𑐱𑐶𑐎𑑂𑐲𑐵 𑐳𑑂𑐰𑐵𑐳𑑂𑐠𑑂𑐫 𑐣𑐶𑑅𑐱𑐸𑐮𑑂𑐎𑐫𑐵 𑐳𑐰𑐵𑐮

𑐣𑐾𑐥𑐵𑑅𑐫𑐵 𑐳𑑄𑐰𑐶𑐢𑐵𑐣𑐫𑑂 𑐳𑐩𑐵𑐖𑐰𑐵𑐡𑐄𑐣𑑂𑐩𑐸𑐏 𑐡𑐾𑐱 𑐢𑐎𑐵𑑅 𑐄𑐮𑑂𑐮𑐾𑐏 𑐖𑐹𑐐𑐸 𑐡𑐸 𑑋 𑐀𑐠𑐾 𑐫𑐵𑐫𑐾𑐢𑐸𑑄𑐎𑐵𑑅 𑐄𑐎𑐠𑑄𑐫𑐵 𑐎𑐵𑐣𑐹𑐣 𑐣𑐶𑐬𑑂‍𑐩𑐵𑐞 𑐫𑐵𑐣𑐵 𑐰𑐣𑐾𑐩𑐵𑑅𑐐𑐸 𑐳𑑄𑐳𑐡𑐫𑐵 𑐡𑐵𑐫𑐶𑐟𑑂𑐰 𑐣𑑄 𑐏𑑅 𑑋 𑐏𑐫𑑂𑐟 𑐮𑐵 𑐀𑐣𑑂𑐟𑐬𑐶𑐩 𑐳𑑄𑐰𑐶𑐢𑐵𑐣 𑑒𑑐𑑖𑑓 𑐡𑐸𑐣𑐾 𑐱𑐶𑐎𑑂𑐲𑐵 𑐰 𑐳𑑂𑐰𑐵𑐳𑑂𑐠𑑂𑐫 𑐣𑐶𑑅𑐱𑐸𑐮𑑂𑐎 𑐫𑐵𑐫𑐾𑐐𑐸 𑐏𑑃 𑐄𑐮𑑂𑐮𑐾𑐏 𑐖𑐸𑐂𑐢𑐸𑑄𑐎𑐹𑐐𑐸 𑐏𑑅 𑑋 𑐟𑐬 𑐄𑐎𑐶𑐫𑐵𑐟 𑐎𑐵𑐣𑐹𑐣 𑐡𑐫𑐾𑐎𑐵𑑅 𑐮𑐵𑐐𑐹 𑐫𑐵𑐫𑐾𑐐𑐸 𑐢𑐵𑐫𑐾𑐢𑐸𑑄𑐎𑐵𑑅 𑐢𑐵𑑅𑐳𑐵 𑐁𑑅 𑐟𑐎 𑐣𑑄 𑐄𑐎𑐶𑐫𑐵𑐟 𑐥𑐵𑐫𑑂𑐕𑐶 𑐎𑐠𑑄 𑐕𑑂𑐫𑐮𑐵𑐧𑐸𑐮𑐵𑐫𑑂 𑐴𑐫𑐾 𑐩𑐦𑐸𑐐𑐸 𑐀𑐰𑐳𑑂𑐠𑐵 𑐎𑐵𑐫𑐩 𑐖𑐸𑐫𑐵𑐔𑑂𑐰𑐣 𑑋

𑐁𑑅 𑐴𑐵𑐎𑐣𑑄 𑐕𑐎𑑂𑐰𑑅 𑐣𑐾𑐥𑐵𑑅𑐫𑐵 𑐳𑑄𑐰𑐶𑐢𑐵𑐣𑐫𑑂 𑐡𑑀𑐴𑑀𑐬𑑀 𑐎𑐠𑑄 𑐣𑐶𑑅𑐱𑐸𑐮𑑂𑐎 𑐱𑐶𑐎𑑂𑐲𑐵 𑐰 𑐣𑐶𑑅𑐱𑐸𑐮𑑂𑐎 𑐳𑑂𑐰𑐵𑐳𑑂𑐠𑑂𑐫 𑐳𑐾𑐰𑐵𑐫𑐵 𑐧𑐣𑑂𑐡𑑀𑐧𑐳𑑂𑐟 𑐫𑐵𑐫𑐾𑐐𑐸 𑐏𑑃 𑐄𑐮𑑂𑐮𑐾𑐏 𑐖𑐹𑐰𑑄𑐐𑐸 𑐡𑐸 𑑋 𑐐𑐸𑐐𑐸 𑐳𑐩𑐵𑐖𑐰𑐵𑐡𑐄𑐣𑑂𑐩𑐸𑐸𑐏 𑐳𑑄𑐰𑐶𑐢𑐵𑐣 𑐢𑐵𑐫𑐾𑐎𑐾𑐟 𑐩𑐡𑐫𑐾𑐎𑑄 𑐩𑐐𑐵𑑅𑐐𑐸 𑐔𑐷𑐖 𑐣𑑄 𑐏𑑅 𑑋 𑐄𑐎𑐶𑑄 𑐣𑑄 𑐳𑐩𑐵𑐖𑐰𑐵𑐡𑐷 𑐩𑐸𑐮𑐸𑐎𑐫𑑂 𑐤𑑂𑐫𑐵𑐠𑐵𑐫𑑂 𑐖𑐹𑐳𑐵𑑄 𑐮𑐵𑐐𑐹 𑐫𑐵𑐣𑐵𑐟𑑅𑐐𑐸 𑐣𑐶𑑅𑐱𑐸𑐮𑑂𑐎 𑐳𑑂𑐰𑐵𑐳𑑂𑐠𑑂𑐫 𑐰 𑐣𑐶𑑅𑐱𑐸𑐮𑑂𑐎 𑐱𑐶𑐎𑑂𑐲𑐵𑐫𑐵 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾𑐐𑐸𑐮𑐷 𑐳𑐡𑐣𑐫𑑂 𑐠𑐷𑐠𑐷 𑐎𑐠𑑄𑐫𑐵 𑐥𑐴𑐮 𑐂𑐮𑐫𑑂 𑐧𑑂𑐫𑐮𑐫𑑂 𑐖𑐸𑐖𑐸𑑄 𑐰𑐫𑐵𑐔𑑂𑐰𑑄𑐐𑐸 𑐏𑑅 𑑋

𑐠𑑂𑐰 𑐗𑑂𑐰𑐮𑐫𑑂 𑐣𑐎𑐟𑐶𑐣𑐶 𑐴𑐾 𑐖𑐎 𑐣𑐶𑑅𑐱𑐸𑐮𑑂𑐎 𑐱𑐶𑐎𑑂𑐲𑐵 𑐥𑑂𑐬𑐡𑐵𑐣 𑐫𑐵𑐫𑐾𑐐𑐸 𑐰𑐶𑐢𑐾𑐫𑐎 𑐳𑐡𑐣𑑄 𑐥𑐵𑐬𑐶𑐟 𑐫𑐵𑑅𑐐𑐸 𑐡𑐸 𑑋 𑐱𑐶𑐎𑑂𑐲𑐵𑐫𑐵𑐟 𑐣𑑄 𑐩𑑁𑐮𑐶𑐎 𑐴𑐎 𑐎𑐠𑑄 𑐎𑐫𑐵𑑅 𑐳𑑄𑐰𑐶𑐢𑐵𑐣𑐫𑐵 𑐨𑐵𑐐 𑑓 𑐫𑑂 𑐮𑐵𑐎𑐾𑐢𑐸𑑄𑐎𑐵𑑅 𑐠𑑂𑐰 𑐳𑐩𑑂𑐨𑐰 𑐖𑐹𑐐𑐸 𑐏𑑅 𑑋 𑐁𑑅 𑐩𑐵𑐟𑐺𑐨𑐵𑐲𑐵𑑄 𑐱𑐶𑐎𑑂𑐲𑐵 𑐎𑐵𑐫𑐾𑐐𑐸 𑐧𑐣𑑂𑐡𑑀𑐧𑐳𑑂𑐟 𑐣𑑄 𑐫𑐵𑐫𑐾 𑐩𑐵𑐮𑐷𑐐𑐸 𑐖𑐹𑐐𑐸 𑐡𑐸 𑑋 𑐪𑐶𑐐𑑅 𑐟𑐎 𑐀𑐣𑐶𑐰𑐵𑐬𑑂‍𑐫 𑐎𑐠𑑄 𑐩𑐏𑐸𑐳𑐾𑑄 𑐩𑐵𑑄𑐨𑐵𑐳𑑄 𑐱𑐶𑐎𑑂𑐲𑐵 𑐎𑐵𑐫𑐾𑐦𑐂 𑐢𑐎𑐵𑑅 𑐄𑐮𑑂𑐮𑐾𑐏 𑐖𑐸𑐫𑐵𑐔𑑂𑐰𑑄𑐐𑐸 𑐖𑐸𑐫𑐵𑑅 𑐳𑐬𑐎𑐵𑐬 𑐰𑐵 𑐳𑑂𑐠𑐵𑐣𑐷𑐫 𑐣𑐶𑐎𑐵𑐫𑐫𑐵𑐟 𑐀𑐣𑐶𑐰𑐵𑐬𑑂‍𑐫 𑐎𑐠𑑄 𑐩𑐵𑐟𑐺𑐨𑐵𑐲𑐵𑑄 𑐳𑑂𑐎𑐸𑐮𑐫𑐵 𑐧𑐣𑑂𑐡𑑀𑐧𑐳𑑂𑐟 𑐫𑐵𑐫𑐾𑐐𑐸 𑐢𑐵𑐬𑐞𑐵 𑐳𑑂𑐥𑐲𑑂𑐚 𑐩𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋

𑐁𑑅 𑐢𑐵𑑅𑐳𑐵 𑐕𑐐𑐹 𑐮𑑂𑐫𑐵𑐏𑑄 𑐳𑑂𑐠𑐵𑐣𑐷𑐫 𑐣𑐶𑐎𑐵𑐫, 𑐬𑐵𑐖𑑂𑐫 𑐳𑐬𑐎𑐵𑐬 𑐰𑐵 𑐳𑑄𑐑𑐷𑐫 𑐳𑐬𑐎𑐵𑐬𑐫𑐵𑐟 𑐣𑑄 𑐳𑑂𑐠𑐵𑐣𑐷𑐫 𑐧𑐵𑐴𑐸𑐮𑑂𑐫𑐟𑐵 𑐡𑐸𑐐𑐸 𑐨𑐵𑐳𑑄 𑐰𑐵 𑐩𑐵𑐟𑐺𑐨𑐵𑐲𑐵𑑄 𑐱𑐶𑐎𑑂𑐲𑐵 𑐎𑐵𑐮𑐧𑐶𑐮 𑐫𑐵𑐫𑐾𑐐𑐸 𑐧𑐣𑑂𑐡𑑀𑐧𑐳𑑂𑐟 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐡𑐰𑐵𑐰 𑐳𑐶𑐬𑑂‍𑐖𑐣𑐵 𑐖𑐸𑐂𑐐𑐸 𑐀𑐰𑐳𑑂𑐠𑐵 𑐧𑑂𑐰𑐮𑑄𑐐𑐸 𑐡𑐸 𑑋 𑑒𑑐𑑔𑑖 𑐳𑐵𑐮𑐫𑐵 𑐖𑐣𑐁𑐣𑑂𑐡𑑀𑐣𑐮 𑐢𑐸𑑄𑐎𑐵𑑅 𑑒𑑐𑑔𑑗 𑐳𑐵𑐮𑑄 𑐖𑐵𑐬𑐷 𑐖𑐹𑐐𑐸 𑐣𑐾𑐥𑐵𑑅𑐫𑐵 𑐳𑑄𑐰𑐶𑐢𑐵𑐣𑐫𑑂 𑐏𑐳𑑂 𑐣𑐾𑐥𑐵𑐮𑐷 𑐨𑐵𑐲𑐵 𑐕𑐐𑐹 𑐫𑐵𑐟 𑐖𑐎 ‘𑐬𑐵𑐲𑑂𑐚𑑂𑐬 𑐨𑐵𑐲𑐵’ 𑐢𑐎𑐵𑑅 𑐩𑐾𑐩𑐾𑐐𑐸 𑐨𑐵𑐲𑐵𑐟 𑐦𑐸𑐎𑑂𑐎𑑄 ‘𑐬𑐵𑐲𑑂𑐚𑑂𑐬𑐶𑐫 𑐨𑐵𑐲𑐵’ 𑐢𑐂𑐎𑐠𑑄 𑐄𑐮𑑂𑐮𑐾𑐏 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋

𑐁𑑅 𑐰𑐫𑐵𑑅 𑑒𑑐𑑗𑑒 𑐳𑐵𑐮𑑄 𑐖𑐵𑐬𑐷 𑐖𑐹𑐐𑐸 𑐣𑐾𑐥𑐵𑑅𑐫𑐵 𑐤𑐹𑐐𑐸 𑐳𑑄𑐰𑐶𑐢𑐵𑐣𑐫𑑂 𑐣𑐾𑐥𑐵𑐮𑐫𑑂 𑐯𑐵𑐂𑐐𑐸 𑐦𑐸𑐎𑑂𑐎𑑄 𑐨𑐵𑐲𑐵𑐫𑐵𑐟 𑐬𑐵𑐲𑑂𑐚𑑂𑐬 𑐨𑐵𑐲𑐵 𑐢𑐎𑐵𑑅 𑐄𑐮𑑂𑐮𑐾𑐏 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐠𑑂𑐰 𑐮𑑂𑐫𑐵𑐏𑑄 𑐩𑐵𑐟𑐺𑐨𑐵𑐲𑐵 𑐩𑐏𑐸𑐐𑐸 𑐨𑐵𑐲𑐵 𑐟𑐎𑑄 𑐬𑐵𑐲𑑂𑐚𑑂𑐬 𑐨𑐵𑐲𑐵 𑐖𑐸𑐂𑐐𑐸 𑐳𑐩𑑂𑐨𑐵𑐰𑐣𑐵 𑐣𑑄 𑐡𑐸 𑑋 𑐳𑐬𑐎𑐵𑐬𑑄 𑐡𑐾𑐳𑐫𑑂 𑑑𑑒𑑓 𑐐𑐹 𑐨𑐵𑐲𑐵 𑐡𑐸 𑐢𑐎𑐵𑑅 𑐥𑐴𑐶𑐔𑐵𑐣 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐟𑐬 𑐄𑐐𑐸 𑑑𑑒𑑓 𑐐𑐹 𑐨𑐵𑐲𑐵𑐫𑐵 𑐢𑐮𑐏𑐫𑑂 𑐏𑐳𑑂 𑐣𑐾𑐥𑐵𑐮𑐷, 𑐀𑑄𑐐𑑂𑐬𑐾𑐖𑐷, 𑐔𑐶𑐣𑐶𑐫𑐵𑑃, 𑐴𑐶𑐣𑑂𑐡𑐷, 𑐥𑑄𑐖𑐵𑐧𑐷, 𑐳𑑂𑐥𑐾𑐣𑐶𑐱, 𑐥𑑀𑐬𑑂‍𑐔𑐸𑐐𑐮 𑐰 𑐖𑐵𑐥𑐵𑐣𑐷 𑐨𑐵𑐲𑐵𑐫𑐵𑐟 𑐣𑑄 𑐡𑐸𑐠𑑂𑐫𑐵𑐎𑐵𑐟𑑅𑐐𑐸 𑐡𑐸 𑑋

𑐄𑐥𑐶𑑄 𑐮𑐵 𑐠𑐣 𑐴𑐾 𑐄𑐟𑑂𑐥𑐣𑑂𑐣 𑐖𑐹𑐐𑐸 𑐩𑐵𑐟𑐺𑐨𑐵𑐲𑐵 𑐮𑐵 𑐩𑐏𑐸 𑑋 𑐠𑑂𑐰 𑐮𑑂𑐫𑐵𑐏𑑄 𑐀𑐖𑑂𑐫𑐵𑑅𑐐𑐸 𑐨𑐵𑐲𑐵 𑐯𑐵𑐂𑐥𑐶𑑄 𑐩𑐣𑐹𑐟 𑐠𑐣 𑐣𑐾𑐥𑐵𑑅𑐫𑐵 𑐣𑐵𑐐𑐬𑐶𑐎𑐟𑐵 𑐎𑐫𑐵𑑅 𑐁𑑅 𑐣𑐾𑐥𑐵𑐮𑐷 𑐠𑐾𑑄 𑐴𑐾 𑐖𑐹𑐥𑐶𑑄 𑐏𑐫𑐾𑐦𑐸 𑑋 𑐟𑐬 𑐄𑐥𑐶𑑄 𑐮𑐵 𑐮𑐶𑐥𑐵 𑐖𑐎 𑐣𑐾𑐥𑐵𑑅 𑐰𑐫𑐵 𑐔𑑂𑐰𑐣𑐵𑐔𑑂𑐰𑑄𑐥𑐶𑑄 𑐖𑐸𑐮 𑑋 𑐠𑑂𑐰 𑐩𑐵𑐟𑐺𑐨𑐵𑐲𑐵 𑐮𑐵 𑐢𑐵𑐫𑐾 𑐴𑐾 𑐩𑐕𑐶𑑄 𑑋 𑐠𑑂𑐰 𑐮𑑂𑐫𑐵𑐏𑑄 𑐩𑐵𑐟𑐺𑐨𑐵𑐲𑐵𑐫𑐵 𑐳𑑄𑐬𑐎𑑂𑐲𑐞 𑐰𑐶𑐎𑐵𑐳 𑐰 𑐥𑑂𑐬𑐰𑐡𑑂𑐬𑑂‍𑐢𑐣 𑐫𑐵𑐣𑐵𑑅 𑐱𑐶𑐎𑑂𑐲𑐵 𑐮𑐵𑐐𑐵𑐫𑑂 𑐕𑐸𑑄 𑐫𑐵𑐫𑐾𑐐𑐸 𑐏𑑅𑐳𑐵 𑐁𑑅 𑐣𑐾𑐥𑐵𑑅 𑐡𑐸𑐣𑐾 𑐤𑐵𑐥𑐵𑑄𑐣𑐶𑐳𑐾𑑄 𑐯𑐵𑐂𑐐𑐸 𑐣𑐾𑐥𑐵𑐮𑐨𑐵𑐲𑐵, 𑐟𑐵𑐩𑐵𑐒 𑐨𑐵𑐲𑐵, 𑐬𑐵𑐃, 𑐮𑐶𑐩𑑂𑐧𑐸 𑐨𑐵𑐲𑐵, 𑐠𑐵𑐬𑐸 𑐖𑐵𑐟𑐶𑑄 𑐯𑐵𑐂𑐐𑐸 𑐨𑐵𑐲𑐵, 𑐡𑐣𑐸𑐰𑐵𑐬, 𑐳𑐸𑐣𑐸𑐰𑐵𑐬𑐟𑐫𑑂𑐳𑑄 𑐯𑐵𑐂𑐐𑐸 𑐨𑐵𑐲𑐵𑐫𑐵𑐟 𑐳𑑄𑐰𑐶𑐢𑐵𑐣, 𑐳𑐬𑐎𑐵𑐬 𑐰 𑐳𑑂𑐠𑐵𑐣𑐷𑐫 𑐣𑐶𑐎𑐵𑐫𑐟𑐫𑑂𑐳𑑄 𑐳𑑂𑐎𑐸𑐮 𑐎𑐮𑐾𑐖𑐫𑑂 𑐮𑐵𑐐𑐹 𑐫𑐵𑐣𑐵𑑅 𑐳𑑄𑐬𑐎𑑂𑐲𑐞 𑐰 𑐰𑐶𑐎𑐵𑐳 𑐫𑐵𑐫𑐾𑐐𑐸 𑐳𑑂𑐰𑐫𑐾𑐩𑐵𑑅𑐐𑐸 𑐏𑑅 𑑋

𑐠𑑂𑐰 𑐱𑐶𑐎𑑂𑐲𑐵𑐫𑐵 𑐀𑐣𑐶𑐰𑐵𑐬𑑂‍𑐫 𑐱𑐬𑑂‍𑐟 𑐣𑑄 𑐖𑐸𑐂𑐩𑐵𑑅 𑑋 𑐩𑐏𑐸𑐟 𑐢𑐵𑑅𑐳𑐵 𑐳𑑂𑐠𑐵𑐣𑐷𑐫 𑐨𑐵𑐲𑐵𑐟 𑐮𑐶𑐥𑐵 𑐴𑐾 𑐮𑐵𑐣𑐵𑐔𑑂𑐰𑐣𑐷 𑑋 𑐨𑐵𑐲𑐵 𑐳𑑄𑐳𑑂𑐎𑐺𑐟𑐶 𑐰 𑐳𑑄𑐳𑑂𑐎𑐵𑐬𑐫𑐵 𑐰𑐶𑐎𑐵𑐳𑑄 𑐴𑐾 𑐖𑐎 𑐩𑐣𑐹𑐫𑐵 𑐳𑐨𑑂𑐫𑐟𑐵𑐫𑐵 𑐰𑐶𑐎𑐵𑐳 𑐖𑐹𑐐𑐸 𑐏𑐣𑐾𑐡𑐂 𑑋 𑐀𑐠𑐾𑐴𑐾 𑐳𑑂𑐰𑐵𑐳𑑂𑐠𑑂𑐫 𑐰 𑐳𑐬𑐳𑐦𑐵𑐃𑐫𑐵 𑐎𑐵𑐬𑐞𑑄 𑐖𑐎 𑐩𑐣𑐹 𑐐𑐸𑐮𑐶 𑐟𑐎 𑐰𑐶𑐎𑐵𑐳 𑐖𑐹𑐥𑐶𑑄 𑐖𑐵𑐟𑐶 𑐏𑑅 𑐢𑐂𑐐𑐸 𑐎𑑂𑐫𑐣𑐷 𑑋 𑐠𑑂𑐰 𑐮𑑂𑐫𑐵𑐏𑑄 𑐣𑑄 𑐣𑐾𑐥𑐵𑑅 𑐡𑐸𑐣𑐾 𑐐𑐸𑐮𑐶 𑐣𑑄 𑐨𑐵𑐲𑐵, 𑐖𑐵𑐟𑐶 𑐰 𑐳𑑄𑐳𑑂𑐎𑐺𑐟𑐶 𑐡𑐸 𑐄𑐎𑐶𑐫𑐵 𑐳𑑄𑐬𑐎𑑂𑐲𑐞 𑐫𑐵𑐫𑐾𑐐𑐸 𑐖𑑂𑐫𑐵 𑐬𑐵𑐖𑑂𑐫𑐫𑐵 𑐖𑐸𑐂𑐩𑐵𑑅 𑑋

𑐀𑐠𑐾 𑐴𑐾 𑐟𑐸𑑄 𑐗𑐷 𑐩𑐣𑐹𑐟 𑐳𑑂𑐰𑐳𑑂𑐠 𑐖𑐸𑐫𑐵𑑅 𑐩𑑂𑐰𑐵𑐫𑐾𑐐𑐸 𑐣𑐶𑑄𑐟𑐶𑑄 𑐥𑑂𑐬𑐡𑐾𑐱𑐳𑑂𑐟𑐬𑐫𑑂 𑐰 𑐖𑐶𑐮𑑂𑐮𑐵𑐳𑑂𑐟𑐬𑐫𑑂 𑐟𑐎𑑄 𑐠𑐷𑐠𑐷 𑐎𑐠𑑄𑐫𑐵 𑐀𑐳𑑂𑐥𑐟𑐵𑐮𑐫𑐵 𑐧𑐣𑑂𑐡𑑀𑐧𑐳𑑂𑐟 𑐫𑐵𑐫𑐾𑐐𑐸 𑐣𑐵𑐥𑐣𑐵𑐥𑑄 𑐣𑐬𑑂‍𑐳𑐶𑐒 𑐎𑐮𑐾𑐖𑐟 𑐳𑑂𑐠𑐵𑐥𑐣𑐵 𑐫𑐵𑐣𑐵𑑅 𑐳𑑂𑐰𑐵𑐳𑑂𑐠𑑂𑐫 𑐮𑐵𑐐𑐵𑐫𑐵𑐟 𑐥𑑂𑐬𑐰𑐡𑑂𑐬𑑂‍𑐢𑐣 𑐫𑐵𑐫𑐾𑐐𑐸 𑐖𑑂𑐫𑐵 𑐫𑐵𑐣𑐵 𑐰𑐣𑐾𑐩𑐵𑑅𑐐𑐸 𑐏𑑅 𑑋 𑐠𑑂𑐰 𑐗𑑂𑐰𑐮𑐫𑑂 𑐏𑑂𑐰𑐥 𑐡𑐾𑐳𑐫𑑂 𑐳𑑂𑐠𑐵𑐣𑐷𑐫 𑐣𑐶𑐎𑐵𑐫𑐥𑐵𑐏𑐾𑑄 𑐗𑐶𑐡𑑃 𑐗𑐶𑑄𑐣𑑂𑐫𑐵𑐡𑑃 𑐤𑑂𑐫𑑅𑐣𑐶𑐳𑐾𑑄 𑐎𑐮𑐾𑐖 𑐔𑐵𑐫𑐾𑐎𑐵𑑅 𑐖𑑂𑐫𑐵 𑐳𑐸𑐬𑐸 𑐫𑐵𑑅𑐐𑐸 𑐡𑐸𑐳𑐵 𑐁𑑅 𑐰𑐫𑐵𑑅 𑐏𑑂𑐰𑐥 𑐣𑐐𑐬𑐥𑐵𑐮𑐶𑐎𑐵𑑄 𑐠𑑅𑐐𑐸 𑐴𑐾 𑐎𑐠𑑄 𑐏𑑂𑐰𑐥 𑐀𑐳𑑂𑐥𑐟𑐵𑐮 𑐳𑐘𑑂𑐔𑐵𑐮𑐣𑐫𑐵 𑐮𑐵𑐐𑐶𑑄 𑐖𑐐 𑐳𑑂𑐰𑐣𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐡𑐸 𑑋

𑐳𑐩𑑂𑐨𑐰𑐟 𑐳𑑂𑐠𑐵𑐣𑐷𑐫 𑐣𑐶𑐎𑐵𑐫𑐥𑐵𑐏𑐾𑑄 𑐳𑑂𑐎𑐸𑐮 𑐎𑐮𑐾𑐖 𑐳𑐘𑑂𑐔𑐵𑐮𑐣 𑐫𑐵𑐫𑐾𑐐𑐸 𑐰 𑐀𑐳𑑂𑐥𑐟𑐵𑐮 𑐳𑑂𑐰𑐷𑐎𑐺𑐟𑐶 𑐎𑐫𑐵𑑅 𑐳𑐘𑑂𑐔𑐵𑐮𑐣𑐫𑑂 𑐴𑐫𑐾𑐐𑐸 𑐖𑑂𑐫𑐵 𑐫𑐵𑐣𑐵 𑐎𑑂𑐫𑑄𑐐𑐸 𑐏𑑂𑐰𑐥 𑐣𑐐𑐬𑐥𑐵𑐮𑐶𑐎𑐵 𑐕𑐐𑐹 𑐴𑐾 𑐖𑐎 𑐏𑑅 𑑋𑐟𑐟𑑅𑐢𑑄𑐐𑐸 𑐏𑑃 𑐯𑐵𑐫𑐾𑐐𑐸 𑐳𑑂𑐰𑐫𑐵𑑄 𑐔𑐶𑐔𑐷𑐢𑑄𑐐𑐸 𑐖𑑂𑐫𑐵𑐟 𑐟𑑅𑐖𑐶𑐎 𑐫𑐵𑐫𑐾𑐐𑐸 𑐡𑐎𑐮𑐫𑑂 𑐧𑐵𑑄𑐮𑐵𑑅 𑑋

𑐊𑐩𑐵𑐮𑐾 𑐰 𑐎𑐵𑑄𑐐𑑂𑐬𑐾𑐳𑑄 𑐳𑐡𑐣𑐫𑑂 𑐠𑑅𑐥𑐶𑐣𑐶 𑐣𑐾𑐟𑐵𑐟𑐫𑑂 𑐣𑐵𑐩𑐫𑑂 𑐳𑑂𑐠𑐵𑐥𑐣𑐵 𑐫𑐵𑐣𑐵𑐟𑑅𑐐𑐸 𑐀𑐳𑑂𑐥𑐟𑐵𑐮𑐫𑐵𑐟 𑐎𑐾𑐣𑑂𑐡𑑂𑐬𑐷𑐫 𑐳𑐬𑐎𑐵𑐬𑐫𑐵 𑐩𑐵𑐟𑐴𑐟𑐫𑑂 𑐰𑐵 𑐳𑑄𑐑𑐷𑐫 𑐳𑐬𑐎𑐵𑐬𑐫𑐵 𑐩𑐵𑐟𑐴𑐟𑐫𑑂 𑐟𑐫𑐾𑐩𑐵𑑅 𑐢𑐎𑐵𑑅 𑐳𑐡𑐣𑐫𑑂 𑐳𑑄𑐑𑐬𑑂‍𑐲 𑐫𑐵𑐫𑐾𑐐𑐸 𑐢𑐵𑐢𑐵𑑄 𑐳𑐡𑐣𑐫𑑂 𑐴𑑄𑐐𑐵𑐩𑐵 𑐫𑐵𑐣𑐵𑐔𑑂𑐰𑑄𑐐𑐸 𑐂𑐮𑐫𑑂 𑐏𑑂𑐰𑐥 𑐣𑐐𑐬𑐥𑐵𑐮𑐶𑐎𑐵𑑄 𑐢𑐵𑑅𑐳𑐵 𑐠𑑅𑐐𑐸 𑐴𑐾 𑐎𑐠𑑄 𑐎𑐬𑐶𑐧 𑐧𑐵𑐐𑐹 𑐀𑐬𑐧 𑐡𑐵𑑄 𑐏𑐬𑑂‍𑐔 𑐫𑐵𑐣𑐵𑑅 𑐏𑑂𑐰𑐥 𑐀𑐳𑑂𑐥𑐟𑐵𑐮 𑐳𑐘𑑂𑐔𑐵𑐮𑐣𑐫𑐵 𑐣𑐶𑑄𑐟𑐶𑑄 𑐳𑑂𑐰𑐷𑐎𑐺𑐟𑐶 𑐔𑐹𑐮𑐵𑐎𑐹𑐐𑐸 𑐡𑐸 𑑋

𑐁𑑅 𑐄𑐎𑐶𑐫𑐵 𑐱𑐶𑐮𑐵𑐣𑑂𑐫𑐵𑐳 𑐫𑐵𑐣𑐵𑑅 𑐳𑑂𑐰𑐡𑑃 𑐡𑐸𑐣𑐾 𑐳𑐘𑑂𑐔𑐵𑐮𑐣𑐫𑑂 𑐴𑐫𑐾𑐐𑐸 𑐎𑐠𑑄 𑐖𑑂𑐫𑐵 𑐣𑑄 𑐳𑐸𑐬𑐸 𑐖𑐸𑐂𑐢𑐸𑑄𑐎𑐹𑐐𑐸 𑐡𑐸 𑑋 𑐠𑐖𑑂𑐫𑐵𑑅𑐐𑐸 𑐀𑐰𑐳𑑂𑐠𑐵𑐫𑑂 𑐣𑐾𑐥𑐵𑑅 𑐳𑑂𑐰𑐵𑐳𑑂𑐠𑑂𑐫 𑐎𑑂𑐲𑐾𑐟𑑂𑐬𑐫𑑂 𑐁𑐟𑑂𑐩𑐣𑐶𑐬𑑂‍𑐨𑐬 𑐖𑐸𑐖𑐸𑑄 𑐰𑐣𑐷𑐐𑐸 𑐳𑐩𑑂𑐨𑐵𑐰𑐣𑐵 𑐏𑐣𑐾 𑐡𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐡𑑃𑐫𑑂 𑐀𑐬𑐧𑑁𑑄 𑐟𑐎𑐵 𑐡𑐵𑑄 𑐳𑑂𑐰𑐵𑐳𑑂𑐠𑑂𑐫𑐫𑐵 𑐮𑐵𑐐𑐶𑑄 𑐖𑐎 𑐥𑐶𑐣𑐾 𑐰𑐣𑐵𑐔𑑂𑐰𑑄𑐐𑐸 𑐗𑐷𑐐𑐸 𑐡𑐾𑐳𑐫𑑂 𑐠𑐷𑐠𑐷 𑐠𑐵𑐳𑐫𑑂 𑐠𑐷𑐠𑐷 𑐎𑐠𑑄𑐫𑐵 𑐀𑐳𑑂𑐥𑐟𑐵𑐮, 𑐳𑑂𑐰𑐵𑐳𑑂𑐠𑑂𑐫 𑐎𑐾𑐣𑑂𑐡𑑂𑐬 𑐰 𑐳𑑂𑐰𑐵𑐳𑑂𑐠𑑂𑐫 𑐱𑐶𑐎𑑂𑐲𑐵 𑐧𑐷𑐐𑐸 𑐣𑐬𑑂‍𑐳𑐶𑐒 𑐎𑐮𑐾𑐖𑐟 𑐳𑑂𑐠𑐵𑐥𑐣𑐵 𑐫𑐵𑐣𑐵𑑅 𑐄𑐎𑐶𑐫𑐵 𑐳𑐘𑑂𑐔𑐵𑐮𑐣 𑐣𑑄 𑐳𑑂𑐠𑐵𑐣𑐷𑐫 𑐣𑐶𑐎𑐵𑐫 𑐰𑐵 𑐳𑑂𑐠𑐵𑐣𑐷𑐫 𑐳𑐬𑐎𑐵𑐬𑐥𑐵𑐏𑐾𑑄 𑐫𑐵𑐣𑐵 𑐰𑐣𑐾𑐐𑐸 𑐏𑐟 𑐢𑐵𑑅𑐳𑐵 𑐳𑑂𑐠𑐵𑐣𑐷𑐫 𑐖𑐣𑐟𑐵𑐫𑐵 𑐮𑐵𑐐𑐶𑑄 𑐁𑐥𑐵𑐮𑑄 𑐁𑐥𑐵𑑅 𑐐𑑂𑐰𑐵𑐴𑐵𑐮𑐶 𑐖𑐸𑐂𑐐𑐸 𑐏𑐣𑐾𑐡𑐸 𑑋

𑐕𑐏𑐾 𑐧𑑂𑐰𑐣𑐾𑐐𑐸 𑐣𑐶𑑄𑐟𑐶𑑄 𑐗𑐷 𑐣𑐾𑐥𑐵𑑅𑐩𑐶 𑐰𑐶𑐡𑑂𑐫𑐵𑐬𑑂‍𑐠𑐷𑐟𑐫𑑂𑐳𑑄 𑐀𑐬𑐧𑑁𑑄 𑐀𑐬𑐧 𑐟𑐎𑐵 𑐡𑐵𑑄 𑐥𑐶𑐣𑐾 𑐫𑑄𑐎𑐹𑐐𑐸𑐮𑐶𑑄 𑐡𑐾𑐱𑑄 𑐁𑐬𑑂‍𑐠𑐶𑐎 𑐨𑐵𑐬 𑐦𑐫𑐾 𑐩𑐵𑐮𑐵𑐔𑑂𑐰𑑄𑐐𑐸 𑐡𑐸 𑑋 𑐩𑐾𑐏𑐾 𑐳𑑂𑐰𑐵𑐳𑑂𑐠𑑂𑐫 𑐮𑐵𑐐𑐵𑐫𑑂 𑐣𑑄 𑐀𑐖𑑂𑐫𑐵𑑅𑐐𑐸 𑐴𑐰𑐶𑐐𑐟 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐀𑐗 𑐢𑑂𑐫𑐧𑐵 𑐥𑐸𑐮𑐵𑑅 𑐰𑐶𑐡𑐾𑐱 𑐰𑐣𑐵𑐔𑑂𑐰𑑄𑐥𑐶𑑄 𑐣𑐾𑐥𑐵𑑅𑐩𑐶 𑐰𑐶𑐡𑑂𑐫𑐵𑐬𑑂‍𑐠𑐷𑐟 𑐩𑐢𑑂𑐫𑐾 𑐀𑐲𑑂𑐚𑑂𑐬𑐾𑐮𑐶𑐫𑐵𑐫𑑂 𑐎𑐮𑐾𑐖 𑐴𑐾 𑐏𑐵𑐬𑐾𑐖 𑐫𑐵𑐣𑐵 𑐧𑐷𑐰𑑄 𑐳𑐮𑑄𑐳𑑅 𑐣𑐾𑐥𑐵𑑅𑐩𑐶 𑐰𑐶𑐡𑑂𑐫𑐵𑐬𑑂‍𑐠𑐷𑐟 𑐧𑐶𑐔𑐮𑑂𑐮𑐷𑐂 𑐮𑐵𑐣𑐵𑐔𑑂𑐰𑑄𑐐𑐸 𑐳𑐩𑐵𑐔𑐵𑐬 𑐥𑐶𑐴𑐵𑑄 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐳𑐬𑐎𑐵𑐬𑑄 𑐠𑑅𑐐𑐸 𑐠𑐵𑐳𑐫𑑂 𑐄𑐔𑑂𑐔 𑐱𑐶𑐎𑑂𑐲𑐵 𑐧𑐷𑐐𑐸 𑐧𑐣𑑂𑐡𑑀𑐧𑐳𑑂𑐟 𑐫𑐵𑐫𑐾 𑐩𑐦𑐸𑐐𑐸 𑐖𑐎 𑐩𑐏𑐸, 𑐧𑑂𑐰𑐣𑐾𑐐𑐸 𑐰𑐵𑐟𑐵𑐰𑐬𑐞 𑐟𑐎𑑄 𑐧𑐵𑑄𑐮𑐵𑐎𑐾 𑐩𑐦𑐸𑐐𑐸 𑐎𑐵𑐬𑐞𑑄 𑐣𑐾𑐥𑐵𑑅𑐩𑐶 𑐰𑐶𑐡𑑂𑐫𑐵𑐬𑑂‍𑐠𑐷𑐟 𑐧𑐵𑐢𑑂𑐫 𑐖𑐸𑐫𑐵𑑅 𑐥𑐶𑐣𑐾 𑐰𑐣𑐵𑑅 𑐧𑑂𑐰𑑄 𑐰𑐣𑐾𑐩𑐵𑑅𑐐𑐸 𑐏𑑅 𑑋 𑐠𑐣 𑐄𑐔𑐶𑐟 𑐰𑐵𑐟𑐵𑐰𑐬𑐞 𑐧𑐶𑐫𑐵𑑅 𑐧𑐬𑐸 𑐥𑐶𑐣𑑄 𑐥𑑂𑐬𑐱𑐶𑐎𑑂𑐲𑐎 𑐰 𑐥𑑂𑐬𑑀𑐦𑐾𑐳𑐬𑐟 𑐡𑐸𑐟 𑐴𑐫𑐾𑐐𑐸 𑐳𑑂𑐰𑐟 𑐢𑐵𑑅𑐳𑐵 𑐗𑐷𑐐𑐸 𑐁𑐥𑐵𑐮𑑄 𑐁𑐥𑐵𑑅 𑐄𑐣𑑂𑐣𑐟 𑐖𑐣𑐱𑐎𑑂𑐟𑐶 𑐥𑐶𑐣𑐾 𑐮𑐵𑑅 𑐰𑐣𑐷𑐐𑐸 𑐏𑐟𑐬𑐵 𑐩𑐰𑐂𑐐𑐸 𑐖𑐸𑐂 𑑋

𑐬𑐵𑐲𑑂𑐚𑑂𑐬𑑄 𑐟𑐵𑑅 𑐃 𑐟𑐎 𑐮𑐐𑐵𑐣𑐷 𑐫𑐵𑐣𑐵𑑅𑐮𑐶 𑐄𑐔𑑂𑐔𑐱𑐶𑐎𑑂𑐲𑐵 𑐎𑐵𑐫𑐾𑐟 𑐥𑐶𑐣𑐾 𑐰𑐣𑐷𑐥𑐶𑑄 𑐗𑐷 𑐣𑐾𑐥𑐵𑑅𑐩𑐶 𑐰𑐶𑐡𑑂𑐫𑐵𑐬𑑂‍𑐠𑐷𑐟 𑐥𑐶𑐣𑐾 𑐴𑐾 𑐔𑑂𑐰𑐣𑐵𑑅 𑐖𑑂𑐫𑐵 𑐫𑐵𑐫𑐾𑐐𑐸 𑐰𑐵 𑐡𑐾𑐳𑐫𑑂 𑐐𑐧𑐮𑐾𑑄 𑐡𑐸𑐴𑐵𑑄 𑐴𑐾 𑐩𑐰𑐫𑐾𑐐𑐸 𑐥𑑂𑐬𑐧𑐺𑐟𑐶 𑐣𑑄 𑐀𑐥𑑂𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐀𑐠𑐾 𑐩𑐫𑐵𑐳𑐾 𑐗𑐷𑐳𑑄 𑐥𑐶𑐣𑑄 𑐖𑑂𑐘𑐵𑐣 𑐎𑐫𑐵𑑅 𑐣𑑄 𑐠𑐣 𑐠𑑅𑐐𑐸 𑐱𑐶𑐎𑑂𑐲𑐵 𑐳𑐷𑐥 𑐕𑑂𑐫𑐮𑐾𑐐𑐸 𑐰𑐵𑐟𑐵𑐰𑐬𑐞 𑐔𑐹𑐮𑐵𑐎𑐾𑐩𑐵𑑅𑐐𑐸 𑐏𑐣𑐾𑐡𑐸 𑑋