𑐳𑐵𑑄𑐳𑑂𑐎𑐺𑐟𑐶𑐎 𑐔𑐾𑐟𑐣𑐵 𑐧𑑂𑐰𑐮𑑄𑐎𑐹𑐐𑐸 𑐣𑐾𑐥𑐵𑐮𑐨𑐵𑐲𑐵 𑐱𑐶𑐎𑑂𑐲𑐵

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐡𑐸𑐣𑐾𑐫𑐵 𑐳𑑂𑐎𑐸𑐮𑐫𑑂 𑐳𑑂𑐠𑐵𑐣𑐷𑐫 𑐨𑐵𑐫𑑂 𑐎𑐠𑑄 𑐣𑐾𑐥𑐵𑐮𑐨𑐵𑐲𑐵 𑐣𑑄 𑐧𑑂𑐰𑑄𑐎𑐾𑐐𑐸 𑐀𑐣𑐶𑐰𑐵𑐬𑑂𑐫 𑐫𑐵𑐫𑐾 𑐢𑐸𑑄𑐎𑐵𑑅 𑐠𑐸𑐎𑐶𑐫𑐵 𑐥𑑂𑐬𑐨𑐵𑐰 𑐱𑐿𑐎𑑂𑐲𑐶𑐎 𑐎𑑂𑐲𑐾𑐟𑑂𑐬𑐫𑑂 𑐖𑐎 𑐳𑐷𑐩𑐶𑐟 𑐩𑐖𑐸𑐳𑐾 𑐳𑐵𑑄𑐳𑑂𑐎𑐺𑐟𑐶𑐎, 𑐨𑐵𑐲𑐶𑐎, 𑐳𑐵𑐴𑐶𑐟𑑂𑐫𑐶𑐎 𑐏𑑂𑐫𑐮𑐫𑑂 𑐣𑑄 𑐧𑐸𑐮𑐸𑐴𑐸𑑄 𑐏𑐣𑐾 𑐡𑐫𑐵 𑐰𑑅𑐐𑐸 𑐡𑐸 𑑋 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑑒𑑓 𑐰𑐜𑐵𑐫𑐵 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐔𑐶𑐣𑐵𑐏𑑃 𑐰 𑐔𑑂𑐰𑐏𑑃 𑐢𑐾𑑄𑐢𑐾𑑄𑐧𑐮𑑂𑐮𑐵𑐏𑐫𑑂 𑐠𑐸𑐎𑐶𑐫𑐵 𑐧𑐵𑑄𑐮𑐵𑑅𑐐𑐸 𑐮𑐶𑐔𑑂𑐰𑑅 𑐏𑐣𑐾 𑐡𑐸𑐐𑐸 𑐡𑐸 𑑋 𑐰𑐬𑐶𑐲𑑂𑐛 𑐧𑐵𑐮𑐳𑐵𑐴𑐶𑐟𑑂𑐫𑐎𑐵𑐬 𑐱𑐵𑐣𑑂𑐟𑐡𑐵𑐳 𑐩𑐵𑐣𑐣𑑂𑐢𑐬𑐫𑐵 𑐮𑐸𑐩𑑄𑐟𑐶𑐂 𑐖𑐹𑐐𑐸 𑐳𑑂𑐰𑐎𑑂𑐰𑑅𑐐𑐸 𑐔𑐶𑐣𑐵𑐏𑑃 𑐰 𑐔𑑂𑐰𑐏𑑃 𑐢𑐾𑑄𑐢𑐾𑑄𑐧𑐮𑑂𑐮𑐵𑐏𑐫𑑂 𑐫𑐎𑑂𑐰 𑐴𑐾 𑐩𑐳𑑂𑐟𑐫𑑂𑐳𑑄 𑐣𑐾𑐥𑐵𑐮𑐨𑐵𑐲𑐵 𑐔𑐶𑐣𑐵𑐏𑑃 𑐰 𑐔𑑂𑐰𑐏𑑃 𑐎𑐫𑐵𑑅 𑐧𑑂𑐰𑐟𑐶 𑐎𑐵𑐮 𑑋 𑐄𑐩𑐶𑐳𑑄 𑐔𑑂𑐰𑐫𑐾 𑐐𑐸 𑐖𑐎 𑐫𑐵𑑅𑐐𑐸 𑐩𑐏𑐸, 𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐴𑑂𑐫𑐂𑐥𑐸𑐎 𑐣𑐾 𑐰𑐵𑑅 𑐨𑐵𑐳𑑄 𑐧𑑂𑐰𑐣𑐵𑑅 𑐣𑑄 𑐣𑑂𑐫𑑄𑐎𑐮 𑑋 𑐀𑐮𑐾 𑐄𑐩𑐶𑐳𑑄 𑐔𑑂𑐰𑑅𑐐𑐸 𑐬𑐔𑐣𑐵 𑐣𑐾𑐰𑐵𑑅 𑐨𑐵𑐳𑑄 𑐖𑐎 𑐔𑑂𑐰𑑅𑐐𑐸 𑐩𑐏𑐸, 𑐳𑑂𑐰𑐣𑐶𑐐𑑅𑐫𑐵 𑐳𑑄𑐳𑑂𑐎𑐺𑐟𑐶, 𑐳𑐩𑑂𑐥𑐡𑐵𑐫𑐵 𑐧𑐵𑐬𑐾 𑐔𑑂𑐰𑑅𑐐𑐸 𑐡𑐸 𑑋

𑐩𑐳𑑂𑐟𑐫𑑂𑐳𑑄 𑐠𑐸𑐎𑐠𑑄 𑐣𑐾𑐰𑐵𑑅 𑐨𑐵𑐳𑑄 𑐔𑑂𑐰𑐫𑐵𑐴𑑅𑐐𑐸 𑐱𑐶𑐎𑑂𑐲𑐵 𑐧𑑂𑐰𑐣𑐵𑐴𑑅𑐐𑐸 𑐢𑐫𑐵𑐐𑐸 𑐣𑐾𑐰𑐵𑑅 𑐨𑐵𑐫𑑂 𑐳𑑄𑐬𑐎𑑂𑐲𑐞𑐫𑐵 𑐣𑐶𑑄𑐟𑐶𑑄 𑐖𑐎 𑐩𑐏𑐸 𑐠𑐣𑐫𑐵 𑐳𑑄𑐳𑑂𑐎𑐺𑐟𑐶 𑐳𑑄𑐳𑑂𑐎𑐵𑐬 𑐳𑑄𑐬𑐎𑑂𑐲𑐞𑐫𑐵 𑐣𑐶𑑄𑐟𑐶𑑄 𑐟𑐳𑐎𑑄 𑐩𑐴𑐟𑑂𑐰𑐥𑐹𑐬𑑂𑐞 𑐏𑑅 𑑋 𑐳𑑂𑐎𑐸𑐮𑐳𑑂𑐟𑐬𑐫𑑂 𑐴𑐾 𑐣𑐾𑐰𑐵𑑅 𑐨𑐵𑐳𑑄 𑐧𑑂𑐰𑑄𑐎𑐾𑐐𑐸 𑐳𑐸𑐬𑐸 𑐫𑐵𑐫𑐾𑐰𑑄 𑐨𑐵𑐫𑑂‌𑐫𑐵 𑐳𑑄𑐬𑐎𑑂𑐲𑐞𑐫𑐵𑐟 𑐳𑑄𑐳𑑂𑐠𑐵𑐐𑐟 𑐁𑐢𑐵𑐬 𑐧𑐶𑐄𑐐𑐸 𑐡𑐸 𑑋 𑐕𑐐𑐹 𑐂𑐮𑐫𑑂 𑐥𑐘𑑂𑐔𑐵𑐫𑐟 𑐳𑐬𑐎𑐵𑐬𑑄 𑐣𑐵𑐮𑐵𑐎𑐵𑑅𑐐𑐸 𑐊𑐎 𑐨𑐵𑐲𑐵 𑐊𑐎 𑐣𑐷𑐟𑐶𑑄 𑐫𑐵𑐣𑐵𑑅 𑐧𑐸𑐮𑐸𑐴𑐸𑑄 𑐕𑐾𑑃𑐫𑑂 𑐕𑐾𑑃𑐫𑑂 𑐟𑐎𑑄 𑐣𑑂𑐰𑐰𑐵𑐫𑐾𑐐𑐸 𑐟𑑂𑐰𑑅𑐟𑐵𑑅𑐴𑑅𑐐𑐸 𑐣𑐾𑐥𑐵𑐮𑐨𑐵𑐲𑐵 𑐁𑑅 𑐰𑐶𑐡𑑂𑐫𑐵𑐮𑐫𑐫𑐵 𑐥𑐵𑐛𑐫𑐎𑑂𑐬𑐩𑐫𑑂 𑐴𑐾 𑐡𑐸𑐠𑑂𑐫𑐵𑐎𑐾 𑐰𑑄 𑐍𑐥𑐔𑐵𑐬𑐶𑐎 𑐬𑐸𑐥𑑄 𑐱𑐿𑐎𑑂𑐲𑐶𑐎 𑐳𑑂𑐟𑐬𑐫𑑂 𑐕𑑂𑐫𑐮𑐵𑐧𑐸𑐮𑐵𑐫𑑂 𑐰𑑅𑐐𑐸 𑐡𑐸 𑑋 𑐠𑐸𑐎𑐶𑑄 𑐣𑑂𑐴𑐹𑐥𑐸𑐳𑑂 𑐟𑐵𑐫𑐵𑐟 𑐨𑐵𑐲𑐵𑐥𑑂𑐬𑐟𑐶 𑐖𑐶𑐩𑑂𑐩𑐾𑐰𑐵𑐬𑐷 𑐰 𑐐𑐬𑑂𑐰 𑐧𑑀𑐢 𑐫𑐵𑐎𑐵𑐧𑐶𑐄𑐐𑐸 𑐡𑐸 𑑋

𑐧𑐴𑐸𑐨𑐵𑐲𑐶𑐎 𑐳𑐩𑐵𑐖𑐫𑑂 𑐕𑐐𑐹 𑐖𑐎 𑐨𑐵𑐲𑐵𑐫𑐵𑐟 𑐥𑑂𑐬𑐵𑐠𑐩𑐶𑐎𑐟𑐵 𑐧𑐷𑐐𑐸 𑐩𑐏𑐸, 𑐳𑑂𑐠𑐵𑐣𑐷𑐫 𑐨𑐵𑐫𑑂‌𑐫𑐵𑐟 𑐣𑑄 𑐳𑐩𑑂𑐩𑐵𑐣𑐖𑐣𑐎 𑐠𑐵𑐫𑑂 𑐧𑐷𑐩𑐵𑑅 𑑋 𑐫𑐾𑑃𑐫𑐵 𑐳𑑂𑐎𑐸𑐮𑐫𑑂 𑐳𑑂𑐠𑐵𑐣𑐷𑐫 𑐨𑐵𑐫𑑂 𑐣𑐾𑐥𑐵𑐮𑐨𑐵𑐲𑐵 𑐮𑐵𑐐𑐸 𑐫𑐵𑐫𑐾𑐐𑐸 𑐣𑐶𑐬𑑂𑐞𑐫𑑄 𑐟𑐵𑑅𑐃 𑐣𑑂𑐴𑑂𑐫𑐰𑐣𑐶𑐳𑐾𑑄 𑐄𑐥𑐾𑐎𑑂𑐲𑐶𑐟 𑐖𑐸𑐫𑐵𑐔𑑂𑐰𑑄𑐐𑐸 𑐳𑑂𑐠𑐵𑐣𑐷𑐫 𑐨𑐵𑐫𑑂‌𑐫𑐵𑐟 𑐥𑐸𑐣𑑅𑐖𑐷𑐰𑐣 𑐧𑐷𑐟 𑐟𑐵𑑅𑐮𑐵𑑅𑐐𑐸 𑐡𑐸 𑑋 𑐳𑑂𑐎𑐸𑐮𑐫𑑂 𑐳𑑂𑐠𑐵𑐣𑐷𑐫 𑐨𑐵𑐫𑑂 𑐮𑐵𑐐𑐸 𑐫𑐵𑑅𑐐𑐸 𑐨𑐵𑐲𑐶𑐎 𑐀𑐨𑑂𑐫𑐵𑐳𑐫𑐵 𑐣𑐶𑑄𑐟𑐶𑑄 𑐖𑐎 𑐩𑐏𑐸 𑐳𑐵𑑄𑐳𑑂𑐎𑐺𑐟𑐶𑐎 𑐥𑐸𑐣𑐬𑑂𑐖𑐵𑐐𑐬𑐞𑐫𑐵 𑐣𑐶𑑄𑐟𑐶𑑄 𑐣𑑄 𑐏𑑅 𑑋 𑐠𑑂𑐰 𑐀𑐨𑑂𑐫𑐵𑐳𑑄 𑐫𑐾𑑃 𑐩𑐴𑐵𑐣𑐐𑐬𑐫𑐵𑐟 𑐠𑑅𑐐𑐸 𑐠𑐵𑐫𑑂‌𑐫𑐵 𑐩𑑁𑐮𑐶𑐎𑐟𑐵 𑐰 𑐥𑐴𑐶𑐔𑐵𑐣 𑐳𑑄𑐬𑐎𑑂𑐲𑐞 𑐫𑐵𑐫𑐾𑐟 𑐫𑐎𑑂𑐰 𑐐𑑂𑐰𑐵𑐴𑐵𑐮𑐶 𑐖𑐹𑐐𑐸 𑐡𑐸 𑑋 𑐣𑐾𑐰𑐵𑑅 𑐨𑐵𑐳𑑄 𑐳𑑂𑐠𑐵𑐣𑐷𑐫 𑐳𑑄𑐳𑑂 𑐎𑐺𑐟𑐶 𑐧𑐵𑐬𑐾 𑐧𑑂𑐰𑐣𑐾 𑐏𑑄𑐐𑐸𑐮𑐶𑑄 𑐩𑐳𑑂𑐟𑐫𑑂𑐟 𑐳𑑄𑐳𑑂𑐎𑐺𑐟𑐶 𑐥𑑂𑐬𑐟𑐶 𑐔𑐾𑐟𑐣𑐵 𑐧𑐮𑑂𑐮𑐵𑑅𑐐𑐸 𑐡𑐸, 𑐐𑐸𑐎𑐶𑑄 𑐨𑐰𑐶𑐲𑑂𑐫𑐫𑑂 𑐳𑐩𑑂𑐥𑐡𑐵 𑐳𑑄𑐬𑐎𑑂𑐲𑐞 𑐰 𑐠𑐣𑐫𑐵 𑐩𑑁𑐮𑐶𑐎 𑐳𑑄𑐳𑑂𑐎𑐺𑐟𑐶𑐫𑐵𑐟 𑐣𑐶𑐬𑐣𑑂𑐟𑐬𑐟𑐵 𑐧𑐷𑐟 𑐫𑐎𑑂𑐰 𑐴𑐾 𑐐𑑂𑐰𑐵𑐴𑐵𑐮𑐶 𑐫𑐵𑐂 𑐢𑐫𑐵𑐐𑐸 𑐰𑐶𑐱𑑂𑐰𑐵𑐳 𑐫𑐵𑐫𑐾 𑐦𑐂 𑑋