‘𑐳𑐶𑐮𑐸’ 𑐣𑐶𑐳𑐾𑑄 𑐤𑑂𑐫𑐵𑑅𑐐𑐸 𑐩𑐵𑐟𑐺𑐨𑐵𑐲𑐷 𑐦𑐶𑐮𑑂𑐩𑐫𑐵 𑐫𑐵𑐟𑑂𑐬𑐵

𑐦𑐶𑐮𑑂𑐩𑐫𑐵 𑐏𑑃 𑐯𑐵𑐫𑐾𑐧𑐮𑐫𑑂 𑐁𑐡𑐶𑐰𑐵𑐳𑐷 𑐩𑐵𑐟𑐺𑐨𑐵𑐲𑐷 𑐦𑐶𑐮𑑂𑐩𑐫𑐵 𑐏𑑃 𑐣𑑄 𑐰𑐂 𑑋 𑐴𑐮𑐶𑐩𑐫𑑂 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐩𑐵𑐟𑐺𑐨𑐵𑐲𑐷 𑐦𑐶𑐮𑑂𑐩 𑐡𑐫𑐾𑐎𑐾𑐐𑐸 𑐕𑐐𑐹 𑐀𑐨𑐶𑐫𑐵𑐣 𑐣𑑄 𑐤𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐠𑐾 𑐴𑐮𑐶𑐩𑐫𑑂 𑐣𑑂𑐫𑑄𑐎𑐨𑐣𑑄 𑐡𑐫𑐾𑐎𑐵 𑐰𑐫𑐵𑐔𑑂𑐰𑑄𑐐𑐸 𑐁𑐡𑐶𑐰𑐵𑐳𑐷 𑐩𑐵𑐟𑐺𑐨𑐵𑐲𑐷 𑐦𑐶𑐮𑑂𑐩𑐫𑐵 𑐩𑐾𑐮𑐵 𑐣𑑄 𑐖𑐸𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸𑐳𑐵 𑐣𑐶𑐡𑑃 𑐥𑑂𑐫𑐡𑑃 𑐤𑑂𑐫𑑅𑐟𑐎 𑐣𑐾𑐥𑐵𑐮𑐫𑑂 𑐣𑑄 𑐂𑐣𑑂𑐜𑐶𑐖𑐶𑐣𑐳 𑐦𑐶𑐮𑑂𑐩 𑐁𑐬𑑂‍𑐎𑐵𑐂𑐨(𑐁𑐂𑐊𑐦𑐊) 𑐫𑐵 𑐐𑑂𑐰𑐳𑐵𑐮𑐫𑑂 𑐣𑐾𑐥𑐵𑐮 𑐃𑐣𑑂𑐚𑐬𑐣𑐾𑐱𑐣𑐮 𑐦𑐶𑐮𑑂𑐩 𑐦𑐾𑐳𑑂𑐚𑐶𑐨𑐮 𑐢𑐎𑐵𑑅 𑐀𑐣𑑂𑐟𑐬𑑂‍𑐬𑐵𑐲𑑂𑐚𑑂𑐬𑐶𑐫 𑐳𑑂𑐟𑐬𑐫𑐵 𑐦𑐶𑐮𑑂𑐩 𑐦𑐾𑐳𑑂𑐚𑐶𑐨𑐮 𑐣𑑄 𑐖𑐸𑐫𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅 𑑋

𑐁𑑅 𑐰𑐫𑐵𑑅𑐠𑑂𑐰 𑐦𑐾𑐳𑑂𑐚𑐶𑐨𑐮𑑄 𑐡𑐶𑐥𑐵𑑅 𑐎𑐵𑐮 𑑋 𑐄𑐐𑐸 𑐴𑐾 𑐦𑐶𑐮𑑂𑐩 𑐦𑐾𑐳𑑂𑐚𑐶𑐨𑐮𑐫𑑂 𑐣𑐶𑐬𑑂‍𑐡𑐾𑐱𑐎 𑐁𑐬𑑂‍𑐫𑐩 𑐣𑐎𑑅𑐩𑐶𑐫𑐵 “𑐨𑐶𑐣𑑂𑐟𑐸𑐣𑐵”𑐫𑐵𑐟 𑐎𑑂𑐬𑐶𑐚𑐶𑐎𑑂𑐳 𑐔𑑂𑐰𑐵𑐂𑐳 𑐀𑐰𑐵𑐬𑑂‍𑐜 𑐰𑑅𑐐𑐸 𑐏𑑅𑐳𑐵 𑐣𑐶𑐬𑑂‍𑐡𑐾𑐱𑐎 𑐮𑐸𑐖𑑅 𑐳𑐶𑑄𑐴𑐫𑐵 “𑐂𑐩𑑂𑐥𑑂𑐬𑐾𑐱𑐣𑑂𑐳 𑐀𑐦 𑐮𑐸𑐩𑑂𑐧𑐶𑐣𑐷” 𑐣𑐵𑑄𑐫𑐵𑐐𑐸 𑐜𑐎𑐸𑐩𑐾𑐞𑑂𑐚𑑂𑐬𑐶𑑄 𑐣𑑄 𑐕𑐐𑐹 𑐳𑐶𑐬𑐥𑐵𑑅 𑐟𑑂𑐫𑐵𑐎𑐹𑐐𑐸 𑐏𑑃 𑐠𑐣 𑐮𑐸𑐩𑑄𑐎𑐾𑐧𑐴𑐖𑐹 𑑋 𑐣𑐾𑐥𑐵𑐮𑐫𑑂 𑐰𑐶.𑐳𑑄.𑑒𑑐𑑒𑑒 𑐳𑐵𑐮𑑄 𑐡𑐎𑐮𑐫𑑂 𑐤𑐵𑐥𑐵𑑄𑐐𑐸 𑐦𑐶𑐮𑑂𑐩 𑐎𑐠𑑄 “𑐁𑐩𑐵” 𑐥𑐶𑐡𑑄𑐐𑐸 𑐏𑑅𑐳𑐵 𑐰𑐫𑐵𑑄 𑐣𑐷𑐣𑐶𑐡𑑃 𑐮𑐶𑐥𑐵𑐟𑐎 𑐣𑑄 𑐏𑐳 𑐣𑐾𑐥𑐵𑐮𑐷 𑐨𑐵𑐫𑑂𑐫𑐵 𑐦𑐶𑐮𑑂𑐩 𑐴𑐾 𑐖𑐎 𑐥𑐶𑐡𑐣𑐵𑐔𑑂𑐰𑑄𑐐𑐸 𑐏𑑅 𑑋

𑐠𑑂𑐰 𑐃𑐫𑐵 𑐡𑐸𑐣𑐾 𑐥𑐶𑐡𑑄𑐐𑐸 𑐏𑐳 𑐣𑐾𑐥𑐵𑐮𑐷 𑐨𑐵𑐫𑑂𑐫𑐵 𑐦𑐶𑐮𑑂𑐩 𑐢𑐸𑑄𑐎𑐵𑑅 𑐰𑐶.𑐳𑑄. 𑑒𑑐𑑔𑑔 𑐳𑐵𑐮𑐫𑑂 𑐥𑐶𑐡𑑄𑐐𑐸 𑐣𑐾𑐰𑐵𑑅𑐦𑐶𑐮𑑂𑐩 “𑐳𑐶𑐮𑐸” 𑐴𑐾 𑐣𑐾𑐥𑐵𑑅𑐫𑐵 𑐡𑐎𑐮𑐫𑑂 𑐤𑐵𑐥𑐵𑑄𑐐𑐸 𑐐𑐿𑐬 𑐏𑐳 𑐣𑐾𑐥𑐵𑐮𑐷 𑐨𑐵𑐫𑑂𑐫𑐵 𑐦𑐶𑐮𑑂𑐩 𑐏𑑅𑐳𑐵 𑐠𑑂𑐰𑐴𑐾 𑐡𑐎𑐮𑐫𑑂 𑐤𑐵𑐥𑐵𑑄𑐐𑐸 𑐩𑐵𑐟𑐺𑐨𑐵𑐲𑐷 𑐦𑐶𑐮𑑂𑐩 𑐏𑑅 𑑋 𑐠𑑂𑐰 𑐦𑐶𑐮𑑂𑐩𑐫𑐵 𑐣𑐶𑐬𑑂‍𑐡𑐾𑐱𑐎 𑐥𑑂𑐬𑐡𑐶𑐥 𑐬𑐶𑐩𑐵𑐮 𑐏𑑅 𑑋 𑐠𑐸𑐎𑐷 𑐖𑐫 𑐱𑑂𑐬𑐾𑐲𑑂𑐛 𑐰 𑐣𑐧𑐶𑐣𑐵 𑐱𑑂𑐬𑐾𑐲𑑂𑐛𑐫𑐵 𑐩𑐾𑐣 𑐬𑑀𑐮 𑐡𑐸𑐐𑐸 𑐮𑑂𑐫𑐵𑐏𑑄 𑐁𑐡𑐶𑐰𑐵𑐳𑐷 𑐩𑐵𑐟𑐺𑐨𑐵𑐫𑑂𑐫𑐵 𑐡𑐎𑐮𑐫𑑂 𑐤𑐵𑐥𑐵𑑄𑐪 𑐀𑐨𑐶𑐣𑐾𑐟𑐵 𑐖𑐫 𑐱𑑂𑐬𑐾𑐲𑑂𑐛 𑐛𑐴𑐬𑐾 𑐖𑐸𑐮𑐳𑐵 𑐀𑐨𑐶𑐣𑐾𑐟𑑂𑐬𑐷 𑐣𑐧𑐶𑐣𑐵 𑐱𑑂𑐬𑐾𑐲𑑂𑐛 𑑋

𑐁𑐡𑐶𑐰𑐵𑐳𑐷 𑐩𑐵𑐟𑐺𑐨𑐵𑐲𑐷 𑐦𑐶𑐮𑑂𑐩𑐫𑐵 𑐂𑐟𑐶𑐴𑐵𑐳𑐫𑐵 𑐴𑐾 𑐡𑐎𑐮𑐫𑑂 𑐤𑐵𑐥𑐵𑑄𑐐𑐸 𑐥𑐮𑐵𑑅 𑐖𑐸𑐂𑐟 𑐟𑐵𑑅𑐮𑐵𑑅𑐐𑐸 𑐣𑐾𑐰𑐵𑑅 𑐨𑐵𑐫𑑂𑐫𑐵 𑐦𑐶𑐮𑑂𑐩 “𑐳𑐶𑐮𑐸” 𑐢𑐸𑑄𑐎𑐵𑑅 𑐟𑑅𑐡𑑃𑐟𑐎 𑐴𑐵𑐎𑐣𑑄 𑐩𑐾𑐐𑐸 𑐁𑐡𑐶𑐰𑐵𑐳𑐷 𑐩𑐵𑐟𑐺𑐨𑐵𑐲𑐵𑐫𑐵 𑐦𑐶𑐮𑑂𑐩 𑐥𑐶𑐩𑐡𑐣 𑑋 “𑐳𑐶𑐮𑐸”𑐥𑐶𑐡𑐣𑐾 𑐢𑐸𑑄𑐎𑐵𑑅 𑐗𑐶𑐣𑐶𑐡𑑃 𑐮𑐶𑐥𑐵 𑐰𑐶.𑐳𑑄.𑑒𑑐𑑕𑑓 𑐳𑐵𑐮𑐫𑑂 𑐩𑐾𑐐𑐸 𑐣𑐾𑐰𑐵𑑅 𑐦𑐶𑐮𑑂𑐩 𑐎𑐠𑑄 “𑐬𑐵𑐖𑐩𑐟𑐶” 𑐥𑐶𑐡𑐣 𑑋

“𑐬𑐵𑐖𑐩𑐟𑐶”𑐫𑐵 𑐣𑐶𑐬𑑂‍𑐡𑐾𑐱𑐎 𑐣𑐷𑐬 𑐱𑐵𑐴 𑐏𑑅 𑐀𑐮𑐾 𑐠𑐸𑐎𑐷 𑐴𑐶𑐳𑐶𑐮𑐵 𑐩𑐴𑐬𑑂‍𑐖𑐣𑑄 𑐬𑐵𑐖𑐩𑐟𑐶𑐫𑐵 𑐩𑐾𑐣 𑐬𑑀𑐮 𑐪𑐶𑐟𑐵𑐟𑑅𑐐𑐸 𑐡𑐸𑐳𑐵 𑐩𑐞𑐶 𑐬𑐵𑐖𑐮𑐰𑐚 𑐰 𑐱𑑂𑐬𑐷𑐎𑐺𑐲𑑂𑐞 𑐱𑑂𑐬𑐾𑐲𑑂𑐛𑐫𑐵 𑐣𑑄 𑐩𑐹 𑐨𑐹𑐩𑐶𑐎𑐵 𑐡𑐸 𑑋𑐠𑐸𑐮𑐶𑐫𑐵 𑐡𑐸𑐣𑐾 𑐩𑐾𑐐𑐸 𑐥𑑂𑐫𑑄𑐐𑐹 𑐣𑐾𑐰𑐵𑑅 𑐦𑐶𑐮𑑂𑐩 𑐣𑑄 𑐥𑐶𑐡𑑄𑐐𑐸 𑐡𑐸 𑐟𑐬 𑐣𑐾𑐰𑐵𑑅 𑐦𑐶𑐮𑑂𑐩𑐫𑐵 𑐂𑐟𑐶𑐴𑐵𑐳𑐫𑑂 𑐐𑐣𑑄 𑐄𑐮𑑂𑐮𑐾𑐏 𑐫𑐵𑐣𑐵𑐟𑑅𑐐𑐸 𑐩𑐡𑐸 𑑋 𑐠𑐠𑐾 𑐖𑐹𑐐𑐸𑐫𑐵 𑐩𑐹𑐴𑐸𑐣𑐶 𑐢𑐂𑐐𑐸 “𑐳𑐶𑐮𑐸”𑐰 “𑐬𑐵𑐖𑐩𑐟𑐶” 𑐄𑐐𑐸 𑐃𑐫𑐵 𑐦𑐶𑐮𑑂𑐩 𑐣𑐶𑐬𑑂‍𑐩𑐵𑐞 𑐥𑑂𑐬𑐰𑐶𑐢𑐷 𑐳𑐾𑐮𑐸𑐮𑐵𑐂𑐜𑐫𑑂 𑐡𑐫𑐾𑐎𑐹𑐐𑐸 𑐏𑑅𑐳𑐵 𑐩𑐾𑐐𑐸 𑐥𑑂𑐫𑑄𑐐𑐹 𑐦𑐶𑐮𑑂𑐩“𑐔𑐬𑐶𑐟𑑂𑐬”, “𑐔𑐶𑐥𑐣𑐶𑐥”, “𑐤𑐶𑐮𑐵𑑅 𑐤𑐶𑐮𑐵𑑅 𑐴𑐸𑑃” 𑐰 “𑐣𑐶𑐥𑐵𑑅 𑐏𑑂𑐰𑐵𑑅𑐥𑐵𑑅” 𑐢𑐵𑑅𑐳𑐵 𑐨𑐶𑐜𑐶𑐫𑑀 𑐥𑑂𑐬𑐰𑐶𑐢𑐷𑑄 𑐡𑐫𑐾𑐎𑐹𑐐𑐸 𑐦𑐶𑐮𑑂𑐩 𑐏𑑅 𑑋

𑐣𑐾𑐥𑐵𑐮𑐫𑑂 𑐁𑐡𑐶𑐰𑐵𑐳𑐷 𑐩𑐵𑐟𑐺𑐨𑐵𑐲𑐷 𑐦𑐶𑐮𑑂𑐩𑐫𑐵 𑐔𑐬𑑂‍𑐔𑐵 𑐫𑐵𑐫𑐾𑐧𑐮𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵“𑐳𑐶𑐮𑐸”𑐢𑐸𑑄𑐎𑐵𑑅 𑐟𑑅𑐡𑑃 𑐮𑐶𑐥𑐵 𑐩𑐾𑐐𑐸 𑐨𑐵𑐫𑑂𑐫𑐵 𑐦𑐶𑐮𑑂𑐩 𑐎𑐠𑑄 𑐥𑐶𑐡𑑄𑐐𑐸 𑐢𑐂𑐐𑐸 𑐠𑐵𑐬𑐸 𑐨𑐵𑐫𑑂𑐫𑐵 𑐦𑐶𑐮𑑂𑐩 “𑐎𑐬𑐩” 𑐏𑑅 𑑋𑐥𑐬𑐱𑐸𑐬𑐵𑐩 𑐔𑑁𑐢𑐬𑐷𑑄 𑐡𑐫𑐾𑐎𑐹𑐐𑐸 𑐠𑑂𑐰 𑐦𑐶𑐮𑑂𑐩𑑄 𑐄𑐐𑐸 𑐂𑐮𑐫𑑂 𑐖𑐹𑐐𑐸 𑐨𑐶𑐜𑐶𑐫𑑀 𑐔𑐮𑐔𑐶𑐟𑑂𑐬 𑐩𑐴𑑀𑐟𑑂𑐳𑐰𑐫𑑂 𑐠𑐷𑐠𑐷 𑐳𑐶𑐬𑐥𑐵𑑅 𑐟𑑂𑐫𑐵𑐎𑐾𑐟 𑐟𑐵𑑅𑐮𑐵𑑅𑐐𑐸 𑐏𑑅 𑑋

𑐠𑑂𑐰 𑐂𑐮𑐫𑑂 𑐨𑐶𑐜𑐶𑐫𑑀 𑐥𑑂𑐬𑐰𑐶𑐢𑐷𑑄 𑐡𑐫𑐾𑐎𑐹𑐐𑐸 𑐦𑐶𑐮𑑂𑐩𑐟 𑐴𑐮𑐫𑑂 𑐎𑑂𑐫𑐣𑐾𑐐𑐸 𑐔𑐮𑐣 𑐩𑐡𑐸𑐐𑐸𑐮𑐶𑑄 𑐫𑐵𑐣𑐵𑑅𑐄𑐧𑐮𑐫𑑂 𑐥𑐶𑐡𑑄𑐐𑐸 𑐥𑑂𑐫𑑄𑐐𑐹 𑐣𑐾𑐰𑐵𑑅 𑐦𑐶𑐮𑑂𑐩 𑐣𑑄 𑐴𑐮𑐟𑐎 𑐠𑑂𑐫𑐣𑐾 𑐩𑐦𑐸𑐐𑐸 𑐏𑑅𑐳𑐵 “𑐎𑐬𑐩” 𑐣𑑄 𑐣𑐾𑐥𑐵𑐮 𑐨𑐶𑐜𑐶𑐫𑑀 𑐔𑐮𑐔𑐶𑐟𑑂𑐬 𑐳𑑄𑐑𑐫𑐵 𑐐𑑂𑐰𑐳𑐵𑐮𑐫𑑂 𑐨𑐺𑐎𑐸𑐚𑐷𑐩𑐞𑑂𑐜𑐥𑐫𑑂 𑐡𑐸𑐣𑐾 𑐔𑑂𑐰𑑄𑐐𑐸 𑐴𑐵𑐃𑐨𑐶𑐖𑐣 𑐴𑐮 𑐡𑐸𑐳𑐵𑑄 𑐀𑐣 𑐟𑐎𑑄 𑐎𑑂𑐫𑐣𑐾 𑐩𑐦𑐸𑐐𑐸 𑐏𑑅 𑑋 𑐄𑐐𑐸 𑐦𑐶𑐮𑑂𑐩 𑐣𑑄 𑐣𑐶𑐬𑑂‍𑐩𑐵𑐟𑐵𑐫𑐵 𑐠𑑅𑐐𑐸 𑐴𑐾 𑐎𑐸𑐟𑐮𑑄 𑐠𑐷𑐠𑐷 𑐠𑐵𑐳𑐫𑑂 𑐔𑑂𑐫𑐵𑐬𑐶𑐚𑐷 𑐱𑑀 𑐎𑐠𑑄 𑐎𑑂𑐫𑐣𑐾𑐖𑑂𑐫𑐵 𑐖𑐹𑐐𑐸 𑐏𑑅 𑑋

𑐠𑐠𑐾 𑐣𑐾𑐥𑐵𑐮𑐫𑑂 𑐁𑐡𑐶𑐰𑐵𑐳𑐷 𑐩𑐵𑐟𑐺𑐨𑐵𑐲𑐷 𑐦𑐶𑐮𑑂𑐩𑐫𑐵 𑐎𑑂𑐫𑐣𑐾𑐖𑑂𑐫𑐵 𑐤𑑂𑐫𑐵𑑅𑐐𑐸 𑐣𑑄 𑐳𑑂𑐰𑐷𑐡𑑃 𑐥𑐸𑐮𑐾 𑐢𑐸𑑄𑐎𑐮 𑐟𑐬 𑐁𑑅 𑐟𑐎 𑐣𑑄 𑐀𑐖𑑂𑐫𑐵𑑅𑐐𑐸 𑐦𑐶𑐮𑑂𑐩𑑄 𑐴𑐮𑐫𑑂 𑐧𑐵𑑄𑐮𑐵𑐎𑑂𑐎 𑐠𑐵𑐫𑑂 𑐎𑐵𑐫𑐾 𑐦𑐸𑐐𑐸 𑐩𑐡𑐸𑐣𑐶 𑑋“𑐳𑐶𑐮𑐸”𑐫𑐵 𑐎𑑂𑐫𑐣𑐾𑐖𑑂𑐫𑐵 𑐱𑐸𑐬𑐸 𑐖𑐹𑐐𑐸 𑐂𑐮𑐫𑑂 𑐁𑐥𑐵𑐮𑑄𑐁𑐥𑐵𑑅 𑐳𑑂𑐰𑐎𑐸𑐩𑐶 𑐰𑐫𑐵𑑅 𑐦𑐶𑐫𑐵𑑄𑐦𑐷 𑐩𑐦𑐫𑐾𑐎 𑐴𑐸𑐮 𑐖𑐹𑐐𑐸 𑐏𑑅𑐳𑐵 𑐮𑐶𑐥𑐵 “𑐬𑐵𑐖𑐩𑐟𑐶” 𑐣𑑄 𑑕𑑑 𑐤𑐹𑐟𑐎 𑐎𑑂𑐫𑐣𑐾𑐟 𑐟𑐵𑑅𑐮𑐵𑑅𑐐𑐸 𑐏𑑅 𑑋

𑐰 𑐢𑐸𑑄𑐎𑐵𑑅 𑐁𑑅 𑐟𑐎𑐫𑐵 𑐣𑐾𑐰𑐵𑑅 𑐦𑐶𑐮𑑂𑐩𑐫𑐵 𑐔𑐬𑑂‍𑐔𑐵 𑐫𑐵𑐫𑐾𑐧𑐮𑐫𑑂 𑐧𑐸𑐡𑑂𑐢𑐎𑐵𑐮𑐶𑐣 𑐧𑐵𑐏𑐣𑐫𑑂 𑐡𑐫𑐾𑐎𑐹𑐐𑐸 𑐣𑐶𑐬𑑂‍𑐡𑐾𑐱𑐎 𑐬𑐵𑐩𑐎𑐺𑐲𑑂𑐞 𑐏𑐜𑑂𑐐𑐷𑐫𑐵 “𑐥𑐚𑐵𑐔𑐵𑐬𑐵” 𑐐𑐸𑐞 𑐳𑐶𑐣𑐾𑐩𑐵𑑄 𑐴𑐮𑐫𑑂 𑑑𑑒𑑕 𑐤𑐸𑐳𑐶𑐧𑐾𑑄 𑐀𑐥𑑂𑐰𑑅 𑐎𑑂𑐫𑐣𑐵𑑅 𑐬𑐾𑐎𑐬𑑂‍𑐜 𑐟𑑅𑐐𑐸 𑐏𑑅𑐳𑐵 𑐬𑐵𑐩𑐎𑐺𑐲𑑂𑐞 𑐏𑐜𑑂𑐐𑐷𑐫𑐵 𑐴𑐾 “𑐎𑐺𑐲𑐵 𑐐𑑁𑐟𑐩𑐷”𑐣𑑄 𑑖𑑘𑐤𑐹𑐟𑐎 𑐎𑑂𑐫𑐣𑐾𑐟 𑐟𑐵𑑅𑐮𑐵𑑅𑐐𑐸 𑐏𑑅 𑑋 𑐠𑑂𑐰 𑐥𑑂𑐫𑑄𑐐𑐹 𑐦𑐶𑐮𑑂𑐩 𑐧𑐵𑐴𑐾𑐎 𑐣𑐶𑐬𑑂‍𑐡𑐾𑐱𑐎 𑐥𑐰𑐣 𑐖𑑀𑐱𑐷𑐫𑐵 “𑐧𑐵𑑄𑐮𑐵𑑅 𑐩𑐫𑑂𑐖𑐸” 𑐣𑑄 𑐴𑐮𑐫𑑂 𑐳𑐵𑐬𑑂‍𑐰𑐖𑐣𑐶𑐎 𑐬𑐸𑐥𑑄 𑐎𑑂𑐫𑑄𑐐𑐸 𑐦𑐶𑐮𑑂𑐩 𑐏𑑅𑐳𑐵 𑐁𑑅 𑐰𑐫𑐵𑑅 𑐣𑐶𑐬𑑂‍𑐡𑐾𑐱𑐎 𑐬𑐰𑐶 𑐳𑐵𑐫𑑂𑐩𑐶𑐫𑐵 “𑐖𑐵𑐩𑐣𑑅 𑐐𑐸𑐨𑐵𑐖𑐸” 𑐰𑐵𑐮𑐫𑑂 𑐕𑐤𑐸 𑐖𑐹𑐳𑐵𑑄 𑐎𑑂𑐫𑐣𑐵 𑐰𑐫𑐵𑐔𑑂𑐰𑑄𑐐𑐸 𑐣𑐾𑐰𑐵𑑅 𑐦𑐶𑐮𑑂𑐩 𑐏𑑅 𑑋

𑐁𑐡𑐶𑐰𑐵𑐳𑐷 𑐩𑐵𑐟𑐺𑐨𑐵𑐲𑐷 𑐦𑐶𑐮𑑂𑐩𑐫𑐵 𑐥𑐸𑐮𑐵𑑄 𑐏𑑃 𑐡𑐸𑐰𑐵𑐮𑐾𑐐𑐸 𑐏𑑅𑐳𑐵 𑐠𑐣 𑐔𑑂𑐰𑐫𑐾𑐧𑐴𑐐𑐸 𑐕𑐟𑐵 𑐏𑑃 𑐢𑐂𑐐𑐸 “𑐳𑐶𑐮𑐸”𑐥𑐶𑐴𑐵𑑄 𑐰𑑅𑐐𑐸 𑐂𑐮𑐫𑑂 𑐏𑐳 𑐣𑐾𑐥𑐵𑐮𑐷 𑐨𑐵𑐫𑑂𑐫𑐵 𑐦𑐶𑐮𑑂𑐩𑐫𑐵𑐟𑐖𑐎 𑐣𑐾𑐥𑐵𑐮𑐷 𑐦𑐶𑐮𑑂𑐩 𑐢𑐫𑐵𑐟𑑅𑐐𑐸 𑐏𑑅𑐳𑐵 𑐄𑐐𑐸 𑐂𑐮𑐫𑑂 𑐬𑐵𑐖𑑂𑐫𑑄 𑐪𑐂𑐐𑐸 𑐩𑐣𑑀𑐬𑐘𑑂𑐖𑐣 𑐎𑐬𑐫𑐵 𑑕𑑐 𑐥𑑂𑐬𑐟𑐶𑐱𑐟 𑐣𑐶𑐬𑑂‍𑐩𑐵𑐟𑐵𑐫𑐵𑐟 𑐮𑐶𑐟𑐧𑐷𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅 𑑋𑐟𑐬 “𑐳𑐶𑐮𑐸”𑐫𑐵𑐟 𑐣𑐾𑐥𑐵𑐮𑐷 𑐩𑐏𑐸 𑐢𑐎𑐵𑑅 𑐀𑐖𑑂𑐫𑐵𑑅𑐐𑐸 𑐳𑐸𑐰𑐶𑐢𑐵 𑐩𑐧𑐷𑐐𑐸 𑐎𑐸𑐟𑑅 𑐫𑐵𑑅𑐐𑐸 𑐏𑑅𑑋

𑐠𑐸𑐎𑐠𑑄 𑐤𑐵𑐥𑐵𑑄𑐐𑐸 𑐁𑐡𑐶𑐰𑐵𑐳𑐷 𑐩𑐵𑐟𑐺𑐨𑐵𑐲𑐷 𑐦𑐶𑐮𑑂𑐩𑐫𑐵𑐟 𑐎𑑂𑐫𑑄𑐐𑐸 𑐠𑐖𑑂𑐫𑐵𑑅𑐐𑐸 𑐔𑐶𑐬𑐶𑐩𑐵𑑄 𑐰𑑂𑐫𑐰𑐴𑐵𑐬𑑄 𑐫𑐵𑐣𑐵𑑄 𑐀𑐥𑑂𑐰𑑅 𑐮𑐵𑐫𑑂 𑐟𑐫𑐵𑑅 𑐳𑐾𑐮𑐸𑐮𑐵𑐂𑐜 𑐦𑐶𑐮𑑂𑐩 𑐡𑐫𑐾𑐎𑐾𑐐𑐸 𑐁𑑃𑐚 𑐳𑐸𑐣𑐵𑑄 𑐩𑐫𑐵𑐟 𑑋 𑐟𑐬 𑐕𑐐𑐹–𑐣𑐶𑐐𑐹 𑐖𑐹𑐳𑐵𑑄 𑐨𑐶𑐜𑐶𑐫𑑀 𑐦𑐶𑐮𑑂𑐩 𑐡𑐫𑐾𑐎𑐾𑐐𑐸 𑐖𑑂𑐫𑐵 𑐢𑐵𑑅𑐳𑐵 𑐖𑐸𑐮 𑑋 𑐁𑑅 𑐟𑐎𑐫𑐵 𑐡𑐸𑐣𑐾 𑐎𑐬𑐶𑐧 𑑑𑑒𑑕 𑐐𑐹 𑐟𑐶 𑐣𑐾𑐰𑐵𑑅 𑐦𑐶𑐮𑑂𑐩 𑐥𑐶𑐡𑐣𑐾 𑐢𑐸𑑄𑐎𑐮𑐳𑐵 𑐩𑐾𑐩𑐾𑐐𑐸 𑐨𑐵𑐫𑑂𑐫𑐵 𑐦𑐶𑐮𑑂𑐩𑐫𑐵 𑐣𑐵𑐥𑑄 𑐫𑐵𑐣𑐵𑑅 𑐠𑑂𑐫𑑄𑐩𑐠𑑂𑐫𑑄 𑐏𑐸𑐳𑑅–𑐤𑐫𑑂𑐳𑑅𑐟𑐶 𑐦𑐶𑐮𑑂𑐩 𑐁𑐡𑐶𑐰𑐵𑐳𑐷 𑐩𑐵𑐟𑐺𑐨𑐵𑐲𑐵𑑄 𑐥𑐶𑐴𑐵𑑄 𑐰𑐫𑐾𑐢𑐸𑑄𑐎𑐮, 𑐟𑐬 𑐀𑐖𑑂𑐫𑐵𑑅𑐐𑐸 𑐡𑐎𑑂𑐰 𑐢𑐫𑐵𑐠𑐾𑑄 𑐦𑐶𑐮𑑂𑐩𑐟 𑐴𑐮 𑐟𑐎 𑐢𑐵𑑅𑐳𑐵 𑐠𑑂𑐫𑐣𑐾 𑐦𑐸𑐐𑐸 𑐩𑐡𑐸 𑑋

𑐣𑐾𑐥𑐵𑐮𑐫𑑂 𑐡𑐸𑐣𑐾 𑐣𑑂𑐰𑐰𑐵𑐂𑐐𑐸 𑐰 𑐮𑐶𑐥𑐶 𑐡𑐸𑐐𑐸 𑐨𑐵𑐫𑑂 𑐩𑐢𑑂𑐫𑐾 𑐟𑐵𑐩𑐵𑐒𑑂𑐐,𑐩𑐐𑐬,𑐐𑐸𑐬𑐸𑐒𑑂𑐐 𑐮𑐐𑐵𑐫𑐟 𑐠𑐷𑐠𑐷 𑐁𑐡𑐶𑐰𑐵𑐳𑐷 𑐩𑐵𑐟𑐺𑐨𑐵𑐲𑐵𑑄 𑐣𑑄 𑐦𑐶𑐮𑑂𑐩𑐟 𑐡𑐫𑐾𑐎𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸𑐳𑐵 𑐡𑐕𑐶𑐫𑐵 𑐡𑐸𑐣𑐾 𑐣𑑂𑐫𑐫𑑂𑐐𑐹𑐟𑐶 𑐀𑐖𑑂𑐫𑐵𑑅𑐐𑐸 𑐦𑐶𑐮𑑂𑐩 𑐥𑐶𑐡𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐣𑐾𑐥𑐵𑐮𑐨𑐵𑐲𑐵 𑐢𑐸𑑄𑐎𑐵𑑅 𑐠𑐵𑐬𑐸 𑐨𑐵𑐫𑑂𑐫𑐵 𑐦𑐶𑐮𑑂𑐩 𑐥𑐶𑐴𑐵𑑄 𑐰𑐮𑐳𑐵 𑐰 𑐢𑐸𑑄𑐎𑐵𑑅𑐰𑐶.𑐳𑑄.𑑒𑑐𑑕𑑑 𑐳𑐵𑐮𑐫𑑂 𑐰𑐫𑐵𑑅 𑐩𑐐𑐬 𑐨𑐵𑐫𑑂𑐫𑐵 𑐦𑐶𑐮𑑂𑐩 “𑐮𑐒𑐑𑐣”𑐥𑐶𑐡𑐣 𑑋

𑐠𑑂𑐰 𑐦𑐶𑐮𑑂𑐩𑐫𑐵 𑐣𑐶𑐬𑑂‍𑐡𑐾𑐱𑐎 𑐫𑐸𑐰𑐬𑐵𑐖 𑐩𑐵𑐳𑑂𑐎𑐷 𑐩𑐐𑐬 𑐏𑑅 𑑋 𑐩𑐐𑐬 𑐨𑐵𑐲𑐷 𑐦𑐶𑐮𑑂𑐩𑐫𑐵 𑐡𑐎𑐮𑐫𑑂 𑐤𑐵𑐥𑐵𑑄𑐪 𑐦𑐶𑐮𑑂𑐩 𑐣𑐶𑐬𑑂‍𑐡𑐾𑐱𑐎 𑐖𑐸𑐂𑐐𑐸 𑐴𑑂𑐰𑑅𑐟𑐵𑑅 𑐔𑐹𑐮𑐵𑐎𑐹𑐪 𑐫𑐸𑐰𑐬𑐵𑐖 𑐩𑐵𑐳𑑂𑐎𑐷 𑐩𑐐𑐬𑑄 𑐮𑐶𑐥𑐵 𑐰𑐶.𑐳𑑄.𑑒𑑐𑑕𑑒 𑐥𑐵𑐏𑐾 𑐐𑐸𑐬𑐸𑐒𑑂𑐐 𑐨𑐵𑐫𑑂𑐫𑐵 𑐦𑐶𑐮𑑂𑐩 “𑐥𑐵𑐟𑐾” 𑐡𑐫𑐾𑐎𑐵𑑅 𑐐𑐸𑐬𑐸𑐒𑑂𑐐 𑐨𑐵𑐫𑑂𑐫𑐵 𑐣𑑄 𑐡𑐎𑐮𑐫𑑂 𑐤𑐵𑐥𑐵𑑄𑐪 𑐦𑐶𑐮𑑂𑐩 𑐣𑐶𑐬𑑂‍𑐡𑐾𑐱𑐎 𑐖𑐸𑐂𑐐𑐸 𑐴𑑂𑐰𑑅𑐟𑐵𑑅 𑐔𑐹𑐮𑐵𑐎𑐮 𑑋

𑐠𑑁𑑄𑐎𑐤𑐫𑑂 𑐐𑐸𑐬𑐸𑐒𑑂𑐐 𑐨𑐵𑐫𑑂𑐫𑐵 𑐦𑐶𑐮𑑂𑐩𑐫𑐵 𑐮𑑂𑐫𑐵𑑅 𑐀𑐥𑑂𑐰𑐫𑐵𑐰𑐫𑐵𑐔𑑂𑐰𑑄𑐐𑐸 𑐡𑐸𑐳𑐵 𑐥𑑀𑐏𑐬𑐵𑐫𑑂 𑐠𑑂𑐰 𑐨𑐵𑐫𑑂𑐫𑐵 𑐦𑐶𑐮𑑂𑐩𑐫𑐵𑐟 𑐰𑑂𑐫𑐰𑐳𑑂𑐠𑐶𑐟 𑐬𑐸𑐥𑑄 𑐴𑐮𑐫𑑂 𑐴𑐾 𑐎𑑂𑐫𑐣𑐾𑐐𑐸 𑐣𑐶𑑄𑐟𑐶𑑄 𑐐𑐸𑐬𑐸𑐒𑑂𑐐 𑐦𑐶𑐮𑑂𑐩 𑐳𑑄𑐑𑑄 𑐎𑐸𑐟𑑅 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑐢𑐂𑐐𑐸 𑐣𑑂𑐫𑐣𑐾𑐡𑐸 𑑋𑐦𑐶𑐮𑑂𑐩 𑐳𑑂𑐰𑐂𑐥𑐶𑑄 𑐳𑑂𑐰𑐎𑐸𑐩𑐶𑐫𑐵 𑐮𑑂𑐫𑐵𑑅 𑐰 𑐠𑑅𑐐𑐸 𑐨𑐵𑐳𑑄 𑐥𑐶𑐡𑑄𑐐𑐸 𑐩𑐵𑐟𑐺𑐨𑐵𑐲𑐷 𑐦𑐶𑐮𑑂𑐩𑐫𑐵𑐟 𑐩𑐟𑐶𑐣𑐵 𑐫𑐵𑐫𑐾𑐩𑐵𑑅 𑐢𑐂𑐐𑐸 𑐨𑐵𑐰𑐣𑐵 𑐟𑐵𑐩𑐵𑐒𑑂𑐐 𑐳𑐩𑐸𑐡𑐵𑐫 𑐡𑐸𑐣𑐾 𑐡𑐸𑐐𑐸 𑐏𑐣𑐾𑐡𑐸 𑑋

𑐟𑐵𑐩𑐵𑐒𑑂𑐐 𑐦𑐶𑐮𑑂𑐩𑐫𑐵 𑐱𑑀 𑐖𑐸𑐂𑐧𑐮𑐫𑑂𑐟𑐵𑐩𑐵𑐒𑑂𑐐 𑐳𑐩𑐸𑐡𑐵𑐫𑐫𑐵 𑐳𑑂𑐰𑐎𑐸𑐩𑐶𑐟 𑐧𑐠𑐵𑑄𑐧𑐠𑐵𑑄 𑐩𑐸𑐸𑐣𑐵𑑅 𑐳𑑂𑐰𑑅𑐰𑑅𑐐𑐸 𑐏𑐣𑐾𑐡𑐸 𑑋 𑐠𑐸𑐎𑐶𑑄 𑐫𑐵𑐣𑐵𑑅 𑐟𑐵𑐩𑐵𑐒𑑂𑐐 𑐦𑐶𑐮𑑂𑐩𑐫𑑂 𑐖𑑂𑐫𑐵 𑐫𑐵𑐂𑐥𑐶𑐣𑐶𑐐𑐸 𑐴𑑁𑐳𑐮𑐵 𑐗𑐣𑑂 𑐀𑐥𑑂𑐰𑑅𑐫𑐵 𑐰𑑅𑐐𑐸 𑐏𑐣𑐾𑐡𑐸 𑑋 𑐠𑐸𑐎𑐠𑑄 𑐠𑑅𑐐𑐸 𑐨𑐵𑐲𑐵𑐫𑐵 𑐦𑐶𑐮𑑂𑐩 𑐥𑑂𑐬𑐟𑐶 𑐩𑐟𑐶𑐣𑐵 𑐎𑑂𑐫𑐣𑐷𑐥𑐶𑑄 𑐟𑐵𑐩𑐵𑐒𑑂𑐐𑐟𑐫𑑂𑐐𑐸 𑐡𑐎𑐮𑐫𑑂 𑐤𑐵𑐥𑐵𑑄𑐐𑐸 𑐦𑐶𑐮𑑂𑐩 “𑐳𑐾𑐩𑐬𑐷 𑐕𑑀𑐬𑐒𑐵𑐣” 𑐏𑑅 𑑋 𑐠𑑂𑐰 𑐦𑐶𑐮𑑂𑐩𑐫𑐵 𑐣𑐶𑐬𑑂‍𑐡𑐾𑐱𑐎 𑐖𑐫𑐣𑐣𑑂𑐡 𑐮𑐵𑐩𑐵 𑐏𑑅 𑑋

𑐣𑐾𑐥𑐵𑐮𑐫𑑂 𑐡𑐸𑐣𑐾 𑐠𑑅𑐐𑐸 𑐴𑐾 𑐨𑐵𑐲𑐵 𑐡𑐸𑐥𑐶𑑄 𑐁𑐡𑐷𑐰𑐵𑐳𑐷 𑐖𑐣𑐖𑐵𑐟𑐶𑐟 𑐫𑐎𑑂𑐰𑐴𑐾 𑐡𑑅𑐳𑐵𑑄 𑐀𑐖𑑂𑐫𑐵𑑅𑐐𑐸 𑐡𑐎𑑂𑐰 𑐨𑐵𑐳𑑄 𑐦𑐶𑐮𑑂𑐩 𑐴𑐾 𑐢𑐵𑑅𑐳𑐵 𑐡𑐫𑐾𑐎𑐵𑐔𑑂𑐰𑑄𑐐𑐸 𑐩𑐡𑐸 𑑋 𑐁𑑅 𑐰𑐫𑐵𑑅 𑐩𑐸𑐐𑐵𑐮𑐷, 𑐎𑑀𑐂𑑄𑐔, 𑐬𑐵𑐃 𑐨𑐵𑐲𑐵𑐫𑐵 𑐣𑑄 𑐦𑐶𑐮𑑂𑐩 𑐥𑐶𑐴𑐵𑑄 𑐰𑐫𑐵𑐔𑑂𑐰𑑄𑐐𑐸 𑐡𑐸𑐳𑐵 𑐡𑐎𑐮𑐫𑑂 𑐤𑐵𑐥𑐵𑑄𑐐𑐸 𑐦𑐶𑐮𑑂𑐩 𑐢𑐂𑐐𑐸 “𑐳𑐵𑐫𑐵𑐧𑐸𑐒” 𑐏𑑅𑐳𑐵 𑐠𑑂𑐰 𑐦𑐶𑐮𑑂𑐩𑐫𑐵 𑐣𑐶𑐬𑑂‍𑐡𑐾𑐱𑐎 𑐜𑐶𑐎 𑐧𑐵𑐣𑑂𑐟𑐰𑐵 𑐏𑑅 𑑋 𑐀𑐠𑐾𑐴𑐾𑐟𑐸𑑄 𑐮𑐶𑐩𑑂𑐧𑐸 𑐨𑐵𑐫𑑂𑐫𑐵 𑐤𑐵𑐥𑐵𑑄𑐐𑐸 𑐦𑐶𑐮𑑂𑐩 𑐎𑐠𑑄 𑐡𑐫𑐾𑐎𑐹𑐐𑐸 𑐚𑐾𑐮𑐶𑐦𑐶𑐮𑑂𑐩 “𑐟𑐬𑐾𑐰𑐵” 𑐏𑑅𑐳𑐵 𑐠𑐸𑐎𑐶𑐫𑐵 𑐣𑐶𑐬𑑂‍𑐡𑐾𑐱𑐎 𑐣𑐧𑐷𑐣 𑐳𑐸𑐧𑑂𑐧𑐵 𑐏𑑅 𑑋

𑐮𑐶𑐥𑐵 𑐰𑐣𑐵𑑅 𑐣𑐧𑐷𑐣 𑐳𑐸𑐧𑑂𑐧𑐵𑑄 𑐣𑐾𑐥𑐵𑐮𑐫𑑂 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐩𑐵𑐟𑐺𑐨𑐵𑐲𑐵𑐫𑐵 𑐦𑐶𑐮𑑂𑐩𑐫𑐵 𑐀𑐨𑐶𑐫𑐵𑐣𑐫𑐵𑐟 𑐴𑐾 𑐤𑑂𑐫𑐵𑐎𑐮𑐳𑐵 𑐰𑐫𑐵𑐐𑐸 𑐴𑐾 𑐎𑐸𑐟𑐮𑑄 𑐂𑐣𑑂𑐜𑐶𑐖𑐶𑐣𑐳 𑐦𑐶𑐮𑑂𑐩 𑐁𑐬𑑂‍𑐎𑐵𑐂𑐨 𑐣𑐷𑐳𑑂𑐰𑑄𑐐𑐸 𑐏𑑅 𑑋 𑐳𑐣𑑂 𑑒𑑐𑑐𑑗 𑐣𑐶𑐳𑐾𑑄 𑐣𑐾𑐥𑐵𑐮 𑐂𑐣𑑂𑐚𑐬𑐣𑐾𑐱𑐣𑐮 𑐂𑐣𑑂𑐜𑐶𑐖𑐶𑐣𑐳 𑐦𑐶𑐮𑑂𑐩 𑐦𑐾𑐳𑑂𑐚𑐶𑐨𑐮𑐫𑐵 𑐀𑐨𑐶𑐫𑐵𑐣 𑐤𑑂𑐫𑐵𑐎𑐹𑐐𑐸 𑐏𑑅 𑑋 𑐀𑐠𑐾𑐴𑐾𑐟𑐸𑑄 𑐣𑐧𑐷𑐣 𑐳𑐸𑐧𑑂𑐧𑐵𑑄 𑐮𑐶𑐥𑐵 𑐰𑐣𑐵𑑅 “𑐣𑐸𑐩𑐵𑐦𑐸𑐒” 𑐣𑐵𑑄𑐫𑐵𑐐𑐸 𑐕𑐐𑐹 𑐦𑐶𑐮𑑂𑐩 𑐮𑐶𑐩𑑂𑐧𑐸 𑐟𑐖𑐶𑐮𑐖𑐶𑐫𑐵𑐟 𑐎𑐫𑐵𑑅 𑐡𑐫𑐾𑐎𑐮 𑑋

𑐠𑑂𑐰 𑐦𑐶𑐮𑑂𑐩𑑄 𑐬𑐵𑐲𑑂𑐚𑑂𑐬𑐶𑐫 𑐰 𑐀𑐣𑑂𑐟𑐬𑑂‍𑐬𑐵𑐲𑑂𑐚𑑂𑐬𑐶𑐫 𑐦𑐶𑐮𑑂𑐩 𑐦𑐾𑐳𑑂𑐚𑐶𑐨𑐮𑐫𑑂 𑐧𑑂𑐰𑐟𑐶 𑐎𑐵𑑅𑐐𑐸𑐖𑐎 𑐩𑐏𑐳𑐾 𑐠𑐷𑐠𑐷 𑐳𑐶𑐬𑐥𑐵𑑅 𑐣𑑄 𑐟𑑂𑐫𑐵𑐎𑐮 𑑋 𑐰 𑐴𑐾 𑐣𑐧𑐷𑐣 𑐳𑐸𑐧𑑂𑐧𑐵𑑄 𑐡𑐎𑐮𑐫𑑂 𑐤𑐵𑐥𑐵𑑄𑐐𑐸 𑐱𑐾𑐬𑑂‍𑐥𑐵 𑐦𑐶𑐮𑑂𑐩𑐫𑐵 𑐬𑐸𑐥𑐫𑑂 “𑐏𑐵𑐒𑐐𑑂𑐬𑐷”𑐡𑐫𑐾𑐎𑐮𑐳𑐵 𑐣𑐶𑐬𑑂‍𑐡𑐾𑐱𑐎 𑐩𑐫𑐖𑐸 𑐟𑑀𑐩𑐵 𑐮𑐵𑐩𑐵𑑄 𑐡𑐎𑐮𑐫𑑂 𑐤𑐵𑐥𑐵𑑄𑐐𑐸 𑐩𑐸𑐐𑐵𑐮𑐷 𑐨𑐵𑐫𑑂𑐫𑐵 𑐦𑐶𑐮𑑂𑐩𑐡𑐫𑐾𑐎𑐹𑐐𑐸 𑐏𑑅 𑑋

𑐠𑐸𑐎𑐠𑑄 𑐣𑐾𑐥𑐵𑑅𑐫𑐵 𑐦𑐶𑐮𑑂𑐩 𑐏𑑂𑐫𑐮𑐫𑑂 𑐣𑐾𑐥𑐵𑐮𑐫𑑂 𑐣𑑂𑐰𑐰𑐵𑐂𑐐𑐸 𑐏𑐳 𑐣𑐾𑐥𑐵𑐮𑐷 𑐨𑐵𑐫𑑂𑐫𑐵 𑐊𑐎𑐕𑐟𑑂𑐬𑐷𑐫 𑐬𑐵𑐖𑐫𑐵𑐟 𑐴𑐵𑐠𑑂𑐫𑐵 𑐧𑐶𑐫𑐵𑑅 𑐡𑐎𑐮𑐫𑑂 𑐤𑐵𑐥𑐵𑑄 𑐣𑐾𑐰𑐵𑑅 𑐨𑐵𑐳𑑄 𑐦𑐶𑐮𑑂𑐩 𑐡𑐫𑐾𑐎𑐹𑐐𑐸 𑐏𑑅𑐳𑐵 𑐰 𑐢𑐸𑑄𑐎𑐵𑑅 𑐟𑐶𑐣𑐶 𑐧𑐸𑐮𑐸𑐴𑐸𑑄𑐧𑐸𑐮𑐸𑐴𑐸𑑄 𑐩𑐾𑐩𑐾𑐐𑐸 𑐁𑐡𑐶𑐰𑐵𑐳𑐷 𑐩𑐵𑐟𑐺𑐨𑐵𑐲𑐵𑑄 𑐣𑑄 𑐦𑐶𑐮𑑂𑐩 𑐥𑐶𑐴𑐵𑑄 𑐰𑐫𑐾𑐐𑐸 𑐱𑐸𑐬𑐸 𑐖𑐹𑐐𑐸 𑐏𑑅 𑐢𑐂𑐐𑐸 𑐏𑑃 𑐠𑐣 𑐮𑐸𑐩𑑄𑐎𑐾𑐧𑐴𑐖𑐹 𑑋