𑐰𑐬𑐶𑐲𑑂𑐛 𑐩𑐔𑐵 𑐳𑐵𑐴𑐶𑐟𑑂𑐫𑐎𑐵𑐬 𑐱𑐵𑐣𑑂𑐟𑐡𑐵𑐳𑐫𑐵 𑐮𑐸𑐩𑐣𑑂𑐟𑐶𑐂 𑐩𑐔𑐵 𑐳𑐵𑐴𑐶𑐟𑑂𑐫 𑐢𑐾𑑄𑐢𑐾𑑄𑐧𑐮𑑂𑐮𑐵𑑅

𑐣𑐵𑑄𑐖𑐵𑑅𑐩𑑂𑐴 𑐰 𑐰𑐬𑐶𑐲𑑂𑐛 𑐩𑐔𑐵 𑐳𑐵𑐴𑐶𑐟𑑂𑐫𑐎𑐵𑐬 𑐱𑐵𑐣𑑂𑐟𑐡𑐵𑐳 𑐩𑐵𑐣𑐣𑑂𑐢𑐬𑐫𑐵 𑐮𑐸𑐩𑐣𑑂𑐟𑐶𑐂 ‘𑐩𑐔𑐵 𑐳𑐵𑐴𑐶𑐟𑑂𑐫 𑐢𑐾𑑄𑐢𑐾𑑄𑐧𑐮𑑂𑐮𑐵𑑅 𑐎𑐵𑐳𑐵’ 𑐎𑐵𑐳𑐵𑐫𑑂 𑐄𑐟𑑂𑐎𑐺𑐲𑑂𑐚 𑐖𑐹𑐥𑐶𑑄 𑐱𑐣𑐶𑐰𑐵𑑅 𑐖𑐹𑐐𑐸 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑑅𑐐𑐸 𑐡𑐸 𑑋 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑑒𑑓 𑐰𑐜𑐵𑐫𑐵 𑐐𑑂𑐰𑐳𑐵𑐮𑐫𑑂 𑐩𑐴𑐵𑐣𑐐𑐬𑐰𑑂𑐫𑐵𑐥𑐷 𑐳𑐵𑐴𑐶𑐟𑑂𑐫 𑐢𑐾𑑄𑐢𑐾𑑄𑐧𑐮𑑂𑐮𑐵𑑅 𑐖𑐹𑐐𑐸 𑐏𑑅 𑑋

𑐎𑐵𑐳𑐵𑐫𑑂 𑐄𑐟𑑂𑐎𑐺𑐲𑑂𑐚 𑐧𑑂𑐰𑑃𑐩𑐶𑐥𑐶𑑄𑐟 𑐩𑐹𑐥𑐵𑐴𑐵𑑄 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐄𑐥𑐥𑑂𑐬𑐩𑐸𑐏 𑐳𑐸𑐣𑐶𑐟𑐵 𑐜𑑄𑐐𑑀𑐮𑑄 𑐡𑐳𑐶𑐥𑑁 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅𑐳𑐵 𑑒𑑓 𑐰𑐜𑐵𑐀𑐢𑑂𑐫𑐎𑑂𑐲 𑐩𑐔𑐵𑐬𑐵𑐖𑐵 𑐩𑐴𑐬𑑂𑐖𑐣𑑄 𑐡𑐵𑑄 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋 𑐀𑐠𑐾 𑐴𑐾 𑐣𑐶𑐬𑑂𑐞𑐵𑐫𑐎𑐩𑐞𑑂𑐜𑐮𑐫𑐵 𑐥𑑂𑐬𑐩𑐸𑐏 𑐬𑐩𑐾𑐱𑐎𑐵𑐖𑐷 𑐳𑑂𑐠𑐵𑐥𑐶𑐟𑑄 𑐏𑐵𑐡𑐵 𑐎𑑂𑐰𑐏𑐵𑐫𑐾𑐎𑐵𑐡𑐷𑐐𑐸 𑐏𑑅 𑑋

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑑒𑑓 𑐰𑐜𑐵𑐫𑐵 𑐥𑐸𑐮𑐵𑑄𑐩𑑂𑐴 𑐰𑐜𑐵𑐀𑐢𑑂𑐫𑐎𑑂𑐲 𑐟𑐎𑑄 𑐖𑐸𑐫𑐵𑐡𑐷𑐩𑑂𑐴 𑐰𑐬𑐶𑐲𑑂𑐛 𑐩𑐔𑐵 𑐳𑐵𑐴𑐶𑐟𑑂𑐫𑐎𑐵𑐬 𑐩𑐵𑐣𑐣𑑂𑐢𑐬𑐫𑐵 𑐮𑐸𑐩𑐣𑑂𑐟𑐶𑐂 𑐖𑐹𑐐𑐸 𑐫𑐾𑑃 𑐩𑐴𑐵𑐣𑐐𑐬𑐰𑑂𑐫𑐵𑐥𑐷 𑐩𑐔𑐵 𑐳𑐵𑐴𑐶𑐟𑑂𑐫 𑐢𑐾𑑄𑐢𑐾𑑄𑐧𑐮𑑂𑐮𑐵𑑅 𑐎𑐵𑐳𑐵𑐫𑑂 𑐩𑐴𑐵𑐣𑐐𑐬 𑐡𑐸𑐣𑐾𑐫𑐵 𑐳𑐵𑐩𑐸𑐡𑐵𑐫𑐶𑐎 𑐰 𑐣𑐶𑐖𑐷 𑐰𑐶𑐡𑑂𑐫𑐵𑐮𑐫𑐫𑐵 𑑕𑑐 𑐐𑐹 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐧𑑂𑐰𑐣𑐾𑐎𑐸𑐠𑐶𑐫𑐵 𑑔𑑐𑑐 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐧𑑂𑐰𑑃𑐩𑐶𑐥𑐶𑑄𑐳𑑄 𑐧𑑂𑐰𑐟𑐶 𑐎𑐵𑑅𑐐𑐸 𑐏𑑅 𑑋

𑐟𑐐𑐶𑑄 𑑖 𑐰 𑑗 𑐰 𑐟𑐐𑐶𑑄 𑑘 𑐰 𑑙 𑐫𑐵𑐣𑐵𑑅 𑐣𑐶𑐐𑐹 𑐥𑐸𑐔𑐮𑐫𑑂 𑐣𑐾𑐥𑐵𑐮𑐨𑐵𑐲𑐵 𑐰 𑐏𑐳 𑐣𑐾𑐥𑐵𑐮𑐷 𑐨𑐵𑐳𑑄 𑐣𑐶𑐐𑐹 𑐣𑐶𑐐𑐹 𑐱𑐷𑐬𑑂𑐲𑐎𑐫𑑂 𑐔𑑂𑐰𑐏𑑃 𑐰 𑐔𑐶𑐣𑐵𑐏𑑃 𑐰𑐶𑐢𑐵𑐫𑑂 𑐄𑐐𑐸 𑐎𑐵𑐳𑐵 𑐖𑐹𑐐𑐸 𑐏𑑅 𑑋 𑐎𑐵𑐳𑐵𑐫𑑂 𑑘 𑐰 𑑙 𑐟𑐐𑐶𑑄𑐫𑐵 𑐳𑐩𑐹𑐴𑐫𑐵 𑐔𑑂𑐰𑐏𑑃 𑐎𑐵𑐳𑐵𑐫𑑂 𑐱𑑂𑐬𑐾𑐫𑐵 𑐥𑐬𑐵𑐖𑐸𑐮𑐷 (𑐦𑑂𑐫𑐸𑐔𑐮 𑐳𑑂𑐚𑐵𑐬 𑐂𑑄𑐐𑑂𑐮𑐶𑐱 𑐳𑐾𑐎𑐾𑐣𑑂𑐜𑐬𑐷 𑐳𑑂𑐎𑐸𑐮, 𑐟𑐐𑐶𑑄 𑑘) 𑐣𑑂𑐴𑐵𑐥, 𑐥𑑂𑐬𑐎𑐺𑐟𑐶 𑐔𑑁𑐴𑐵𑐣 (𑐰𑐶𑐖𑐾𑐱𑑂𑐰𑐬𑐷 𑐖𑑂𑐘𑐵𑐣𑐩𑐣𑑂𑐡𑐶𑐬 𑐳𑐿𑐣𑐶𑐎 𑐩𑐴𑐵𑐰𑐶𑐡𑑂𑐫𑐵𑐮𑐫, 𑐟𑐐𑐶𑑄 𑑙) 𑐮𑐶𑐄, 𑐳𑐩𑑂𑐥𑐡𑐵 𑐠𑐵𑐥𑐵 (𑐱𑑂𑐬𑐷 𑐬𑐟𑑂𑐣𑐬𑐵𑐖𑑂𑐫 𑐩𑐵𑐰𑐶, 𑐟𑐐𑐶𑑄 𑑘) 𑐮𑐶𑐄 𑐰 𑐎𑐖𑐣𑐵 𑐱𑑂𑐬𑐾𑐲𑑂𑐛 (𑐖𑐐𑐟𑐳𑐸𑐣𑑂𑐡𑐬 𑐧𑑂𑐰𑐣𑐾𑐎𑐸𑐠𑐶, 𑐟𑐐𑐶𑑄 𑑘) 𑐴𑑅𑐥𑐵𑑅 𑐳𑐶𑐬𑐥𑐵𑑅 𑐟𑑂𑐫𑐵𑐎𑐵𑐡𑐷𑐐𑐸 𑐏𑑅 𑑋

𑐠𑐸𑐐𑐸 𑐴𑐾 𑐳𑐩𑐹𑐴𑐫𑑂 𑐔𑐶𑐣𑐵𑐏𑑃 𑐰𑐶𑐢𑐵𑐫𑑂 𑐳𑐡𑑂𑐨𑐵𑐰 𑐖𑑂𑐘𑐰𑐵𑐮𑐷 (𑐖𑑂𑐘𑐵𑐣𑑀𑐡𑐫 𑐩𑐵.𑐰𑐶, 𑑘) 𑐣𑑂𑐴𑐵𑐥, 𑐀𑐘𑑂𑐖𑐮𑐷 𑐐𑐸𑐥𑑂𑐟𑐵 𑐀𑐣𑐶𑐱 𑐰𑐶𑐲𑑂𑐚 (𑐟𑐐𑐶𑑄 𑑙) 𑐮𑐶𑐄, (𑐱𑑂𑐬𑐷 𑐩𑐴𑐵𑑄𑐎𑐵𑐮 𑐩𑐵𑐰𑐶𑑄, 𑑙) 𑐮𑐶𑐫𑐵𑑄𑐮𑐶𑐄 𑐳𑐰𑐶𑐣𑐵 𑐣𑑂𑐫𑑁𑐥𑐵𑐣𑐾 (𑐱𑐵𑐣𑑂𑐟𑐶 𑐣𑐶𑐎𑐸𑐘𑑂𑐖 𑐩𑐵.𑐰𑐶, 𑑙) 𑐴𑑅𑐥𑐵𑑅 𑐳𑐶𑐬𑐥𑐵𑑅 𑐟𑑂𑐫𑐵𑐎𑐮 𑑋

𑐟𑐐𑐶𑑄 𑑖 𑐰 𑑗 𑐫𑐵 𑐳𑐩𑐹𑐴𑐫𑑂 𑐔𑑂𑐰𑐏𑑃 𑐰𑐶𑐢𑐵𑐫𑑂 𑐳𑐥𑐣𑐵 𑐱𑑂𑐬𑐾𑐲𑑂𑐛 (𑐱𑑂𑐬𑐷 𑐩𑐴𑐵𑑄𑐎𑐵𑐮 𑐩𑐵.𑐰𑐶., 𑑗) 𑐣𑑂𑐴𑐵𑐥, 𑐁𑐊𑐱𑐵 𑐏𑐵𑐟𑐸𑐣 (𑐣𑐾𑐥𑐵𑐮 𑐫𑐸𑐰𑐎 𑐳𑑂𑐎𑐸𑐮, 𑑖) 𑐮𑐶𑐄, 𑐎𑐬𑐸𑐞𑐵 𑐣𑐾𑐥𑐵𑐮 (𑐎𑐣𑑂𑐫𑐵 𑐩𑐣𑑂𑐡𑐶𑐬 𑐩𑐵. 𑐰𑐶., 𑑗) 𑐮𑐶𑐫𑐵𑑄𑐮𑐶𑐄 𑐰 𑐫𑐸𑐰𑐬𑐵𑐖 𑐱𑐵𑐴 (𑐖𑐣𑐎𑐮𑑂𑐫𑐵𑐞 𑐩𑐵.𑐰𑐶., 𑑖) 𑐴𑑅𑐥𑐵𑑅 𑐳𑐶𑐬𑐥𑐵𑑅 𑐟𑑂𑐫𑐵𑐎𑐵𑐮 𑑋 𑐀𑐠𑐾 𑐴𑐾 𑐔𑐶𑐣𑐵𑐏𑑃 𑐰𑐶𑐢𑐵𑐫𑑂 𑐣𑐶𑐨𑐵 𑐱𑑂𑐬𑐾𑐲𑑂𑐛 (𑐖𑐐𑐟𑐳𑐸𑐣𑑂𑐡𑐬 𑐧𑑂𑐰𑐣𑐾𑐎𑐸𑐠𑐶, 𑑖) 𑐣𑑂𑐴𑐵𑐥, 𑐴𑐶𑐬𑐵 𑐎𑐸𑑃𑐰𑐬 (𑐬𑐟𑑂𑐣𑐬𑐵𑐖𑑂𑐫 𑐩𑐵.𑐰𑐶., 𑑗) 𑐮𑐶𑐄, 𑐧𑐶𑐮𑑂𑐎𑐶𑐳 𑐏𑐵𑐟𑐸𑐣 (𑐎𑑄𑐎𑐾𑐱𑑂𑐰𑐬𑐷 𑐁𑐢𑐵𑐬𑐨𑐹𑐟 𑐰𑐶𑐡𑑂𑐫𑐵𑐮𑐫, 𑑗) 𑐮𑐶𑐫𑐵𑑄𑐮𑐶𑐄 𑐰 𑐳𑐸𑐲𑑂𑐩𑐵 𑐩𑐵𑐗𑐷 (𑐱𑐵𑐣𑑂𑐟𑐶 𑐣𑐶𑐎𑐸𑐘𑑂𑐖 𑐩𑐵.𑐰𑐶., 𑑖) 𑐴𑑅𑐥𑐵𑑅 𑐳𑐶𑐬𑐥𑐵𑑅 𑐟𑑂𑐫𑐵𑐎𑐾𑐟 𑐟𑐵𑑅𑐮𑐵𑑅𑐐𑐸 𑐏𑑅 𑑋

 

𑐎𑐵𑐳𑐵𑐫𑑂 𑐣𑑂𑐴𑐵𑐥𑐫𑐵𑐟 𑐗𑐶𑐡𑑂𑐰𑑅, 𑐮𑐶𑐄𑐫𑐵𑐟 𑐣𑑂𑐴𑐫𑑂𑐡𑑂𑐰𑑅, 𑐮𑐶𑐫𑐵𑑄𑐮𑐶𑐄𑐫𑐵𑐟 𑐣𑑂𑐫𑐵𑐡𑑂𑐰𑑅 𑐰 𑐴𑑅𑐥𑐵𑑅𑐫𑐵𑐟 𑐗𑐶𑑄𑐣𑑂𑐫𑐵𑐳𑑅 𑐟𑐎𑐵 𑐡𑐵𑑄 𑐳𑐶𑐬𑐥𑐵𑑅𑐮𑐶𑐳𑐾𑑄 𑐡𑐳𑐶𑐥𑑁 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐄𑐟𑑂𑐎𑐺𑐲𑑂𑐚 𑐖𑐸𑐫𑐵𑐡𑐷𑐥𑐶𑑄 𑐳𑐎𑐮𑐾𑑄 𑐧𑑂𑐰𑑃𑐩𑐶𑐥𑐶𑑄𑐳𑑄 𑐠𑑅𑐠𑑅𑐐𑐸 𑐬𑐔𑐣𑐵 𑐣𑑄 𑐥𑐵𑐛 𑐫𑐵𑑅𑐐𑐸 𑐏𑑅 𑑋

𑐰𑐜𑐵𑐀𑐢𑑂𑐫𑐎𑑂𑐲 𑐩𑐔𑐵𑐬𑐵𑐖𑐵 𑐩𑐴𑐬𑑂𑐖𑐣𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑑒𑑓 𑐰𑐜𑐵𑐫𑐵 𑐣𑐶𑐩𑐶𑐟𑑂𑐟 𑐳𑐔𑐶𑐰 𑐬𑐘𑑂𑐖𑐸 𑐱𑑂𑐬𑐾𑐲𑑂𑐛𑑄 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐏𑑅𑐳𑐵 𑐰𑐜𑐵 𑐳𑐡𑐳𑑂𑐫𑐮𑐶𑐳𑐾𑑄 𑐖𑑂𑐫𑐵𑐗𑑂𑐰𑑅𑐫𑐵 𑐎𑐖𑐶 𑐳𑐸𑐬𑐾𑐱 𑐩𑐵𑐣𑐣𑑂𑐢𑐬𑑄 𑐎𑐵𑐳𑐵𑐫𑐵 𑐧𑐵𑐬𑐾 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐣𑐶𑐬𑑂𑐞𑐵𑐫𑐎𑐩𑐞𑑂𑐜𑐮𑐫𑐞 𑐥𑑂𑐬𑐩𑐸𑐏 𑐬𑐩𑐾𑐱𑐎𑐵𑐖𑐷 𑐳𑑂𑐠𑐵𑐥𑐶𑐟𑑄 𑐣𑐶𑐬𑑂𑐞𑐫 𑐥𑑂𑐬𑐎𑑂𑐬𑐶𑐫𑐵𑐫𑐵 𑐧𑐵𑐬𑐾 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐳𑐾𑑄 𑐳𑐶𑐬𑐥𑐵𑑅 𑐟𑑂𑐫𑐵𑐎𑐵𑐡𑐷𑐥𑐶𑑄 𑐧𑑂𑐰𑑃𑐩𑐶𑐥𑐶𑐣𑐶𑐐𑐸 𑐣𑐵𑑄 𑐑𑑀𑐲𑐞𑐵 𑐫𑐵𑐣𑐵𑐡𑐷𑐐𑐸 𑐏𑑅𑐳𑐵 𑐣𑐶𑐬𑑂𑐞𑐵𑐫𑐎𑐩𑐞𑑂𑐜𑐮𑐫𑐵 𑐡𑐸𑐖𑑅 𑐥𑐹𑐬𑑂𑐞𑐶𑐩𑐵 𑐜𑑄𑐐𑑀𑐮 𑐱𑐵𑐎𑑂𑐫𑑄 𑐰𑐬𑐶𑐲𑑂𑐛 𑐩𑐔𑐵 𑐳𑐵𑐴𑐶𑐟𑑂𑐫𑐎𑐵𑐬 𑐩𑐵𑐣𑐣𑑂𑐢𑐬𑐫𑐵 𑐖𑐷𑐰𑐣𑐷 𑐧𑐵𑐬𑐾 𑐎𑐣𑐵𑐡𑐷𑐐𑐸 𑐏𑑅 𑑋

courtsey : www.nepalbhasatimes.com