‘𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫 𑐣𑑄 𑐥𑑂𑐬𑐟𑐶𑐳𑑂𑐥𑐬𑑂𑐢𑐷 𑐖𑐸𑐂𑐩𑐵𑑅’

𑐫𑐾𑑃 – 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑐾𑐫𑐬 𑐰𑐶𑐡𑑂𑐫𑐵 𑐳𑐸𑐣𑑂𑐡𑐬 𑐱𑐵𑐎𑑂𑐫𑑄 𑐩𑐴𑐵𑐣𑐐𑐬 𑐡𑐸𑐣𑐾𑐫𑐵 𑐳𑑂𑐎𑐸𑐮𑐫𑐵 𑐥𑐵𑐛𑑂𑐫𑐎𑑂𑐬𑐩 𑐳𑑂𑐰𑐣𑐶𑐐𑑅𑐣𑑂𑐫𑑄𑐎𑑄𑐫𑐵 𑐎𑐮𑐵–𑐳𑑄𑐳𑑂𑐎𑐺𑐟𑐶 𑐡𑐸𑐠𑑂𑐫𑐵𑐎𑐵𑑅 𑐰𑐶𑐎𑐵𑐳 𑐫𑐵𑐣𑐵𑐔𑑂𑐰𑐣𑐵𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐡𑐸 𑑋 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐡𑐾𑐫𑑂𑐫𑐵 𑐴𑐾 𑐳𑑄𑐑𑐷𑐫 𑐬𑐵𑐖𑐢𑐵𑐣𑐷𑐂 𑐮𑐵𑐣𑐵𑐔𑑂𑐰𑑄𑐐𑐸 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐖𑐹𑐐𑐸𑐮𑐶𑑄 𑐳𑑂𑐰𑐣𑐶𑐐𑑅𑐫𑐵𑐟 𑐴𑐾 𑐡𑐸𑐠𑑂𑐫𑐵𑐎𑐵𑑅 𑐥𑐵𑐛𑑂𑐫𑐎𑑂𑐬𑐩 𑐟𑐫𑐵𑐬 𑐫𑐵𑐫𑐾𑐐𑐸 𑐏𑑃 𑐰𑐫𑑂𑐎𑐮𑑄 𑐢𑐫𑐵𑐡𑐷𑐐𑐸 𑐏𑑅 𑑋

𑐰𑐶𑐡𑑂𑐫𑐵𑐮𑐫 𑐰𑑂𑐫𑐰𑐳𑑂𑐠𑐵𑐥𑐎 𑐳𑐩𑐵𑐖 𑐣𑐾𑐥𑐵𑐮𑐫𑐵 𑐩𑑂𑐴𑐶𑐐𑑅 𑐖𑐹𑐐𑐸 𑐣𑐶𑐎𑑂𑐰𑑅𑐐𑐸 𑐰 𑐳𑑂𑐰𑐎𑑂𑐰𑑅𑐐𑐸 𑐳𑐵𑐢𑐵𑐬𑐞 𑐳𑐨𑐵𑐫𑐵 𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐶𑐳𑐾𑑄 𑐩𑐾𑐫𑐬 𑐱𑐵𑐎𑑂𑐫𑑄 𑐠𑑂𑐰 𑐏𑑃 𑐢𑐫𑐵𑐡𑐷𑐐𑐸 𑐏𑑅 𑑋 𑐰𑐫𑑂𑐎𑐮𑑄 𑐠𑐸𑐐𑐸 𑐁𑐬𑑂𑐠𑐶𑐎 𑐡𑑃𑐫𑐵 𑐡𑐸𑐣𑐾 𑐫𑑃𑐾 𑐩𑐴𑐵𑐣𑐐𑐬 𑐡𑐸𑐣𑐾 𑐮𑐵𑑅𑐐𑐸 𑑙𑑑 𑐐𑐸𑐮𑐶𑑄 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫 𑐳𑐩𑐵𑐣 𑐖𑐸𑐂𑐐𑐸 𑐕𑐐𑐹 𑐴𑐾 𑐬𑑄𑐐𑑄 𑐕𑐶𑐂𑐐𑐸 𑐏𑑃 𑐣𑑄 𑐢𑐫𑐵𑐡𑐷𑐐𑐸 𑐡𑐸 𑑋 𑐀𑐠𑐾𑐴𑐾 𑐰𑐫𑑂𑐎𑐮𑑄 𑐳𑐵𑐩𑐸𑐡𑐵𑐫𑐶𑐎 𑐳𑑂𑐎𑐸𑐮𑐫𑑂 𑐧𑑂𑐰𑐣𑐷𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑑄 𑐩𑑂𑐴𑐶𑐟𑐷𑐐𑐸 𑐠𑐵𑐫𑑂 𑐳𑐸𑐢𑐵𑐬 𑐫𑐵𑐫𑐾𑐟, 𑐳𑑂𑐎𑐸𑐮 𑐡𑐸𑐣𑐾 𑐟𑑂𑐰𑐣𑐾𑐐𑐸 𑐮𑑅𑐫𑐵 𑐰𑑂𑐫𑐰𑐳𑑂𑐠𑐶𑐟 𑐫𑐵𑐫𑐾𑐟, 𑐔𑑅𑐧𑐶 𑐡𑐫𑐾𑐎𑐾𑐟 𑐣𑑄 𑐠𑑂𑐰 𑐁𑐬𑑂𑐠𑐶𑐎 𑐡𑑃𑐫𑑂 𑐧𑐖𑐾𑐚 𑐦𑑂𑐫𑐵𑐣𑐵𑐐𑐸 𑐏𑑃 𑐣𑑄 𑐢𑐫𑐵𑐡𑐷𑐐𑐸 𑐡𑐸 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐣𑐵𑐡𑐶𑐳𑐾𑑄 𑐰𑐫𑑂𑐎𑐮𑑄 𑐱𑐶𑐎𑑂𑐲𑐎𑐟𑐫𑑂 𑐡𑐬𑐧𑐣𑑂𑐡𑐷 𑐳𑐩𑑂𑐧𑐣𑑂𑐢𑐷 𑐰𑐫𑐵𑐔𑑂𑐰𑑄𑐐𑐸 𑐳𑐩𑐳𑑂𑐫𑐵 𑐖𑑂𑐫𑑄𑐎𑐾𑐐𑐸 𑐣𑐶𑑄𑐟𑐶𑑄 𑐩𑐴𑐵𑐣𑐐𑐬𑐫𑐵 𑐮𑐐𑐾 𑐖𑐸𑐫𑐵𑐔𑑂𑐰𑑄𑐐𑐸, 𑐱𑐶𑐎𑑂𑐲𑐎𑐟𑐫𑑂𑐟 𑐂𑐮𑐫𑑂 𑐟𑐮𑐧 𑐣𑐶𑐎𑐵𑐳𑐵 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐩𑐣𑑂𑐟𑑂𑐬𑐵𑐮𑐫𑑄 𑐢𑑂𑐫𑐧𑐵 𑐕𑑂𑐰𑐫𑐵 𑐩𑐴𑑅𑐳𑐵𑑄 𑐩𑐾𑐠𑐵𑐳𑑄𑐳𑐵𑑄 𑐰𑑂𑐫𑐰𑐳𑑂𑐠𑐵𑐥𑐣 𑐫𑐵𑐣𑐵𑐔𑑂𑐰𑐣𑐵𑐐𑐸 𑐏𑑃 𑐣𑑄 𑐢𑐫𑐵𑐡𑐷𑐐𑐸 𑐏𑑅 𑑋 𑐟𑐮𑐧 𑐨𑐔𑐵 𑐮𑐶𑐧𑐵𑐎 𑐰𑐮 𑐀𑐠𑐰𑐵 𑐰𑐶𑐡𑑂𑐫𑐵𑐮𑐫𑐫𑑂 𑐕𑐸𑑄 𑐳𑐩𑐳𑑂𑐫𑐵 𑐰𑐮 𑐢𑐎𑐵𑑅 𑐱𑐶𑐎𑑂𑐲𑐎𑐟 𑐣𑐶𑐬𑐵𑐱 𑐖𑐸𑐂𑐩𑐖𑐶𑐄 𑐢𑐵𑐳𑐾𑑄 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮, ‘𑐱𑐶𑐎𑑂𑐲𑐎𑐟 𑐴𑐾 𑐣𑐶𑐬𑐵𑐱 𑐖𑐸𑐮 𑐢𑐵𑑅𑐳𑐵 𑐱𑐶𑐎𑑂𑐲𑐵 𑐏𑑂𑐫𑑅 𑐴𑐾 𑐢𑐬𑐵𑐳𑐵𑐫𑐷 𑐖𑐸𑐂, 𑐄𑐎𑐶𑑄 𑐁𑐱𑐵𑐰𑐵𑐡𑐷 𑐖𑐸𑐫𑐵 𑐖𑑂𑐫𑐵 𑐫𑐵𑐫𑐾𑐩𑐵𑑅 𑑋 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐣𑑄 𑐰𑐶𑐡𑑂𑐫𑐵𑐮𑐫 𑐳𑐸𑐢𑐵𑐬𑐫𑐵 𑐖𑑂𑐫𑐵𑐫𑑂 𑐣𑑂𑐴𑑂𑐫𑐵𑐫𑐾 𑐰𑐣𑐾𑐟 𑐟𑐫𑐵𑐬 𑐡𑐸 𑑋’
𑐀𑐠𑐾𑐴𑐾 𑐰𑐫𑑂𑐎𑐮𑑄 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫𑐫𑑂 𑐣𑑄 𑐥𑑂𑐬𑐟𑐶𑐳𑑂𑐥𑐬𑑂𑐢𑐷 𑐖𑐸𑐂𑐩𑐵𑑅𑐐𑐸 𑐏𑑃 𑐢𑐵𑐳𑐾𑑄 𑐢𑐫𑐵𑐡𑐶𑐮, ‘𑐣𑐶𑐖𑐷 𑐳𑑂𑐎𑐸𑐮𑐫𑐵𑐟 𑐣𑐶𑐲𑐾𑐢 𑐫𑐵𑐫𑐾𑐐𑐸 𑐩𑐏𑐸𑐎𑐶 𑐳𑐵𑐩𑐸𑐡𑐵𑐫𑐶𑐎 𑐳𑑂𑐎𑐸𑐮 𑐥𑑂𑐬𑐟𑐶𑐳𑑂𑐥𑐬𑑂𑐢𑐷 𑐖𑐸𑐂𑐩𑐵𑑅 𑑋 𑐠𑑂𑐰 𑐖𑑂𑐫𑐵 𑐳𑐬𑐎𑐵𑐬, 𑐩𑐣𑑂𑐟𑑂𑐬𑐷 𑐰𑐵 𑐩𑐾𑐫𑐬𑑄 𑐖𑐎 𑐫𑐵𑐣𑐵𑑅 𑐖𑐸𑐂𑐐𑐸 𑐖𑑂𑐫𑐵 𑐩𑐏𑐸 𑑋 𑐠𑐸𑐎𑐶𑐫𑐵 𑐣𑐶𑑄𑐟𑐶𑑄 𑐥𑑂𑐬𑐢𑐵𑐣𑐵𑐢𑑂𑐫𑐵𑐥𑐎, 𑐱𑐶𑐎𑑂𑐲𑐎𑐥𑐶𑑄 𑐣𑑄 𑐖𑐶𑐩𑑂𑐩𑐾𑐰𑐵𑐬 𑐖𑐸𑐂𑐩𑐵𑑅 𑑋’

𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐣𑐵𑐡𑐶𑐳𑐾𑑄 𑐳𑐩𑐵𑐖𑐫𑐵 𑐀𑐢𑑂𑐫𑐎𑑂𑐲 𑐬𑐵𑐖𑐾𑐱𑑂𑐰𑐬𑐩𑐵𑐣 𑐱𑑂𑐬𑐾𑐲𑑂𑐛𑑄 𑐳𑐩𑐵𑐖𑑄 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐠𑐷𑐠𑐷 𑐖𑑂𑐫𑐵𑐫𑐵 𑐧𑐵𑐬𑐾 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋 𑐠𑑂𑐰 𑐗𑑂𑐰𑐮𑐫𑑂 𑐰𑐫𑑂𑐎𑐮𑑄 𑐱𑐶𑐎𑑂𑐲𑐎 𑐡𑐬𑐧𑐣𑑂𑐡𑐷 𑐩𑐶𑐮𑐾 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐳𑐸𑐫𑐵𑐟𑑄 𑐩𑐬𑑂𑐎𑐵 𑐩𑐖𑐸𑐂 𑐎𑐠𑑄 𑐰𑑂𑐫𑐰𑐳𑑂𑐠𑐵𑐥𑐣 𑐫𑐵𑐫𑐾𑐟 𑐳𑐩𑐵𑐖𑑄 𑐳𑐩𑐣𑑂𑐰𑐫𑐎𑐵𑐬𑐷 𑐨𑐹𑐩𑐶𑐎𑐵 𑐩𑑂𑐴𑐶𑐟𑐵 𑐔𑑂𑐰𑐣𑐵𑐐𑐸 𑐏𑑃 𑐢𑐫𑐵𑐡𑐶𑐮 𑑋 𑐀𑐠𑐾𑐴𑐾 𑐰𑐫𑑂𑐎𑐮𑑄 𑐱𑐶𑐎𑑂𑐲𑐎𑐟𑐫𑑂𑐟 𑐠𑐷𑐠𑐷 𑐟𑐵𑐮𑐶𑐩 𑐧𑐷𑐐𑐸, 𑐰𑐶𑐡𑑂𑐫𑐵𑐮𑐫 𑐡𑐠𑐸𑐂 𑐳𑐸𑐔𑑄 𑐎𑐵𑐮𑐧𑐶𑐮 𑐫𑐵𑐫𑐾𑐐𑐸, 𑐱𑐶𑐎𑑂𑐲𑐎𑐥𑐶𑑄𑐟 𑐠𑐷𑐠𑐷 𑐳𑑂𑐎𑐸𑐮𑐫𑑂 𑐀𑐢𑑂𑐫𑐫𑐣 𑐨𑑂𑐬𑐩𑐞𑐫𑑂 𑐫𑑄𑐎𑐵𑑅 𑐳𑐴𑐮𑐴 𑐧𑑂𑐫𑐵𑐎𑐾𑐐𑐸, 𑐀𑐣𑐸𑐨𑐰 𑐎𑐵𑐮𑐧𑐶𑐮 𑐫𑐵𑐫𑐾𑐐𑐸 𑐖𑑂𑐫𑐵 𑐳𑐩𑐵𑐖𑐥𑐵𑐏𑐾𑑄 𑐫𑐵𑐣𑐵 𑐰𑐫𑐵𑐔𑑂𑐰𑐣𑐵𑐐𑐸 𑐏𑑃 𑐢𑐫𑐵𑐡𑐶𑐮 𑑋 𑐀𑐢𑑂𑐫𑐎𑑂𑐲 𑐱𑑂𑐬𑐾𑐲𑑂𑐛𑑄 𑐳𑑄𑐰𑐶𑐢𑐵𑐣 𑐎𑐠𑑄 𑐁𑑅 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫𑐟 𑐳𑑂𑐠𑐵𑐣𑐷𑐫 𑐟𑐴𑐫𑐵 𑐩𑐵𑐟𑐴𑐟𑐫𑑂 𑐰𑐫𑐾𑐢𑐸𑑄𑐎𑐹𑐐𑐸𑐮𑐶𑑄 𑐠𑐷𑐠𑐷 𑐳𑑂𑐠𑐵𑐣𑐷𑐫 𑐟𑐴𑐫𑑂 𑐳𑐩𑐵𑐖𑐫𑐵 𑐃𑐎𑐵𑐂𑐟 𑐐𑐛𑐣 𑐫𑐵𑐣𑐵 𑐰𑐣𑐾𑐐𑐸 𑐏𑑃 𑐣𑑄 𑐢𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐮𑐳𑐎𑐸𑐳 𑐫𑐵𑐳𑐾𑑄 𑐳𑐩𑐵𑐖𑐫𑐵 𑐄𑐥𑐵𑐢𑑂𑐫𑐎𑑂𑐲 𑐎𑐺𑐲𑑂𑐞𑐎𑐸𑐩𑐵𑐬 𑐱𑑂𑐬𑐾𑐲𑑂𑐛𑑄 𑐱𑐶𑐎𑑂𑐲𑐎𑐟 𑐰𑐶𑐳𑑂𑐠𑐵𑐥𑐶𑐟 𑐖𑐸𑐫𑐵 𑐰𑐣𑐵𑐔𑑂𑐰𑑄𑐐𑐸𑐮𑐶𑑄 𑐰𑐶𑐡𑑂𑐫𑐵𑐮𑐫𑐫𑑂 𑐱𑐶𑐎𑑂𑐲𑐎𑐟𑐫𑑂 𑐴𑐾 𑐳𑐩𑐳𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐢𑐵𑐳𑐾𑑄 𑐠𑐸𑐎𑐶𑐫𑐵𑐟 𑐰𑑂𑐫𑐰𑐳𑑂𑐠𑐶𑐟 𑐫𑐵𑐫𑐾𑐟 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐢𑑂𑐫𑐵𑐣 𑐧𑐷𑐩𑐵𑑅𑐐𑐸 𑐏𑑃 𑐢𑐫𑐵𑐡𑐶𑐮 𑑋 𑐀𑐠𑐾𑐴𑐾 𑐖𑐣𑐎𑐮𑑂𑐫𑐵𑐞 𑐩𑐵𑐰𑐶𑐫𑐵 𑐥𑑂𑐬𑐢𑐵𑐣𑐵𑐢𑑂𑐫𑐵𑐥𑐎 𑐎𑐸𑐩𑐵𑐬𑐷 𑐎𑐩𑐮𑐵 𑐬𑐵𑐃𑑄 𑐠𑑅𑐥𑐶𑐣𑐶𑐐𑐸 𑐳𑑂𑐎𑐸𑐮𑐫𑑂 𑐗𑐶𑑄𑐕𑐳𑑅𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷 𑐡𑐸, 𑐟𑐬 𑐱𑐶𑐎𑑂𑐲𑐎 𑐡𑐬𑐧𑐣𑑂𑐡𑐷 𑐩𑐸𑐎𑑂𑐎𑑄 𑐣𑐷𑐣𑐶𑐩𑑂𑐴 𑐖𑐎 𑐡𑐸 𑐢𑐫𑐵𑐡𑐶𑐳𑐾𑑄 𑐫𑐎𑑂𑐰 𑐰𑐶𑐡𑑂𑐫𑐵𑐬𑑂𑐠𑐷 𑐡𑐸𑐐𑐸 𑐳𑑂𑐎𑐸𑐮𑐫𑑂 𑐟𑐳𑐎𑑄 𑐩𑑂𑐴𑑀 𑐖𑐎 𑐱𑐶𑐎𑑂𑐲𑐎 𑐡𑐬𑐧𑐣𑑂𑐡𑐷 𑐡𑐸𑐐𑐸𑐮𑐶𑑄 𑐀𑐢𑑂𑐫𑐵𑐥𑐣𑐫𑑂 𑐐𑐸𑐞𑐳𑑂𑐟𑐬𑐟𑐵 𑐴𑐫𑐾𑐟 𑐠𑐵𑐎𑐸𑐫𑐵𑐔𑑂𑐰𑑄𑐐𑐸 𑐏𑑃 𑐢𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐱𑐶𑐎𑑂𑐲𑐵 𑐰𑐶𑐨𑐵𑐐𑐫𑐵 𑐀𑐢𑐶𑐎𑐺𑐟 𑐟𑐵𑐬𑐵𑐥𑐟𑐶 𑐏𑐬𑐾𑐮, 𑐱𑐶𑐎𑑂𑐲𑐵 𑐰𑐶𑐎𑐵𑐳 𑐟𑐠𑐵 𑐳𑐩𑐣𑑂𑐰𑐫 𑐳𑐩𑐶𑐟𑐶𑐫𑐵 𑐣𑐣𑑂𑐡𑐮𑐵𑐮 𑐥𑑁𑐜𑐾𑐮, 𑐫𑐾𑑃 𑐩𑐣𑐥𑐵 𑑒𑑐 𑐰𑐜𑐵 𑐀𑐢𑑂𑐫𑐎𑑂𑐲 𑐬𑐵𑐖𑐾𑐣𑑂𑐡𑑂𑐬 𑐩𑐵𑐣𑐣𑑂𑐢𑐬𑑄 𑐣𑑄 𑐣𑑂𑐰𑐰𑐵𑐣𑐵𑐡𑐷𑐐𑐸 𑐏𑑅 𑑋

𑐳𑐵𑐢𑐵𑐬𑐞 𑐳𑐨𑐵𑑄 𑐳𑐩𑐵𑐖𑐫𑐵 𑐣𑑂𑐴𑐹𑐐𑐸 𑐖𑑂𑐫𑐵𑐳𑐣𑐵 𑐥𑐸𑐔𑑅 𑐣𑑄 𑐮𑑂𑐫𑑅𑐐𑐸 𑐡𑐸 𑑋 𑐣𑑂𑐴𑐹𑐐𑐸 𑐖𑑂𑐫𑐵𑐳𑐣𑐵 𑐥𑐸𑐔𑐮𑐫𑑂 𑐀𑐢𑑂𑐫𑐎𑑂𑐲 𑐬𑐵𑐖𑐾𑐱𑑂𑐰𑐬𑐩𑐵𑐣 𑐱𑑂𑐬𑐾𑐲𑑂𑐛 –𑐥𑑂𑐬𑐨𑐵𑐟 𑐩𑐵𑐰𑐶), 𑐄𑐥𑐵𑐢𑑂𑐫𑐎𑑂𑐲 𑐳𑐸𑐡𑐬𑑂𑐱𑐣 𑐎𑐚𑑂𑐚𑐾𑐮 –𑐨𑐎𑑂𑐟 𑐰𑐶𑐡𑑂𑐫𑐵𑐱𑑂𑐬𑐩), 𑐳𑐔𑐶𑐰 𑐬𑐰𑐶𑐣𑐵 𑐩𑐴𑐬𑑂𑐖𑐣 (𑐳𑐬𑐳𑑂𑐰𑐟𑐶 𑐣𑐶𑐎𑐾𑐟𑐣 𑐩𑐵𑐰𑐶), 𑐳𑐴𑐳𑐔𑐶𑐰 𑐬𑐶𑐟𑐵 𑐟𑐶𑐰𑐵𑐬𑐷 –𑐥𑐡𑑂𑐩𑐎𑐣𑑂𑐫𑐵 𑐩𑐵𑐰𑐶), 𑐎𑑀𑐲𑐵𑐢𑑂𑐫𑐎𑑂𑐲 𑐥𑑂𑐬𑐩𑑀𑐡 𑐎𑐺𑐲𑑂𑐞 𑐱𑑂𑐬𑐾𑐲𑑂𑐛 (𑐣𑐰 𑐁𑐡𑐬𑑂𑐱 𑐩𑐵𑐰𑐶), 𑐡𑐸𑐖𑑅𑐥𑐶𑑄 𑐀𑐩𑐺𑐟𑐵 𑐱𑑂𑐬𑐾𑐲𑑂𑐛 (𑐂𑐔𑑄𑐐𑐸 𑐁𑐢𑐵𑐬𑐨𑐹𑐟 𑐰𑐶𑐡𑑂𑐫𑐵𑐮𑐫), 𑐐𑐷𑐟𑐵 𑐎𑐵𑐦𑑂𑐮𑐾 (𑐣𑐣𑑂𑐡𑐷 𑐩𑐵𑐰𑐶), 𑐩𑐾𑐑𑐧𑐴𑐵𑐡𑐸𑐬 𑐧𑐣𑑂𑐖𑐵𑐬𑐵 (𑐐𑐸𑐴𑑂𑐫𑐾𑐱𑑂𑐰𑐬𑐷 𑐩𑐵𑐰𑐶), 𑐣𑐵𑐟𑐷𑐎𑐵𑐖𑐷 𑐩𑐴𑐬𑑂𑐖𑐣 (𑐖𑑂𑐘𑐵𑐣𑑀𑐡𑐫 𑐩𑐵𑐰𑐶), 𑐳𑐬𑐶𑐟𑐵 𑐎𑑂𑐲𑐾𑐟𑑂𑐬𑐷 (𑐣𑐾𑐥𑐵𑐮 𑐫𑐸𑐰𑐎 𑐩𑐵𑐰𑐶) 𑐰 𑐮𑐎𑑂𑐲𑑂𑐩𑐞 𑐥𑑁𑐜𑐾𑐮 (𑐖𑐸𑐡𑑂𑐢𑑀𑐡𑐫 𑐩𑐵𑐰𑐶)𑐫𑐵𑐟 𑐮𑑂𑐫𑑅𑐐𑐸 𑐏𑑅 𑑋