𑐳𑐶𑐎𑑂𑐎𑐶𑐩 𑐣𑐾𑐰𑐵𑑅 𑐐𑐸𑐠𑐶𑐫𑐵𑐟 𑐳𑐸𑐡𑐬𑑂𑐱𑐣–𑐎𑐥𑐶𑐮𑐵 𑐳𑐶𑐬𑐥𑐵𑑅

𑐫𑐾𑑃- 𑐗𑐷 𑐥𑐸𑐔𑑅 𑐰𑐶𑐬𑐵𑐚𑐣𑐐𑐬𑑄 𑐥𑑂𑐬𑐟𑑂𑐫𑐾𑐎 𑐣𑐶𑐡𑑃𑐫𑑂 𑐕𑐎𑑂𑐰𑑅 𑐮𑑅𑐮𑑂𑐴𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 ‘𑐳𑐸𑐡𑐬𑑂𑐱𑐣–𑐎𑐥𑐶𑐮𑐵 𑐳𑐶𑐬𑐥𑐵𑑅’ 𑐠𑐸𑐐𑐸𑐳𑐷 𑐳𑐶𑐎𑑂𑐎𑐶𑐩 𑐣𑐾𑐰𑐵𑑅 𑐐𑐸𑐠𑐶, 𑐐𑐵𑐣𑑂𑐟𑑀𑐎𑐫𑐵𑐟 𑐮𑑅𑐮𑑂𑐴𑐵𑑅𑐐𑐸 𑐡𑐸 𑑋 𑐥𑐸𑐔𑑅𑐫𑐵 𑐐𑑂𑐰𑐳𑐵𑐮𑐫𑑂 𑐳𑐸𑐡𑐬𑑂𑐱𑐣 𑐎𑐥𑐶𑐮𑐵 𑐚𑑂𑐬𑐲𑑂𑐚𑐥𑐵𑐏𑐾𑑄 𑐮𑑅𑐮𑑂𑐴𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐄𑐐𑐸 𑐳𑐶𑐬𑐥𑐵𑑅 𑐣𑐾𑐰𑐵𑑅 𑐖𑐵𑐟𑐶, 𑐨𑐵𑐲𑐵, 𑐎𑐮𑐵, 𑐳𑑄𑐳𑑂𑐎𑐺𑐟𑐶 𑐔𑑂𑐰𑐣𑑂𑐴𑑂𑐫𑐵𑐎𑐾𑐐𑐸𑐮𑐶𑐳𑐾𑑄 𑐄𑐎𑐶𑐫𑐵 𑐳𑑄𑐬𑐎𑑂𑐲𑐞, 𑐰𑐶𑐎𑐵𑐳 𑐫𑐵𑐫𑐾𑐐𑐸 𑐖𑑂𑐫𑐵𑐫𑑂 𑐐𑐸𑐠𑐶𑑄 𑐧𑐶𑐫𑐵 𑐰𑐫𑐵𑐔𑑂𑐰𑑄𑐐𑐸 𑐫𑑀𑐐𑐡𑐵𑐣𑐫𑐵 𑐎𑐡𑐬 𑐫𑐵𑐳𑐾𑑄 𑐄𑐐𑐸 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑑅𑐐𑐸 𑐏𑑅𑑋

𑐰𑑄𑐐𑐸 𑐱𑐸𑐎𑑂𑐬𑐰𑐵𑑅 𑐰𑐶𑐬𑐵𑐚𑐣𑐐𑐬𑐫𑑂 𑐖𑐹𑐐𑐸 𑐕𑐐𑐹 𑐟𑑅𑐖𑐶𑐐𑐸 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐣𑐾𑐥𑐵𑑅𑐥𑐵𑐏𑐾𑑄 𑐗𑐵𑐫𑐵𑐡𑐷𑐩𑑂𑐴 𑐩𑐹𑐥𑐵𑐴𑐵𑑄 𑐥𑑂𑐬𑐡𑐾𑐱 𑐣𑑄. 𑑑𑐫𑐵 𑐩𑐸𑐏𑑂𑐫𑐩𑐣𑑂𑐟𑑂𑐬𑐷 𑐬𑐵𑐖𑐾𑐣𑑂𑐡𑑂𑐬𑐎𑐸𑐩𑐵𑐬 𑐬𑐵𑐃𑑄 𑐳𑐶𑐎𑑂𑐎𑐶𑐩 𑐣𑐾𑐰𑐵𑑅 𑐐𑐸𑐠𑐶𑐫𑐵 𑐣𑐵𑐫𑑅 𑐣𑐶𑐬𑑂𑐩𑐮𑐎𑐸𑐩𑐵𑐬 𑐥𑑂𑐬𑐢𑐵𑐣𑐫𑐵𑐟 𑐣𑐶𑐐𑐹 𑐮𑐏 𑐟𑐎𑐵 𑐡𑐵𑑄𑐮𑐶𑐳𑐾𑑄 𑐳𑐩𑑂𑐩𑐵𑐣 𑐥𑐟𑑂𑐬 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑐨𑐵𑐬𑐟𑐷𑐫 𑐥𑑂𑐬𑐵𑐣𑑂𑐟𑐫𑑂 𑐔𑑂𑐰𑐣𑐵𑑅 𑐣𑑄 𑐣𑐶𑐐𑐹 𑐡𑐱𑐎 𑐣𑑂𑐴𑑂𑐫𑐰𑑄𑑄𑐣𑐶𑐳𑐾𑑄 𑐠𑑅𑐐𑐸 𑐨𑐵𑐲𑐵, 𑐎𑐮𑐵, 𑐳𑐵𑐴𑐶𑐟𑑂𑐫, 𑐳𑑄𑐳𑑂𑐎𑐺𑐟𑐶𑐮𑐶𑐳𑐾𑑄 𑐥𑐴𑐶𑐔𑐵𑐣𑐫𑐵 𑐳𑑄𑐬𑐎𑑂𑐲𑐞 𑐫𑐵𑐫𑐾𑐐𑐮𑐶𑐂 𑐐𑐸𑐠𑐶𑑄 𑐩𑑂𑐴𑐶𑐟𑐵 𑐰𑐫𑐵𑐔𑑂𑐰𑑄𑐐𑐸 𑐫𑑀𑐐𑐡𑐵𑐣𑐫𑐵 𑐎𑐡𑐬 𑐫𑐵𑐳𑐾𑑄 𑐄𑐐𑐸 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋 𑐰𑑄𑐐𑐸 𑐣𑐷𑐣𑑂𑐫𑐵𑐡𑑃 𑐣𑑂𑐴𑑂𑐫𑐰𑐣𑐶𑐳𑐾𑑄 𑐎𑑂𑐬𑐶𑐫𑐵𑐱𑐷𑐮 𑐐𑐸𑐠𑐶𑑄 𑐣𑐾𑐰𑐵𑑅 𑐖𑐵𑐟𑐶, 𑐨𑐵𑐲𑐵, 𑐎𑐮𑐵, 𑐳𑑄𑐳𑑂𑐎𑐺𑐟𑐶𑐫𑐵 𑐳𑑄𑐬𑐎𑑂𑐲𑐞 𑐫𑐵𑐫𑐾𑐐𑐸 𑐮𑑂𑐫𑐵𑐏𑑄 𑐠𑐷𑐠𑐷 𑐖𑐵𑐟𑑂𑐬𑐵, 𑐥𑐬𑑂𑐰 𑐴𑐣𑐾𑐐𑐸 𑐣𑐵𑐥𑑄 𑐳𑐶𑐎𑑂𑐎𑐶𑐩 𑐖𑐶𑐮𑑂𑐮𑐵𑐣𑑂𑐫𑑄𑐎𑑄 𑐣𑑂𑐫𑑄𑐎𑐾𑐐𑐸 𑐖𑑂𑐫𑐵𑐫𑑂 𑐰𑐶𑐱𑐾𑐲 𑐫𑑀𑐐𑐡𑐵𑐣 𑐧𑐶𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑐰𑐵𑐳𑐾𑑄 𑐩𑐸𑐏𑑂𑐫𑐩𑐣𑑂𑐟𑑂𑐬𑐷 𑐬𑐵𑐃𑑄 𑐣𑐾𑐰𑐵𑑅 𑐳𑐩𑐸𑐡𑐵𑐫 𑐨𑐵𑐫𑑂𑐫𑐵 𑐩𑐵𑐢𑑂𑐫𑐩𑑄 𑐡𑐾𑐫𑑂𑐫𑐵 𑐴𑐬𑐾𑐎 𑐎𑑂𑐲𑐾𑐟𑑂𑐬𑐫𑑂 𑐠𑑅𑐐𑐸 𑐳𑐩𑐸𑐡𑐵𑐫𑐮𑐶𑐳𑐾 𑐟𑐳𑐎𑑄 𑐎𑑂𑐰𑐵𑐟𑐸𑐐𑐸 𑐳𑐩𑑂𑐧𑐣𑑂𑐢 𑐡𑐸𑐐𑐸 𑐢𑐵𑐳𑐾𑑄 𑐨𑐵𑐫𑑂𑐫𑐵 𑐳𑑄𑐬𑐎𑑂𑐲𑐞, 𑐳𑑄𑐰𑐡𑑂𑐬𑑂𑐢𑐣𑐫𑐵 𑐫𑐵𑐫𑐾𑐩𑐵𑑅𑐐𑐸 𑐏𑑃𑐫𑑂 𑐧𑑅 𑐧𑐶𑐫𑐵𑐡𑐶𑐮 𑑋

𑐐𑐸𑐠𑐶𑐫𑐵 𑐣𑐵𑐫𑑅 𑐥𑑂𑐬𑐢𑐵𑐣𑑄 𑐳𑐶𑐎𑑂𑐎𑐶𑐩 𑐳𑐬𑐎𑐵𑐬𑑄 𑐣𑐾𑐥𑐵𑐮𑐨𑐵𑐲𑐵 𑐩𑐵𑐣𑑂𑐫𑐟𑐵 𑐧𑐶𑐄𑐐𑐸 𑐣𑐵𑐥𑑄 𑐨𑐵𑐫𑑂 𑐳𑑄𑐬𑐎𑑂𑐲𑐞𑐫𑐵 𑐣𑐶𑑄𑐟𑐶𑑄 𑐣𑑄 𑐥𑑂𑐬𑐟𑐶𑐰𑐡𑑂𑐢 𑐡𑐸𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋
𑐖𑑂𑐫𑐵𑐗𑑂𑐰𑐮𑐫𑑂 𑐳𑐶𑐎𑑂𑐎𑐶𑐩 𑐳𑐬𑐎𑐵𑐬𑐫𑐵 𑐥𑐬𑑂𑐫𑐚𑐣 𑐰 𑐳𑑄𑐳𑑂𑐎𑐺𑐟𑐶𑐩𑐣𑑂𑐟𑑂𑐬𑐷 𑐏𑐶𑐣𑐸 𑐮𑐶𑐒𑑂𑐰𑐵 𑐮𑐶𑐩𑑂𑐧𑐸, 𑐳𑐶𑐬𑐥𑐵𑑅𑐫𑐵 𑐡𑐵𑐟𑐵 𑐳𑐸𑐡𑐬𑑂𑐱𑐣 𑐱𑑂𑐬𑐾𑐲𑑂𑐛, 𑐗𑐷 𑐥𑐸𑐔𑑅𑐫𑐵 𑐣𑐵𑐫𑑅 𑐴𑐬𑐶𑐧𑐴𑐵𑐡𑐸𑐬 𑐱𑑂𑐬𑐾𑐲𑑂𑐛, 𑐩𑐹𑐕𑑂𑐫𑐵𑐘𑑂𑐖𑐾 𑐳𑐸𑐬𑐾𑐱𑐮𑐵𑐮 𑐱𑑂𑐬𑐾𑐲𑑂𑐛, 𑐳𑐡𑐳𑑂𑐫 𑐳𑐔𑐶𑐰 𑐨𑐰𑐶𑐲 𑐱𑑂𑐬𑐾𑐲𑑂𑐛, 𑐣𑐾𑐰𑐵𑑅 𑐩𑐶𑐳𑐵 𑐡𑐧𑐹𑐫𑐵 𑐣𑐵𑐫𑑅 𑐬𑐱𑑂𑐩𑐶𑐮𑐵 𑐥𑑂𑐬𑐖𑐵𑐥𑐟𑐶𑑄 𑐣𑑄 𑐠𑑅𑐠𑑅𑐐𑐸 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋

𑐣𑐾𑐥𑐵𑐮𑐨𑐵𑐲𑐵 𑐳𑑄𑐬𑐎𑑂𑐲𑐞, 𑐥𑑂𑐬𑐰𑐡𑑂𑐬𑑂𑐢𑐣 𑐰 𑐳𑑄𑐰𑐡𑑂𑐬𑑂𑐢𑐣 𑐫𑐵𑐫𑐾𑐐𑐸 𑐖𑑂𑐫𑐵𑐫𑑂 𑐰𑐶𑐱𑐾𑐲 𑐫𑑀𑐐𑐡𑐵𑐣 𑐧𑐶𑐫𑐵𑐡𑐷𑐥𑐶𑑄 𑐰𑑂𑐫𑐎𑑂𑐟𑐶 𑐰 𑐏𑐮𑑅, 𑐥𑐸𑐔𑑅𑐫𑐵𑐟 𑐧𑐷𑐐𑐸 𑐮𑑂𑐫𑐵𑐏𑑄 𑐳𑐸𑐡𑐬𑑂𑐱𑐣 𑐱𑑂𑐬𑐾𑐲𑑂𑐛 𑐰 𑐎𑐥𑐶𑐮𑐵 𑐱𑑂𑐬𑐾𑐲𑑂𑐛𑑄 𑐳𑑂𑐰𑐣𑐵𑐡𑐷𑐐𑐸 𑑒𑑐 𑐐𑐹 𑐮𑐏𑐫𑐵 𑐀𑐎𑑂𑐲𑐫𑐵 𑐎𑑀𑐲𑐥𑐵𑐏𑐾𑑄 𑐣𑐶𑐡𑑃𑐫𑑂 𑐕𑐎𑑂𑐰𑑅 𑐠𑐸𑐐𑐸 𑐳𑐶𑐬𑐥𑐵𑑅 𑐧𑐷𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋𑐳𑐶𑐎𑑂𑐎𑐶𑐩 𑐣𑐾𑐰𑐵𑑅 𑐐𑐸𑐠𑐶𑐫𑐵𑐟 𑐳𑐸𑐡𑐬𑑂𑐱𑐣–𑐎𑐥𑐶𑐮𑐵 𑐳𑐶𑐬𑐥𑐵𑑅

सिक्किम नेवाः गुथियात सुदर्शन–कपिला सिरपाः