩 𑐳𑑂𑐎𑑂𑐰𑐵𑐫𑐬𑐫𑑂 𑐠𑑂𑐫𑐣 𑑋 𑐟𑐟𑑅𑐧𑐵𑐮𑐵𑐐𑐸 𑐮𑑃, 𑐮𑑃𑐫𑑂 𑐰𑐵𑐄𑑃𑐐𑐸 𑐐𑐵𑐬𑑂𑐜𑐣 𑑋 𑐮𑑃𑐳𑐶𑐠𑐫𑑂 𑐡𑐣𑐵𑐔𑑂𑐰𑑄𑐐𑐸 𑐕𑐏𑐵 𑐟𑐏𑐵𑐐𑐸 𑐏𑐵𑑅𑐫𑐵 𑐏𑐵𑐮𑑄 𑐨𑐸𑐣𑐵𑐟𑑅𑐐𑐸 𑐕𑐏𑐵 𑐰𑐶𑐱𑐵𑐮 𑐧𑐶𑐮𑑂𑐜𑐶𑐒 𑑋 𑐳𑐶𑑄𑐐𑐵𑐥𑐸𑐬𑐫𑐵 𑐡𑐎𑐮𑐫𑑂 𑐟𑑅𑐢𑑄𑐐𑐸 𑐂𑐮𑐾𑐎𑑂𑐚𑑂𑐬𑑀𑐣𑐶𑐎 𑐳𑐵𑐩𑐵𑐣𑐫𑐵 𑐧𑐖𑐵𑐬 𑑋 𑐗𑐷𑐐𑐸 𑐰𑐶𑐱𑐵𑐮 𑐧𑐖𑐵𑐬 𑐠𑐖𑑂𑐫𑐵𑑅𑐐𑐸 𑐣𑑂𑐫𑐵𑐐𑐹 𑐗𑐶𑐐𑐹 𑐴𑐾 𑐡𑐂 𑐖𑐸𑐂 𑐠𑐣 𑑋 𑐐𑑂𑐰𑑅𑐟𑑃 𑐐𑑂𑐰𑑅𑐟𑑃 𑐖𑐵𑑅 𑑋

𑐡𑐸𑐣𑐾 𑐥𑐳𑑅𑐫𑐵 𑐥𑐳𑑅 𑐖𑐎 𑑋 𑐡𑐎𑑂𑐰 𑐡𑐎𑑂𑐰 𑐴𑐾 𑐰𑐶𑐡𑑂𑐫𑐸𑐟𑐷𑐫 𑐳𑐵𑐩𑐵𑐣𑐫𑐵 𑐖𑐎 𑐧𑐖𑐵𑐬 𑑋 𑐚𑐶𑐨𑐷, 𑐩𑑀𑐧𑐵𑐂𑐮, 𑐎𑐩𑑂𑐥𑑂𑐫𑐹𑐚𑐬, 𑐮𑑂𑐫𑐵𑐥𑐚𑐥, 𑐎𑑂𑐫𑐵𑐩𑐬𑐵, 𑐑𑐜𑐷, 𑐰𑐳𑑅𑐴𑐶𑐂𑐐𑐸 𑐩𑐶𑐳𑐶𑐣𑐣𑐶𑐳𑐾𑑄 𑐎𑐫𑐵𑑅 𑐨𑐸𑐟𑐹𑐫𑐵𑐟 𑐩𑐵𑑅𑐐𑐸 𑐡𑐎𑑂𑐰 𑐳𑐵𑐩𑐵𑐣 𑑋 𑐴𑐬𑐾𑐎𑐳𑑂𑐫𑐵 𑐠𑑅𑐠𑑅𑐐𑐸 𑐩𑐶𑐂𑐐𑐸 𑐥𑐴𑑅 𑑋 𑐐𑐸𑐮𑐶𑐳𑑂𑐫𑐵𑑄 𑐕𑑂𑐫𑐵𑐥𑑄, 𑐐𑐸𑐮𑐶𑐳𑑂𑐫𑐵 𑐕𑐸 𑐕𑐸 𑐦𑑂𑐰𑐳𑐵 𑑋 𑐣𑑂𑐴𑐹𑐐𑐸 𑐳𑑂𑐰𑐫𑐵𑑅 𑐣𑑂𑐴𑐹𑐐𑐸 𑐳𑐵𑐩𑐵𑐣 𑐦𑐵𑐮𑐵𑐦𑐵𑐮 𑑋 𑐳𑑂𑐰𑐳𑑂𑐰𑑄 𑐴𑐾 𑐂𑐎𑐸𑐳𑐾 𑐔𑑂𑐰𑐣𑐵𑐰𑑅 𑑋

𑐕𑐥𑐸 𑐧𑐵𑐏𑑄 𑐖𑐎 𑑋 𑐗𑐶𑑄𑐳𑑂𑐰𑑄𑐐𑐹𑐐𑐸 𑐱𑐟𑐵𑐧𑑂𑐡𑐷𑐂 𑐳𑐸𑐩𑐵𑐟𑑂𑐬𑐵𑐫𑐵 𑐥𑐵𑐮𑐾𑐩𑑂𑐧𑐵𑑄𑐐 𑐡𑑂𑐰𑐷𑐥𑐫𑐵 𑐬𑐵𑐖𑐎𑐸𑐩𑐵𑐬 𑐔𑐵𑑅𑐴𑐶𑐄𑐰𑑄𑐧𑐮𑐫𑑂 𑐰𑐫𑐵𑐐𑐸 𑐖𑐴𑐵𑐖 𑐟𑐖𑑂𑐫𑐵𑐣𑐵𑑅 𑐰 𑐕𑐐𑐹 𑐖𑑄𑐐𑐮𑐫𑑂 𑐮𑐵𑐟 𑐴𑑃 𑑋 𑐀𑐣 𑐖𑑄𑐐𑐮𑐫𑑂 “𑐳𑐶𑑄𑐴” 𑐏𑐣𑐵𑑅 𑐄𑐎𑐶𑐫𑐵 𑐣𑐵𑑄 𑐴𑐾 𑐳𑐶𑑄𑐴𑐥𑐸𑐬 𑐟𑐫𑐵𑐧𑐶𑐮 𑐴𑑃 𑑋 𑐧𑐵𑐏𑑄 𑐮𑐵 𑐏𑑅, 𑐠𑑂𑐰 𑐡𑑂𑐰𑐶𑐥𑐫𑑂 𑐳𑐶𑑄𑐴 𑐡𑐂𑐐𑐸 𑐳𑐩𑑂𑐨𑐵𑐰𑐣𑐵 𑐴𑐾 𑐩𑐡𑐸 𑑋 𑐀𑐖𑐹𑐔𑐵𑐫𑐵𑐥𑐸𑐐𑐸 𑐏𑑃 𑐩𑐏𑐸𑐮𑐵, 𑐎𑐶 𑐐𑐣 𑐳𑐶𑑄𑐴 𑐢𑐂𑐐𑐸 𑐴𑐾 𑐡𑐂𑐩𑐏𑐸, 𑐀𑐣 𑐳𑐶𑑄𑐴𑐫𑐵 𑐁𑐎𑐬𑑂𑐲𑐞 𑐠𑐥𑐵𑐫𑑂𑐖𑐶 𑑋

𑐳𑐶𑑄𑐴𑐫𑐵 𑐩𑑀𑐴𑑄 𑐣𑐾𑐰𑐵𑑅𑐟𑐫𑑂𑐟 𑐣𑑄 𑐩𑑂𑐴𑑀 𑐨𑐸𑐣𑐵𑐟𑑅𑐐𑐸 𑐩𑐡𑐸 𑑋 𑐳𑐶𑑄𑐴 𑐩𑐡𑐹𑐐𑐸 𑐡𑑂𑐫𑑅𑐐𑑅, 𑐧𑐴𑐵𑐧𑐴𑐶 𑐳𑐟𑑅, 𑐕𑐸𑑄 𑐕𑐸𑑄 𑐡𑐂𑐩𑐏𑐸 𑑋 𑐗𑐷 𑐥𑐸𑐬𑑂𑐏𑐵 𑐎𑐮𑐵𑐎𑐵𑐬𑐥𑐶𑐣𑑂𑐳𑑄 𑐳𑐶𑑄𑐴 𑐐𑐣 𑐏𑐣 𑐖𑐸𑐂, 𑐳𑐸𑐣𑐵𑑄 𑐄𑐎𑐶𑐫𑐵 𑐔𑐶𑐟𑑂𑐬 𑐰𑐵 𑐩𑐹𑐬𑑂𑐟𑐶 𑐡𑐎𑐮𑐫𑑂𑐣𑑂𑐴𑐵𑐥𑐵𑑄 𑐳𑑂𑐰𑐣𑐶𑐐𑐮𑐫𑑂 𑐖𑑂𑐰𑐣𑐵𑐰𑐮 𑐖𑐸𑐂 𑑋 𑐠𑐸𑐎𑐶𑐫𑐵 𑐴𑐶𑐳𑐵𑐧 𑐎𑐶𑐟𑐵𑐧 𑐳𑐸𑐣𑐵𑑄 𑐩𑐵𑐮𑐷𑐐𑐸 ? 𑐣𑑂𑐴𑑂𑐫𑐵𑐐𑐸𑐳𑐵𑑄 𑐳𑐶𑑄𑐐𑐵𑐥𑐸𑐬𑑄 𑐳𑐶𑑄𑐴𑐫𑐵 𑐣𑐵𑑄 𑐔𑑂𑐫𑐵𑐎𑐵𑐧𑐶𑐮 𑐳𑑄𑐳𑐵𑐬𑐫𑑂 𑑋 𑐮𑐶𑐥𑐵 𑐩𑐣𑐹𑐟𑐫𑑂𑐳𑑄 𑐳𑐶𑑄𑐐𑐵𑐥𑐸𑐬 𑐳𑐶𑐫𑐵𑐔𑑂𑐰𑐣𑐷, 𑐳𑐶𑑄𑐴 𑐩𑐳𑐶𑐫𑐵𑐰𑐣𑐷 𑑋

𑑐𑑐𑑐

𑐖𑐶𑐩𑐶𑐟 𑐳𑑅𑐟𑐵 𑐟𑑅𑐎𑐠𑑄 𑐖𑐶𑐥𑐶𑑄 𑐣𑑂𑐴𑐶𑐣𑐫𑑂 𑐟𑐶𑐣𑐶 𑐎𑐣𑑂𑐦𑐬𑐾𑐣𑑂𑐳𑐫𑐵𑑅𑐠𑐵𑐫𑑂 𑐠𑑂𑐫𑐣 𑑋 𑐰𑐵𑐄𑑃𑐐𑐸 𑐎𑑂𑐫𑐧𑐫𑑂 𑐖𑑂𑐫𑑅𑐣𑐵𑑄 𑐖𑐶𑐩𑐶𑐟 𑐥𑐶𑐫𑐵𑐔𑑂𑐰𑐣, 𑐀𑐮𑐾 𑐠𑐷 𑐠𑐷 𑐡𑐾𑐫𑑂𑐫𑐵𑐥𑐶𑑄 𑐰𑐶𑐱𑐾𑐲 𑐫𑐵𑐣𑐵𑑅 𑐮𑑅𑐫𑐵 𑐏𑑂𑐫𑐮𑐫𑑂 𑐖𑑂𑐫𑐵 𑐫𑐵𑐂𑐥𑐶𑑄 𑐰𑐶𑐎𑐵𑐳𑐎𑐬𑑂𑐩𑐷𑐟 𑐰 𑐥𑐟𑑂𑐬𑐎𑐵𑐬𑐟 𑐠𑑂𑐫𑐣𑐵 𑐔𑑂𑐰𑐣 𑑋 𑐡𑐎𑑂𑐰 𑐖𑐶𑐩𑐶𑐟 𑐥𑐶𑐫𑐵𑐔𑑂𑐰𑑄𑐐𑐸 𑐮𑐵 𑐣𑐾𑐥𑐵𑐮𑐫𑐵𑐟, 𑐖𑐶𑐩𑐶𑐟 𑐣𑐾𑐥𑐵𑑅 𑐢𑐎𑐵𑑅 𑐩𑑂𑐴𑐳𑐶𑐂𑐎𑐵𑐧𑐶𑐂𑐰𑑄 𑐡𑐎𑑂𑐰𑑄 𑐮𑐫𑑂𑐟𑐵𑐮 𑑋

𑐮𑐶𑐥𑐵 𑐖𑐶𑐩𑐶𑐟 𑐳𑐶𑑄𑐐𑐵𑐥𑐸𑐬𑐫𑑂 𑐮𑑅 𑐐𑐠𑐾𑐫𑐵𑐣𑐵𑑅 𑐳𑐦𑐵 𑐫𑐵𑐂𑐠𑐵𑐫𑑂 𑐫𑑄𑐎𑐮 𑑋 𑐄𑐩𑐶 𑐮𑐵 𑐔𑑅𑐧𑐶𑑄 𑐥𑐶𑐴𑐵𑑃 𑐰𑑅𑐐𑐸 𑐦𑑀𑐴𑐬𑐐𑐸 𑐟𑐵𑐎𑐸𑐐𑐸 𑐴𑐵𑐎𑐸𑐐𑐸 𑐮𑑅 𑐟𑐎 𑐴𑐾 𑐟𑑂𑐰𑐣𑐾 𑐖𑐶𑐄𑐐𑐸 𑐡𑐫𑐾𑐎𑐷 𑐏𑐣𑐷 𑑋 𑐀𑐠𑐾 𑐢𑐮𑑄 𑐰𑑅𑐐𑐸 𑐮𑑅𑐫𑐵𑐟 𑐥𑑂𑐬𑐱𑑀𑐢𑐣 𑐫𑐵𑐣𑐵𑐐𑐸 𑐢𑐎𑐵𑑅 𑐖𑐶𑐩𑐶𑐟 𑐕𑐐𑐹 𑐕𑐐𑐹 𑐐𑐶𑐮𑐵𑐳 𑐮𑑅 𑐟𑑂𑐰𑑄𑐎𑐮, 𑐀𑐮𑐾 𑐕𑐐𑐹 𑐴𑐶𑐳𑐶𑐔𑐵 𑐡𑐹𑐐𑐸 𑐮𑑅 𑐱𑐶𑐱𑐶 𑐣𑑄 𑐧𑐶𑐮 𑑋 𑐩𑐾𑐥𑐶𑑄𑐳𑐵 𑐠𑐶𑐂 𑐑𑐔𑐵𑐂, 𑐟𑐬 𑐖𑐶𑐩𑐶𑐟 𑐀𑐠𑐾 𑐕𑐸𑑄 𑐩𑐖𑐹, 𑐮𑑅 𑐴𑐶𑐬𑐵 𑐠𑐾𑑄 𑐫𑐔𑐸𑐳𑐾 𑐔𑑂𑐰𑑄 𑑋

𑐕𑐟𑐵 𑐏𑑃𑐫𑑂 𑐳𑑂𑐰𑐣𑐶𑐐𑑅 𑐰 𑐳𑐶𑑄𑐐𑐵𑐥𑐸𑐬 𑐖𑑂𑐰𑑅𑐮𑐵𑑅 𑑋 𑐰 𑐥𑑂𑐫𑐏𑐾𑐬𑑄 𑐮𑐏𑑄 𑐔𑐵𑑅𑐴𑐶𑐂𑐎𑐵𑐟𑑅𑐳𑐵𑑄 𑐮𑑅 𑐩𑐾𑐐𑐸 𑐡𑐾𑐳𑑄 𑐁𑐫𑐵𑐟 𑐫𑐵𑐣𑐵𑑅 𑐟𑑂𑐰𑐣𑐾𑐩𑐵𑑅, 𑐗𑐷 𑐗𑐷𑐐𑐸 𑐡𑐠𑐸𑑄 𑐧𑐵𑐐𑐩𑐟𑐶 𑐰𑐶𑐲𑑂𑐞𑐸𑐩𑐟𑐶 𑐧𑐵𑑅 𑐰𑐣𑐵𑐔𑑂𑐰𑑄𑐳𑐵𑑄 𑐚𑑂𑐫𑐵𑑄𑐎𑐬𑑄 𑐮𑑅 𑐣𑑂𑐫𑐣𑐵𑑅 𑐟𑑂𑐰𑐣𑐾𑐩𑐵𑑅 𑑋 𑐠𑑂𑐰 𑐮𑐵 𑐀𑐰𑐳𑑂𑐠𑐵𑐫𑐵 𑐏𑑃 𑐖𑐸𑐮 𑑋 𑐟𑐬 𑐄𑐩𑐶𑐟 𑐢𑐵𑑅𑐳𑐵 𑐡𑑂𑐫𑐰𑑄 𑐴𑐾 𑐟𑑂𑐰𑐣𑐾𑐐𑐸 𑐮𑑅 𑐫𑐎𑑂𑐰 𑐩𑐧𑐶𑐄𑐐𑐸, 𑐗𑐷𑐟 𑐢𑐵𑑅𑐳𑐵 𑐡𑑂𑐫𑐰𑑄 𑐣𑑂𑐴𑑂𑐫𑐵𑐎𑑂𑐰 𑐫𑐎𑑂𑐰 𑐟𑑂𑐰𑐣𑐾𑐐𑐸 𑐮𑑅 𑐧𑐶𑐄𑐳𑐵𑑄 𑐣𑐎𑐟𑐶𑐣𑐶 𑐠𑐣 𑐰𑑅𑐥𑐶𑐣𑑂𑐳𑑄 𑐠𑐣𑐫𑐵 𑐥𑑂𑐬𑐵𑐎𑐺𑐟𑐶𑐎 𑐮𑑅𑐫𑐵 𑐩𑐸𑐴𑐵𑐣 𑐀𑐮𑐾 𑐔𑐵𑑄𑐣𑑂𑐴𑐶𑑄 𑐴𑐵𑐫𑐵𑐔𑑂𑐰𑑄𑐐𑐸 𑐮𑑂𑐰𑐴𑑄𑐴𑐶𑐟𑐶 𑐳𑑂𑐫𑑄𑐎𑐵𑑅 𑐩𑐾𑐮𑐩𑑂𑐔𑐶𑐫𑐵 𑐧𑐵𑐏𑑄 𑐩𑐶𑐫𑐵𑐔𑑂𑐰𑑄𑐐𑐸 𑑋 𑐦𑐬𑐎 𑐠𑐸𑐮𑐶 𑐴𑐾 𑑋

𑐗𑐷𑐠𑐵𑐫𑑂 𑐣𑑄 𑐳𑑅𑐳𑐶𑐄𑐥𑐶𑑄 𑐮𑐵 𑐩𑐡𑐸𑐐𑐸 𑐩𑐏𑐸 𑐣𑐶 𑑋 𑐀𑐩𑐾𑐬𑐶𑐎𑐵𑐫𑑂 𑐖𑐵𑐥𑐵𑐣𑐫𑑂 𑐧𑑂𑐰𑐣𑐵𑐰𑑅𑐥𑐶𑑄 𑐴𑐾 𑐳𑐬𑐎𑐵𑐬𑐫𑐵 𑐩𑐣𑑂𑐟𑑂𑐬𑐵𑐮𑐫𑐫𑐵 𑐳𑐔𑐶𑐰 𑐄𑐥𑐳𑐔𑐶𑐰 𑐖𑐸𑐂 𑑋 𑐀𑐗 𑐳𑐬𑐎𑐵𑐬𑑄 𑐠𑑅 𑐎𑐬𑑂𑐩𑐔𑐵𑐬𑐷𑐟𑐫𑑂𑐟 𑐟𑐧𑐮𑐫𑐵 𑐟𑐮𑐧, 𑐧𑑂𑐰𑐣𑐵𑐫𑐵 𑐀𑐮𑐐 𑐢𑑂𑐫𑐧𑐵 𑐥𑐸𑐮𑐵𑑅 𑐐𑐣 𑐐𑐣 𑐕𑐵𑐟𑑂𑐬𑐰𑐺𑐟𑐶 𑐧𑐶𑐫𑐵𑑅 𑐧𑑂𑐰𑑄𑐎𑐾𑐕𑑂𑐰𑐂, 𑐀𑐮𑐾 𑐄𑐥𑐶𑑄 𑐴𑐾 𑐮𑐶𑐴𑐵𑑃 𑐰𑐫𑐵𑑅 𑐏𑐸𑐳𑐶𑐂 𑐢𑑅 𑐮𑑂𑐰𑐵𑐎𑐕𑑂𑐫𑐵𑐣𑐵𑐫𑐵 𑐟𑐮𑐧 𑐣𑐂 𑑋 𑐐𑐣 𑐳𑐸𑐣𑐵𑑄 𑐳𑑂𑐫𑑄𑐎𑐮 𑐢𑐎𑐵𑑅 𑐴𑐾 𑐢𑐵𑐫𑐾 𑐩𑐳𑐫𑐵𑐰𑐂 𑐖𑐶 𑑋 𑐳𑐶𑑄𑐐𑐵𑐥𑐸𑐬𑐫𑐵 𑐰 𑐖𑐣𑐟𑐵 𑐰 𑐄𑐩𑐶𑐐𑐸 𑐩𑐶𑐴𑐾𑐣𑐟𑐫𑐵𑐟 𑐖𑑂𑐰𑐖𑐥𑐮𑐵 𑐫𑐵𑐣𑐵𑑅 𑐥𑐶𑐴𑐵𑑃 𑐰𑐫𑐵 𑑋

𑑐𑑐𑑐

𑐖𑐸𑐮𑐵𑐂 𑑑𑑓 𑐠𑑁𑑄 𑑋 𑐔𑐵𑐣𑑂𑐴𑐫𑑂 𑐔𑐵𑐣𑑂𑐴𑐫𑑂 𑐔𑐵𑑅𑐴𑐶𑐮𑐾𑐐𑐸 𑐧𑐵𑑄𑐮𑐵𑑅𑐐𑐸 𑐧𑐵𑐣𑐷 𑐩𑐏𑐸 𑑋 𑐳𑐸𑐠𑐫𑑂 𑐣𑑂𑐴𑐵𑐥𑐵𑑄 𑐎𑐣𑑂𑐦𑐬𑐾𑐣𑑂𑐳𑐫𑑂 𑐰𑐣𑐾𑐩𑐵𑑅𑐥𑐶𑐣𑑂𑐟 𑐮𑐵 𑐠𑑂𑐰 𑐗𑐣𑑂 𑐴𑐾 𑐩𑐖𑐶𑐄 𑑋 𑐮𑐶𑐧𑐵𑐎𑑂𑐎 𑐡𑑂𑐫𑐣𑐵, 𑐮𑐶𑐧𑐵𑐎𑑂𑐎 𑐴𑐾 𑐡𑐣𑐵 𑑋 𑐀𑐮𑐾 𑐢𑐵𑐢𑐵𑑄 𑐴𑐾 𑐠𑑁𑑄 𑐖𑐶𑐥𑐶𑑄 𑐮𑐶𑐧𑐵𑐎𑑂𑐎 𑐟𑐶𑐣𑐶 𑐠𑑂𑐫𑐣 𑐖𑑂𑐫𑐵𑐗𑑂𑐰𑐮𑐫𑑂 𑑋

𑐴𑐵𑐣𑑄 𑐠𑑂𑐫𑐣 𑐖𑐶𑐥𑐶𑑄 𑐱𑐶𑐩𑐮𑐶𑐩 𑐧𑐖𑐵𑐬𑐫𑑂 𑐧𑐴𑐣𑐷 𑑋 𑐧𑐴𑐣𑐷 𑐖𑐹𑐳𑐵𑑄 𑐥𑐳𑑅 𑐟𑐶𑐂 𑐢𑐂𑐐𑐸 𑐢𑐣𑑂𑐡𑐵 𑐎𑐵𑐫𑐾𑐩𑑂𑐰𑐵𑑅𑐐𑐸 𑐠𑐵𑐫𑑂 𑐰 𑑋 𑐣𑑂𑐫𑐵𑐫𑐾𑐩𑐵𑑅𑐐𑐸 𑐕𑐐𑑅 𑐮𑑂𑐫𑐵𑐥𑐚𑐥, 𑐀𑐣 𑐡𑐸 𑐡𑑂𑐰𑐮𑑄𑐡𑑂𑐰𑑅 𑑋 𑐖𑐶𑑄 𑐣𑑂𑐴𑐵𑐥𑐵 𑐫𑐾𑑃𑐫𑑂 𑐠𑐠𑐾 𑐧𑑂𑐰𑐫𑐵𑑅 𑐩𑐣𑐸𑐏𑑄 𑐠𑐶𑐫𑐵𑑅, 𑐔𑐮𑐾𑐫𑐵𑐣𑐵𑑅 𑐳𑑂𑐰𑐫𑐾𑐖𑐶𑐂𑐎 𑐮𑑂𑐫𑐵𑐥𑐚𑐥 𑐩𑐶𑐫𑐵𑐟𑑅𑐐𑐸 𑐩𑐏𑐣𑐵𑐣𑐶 𑑋 𑐢𑑂𑐫𑐧𑐵𑑄 𑐨𑐵𑐫𑑂 𑐩𑐮𑑂𑐴𑐵𑑅𑐳𑐵𑑄 𑐎𑐫𑐵 𑐴𑐾 𑐕𑑂𑐰𑐫𑐵 𑐩𑑂𑐫𑐵𑐎𑐧𑐸𑐎 𑑋 𑐕𑐎𑑅 𑐫𑐮𑐎𑐶 𑐰 𑐴𑐾 𑐩𑐵𑑅𑐩𑑂𑐴 𑐖𑐶 𑑋

𑐳𑐶𑐔𑐸𑐐𑐸 𑐰 𑐱𑐵𑐣𑑂𑐟𑐐𑐸 𑐟𑐟𑑅𑐧𑐵𑐮𑐵𑐐𑐸 𑐮𑑃 𑐳𑐶𑐠𑐫𑑂 𑐖𑐶 𑐰 𑐥𑑂𑐬𑐎𑐵𑐱 𑐏𑑃 𑐮𑑂𑐴𑐵𑐮𑑂𑐴𑐵𑑄 𑐰𑐫𑐵𑐔𑑂𑐰𑐣𑐵 𑑋 𑐖𑐶𑐩𑐶𑐐𑐸 𑐩𑐶𑐏𑐵𑐫𑑂 𑐳𑐶𑑄𑐐𑐵𑐥𑐸𑐬 𑐀𑐮𑐾 𑐣𑐸𑐐𑐮𑐫𑑂 𑐣𑐾𑐥𑐵𑑅 𑑋 𑐏𑑃 𑐮𑑂𑐴𑐵𑐫𑐾𑐐𑐸 𑐩𑐾𑐐𑐸 𑐰𑐶𑐲𑐫 𑐕𑐸 𑐖𑐸𑐂𑐦𑐂? 𑐖𑐶𑐩𑐶𑐳𑑄 𑐧𑐶𑐔𑐵𑑅 𑐟𑐟𑑄 𑐰𑐫𑐵𑐔𑑂𑐰𑐣𑐵 — 𑐢𑐵𑐠𑐾𑑄 𑐣𑐾𑐥𑐵𑑅 𑐕𑐵𑐫𑑂 𑐰𑐶𑐎𑐵𑐳 𑐩𑐖𑐹𑐐𑐸 ? 𑐕𑐟𑐵 𑐴𑐾 𑐖𑐎 𑐮𑐶𑐳𑑅 𑐡𑐸, 𑐗𑐷 𑐣𑐾𑐟𑐵𑐟𑐫𑑂 𑐏𑑃 𑐖𑐎 𑐮𑑂𑐴𑐵𑐫𑐾𑐐𑐸 𑐖𑑂𑐫𑐵 𑐩𑐫𑐵𑐫𑐾𑐐𑐸 𑐧𑐵𑐣𑐷 𑐡𑐸, 𑐰 𑐴𑐾 𑐎𑐵𑐬𑐞𑑄 𑐏𑑅 𑑋 𑐀𑐠𑐾𑐳𑐵 𑐣𑐾𑐥𑐵𑐮 𑐀𑐳𑐦𑐮 𑐖𑐹𑐐𑐸𑐫𑐵 𑐳𑐸 𑐖𑐰𑐵𑐦𑐡𑐾𑐴𑐷 𑐮𑐾 ?

𑑐𑑐𑑐

𑐣𑑂𑐴𑑂𑐫𑐵𑐐𑐸𑐳𑐵𑑄 𑐎𑐣𑑂𑐦𑐬𑐾𑐣𑑂𑐳𑐫𑐵 𑐣𑐶𑐫𑐩 𑐎𑐠𑑄 𑐀𑐠𑐾 𑐫𑐵𑐫𑐾 𑐠𑐠𑐾 𑐫𑐵𑐫𑐾 𑐢𑐫𑐵𑐰𑐫𑐵 𑑋 𑐀𑐮𑐾 𑐀𑐣 𑐧𑑂𑐰𑐟𑐶𑐎𑐫𑐵𑐐𑐸𑐫𑐵 𑐡𑐳𑐶𑐥𑑁 𑐖𑑂𑐰𑐣𑐵𑑅 𑐴𑑀𑐚𑐮𑐫𑑂 𑐮𑐶𑐴𑐵𑑃 𑐰𑐫𑐵 𑑋 𑐥𑐮𑐏𑑄 𑐥𑑂𑐬𑐎𑐵𑐱𑐮𑐶𑐳𑐾 𑐰 𑐐𑐣𑑄 𑐩𑐡𑐹𑐐𑐸 𑐳𑐩𑐸𑐡𑑂𑐬𑐷 𑐳𑐶𑑄𑐴 𑐀𑐠𑐰𑐵 𑐩𑐬𑐮𑐵𑐫𑐣𑐫𑐵 𑐮𑐶𑐎𑑂𑐎 𑐔𑑂𑐰𑐣𑐵𑑅 𑐥𑐮𑐏 𑐣𑑂𑐴𑑂𑐫𑐥𑐸𑐎𑐵 𑐀𑐮𑐾 𑐰 𑐠𑑅𑐐𑐸 𑐮𑑃 𑐮𑐶𑐣𑐵𑑅 𑐰𑐣 𑑋

𑐖𑐶 𑐰 𑐩𑐬𑐮𑐵𑐫𑐣 𑐥𑐮𑐏 𑐏𑑃 𑐧𑑂𑐫𑐵𑐎𑐵 𑑋 𑐩𑐶𑐏𑐵𑑄 𑐩𑐶𑐏𑐵𑑄 𑐖𑐎 𑐴𑐾 𑐳𑐵𑑄 𑑋 𑐩𑐬𑐮𑐵𑐫𑐣 — 𑐣𑐵𑐩𑑄 𑐴𑐾 𑐢𑐵𑑅 𑐳𑐩𑐸𑐡𑑂𑐬𑐷 𑐳𑐶𑑄𑐴, 𑐀𑐠𑐾 𑐢𑐂𑐐𑐸 𑐩𑑂𑐴 𑐣𑑂𑐫𑐵𑐫𑐵𑐐𑐸, 𑐕𑑂𑐫𑑄 𑐢𑐵𑑅𑐳𑐵 𑐳𑐶𑑄𑐴𑐫𑐵𑐐𑐸 𑑋 𑐳𑑂𑐰𑑅𑐳𑐵 𑐕𑐸𑑄 𑐴𑐾 𑐩𑐏𑐸𑐠𑐾𑑄𑐔𑑂𑐰𑑄 𑑋 𑐣𑐵𑐎𑑄 𑐟𑑅𑐢𑑄𑐐𑐸 𑐣𑑄 𑐩𑐏𑐸 𑑋 𑐳𑐣𑑂 𑑑𑑙𑑗𑑒𑐫𑑂 𑐣𑑂𑐴𑐵𑐥𑐵𑑄 𑐠𑑂𑐰 𑐡𑐫𑐾𑐎𑐹𑐐𑐸, 𑑘.𑑖𑐩𑐶𑐚𑐬 𑐖𑐎 𑐟𑐖𑐵𑑅 𑑋 𑐜𑐾𑐣𑐩𑐵𑐬𑑂𑐎𑐫𑐵 𑐩𑐬𑐩𑐾𑐜 𑐰 𑐧𑑂𑐬𑐸𑐳𑐾𑐮𑑂𑐳𑐫𑐵 𑐩𑐵𑐣𑐶𑐎𑐾𑐣 𑐥𑐶𑐳 𑐠𑐾𑑄 𑐴𑐾 𑐣𑐵𑐎𑑄 𑐧𑐵𑑄𑐮𑐵𑑅𑐐𑐸 𑐩𑐏𑐳𑐾𑑄 𑐣𑑄 𑐰 𑐱𑐴𑐬𑐫𑐵 𑐴𑐾 𑐁𑐎𑐬𑑂𑐲𑐞 𑐖𑐸𑐂𑐟 𑐟𑐵𑑅𑐮𑐵𑑅𑐐𑐸 𑐩𑐹𑐬𑑂𑐟𑐶 𑐠𑑂𑐰 𑑋 𑐳𑐣𑑂 𑑒𑑐𑑐𑑒𑐮𑐫𑑂 𑐁𑑅𑐫𑐵 𑐩𑐬𑐮𑐵𑐫𑐣 𑐥𑐵𑐬𑑂𑐎𑐫𑑂 𑐟𑐫𑐾 𑐴𑑅𑐐𑐸 𑐴𑑃 𑑋 𑐰𑐫𑐵𑐐𑐸 𑐩𑑂𑐴𑐸𑐟𑐸𑑄 𑐴𑐵𑐫𑐵𑐔𑑂𑐰𑑄𑐐𑐸 𑐮𑐏𑑄 𑐣𑑄 𑐩𑐣𑐹𑐟𑐫𑑂𑐟 𑐮𑑅𑐫𑐵 𑐩𑐴𑐟𑑂𑐰𑐫𑐵 𑐏𑑃 𑐎𑐣𑐵𑐔𑑂𑐰𑐣 𑑋 𑐮𑑅 𑐩𑐡𑐸𑐳𑐵 𑐣 𑐩𑐬𑐮𑐵𑐫𑐣 𑐡𑐂, 𑐣 𑐰𑐫𑐵𑐐𑐸 𑐩𑑂𑐴𑐸𑐟𑐸𑑄 𑐮𑑅 𑐴𑐵𑑅𑐐𑐸 𑐳𑑂𑐰𑐫𑐾𑐡𑐂 𑑋 𑐱𑐵𑐫𑐡 𑐩𑐬𑐮𑐵𑐫𑐣 𑐩𑐡𑐸𑐳𑐵 𑐳𑐶𑑄𑐐𑐵𑐥𑐸𑐬 𑐴𑐾 𑐡𑐂𑐩𑐏𑐸 𑐮𑐵, 𑐴𑐮𑐵?

𑐀𑐣 𑐴𑐾 𑐳𑐩𑐸𑐡𑑂𑐬, 𑐀𑐣 𑐴𑐾 𑐀𑐣𑐣𑑂𑐟 𑐁𑐎𑐵𑐳, 𑐀𑐣 𑐴𑐾 𑐰𑐵𑐄𑑃𑐐𑐸 𑐥𑐵𑐬𑑂𑐎, 𑐀𑐣 𑐴𑐾 𑐀𑐟𑑂𑐫𑐵𑐢𑐸𑐣𑐶𑐎 𑐰𑐶𑐮𑑂𑐜𑐶𑐒 𑑋 𑐡𑐫𑐾𑐎𑐾𑐟 𑐴𑐾 𑐏𑑅𑐳𑐵 𑐄𑐮𑐶 𑐟𑐎𑐹𑐐𑐸 𑐠𑐵𑐫𑑂 𑐩𑑂𑐰𑐵𑑅 𑐏𑐣𑐷 𑑋 𑐴𑐬𑐾𑐎 𑐔𑐶𑐖𑐫𑑂 𑐳𑐸𑐣𑑂𑐡𑐬𑐟𑐵 𑐡𑐂, 𑐫𑐡𑐶 𑐩𑐣 𑐥𑑂𑐬𑐦𑐸𑐮𑑂𑐮𑐶𑐟 𑐖𑐸𑐮 𑐢𑐵𑑅𑐳𑐵 𑑋 𑐏𑐣 𑐎𑐶 𑐳𑑂𑐫𑑄𑐎𑐾𑐟 𑐴𑐾 𑐳𑑂𑐰𑐂𑐥𑐶𑑄 𑐗𑐷 𑐣𑐾𑐥𑐵𑐮𑐷𑐟 𑐠𑐖𑑂𑐫𑐵𑑅𑐥𑐶𑐣𑑂𑐟 𑐖𑐹𑐳𑐵 𑐢𑐵𑑅𑐳𑐵 𑐩𑐶𑐏𑐵𑐫𑑂 𑐴𑐾 𑐳𑑂𑐫𑑄𑐎𑐾𑐐𑐸𑐫𑐵 𑐳𑑂𑐫𑑄𑐎𑐾𑐐𑐸 𑐖𑐎 𑐏𑐣𑐵𑐔𑑂𑐰𑐣𑐷 𑐖𑐸𑐂 𑑋

𑐩𑐣𑐹𑐟 𑐩𑑂𑐰𑑅 𑐩𑑂𑐰𑑅 𑐰𑐫𑐵𑐔𑑂𑐰𑐣 𑑋 𑐐𑐸𑐮𑐶𑑄 𑐖𑑂𑐰𑐮𑐶𑑄 𑐖𑑂𑐰𑑅, 𑐐𑐸𑐮𑐶𑑄 𑐥𑐬𑐶𑐰𑐵𑐬𑐮𑐶𑐳𑐾 𑑋 𑐎𑐟𑐵𑑄𑐩𑐬𑐶𑐟𑐫𑑂𑐐𑐸 𑐥𑐳𑑅𑐠𑐾𑑄 𑐔𑑂𑐰𑑄 𑑋 𑐧𑐵𑑄𑐮𑐵𑑅𑐐𑐸 𑐴𑐾 𑐏𑑅𑐮𑐵, 𑐡𑐸𑐥𑐶𑑄 𑐖𑐸𑐫𑐵𑑅 𑐳𑑂𑐰𑐫𑐾𑐖𑐶𑐂𑐎 𑐥𑐸𑐣𑐾𑐳𑑅𑐐𑐸 𑐮𑐵 𑑋 𑐣 𑐫𑑁𑐰𑐣𑐫𑐵 𑐧𑐵𑑄 𑐴𑐾 𑐧𑐵𑑄𑐮𑐵𑐫𑐾𑐐𑐸 𑐮𑐵 𑑋 𑐳𑑂𑐰𑐳𑑂𑐰𑑄 𑐖𑑂𑐫𑑅 𑐖𑐸𑐫𑐵𑐔𑑂𑐰𑐣 𑐖𑐶𑐐𑐸 𑐩𑐶𑐏𑐵 𑑋 𑐩𑐾𑐥𑐶𑐣𑑂𑐳𑑄 𑐏𑑄𑐳𑐵 𑐐𑐸𑐮𑐶 𑐣𑐫𑐾𑐠𑐾𑑄 𑐳𑑂𑐰𑐫𑐵𑐔𑑂𑐰𑑄𑐐𑐸 𑐢𑐵𑐂 𑐖𑐸𑐂 𑐖𑐶𑐟𑑅 𑑋 𑐟𑐬 𑐩𑐶𑐏𑐵𑐫𑐵 𑐳𑑂𑐰𑐫𑐵𑑅 𑐴𑐾 𑐖𑐎 𑐮𑐸𑐢𑐣𑐾𑐐𑐸 𑐩𑐟𑐶𑐂 𑑋

𑐴𑑂𑐫𑐵𑐄𑑃𑐐𑐸 𑐣𑐶𑐨𑐵𑑅 𑐏𑐶𑐄𑑃𑐏𑐶𑐄𑑃 𑐢𑐫𑐵𑐴𑐮 𑑋 𑐩𑐣𑐹𑐟 𑐡𑐎𑑂𑐰 𑐡𑐎𑑂𑐰 𑐴𑐾 𑐴𑑂𑐫𑐵𑐄𑑃𑐳𑐾 𑑋 𑐩𑐟𑐶𑐣𑐵𑐫𑐵 𑐬𑑄𑐐 𑐣𑑄 𑐴𑑂𑐫𑐵𑐄𑑃𑐳𑐾 𑐔𑑂𑐰𑐣𑐷 𑐖𑐸𑐂 𑑋 𑐏𑐶𑐄𑑃𑐮𑐎𑐶 𑐩𑐣𑐹𑐟 𑐩𑐟𑐶𑐣𑐵 𑐧𑑂𑐰𑐫𑐾𑐩𑐵𑐮𑐵𑐰𑐂 𑑋 𑐧𑐵𑑄𑐩𑐮𑐵𑑅𑐐𑐸 𑐀𑐠𑐾 𑐕𑐸𑑄 𑐩𑐏𑐸, 𑐟𑐬 𑐀𑐣𑐫𑐵 𑐖𑑂𑐰𑐮𑐶𑑄 𑐖𑑂𑐰𑑅 𑐮𑑂𑐴𑐵𑑅𑐖𑑂𑐰𑐣𑐵𑑅 𑐰𑐫𑐵𑐔𑑂𑐰𑑄𑐥𑐶𑑄 𑐩𑐟𑐶𑐣𑐵𑐫𑐵 𑐗𑑄𑐐𑑅𑐟𑐫𑑂𑐳𑑄 𑐖𑐶𑐟𑑅 𑐳𑐵𑐮𑐵𑐔𑑂𑐰𑐣, 𑐧𑑂𑐰𑐫𑐾𑐎𑐵𑐔𑑂𑐰𑐣 𑑋 𑐖𑐶 𑐢𑐵𑑅𑐳𑐵 𑐫𑐵𑐎𑑅𑐔𑐵 𑑋 𑐣𑑂𑐴𑑂𑐫𑐵𑐧𑐮𑐾𑑄 𑐠𑐾𑑄 𑐫𑐵𑐎𑑅𑐔𑐵 𑑋 𑐏𑐶𑐄𑑃𑐳𑐾 𑐔𑑂𑐰𑐣𑐵𑐰𑑅𑐮𑐶𑐳𑐾 𑐀𑐣𑑄 𑐠𑐣𑑄 𑐩𑐡𑐫𑐾𑐎 𑐩𑐟𑐫𑐵 𑐖𑑅 𑐴𑑂𑐰𑐮𑐵𑐟𑐮 𑑋 𑐴𑑂𑐫𑐵𑐄𑑃𑐳𑐾, 𑐰𑐵𑐄𑑃𑐳𑐾, 𑐩𑑂𑐴𑐵𑐳𑐸𑐳𑐾, 𑐰𑑃𑐔𑐸𑐳𑐾 𑑋 𑐮𑑅 𑐖𑐎 𑐧𑐵𑑄𑐮𑐵𑑅 𑐢𑐫𑐵𑑄 𑐮𑐏𑐫𑑂 𑐩𑐟𑐫𑐵 𑐖𑐮𑑄 𑐏𑐮𑐎𑐶 𑐗𑐣𑑂 𑐧𑐵𑑄𑐮𑐵𑐂𑐐𑐸 𑐖𑐸𑐫𑐵𑐔𑑂𑐰𑐣 𑑋

𑐩𑐣𑐹𑐟 𑐳𑑂𑐰𑐷𑐡𑑃 𑐥𑐷𑐡𑑃 𑐣𑑂𑐴𑑂𑐫𑑅 𑐀𑐳𑑂𑐟𑐶𑐟𑑂𑐰𑐫𑑂 𑐩𑐡𑐹𑐐𑐸 𑐕𑐐𑐹 𑐳𑐶𑐩𑐣𑑂𑐟𑐶𑐫𑐵 𑐩𑐹𑐬𑑂𑐟𑐶𑐂 𑐠𑑅𑐐𑐸 𑐡𑐾𑐫𑑂𑐫𑐵𑐟 𑐴𑐾 𑐰𑐶𑐱𑑂𑐰𑐫𑑂 𑐩𑑂𑐴𑐳𑐶𑐎𑐵𑐧𑐶𑐂𑐐𑐸 𑐬𑐵𑐖𑐡𑐹𑐟𑐫𑐵 𑐥𑑂𑐬𑐟𑐶𑐧𑐶𑐩𑑂𑐧 𑐏𑐣𑐵𑐔𑑂𑐰𑐣 𑑋 𑐗𑐷𑐠𑐵𑐫𑑂 𑐗𑐶𑑄𑐣𑑂𑐫𑐵𑐳𑑅𑐡𑑃 𑐥𑐸𑐮𑐵𑑄𑐐𑐸 𑐩𑐹𑐬𑑂𑐟𑐶 𑐰 𑐩𑐾𑐩𑐾𑐐𑐸 𑐥𑐸𑐬𑐵𑐟𑐵𑐟𑑂𑐰𑐶𑐎 𑐰𑐳𑑂𑐟𑐸 𑐣𑐵𑐮𑐵𑐎𑐵𑑅 𑐟𑐎𑑄 𑐩𑐡𑐫𑐵𑑅, 𑐡𑑂𑐫𑑅𑐐𑑅 𑐳𑐶𑐠𑐫𑑂, 𑐮𑑃 𑐳𑐶𑐠𑐫𑑂, 𑐡𑐸𑐧𑐵𑐟𑐫𑑂 𑐂𑐳𑑅𑐠𑐶𑐳𑑅 𑐖𑐸𑐫𑐵𑐔𑑂𑐰𑐣 𑑋 𑐣 𑐗𑐷 𑐂𑐟𑐶𑐴𑐵𑐳𑐫𑑂 𑐩𑑂𑐰𑐵𑐫𑐾𑐩𑐵𑑅𑐥𑐶𑑄 𑐖𑐸𑐫𑐵𑑅𑐮𑐵, 𑐖𑐶𑐟𑑅 𑐋𑐟𑐶𑐴𑐵𑐳𑐶𑐎 𑐧𑐳𑑂𑐟𑐸𑐟 𑐏𑐣𑐎𑐶 𑐐𑐬𑑂𑐰 𑐖𑐸𑐂𑐐𑐸 𑑋 𑐏𑐣𑑄 𑐀𑐖𑑂𑐫𑐵𑑅𑐐𑐸 𑐥𑐸𑐮𑐵𑑄𑐐𑐸 𑐂𑐟𑐶𑐴𑐵𑐳 𑐠𑑁𑑄 𑐡𑐫𑐾𑐎𑐾𑐢𑐫𑐵𑑄 𑐡𑐫𑐾𑐎𑐾 𑐖𑐶𑐂𑐮𑐵?

𑐀𑐮𑐾 𑐖𑐶 𑐠𑑂𑐫𑐣 𑐀𑐣𑐫𑐵 𑐥𑑂𑐬𑐏𑑂𑐫𑐵𑐟 𑐧𑐸𑐐𑐶𑐳 𑐖𑐎𑑂𑐳𑐣𑐫𑑂 𑐀𑐮𑐾 𑐧𑐸𑐐𑐶𑐳 𑐳𑑂𑐚𑑂𑐬𑐷𑐚𑐫𑑂 𑑋 𑐀𑐥𑐵𑐫𑑂𑐔𑐵 𑐎𑐹𑐐𑐸 𑐢𑐫𑐵𑐟𑑅𑐐𑐸 𑐳𑐶𑑄𑐐𑐵𑐥𑐸𑐬𑐫𑑂 𑐳𑐵𑐬𑐵 𑐫𑐸𑐬𑑀𑐥 𑐴𑐾 𑐎𑑅𑐑𑐵𑐣𑐵𑐟𑑅𑐐𑐸𑐠𑐾𑑄 𑑋 𑐫𑐔𑐸𑐐𑐸 𑐥𑐶𑐔𑐸𑐐𑐸 𑐄𑐮𑐶 𑐴𑐾, 𑐩𑐣𑐸𑐟 𑐳𑐨𑑂𑐫 𑐄𑐮𑐶 𑐴𑐾 𑑋 𑐄𑐮𑐶 𑐴𑐾 𑐮𑑃 𑐟𑐧𑑂𑐫𑐵, 𑐚𑑂𑐬𑐵𑐦𑐶𑐎 𑐮𑐵𑐂𑐚𑑄 𑐖𑑂𑐫𑐵 𑐫𑐵𑐣𑐵𑐔𑑂𑐰𑐣, 𑐕𑐩𑑂𑐴 𑐢𑐎𑐵𑑅 𑐚𑑂𑐬𑐵𑐦𑐶𑐎 𑐥𑐸𑐮𑐶𑐳 𑐡𑐣𑐵𑐩𑐔𑑂𑐰𑑄 𑑋

𑐢𑐵𑐢𑐵𑑄 𑐖𑐶𑐟𑑅 𑐮𑐶𑐧𑐵𑐂𑐠𑐾𑑄 𑐔𑑂𑐰𑐣𑐵𑐰𑐮 — 𑐠𑑁𑑄 𑐊𑐳𑑂𑐥𑐾𑐬𑐵𑐣𑑂𑐟𑑀 𑐨𑐵𑐫𑑂 𑐮𑑂𑐴𑐵𑐂𑐥𑐶𑑄 𑐥𑐵𑐳𑐵𑐥𑐶𑑄 𑐣𑐵𑐥𑐮𑐵𑐫𑐾𑐩𑐵𑐣𑐶 𑑋 𑐀𑐣 𑐮𑑃𑐫𑑂 𑐰𑐣𑐵𑐔𑑂𑐰𑑄𑐩𑑂𑐴 𑐩𑐫𑑂𑐖𑐸 𑐕𑐩𑑂𑐴𑐳𑐶𑐟 𑐖𑐶 𑐰𑐣𑐾𑐩𑐵𑑅𑐐𑐸 𑐠𑐵𑐫𑑂𑐫𑐵 𑐧𑐵𑐬𑐾 𑐣𑑂𑐫𑐣𑐵 𑑋 𑐰𑑄 𑐮𑐵 𑐖𑐶 𑐚𑑂𑐬𑐾𑐣𑐫𑑂 𑐰𑑄𑐳𑐵 𑐖𑐎 𑐠𑑂𑐫𑐣𑐷 𑐢𑐵𑐮 𑑋 𑐖𑐶𑑄 𑐖𑐶𑐐𑐸 𑐎𑐥𑐵𑑅 𑐖𑑂𑐰𑐣𑐵, 𑐖𑐶𑑄 𑐰 𑐠𑐵𑐫𑑂 𑐄𑐮𑐶 𑐟𑐵𑐥𑐵𑑅 𑐢𑐎𑐵𑑅 𑐧𑐶𑐔𑐵𑑅 𑐴𑐾 𑐩𑐫𑐵𑐣𑐵𑐐𑐸 𑑋 𑐖𑐶𑑄 𑐮𑐵 𑐳𑐶𑑄𑐐𑐵𑐥𑐸𑐬 𑐕𑐐𑐸𑐮𑐶𑑄 𑐖𑐶𑐐𑐸 𑐏𑐮𑑂𑐟𑐶𑐂 𑐣𑑂𑐴𑑂𑐫𑑄 𑐢𑐎𑐵𑑅 𑐔𑑂𑐰𑐣𑐵𑐐𑐸 𑑋 𑐂𑐮𑑄 𑐩𑐮𑐵𑐫𑐾𑐢𑐸𑑄𑐎𑐮, 𑐮𑐶𑐧𑐵𑐎𑑂𑐎 𑐠𑑂𑐫𑐣𑐎𑐶 𑐖𑐶𑐟𑑅 𑐢𑐵𑐂, 𑐣𑐾𑐥𑐵𑑅𑐫𑐵𑐟 𑐴𑐾 𑐢𑐵𑐂 𑑋 𑐑𑐜𑐷 𑐳𑑂𑐰𑐳𑑂𑐰𑑄 𑐖𑐶 𑐚𑑂𑐬𑐾𑐣 𑐳𑑂𑐚𑐾𑐱𑐣𑐫𑑂 𑐧𑑂𑐰𑐵𑑃𑐫𑑂 𑐧𑑂𑐰𑐵𑑃𑐫𑑂 𑐰𑐣𑐵 𑑋

𑐄𑐏𑐾𑑄 𑐠𑐸𑐏𑐾𑑄 𑐮𑑃𑐫𑐵 𑐣𑐵𑑄 𑐳𑑂𑐰𑐳𑑂𑐰𑑄 𑐰𑐣𑐵𑑄 𑐥𑐮𑐏𑑄 𑐴𑐾 𑐳𑑂𑐚𑐾𑐱𑐣𑐫𑑂 𑐠𑑂𑐫𑐣 𑑋 𑐳𑐵𑐳𑑅 𑐠𑐵𑐴𑐵𑑃 𑐰𑐮 𑑋 𑐰 𑐴𑐾 𑐮𑐵 𑐖𑐸𑐫𑐵𑐔𑑂𑐰𑐣 𑐧𑐸𑐐𑐶𑐳 𑐳𑑂𑐚𑐾𑐱𑐣 𑑋 𑐎𑑂𑐫𑐵 𑐦𑐳𑐵𑐡 𑑋 𑐖𑐶 𑐠𑑂𑐫𑐣𑐾 𑐩𑐵𑑅𑐐𑐸 𑐴𑐾 𑐰 𑐴𑐾 𑐳𑑂𑐚𑐾𑐱𑐣 𑑋 𑐖𑐶𑑄 𑐣𑑂𑐫𑐣𑐵𑐐𑐸 𑐩𑐶𑐮𑐾𑐩𑐖𑐹𑐐𑐸 𑐮𑐵, 𑐰𑑄 𑐎𑑄𑐐𑐸 𑐩𑐶𑐮𑐾𑐩𑐖𑐹𑐐𑐸 𑐮𑐵 𑑋 𑐡𑐎𑑂𑐰 𑐥𑐵𑐳𑐵𑐥𑐶𑑄 𑐣𑐵𑐥𑐮𑐵𑐟 𑑋

𑐣𑐫𑐾𑐠𑐵𑐫𑑂 𑐠𑑂𑐫𑐣 𑑋 𑐠𑐣 𑐮𑐵 𑐐𑐖𑐧𑐐𑐸 𑐟𑐬𑐶𑐎𑐵 𑐏𑐣𑐷 — 𑐀𑐣 𑐧𑐕𑐶 𑐖𑐎 𑐧𑐸𑐎𑑂𑐎 𑐩𑐣𑐵𑐟𑑅𑐐𑐸 𑐧𑑂𑐰𑐫𑐵𑐟𑑅𑐐𑐸 𑐣𑑂𑐴𑐫𑑂𑐟𑐵𑐖𑐶 𑐰𑐵𑐄𑑃𑐔𑐵 𑐰𑐵 𑐮𑐵𑐫𑐵 𑐥𑐬𑐶𑐎𑐵𑐬 𑐮𑑂𑐫𑐫𑐵𑑅 𑐕𑐐𑑅 𑐠𑐮𑐫𑑂 𑐟𑐫𑐵𑐧𑐶𑐂𑐐𑐸 𑑋 𑐀𑐣 𑐴𑐾 𑐨𑐸𑐟𑐹 𑐠𑐖𑑂𑐫𑐵𑑅𑐐𑐸 𑐠𑐵𑐳𑐫𑑂 𑐔𑑂𑐰𑐣𑐵𑐔𑑂𑐰𑑄𑐩𑑂𑐴𑐳𑑂𑐫𑐵𑑄 𑐰 𑐎𑐫𑐵𑑅 𑐐𑑂𑐰𑐵𑐬𑐵𑐐𑑂𑐰𑐵𑐬𑐵𑐡𑐵𑑅𑐐𑐸 𑐔𑐶𑐎𑐣𑐫𑑂 𑐰 𑐠𑐸𑐣𑐵𑑅 𑐥𑐸𑐎𑐵𑐧𑐶𑐂 𑐀𑐮𑐾 𑐳𑐵𑑅𑐐𑐸 𑐎𑑂𑐰𑐵𑑅𑐐𑐸 𑐧𑑂𑐫𑐮𑐾 𑐟𑐫𑐵𑐬 𑐖𑐸𑐂 𑑋 𑐖𑐶𑑄 𑐩𑐶𑐏𑐵 𑐟𑐶𑐳𑐶𑐣𑐵𑑅 𑐮𑑂𑐫𑐫𑐵𑑅𑐐𑐸 𑐣𑐳𑐵 𑐖𑑂𑐰𑐮𑑄 𑐩𑐳𑐵𑑅 𑐮𑐵 𑐩𑐖𑐹 𑐏𑐣𑐷 𑑋 𑐕𑐸 𑐣𑑄 𑐩𑐳𑐶𑐄, 𑐕𑐸𑐎𑐶𑐫𑐵𑐐𑐸 𑐣𑑄 𑐩𑐳𑐶𑐄 𑑋 𑐎𑐠𑐸 𑐴𑐾 𑐴𑐶𑐂𑐎 𑐥𑐵𑐮𑐸, 𑐟𑐬 𑐳𑐵𑑅, 𑐟𑐳𑐎𑑄 𑐴𑐾 𑐳𑐵𑑅 𑑋 𑐣𑐣𑑄 𑐕𑐗𑐵𑑅 𑐣𑑂𑐴𑑂𑐂𑐥𑐸𑐎 𑐏𑑃 𑐖𑐸𑐮 𑑋

𑐣𑐫𑐾𑐐𑐸 𑐰 𑐏𑑃 𑐮𑑂𑐴𑐵𑐫𑐾𑐐𑐸 𑐳𑐶𑐢𑐫𑐾𑐎𑐵𑑅 𑐖𑐶𑐥𑐶𑑄 𑐥𑐶𑐴𑐵𑑃 𑐰𑐫𑐵 𑑋 𑐡𑐸𑐣𑐾 𑐳𑐶𑐔𑑂𑐔𑐸𑐎 𑐔𑑂𑐰𑐣𑐵𑐔𑑂𑐰𑐣𑐵𑐐𑐸, 𑐥𑐶𑐣𑐾 𑐴𑐥𑑂𑐥 𑐎𑑂𑐰𑐵𑐐𑐸 𑐦𑐳𑑄 𑐨𑐸𑑄𑐰𑐮 𑑋 𑐀𑐠𑐾𑐳𑐵𑑄 𑐖𑐾𑐣𑑂𑐡𑑄 𑐖𑐶𑐟𑑅 𑐩𑐬𑐶𑐣𑐵 𑐧𑐾𑐟𑐎 𑐟𑑅𑐰𑐮 𑑋 𑐳𑐩𑐸𑐡𑑂𑐬 𑐰 𑐰𑐶𑐮𑐵𑐳𑐷 𑐱𑐴𑐬𑐷 𑐖𑐷𑐰𑐣𑐫𑐵 𑐳𑑄𑐐𑐩 𑑋 𑐩𑑂𑐴𑐐𑐳𑐫𑑂 𑐏𑐣𑐾𑐠𑐾𑑄 𑐡𑐎𑑂𑐰 𑐡𑐎𑑂𑐰 𑐖𑐶𑐐𑐸 𑐩𑐶𑐏𑐵 𑐣𑑂𑐴𑑂𑐫𑑅𑐣𑐾 𑐰𑐫𑐵𑐔𑑂𑐰𑐣 𑑋 𑐖𑐶𑑄 𑐧𑐶𑐔𑐵𑑅 𑐫𑐵𑐣𑐵𑐔𑑂𑐰𑐣𑐵, 𑐳𑐶𑑄𑐐𑐵𑐥𑐸𑐬𑐫𑑂 𑐧𑐵𑑄𑐩𑐮𑐵𑑅𑐐𑐸 𑐢𑐂𑐐𑐸 𑐕𑐸 𑐡𑐸 𑐖𑐸𑐂, 𑐐𑐣 𑐡𑐸 𑐖𑐸𑐂 𑑋 𑐠𑐣 𑐴𑐾 𑐁𑑅 𑐫𑐵𑐎𑐣𑑄 𑐊𑐱𑐶𑐫𑐵 𑐴𑐾 𑐟𑐖𑐵𑑅𑐐𑐸 𑐴𑑀𑐚𑐮 𑐡𑐫𑐾𑐎𑐵𑐔𑑂𑐰𑑄𑐐𑐸 𑐢𑐵𑑅𑐐𑐸 𑐣𑑂𑐫𑐣𑐵 𑑋 𑐳𑐿𑐣𑑂𑐫 𑐥𑑂𑐬𑐡𑐬𑑂𑐱𑐣 𑐫𑐵𑐫𑐾𑐐𑐸 𑐠𑐵𑐫𑑂 𑐣𑑄 𑐠𑑂𑐰 𑐴𑐾, 𑐁𑐟𑐶𑐱𑐧𑐵𑐖𑐷𑐫𑐵 𑐩𑐖𑑂𑐖𑐵 𑐎𑐵𑐫𑐾𑐐𑐸 𑐠𑐵𑐫𑑂 𑐣𑑄 𑐠𑑂𑐰 𑐴𑐾 𑑋

𑐀𑐣𑑄 𑐖𑐶𑐥𑐶𑑄 𑐰𑐣𑐵 𑐊𑐳𑑂𑐥𑑂𑐮𑐵𑐣𑑂𑐡𑐾 — 𑐳𑐩𑐡𑑂𑐬 𑐰 𑐳𑐶𑑄𑐐𑐵𑐥𑐸𑐬𑐫𑐵 𑐏𑐸𑐳𑐶 𑐣𑐵𑐥𑐮𑐵𑐂𑐠𑐵𑐫𑑂 𑑋 𑐠𑐣 𑐕𑐐𑐹 𑐥𑐵𑐬𑑂𑐎 𑐡𑐸 𑐊𑐳𑑂𑐥𑑂𑐮𑐵𑐣𑑂𑐡𑐾 𑐢𑐵𑑅𑐐𑐸, 𑐀𑐮𑐾 𑐁𑑅 𑐀𑐣 𑐴𑐾 𑑑𑑖𑑐𑑐𑐩𑑂𑐴 𑐩𑐣𑐹𑐟 𑐣𑑂𑐴𑑂𑐫𑑄𑐐𑐸 𑐎𑐣𑑂𑐳𑐬𑑂𑐚 𑐴𑐮 𑐀𑐮𑐾 𑑒𑑐𑑐𑑐 𑐩𑑂𑐴 𑐩𑐣𑐹𑐟 𑐣𑑂𑐴𑑂𑐫𑑄𑐐𑐸 𑐠𑐶𑐫𑐚𑐬 𑐡𑐫𑐾𑐎𑐵𑐟𑑅𑐐𑐸 𑐡𑐸 𑑋 𑐐𑐣𑑄 𑐢𑐹 𑐕𑐦𑐸𑐟𑐶 𑐩𑐡𑐸, 𑐮𑑅 𑐕𑐦𑐸𑐟𑐶 𑐰𑐵𑐣𑐵𑐔𑑂𑐰𑑄𑐐𑐸 𑐡𑐸, 𑐨𑑂𑐰𑑄𑐎𑐸𑐔𑐵 𑐕𑐎𑐹 𑐢𑐎𑐵𑑅 𑐐𑐣𑑄 𑐎𑐸𑐟𑐸𑑄 𑐰𑐣𑐵𑐔𑑂𑐰𑑄𑐐𑐸 𑐩𑐡𑐸 𑑋 𑐥𑐮𑐵𑑅 𑐴𑐾 𑐟𑐫𑐾𑐩𑐵𑐟𑑂𑐬𑑄 𑐖𑐶𑐐𑐸 𑐮𑐵𑐎𑐵𑑄 𑐫𑐵 𑐢𑐹 𑐖𑐎 𑐧𑑃𑐫𑑂 𑐎𑐶𑐂𑐮𑐵 𑐢𑐎𑐵𑑅 𑐐𑑂𑐫𑐵𑐫𑐾𑐩𑐵𑑅 𑑋 𑐖𑐶 𑐀𑐣 𑐕𑐩𑑂𑐴 𑐩𑐾𑐐𑐸 𑐴𑐾 𑐐𑑂𑐬𑐴𑑄 𑐰𑑅𑐩𑑂𑐴 𑐩𑐣𑐹𑐠𑐾𑑄 𑑋

𑐖𑐶𑐐𑐸 𑐩𑐣𑐫𑑂 𑐏𑑃 𑐰𑐫𑐵𑐔𑑂𑐰𑐣 𑑋 𑐣𑐎𑐟𑐶𑐣𑐶 𑐣𑐎𑐟𑐶𑐣𑐶 𑐥𑑂𑐬𑐖𑐵𑐟𑐣𑑂𑐟𑑂𑐬 𑐰𑑅𑐧𑐮𑐫𑑂 𑐕𑐎𑐮𑑄 𑐡𑐎𑑂𑐰 𑐡𑐎𑑂𑐰 𑐴𑐾 𑐰𑐶𑐎𑐵𑐳𑐫𑐵 𑐏𑑃 𑐮𑑂𑐴𑐵𑐂𑐥𑐶𑑄 𑐖𑐸𑐮 𑑋 𑐣𑑂𑐴𑐵𑐥𑐵 𑐥𑑄𑐔𑐵𑐫𑐟𑐷 𑐣𑐾𑐟𑐵𑐟𑐫𑑂𑐳𑑄 𑐊𑐱𑐶𑐫𑐵𑐮𑐷 𑐩𑐵𑐥𑐡𑐞𑑂𑐜 𑐰 𑐁𑐢𑐵𑐬𑐨𑐹𑐟 𑐁𑐰𑐱𑑂𑐫𑐎𑐟𑐵𑐫𑐵 𑐏𑑃 𑐫𑐎𑑂𑐰 𑐣𑑂𑐫𑑄𑐎𑐮, 𑐀𑐧 𑐀𑐐𑐵𑐜𑐶 𑐧𑐝𑑂𑐣𑐸 𑐕 𑐢𑐎𑐵𑑅 𑐚𑐶𑐨𑐷 𑐰𑐶𑐖𑑂𑐘𑐵𑐥𑐣 𑐣𑑄 𑐫𑐎𑑂𑐰 𑐴𑐾 𑐎𑑂𑐫𑐣 𑑋 𑐟𑐬 𑐰𑐶𑐎𑐵𑐳 𑐕𑐸𑐎𑐶𑐫𑐵𑐟 𑐢𑐵𑐂 𑐢𑐎𑐵𑑅 𑐩𑐎𑑂𑐫𑑄 𑑋 𑐳𑐶𑑄𑐐𑐵𑐥𑐸𑐬𑐫𑐵𑐟 𑐢𑐵𑐂𑐐𑐸 𑐖𑐸𑐫𑐵𑐔𑑂𑐰𑐣 𑐎𑐵 𑐰𑐶𑐎𑐵𑐳 𑐮𑐵 𑑋

𑐖𑐾𑐣𑑂𑐡𑑄 𑐖𑐶𑐟𑑅 𑐳𑐶𑑄𑐐𑐵𑐥𑐸𑐬 𑐐𑐠𑐾 𑐖𑐸𑐫𑐵𑑅 𑐳𑐶𑑄𑐐𑐵𑐥𑐸𑐬 𑐖𑐸𑐮 𑐢𑐎𑐵𑑅 𑐎𑐣𑐵𑐔𑑂𑐰𑐣, 𑐖𑐶𑐐𑐸 𑐣𑑂𑐴𑑂𑐫𑐥𑐸𑑄 𑐖𑐶𑐟𑑅 𑐳𑑂𑐰𑐣𑐶𑐐𑑅 𑐐𑐠𑐾 𑐖𑐸𑐫𑐵𑑅 𑐳𑑂𑐰𑐣𑐶𑐐𑑅 𑐖𑐸𑐮 𑐢𑐎𑐵𑑅 𑐢𑐫𑐵𑐔𑑂𑐰𑐣 𑑋 𑐣𑑂𑐫𑐵𑐳𑑅𑐡𑑃 𑐣𑑂𑐴𑐫𑑅 𑐗𑐷 𑐮𑐸𑑃𑐐𑐖𑐹 𑐡𑐹𑐐𑐸 𑐡𑑂𑐫𑑅𑐐𑑅 𑐡𑐫𑐾𑐎𑐾𑐳𑑅𑐥𑐶𑑄, 𑐳𑑃𑐗𑑂𑐫𑐵𑑅, 𑐡𑐹𑐐𑐸 𑐕𑐾𑑃 𑐡𑐣𑐾𑐳𑑅𑐥𑐶𑑄 𑐔𑐕𑐶𑑄 𑐣𑑂𑐴𑐶𑐕𑑂𑐬𑐶𑑄 𑐮𑑅 𑐴𑐵𑐂𑐐𑐸 𑐮𑑂𑐰𑐴𑑃 𑐴𑐶𑐟𑐶 𑐡𑐫𑐾𑐎𑐾𑐳𑑅𑐥𑐶𑑄 𑐠𑑁𑑄 𑐮𑐸𑑃𑐴𑐶𑐟𑐶𑐫𑐵 𑐮𑐶𑐄𑐣𑐾 𑐱𑐥𑐶𑐒 𑐩𑐮 𑐡𑐫𑐾𑐎𑐵𑑅 𑐮𑑅𑐫𑐵 𑐩𑐸𑐴𑐵𑐣𑐫𑑂 𑐮𑐵𑐎𑐩𑑄 𑐥𑑂𑐫𑑄𑐎𑐷𑐥𑐶𑑄 𑐖𑐸𑐂𑐢𑐸𑐣 𑑋 𑐗𑐷𑐳𑑄 𑐣𑑂𑐫𑐵𑐟𑐥𑑀𑐮 𑐡𑑂𑐫𑑅𑐐𑑅 𑐡𑐫𑐾𑐎𑐹𑐧𑐮𑐫𑑂 𑐠𑐣 𑐳𑐶𑑄𑐐𑐵𑐥𑐸𑐬𑐫𑑂 𑐔𑑂𑐰𑑄𑐥𑐶𑑄 𑐖𑐵 𑐣𑐫𑐵𑑅 𑐣𑑂𑐰 𑐴𑐾 𑐳𑐶𑐮𑐾 𑐳𑑅𑐮𑐵 𑐩𑐳𑑅𑐮𑐵 𑑋 𑐠𑑁𑑄 𑐠𑐣𑐫𑐵 𑐧𑑃𑐫𑑂 𑐖𑐶𑐐𑐸 𑐎𑐶𑐔𑑅𑐫𑐵 𑐢𑐹 𑐮𑐵𑐂𑐮𑐵 𑐢𑐎𑐵𑑅 𑐖𑐶 𑐮𑐶𑐮𑐶𑐔𑐶𑐮𑐵𑐔𑑂𑐰𑐣𑐵 𑑋

𑐔𑐥𑐮𑐔𑐵 𑐮𑐵𑐎𑐵𑑄, 𑐧𑐵𑐐𑑅𑐥𑐵𑐂𑐣𑑂𑐚, 𑐣𑐎𑐟𑐶𑐣𑐶 𑐣𑑂𑐫𑐵𑐣𑐵𑐐𑐸 𑐮𑑂𑐫𑐵𑐥𑐚𑐥 𑐧𑑂𑐫𑐵𑐐, 𑐔𑑅𑐟𑐶𑑄 𑐟𑐶𑐳𑐶𑐂𑐖𑐶𑐂𑐠𑐾𑑄 𑐥𑑂𑐫𑐵𑑅𑐐𑐸 𑐚𑐶𑐱𑐬𑑂𑐚 𑐀𑐮𑐾 𑐖𑐶 𑑋 𑐖𑐶𑐫𑐵 𑐖𑐶 𑐖𑐎 𑑋 𑐟𑐧𑐵𑐮𑐵𑐐𑐸 𑐮𑑃𑐫𑐵 𑐳𑐶𑐠𑑄 𑐳𑐶𑐠𑑄 𑐣𑑂𑐫𑐵𑐳𑐶 𑐰𑐣𑐵 𑑋 𑐣𑑂𑐴𑐵𑐥𑐵 𑐰𑐣𑐾𑐢𑐸𑐣𑐵𑐐𑐸 𑐡𑐎𑑂𑐰 𑐴𑐾 𑐮𑑃 𑐢𑐫𑐵𑐠𑐾𑑄 𑐖𑐶𑑄 𑐖𑐶𑑄 𑐖𑐶𑐟𑑅 𑐎𑑂𑐫𑐎𑑂𑐫𑑄 𑐫𑑄𑐎𑐵 𑑋 𑐩𑐣𑐫𑑂 𑐏𑑃 𑐰𑐵𑐮𑐵𑐔𑑂𑐰𑐣 𑑋 𑐠𑑅, 𑐠𑑅𑐐𑐸 𑐡𑐾𑐫𑑂, 𑐠𑑅𑐐𑐸 𑐳𑑂𑐰𑐣𑐶𑐐𑑅, 𑐀𑐣𑐫𑐵 𑐥𑑂𑐬𑐵𑐔𑐷𑐣 𑐳𑐩𑑂𑐥𑐡𑐵, 𑐣𑑂𑐴𑐹𑐣𑑂𑐴𑐹𑐐𑐸 𑐣𑐎𑐟𑐶𑐣𑐶 𑐡𑐣𑐵𑐴𑑅𑐐𑐸 𑐟𑐟𑑅𑐖𑐵𑑅𑐐𑐸 𑐕𑐾𑑃 𑑋 𑐏𑐸𑐳𑐶𑐧𑐵𑑅 𑐰𑑅𑐠𑐾𑑄 𑐡𑐾𑐫𑑂𑐫𑐵 𑑗𑑕𑐐𑐹 𑐖𑐶𑐮𑑂𑐮𑐵𑑄 𑐰𑑅𑐥𑐶𑑄 𑐩𑐣𑐹𑐟𑐫𑑂𑐐𑐸 𑐧𑐐𑐵𑐮 𑑋 𑐠𑑅𑐐𑐸 𑐖𑐶𑐮𑑂𑐮𑐵𑐫𑐵 𑐰𑐶𑐎𑐵𑐳 𑐫𑐵𑐫𑐾 𑐀𑐮𑑂𑐕𑐶 𑐖𑐸𑐫𑐵𑑅 𑐳𑑂𑐰𑐣𑐶𑐐𑐮𑐫𑑂 𑐰𑑅𑐥𑐶𑐣𑑂𑐳𑑄 𑐠𑐣 𑐕𑐸 𑐨𑐶𑑄𑐎𑐷 𑐖𑐸𑐂 𑑋 𑐀𑐮𑐾 𑐧𑐸𑐮𑐸𑐴𑐸𑑃 𑐧𑐸𑐮𑐸𑐴𑐸𑑃 𑐖𑐶𑐐𑐸 𑐰 𑐴𑐵𑑅𑐣𑐵𑑅 𑐩𑐡𑐸𑐐𑐸, 𑐱𑐴𑐬𑐷 𑐰𑐶𑐎𑐵𑐳𑐫𑐵 𑐣𑐵𑐩𑐫𑑂 𑐎𑐮𑑄𑐎 𑐖𑐸𑐫𑐵𑐔𑑂𑐰𑑄𑐐𑐸 𑐱𑐴𑐬 𑐩𑐶𑐏𑐵𑐫𑑂 𑐮𑐸𑐟 𑑋 𑐳𑑄𑐳𑐵𑐬𑐫𑑂 𑐡𑐎𑐮𑐫𑑂 𑐟𑑅𑐴𑐵𑐎𑑅𑐐𑐸 𑐴𑐶𑐩𑐵𑐮𑐷 𑐱𑑂𑐬𑐺𑑄𑐏𑐮𑐵 𑐴𑐶𑐩𑐵𑐮𑐫𑐫𑐵 𑐩𑐸𑐮𑐫𑑂 𑐮𑐵𑑅𑐐𑐸 𑐖𑐶𑐐𑐸 𑐡𑐾𑐫𑑂 𑐡𑐕𑐶𑐫𑑄𑐎 𑐔𑑂𑐰𑐵𑐥𑐸 𑐣𑐵𑐫𑐵𑑅 𑐧𑐵𑑅𑐰𑐫𑐵𑐔𑑂𑐰𑐣𑐾𑐐𑐸 𑐫𑐔𑐸𑐐𑐸 𑐮𑑅𑐫𑐵 𑐏𑐸𑐳𑐶 𑐡𑐹𑐐𑐸 𑐖𑐶𑐐𑐸 𑐡𑐾𑐫𑑂 𑐀𑐮𑐾 𑐠𑑂𑐰 𑐮𑑅 𑐟𑐎 𑐴𑐾 𑐰𑐶𑐡𑐾𑐱𑑄 𑐴𑐫𑐵𑑅 𑐟𑑂𑐰𑐣𑐾𑐩𑐵𑑅𑐐𑐸 𑐳𑐶𑑄𑐐𑐵𑐥𑐸𑐬 𑑋 𑐴𑐬𑐾𑐎 𑐰𑐶𑐎𑐵𑐳 𑐢𑐂𑐐𑐸 𑐀𑐰𑐳𑐬 𑐢𑐵𑐂, 𑐀𑐰𑐳𑐬 𑐡𑐫𑐾𑐰𑑄 𑐣𑑄 𑐡𑐾𑐫𑑂 𑐴𑐾 𑐎𑐶𑐮𑑄 𑐣𑐫𑐾𑐠𑐾𑑄 𑐣𑐫𑐵𑐔𑑂𑐰𑑄𑐥𑐶𑑄 𑐣𑐾𑐟𑐵𑐟𑐫𑑂𑐐𑐸 𑐮𑑂𑐴𑐵𑐟𑐶𑐂 𑐮𑐵𑐟𑐎𑐶 𑐨𑐐𑐰𑐵𑐣𑑄 𑐴𑐾 𑐮𑑂𑐴𑐵𑑅 𑐖𑐵𑐫𑐾𑐎 𑐀𑐰𑐳𑐬 𑐧𑐶𑐄𑐳𑐵𑑄 𑐕𑐸𑑄 𑐖𑐸𑐂𑐩𑐏𑐸 𑐏𑐣𑐷 𑑋 𑐣𑑂𑐴𑑂𑐫𑐵𑐎𑑂𑐰 𑐣𑐾𑐥𑐵𑑅𑐫𑐵 𑐧𑐶𑐔𑐵𑑅 𑐫𑐵𑐫𑐾𑐩𑐏𑐸 𑐢𑐵𑑅𑐳𑐵𑑄 𑐣𑐾𑐥𑐵𑐮𑑄 𑐖𑐶𑐟𑑅 𑐨𑑂𑐰𑐵𑑅 𑐨𑑂𑐰𑐵𑑅 𑐥𑑂𑐫𑑄𑐎𑑅 𑐰𑐫𑐵𑐔𑑂𑐰𑐣, 𑐮𑐥𑐸 𑐖𑑂𑐰𑐣𑐵𑑅 𑐂𑐳𑑅𑐠𑐶𑐳𑑅 𑐫𑐵𑐣𑐵𑐔𑑂𑐰𑐣𑐵 𑑋 𑐖𑐶𑑄 𑐳𑐴𑐖𑐎 𑐫𑐵𑐣𑐵𑐔𑑂𑐰𑐣𑐵, 𑐮𑐶𑐳𑑅 𑐩𑐧𑐶𑐫𑐵 𑑋

𑐖𑐶 𑐰𑐣𑐵𑐔𑑂𑐰𑐣𑐵 𑑋 𑐳𑐶𑑄𑐐𑐵𑐥𑐸𑐬 𑐩𑐡𑑂𑐫𑑄𑐣𑐶 𑑋 𑐮𑑃𑐫𑑂 𑐮𑑂𑐴𑐵𑑅 𑐮𑑂𑐴𑐵𑑅 𑐖𑑂𑐰𑐣𑐵𑑅 𑐔𑐵𑑅𑐴𑐶𑐮𑐵𑐔𑑂𑐰𑑄𑐥𑐶𑑄 𑐖𑑂𑐰𑐮𑐶𑑄𑐖𑑂𑐰𑑅𑐟 𑐩𑐡𑑂𑐫𑑄𑐣𑐶 𑑋 𑐥𑐳𑑅𑐥𑐶𑐳𑑅 𑐣𑑄 𑐩𑐡𑑂𑐫𑑄𑐣𑐶 𑑋 𑐥𑐳𑐮𑐫𑑂 𑐥𑐳𑐮𑐫𑑂 𑐔𑑂𑐫𑐵𑐎𑐵𑐟𑑅𑐐𑐸 𑐗𑐶𑐮𑐶𑐨𑐶𑐮𑐶 𑐩𑐟 𑐣𑑄 𑐩𑐡𑑂𑐫𑑄𑐣𑐶 𑑋 𑐫𑐵𑐎𑑅𑐔𑐵 𑐖𑐶 𑐳𑐬𑑂𑐐𑐟𑐫𑑂 𑐳𑑂𑐰𑐫𑐵𑑅 𑐫𑑅𑐫𑑅𑐐𑐸 𑐩𑑂𑐫𑐾 𑐴𑐵𑐮𑐵𑑅 𑐣𑑂𑐫𑐵𑐳𑐶𑐰𑐣𑐵𑐔𑑂𑐰𑐣𑐵, 𑐣𑐵𑐥𑑄 𑐮𑑂𑐴𑐵𑑅 𑐖𑑂𑐰𑐣𑐵𑑅 𑐰𑐣𑐾𑐟 𑐩𑐡𑐸𑐩𑑂𑐴 𑐩𑐟𑐶𑐣𑐵 𑐮𑐸𑐩𑑄𑐎𑐵𑑅 𑑋 𑐳𑐸𑐣𑐵𑑄 𑐣𑑄 𑐖𑐶𑑄 𑐴𑐵𑑅𑐐𑐸 𑐩𑑂𑐫𑐾 𑐩𑐟𑐵𑑅 𑑋 𑐖𑐶𑐐𑐸 𑐩𑑂𑐫𑐾𑐫𑑂 𑐳𑑅 𑐎𑐩, 𑐀𑐮𑐾 𑐩𑐟𑐶𑐣𑐵 𑐫𑐎𑑂𑐰 𑐡𑐸, 𑐰 𑐄𑐩𑐶𑐳 𑐏𑐣𑐷𑐩𑐏𑐸 𑑋 𑐐𑐧𑐮𑐾𑑄 𑐐𑐧𑐮𑐾𑑄 𑐳𑐸𑐫𑐵𑐟𑑄 𑐔𑐵𑐫𑐾𑐎 𑐩𑐔𑐵𑐫𑐾𑐎 𑐫𑐵𑐣𑐵𑐐𑐸 𑐩𑐟𑐶𑐣𑐵𑐫𑐵 𑐩𑑂𑐫𑐾 𑑋

𑐧𑐵𑐔𑐵𑑅 𑐳𑐶𑑄𑐐𑐵𑐥𑐸𑐬 𑐴𑐾 𑐔𑐵𑑅𑐴𑐶𑐮 𑐮𑐵𑐎𑐶 𑐕𑐸 𑐖𑐶𑑄, 𑐖𑐶𑐐𑐸 𑐴𑑀𑐚𑐮𑐫𑑂 𑐠𑑂𑐫𑑄𑐧𑐮𑐫𑑂 𑑑𑑒 𑐧𑐖𑐾 𑐖𑐸𑐂𑐢𑐸𑑄𑐎𑐮 𑑋 𑐖𑐶𑐟𑑅 𑐐𑐸𑐮𑐶 𑐟𑑂𑐫𑐵𑐣𑐸 𑐢𑐂𑐐𑐸 𑐖𑐶𑑄 𑐴𑐾 𑐩𑐔𑐵𑑅, 𑐩𑐵𑐫𑐵 𑐣𑑄 𑐩𑐰𑑄 𑐖𑐶𑐟𑑅 𑐖𑐶 𑐟𑑂𑐫𑐵𑐣𑐸𑐎𑐵 𑐰𑑅𑐐𑐸 𑐏𑐣𑐵𑑅 𑑋
𑐠𑑅𑐐𑐸 𑐎𑑂𑐰𑐠𑐵𑐫𑑂 𑐰𑐣𑐵𑑄 𑐣𑐶𑐩𑑂𑐴𑑄 𑐦𑐸𑑄𑐦𑐸𑑄 𑐳𑑅 𑐰𑐫𑐾𑐎 𑐡𑑂𑐫𑐣𑐵𑐔𑑂𑐰𑐣𑐾𑐢𑐸𑑄𑐎𑐮 𑑋 𑐩𑐶𑐏𑐵 𑐖𑐶𑐐𑐸 𑐔𑐵𑑅𑐮𑐵𑐎𑐶 𑐩𑐔𑐵𑑅 𑐴𑐾 𑐖𑐶𑑄 𑐩𑐳𑐶𑐄 𑑋 𑐖𑐶𑑄 𑐄𑐮𑐶 𑐴𑐾 𑐖𑐎 𑐳𑐶𑐄 𑐎𑐶 𑐎𑐣𑑂𑐴𑐫𑑂 𑐳𑐸𑐠𑐫𑑂 𑑖 𑐧𑐖𑐾 𑐮𑐵 𑐔𑐵𑐒𑐐𑐶 𑐊𑐀𑐬𑐥𑑀𑐬𑑂𑐚𑐫𑑂 𑐠𑑂𑐫𑐣𑐾𑐩𑐵𑐣𑐶 𑑋 𑐟𑐶𑐣𑐵𑐐𑐸 𑐩𑐶𑐏𑐵 𑐢𑐵𑐠𑐾𑑄 𑐟𑐶𑐳𑐶𑐣𑐵𑐕𑑂𑐰𑐫𑐵 𑑋 𑐠𑐸𑐎𑐶𑐂 𑐴𑐾 𑐮𑐫𑑂𑐟𑐵𑑅 𑐎𑐶 𑐖𑐶𑑄 𑐰𑐣𑐾 𑐣𑑂𑐴𑑂𑐫𑑅 𑐕𑐎𑑅 𑐳𑐶𑑄𑐐𑐵𑐥𑐸𑐬𑐫𑐵𑐟 𑐎𑐳𑑂𑐳𑐶𑐎 𑐩𑐟𑐶𑐣𑐵 𑐫𑐵𑐫𑐾𑐏𑐣 𑑋

𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳𑐫𑑂 𑐥𑐶𑐡𑑄𑐐𑐸

rzm